ليه تخسر صديقك؟؟

[Cleo]

كل واحد فينا كان له فى يوم صديق عزيز عليه جدا جدا جدا.. أكتر من أخ.. أكلين شاربين نايمين مع بعض.

فجأة... يختلفوا... وكل واحد فيهم يروح فى طريق ومشعارهم تجاه بعض تتغير.

إيه فى الدنيا ممكن يخليك تخسر واحد بتحبه؟؟

[nashwa]

إيه فى الدنيا ممكن يخليك تخسر واحد بتحبه؟؟

الخذلان

[Lighthouse]

الصديق يُعرف وقت الضيق

وهناك من الاصدقاء المزيفين الذين يختفون وقت الضيق

[kfaya]

فى صاحب و خل و نديم و قروانه و تخته .... و اسماء كتير تطلق على علاقة بين شخصين ....

اما الصداقة بمعناها العميق ... لما اقول ده صديقى ...

دى بقى ليها شروط .... و لازم تكون مرت بتجارب كثيرة ايقن الأنسان أن صديقة هذا لن يخونه أو يخزله أو يتخلى عنه مهما غدر به الزمان و تقلب عليه الدهر ..

وهناك مقولة أو هو مثل يلخص هذه العلاقة :

ان لم تكن لى و الزمان شرم برم ..... لا خير فيك و الزمان ترللى

[أنـفـــال]

ممكن تحصل..

حصلت معايا..

بس السبب كان..

انه افضى ببعض اموري الخاصة لآخرين!!

و بعدين لقيت الناس بقت عارفة عني اكثر مماينبغي!!

فاضطريت اني اقطع علاقتي به..لأنه فضح اسراري..!!

يعني نوع من الخيانة.

أنفال

[سهيلة]

بصراحة الصداقة دى احلى حاجة ف الكون

انا داءمة الترحال ف شغلى من مكان لاخر

وبحرص اول حاجة الاقيها ف اى مكان اروحة انتقاء الصديق

والسوال المطروح ياترى اية هى المواصفات اللى بتحرص انها لازم تكون متوفرة ف الصديق دة؟؟؟؟؟؟؟

من وجهة نظرى

اول حاجة بدور عليها الصدق من غير صدق لا يوجد صداقة

وبعدين بقى اى حاجة

اخلاص وفاااء تضحية ممكن اتفاق او اختلاف ف وجهات النظر والمبادىئ

بس المهم الاتفاق على اخلاص كل واحد للتانى وحرصة علية

وانة ممكن يقف جنبة ف اصعب فترات حياتة ومرورة بظروف صعبة

انا مش ممكن اعيش ابدااا بدون اصدقاء

نرجع لموضوع كليو

امتى اترك هذا الصديق؟

لما احتاجة وما الاقيهووش جنبى

لما يفضل مصلحتة على مصلحتى ويكون انانى

لما يحقد علية لان المفروض انى ااثرة على نفسى واحب لة الخير

غير كدة انا مكن اسامحة ف اى حاجة تانية

على فكرة اللى هيختار صديقة من الاول صح اكيد مش هيلاقى الصفات دى فية rei::

[عم الطيب]

اعتقد ان المثل اللى يقول صديقك لاتنسبه ولاتحاسبه مثل جميل لانى اعتقد خسارة صديق لصديقه 90 % سببها الفلوس او النسب .

[METALLICA]

إيه فى الدنيا ممكن يخليك تخسر واحد بتحبه؟؟

الخيانة . . . . .

تم تعديل 10 ديسمبر 2004 بواسطة METALLICA

[yasovinas]

خسارة الصديق مش شرط تكون لسبب او لفعل هو قام به او انا قمت بيه ممكن جدا الظروف المحيطه مثل الغربه الهباب اللي احنا فيها

انا هضرب مثل واظن كل الاخوة المغتربين عاشوة

عند عودتك في اجازة الى مصر تبحث عن اصدقاء العمر تجلس معهم تتحدث معهم عن اخبارك واحوالك في اول جلسه يكون الجميع معك بكل مشاعرهم

في الجلسه التانيه يتحول الحديث الى موضوعات جانبية او حتى جماعيه تتعلق بيهم هم عملت ايه في كذا وحصل ايه مع فلان تجلس انت مستمع غريب لان طبعا انت مش متابع ولا عارف اصل الموضوع اللي بيتكلموا عليه

هتلاقي نفسك بتنسحب من وسطهم ومن جلساتهم شويه بشويه مش هتلاقي شغف ولهفه للقاء اصدقاء كنت في يوم من الايام عايش معاهم اكتر ما كنت عايش مع اهلك

مش شرط تخسر صديق العمر بسبب فعل

الظروف اقوى سبب

[فــيــروز]

إيه فى الدنيا ممكن يخليك تخسر واحد بتحبه؟؟

لو شعرت انى لم اعد امثل له ما يمثله لى

وقتها انصرف فى هدوء et:(

[Cleo]

طول عمرى من سن المدرسة و حتى سن المحاورات et:( وأنا الحمدلله اتمتع بشىء من القبول لدى المحيطين. وكان لى أصدقاء كثيرين لم يبق منهم الأن إلا ثلاث صديقات لا يعرفون بعضهن.. يعنى كل واحدة أعرفها من مكان شكل والتلاتة عمرهم ما شافوا بعض.

جلست ذات يوم أفكر فى صديقاتى السابقات ولماذا خسرتهن:

- الأولى: كانت شديدة السيطرة ولا تقبل فكرة تقربى من صديقة أخرى وكانت تلجأ لكل الحيل للاستحوذا على و "التوقيع"بينى وبين أى صديقة جديدة.

- الثانية: بسبب اختلاف البيئة و المنزل و الاهتمامات، وفى سن يصبح التطور الفكرى والشخصى فيه سريعا، بدأت أشعر بفارق شاسع بينى وبينها فى الفكر و الشخصية وحتى البيئة المحيطة و الأسرة، فانسحبت فى هدوء (سورى يا فيروز) لأن التوافق انعدم.

- الثالثة: واكنت بالفعل من أعز صديقاتى على والتى لازلت كلما تذكرت أيامنا الخوالى يدمى قلبى. بعد فترة ابتعاد بسبب تفرقنا فى الكليات المختلفة، فوجئت بعد حين أنها قد انصرفت باهتمامها ومشاعرها كلية إلى أصدقاء أخرين، وأن مكانى أصبح دكة الاحتياطى. فأبيت أن أكون فى الدرجة الثانية و ابتعدت فى هدوء أيضا. وأصبحت العلاقة الأن مجرد "عشم" و احترام لذكرى جميلة كانت بيننا. مجاملات من بعيد لبعيد و مشاعر طيبة. لكن بدون اهتمام حقيقى.

- الرابعة: كانت شخصية شديدة الأنانية والتمركز حول الذات. ترى العالم من نقطة أنها هى مركز الكزن و أن الكون مسخر لخدمتها. بعد عدة سنوات جلست لأقيم هذه العلاقة، وقارنت بين ما أعطيته وما جنيته... فلا يوم يوجدتها جوارى فى أزمة، ولا يوم احتجتها وكانت معى، ولا طلب طلبته وحاولت أن تحققه لى. مجرد أن تطلب منها شىء تصاب بالفزع الحقيقى و تتهرب و تخترع الحجج فى حين أن كل مطالبها تعتبرها حقوق لها يجب تحقيقها. عندئذ، خرجت، ورزعت الباب ورائى

- الخامسة: لم أفقدها بعد، ولكنى ملآى بمشاعر محيرة من جانبها. فهى كانت نعم الصديقةن و اهتمامها بى حقيقيا، وفى أشد الأزمات كانت بجوارى وكانت عينى التى أرى بها بعد أن أن أفقدنى الحب والألم بصيرتى، وكانت نعم البلسم لجروحى. وفجأة، فوجئت بها تخفى عنى أمورا كان يجب أن أكون أول من يعلمها، الاهتمام قل بعد أن ظهر لى شريك فى حياتها (خطيب يعنى) ;) كلما سألتها عن أمر خطوبتها أو فتحت معها الموضوع تهربت منى بشكل ضايقنى. فأهم ما يهمنى فى الصداقة هو الثقة المتبادلة. قررت أن أتجاهل تماما أمر خطوبتها هذا فى مكالماتنا و أتصل بها و نرغى بالساعة، دون أن أتطرق لهذا الأمر بالقصد. الحقيقة لست متأكدة أننى سوف أستطيع أن أواصل العلاقة على هذا المنوال. و أظن أنى سأفقدها قريبا.

[Modest]

خسارة الصديق مش شرط تكون لسبب او لفعل هو قام به او انا قمت بيه ممكن جدا الظروف المحيطه مثل الغربه الهباب اللي احنا فيها

انا هضرب مثل واظن كل الاخوة المغتربين عاشوة

عند عودتك في اجازة الى مصر تبحث عن اصدقاء العمر تجلس معهم تتحدث معهم عن اخبارك واحوالك في اول جلسه يكون الجميع معك بكل مشاعرهم

في الجلسه التانيه يتحول الحديث الى موضوعات جانبية او حتى جماعيه تتعلق بيهم هم عملت ايه في كذا وحصل ايه مع فلان تجلس انت مستمع غريب لان طبعا انت مش متابع ولا عارف اصل الموضوع اللي بيتكلموا عليه

هتلاقي نفسك بتنسحب من وسطهم ومن جلساتهم شويه بشويه مش هتلاقي شغف ولهفه للقاء اصدقاء كنت في يوم من الايام عايش معاهم اكتر ما كنت عايش مع اهلك

مش شرط تخسر صديق العمر بسبب فعل

الظروف اقوى سبب

فعلاً يا ياسو .... دي أحَد نتائج (مساوئ) الغربة.

في بداية الغربة تظل على اتصال مع صديقك / أصدقائك بالتليفون و الإيميلات و مفيش أي مناسبة إلا و انتوا فاكرينها سوا و مع مرور الوقت يتباعد الوقت بين كل اتصال و آخر و تبدأ الإيميلات يتغير محتواها من الإطمئنان على بعض و الاستشارات المتبادلة إلى مجرد تبادل النكت و عمل Forward لإيميلات أخرى من أناس تانيين و هكذا إلى أن ينقطع الاتصال "تقريباً" تماماً إلا عند حدوث أي طارئ و في بعض الأحيان عند وصولي إلى مصر أفاجأ أن الأجازة مرِّت بدون حتى أن أتمكن من لقاء أي منهم لإنشغالي أو لانشغالهم و حتى إذا تمكنت من لقاء أي منهم ألاحظ تغُّير (يضايقني) في إحساسنا ببعض لاختلاف اهتماماتنا الذي فرضته علينا المسئوليات الجديدة التي لم تكن موجودة أثناء وجودنا مع بعض قبل الغربة.

في الغربة صعب أن تجد صديق إلا من تفرضه علينا ظروف العمل و نادراً ما تستمر أو تقوى مثل هذه الصداقات لأنها في الغالب مبنية على ظروف معينة و تنتهي بمجرد انتهاء السبب في وجودها لذا لا أعتبرها صداقة.

تم تعديل 11 ديسمبر 2004 بواسطة Modest

[yasovinas]

في الغربة صعب أن تجد صديق إلا من تفرضه علينا ظروف العمل و نادراً ما تستمر أو تقوى مثل هذه الصداقات لأنها في الغالب مبنية على ظروف معينة و تنتهي بمجرد انتهاء السبب في وجودها لذا لا أعتبرها صداقة.

مودسيت

كلنا في الهم اغراب يا صديقي

صداقة العمل او السكن

دي نقدر نسميها معرفه او صحبه لمن صداقه صعب

[Cleo]

طيب...

لو صديقك وظهر منه أى شىء من الأشياء اللى ممكن تخليك تخسره... تفتكر تيجى على نفسك و تديله فرصة تانية؟؟ ولا الصداقة زى اللبن.. أقل الشوائب تبوظه؟؟

[Modest]

لو صديقك وظهر منه أى شىء من الأشياء اللى ممكن تخليك تخسره... تفتكر تيجى على نفسك و تديله فرصة تانية؟؟ ولا الصداقة زى اللبن.. أقل الشوائب تبوظه؟؟

إذا كنت أعتبره صديق حقيقي أسمع مبرراته و إذا اقتنعت أديله فرصة تانية بالتأكيد و يمكن ثالتة و رابعة ... الواحد مش هايلاقي """صديق""" كل يوم.

[yasovinas]

طيب...

لو صديقك وظهر منه أى شىء من الأشياء اللى ممكن تخليك تخسره... تفتكر تيجى على نفسك و تديله فرصة تانية؟؟ ولا الصداقة زى اللبن.. أقل الشوائب تبوظه؟؟

الصداقه الصح مش زي اللبن اي حاجه تعكرة

الصداقه الصح هي ان تتحمل من صديقك كل اغلاطه واخطاءه

وان تتقبل منه كل حماقاته وايضا ان تكون الى جانبه لردعه من هذه الحماقات

اما ما هو مثل اللبن اي شيء يعكره فهو النسب

[c'est la vie]

قد تكون نظره تشاؤميه ..لكن لا اسعى ابداً ليكون لدي اصدقاء

مرتبطين جداً بي..افضل ان يكون لى (زملاء ) فقط ..واقطع اي فرصه لأى صداقه مهما كانت ..

لاأعرف لماذا ينتابنى الخوف من أى صداقه ..احياناً اشعر انها لابد وستنتهى بأى سبب كان وحتى انتهاءها سيمثل صدمة كبيره جداً , فأتحاشي ذلك من البدايه؟؟ وكثيراً ما يكون خوف من اللانسان نفسه..خوف غير مبرر وحتى الان ليس لي صديقه بالاسم يمكن ان اقول عنها صديقتى بحق..فاجعل كل علاقتى هامشيه واجتماعيه عاديه اعامل الناس بحب شديد..لكن لا اسمح لا حد بالتقرب لي ..رغم ان هذا بيسبب فهم خاطيء للاخرين عنى , لكنى مصره علي ان لا يكون لى اصدقاء ملازمين لي رغم انى كثيراً ما اعانى الوحدة التى افتش عنها بنفسي..

يعنى فعلاً مش عارفه ليه دايماً اخسر اصدقائي ؟؟

واعترف ان الكثير منهم من يحاول اخراجى من وحدتى ودول اللى فاهمينى والباقي صرف النظر علشان الفكرة الخاطئه اللي انا اديتهالهم عنىh):

اكيد ده مرض نفسي ؟؟ صح :)

[egyptforever]

اسهل و اصعب قرار في العالم هو قرار انك تسيب صديق

اسهل قرار ممكن تقوله بلسانك

خلاص من النهارده انا مش هاعرف فلان

و اصعب قرار يتنفذ هو القرار ده

الصداقه و خصوصا الطويله جدا يعني 20 -25 سنه يبقى من الصعب انها تتكرر

ازاي تقدر تكرر فرحك و زعلك و احلامك و احباطاتك و كل حياتك اللي عشتها و كان بيشاركك فيها الصديق ده ؟؟؟ صعب او بمعنى اصح مستحيل الا في حاله الظروف

اللي اقوى من اي صداقه واي علاقه هي الظروف

الظروف بتعتبر اكبر مفرق جماعات في التاريخ

في ناس بتقدر تتغلب على الظروف بس دول طبعا قله

زي موضوع السفر و الغربه او حتى الجواز و الاولاد

مافيش شئ معين يخلي الواحد يسيب صديقه لانها بتختلف باختلاف وقت و موقع الخطأ اللي عمله الصديق

في صديق يعمل غلطه كبيره جدا خيانه مثلا بس وقتها و مكانها يساعدوا انك تنساها تماما و في صديق يعمل معاك غلطه صغيره جدا جدا بس الوقت و المكان يخلوك مستعد لانك تكرهه و تنساه

عن نفسي انا من سنه 1995 مخسرتش صديق او بمعنى اصح مفقدتش صديق

بس للاسف سنه 2005 هتكون سنه فقدان الاصدقاء كلهم مره واحده

نزولي لمصر نهائيا هيكون السبب في فقداني كل الاصدقاء بس الامل موجود في صداقات جديده في مصر

[فــيــروز]

طيب...

لو صديقك وظهر منه أى شىء من الأشياء اللى ممكن تخليك تخسره... تفتكر تيجى على نفسك و تديله فرصة تانية؟؟ ولا الصداقة زى اللبن.. أقل الشوائب تبوظه؟؟

قرات هذه الابيات قريبا جدا ولعلها تجيب سؤالك يا كليو

اذا كنت فى كل الامور معاتبا ........ صديقك لم تلق الذى تعاتبه

وكذلك قال ابن الرومى :

هم الناس و الدنيا .. ولابد من قذى ........ يلم بعين او يكدر مشربا

ومن قلة الانصاف أنك تبتغى .............. المهذّب فى الدنيا ولست المهذّبا

وبالتالى ولاننا لابد ستكون لنا هنّات مع اصدقائنا .. ينبغى ان نلتمس لهم العذر ان اخطئوا حتى يكون لنا لديهم رصيد من العفو حين تتبدّل الادوار

تم تعديل 12 ديسمبر 2004 بواسطة فــيــروز

[Cleo]

وبالتالى ولاننا لابد ستكون لنا هنّات مع اصدقائنا .. ينبغى ان نلتمس لهم العذر ان اخطئوا حتى يكون لنا لديهم رصيد من العفو حين تتبدّل الادوار

عندك حق يا روزا...

بس أنا مش بتكلم عن أخطاء عابرة.. أنا بتكلم عن أخطاء فادحة