ايه موضوع عمر أفندي ؟؟

[mohmaher]

حد عند ه فكرة عن الكلام ده ؟؟؟؟؟

هو ايه ناقص لسه متباعش في البلد ؟؟ حد يفكرني ....

"بلاغ مضاد" للنائب العام حول صفقة عمر أفندي

نقلاً عن جريدة نهضة مصر القاهرية / مصر العربية

Monday 6 March 2006 الساعة 4 PM

تصاعدت أمس أزمة بيع شركة عمر أفندي في ضوء المفاجآت التي فجرها رئيس شركة بنزايون وعضو لجنة التقييم، والذي تقدم ببلاغ للنائب العام اتهم فيه وزير الاستثمار ورئيس الشركة القابضة بإهدار المال العام في صفقة بيع الشركة حيث تقدمت الشركة القابضة للتجارة ببلاغ آخر للنائب العام ضد يحيي عبد الهادي رئيس شركة بنزايون اتهمته فيه بالتشهير بالقيادات والسب والقذف وإفشاء معلومات مغلوطة وذلك رداً على اتهاماته الواردة في بلاغه للنائب العام.

[se_ Elsyed]

طول عمري كنت أكره الكيميا والفيزيا والحاجات دي .. عشان كده دخلت أدبي ..

في ثانوية عامة بقى كان عندنا موضوعين في مادتي الجغرافيا وعلم النفس في غاية الساخفاة والكونفيوجينزم ( اللخبطة يعني :D ) ..

في علم النفس كان موضوع مهم جداً ولازم ييجي في الإمتحان إسمه " مراحل النمو " من ساعة الخطوبة وجوابات الحب لحد ما الإتنين يتجوزوا ويخلفوا والواد يكبر يكبر يكبر لحد ما يموت .. ودايماً كانت عندي الرضاعة تدخل على التسنين على المراهقة وأتلخبط في المراحل دي وأعك عك جامد قوي ... ما علينا

في الجغرافيا بقى كان في موضوع غلس إسمه " العصور الجيولجية " العصر الحجري والبرونزي والصفيحي :D وما إلى ذلك .. وبرضوا كان لازم ييجي في الإمتحان

طب إيه علاقة العصر البرونزي بعمر فندي ؟

أقولكم

فبضل من الله سبحانه وتعالى .. ثم العهد المبارك للرئيس مبارك .. إبتديت أفهم وأربط تلك العصور الجيولوجية بعصور حكامنا السودا

فمثلاً

- عصر عبد الناصر هو عصر الإستبداد ( أرفع رأسك يا أخي عشان نقطفها لك وتبقى ماشي مذلول ومن غير راس "

- عصر السادات " عصر السبهللة والإنفتاح وكل حاجه فاتحه على كل حاجه "

أنظر الكتاب ... صفحة قصيدة " البتاع " لنجم الفقري

يا للي فتحت

البتاع

فتحك على مقفول

لأن أصل البتاع

واصل على موصول

فأى شئ في البتاع

الناس تشوف على طول

والناس تموت في البتاع

فيبقي مين مسؤول ؟

وإزاي حتفتح بتاع

في وسط ناس بتقول

بأن هذا البتاع

جاب الخراب مشمول

لأنه حتة بتاع

جاهل

غبي

مخبول

أمر بفتح البتاع

لأنه

كان مسطول !

وبعد فتح البتاع

جابوا الهوا المنقول

نكس عشوش البتاع

وهد كل أصول

وفات في غيط البتاع

قام سمم المحصول

وخلا لون البتاع

أصفر

حزين

مهزول

وساد قانون البتاع

ولا عله ولا معلول

فالقاضي بتع البتاع

فالحق ع المقتول

والجهل زاد في البتاع

ولا مقري

ولا منقول

والخوف

سرح في البتاع

خلا الديابه تصول

ويبقي البتاع في البتاع

والناس صايبها ذهول

وأن حد قال دا البتاع

يقولوا له

مش معقول

وناس تعيش بالبتاع

وناس تموت بالفول

وناس تنام ع البتاع

وناس تنام كشكول

آدي اللي جابه البتاع

جاب الخراب بالطول

لأنه حتة بتاع

مخلب

لراس الغول

باع البتاع بالبتاع

وعشان يعيش على طول

عين حرس بالبتاع

وبرضه مات مقتول

يُتبع ( اللهم طولك يا روح ونعرف إيه علاقة ده كله بعمر أفندي ... حد من المشرفين يلحق الراجل اللي أهتبش في مخه ده ياخواننا )

[se_ Elsyed]

- عصر مبارك : هو عصر " حرف الهاء " أي حاجة أولها هاء ( هبر ، هبش ، هبل ، هتك ، هلس ، هجص .... إلخ )

إحنا ما بنتجناش على حد وأقرب مثال على ذلك هو الصفقات المشبوهة لبيع ممتلكات الشعب ... مش هاقول الدولة .. لإن الدولة هي الشعب وممتلكات الدولة لا تعني ممتلكات الرئيس والوزراء وحكوماتهم !!! ....

وسبق أن تكلمنا عن ذلك العديد من المرات .. ومن ضمن ما ذكرناه إن في صفقات بيع القطاع العام أو شركات الدولة فإنه - وبفعل فاعل - لا يتم تقييم معظم الأصول لهذا المشروع أو الشركة عند اليبع وأهم أصل من هذه الأصول هو " الأرض " المُقام عليها هذه الشركة ...

وحدث هذا على مرأى ومسمع من الجميع في غالبية إن لم يكن كل المشاريع اللي إتباعت ..

نيجي لعمر أفندي

بالتأكيد كلنا زورنا أو إشترينا مره من عمر أفندي سواء في القاهرة أو المحافظات الأخرى .. وشوفنا المواقع المميزة لهذا الصرح العملاق الذي نخر السوس في عظمه منذ عشرات السنين ... ما هو مال سايب بقى .. وفلوس الحكومة حلال ....

ففكروا يبيعوه لمستشمر رئيسي ويستفيدوا من القرشين ... وما حدش يسأل يستفيدوا منهم إزاي .. لإن ده عيب ولا يجوز ... فإحنا داخلين على جوازة جمال بك ... والجواز محتاج مصاريف متلتلة والدولة ملبوخه على الأخر بهذا الحدث الجلل ...

في الأول ما حدش إتقدم لشراءه - برضوا بفعل فاعل - وده كان مقصود عشان نبين إنها بضاعة بايرة وراكده ومش هاتلاقي اللي يشتريها ... وبعدين نقول أمرنا لله هانبيعها لأول واحد معدي في الشارع خلينا نخلص ونروح

راح حصل التالي

وإقرأوا معي وكل واحد يحضر حباية الضغط جنبه .. ويستعد لكشف راسه والدعاء على الظلمة والنهابين

فضيحة في صفقة بيع عمر أفندي 

إهدار 700 مليون جنيه في التقييم وتجاهل جهاز المحاسبات 

صورة ضوئية من قرار تشكيل لجنة التقييم الذي يعد مخالفا للقانون لعدم صدور القرار من الوزير المختص. 

  كتبت ـ حنان عثمان:

تلقي الدكتور محمود محيي الدين وزير الاستثمار مذكرة تؤكد وقوع مخالفات جسيمة في عملية تقييم شركة عمر أفندي لبيعها. أشارت المذكرة إلي ان اللجنة المشكلة للتقييم قدرت قيمة الشركة بنحو مليار ومائة وتسعة وثلاثين مليون جنيه

. واعترضت قيادات الشركة علي التقييم وتم اجبار اعضاء اللجنة علي التوقيع بخقض التقييم إلي 500 مليون جنيه فقط.

واوضحت المذكرة ان هادي فهمي رئيس الشركة القابضة للتجارة قام باستدعاء اعضاء اللجنة في مكتبه يوم الخميس الماضي وطالبهم بخفض التقييم. وكان مبرر الخفض هو ان شركة عمر أفندي تباع علي اساس التدفقات النقدية بدون النظر إلي قيمة اصول الشركة وهي الطريقة التي اعتمدت اللجنة عليها، مستندة إلي قواعد اللجنة العليا للخصخصة والتي تقضي ببيع الاصول كفروع.

وكشفت المذكرة ان شركة عمر افندي تمتلك 28 فرع تمليك و54 فرع ايجار واراضي تتجاوز مساحتها 30 ألف متر مربع بالاضافة إلي عدد من المخازن واسطول نقل يضم 146 سيارة نقل بضائع و11 سيارة مقطورة و55 سيارة ركوب.

وأشارت المذكرة التي اعدتها جماعة مقاومة الفساد والغش في شركة عمر أفندي إلي وجود شبهة في قانونية تكوين لجنة التقييم. تقضي المادة 9 من القانون 203 لسنة 1991 بأن اللجنة يتم تشكيلها بقرار من الوزير المختص.

وتضم ممثلين عن الجهاز المركزي للمحاسبات في حين تم تشكيل اللجنة بقرار من رئيس الشركة القابضة، وتم تجاهل وجود ممثل عن الجهاز المركزي للمحاسبات. كما تم تجاهل العاملين ولم يمثلهم احد في لجنة التقييم. 

[se_ Elsyed]

الوصلة

موضوع أخر

حسم صفقة «عمر أفندي» لمصلحة أنوال السعودية

تقدمت لها «سلطان» بـ 300 مليون جنيه

27/02/2006

جريدة القبس

خلال أيام قليلة تحسم صفقة بيع شركة عمر أفندي المصرية لمصلحة مجموعة أنوال للتجارة السعودية في صفقة بلغت قيمتها 500 مليون جنيه، وذلك في أول عملية خصخصة لشركات التجارة الداخلية في مصر.

وقد قاربت المجموعة السعودية المتخصصة في التجارة على وضع الشروط النهائية لاتفاقها مع الشركة القابضة للتجارة المصرية التي يناقشها مجلس إدارتها في ما يتعلق بكيفية الحفاظ على حقوق العمال.

ومن المتوقع ابرام الصفقة وإعلان التفاصيل خلال ايام، اذ يعد عرض أنوال أفضل العروض التي تلقتها الشركة القابضة للتجارة من بين المستثمرين الذين ابدوا اهتماما بالشركة من بينهم شركة كويتية.

و«كانت شركة سلطان الكويتية عرضت 300 مليون جنيه للاستحواذ على الصفقة، الا ان العرض لم يلق القبول لدى الشركة القابضة للتجارة»، وقد قدمت شركة سلطان عرضا فنيا وآخر ماليا اشتمل على السيرة الذاتية لمركز سلطان وخطته لتطوير الشركة والفروع للوصول بها الى مستوى سلاسل محلات التجزئة العالمية، وذلك من خلال عدة محاور أهمها اعادة تجديد الفروع من الداخل والخارج، استخدام احدث نظم إدارة محلات التجزئة، ادخال احدث نظم التكنولوجيا والمعلومات بالإضافة الى خطة الشركة لتطوير وتنمية مهارات العمالة التي تعهدت بالمحافظة على حقوقها كاملة. تأسست شركة عمر أفندي عام 1856 ويبلغ عدد فروعها 82 فرعا، ويبلغ رأس مال الشركة 17 مليون جنيه موزعة على 17 مليون سهم، وهي مملوكة بالكامل للشركة القابضة للتجارة.

الوصلة

[mohmaher]

ما لاكش حل انت يا س.س .

شكرا على الافادة