كوبري ومُحلل إسمه " منصور حسن "

[se_ Elsyed]

لم يكن إختيار المجلس العسكري الخبيث لمنصور حسن في ترأسة للمجلس الإستشاري وليد الصدفة ... فالراجل معروف ميوله إيه .. ويدين بالولاء لمين .... وهو أرتضى مثل غيره بان يلعب دور المحلل والكوبري .. بعد أن دأب أعضاء المجلس العسكري أمثال الرويني والفنجري والعصار والعطار وبدين على الهلفطة في كل مناسبة يظهرون بها ...

وبالتالي بحث المجلس العسكري عن مُحلل يحمل عنه عبء الهجوم ويكون في وجه المدفع ... ولم يكن أحلى وأجمل من إختراع بعكوكة إسمها المجلس الإستشاري اللي لا حول له ولا قوة ولا سلطات .. بل ولا أعضاء أيضاً بعد إستقالة معظم أعضاءة اللي منهم ناس حسوا من بدري إن منظرهم وحش لأن إحساس إنك تبقى كوبري بيبقى إحساس مش ظريف

وتمر الأيام وفوجئنا بترشيح منصور حسن لنفسه .. وهو حقه كمواطن مصري بلا شك ... لكن اللي مش من حقه إني أسمع إن ده جاء نتيجة ضغط شعبي وضغط لقوى سياسية أخرى لن يُعلن عنها ... وهو نفس كلام مبارك في عهده الأسود

ولما يحاولوا يفهمونا إن القرار ده جاء فجأة .. تبقى مصيبة وكأنك بتكلم هنود .. لإن النهاردة أعلن منصور حسن إنه سيُعلن تفاصيل برنامجه الأسبوع القادم ...

وكلنا عارفين إن البرنامج الإنتخابي بياخد شهور طويلة لتجهيزة وفريق كامل متخصص بيشترك في كتابتة ودراستة ومراجعتة قبل عرضه على الناس

الأبشع في الموضوع بقى وركزوا معايا كويس عشان ما نلاقيش نفسنا وبلدنا في الضياع

إن المجلس العسكري اللي وعدنا بتسليم السلطة وناس كتير صدقته وناس كتير حاربت الثوار وأتهمتهم بزعزعة إستقرار البلد وحرام عليكم خربتوا البلد والناس هايسلموا السلطة والله العظيم ولم يفكروا في لحظة ما هو نوع السلطة التي سيتم تسليمها وكيف ... وهل هي سُلطة أم سُلطانية ... وهاتتسلم لمين ؟

السلطة يا سادة المجلس عاوزها تفصيل .. وعاوزها تتسلم لواحد من أتباعه .. وصنيعته ... بل والأغرب اللي مش عارف لفت نظركم ولا لأ إنه الوحيد اللي أختار نائبة في لحظةإعلانة رسمياً عن ترشحه

يعني بقت Package على بعضها ... عاوز مكرونة .. لازم تاخد معاها صلصة

عاوز منصور حسن ... لازم تاخد معاه عسكري ولواء سابق إسمه سامح سيف اليزل كنائب

وبالتالي المجلس العسكري يريد ألا يخرج الموضوع من يده وفجأة يلاقي رئيس محترم ويا سلام لو و ميول إسلامية تبقى سنتهم سودا .. ويبتدي بقى ينكش في إمتيازاتهم واليغمة اللي عايشين فيها

ومش بس في خلال الجيل الأول للرؤساء في فترة بعد الثورة ... بل يجب أن يمتد هذا الولاء للنائب أيضاُ .. وكل تلك الفترة على حسب مكر المجلس العسكري وعصابتة كفيلة بإلهاء الناس وجعلهم ينسون إنهم قاموا بثورة على كل رموز الفساد والبرود والجمود

ولكم أن تتخيلوا كيف يضم المجلس الإستشاري اللي إقترح بل فصل قانون إنتخاب الرئيس ثلاث رؤساء

منصور حسن

عمرو موسى

وسليم العوا

إيه الحلاوة دي ؟

طب فرقوا إيه عن تفصيل أحمد عز رئيس لجنة الموازنة لقانون الإحتكار اللي على رأسة قانون إحتكار الحديد ؟؟؟

وشوفنا أول الأحزاب الكرتونية اللي أعلن تأييدة لمنصور حسن وهو الحزب الفاشل .. حزب الوفد اللي شبابة الواعي معتصمون الأن أمام مقر الحزب إعتراضاً على دعم الحزب لهذا المرشح الطاعن في السن

أنا قولت لكم إني أقسم بالله كنت باحسبة مات من زمان ... ده وزير يا جدعان سنة 79 .... واخدين بالكم ؟

والحمد لله اهو من ساعة ما تم تكوين هذا المجلس الإستشاري برئاستة وإحنا شوفنا الكوارث اللي مرت بمصر وكيف كان رد المجلس اللي لم يفرق كثيراً عن ردور أفعال مبارك الباردة

يعني المجلس العسكري عاوز رئيس تفصيل لا يصُد ولا يرد .... ونائب من العائلة العسكرية .... والامور تبقى 100 فل وتمنااشر

[متعب]

الرئيس متظبط تحت شعار الاراده الشعبيه من المجلس العسكرى

والمرشحيين مجرد واجه للنظام واستمراره وكلهم يؤدوا نفس الغرض

عمر سليمان . احمد شفيق . عمر موسى . العو

واغلب الظن انه عمر موسى لان ايده الوفد وبالطبع الوفد لا يتحرك إلا بمشورة الاخوان

وبالطبع ايضا مرسوم كل هؤلاء ليكونوا من ضمن الحكومه اذا فشلوا فى منصب الرياسه

عمر موسى رئيسا عمر سليمان نائبا وهكذا

والسؤال هنا

هل ستعود مصر الى سابق عهدها وهل ستقبل الثورة هذا ان يعاد النظام بهذه الطريقه وتنضرب على قفاها ؟

الاجابه لاء

ستعم الفوضى فى البلاد الى قيام ثورة مسلحه تكنس كل هؤلاء من على الساحه

[باهى الطائر الحزين]

بالراحه علينا يا س س

نفسنا انقطع من الجرى وراك

خلينى اشم نفسى وارتب افكارى وارجعلك

الموضوع كبير / كبير اوى

[باهى الطائر الحزين]

قرأت ان مرشح ما ؛ دوله عربيه ستدعم

حملته الإنتخابيه ؛ بمائه وخمسون مليون

ثلاثون الف توكيل × مائة جنيه = كام

يكفو ولا لأ يا عزيزى / رؤوف

واهى زنبوبه والحال انت عارف مش ولابد اليومين السود دول