نحن نربى اولادنا على العنصرية و ثقافة عدم الاختلاف

[moamana]

السلام عليكم و رحمة الله و بركاته

استوقفتنى مواقف بسيطة من اطفال صغار

طفلة تسالنى ليه يا تنت انت بتسمعى موسيقى انت كده هتروحى النار

ليه انت مش منتقبة اللى مبيغطيش وشه فى النار

الناس المسيحين جيرانا دول فى النار

الرجل المذيع ده بيقول كلام اهبل و بابا بيقول عليه متخلف

طبعا هذه امثلة بسيطة لطريقة تربيتنا لاولادنا

طريقتنا بتقول لما يجى طفل يسالك اعمل ليه كده قوله عشان مترحش النار عشان البوليس ميزعلش منك و يقبض عليك عشان هو ده الصح و غيره غلط

طيب ما تيجى نشوف الناس المتحضرة اللى عارفين يربوا بيربوا ازاى

انت عارفة يا تنت بابا قالى ان اغانى الاطفال و الاغانى اللى كلماتها حلوة حلال نسمعها و الاغانى اللى كلماتها وحشة زى الشتيمة حرام نسمعها

ماما قالتلى ان ربنا ممكن يحبنا اكثر لما نغطى وشنا لانها حاجة فيها حسنات اكثر

جيرانا المسيحين ماما قالتلى اتعامل معاهم كويس زى ما رسولنا كان بيعاملهم

و هلم جرا

عايزين منربيش اولادنا يصدروا احكام على الاخرين اول ما يبداوا يتكلموا

لان المصيبة اللى احنا فيها الان من سلف و اخوان و فلول و ليبراليين و علمانيين مقطعيين بعض من هذا الامر اننا تربينا على ان ارائنا هى الاراء الوحيدة الصحيحة و الباقيين هبل لا يفهمون

و لان ربنا نجانى من التعليم المصرى علمونا زمان ان ثلاثة اصدقاء اغمضوا اعينهم و تلمسوا الفيل و لم يكونوا قد راوه من قبل

فالاول قال: انه طويل و رفيع فقد كان يمسك بخرطومه

الثانى: انه خشن و ضخم فقد كان يمسك بجسده

و الثالث قال : انه عريض و دائرى فقد كان يمسك باذنيه

و عندما فتحوا اعينهم راوا الفيل انه هذه الاشياء الثلاثة

و علمونا ايضا ان ننتقد شكسبير و نقول لما لم يعجبنا تعبيراته فى الموقف القصصى الفلانى

بينما نحترمه لانه كان اعظم الكتاب و هذه هى وجهة نظره

علمونا ان الحرية الشخصية تقف عند حدود الحرية الشخصية او ايذاء الاخرين

و عندما عدت اللى التعليم المصرى فى الجامعة فوجئت بانى رسبت فى مادة لاننى لم اذاكر من الكتاب الجديد الذى كتبه دكتور القسم الجديد و ذاكرت من كتاب دكتور اخر كان رئيس القسم القديم و استعملت تعبيراته رغم انه نفس المنهج بالحرف

المشكلة مش فى التعليم المصرى المشكلة فى المصريين اللى بيعلموا المنهج المصرى

المشكلة فى كل اب و ام بيعلموا بطريقة الحرام و النار و الغلط و بينسوا يوضحوا السبب ورا الموقف انه ليه غلط عشان ميوجعوش دماغهم و يشرحوا كثير او عشان فاكرين ان اولادهم فى سن صغيرة مبيفهموش او عشان للاسف هم انفسهم لا يؤمنون سوى بهذه الافكار بلا تفكير