تعددت الاشكال والـ واحدـــــزواج

[yasovinas]

قطعت قلبي معاك

وانا بداري وادور

قولي اعمل ايه وياك

يا ابني ما انا بدور

بدي احكيلك علي فقي قلبي

بدي اشكيلك ماللي مخبي

واقولك على اللي جوزني

واقولك على اللي سهرني

وعزة نفسي منعاني

وعزة نفسي منعاني

ايه يا جدعان الراجل هيتجوز على روحه

انا قلت اعمل له الموضوع ده علشان يحس انه مش لوحده العازب وان العزوبية ليست كلها شر

لكن الظاهر الدوا قلب بالعكس

طيب بص انا هحكي لك على ايام الخطوبة وما فيها يمكن

[Guest النسر المصري]

طب انت عارف ياسي ياسو (حلوة ياسي ياسو.. :closedeyes: .عجباك مش كدة.. <_< ....اكررهالك...ياسي ياسوياسي ياسوياسي ياسوياسي ياسوياسي ياسوياسي ياسوياسي ياسوياسي ياسو)

المهم انت عارف ....انا امبارح فضلت واقف مع اخويا في الشارع قرابة التلاتة ساعات....المهم هو نطح في يمين ...وانا انطح فيه شمال....بالادب طبعا :huh:

المهم الكلام كله كان عن الموضوع بتاعك ده...وان ازاي العزوبيه وحشه وكلام الناس....ولو طول...والمستقبل....والقعدة...والبنات مش وحشة كدة...وووووو الخ الخ

المهم نقطة الحوار اللي مش عاوزة تتحل هي الشيء اللي بفضله دايما اي واحد في اي حد.....يعني العزاب يختلفوا...في اللي أهم حاجة عندو انها تكون بنت عيلة...وفي الل عايزه روشة وعفريتة وشعنونة(مع العتذار للست شعنونة)..وفيه اللي عاوزها تكون معاها شقتها وعربيتها حتى لو وشها حاجة كدة استغفر الله العظيم

انا بقى كانت مشكلتي في اني بادور علي شكلها يكون مقبول بالنسبة لي...يعني لازم أعجب بيها وبجمالها وبشكلها......أكرر أعجب...بس أعجب...مش أحبها

لاني صعب آخد واحدة كدة شكلها مش عاجبني ..... ده مستحيل....لاني انا راجل فنان رسام...بحب الذوق والجمال....دي شغلتي...وهي دي طبيعتي.....عربيتي ليها جو انا حابه ...شقتي كذلك...ومراتي كذلك

في واحد قالهالي حكمة... تلات حاجات ماينفعش فيهم الشراكة ولا الغصب...عربيتك.....بيتك.....مراتك....

فما كان من أخويا إلا انه يعترض ويقول ان الشكل مش مهم (يمكن عشان هو اتجوز واحده قمر...وخلف منها عيال زي القمر اللهم لاحسد)

وقالي انه لو حطيت عشر بنات حلوين قدامك هتعجبك كام واحدة....هيعجبك واحدة او اتنين. بالكتير.....لكن لو اختارت على اساس اخلاقهم وطنشت الجمال...هتختار سبعة او تمانية...(وكأن إن الأخلاق مابقتش مشكله الايام دي...الله يرحمك ياستي )

المهم انه وقفنا عند نقطة ماهاش حل...هو مقتنع بإن الجواز من أي واحدة محترمة وخلاص أحسن من إني ألاقي اللي يعجبني شكلها.....وأنا مقتنع باني لو خطيت الخطوة دي هاندم وقد أكرهها ويمكن يحصل ملايحمده عقباه بعيد عنك

وقعدت اقوله انا مش طالب شروط تعجيزية....كلهم فعلا دلوقتي متعلمين وجامعيين وشهادات....الشهادات بقت تتوزع اكتر من تذاكر الاوتوبيس.....واللي أخلاقهم كويسة هم ربنا بيوفقنا فيهم لاننا المدلله لم نخطيء يوما...أما بصراحة اللي تعجبك...بدي موضوع تاني....وسبق واتقال...الجمال نسبي...وكل واحد وعلى قد بطيخته(مثل من اختراعي).....واحد بيمووت في القصيرة(انا منهم)....والتاني بيعشق السمرا القمحاوية أو الخمرية (انا بعشقق الخمرية)....وغيره هيتجنن على ام شعر كيرلي (زي ماريام فارس)

بس كل واحد منهم له تقاطيع كده هو بيحبها.... ده النوع اللي بيهتم بالناحيه الجماليه......

وفي اللي مش حاطط في باله الشكل ده خالص والمهم فلوسها أو عيليتها....(لاننا كلنا بندور عالأخلاق)

تقدر تقول لي ياسي ياسو...ياسي ياسو/.....ياسي ياسو....ياسي ياسو...ياسي ياسو (اصلي حبيتها خلاص) ياسي ياسو.....ازاي ممكن اتخطى الحاجة الوحيدة اللي تغفرلي اي عيب تاني في الست اللي هتجوزها بجانب أخلاقها....هه ..قولي...ازاي :P

[nancy]

عمرو انا قريت كلامك بس مفهمتش

هى اية الحاجة الوحيدة الى انت عاوز تتخطها

وبعدين ممكن تدينى فكرة عن الطلبات التعجيزية

على فكرة طول ما انت حر وبتتفرج على البنات بتشفهم كلهم حلوين

انما لما تيجى تتجوز بتحس انة مش بالسهولة دى

لانك بتدخل فى مواضيع اعمق

[Guest النسر المصري]

عمرو انا قريت كلامك بس مفهمتش

هى اية الحاجة الوحيدة الى انت عاوز تتخطها

وبعدين ممكن تدينى فكرة عن الطلبات التعجيزية

على فكرة طول ما انت حر وبتتفرج على البنات بتشفهم كلهم حلوين

انما لما تيجى تتجوز بتحس انة مش بالسهولة دى

لانك بتدخل فى مواضيع اعمق

مانا جاوبت يانانسي وقلت اني لازم البنت تكون من نفسي...يعني شكلها يعجبني....

ام الشروط التعجيزية فبتكون حاجات رزلة اوي من نوع.......انا مش هسيب ماما وبابا واروح البلد الغريبة دي مع حد غريببب :huh: ........

او ..نتجوز بس مش هسافر معاك على طول...يعني ست شهور مع بابا وماما...وست شهور معاك

او...مش مهم الفلوس ...المهم الحب...سيبك وارجع بلدك......وبعدين الحمدلله مستوره....يعني انا مش ناقصني حاجة...بابي عاملي فيله ومديني عربية...بس بلاش الكويت دي (بكسر الكاف)

اما المواضيع الأعمق...قهي من المؤكد هيحصل بينا ترابط وكلام سواء كانت حلوة او وحشة.....طب مانخليها في الحلوه وخلاص....هو حرام اتجوز واحده تعجبني ياجماعة......الله....نفسي في المانجا...ومعايا تمنها.....اقوم اشتري بطيخ لييه!!! :P

[yasovinas]

طيب شوف يا ابني يا حبيبي الكلام الخلاصة في موضوع الجوازة

حضرتك ما ينفعش اني اجيب لك عروسة ونانسي تجيب لك وام عبدة تدور لك وحضرتك تقعد على البساط وتختار ست البنات لان ما ينفعش ادورلك بعيونك يعني اشوف لك عروسة بنت ناس وجميله او مقبولة شكلا وموضوعا وفيها كل ما يتمناه اي شاب "عايز يتجوز" ونيجي في الآخر نقول بس ادعوا ربنا وابتهلوا اليه عز وجل ان ياتي شكلها وتقاطيعها على حسب ما يوافق هوا السلطان بهلول

يا عظمة السلطان

انت راجل وهمان

وعايش في التوهان

هاتلك عروسة وارد لبنان

او اطلبها من اليابان

[nancy]

يا ولاد الحلال

عوزين عروسة مانجه وقطة ودلوعة وقصيرة وتعشق الكويت وتموووت فى الغربة

علشان استاذ منجاوى :huh:

اظن اعلان 100/100

[مصرية يعني مصرية]

يا ولاد الحلال

عوزين عروسة مانجه وقطة ودلوعة وقصيرة وتعشق الكويت وتموووت فى الغربة

علشان استاذ منجاوى :huh:

اظن اعلان 100/100

***********************

أنا يا جماعة عندي واحدة.

قصيرة..و تعشق الكويت..وخمرية...وتموت في الغربة

تدفع كام؟

[nancy]

يلا يا سوسو

اديلة عنوانها وخلية يشوفها يمكن تطلع منجى وحلوة وخمرية وقطة وقصيرة وبتحب الغربة وبعد كام يوم تموت فى عمرو نخلص منة ونجوزة

انا مش حزعل لو كانت مش مصرية كلنا عرب يلا يارب تطلع تنفعة

[yasovinas]

واضح قوي يا عمرو ان نانسي اتخنقت منك قوي لدرجة انها تنازلت عن امر دافعت عنه في البداية بشده وببساله وهو ان العروسة تكون مصريه :huh: - ما علينا-

طيب ربنا كريم ويرزقك ببنت الحلال وتدخل بقى معانا في دنيا المخطوبين

الخطوبة يا سادة قالوا "انها فترة تعارف" - الا ان هذه الاشاعه غير صحيحه اطلاقا ؛؛؛؛ فمعرفة اي شخص على حقيقتة تحتاج الى حياة وعشرة حقيقية قائمة بالفعل ؛؛وليست الى ساعات للخروج او اللقاء العاطفي الجميل -

حد منكم هيسألني ويقول "امال ايه هي فترة الخطوبة يا ابو لسانين :o "

اقول لك يا سيدي - الخطوبة من وجهة نظر واحد "بقال" هي الفترة التي يقضيها "كيس الخضروات" المجمده مع "كيس اللحمه" المجمد بعد خروجهما من "الفريزر" ؛؛؛ حتى يذوب "الثلج" ؛؛ ويبدأ الاندماج الحقيقي عندما يصبحان في إناء واحد - وطبعاً يضاف اليهم دائماً شوية ملح وفلفل وعلى نار هادئة !!

اجمل ما في فترة الخطوبة تلك المواقف المضحكة الكوميدية وهي التي تجعل لهذه الايام طعم مختلف وتفتح مجال للمزيد من الحب والتفاهم والاندماج ،،،،، خصوصا عندما تكون كوميديا موقف محرج جداً في وقتها طبعا

وللحديث بقية

[nancy]

شوف باه انا حاكلمك عن فترة الخطوبة الى شفتها عند اصحابى لان مع الحب وفترة الخطوبة بتاعتى كان عندى هم تانى انا وهو ازاى نبنى حياتنا فمكنش عندنا وقت لرسم البنات الى بيتجوزا جواز تقليدى وطبعا مش كلهم دة مش تعميم

البنت لما يكون خطبها حايعدى عليها علشان بخرجوا

فيكون احيانا معاها اخوها الصغير مندوب عن الحرس الاكبرالى هى حماتة

فاول ما يدخل امها تخدة بكل ترحيب اصلة لسة على البر وممكن يخلع فتقعد تضحك معاه وتهزر وتحسسة اى اية انها ست ظريفة

على ما البنت توضب نفسها كانها ريحة فرح وتطلع وشها فى الارض وتسلو وهى باصة الناحية التانية اصلاها بتتكسف اوى اوى

وبعدين تنزل معاه واخوها معاه

وهو ماشى حماتة تقولة يلا بيباى يا حبيبى وتشد بنتها من بالوزتها يعنى خدى بالك واوعى تنسى الى قلتلك علية

فيخرج معاها يتمشوا على البحر شوية قبل ما يروحوا السنيما واخوها يقعد فى النص فى السنيما

فتقولة دة ماما شافة حتة اوضة نوم تجنن عند فلانة وسالنا على المحل طلعت ب15 الف بس تخيل رخيصة ازاى

وما شابة وبعدين يروحوا السنيما

اخوها فى النص تيص له بدلال يعنى بعينك وبعدين وهى خارجة من السنيما يتمشوا ويتفرجوا على المحلات

تقولة ياة الفستان دة جميل اوى ويبقى حلو عليا مش كدة تعالى اقيسة

تقيسة وتسالة راية

وتسال على تمنة فتقلها البياعة 200 جنية تقول بس خلاص انا حاشترية بكرة اجى مع ماما احجزهولى

طبعا العريس يتكسف فيقولها لية ماما انتى حتبقى مراتى لا انا الى لازم اجبهولك فتقولة لا ميصحش

وتلبس وتستنى على ما يحاسب وياخد الكيس فى ايدة زى الشاطر

صح ياياسو ولا انا غلطانة

بالنسبة لعروسة عمرو ولهى الراجل كشف راسة فى كذا موضوع حتى لو مش على موضوعة لما حسيت انة لازم يتجوز وحالتة وصلت لمرحلة متاخرة اوى معدش ينفع فيها انتظار فاةى حد كويس ويكون فية النصيب يلا نجوزة وخلاص

[yasovinas]

نانسي اللي بتحكيه دا مش خطوبة دي توريطه :huh:

اذكر مرة كنت راجع انا وام محمد (مراتي مش ام محمد الغساله :P ) ايام الخطوبة وكنا داخلين على موسم وقال ايه عايزة طقم حلل :P طبعا انا رفضت رفض تام ونوهائي ووقفت وقفة تارخيه لاني يومها حسيت ان اللي يتنازل مرة راح يتنازل كل مرة وكمان لازم افعص لها الصرصار من الاول :o

المهم ما اطولش عليكم - قوقلوا طول - واحنا راجعين وقدام باب شقتهم قابلت في وشي "عادل عبد العزيز" كان زميلي من ايام ثانوي وخالته ساكنه في نفس عمارة نسايبي

طبعا الاستاذ ما صدق شاف المنظر وانا شايل كارتونة الطقم وفتح في الضحك والقهقه وقال لي وهو مش قادر ياخد نفسه من الضحك {شيييل ولسه يا ما هتشييييل}

ما علينا نكمل بعد الفاصل

[مصرية يعني مصرية]

يلا ....يا سو

كمل..........بسرعة...

عنصر التشويق إلي بتعمله يجنن

ولا ليالي الحلمية

تم تعديل 29 أبريل 2006 بواسطة مصرية يعني مصرية

[عصام]

وكمان لازم افعص لها الصرصار من الاول :o

يا سلام .. :huh: إيه الإحساس المرهف دا؟

أفعص لها الصرصار ..

أفعص .. يا ااا سلام

:P

أفعص .. لها .. الصرصار .. :P

[yasovinas]

قبل الخطوبة بثلاثة ايام بالضبط كنت انا وعروستي رايحين نجيب حاجات من المنشية عند هانو الكبير طبعا الاسكندرانيه عارفين المكان - المهم المنطقة دي ايامها كانت موقف للحناطير - لاقيت الهانم بتشبط في ذراعي وبتقول لي ايه رايك نعمل زفة حناطير - والنبي والنبي علشان خاطري - طبعا كووول دا وهي عمالة تشد في ذراعي لما كان هينخلع من مكانه فقلت لها وانا على آري طيب طيب "وبيني وبين نفسي بقول كانت كلمه سودا لما قلت لابوها انا طالب ايد بنتك مش عايزةتسيب ايدي من ساعتها اففففف"

المهم يا سادة انا قلت الكلمه من باب تكبير الدماغ وخلاص ويا دوب على ما فقت من افكاري السودا حول موضوع انا طالب ايد بنتك وبدور على الهانم مش لاقيها قلت والله ولعبت معاك يا واد يا ياسو؛؛؛ وربك راضي عنك وجت طبيعي؛؛ فاكرين حكاية البت اللي اتشقت الارض وبلعتها في اسكندريه- اطلقوا عليها عروس الاسكندريه - قلت اتكررت وهطلع في الجرايد بقى العريس اللي فقد عروسته واكتب قصه حياتي ونعمل شغل ما حصلش - المهم لسه بعد وحلم بالكام الف اللي هقبضهم من بيع القصه اذا بي افوجأ بصوت عارفه ؛؛؛ جميل؛؛؛ عذب؛؛؛ كما الكمان بتاع الاسطى وليد صفوت منجد المحاورات - بينده عليه التفت يمين وشمال اتاري خطيبتي حبيبتي ونور عيني واقفه مع كبير العربجية بتاع الحناطير وبتقول لي تعالى _ طبعا عيب قوي اسيبها واخلع فرحت وانا عارف اني هحلق له ومصمم بقى المرة دي اني ارفض وبصرامه - لاقيتها يا سادة يا كرام متفقه مع الراجل على خمس حناطير ييجوا عند البيت ويزفونا زقة حناطير والراجل وافق واعطاها "دشكوند" كمان ؛؛؛؛ المهم لاقيتها بتقول لي اديله عربون يا ياسو :wub: وهو طبعا كان خلص الموضوع وجاب الاسطوات العربجيه واتفق معاهم ولاقيت حوالينا ما لا يقل عن خماشر باش عربجي - بيني وبينكم كنت ناوي اقاوم وارفض لكني تذكرت فريد شوقي في فيلم عنتر بن شداد لما راح يجيب النوق الحمر مهر عبلة من ارض الملك النعمان وقال مقولته الشهيرة {الكثرة تغلب الشجاعه} ولاني ليس عندي لا هذه ولا تلك؛؛؛ فلقد اخرجت من جيبي ورقه بخمسة واعطيتها للمعلم وانا اودعها وداع العاشق المتيم

وللحديث بقية

[مصرية يعني مصرية]

إيه الزنقه المنيلة دي......... :wub: .

قطعت قلبي... :wub:

دا نتا تعبت قوي يا أخوي ياسو

ها و بعدين........؟؟؟؟؟؟؟؟؟؟؟؟؟؟؟؟؟؟؟؟؟؟؟

تم تعديل 30 أبريل 2006 بواسطة مصرية يعني مصرية

[ذات الوشاح]

بسم الله الرحمن الرحيم

يا عينى على حكايات العزاب

و اساطير العزاب

التى نسمعها نحن و نضحك او نبكى حسب الظروف المحيطة وقتها

للبنات قبل الزواج ايضا حكايات و اساطير

و ان كانت البنت التى لا تتزوج _ العانس يعنى _ حظها اسوء من العازب

حيث يلاحقها الجميع بنظرات الشفقة _ او الشماته _ اينما ذهبت

فان كانت جميلة قالوا _ كله بياخد نصيبه و صحيح الدنيا نصيب _

و ان كانت قبيحه : قالوا ياما في الدنيا مظلاليم

و الله فكرتنى يا اخ ياسو

لسه اول امبارح نازلة الف لما رجليا نملت في المنشية و العطارين

اصل عقبال عندكم بنت خالتى هتتجوز

بس بينى و بينكم بيقول اجمل حاجه في الزواج _ من وجهه نظر الست طبعا _ انها تنزل تتفرج مع زوج المستقبل على الفساتين و الفرش و اختيار ما يناسب غرفة النوم و ما يناسب غرفة المعيشة

و ما يناسب الميزانية طبعا

بس بنت خالتى الغلبانه جوزها مش هنا _ لسوء حظها و حسن حظه طبعا _

اصله في الكويت بيشتغل

و طبعا هيا الى بتعمل كل حاجه بنفسها من اول شراء العفش و فرش الشقة لحد اخر ملعقة في البيت

ادعولها ربنا يتمم لها على خير

و كمل يا اخ ياسو

و ان كانت جيجي مش راضية تقولك على غرفة البنات ابقى احكى لكم انا :wub:

[yasovinas]

ذات الوشاح كمان هنا بشحمها ووشاحها يا هلا يا هلا

طيب اكراماً لتشريفك الدكان "هتنزل المرة دي ونكمل الليلة دي" - بس المرة الجاية لا منكن ابداً-

ودعت يا سادة الورقه ام خمسة وكانت ايامها مبلغ وقدرة وطبعا قفلت على البيك العربجي في الكلام وقلت له خلاص خلاص انا هبقى اجي لك بكرة ونتفق على الترتيبات كلها وطبعا انا في دماغي اني احلق له ولكن اللي حصل واللي جرا لا يتقال ولا ينقرا

يوم الخطوبة يا سادة وكما هي عادة اهل اسكندرية العريس يتزف زفه اسكندراني فرداني وهو نازل من بيت اهله (عدوا معايا الله يخليكم) اتزفيت من اهل الحتة وكل البشر جاي يزف وينقط اخونا ياسو اللي زف طوب الارض في اسكندرية فكلة بيوجب مع ابو الواجب - ما علينا ساعه كامله يا سادة وانا بتزف لمسافه لا تزيد عن المية متر من باب الشقه في الدور الثالث لغاية باب السيارة اللي واقفه امام باب العمارة - ما اطولش عليكم قولوا طول - ايضا كعادة اهل اسكندرية العروسه راحت لبست عند ناس قرايبهم لان الخطوبة عامبنها عندهم في بيتهم اللي هو اصلا مكون من ثمان غرف وصالتين بمساحه شقه من شقق اليومين دول فذهبت هناك جبتها من بيت قرايبها في شارع الفلكي ودول بقى ساكنين في الدور السابع ومن غير اسانسير وطلعت بزفه ونزلت انا وهي بزفه تانيه من اصدقاء جوز اختها اللي طبعا كنت قايم معاه بالواجب وزياده يوم فرحه فجايب زفه من بحري (كده بقوا ثلاثة )ركبنا السيارات يا ساده واللي فوجئت انهم وصلوا لعشرين سيارة مش عارف جم منين قافلين شارع الفلكي من اوله لاخرة وادوها زفة في انحاء المنشية وبحري وابو العباس وبعدين وصلنا الى المنشية عند نصب الجندي المجهول فلاقيت الحناطير واقفه ومتزوقه وطبعاً أُنزلت غصب عني وركبت الحنطور ولفوا تاني المنشية ومحطة الرمل وجامع ابراهيم واصبح اللي ما يشتري يتفرج يا ساده واسمع بقى التعليقات والتأليس اللي اخذته يومها من طوب الارض

ايوووو يا دين النبي دا انا شفت يوم mfb: ;)

احكي لكم على حاجه بسرعه بخصوص الموضوع دا

بعدها بشهرين تقريبا واقف على محطة الترام انا واتنين زمايلي من القاهره كانوا بيصيفوا ولا قينا زفة حناطير معديه واحد منهم قال الله حلوة قوي :wub: ولسه هقول له بكل فخر ما انا اتزفيت كده :wub: لاقيت التاني بيقول له تلاقي العريس ابوة عربجي :wub: حطيت لساني في بقى وقلت الله يسامحك يللي كنت السبب

وللحديث بقية ان كان في العمر بقية

[yasovinas]

موقف رهيب وما لهوش حل من ايام الخطوبة العريس او الخطيب وخطيبته واقفين في مكان عام ويلفت نظر الخطيب واحد جاي من بعيد بس شكله وتركيبته وهدومه كوميديا ما حصلتش بالاضافه الى لسان الباشا اللي متبري منه وطبعا عايز يثبت للهانم ان دمه خفيف وواد يشتغل طوب الارض

يبدأ فاصل من التريأه والنقورة وكل ما تضحك الننوسه الباشا يزود وشغال الله ينور ؛؛؛؛؛؛ وفجأه وما ان يقترب هذا الشخص تترك الننوسه زراع الشاب وتنطلق الى صاحبنا الكومدي قائله خالوا ماجد حبيبي :unsure:

[ATHENA]

موقف رهيب وما لهوش حل من ايام الخطوبة العريس او الخطيب وخطيبته واقفين في مكان عام ويلفت نظر الخطيب واحد جاي من بعيد بس شكله وتركيبته وهدومه كوميديا ما حصلتش بالاضافه الى لسان الباشا اللي متبري منه وطبعا عايز يثبت للهانم ان دمه خفيف وواد يشتغل طوب الارض

يبدأ فاصل من التريأه والنقورة وكل ما تضحك الننوسه الباشا يزود وشغال الله ينور ؛؛؛؛؛؛ وفجأه وما ان يقترب هذا الشخص تترك الننوسه زراع الشاب وتنطلق الى صاحبنا الكومدي قائله خالوا ماجد حبيبي :huh:

كويس إن العريس مسك نفسه و لسانه للآخر... :blink:

كمل كمل ده إحنا هنشوف أيام.... :unsure:

[Cleo]

موقف رهيب وما لهوش حل من ايام الخطوبة العريس او الخطيب وخطيبته واقفين في مكان عام ويلفت نظر الخطيب واحد جاي من بعيد بس شكله وتركيبته وهدومه كوميديا ما حصلتش بالاضافه الى لسان الباشا اللي متبري منه وطبعا عايز يثبت للهانم ان دمه خفيف وواد يشتغل طوب الارض

يبدأ فاصل من التريأه والنقورة وكل ما تضحك الننوسه الباشا يزود وشغال الله ينور ؛؛؛؛؛؛ وفجأه وما ان يقترب هذا الشخص تترك الننوسه زراع الشاب وتنطلق الى صاحبنا الكومدي قائله خالوا ماجد حبيبي :unsure:

أعتقد أن هذا الموقف أصبح هو الثغرة التى نفذ بها "العدو" واستغلها فى عمليات الابتزاز الاستراتيجية لتحقيق أهدافه (انظر مداخلة طقم الحلل :blink: )