أثرياء الحرب ... وأثرياء الكرب ..!!

[achnaton]

5]بسم الله الرحمن الرحيم

من شوية صحانى تليفون عاجل من اخونا المهندس وائل .. قوم بسرعة احمد عز فى الفضائية .. ورغم تعبى قمت وحولت القناة الى القناة الفاضية المصرية .. وندمت جدا ان رجلى وارمه ويدوب بتدخل فى الشبشب الازرق زى اللى كان لابسه بشبوش فى سيناريو العزيز ابو عمر الشهير ب س.س. عندما استقبل صديقنا جيمى فى الفجر .. ومش قادر البس جزمه زى طلعت السادات !!

انا ندمت جدا انى ضيعت بعض الوقت فى سماع هذا الرجل .. فهو يتصور مثل اسياده ان المشاهد " حمار " وكان نفسى ارفسه .. لكن إزاى ؟؟

المهندس عز .. أعز الله شعب مصر .. فكرنى بأيام زمان .. واللى حصل للمعلم كرشه بتاع المدبح اللى اثرى ثراء فاحش من توريد اللحوم وباقى المواد الغذائية لجنود الاحتلال الانجليزى .. وقد اطلقوا عليه وعلى امثالة " غنى حرب " .. وهو وصف او لقب فى ايامنا هذه لا يجوز للطفرة الالكترونية ..ولا يمكن استخدامه لكن ممكن نقول على امثال السيد عز اللقب الجديد له ولامثاله " غنى كرب " والفرق بين "غنى الحرب " و " وغنى الكرب " مش كبير فقط زمان كان المعلم كرشه ,والمعلم على عوض اللى كان حول عربته الكارو الى كاميون بيدور بالسولار لينقل غذاء الشعب وكان الخير كتير لعساكر الانجليز مقابل الاسترلينى .. بيعتبرنا بنى آدمين .. وغنى الكرب الحالى .. الكرب ده الذى ساقوا اليه شعب المحروسة وقلبوا ايامه وحياته الى كرب الكرب .. بيعتبرنا حمير .. زمان كان غنى الحرب بياخذ اكلنا ويعطيه لجنود الاحتلال ويساعدهم فى التمتع بخيرات المحروسة مقابل المال .. أما الباشا العلامه الاقتصادى " غنى الكرب " والخبير الصناعى فقد عمل خميرة بالبلايين خلال ست سنين .. بيفسر ده بقى على الشاشة الفضية ان مفيش آى دوله فى العالم فرضت على الحديد المصرى بتاع العز آية ضرائب اغراق .. و سعره أقل من اسعار آى دوله بخمسين دولار .. وانه على الشعب المصرى ان يحمد الله ويشكر السيد عز ان سعر الطن الذى تعدى الثلاثة آلاف جنيه لسه برضه اقل من اسعار الدول الاخرى وقدم احصائية .. ولضيق الوقت .. ولتعبى .. فيه كلمتين واقفين فى حلقى .. حا اقولهم وأجرى على الله .. عاوز اقول لعز .. اتق الله .. مش كل مشاهد حمار .. ولا كل مستمع .. تلميذ فى روضة الاطفال .. لما يقارن سعر الحديد الانتاج المصرى بسعر الحديد فى السعودية او الاسواق الخارجية فلابد ان تكون هذه المقارنه بامانه وعلى اسس صحيحة..ودراسة متكامله صحيح سعر الطن فى اوربا الشرقية او الغربية او حتى فى الدول العربية يقارب سعره الحالى فى مصر السعر الذى فرضه عز على السوق ونهب اموال المصريين وسبب مشاكل فى كثير من الصناعات .. وعاوز أسأله .. هل يدفع أجر للعامل كما تدفع المصانع المثيلة فى البلدان الذى استشهد بغلاء الاسعار فيها .. فى البلاد دى يا سيد عز اجر العامل الشهرى فى المتوسط وللعامل العادى يعنى مش اوسطى او مساعد مهندس او مهندس .. حوالى 1500يورو .. فى 7 جنيه يا سيد عز = 10500 جنيه فكم تدفع حضرتك للعامل بمصانع عز بالدخيلة .. ؟؟ فى هذه البلاد يا سيد عز الكيلووات كهرباء يتعدى ال 3 يوروا يعنى حوالى 21 جنيه فى اقل دوله .. بتدفع حضرتك كام يا سيد عز .. اقل مهندس او كيماوى بهذه المصانع الخارجية مرتبه الشهرى لا يقل عن خمسة آلاف يوروا .. يعنى 35الف جنيه فى الشهر .. فياترى المهندس عندك مرتبه كام ؟؟ سعر نقل الطن للكيلومتر الواحد !! هل تدفع مثله يا سيد عز .. إزاى نقارن وانت راجل بتقول انك خبير .. ؟؟ وبعدين .. بتقارن ارتفاع اسعار الحديد بتاع حضرتك وارتفاع ثمن الرز والفول .. والسكر ..طيب ياريت تفسر لنا العلاقة بين الحديد والفول الذى انقرض من مصر .. ومن فضلك لا تتكلم عن الصلب ؟؟ خلينا كده فى حديد التسليح !!

الكلام اللى يتقوله ده يا سيد عز يدين ادانه كاملة للفشل الخايب لحكومات النظام الكاكى بتاع المماليك الجدد .. فى تطوير الزراعة فى المحروسة !! طبعا انت قاعد فوق فى الحزب وبتفخر انك بدأت فيه من اول السلم .. طب قول لنا ليه انحسر انتاج السكر عندنا .. ومين اللى امر بقطع قصب السكر فى آلاف الافدنه فى الصعيد .. او تفضل كده واشرح لنا كم مصنعا لانتاج السكر تم انشائها فى عهد العسكر .. بلاش .. قول لنا حضرتك التجديدات او الصيانه التى تمت فى اكبر مصنع فى نجع حمادى .. مر كده عليه بصفتك ضمن طاقم خبراء تخريب الاقتصاد فى الحزن الوطنى.. حتلاقى نفس الحاله منذ اكثر من نصف قرن .. يا راجل ده حتى وسيله نقل القصب من الغيط للمصنع ساءت وتخلفت .. نتكلم عن الفول مسمار البطون لابناء مصر الغلابا .. { يا ترى بتفطر كام ملرة فى السنة فول } طب احنا كنا بنصدرة للعالم تحت اسم الشهرة " الفول المكموره " راحت فين مكامر المنيا والصعيد .. انت بتقارن الزيادات المفعتله من احكتار سيادتك لحديد التسليح بمساعده القوانين الهزيلة والنفوس الشرهة .. بزيادة اسعار منتجات زراعية زى ارتفاع اسعار الفول والرز والسكر .. محاصيل قضيتم انتم وحكوماتكم عليها ..

شوف يا سيد عز .. الهجص اللى انتم بتروجوه ده وانتم متصورين ان الشعب بيهضمه بسهولة .. تبقى واهم .. فالاقمار الصناعية جعلتنا نعيش معكم دقيقة بدقيقة بل وثانية بثانية واذا كان سماره ابو زمارة نجح زمان فى ترويج هذه الاقوال .. فدى اصبحت موضة قديمة لا تصلح .. قديمه يا عز .. الشعب اللى حضرتك رفعت اسعار الشقق برفع سعر حديد التسليح ومش لا قى شقة النهارده يسكن فيها عاوز يسترد ال 40 مليار المنهوبين منه .. حتى لو هربتهم للصين !! حيرجوا لاصحابهم .. واطلع حضرتك او ذاكر القوانين الدولية الجديده .. من حق اى حكومه ان تسترد من بنوك العالم ما سربه اليها البعض من اموال الشعوب .. حكم واحد من قاضى عادل يلزم آى دوله برد ما اودع بها من مال الشعوب .. وهانت !! عندنا فى مصر لسه فيه قضاه شرفاء ..

وكفاية كده تعبت

تم تعديل 13 يونيو 2006 بواسطة achnaton

[Abofady]

يعنى الراجل مطلعش خبير ولا حاجه ................. يظهر انه خابور .. وسلامة رجلك يا استاذنا

[achnaton]

بسم الله الرحمن الرحيم

كلام السيد الخبير فى رفع اسعار الحديد واستنزاف مال الغلابا اهل المحروسة فى القناة الفضائية امبارح بيثير كثير من التساؤلات .. فكم دفع مثلا فى حديد الدخيلة واستولى عليها وبدل ما تصب فروق الاسعار فى حديد التسليح واللى كان المفروض تصب فى خزينة الشركة الوطنية فى الدخيله .. صبت وبالقوانين التفصيل فى جيوب الجميل .. احد المواقع على النت بتدعى ان حضرته فلسطينى الجنسية .. ودخل مجلس الشعب ببطاقة شخصية مصرية .. وازاى حصل على مثل هذه البطاقة ؟؟ دى هى الفزورة !! وحاليا مش مهم حلها فالراجل وصل الى قمة الهرم الاجتماعى .. ويقال انه رغم تحويشة الست سنوات الاربعين مليار ..!! سالف من البنوك المصرية اربعة او خمسة مليار عاوزين نسأل اهل العلم والعارفين .. صحيح حكاية القروض دى .. ولا دى اشاعة ؟؟ واذا كان فعلا صحيح وشركاته مقترضه فعلا من البنوك .. فكم قيمة القرض وكم قيمة الفائدة اللى بيدفعوها للبنوك .. خاصة وانه امبارح ذكر انه مشارك بنك مصر ؟؟ فياترى ايه الحكاية ممكن حد يوضح لنا هذه الفوزاير .. ؟؟

تم تعديل 13 يونيو 2006 بواسطة achnaton