الصيف داخل .. لو عربيتك سخنت هاتعمل إيه؟

[عصام]

الصيف داخل .. وكلنا معرضين ان العربية تسخن مننا سواء فى طريق زحمة أو فى طريق سريع .. ما فكرتش لو اتحطيت فى الموقف دا هاتعمل إيه؟ :wub: .. على الأقل لحد ما توصل لميكانيكى ..

إذا ارتفعت درجة حرارة السيارة عن الحدود المعقولة فإن ذلك يتسبب بالتأكيد فى تلف وش السلندر .. حاجة كدا يعنى زى "نص عمرة" .. يعنى مصيبة :D

طيب فيما يلى هاحاول ألخص شوية إرشادات على هيئة نقاط لتلافى الوصول لتكل المرحلة .. يعنى بما يتيح لك السير بالسيارة إلى أقرب ميكانيكى فى حدود درجة الحرارة المعقولة .. ويللا أهو اللى عند الله ما بيروحش :lol:

لو لاحظت ارتفاع درجة الحرارة عن المعدل العادى ...

1. شغل التكييف السخن على أعلى درجة وأعلى مروحة .. :blink: طبعا هاتقولوا الراجل دا مش فاهم حاجة .. لأ فاهم أقولك ليه .. لأن التكييف السخن بتاع العربية بيعتمد على على نقل الحرارة الخارجة من الرادياتير (الميرد اللى فيه الميه السخنة جدا) إلى داخل السيارة وبتشغيل التكييف السخن بنسحب جزء من تلك الحرارة إلى داخل السيارة مما يتسبب بالتبعية فى انخفاض درجة حرارة المبرد وبالتالى المحرك ..

يــٌتبع

(ملحوظة: أنا مش ميكانيكى .. هما شوية قراية وشوية هواية وشوية فك وتركيب وشوية ... إلخ)

[عصام]

--------------------------------------------------------------------------------------------------------

على فكرة النصايح دى مش لازم تتعمل كلها فى نفس الوقت :wub: .. يعنى إختار منها اللى يناسب حالتك .. وما تسألنيش ازاى لأنى ماعرفش حالتك ومش هاكون جنبك لما العربية تسخن :lol:

2. إنقل الجير على نقلة أقل .. يعنى إمشى على التانى مثلا .. ولو عربيتك أوتوماتيك زى س س كدا حط الجير فى D2 ليييييه؟ أقولك

لأن لما بيكون الجير على نقلة أقل بتكون دورة المياه فى المحرك أسرع وكلما زادت النقلة (تالت أو رابع) كلما قلت سرعة تدفق المياه فى لمحرك مما يعنى بالتبعية تبريد أبطأ ..

3. لو الطريق زحمة جدا .. وبيمشى ببطء .. جرب إنك تضع الجير فى المور كلما استطعت (Neutral)

[yasovinas]

:o ورحمة خالتي نزاكه انت شكلك ميكانيكي مراجيح :wub: يعني في عز الحر والدنيا نار والشارع مقفول والسيارة بتسخن اقوم انا مشغل المكيف السخن علشان السيارة تبرد شوية وانا اولع يعني :o

وبعدين اديها غيار عكسي علشان لفات الموترو اللي كانت سريعه تتحول الى اللفات البطيئة فجأة والفكرة برضه ان دورة المياه تزيد ومش مهم الكرنك اللي اتشقلب حالة جوة الموتور ؟؟؟؟ :D

طيب يعني مش الاول تقترح على سواقين الطارة :blink: اللي بتحكيلهم دول ان اول حاجه يعملها يتاكد من مياة الريداتير او انه يزود مياة في قربة الراجع بتاعة الريداتير

لا حظل خير ،،،،،عظل غييييييييرررررر ظعيع :lol:

[عصام]

شوف يابنى .. أنا علشان فرق السن اللى بينك وبينك مش هانفعل عليك .. :P

الكلام دا كله بافتراض ان العربية سخنت .. يعنى على وشك تجيب وش سلندر .. :D لو إحساس حضرتك بالحر أهم عندك من وش سلندر العربية ما تبقاش تعمل كدا .. :blink:

يا ياسو يابنى أنا اقصد ان لو العربية سخنت "جامد" شغل التكييف السخن وطبعا "البديهى" (واخد بالك انت؟) :unsure: إنك هاتفتح الشباك لو الجو حر طبعا يعنى .. وبعدين تستحمل شوية لحد ما توصل لميكانيكى أو لحافة جبل علشان ترميها وتخلص منها ..

أما بقى موضوع الغيار العكسى دا فأنا مش فاهمه !! :P

مين يا حبيبى جاب سيرة غيارات .. عكسية .. :P

أنا باقول إتك تمشى بالراحة (على التانى) ما قولتش انك تبقى على الخامس مثلا وأول ما تلاقى العربية سخنت تقوم هووووووووووب نازل أولانى .. !!

كدا مش هاتلحق وش سلندر ولا حتى هايفضل لك منها سير للذكرى !! :D

أما بقى موضوع الميه دا فعندك حق فيه .. :blink: أصلى افتكرته يعنى من الأساسيات اللى مفروغ منها اتك أول ما تطمن تطمن على الميه .. لكن وبما إنك طلعت من سواقين الطارة .. يبقى هافصصهالك المداخلة الجاية .. ولا تزعل ..

قــٌدام عجلة بقى علشان عايز اركن .. :blink:

[عصام]

طبعا الكلام اللى فوق دا كله لو افترضنا إنك مش عارف أساسا العربية بتسخن ليه .. لكن أول شيء لازم تتأكد منه بشكل عام هو مستوى المياه فى الرادياتير .. طيب هاتقولى ما هو سخن جدا .. افتحه إزاى؟ :P

أقولك .. بعد ما تركن على جنب .. وتفتج غطاء المحرك .. صب ماء بارد على "جانبى وأعلى" الرادياتير .. والخطأ الشائع ان الناس بتصب الماء عليه من الأمام ومن الخلف .. ليه بقى على جانبيه واعلاه؟ .. لأن كل الماء المصبوب من الأمام والخلف ينزل مباشرة إلى الأرض .. بدون المرور داخل جسم الرادياتير.. أما صب الماء على الأجناب والأعلى بيتيح له المرور على مساحة أكبر من السطح الساخن.

بعد كدا تجيب فوطة .. وتطبقها أربعة أرباع بحيث تكون سميكة وتضعها فوق الغطاء .. وتبدأ فى فته ببطء شديد إلى ان تلاحظ بدء انبعاث البخار المضغوط من داخله .. إنتظر حتى يخرج كل البخار المضغوط ..

بعد ان يخرج كل البخار المضغوك يمكنك فتح الرادياتير تماما لتزويد الماء ..

إياك ثم إياك وتزويد ماء بارد فى الرادياتير بينما المحرك ساخن .. إوعى :P

إذا كانت السيارة ساخنة يلزم تشغيل المحرك أثناء إضافة الماء أو الانتظار حتى يبرد المحرك تمااااااما

إوعى .. وادينى قولت لك اهوه

[عصام]

لو انت على طريق سريع .. وبدأ المحرك يسخن .. أضغط على البنزين .. زود سرعة عربيتك قدر ما استطعت (طبعا بدون حوادث) لأن فى الحالة دى الهواء المصطدم بمقدمة السيارة يمر مباشرة من خلال المبرد ثم غلى المحرك مسببا تبريد سريع ..

أما لو الطريق زحمة زى إشارة أو شارع ماشى بطيء .. حاول تترك مسافة بينك وبين السيارة التى أمامك .. لأن لو المسافة قريبة .. كل الحرارة اللى خارجة من تلك السيارة بيتم سحبها عن طريق مروحة التبريد بتاعة سيادتك .. يعنى بتبرد السخن بالسخن .. أما لو فيه مسافة كافية فدا بيتيح تدفق الهواء البارد إلى داخل المحرك مما يسبب تبريد أسرع

لو عربيتك دفع خلفى .. دا معناه فى الغالب إن مروحة التبريد مرتبطة ميكانيكيا بالمحرك .. يعنى بتحصل على حركتها من خلال سير متصل بالمحرك وليس من مصدر كهربائى زى الدينامو .. إنقل على جير أقل ودوس على البنزين أثناء سيرك بما يتيح لك سماع صوت المحرك (3000 أو 4000 لفة على RPM) لأنك كلما زدت سرعة دوران المحرك كلما بالتبعية زادت سرعة دوران مروحة التبريد كلما تسبب ذلك فى تبريد أسرع للمحرك

ندخل بقى بعد كدا .. على الأسباب اللى ممكن تخلى أى عربية تسخن ..

مش عارف ليه حاسس ان الموضوع مشى معايا بالعكس :P

[yasovinas]

ايوه كده يا اسو باشا انت كده من كفر طهرمس بجد الله ينور قول كمان وفهم اخوانا سواقين الطارة اللي اصلاً مش عارفين يعني ايه ريدياتير

احكي لك على حدوته لذيذه قوي بعد ما اشتريت سيارة شاهين للاولاد في مصر وسافرت لاقيت الصبح بدري تليفون من المدام انا بيني وبينك استغربت وجالي حالة هلع عارف يعني ايه هلع يا اسو سا خويا ولا ما لكش انت في الهلع - الهلع دا يعني تتخض وتشهق وتقول اااااههههه كده يعني - ما علينا خير يا ام العيال قالت لي انا رايحه اوصل العيال المدرسه الصبح - قلت لها طيب الله يقويكي يا ام العيال - قالت ويقويك يا ابو العيال يا طيب - قلت لها والله انت اللي طيبه يا ام العيال - وبعدين حصل لي ارتجاع - في الذاكره مش يعني رجعت اللي في بطني لاء ده معناه اني افتكرت حاجه - فقلت لها اتصلتي بيه ليه يا ام العيال - قالت ما انا حكيلك اهو - قلت لها طيب احكي يا ام العيال اصل التليفون بيشتغل بالبرسيم - قالت لي وانا رايحه اوصل العيال وبعد ما نزلت محمد عند مدرسته - ايوه اصل انا عندي محمد في مدرسه ومرح في مدرسه تانيه - وبعدين رايحه اوصل مرح على مدرستها قامت العجله الخلفيه بنشرت وبعدين فين وفين لما لاقيت واحد ابن حلال وقف علشان يساعدها في تغييرها - ولما فتح شنطة العربيه ما لقيناش الاستبن - هو انت شاري السيارة من غير استبن ؟؟؟؟ - دي ام العيال بتسألني - فرديت عليها وقلت لها لاء يا ام العيال الاستبن موجود في الشنطه بس شيلي الفرش اللي في الارضيه

شوفت بقى يا عم عصام ان في ناس سواقين طارة

[عصام]

طيب أحكيلك انا على حاجة أنأح ... (أول مرة أكتب الكلمة دى :P )

المدام لما ربنا كرمنا وخرجنا من عباءة الــ 128 .. وجبنا عقبال ما اشوفك كدا هيونداى .. :o

ما عرفتش تحط الغيار الخامس الا بعد سنتين .. :wub:

دلوقتى ماشاء الله ما شاء الله عقبال ما اشوفك برضه .. ريحتها خالص .. وجبت لها عربية أوتوماتيك .. :huh:

الشيء الغريب انها أول ما ركبتها علشان تجربها .. حسيت انها محتاسة ومش مركزة وقبل ما تدورها قالت لى :

هو الخامس بتاعها ازاى :P ؟؟

[yasovinas]

يا سلام على الكلام، تصدق بجد اللي قالها ما غلطش (هنَ رحمةً لنا :wub: )

طيب بما انك ذكرت موضوع التوماتيكي توماتيكي عايز اسال البازمهندز الاظتى إسو قريب ونسيب عائلات شل وبترومصر وشريك عائلات ادنوك واينوك واخرون

ما رايكم دام فضلكم في التوماتيكي توماتيكي في مصر يعني هل هو فعال ولا مشاكله كثيرة بسبب الزحام وكثرة الوقوف والحركة البطيئه في شوارع مصر المحروسه

وتفضلوا بقبول فائك الاحطرام والتطبيل

[عصام]

شوف يا رياسة ..

علشان تركب أوتوماتيك فى مصر .. نصيحتى ليك بلاش الكورى ..

غير كدا كلللله زى الفل .. ومشاكله تكاد تكون معدومة طالما بتغير زيت والفلتر فى مواعيدهم ..

المشكلة الوحيدة إن حبايبنا الصنايعية فى مصر المحروسة ما بيفهموش فيه .. لكن بيحاولوا يفتوا .. وهنا تبدأ المشاكل فى الظهور ..

إنما الأتوماتيك مريح جدا جدا .. وأعتقد انه معمول أساسا للمدن اللى زى القاهرة كدا ..

ويمكن عيبه الوحيد إن السحب والتجميع لا يقارن بالفتيس العادة (إلا طبعا لو كان ال CC عالى) .. حيث العادة يتفوق بفارق كبير .. أما دون هذا يا ولدى فهو زى الفل .. بالذات لما تكون ساكن فى 6 أكتوبر وشغلك فى مصر الجديدة :wub: تشعر أد إيه هو اختراع عظيم :wub:

[yasovinas]

طيب واللي ساكن في محرم بيك وشغلة في ابو ظبي :wub:

[عصام]

طيب واللي ساكن في محرم بيك وشغلة في ابو ظبي :wub:

:wub:

mfb:

يابن الإيه يا عفريت .. جامدة ;)