جمعة العمل موعدنا الجمعة 3/6/2011

[Howayda Ismail]

سبحان الله يا روشة

انا بقالي اكتر من اسبوع عمالة افكر في موضوع الزبالة دا

اختي في رابعة سياحة و مشروع التخرج عندهم

السلبيات اللي بتعيق السياحة في اسكندرية

و العيال ما شاء الله عليهم ما صدقوا و نازلين بصور تقرف بصراحة كرهوني في نفسي

من ساعتها و انا عمالة اقلب الحوار في دماغي يمين و شمال و ان شاء الله باحاول اظبط المشروع في دماغي كده على ما العيال دول يخلصوا امتانت و ينزلوا يطبقوا المشروع دا و معاهم اختي طبعا

عاوزة اعمل حملة في اسكندرية

و اسميها

اسكندرية مدينة بلا قمامة

يكون هدف الحملة ان كل شارع في اسكندرية يبقى زي الفل

و الفكرة قريبة من اللي قولتيه كده

الشباب متوزعين طبعا على مناطق اسكندرية كلها و شايفين القرف دا كله و مش عاجبهم

فا بافكر اني اقسمهم مجموعات تعدي على البيوت و تجمع مبلغ من كل شقة

و الشباب دول يتفقوا مع زبالين

و بعربيات نص نقل يركب شابين ثلاتة و معاهم اتنين زبالين و يعدواعلى البيوت في معاد معين و يلموا الزبالة و بعدين ياخدوها يودوها لمقلب الزبالة

او لو في مصانع تدويير زبالة انا بصراحة مش عارفة بس هاسأل في الموضوع دا

المهم اني عاوة اسكندرية تكون اول مدينة مصرية تتخلص من الزبالة

و هانبدأ طبعا الفكرة بالاماكن المعروفةف اسكندرية و بقت متبهدلة جامد

محطة الرمل المنشية الابراهيمية و طبعا الاماكن اللي فيها آثار عندنا و السياح بيجوا يزروها

و تبقى خطوة اولى لانها تشتغل في باقي الاماكن

طبعا دا ان شاء الله هايتم بالتعاون مع دكاترة سياحة و المحافظة و جمعية رسالة اسكندرية

باحلم ان الحملة دي تنجح و نعلن عنها في التليفزيون و الجرايد و حد من السادة بتوع الاعلام يعمل حاجه مفيدة في حياته توحد ربنا و يتبنوا الحملة عشان تعمم في باقي المحافظات

هو لحد دلوقتي حلم بس ان شاء الله هاحاول بكل ما اقدر احققه

و اكيد ان شاء الله هالاقي ناس زيي عندها نفس الحلم دا

و ربنا يسهل ان شاء الله

شهر كده بإذن الله و هاقولكم عملت ايه لانهم عندهم امتحانات دلوقتي

طبعا لو حد هنا عنده اقتراحات يشاركني بيها في الموضوع دا خصوصا اخوان م اسكندرية يبقى جزاهم الله خير

اختنا الفاضلة هند علي

الفاضل ابو محمد

الفاضل اسلام المصري

الفاضل محمد عبد العزيز

و بما انهم في اسكندرية حاليا مش مغتربين زي حالاتي لو انضموا ليا في الفكرة هايبقى انجاز ليها طبعا

جزاك الله خير يابينك على الموضوع الهايل ده

مخبيش عليك النظافة فى اسكندرية بقت حسب المنطقة واهميتها

يعنى امبارح كنت عند مستشفى مصطفى كامل مافيش ذرة تراب فى الارض والدنيا زى الفل

وينطبق الكلام ده على منطقة الازاريطة والمكتبة والشلالات ومناطق كتير فى اسكندرية خاصة

لكن ارجعى بقى محطة الرمل بداية القرف صحيح مفيش زبالة لكن امر ماخلاش من فوارغ اكياس مطاعم او علب كنز

او زجاجات مياه فاضية وبواقى الايس كريم طبعا فى اماكن متباعدة والسبب اولا قلة الوعى من الناس واولادهم

اللى معاه حاجة عاوز يخلص منها فمش بيعرف يرميها فين وهنا المشكلة الرئيسية فى الموضوع انه معدش

فى صناديق قمامة معلقة فى الاعمدة زى زمان شارع سعد زغلول من اوله لاخره وده شارع رئيسى مافيش باسكت

واحد ترمى فيه فضلات الاكل حتى حديقة سعد زغلول نفسها مافيهاش صندوق قمامة وناس كتير وشباب كتير بيقعد

ياكل فيها لقربها من فول محمد احمد وطبعا مش كل الناس عندها فكرة تشيل كيس فى شنطتها تشيل فيه الزبالة

الكارثة وانا رايحة لسة على محطة الرمل بضرب بعينى عند محكمة الحقانية اول محكمة فى اسكندرية

من شارع السبع بنات منظر صراحة يقرف بمعنى يقرف طرانيت قمامة تزكم الانوف من بواقى خضار سوق راتب والبياعين

ملاصق لشبابيك المحكمة السفلية ملو الرصيف لايجرؤ حد يمشى على الرصيف من كترها وريحتها وطبعا العربيات

من الزحمة بتضطر تمر على جزء منها وتنشتر اكتر واكتر

المفروض ان فى شركة نظافة خاصة متعاقدة معاها المحافظة ولحد دلوقتى بيحصلوا مننا على فاتورة الكهرباء

مبلغ مالى حسب استهلاك الكهربا مش حسب الزبالة وده خطأ كبير لان فى مناطق نظيفة لكن استهلاكها عالى

فى الكهربا فى حين مناطق شعبية او عشوائية بها محلات ومنازل بتخرج زبالة بكميات كبيرة للشارع وكهربا اقل

المشكلة ان الشركة بعمالها شغالين مع نفسهم بمزاجهم تلاقيه موجود فى الشارع اه لكن بيحسوك ويتلكع

بيخلص وقته وخلاص رغم الزبالة قدامه ومش بيشيلها حتى دوريات التفتيش عليهم مش زى الاول

يااما تلاقيه قاعد على الرصيف وحاطط المقشة جنبه ومبيعملش حاجة ياواقف عند اى محل بيتكلم مع عمال المحل

فين دور محليات الندامة ودور المحافظة من الكلام ده ومعروف العقد مع شركة النظافة بملايين بيتحملها

الاهالى

انا متضامنة معاك ياروز فى الحملة دى هو الحمد لله المنطقة اللى انا ساكنة فيها كويسة لانها على

شارع رئيسى لكن الشوارع الجانبية عاوزة اهتمام ومتابعة برضه

الزبالة فى الميادين كتير والطرق الجانبية وفى مشكلة ان احياء كتيرة اتسرق منها صناديق القمامة

استعملت فى نقل المسروقات يوم 28 يناير وقبل كده جزء اخده الاهالى لاستعمالات شخصية فى منازلهم فوق الاسطح

كذلك محلات العصير مستغلة صناديق المناطق لصالحها

المشكلة كبيرة لان المناطق اللى محتاجة نظافة بجد احياء فقيرة واكيد فى ناس مش فى مقدورها تدفع مرتين

للزبال وللمحافظة يبقى الحل ان المحافظة تلغى تعاقدها وترجع زبال زمان ياخد من الشقق وتحاسبه

كمان معظم العمارات بتدفع نفس الفاتورة رغم ان البوابين متكفلين بموضوع النظافة داخل وخارج العمارات

انا احيانا باضطر اكلم الملاحظين ينبهوا على العمال القمامة يهتموا شوية خصوصا على مخلفات ردم ملقاة على الارصفة

عمال المقاول تحفر مكان وتردم وتسيب الباقى فى الشارع وتمشى والهوا يطير الاتربة والاكياس وكان محدش نظف

اضعف الايمان انى بامنع ولادى يرموا حاجة فى السكة واحنا ماشين واشيلها معايا لحد اقرب صندوق الاقيه

اسفة انى طولت عليك لكن انا حقيقى نفسى اشارك باى حاجة نساعد بيها ويبقى تنفيذ مش كلام وخلاص على النت

شوفى محتاجة منى اعمل ايه واقدر اعمله وانا تحت امرك

اناعاوزة اساهم بشكل ايجابى اكبر ونفسك معانا بقى

[Om Zayd]

الدعوات لجمع العمل بتكتر ما شاء الله على الفيس

https://www.facebook.com/4allOrganization?sk=wall

[tarek hassan]

الدعوات لجمع العمل بتكتر ما شاء الله على الفيس

https://www.facebook...ization?sk=wall

http://www.facebook....=app_4949752878

جمعة العمل الأولى 3 يونيو

تم تعديل 31 مايو 2011 بواسطة tarek hassan

[pink rose]

الحمدلله الدعوات بقت كتيرة جدا جدا

و دا معناه ان الناس بدأت تتجه للاتجاه الصحيح

[abobakr]

والله فكرة جميلة لكن انا كان رايي تاخريها جمعة كمان عشان عقبال ما تتنشر يعني لحد دلوقتي الاعضاء على الفيس مكملوش 200 واحد

والجمعة بتاعة 27 كان الكل بينادي بيها من قبلها باسبوعين وكانت جمعة بيضااا

[pink rose]

والله فكرة جميلة لكن انا كان رايي تاخريها جمعة كمان عشان عقبال ما تتنشر يعني لحد دلوقتي الاعضاء على الفيس مكملوش 200 واحد

والجمعة بتاعة 27 كان الكل بينادي بيها من قبلها باسبوعين وكانت جمعة بيضااا

معاك حق فعلا لسا الحملة ما كملتش 200 واحد

بس لو حضرتك عملت سيرش على الفيس هاتلاقي حوالي 6 او 7 صفحات بنفس الاسم و الاعداد فيها مش قليلة ابدا

المقصود ان دي مش الصفحة الوحيدة للدعوة

و بالتالي ناس كتير بتنادي بالموضوع دا

و لو الجمعة دي ما حصلتش ممكن تكون الجمعة اللي بعدها المهم ان الناس نفسها بدأت طالب بجمعات للعمل و دا المطلوب فعلا

[pink rose]

دعا دكتور ماجد عثمان وزير الاتصالات وتكنولوجيا المعلومات، الي اعتبار يوم الجمعة القادمة 3 يونيو، ''جمعة العمل''، وقال على حسابه الشخص علي ''فيس بوك''، القرية الذكية ستعمل بكامل طاقتها وبعض الشركات الخاصة أيضا ستعمل. واضاف نريد أن نرسل رسالة ايجابية للمجتمع.. مصر عادت من جديد".

وعلم مصراوي ان بعض الشركات المصرية والعالمية، العاملة في القرية الذكية، استجابت لهذه الدعوة، ولم يكشف بعض عن تفاصيل برنامج هذا اليوم، وعن ما اذا كان سيكون يوم عمل عادي، ام سيتخلله بعض الانشطة الاجتماعية الاخرى.

مصراوي

[ام سلمي]

اهه الفيديو

http://www.youtube.com/watch?v=xd90qMYHYzY

[pink rose]

اتفرجوا على منى الشاذلي دلوقتي

بيتكلموا عن جمعة العمل في القرية الذكية

الحمدلله مبادرة طيبة جدا

و ان شاء الله تنتشر بين كل القطاعات

[Handasah]

اتفرجوا على منى الشاذلي دلوقتي

بيتكلموا عن جمعة العمل في القرية الذكية

الحمدلله مبادرة طيبة جدا

و ان شاء الله تنتشر بين كل القطاعات

احنا عندنا فى القرية الذكية شركات كثيير هتشتغل بكرة انشاء الله وتشارك فى جمعه العمل .

انا عن نفسى فى شركة القرية الذكيه نفسها هنزل طبعا واشارك كأى يوم عمل عادى لان دة حق مصر علينا كلنا ونشارك فى تنمية واعمار مصر ..........

[Simba]

لا يمكن ان يكون هناك عمل وانتاج جاد بدون وجود عدالة اجتماعية حقيقية وملموسة

تم تعديل 2 يونيو 2011 بواسطة سمبا

[Ahmed Anwer]

ما شاء الله

الجمعة نجحت ،، نجاح ممتاز علي الأقل علي المستوي الإعلامي

الجزيرة مباشر - مصر غطتها طول النهار من القرية الذكية

و الظريف لسه شايف تقرير عنها كمان في اليورو نيوز

صورة مشرقة فعلا لمصر

[pink rose]

إطلاق مبادرة وطنية بعنوان ثورة العمل والإنتاج والبناء بزيادة ساعات العمل وإلغاء أجازة السبت

أعلنت مجموعة من رموز العمل السياسي الوطني في مصر، اليوم الخميس، عن إطلاق مبادرة تحت شعار: "ثورة العمل والإنتاج والبناء" في حب مصر بهدف إحداث تآلف بين جميع القوى الوطنية من جهة، ومع المجلس الأعلى والقوات المسلحة من جهة أخرى، لدفع المخاطر التي تهدد الثورة والوطن.

وقال الدكتور عصام النظامي، عضو اللجنة التنسيقية لجماهير الثورة المصرية، إن المبادرة تتضمن مجموعة من المحاور، من بينها أن يعلن مجلس الوزراء زيادة دوام العمل لمدة ساعة يوميا، وأن يتم إلغاء أجازة يوم السبت لمدة محددة إلى حين اجتياز الأزمة، ودفعا للإنتاج، وحل مشكلات الجماهير، وتسهيل إجراءات الجوازات والتراخيص والبطاقات، وغيرها.

وتتضمن المبادرة أن يبادر المواطنون بالتنازل عن القضايا التي يمكن حلها من خلال الجلسات العرفية أو بالتراضي تخفيفا عن كاهل جهات التحقيق والتقاضي لتتفرغ لدورها الفعال في نظر القضايا المهمة، كما يقوم المصريون العاملون في الخارج بتحويل مدخراتهم لاستثمارها فى البنوك المصرية الوطنية والتبرع بنسبة لدعم مشاريع قومية للتنمية.

ومن بنود المبادرة أيضا تخفيض الاستهلاك وتقليل الفاقد عبر ترشيد استخدام السيارات توفيرا للوقود وحفاظا على البيئة، وتدشين حملة لإصلاح كافة تسريبات المياة في المساجد والمدارس والتجمعات من خلال عمل تطوعي يتم تمويله من القادرين ماديا، وأن يبادر الشباب بتشكيل لجان شعبية لنظافة أحيائهم وحراستها والتطوع للمساعدة في تنظيم المرور وخاصة في الضواحي السكنية، وأن يشكل الشباب لجان توعية سياسية للبسطاء تمهيدا لخوض الانتخابات.

ومن المقرر أن يطرح الدكتور عصام النظامي عضو اللجنة التنسيقية لجماهير الثورة المصرية تلك المبادرة خلال اللقاء الذي تنظمه جمعية "حماية الوحدة الوطنية"، والمقرر أن يعقد في حي عابدين بوسط القاهرة مساء اليوم، والذي تشارك فيه ائتلافات شباب الثورة ورموز العمل السياسي والوطني في مصر.

الشروق

و الله خبر جميل و مبادرة طيبة

يااااااا رب يتم تطبيقها فعلا