مسافر أو في أجازة ، وجالك إستدعاء جيش ؟؟ .. متخافش .. تعالى أقولك الحل وهتلغيه وتسافر

[متبهدل مع كفيلي]

بسم الله الرحمن الرحيم

السلام عليكم ورحمة الله وبركاته

طبعا الموضوع دا مهم جدا وخصوصا للناس اللى بتقع فيه

وخصوصا برضه اللي خدموا فى الجيش كجندي

بدون مقدمات كتير هندخل فى الموضوع

بعض الناس بيكون بيخلص ورق سفر ويفاجىء بجواب استدعاء

أو يكون نازل أجازة سعيدة ويفاجىء بشيخ الحارة جايب له جواب استدعاء ظريف ويقولك لازم تستلم

ولو مستلمتش هبلغ عنك و .. محكمة

الحل بسيط إن شاء الله كالتالي:

أولا: افتح صدرك ، وجمد قلبك ومتخافش طالما انت على الله لا تبالي ، استلم الجواب وامضى

أيوووووووون استلم الجواب وامضى ، وهاقولك ليه

ثانيا: هنجهز شوية ورق كدا مش هيحتاجو منك مجهود كبير قوى إن شاء الله ، وحتى لو تعبت شوية ،

عمره ماهيكون زى تعب الاستدعاء والعطلة اللى هتقع فيها

الورق كالتالي:

من التجنيد هتقوله انا رايح اشطب استدعاء وعايز : نموذج 2 ، 3 تعبئة – مسير شطب فرد استدعاء

من عندك : بطاقتك سارية - أصل عقد العمل – جواز السفر – التأشيرة – شهادة الجيش -

تصريح عمل ساري (بيطلع من مكتب تصاريخ العمل الرئيسي بالدراسة فى 3 ساعات ) –

من شركتك اللى رايحها ( خطاب تعريفي )

صيغة الخطاب التعريفي :

إلى : هية التنظيم والإدارة بالقوات المسلحة المصرية

السلام عليكم ورحمة الله وبركاته

نحيط بعلم سيادتكم أن الموظف / ******** ويحمل تأشيرة دخول ****** أو إقامة رقم ***** ، يعمل لدينا بوظيفة ****** قد وقع مع الشركة عقد عمل ( أو يعمل مع الشركة ) من تاريخ ******** ، ونفيدكم بأن العمل بحاجة ماسة لحضور الموظف لدينا في تاريخ ( تاريخ قبل الاستدعاء ولو بيوم واحد ) ، فنرجو تيسير أى اجراءات يتطلب تنفيذها لحضور الموظف لدينا بهذا التاريخ ، هذا وتتحمل الشركة المسئولية الكاملة عن حضور الموظف لديها بهذا التاريخ.

إمضاء مدير

وتحته ختم الشركة العادي

ثالثا : هتطلع على هيئة التنظيم و الإدارة بالعباسية من 8ص – 2 ظهرا ( انزل مترو عباسية ) واطلع اتمشى لحدها ، هتدخل تلاقى مقدم محترم، تقول له بابتسامة هادية انا مسافر وعايز اشطب استدعاء ، اول مايجي يتكلم عن الورق – قول له معايا كل الورق وابدأ وريهوله

هيبعتك لعسكري قدامه على ماكنة تصويرتصور نسختين منل كل الورق ، وتقول للعسكري بتاع التصوير عايز طلب رئيس هيئة تصور لى منه نسختين ، وتكتب فى الاتنين الصيغة التالية:

الى السيد / رئيس هيئة التنظيم والإدارة

أنا جندي احتياط / ********** ، أحيط بعلمكم أني مستدعى من الفترة *** الى *** ، وانا على سفر الى **** بغرض العمل حيث أنه ليس لدي مصدر دخل في مصر ، وسفري هو مصدر دخلي الوحيد وأسرتي وأولادي ، لذا ارجو منكم التكرم بالتصديق على شطب الاستدعاء هذه المرة فقط

وتقبلوا فائق الاحترام

حاسب العسكري على التصوير

رابعا : ترجع للمقدم : هياخد الورق منك ويشوف الاصول تانى

هيدبس نسخة كاملة من الورق لوحدها والنسخة التانية لوحدها

وهياخد رقم تليفونك ويقولك اوعى تقفله ، ونصيحة فعلا اوعى تقفله ، واكتب رقمين ،

واحد بتاعك والتانى احتياطي اخوك اختك مراتك اى حد قريب منك

خامسا : ترجع البيت : تصلى ركعتين حاجة وتدعى ربك ييسر الامر ،

لو قدمت الطلب بدري الصبح هيتصلوا بيك بنفس اليوم يقولولك تعالى الصبح ان شاء الله

سادسا : هتروح ان شاء الله يديك خطاب نص ورقة تشيله على كفوف الراحة فى طبق من الدهب

وتروح تسلمه مكتب تجنيدك اللى انت تبعك وتصوره قبلها نسختين ( ممكن تحتاجها فى المطار)

سابعا : تروح التجنيد تاخد طلب ايضاح انك خلاص معندكش استدعاء وتطلع بسرعه تعمل تصريح سفر ،

وهيكون مدته ان شاء الله من شهر – 3 شهور ، سافر براحتك حتى لو بعد تاريخ الاستدعاء او اثنائه

ثامنا: تدعيلي بقى دعوة صادقة من القلب

، انا والله العظيم اتمرمطت علشان اجيب لك المعلومات دى وانت قاعد فى البيت

تم تعديل 11 مايو 2014 بواسطة Mohammad
برجاء عدم التجاوز في استخدام الفاظ غير لائ&#1

[Alshiekh]

أهم شيئ أن تكون المستندات المقدمة سليمة ولو أمكن أن تكون الإصول موجودة لمراجعتها مع الصور.

[drashry]

أولا : أنا ليس لي في الجيش والإحتياط ولا غيره

لإني بإنتظار تأشيرة خروج للآخرة..!!

ثانياً: موضوعك مهم وتشكر عليه.

ثالثاً:إذا كنت تقصد بمساعدتك الإنسان وأن يحمدك الناس فأنت في خسران مبين ولن يشكرك أحد، لأن رب القدرة والعظمة يقول: {{وقليل من عبادي الشكور}}.

رابعاً: إبتغي وجه الله والدار الآخرة لأنك فرجت وستفرج كرب عظيم عن أناس كثيرة..

خامساً: يارب أكثر من أمثال هذا العبد وأجزه خير الجزاء

و......و... شكراً لسعة صدرك

[AbuZeyad]

عاش الجدعان

رغم اني عديت سن التجنيد تحياتي لك flx: flx: flx: flx:

[sokkary]

السلام عليكم ورحمة الله وبركاته

كنت عاوز استفسر اذا جالى استدعاء قبل الاجازة بفترة قليلة ومدته داخل فالاجازة اللى بنزلها مصر باذن الله

ونزلت مصر هل فالحالة دى لازم اروح انفذ الاستدعاء ؟؟ وهل ينفذ كله ولا الفترة المتبيقية ؟؟ وهل فيه اى حل انى مروحش الاستدعا واقدر اسافر تانى بعد الاجازة

ايه اسلم طريقة ,, هل ارسل والدى يستفسر فى القسم ان كان ليا استدعاء ولا لا

السنة السابقى انا جالى استدعا فى شهر 6/2013 وكنت برة مصر ساعتها ولما نزلت مصر فى شهر 8 عرفت لما روحت اطلع اذن سفر

وانا بدور على النت دلوقتى لقيت الناس كاتبة شهادة تخركات وغيره

وقتها انا معلمتش شهادة تحركات وشبخ الحارة قالى انا روحتلك ومكنتش موجود فالبيت

انا اديت لشيخ الحارة فلوس ساعتها وكل حاجة خلصت فالقسم ورجعت تانى منطقة التجنيد وطلعت اذن السفر فى نفس اليوم هل دا فيه مشلكة

وهل ممكن خلال سنة يجيلى استدعاء مرة تانى ؟

بعتذر للاسئلة الكتير بس انا مقلق جدا من الموضوع دا وعاوز اطمن

شاكر مقدما للجميع

تم تعديل 3 يونيو 2014 بواسطة sokkary

[عبير يونس]

تم ضم استفسار الفاضل Sokkary في موضوعه

" استدعاء الجيش قبل او خلال فترة الاجازة بمصر"

لهذا الموضوع لتشابه المحتوى

عن فريق التنسيق و الاشراف

[sokkary]

السلام عليكم شكرا جدا للتواصل

انا قريت الموضوع بالفعل قبل الاستفسار

لكن لسه الاستفسارات ياريت لو احد يجاوب عليها اذا عارف الرد عليها

خصوصا لو فيه استدعاء خلال فترة الاجازة او قبل مانزل

لانى معتقدش انه لو جيه استدعاء لاى حد فى فترة الاجازة ممكن ميروحهوش ويسافر مهما كام الا انه لازم يقضيه

مع خالص التحية للجميع

تم تعديل 3 يونيو 2014 بواسطة sokkary

[عبير يونس]

السلام عليكم شكرا جدا للتواصل

انا قريت الموضوع بالفعل قبل الاستفسار

لكن لسه الاستفسارات ياريت لو احد يجاوب عليها اذا عارف الرد عليها

خصوصا لو فيه استدعاء خلال فترة الاجازة او قبل مانزل

لانى معتقدش انه لو جيه استدعاء لاى حد فى فترة الاجازة ممكن ميروحهوش ويسافر مهما كام الا انه لازم يقضيه

مع خالص التحية للجميع

ان شاء الله الفاضل صاحب الموضوع أو أي من الأعضاء الأفاضل يشوف استفسارك و يرد على حضرتك

بالتوفيق ان شاء الله

[Guest علاء]

اجيب ورق الشركة منين والختم