اصحاب = بزنس

[احمد هادي]

مشكلتي انني لا استطيع ان اقضي وقتي معك لمجرد ان مصلحتي معك

ولا استطيع ان اضحك علي نكاتك السخيفة لمجرد انك رئيسي في العمل

ولا يمكنني ان اظهر لكي اهتمامي الزائف بك لمجرد ان كل من حولك يفعلون ذلك لأنك مهم بالنسبة لهم

انا لا أصاحب إلا من يستحق صحبتي

لشخصه لا لمصلحة

ولا اجامل الا من هو أهل للمجامله

لسلوكه لا لمنصبه

ولا أهتم إلا بمن هو أهل لاهتمامي

لاحترمي له لا خوفا ولا طمعا

وتلك هي مشكلتي هذه الايام

لا أعرف هل يفعل الناس من حولي ذلك بوعي ؟؟؟

أم هم يحبون نفسهم ومن ثم مصالحهم وبالتالي يحبون من يعتقدون أنه قادر علي ان يحقق تلك المصالح دون أن يشعروا

هل المعادله اصبحت

اصحاب = بزنس ؟

ولا في ايه ؟

أفيدونا أفادكم الله

تم تعديل 18 أبريل 2006 بواسطة احمد هادي

[Cleo]

انا لا أصاحب إلا من يستحق صحبتي

لشخصه لا لمصلحة

ولا اجامل الا من هو أهل للمجامله

لسلوكه لا لمنصبه

ولا أهتم إلا بمن هو أهل لاهتمامي

لاحترمي له لا خوفا ولا طمعا

وتلك هي مشكلتي هذه الايام

أفيدونا أفادكم الله

مشكلتى انى زيك... وده سبب كل متاعبى تقريبا.. مش بس لأنى بخسر من إنى مش بجامل ذوى النفوذ.. لأ.. كمان لأنى بتعب لما اللى له مصلحة عندى وتتقضى بينفض عنى

هل المعادله اصبحت

اصحاب = بزنس ؟

ولا في ايه ؟

غالبا هى دى لغة العصر

عشان كدة اتعلمت أسطح علاقتى بمعظم الناس.. و أتوقع اختفاء أغلب الأصدقاء فى أى وقت و أعتبر صداقات العمل "صداقات Disposable" تستعملها مرة و ترميها بعد كدة...

[yasovinas]

لازم نتعلم الفرق بين الصاحب والصديق

الصاحب او الزميل هو انسان تواجد في وقت معين وقي مكان معين وتحت ظروف معينه ادت الى تعاملك بعه بدرجه معينه من الالفه او الرسميات ويجب ان تتاكد انه بزوال هذه الظروف وهذه الـ "معينات " التي ذكرتها،، كلها او بعضها سوف تزول هذه العلاقه ، لذلك يجب ان تتعامل معه بناء على متطلبات هذا الموقف

اما الصديق فهو من تربطك بيه علاقه وصداقه وحميميه ليس لها رابط بظروف او مكان او حتى سبب وهذا هو من يجب ان تتمسك بيه وتتعامل معه بحب وهو اللي مش هيكون علاقته معاك علاقة {بزنس}

تحياتي

[nancy]

عارف يا احمد انا ماكملتش وعملت الدكتوراة بعد الماجستير للسبب دة

الكلية عندنا دكتور واحد الى لازم اعمل معاه الرسالة علشان تخصصى

عرضت علية موضعين رفضهم قالى على موضوع حسيت انى مش عوزة ابحث فية فقلت مش عاملة لما الدكتور دخل المستشفى فى مرضة كتير قالولى فرصة زيارة وهدية والموضوع الى تخطرية حيوافق علية

سالت نفسى انا حروح علشان زيارة المريض صدقة ولا ريحة وفى ضميرى انى عوزة هدف تانى لاقيت ان جوايا الهدف التانى

فلغيت كل حاجة وقلت كفاية الماجستير

يعنى انا زيك معرفش اجى على نفسى مهما كانت الخساير

ودة الصح لازم تود الى يستحق ودك وصداقتك ومتجيش على نفسك ابدا تحت اى ظرف

من الصعب ان تكسب العالم وتخسر نفسك

[MZohairy]

بص ياحمد ياخويا

الأيد اللي متقدرش تعضها ..........بوسها

ولو رحت بلد بيعبدوا فيها العجل ......حش واديله

واربط الحمار مطرح مايقول صاحبه

والجري نص الجدعنه

وعيش ندل تموت مستور

وأخيرا وليس آخرا

ماتقفش قدام القطر و تحرن

الكلام اللي فات كله أمثال ظاهرها سيء ما عدا الأخير وطبعا مش مفروض تطبقها ابدا بشكل حرفي

لكن حاول أحيانا تطبقها بشكل زكي

حاول

حتفرق معاك كتير

أوي

[احمد هادي]

عزيزي زهيري

ممكن شرح مع أمثله ؟

ويا حبذا لو يكون فيه رسوم توضيحية :blink:

وبعدين تعالي هنا

انتا متأكد انك مش عضو في الحزب الوطني ؟ :P

تحياتي

تم تعديل 18 أبريل 2006 بواسطة احمد هادي