ماحصل اتفاق مع الكفيل وعايز انزل مصر...اعمل ايه؟

[madey]

على فكرة انا حصلى نفس موقفك ده من 3 سنين

رحت على شركة براتب محترم وقتها ومشاريع الشركة كان فى تبوك بس لما كلمت صاحب الشركة قالى تعالى الرياض الاول

رحت اول يوم وصلت بعتلى مع المحاسب انه هيخفض راتبى 2000 ريال مرة واحدة طبعا انا الدنيا لفت بيا ومكانش ليا خبرة بالسعودية بس كان معايا خبرة من مصر 7 سنين كمهندس طرق وجسور فى احدى شركات وزارة النقل المصرية

لما استجمعت قواى قلت للمحاسب ساعة وهارد عليك كلمت ناس اصحابى فى السعودية وكلمت بعض مهندسين فى الشركة دى قالولى انه بيدور على مهندسين خبرة 7 سنين او اكتر فى المجال ده بقاله اكتر من سنة مش لاقى اصحابى قالولى اوعى توافق رغم وجود بعض المهندسين المصريين للاسف حاولوا يقنعونى انى اوافق على تخفيض الراتب او هيرجعنى مصر

توكلت على الله ودخلت له المكتب بدون استئذان سكرتارية او غيره وزعقت معاه جامد وقلت له رجعنى مصر قالى ليه قلتله بصراحه الشركة مش عجبانى ومش زى ما كنت متوقع

سالنى المحاسب كلمك (قصده موضوع تخفيض الراتب ) قلتله كلمنى او ماكلمنيش انا مش عايز ااقعد هنا عايز ارجع مصر قالى اوكى

وبعدين زق عليا كل ال فى الشركة علشان يقنعونى انى اقعد وفى الاخر قلت لهم لو قعدت ااقعد بشرط انى لو اثبت كفاءة وخلصت اول مشروع فى ميعاده يزود راتبى 2000 ريال واصريت على كتابة البند ده فى العقد وقد كان ...وبدل ما هو يخفض راتبى 2000 ريال انا احتفظت بيه وزودته انا بعد اول مشروع نفس القيمة

الخلاصة تمسك بحقوقك مهما كان

برافو عليك

انا حبيت انقل موقفى علشان الاخوة يعرفوا ان السعودى الجشع لما يعرف انك مش فارقة معاك ومتمسك بحقك فى الاخر هو ال بيرضخ ليك لانه محتاجك ولو مش محتاجك مكانش جابك من الاول واتحمل مصاريف البحث عنك واستقدامك

وعلى فكرة انا منستش لهم الموقف الاول وبعد 3 سنين بالضبط قدمت استقالتى ( رغم تبقى سنة فى عقدى) واتنازلت عن فلوس كتير مقابل انى اسيبهم وحصلت الحمد لله على شغل احسن من الشركة السابقة بكتير وناس محترمة جدا

الخلاصة انا مش عايز حد يزعل من سفريته الاولى لان دايما المرة الاولى بتكون للتعلم ومعرفة سوق العمل ومتطلبات السوق

وربنا يوفق الجميع

معاك فى كلامك ميه ميه

وده اللى حصل معايا مش مرة مرتين كمان

انا اخدت نهاءى مرتين وكل مرة كنت بتعلم وماينفعش الدرس الاول يبقى هو مقياس امشى عليه ولا اقرر منه

والله يا جماعه الوضع كل يوم من الاسوء للاسوء

وانا مش عارف اعمل ايه بجد

ارجوكم ساعدونى

انا بمر بحاله نفسيه سيئه جدااااااااااا

بص يا استاذ مجدى

اول شهرين تلاتة هما اصعب فترة فى الغربة بعد كده بتتعود ..حاول تتاقلم مؤقتا لمدة سنة تعرف السوق والدنيا ماشية ازاى وبالمرة تلم الفلوس ال انت صرفتها على السفرية دى ....وبعد عقدك ما ينتهى قلهم مع السلامة ومحدش يقدر يقعدك ...

[moshtaak]

يااخى

خد قرارك النهارده واخلص

وبطل تتعب نفسك

انت اللى بتعمله لامؤاخذه بتعك

ماتزعلش منى

يعنى دلوقتى لازم تاخد قراراك

ياهتكمل معاه وتفوض امرك لله

ياتاخد قرار فورى وتمشى منها فورا

قرر ونفذ

ياتسمع كلام الناس اللى لها خبرة وبتقولك استنى واستحمل الاول واشرب السوق وبعدين ور على شغل وخد نهائى منه

ياما مش قادر

اعمل اللى قولتلك عليه وماتكملشى وارجع بلدك وخلاص

[الكينج مجدى]

يااخى

خد قرارك النهارده واخلص

وبطل تتعب نفسك

انت اللى بتعمله لامؤاخذه بتعك

ماتزعلش منى

يعنى دلوقتى لازم تاخد قراراك

ياهتكمل معاه وتفوض امرك لله

ياتاخد قرار فورى وتمشى منها فورا

قرر ونفذ

ياتسمع كلام الناس اللى لها خبرة وبتقولك استنى واستحمل الاول واشرب السوق وبعدين ور على شغل وخد نهائى منه

ياما مش قادر

اعمل اللى قولتلك عليه وماتكملشى وارجع بلدك وخلاص

مقدرش ازعل منك يا سيدى الفاضل

حضرتك بتنصحنى ولازم اقبل نصيحتك وافكر فيها والا مكنتش سالت وطلبت نصيحتكم ليا

انا ان شاء الله هستنى بعد الحج

منها تكون الامور فات عليها شهر واكتر واقدر احكم بشكل كويس

ولو الامور استمرت على كده واستمر تعنته

مش هتردد انى ارجع بلدى