المعاهد والجامعات الخاصة,,,نظره موضوعية

[harmonic_balance]

اخوانى الاعزاء

فى السنوات القليله الماضيه انتشرت الجامعات الخاصة بشكل ملفت md2:

ما رايكم في هذه الظاهره ?

وهل تعود بالايجاب على مجتمعنا ام بالسلب? :angry:

[yasovinas]

صادفت شاب ابن احد العاملين معي خريج حديث من علوم كمبيوتر بالمعادي المفروض انه متخرج بعد اربع سنوات دراسه علوم كمبيوتر يعني الطبيعي انة لا يتقن شيء اكثر من اللغة الانجليزية لغة الدراسة والكمبيوتر مادة الدراسة واحضرة والدة للبحث عن وظيفة طلبت منه ان يعد لنفسة سيرة زاتية على الكمبيوتر بالانجليزية فما كان منه الا ان نظر لي بكل بلاهه واستغراب قلت يمكن مش عارف يكتب يعني الموضوع نفسه فاعطيتة سيرة زاتية جاهزة على الكمبيوتر وقلت له عدل البيانات وفقا لبياناتك

وكانت الكارثة الاستاذ مش بيعرف انجليزي اكتر من طالب اولى اعدادي في مدرسة ام الخلول بباكوس والكمبيوتر بالنسبة من اهل الجن والعفاريت

خريج اكاديمية المعادي لعلوم الكمبيوتر

[harmonic_balance]

يا نهار ابيض ,,,,, :angry:

معقوله في خريجين بهذا المستوى md2:

[فــيــروز]

يا نهار ابيض ,,,,, :angry:

معقوله في خريجين بهذا المستوى  md2:

ولم لا !! خصوصا اذا كانت الجامعات الخاصه مجرد وسيله للتغلب على ضعف امكانيات الجامعات وفى نفس الوقت لا تحتاج الى مجموع كبير لدخولها مع سهولة مناهجها "او تفاهتها" لو اردنا الصدق .. متوقع كذلك ان تنخفض بها نسبة الرسوب لرغبة المعهد الخاص او الجامعه الخاصه فى جذب اكبر عدد من الطلبه بصرف النظر عن مستوى الدراسه :angry:

[harmonic_balance]

طب ياجماعه خلونا نقول كلمة حق,,,,اشمعنا عمر ما حد هاجم الجامعه الامريكيه او اكاديمية السادات او اخبار اليوم ?

مش دول برضه هيئات تعليميه خاصه?

ليه الخريج من عندهم دائما مطلوب في سوق العمل,,,انا فعلا نفسي افهم :)

[فــيــروز]

الجامعه الامريكيه اعتقد لها وضع مختلف

الجامعه الامريكيه لها سمعه تحرص عليها ولن تمنح شخص شهاده لا يستحقها لتحافظ على تلك السمعه .. كما انها ليست مؤسسه يبحث اصحابها عن مجرد الربح كى يتساهلوا فى مستوى الطلبه الملتحقين بها او فى الاختبارات التى يمرون بها للنجاح و الحصول على الشهاده

ليس لدى معلومات كافيه عن اكاديمية السادات ولا اخبار اليوم

[elnegm]

اعتقد يا جماعة ان الموضوع ملهوش علاقة بالجامعة لكن له علاقة بالطالب نفسه

يعني في الجامعات الخاصة والحكومية في طلابة بيتخرجوا ومش فهمين اي حاجة في التخصص بتاعهم وفي الاخر دي بيجي علي الطالب مش علي الجامعة لانه هو لو راح اشتغل في مكان معين اكيد هيترفض لو حد اختبره اكيد هايبان انه ضعيف فالموضوع كله متعلق بالطالب نفسه مش الجامعة .

[ابو يوسف]

أكثر ما يدهشنى هو خريجى بعض معاهد الكمبيوتر ....

تجدهم يفهمون فى كل شىء ..

الا شىء واحد ....

الكمبيوتر !!! :) fr1::

[Farida]

انا اللى باعيب عليه بصراحه فى الموضوع ده عدم وجود هياكل لأعضاء هيئه التدريس مافيش رئيس قسم و اساتذه و معيدين ...لأ هم بيستعينوا باعضاء هيئه تدريس من الخارج يعنى من الجامعات الحكوميه و اعضاء هيئات البحوث و كل واحد و ضميره مافيش محاسبه و لا مراقبه الناس دى بتدى ايه و لا بتعمل ايه .....انا شايفه العيب مش فى الطلبه لآ فى غياب هياكل سليمه لأعضاء هيئات التدريس

[yasovinas]

الفرق بين الجامعه الامريكية او اكاديمية السادات واخبار اليوم

هذه الجامعات الخاصة المذكورة اعلاه لها سمعتها الاكاديميه ومخصصة للصفوة ولا اقصد الصفوة المادية ولكن صفوة الفكر يعني بلغتنا بتطلب مجاميع كبيرة

لكن الجامعات الاخرى الجديده زي المعادي و6اكتوبر هذه الجامعات الجديده مفتوحه علشان اللي مجموعه قليل ومعاه فلوس وعايز ياخد شهاده جامعيه لزوم الوجاهه او لزوم الشغل يدفع يعني بدل ما كان الاغنياء بيبعتو اولادهم المدللين اللي مش فالحين في الثانويه العامه دول اوروبا الشرقيه مثل رومانيا وبلغاريا يقضوا اربع او خمس سنوات هلس في هلس ويرجعوا بشهادة جامعيه واحيانا لو معاهم فلوس كتير يرجعوا بدكتوراه كمان بدل ما يدفعو الفلوس في هذه الجامعات سهلناها لهم وبقى الدفع في الداخل يعني نوع من انواع استقطاب الاستثمارات العربية والمحافظه على العمله الصعبة

[harmonic_balance]

أكثر ما يدهشنى هو خريجى بعض معاهد الكمبيوتر ....

تجدهم يفهمون فى كل شىء ..

الا شىء واحد  ....

الكمبيوتر !!!  :rolleyes:  :lol:

mc:

[METALLICA]

لكن الجامعات الاخرى الجديده زي المعادي و6اكتوبر هذه الجامعات الجديده مفتوحه علشان اللي مجموعه قليل ومعاه فلوس وعايز ياخد شهاده جامعيه لزوم الوجاهه او لزوم الشغل يدفع يعني

بالضبط يا عزيزي . . .

يعامل الطالب بالجامعة الخاصة معاملة الزبون - والزبون دائماً على حق - . . .

بمقارنة بسيطة بين التخصص العلمي الذي أقوم بالتدريس به في إحدى الجامعات الحكومية ، وبين مثيله في جامعة 6أكتوبر :

1- هيئة التدريس بالجهتين واحدة وهم نفس أعضاء هيئة التدريس بالجامعة الحكومية ( طب ما هو طبيعي ؛ يعني هيجيبوا منين يعني )

2- المناهج متشابهة تماما.

3- الإمكانيات بالجامعة الخاصة أكبر ( فلوس بقي ) والطالب يملك مالاً بشكل ملحوظ عن مثيله في الجامعة الحكومية .

4- مستوى الطالب في الجامعة الخاصة ضعيف بشكل واضح بالمقارنة بمثيله بالجامعة الحكومية.

5- يقبل الطالب بالجامعة الحكومية تحت شرط المجموع بالإضافة لإمتحان القدرات في التخصص الذي أعمل به .

6- يقبل الطالب بالجامعة الخاصة تحت شرط واحد فقط ؛ قدرته على سداد المصروفات

7- الطالب في الجامعة الحكومية ( بيطلع عينه و عين كل اللي حواليه من ضغط التعليم وقوة العمل عليه ) ؛ بينما الطالب في الجامعة الخاصة يقوم بدفع فلوس لأي خريج قديم من الجامعة الحكومية أو أي متخصص في نفس المجال لإنهاء أعماله ؛ وما عليه إلا حملها بالسيارة الخاصة به إلى مقر الكلية .

8- إذا ما جال بخاطر أحد طلاب الجامعة الحكومية عمل المثل - بتنفيذ أعمال دراسته بمقابل - لا يكون نصيبه إلا أن يحاول الإجتهاد السنة المقبلة في محاولة النجاح بمجهوده الشخصي ؛ بينما في الجامعة الخاصة يكون الطالب في بعض الأحيان سارقاً لأعمال الطلاب السابقين له ؛ ناسباً إياها لنفسه ، أو يكون مهملاً إهمالاً يستحق رفده من الكلية ، أو متطاولا على أحد مدرسيه :rolleyes: .

عند المطالبة برفد أو تقديم درجات طالب راسب يكون تصرف عميد المعهد او الكلية الخاصة كالتالي ؛ لما أسقط العيال أو أرفدهم هنجيب منين فلوس علشان نقبضها . . . .

وا تعليماه . . . .

أعتقد أن تلك المؤسسات الخاصة ينبغي خضوعها لمتابعة قوية وفعالة من جهة الجامعة الحكومية . . بالإضافة لوجود معايير أخري غير القدرة على دفع المصروفات ؛ كشرط للقبول بتلك المؤسسات العلمية الخاصة . . .

تم تعديل 30 نوفمبر 2004 بواسطة METALLICA

[harmonic_balance]

اشكرك يا دكتور ميتاليكا على معلوماتك القيمه والتى احزنتني على مستوى التعليم الخاص :rolleyes:

ولكن حضرتك مش معايا انه ممكن يكون في طلاب بالفعل مجتهده وعاوزه تنجح فى التخصص اللى اختارته مش شرط انهم كلهم يكونوا مستواهم منحدر بهذاالشكل اكيد فى نسبه ولو بسيطه تستحق النجاح... :lol:

عموما احب اعرف نظرة حضرتك والدكتوره فريده فى وضع حل منطقى مبدئى

[METALLICA]

ولكن حضرتك مش معايا انه ممكن يكون في طلاب بالفعل مجتهده وعاوزه تنجح فى التخصص اللى اختارته   

أتفق معك في تلك النقطة . . . وفي تلك الحالة نحاول ثقل مثل هؤلاء . . ولكن يفشل ذلك في أكثر الأحيان بسبب تأثير الغالبية المهملة المحيطة به . . .

ولكن هذه النقطة تفتح نقطة أخرى هامة أحاول جاهداً على الوصول لتحقيقها ؛ ألا وهي أسلوب القبول بالجامعات بشكل عام . .

لا ننكر أن هناك من دخل كلية الطب استخصاراً لمجموعه الكبير بينما كان يرغب في دخول كلية الحقوق التي يلعن زميل آخر له وجوده بها متمنيا لو كان مكانه بكلية الطب . . . و نجد أن هذا الأول بكلية الطب يفشل في دراسته بعد ذلك . . . على الرغم من دخوله الكلية بمجموعه الكبير . . . عجباً . . . السبب هو عدم ملائمة تلك الكلية لقدراته وميوله ؛ في حين أن رغباته وميوله وقدراته تثبت تحقيقه لمستوى عالٍ في حالة دراسته للقانون ؛ بينما الحال منعكس لدى الثاني الدارس بكلية الحقوق والتي تثبت قدراته تفوقه الكبير المتوقع في حالة دراسته الطب . . . .

- وعليه فيجب أن نغير أسلوب قبول الطلاب بالجامعات ؛ حيث تكون عملية القبول خاضعة لإجتياز إمتحان قياس للقدرات بالكلية ذاتها للتأكد من ملائمة الطالب للدراسة بتلك الكلية . . . و هذا هو المتبع بكثير من جامعات العالم المتقدم . بل أن الجامعة الألمانية بمصر تقوم بتطبيق نفس تلك القاعدة في قبول طلابها . . .

- بالنسبة للجامعات الخاصة . . أعتقد أن القبول بها يجب أن يتم بمعرفة الجامعة الحكومية ذات نفسها .

مثال :

قبلت كليات الهندسة الحكومية حد أدنى للمجموع 95% على سبيل المثال . . . عنده أعتقد أنه ينبغي عدم نقصان الحد الأدنى للمقبولين بنفس الكلية بالجامعات الخاصة عن 90% على سبيل المثال ، وذلك في حالة إتخاذ مجموع الثانوية كمعيار القبول .. .

[هشام الجنيدى]

الجامعات الخاصه

هوه عيب ولا حرام ان الواحد يتعلم الى هوه عايزه طالما معاه فلوس

اعتقد لا لانه لو اتعلم زى ما هو عايز ونجح فعلا او نجح بالكوسه فان ده تاثيره عليه

لان لو اخدنا مثلا كليه الطب فى طلبه جامعات خاصه عندهم الكفاءه والقدره فى العمل ده لانه اتعلم صح بمزاجه محدش غصب عليه

واعتقد ان طالما هيئه التدريس تقريبا واحده بل على العكس

الجامعات الخاصه بتستعين باعظم المدرسين فى مجالهم علشان يعلمو الطلبه

يعنى مثلا فى كليه كب الاسنان الى انا بتعلم فيها

(خاصه) الدكتور الى بيدخل يشرح المحاضره مش دكتور بس

ده رئيس قسم فى الجامعه الحكوميه او بيكون دارس بره وشهاده الدكتوراه بتاعته من امريكا مثلا يعنى مش لعب عيال

نمره اتنين

الدكتور عندنا مثلا بيتعامل مع الطالب مباشره يعنى مفيش حاجز بينهم يعنى بيبقى فيه نوع من التعاون او الود بين الطرفين

فالدكتور بيشرح بمزاج والطالب بيفهم بمزاج

والى مش عايز يفهم هوه حر والى مش هيفهم هوه الى خسران

يعنى المشكله فى الطالب

بالنسبه لنظام الجامعه فهو نظام بيدى للطالب الحريه فى تحديد الى عايز يدرسه فى الوقت الى يشوف نفسه مستعد ليه

يعنى اختيارك انتا الى بتحدده وتتحمل مسؤليه اختيارك

وبالنسبه للجامعات الحكوميه الكوسه برده موجوده بل على العكس الطالب بيكون مغلوب على امره ومش فى ايديه انه يتناقش مع اى حد

وكل نظام وليه عيوبه وكل قاعده وليها شواذ

والى عايز ينجح هينجح والى كسلان خليه نايم

وشكرااااااااااااا

[عادل أبوزيد]

الحوار لم يصل إلى تحديد أو قل تصور لحجم المشكلة التى نحن بصددها.

كل المداخلات لمست جانبا من الحقيقة ... فقط جانبا من الحقيقة

المسألة لاتنصب فقط على الجامعات و المعاهد الخاصة و لكنها تمتد إلى جذر العملية التعليمية ...

و نتجنى على الحقيقة لو تصورنا أن الجامعات الغير خاصة بعيدة عن الشبهات.

و نفس الحديث يمتد بصدق و أمانة إلى التعليم من أول الحضانة.

و لنتفق على أن نفرد موضوعات أخرى لباقى جوانب العملية التعليمية.

و أعود الآن إلى لب مداخلتى ..

هل تعرفون الأمثال الشعبية "مش كل من نفخت طبخت" أو "مش كل من ركب حصان خيال" ....

هذا هو جوهر المشكلة و جوهر الحل و أدعوكم و أنتظر منكم البحث عن تعبير "Accreditation" و هو ببساطة العملية التى من خلالها يتم فرز ما هو تعليم حقيقى عن ما هو تعليم (كدة و كدة)

لا بد أن يكون هناك مقياسا يفرق بين مثلا مدرسة الفلاح لصاحبها الحاج فلان و بين المدارس العريقة الراقية مثل فيكتوريا كوليدج أو سان جورج ... إلخ

لابد من مقياس موضوعى لا يتأثر بفاخر الأثاث و الرياش.

أنتظر من الأفاضل الذين شاركوا فى هذا الموضوع أن يساعدوا فى إثراء ليس الموضوع فقط و لكن الحوار عن التعليم و العمل فى هذا الوطن.

أما واقع الحال الآن فلا يخرج عن محاولات للتعليم و التعلم بمستوى أقل بكثير مما يحتاجه الوطن.

مثلا أن تعتمد هيئة ما - جامعة كلية مستشفى جريدة - على أشخاص لا ينتمون لها هذا هو الخلل بذاته

[METALLICA]

المسألة لاتنصب فقط على الجامعات و المعاهد الخاصة  و لكنها تمتد إلى جذر  العملية التعليمية ...

الأخ الأكبر العزيز عادل أبو زيد . .

تحية طيبة . . وبعد . .؛

أنا معك تماما في هذه النقطة . . وهذا ما حاولت ان اوضحه في الموضوع الخاص بالتعليم في مصر كيف تراه مستقبلياً

ولكني لم أكمله لسبب شعوري بعدم اهتمام الأعضاء بإبداء أرائهم حول الموضوع . . .

وعندما وجدت نفسي انا الوحيد صاحب آخر مجموعة مداخلات متتالية أحسست اني أحدث نفسي ؛ مما دفعني لعدم إكمال الموضوع

وشكراً

[yasovinas]

مشكلة التعليم في مصر هي الخلفية والاعتقاد اللي موجود عندنا جميعاً وانا اولكم وهي الشهادة والشهادة ولا شيء غير الشهادة

والمقصود هنا ليست الشهادة في سبيل الله (لا يقولوا علينا ارهابيين)

ولكن المقصود هو الشهادة العلمية البكالوريوس او الليسانس

اللي معاه شهادة يبقى محترم ويسوى ويستاهل يتجوز بنتي وهي نفسها مش هتوافق على شاب معاه مثلا دبلوم او متوسط التعليم ليه يا بنت الحلال تقوللك مستواه الفكري

طيب وهل الشهاده الجامعية هي دليل على تطور او تثقيف الشخص لا اظن

طبعا السبب في ذلك يبدا من زماااان من ايام الملكية كان المجتمع قسمين فلاح جاهل او افندي متعلم وطبعا الافندي ده كان حاجه كبييييرة

بعدها جائت الثورة المجيده وايضاً رسخت مبدا التعليم كالماء والهواء بينما الثقافة هي التي كالماء والهواء ومعاك شهادات ايه تساوي كام وبالطبع التعليم الفني راح في خبر كان ايضا

ولان الجميع اصبح موظف وما فيش حد بيترفد الا بقرار جمهوري (على راي عادل امام) يبقى نخلي التعليم والمعلمين موظفين يدخل الفصل يخر الكلمتين اللي حافظهم والعيال يحفظوهم وسلامتك خد شهاده وروح الحق الميري

مشكلة التعليم هي طريقه الحفظ والصم اللي عايشينها في بلادنا

وللاسف في رايي ما لهاش حل لان علشان تغير من هذه الطريقة لازم تغير اللي بيدرس للطالب اللي في الحضانة وتجيب واحد يقدر يخفز التلميذ على البحث والفهم وطبعاً فاقد الشيء لا يعطيه المدرس اللي اتعلم طول حياته بطريقة الصم والحفظ هيغيرها ازاي

اسف للاطاله