موسوعة الأمثال الشعبية

[مصرية الهوى]

ميرسي يا جدو على الموضوع الشيق :D

جيبالكم حتة أمثال انما ايه .. محصلتش .. :D

_____________________________

هذا بلا أبوك يا عقاب ..

يضرب هذا المثل لما مثلا تيجي تسأل واحد مالك ؟ ويرد عليك بسبب .. يكون هو نفس السبب اللي عندك ..

احكيلكم حكايته عشان تفهموا أكثر .. وعلى فكرة القصة حقيقية ..

فيه راجل ماتت زوجته، في أول ليلة نامها بعد موت زوجته ، مش قادر ينام وقاعد حزين ويبكي بصمت ، وكان عنده ابنه " عقاب" نايم جنبه ، وفجأة صحى الابن وقعد يعيط ؟؟ .. فقاله أبوه : مالك ياعقاب ؟؟ .. الولد رد: عاوز ماما .. ماما وحشتني .. رد عليه ابوه بكل أسى : هذا بلا أبوك يا عقاب :lol: ... !!

الاسم لليلى والغبوق لجري ...

يضرب لـ ... ، وإلا احكيلكم حكايته أحسن ..

يقولك فيه بنت في الزمن الماضي .. كانت بنت عز .. وكانت ليها خيمة لوحدها ( مين قدها .. خيمة لوحدها B) ) .. وكانت الجارية تجيب لها كل يوم لبن في الصباح " الصبوح" ولبن في المساء " الغبوق " .. ولما حد يسأل الشغالة أنتي رايحة فين : رايحة أودي غبوق ليلى .. جاية منين ؟ جايه من خيمة ليلى موديالها الغبوق ... المهم البنت دي اللي اسمها ليلى .. حبت واحد اسمه " جري" >>>>>> شكله امريكاني :D ...

المهم صاحبها ده بقى يجي كل يوم ويقعد عندها في الخيمة .. ويستخبى لما الجارية تجي .. ولما تروح يظهر .. ويشرب الغبوق .. >>>>> شكله داخل على طمع .. مصاحبها عشان الغبوق بس :D ..

آخر حاجه اكتشفت الشغالة القصة ..

فضربوا المثل ده : الاسم لليلى والغبوق لجري ..

اسكت والا انسدحت ..

يضرب المثل لما حد يقولك بسرعة .. اعمل كده بسرعة .. وانت أساسا بتشتغل بأقصى طاقتك ..

وحكايته :

فيه واحد منحوس اوي .. نام مرة وحلم إنه زي ما يكون في ميدان سباق .. وبتعدي قدامه حظوظ الناس .. المهم ..

الحظوظ بتعدي .. حظوظ زي البرق .. وحظوظ زي الفرس .. وحظوظ تمشي بسرعة .. وحظوظ على مهلها .. لحد ماشاف آخر حاجه حظة بيزحف زحف ببطء شديد .. قام سأله : أنت مين ؟؟ .. قال: أنا حظك .. قاله: طب بسرعة اتحرك .. حظه سكت ماردش .. قام قاله: طب بسرعة .. حاول تستعجل .. مردش .. قام زعق فيه : أقولك امشي بسررررررررررعة .. قام حظه رد عليه : اسكت والا انسدحت

يعني اخرس خالص والا والله لأنام على الأرض ..

ينسدح يعني يستلقي على الأرض ..

الله يحلل الحجاج عند ولده ...

المثل ده يضرب لما مثلا يبقى جارك مطلع عينك ودايما بتشتكي منه .. بعدين عزّل .. وجا مكانه واحد أوحش منه بمراحل .. اكتشفت إن جارك الاولاني كان ملاك ..

وحكاية المثل :

طبعا كلنا عارفين ان الحجاج كان معذب الناس عذاب ومعيشهم في جحيم ..

يقولك لما الحجاج مات .. قام ابنه قال : هنشيل جنازة أبويا من البيت اللي مات فيه لحد المقبرة طريق مستقيم .. يعني اهدموا كل البيوت اللي في السكة .. قاموا الناس قالوا ايه الجبروت ده .. الله يحلل الحجاج عند ولده ..!!

يعني الحجاج بالنسبة لابنه كان ملاك ..

بس بصراحة مش عارفه اذا كانت القصة حقيقة والا تخاريف ..!!

وإلى اللقاء في أمثال أخرى ..

جايه في السكة :blush:

[abofasad]

مصرية الهوى

شرحك جميل للأمثال

[Folana]

الفاجرة ست جيرانها

<{POST_SNAPBACK}>

[/quote

:blush: B) صدقتى ياخالة صفاء والله ..بس على ايامى كان اسمها الغجرية ..يظهر زمامها فلت منها :D

بيقولوا كمان ...

الموكوسة تعمل متعوسة ...

المثل ده الحقيقة كان النشيد الوطنى بتاع حماتى :lol: ..كانت كل لما تشوفنى تسمعنى تحية العلم دى ..مش عارفة كانت تقصد ايه ياترى :D ...

[khedr]

الموكوس موكوس ولو علقوا في رقبته فانوس

معروف الانسان دايما اللي يتعلل ان الحظ لا يخدمه ولا يكون معه ويصادف المشاكل منين مايروح....

لبس البوصه تبقي عروسه

اللبس والمظهر والمنظر هو الذي يحدد شكل الانسان

والجوهر ممكن يكون مختلف تماما عن الداخل

[أبو محمد]

اللوح قال للمسمار : فلقتنى ... قاله : من كتر الدق اللى على دماغى

دى بقى أحسن مثال لها لما موظف يتهزأ من مديره يقوم هو مهزأ اللى تحت منه .. أو بوجه عام عندما يقع الموظف تحت أى ضغط عمل فيقوم بنقل هذا الضغط إلى مرءوسيه

تم تعديل 16 يناير 2006 بواسطة أبو محمد

[Folana]

الجعــــــــــــــــــــــــــــــــان يحلـــــــم بسوق العيــــــــــــــش

واللى عايز يعرف معناه يتفضل يقرأ حلم اختنا العزيزة صفــــــــــــــاء :blush: :wub:

لامؤاخذة ياصفصف.... :P

[مصرية الهوى]

^

^

^

^

^

^

^

يا شماتة طنط فلانه فينا ...

لزمته ايه حكاية الحلم يا صفصف .. احلمي وانتي ساكته :blush:

خدوا الامثال دي ..

قرعه وبتتباهى بشعر بنت أختها ..

الكلمة الحلوة بطالع الحية من وكرها ..

ياآخد القرد على مالو بيروح المال وبيضل القرد على حاله ..

كلمة ياريت عمرها ما عمرت بيت ..

إذا بغيت تضمها اسأل عن أمها .. <<<< يعني لو عاوز تتجوز وحده اسأل عن مامتها ... وتكملة للمثل ده ..

أقلب الجرة على فمها .. تطلع البنت لأمها ..

[Folana]

السلام عليكم ورحمة الله ...........

بنت بنتى مصرية الهوى ...أحب ابشرك انى عملت العملية ونجحت واستأصلت طنط دى اللى كانت طالعة لى فى ضهرى ...(وتلاحظى انك بقيتى بنت بنتى مش بنت بنت بنتى يعنى انا صغرت جيل بحاله والبقية تأتى )

الكلمة الحلوة بطالع الحية من وكرها ..

ياآخد القرد على مالو بيروح المال وبيضل القرد على حاله

لى تعليق بس نونو خالص على المثلين دول ....اذا كانت الكلمة الحلوة حتطلع الحية من وكرها ..يبقى بلاها كلمة حلوة خلينا عايشين زى ماحنا رافعين النبابيت

بالنسبة للقرد ...الكلام ده كان زمان ...دلوقت بيروح القرد فى داهية ويفضل المال على حاله ...يم يم يم .....انت مش بتقرأى صفحة الحوادث ولا ايه ..ايشى اكياس بلاستيك وايشى مية نار ,,,القتل اتقدم يا حبيبتى .. :blush:

وبالمناسبة دى لانى بس ماعنديش وقت اكتب لك فى موضوع صورك ..الصور جميلة جدا واكتر صورة عجبتنى اللى انت بتقولى عليها مش مظبوطة ...رائعة فعلا وكنت عايزة اكتب لك تحتها ...الله نور السموات والارض ...

متاسفة يا جدو ابو الفصاد انى غيرت الموضوع بس غصب عنى ...

يافرخة يا كيكية اللى فيك هاتية فىً

والمثل ده بمناسبة انفلونزا الطيور ...........

[abofasad]

قطهم جمل وبراغيتهم رجالة

يضرب هذا المثل لكل شخص يبالغ فيجعل من القط جمل ومن البرغوت رجل

كل شيء دواه الصبر لكن قلة الصبر مالهاش دوا

بدون تعليق

ما تفرحش للي راح لما تشوف اللي يجي

مال تجيبه الرياح تاخده الزوابع

وقت البطون تتوه العقول

هذا المثل اعتقد اني سمعته من الشيف بودا

يا وحشة كوني نغشة

[مصرية الهوى]

أهلا بيكي يانينا وحشتيني جدا جدا .. ماما وبابا بيسلموا عليكي .. ويقولولك هنيجي نزورك الخميس الجاي ..

وهنتعشى عندك .. وانت طبعا عارفه انا بحب اكل ايه .. حضري السفرة من دلوقتي :wub:

اه .. قلتيلي اكياس البلاستيك ... ام ام :blush:

معاكي حق ..

عُلم وسينفذ ..

:P

وعذرا على المقاطعة يا جدو ..

[مى محمد]

لا تتجوزى الاقرع ولا تاخدى منه نصيحة....لو ربنا كان بيحبه كان خلقها له صحيحة....

و المثل معناه انك حين تسعى لايجاد النصح فعليك ان تختار جيدا من تسأله النصيحة

لو اعطوا المجنون الف عقل على عقله...مايعجبوش غير عقله

غلبت اعلم فيك و الطبع فيك غالب...و ديل الكلب عمره ما يتعدل ولو علقوا فيه قالب

الشاطرة تغزل برجل حمار

حاميها حراميها............. لا تعليق

يا جايبة الزيارة و عينك فيها....اقعدى فى السكة و كليها...... كان هذا مثل ابى الراحل المفضل

و ان كان لك عند الكلب حاجة.....قل له يا سيدى.......مثلى المفضل و شعارى فى التعامل مع دكاترة الكلية بتاعتنا :blush:

وللامثال بقية...ان كان فى العمر بقية

[أبو محمد]

اللى يتلسع م الشوربة ينفخ فى الزبادى

اللى يتلدغ من التعبان يخاف م الحبل

[Reham]

حلوة اوي لعبة الامثال دي ياجدو ابو الفصاد

انا بحب الامثال الشعبية جدا وحافظة كمية لابأس بها

خد عندك............. :D

1..اللي حبه ربه واختاره جاب له حاجته عند داره

2..اللي يربط في رقبته حبل ألف مين يسحبه

3..الضمانة أولها شهامة وآخرها غرامة

4..طمعنجي بناله بيت فلسنجي سكن له فيه

5..عمر العدو مايبقي حبيب وعمر شجرة التين ماتطرح زبيب

6..دخانك عماني وطعامك ماجاني

7..يامستني عشاك من بيت اخاك يوم يطعمك ويوم ينساك

ايه رأيكم حلوين؟؟؟؟؟؟ :)

عندي كتير

والبقيه تأتي العدد القادم بمشيئة المولي

وسلم لي علي الافصدة الصغنططين

:wub:

[abofasad]

وبعدين معاكي يا بنتي يا ريهام

قلنا اسمهم الفصايدة وليس الأفصدة

ما تزعليش الولاد منك

طيب خدي عندك:

الضيف المجنون ياكل ويقوم

ضل راجل ولا ضل حيط

الضرب في الميت حرام

القرش الابيض ينفع في اليوم الاسود

دخولك في بيت اللي ما تعرفه قلة حيا

وحفتكر شوية كمان وارجعلكم

[Reham]

طب خد عندك بقي ياجدو...... ودي بقي لعبتي

معاك حاجة تشيل فيها؟؟؟؟؟؟ :D

1..افتكرناك ياضيف خفيّف... لقيناك ياضيف تشتي وتصيّف

2..يخاف من الخنفسة ويلعب بالتعبان

3..خنفسة شافت ولادها عالحيط قالت دا لولي ملضوم في خيط

4..زي المش كل ساعة بوش

5..ان كان لك صديق وبدك تبقيه ..لا تاخد منه ولا تديه

6..زي الطبل صوت عالي وجوف خالي

7..اللي من دمي ما يخلي من همي

8.العروسه للعريس والجري للمتاعيس :wub: :D mfb:

وسلامي للفصايدة الصغنططين برده :) هيبقي مثل جديد

[abofasad]

ريهام .. واحدة بواحدة

مانا مش حسكت .. اه

زي تنابلة السلطان يقوم من الشمس للضل بعلقة

العقربة اخت الحية

علم في المتبلم يصبح ناسي

علقة تفوت ولا حد يموت

قفطانه وجبته تغني عن خضاره ولحمته

كمان والا كفاية

طيب اخر مثل قبل ما انام

كل نوم وطنطية احسن من فرح طيطة

وتصبحوا على خير

[abofasad]

الغايب حجته معاه

هذا المثل بمناسبة غياب كثير من الأعضاء أمثل الدكتورة شانا، مدام سلوى، اسكوربيون ..وكثيرين

كل ما يعجبك والبس ما يعجب الناس

الكلام لك يا بودا .. يعني اوصف الاكلات واحنا علينا ناكل

[وليد صفوت]

جدو أبو فصاد ...

موضوعك أكثر من رائع ...

مرشح نمرة واحد للتثبيت بمسمارين على باب الثقافة , لأن معظم ثقافة المواطن المصرى البسيط مصدرها الأمثال ,....

أرجوك إستمر , انا عندى فى القاموس ملحق للأمثلة الإنجليزية و مقابلها فى العربية , ارجو ان اتذكر أن أسردهم ......

ألف تحية ,..

[abofasad]

عزيزي عاشق الفيولين

يعني عندك امثلة وحايشها.. يعني حننتظر كتير

طيب خد المثل ده:

موت يا حمار لما يجيك العليق

وخد عندك:

قال يا جحا عد غنمك قال واحدة نايمة وواحدة قايمة

قالوا يا جحا فين بلدك قال اللي مراتي فيها

قالوا يا جحا امتى تقوم القيامة قال لما اموت انا

سأحاول ان أتذكر بعض الأمثلة الأخرى وسأذكرها في حينه لأن:

كل تأخيره وفيها خيره

[وليد صفوت]

الله الله ....

جدو أبو فصاد :

و تم تثبيت الموضوع لأهميته و اتمنى من الجميع ان يشاركوا , لربما كونّا مرجع للأمثلة الشعبية , خصوصاً ان بيننا من يحفظ أمثال ليست فى أى كتب أو مراجع للأمثال الشعبية ... :wub:

مع أرق تحياتى ,...