فوضى رياضة ما بعد الثورة ... جماهير الأهلي تتعرض للضرب الأن في بور سعيد

[se_ Elsyed]

أنا عاوز أسأل ... ليه ؟

لمصلحة مين ؟

ومين بيعمل كده ؟

مش هما دول الشباب اللي زي الفل اللي طلع زلزل الأرض من تحت الفرعون ؟

النهاردة ... مباراة بيني المصري البورسعيدي .. والاهلي ستقام الساعة السابعة بتوقيت القاهرة

سافرت جماهير الأهلي لمدينة أخرى مصرية - واخدين بالكم - ... وروابط تشجيع الأهلي أخدت معها لافتات عزاء للمرحوم العظيم الكابتن مسعد نور اللي توفى من يومين عشان تجامل شعب بورسعيد في وفاة هذا الرجل المحترم .... ولاعبي الأهلي مجهزين تي شيرتات عليها صورة المرحوم ...

وما إن هبط المشجعون من محطة القطار ببورسعيد ... إلا ووجدوا كمين من فلول من الشباب الضال في بورسعيد وهاتك يا ضرب بالحجارة والعُصي وكل اللي في إيدهم و ... ومطاردات في الشوارع ... والاهلاوية مش عارفين إيه اللي بيحصل ... وليه .؟

وأنتقل المحافظ والحاكم العسكري لمحطة القطار ونزل الجيش والشرطة للمكان ... وتم حجز حوالي 1000 مشجع داخل محطة القطار لتأمينهم ولحمايتهم من تلك الفئات الضالة ...

ليه ؟؟

هو في إيه ؟

والقطارات الأخرى اللي جايه من دمياط والأسكندرية وفيها ناس أهلاوية جايين يقضوا يوم جميل ويشجعوا فريقهم بكل ادب ... تم أيقاف تلك القطارات وغالباً سيتم إعادتهم الان

ليه ؟

وليه يتم نقل 6 عساكر إلى المستشفيات لإصابتهم من جماهير بورسعيد

ليه ؟

حتى الأن وباقي ساعة بالظبط على المباراة .. تمكن 500 شخص اهلاوي فقط من الدخول للإستاد

ليه ؟

أقسم بالله لن أنسى في حياتي منظر مرعب شاهدتة بعيني ..

أنا افهم إن الجماهير تشتبك أثناء المباراة أو بعدها ... لكن قبلها بثلاث أو أربع ساعات وعلى مشارف القاهرة .. ليه ؟

كانت مباراة في كأس مصر بين الأهلي والأسماعيلي في استاد القاهرة ..

وانا كنت باتغدا عند اختي في مدينة نصر وأستأذنت أروح اتفرج على الماتش في البيت وفاضل تلات ساعات ..

ويادوب قربت على الأتوستراد إلا والاقي الطريق واقف ....

عشرات الباصات جايه من طريق مصر الاسماعيلية ... تحمل جماهير الاسماعيلي ومتجهة إلى الاستاد ...

وكمية من الشباب العاري من ملابسة يعتلي سقف الباصات ... ومعهم كمية حجارة وضرب في المارة والسيارات بدون تمييز واللي ممكن 90 % من الناس اللي أنضربت دي منهم مش عارفين إن في مباراة النهاردة أو مش عارفين مين دول ؟

طب ليه ؟

ليه ؟

حد يجاوبني ....

النادي الأهلي لم يُنظم اليوم أي رحلات رسمية بالأتوبيسات وكلها كانت مبادرات من الجماهير من كل المحافظات

اضحككوا بقى .

جماهير الاسماعيلية أنتظرت قطارات الجماهير اليوم على محطة الأسماعيلية وهاتك يا ضرب بالطوب ....

ليه ؟

ثورة إيه دي ؟

وقامت عشان مين ؟

رئيس النادي المصري على التليفزيون يتأسف لما حدث .... وكان في إحتمال المبارات تتلغي ... والان توضع خطط لتأمين لاعبي الأهلي والقلة اللي قدرت تدخل الاستاد لكي تعيدهم للقاهرة

أنا ...

انا حزين ومحتار والله

ولا حول ولا قوة إلا بالله

[ozoozo]

نقطه صغيره هاقولها واخرج علي طول

الاسماعلاويه اللي كانو بيحدفوا بالطوب في الاوتوستراد كانو قبل الثوره

يعني الانفلات والبلطجه دي موجوده من قبل الثوره والظباط بيخافوا يضربوا فمابيدخلوش غير بعد العاركه ماتنفض

يعني بلاش الكلام الفاضي بتاع الثوره خربت البلد

هل تعتقدوا اخواني السذج انه لما بتكون في جريمه قتل ولا سرقه بتلاقي ظابط المباحث زي الافلام عمال يفكر ويحرق في سجاير ويجمع الادله ؟

اللي كان بيحصل انهم كانو بيجيبوا اخر ارقام اتصل بيها القتيل بالاضافه لمعارفه واصدقائه وياخده العلقه المتينه في القسم لغايه ما اضعف واحد يقر من الضرب(فاكرين الممثله حبيبه)

تم تعديل 29 أبريل 2011 بواسطة ozoozo

[amgadibrahim]

لا أعتقد أنها فوضى ما بعد الثورة

من زمان ومن واحنا أطفال كنا بنبقى عارفين إن مباريات الأهلي في بور سعيد دائما تكون مصحوبة بالمشاكل

يمكن اللي زود الموضوع شوية المرة دي الفكر الغالب عن معظم الجماهير بغياب الأمن وربنا يسترها إن شاء الله

بس زمان كنا نسمع ان لو الاهلي كسب اليوم مش هيخرج بسهولة من بور سعيد فهل هذه المرة ستتكرر مشاكل الماضي؟؟؟؟؟؟؟؟؟؟؟؟

[fatfouta]

ما قولنا نلغى الدورى ده خالص دلوقتى ونتجنب القرف اللى هييجلنا من وراه

برضو صمموا انهم يكملوه....مش فاهمة لصالح مين يعنى!!!

تم تعديل 29 أبريل 2011 بواسطة fatfouta

[se_ Elsyed]

اللي بيقول إن الثورة هي السبب ...

يبقى يروح لبابا مبارك ويقعد جنبه في شرم الشيخ

لكن أنا قولت فوضة ما بعد الثورة لإن المفروض ده ما يحصلش

والمفروض إن الثورة غيرتنا وبقى قلوبنا على بعض وعلى بلدنا

[أحمد سيف]

مش هما دول الشباب اللي زي الفل اللي طلع زلزل الأرض من تحت الفرعون ؟

لأ مش هما دول

[jasmin hamed]

و الله ي اخوانا انا قولتها فى ماتش الزمالك و بقولها تانى

لا ثوره و لا ثوره مضاده هيه ديه جماهير كره القدم

و زيد عليها الشرطه الى قاعده فى البلد ضيوف يبقى المشهد ده منطقى تشوفوه

انتو ناسين متشات السله الى قبل الثوره بين الاهلى و سموحه و الاهلى و الزمالك

التعصب الكروى فى مصر فى الايام الخيره قرب من التعصب الطائفى

حوار التعصب ده تربيه بقى فى الدم مش الثوره مش هتغيره فى يوم و ليله

[capitshino]

مش هما دول الشباب اللي زي الفل اللي طلع زلزل الأرض من تحت الفرعون ؟

لأ مش هما دول

طبعا مش هما دول

انا كل "مش معظم" اصحابى اللى شاركو فى الثورة واللى كانو بيروحو الاستاد لغو الموضوع ده خالص

وكلهم رائيهم واحد "تمن التذكرة اولى بيها واحد محتاج او يتيم"

[سهران]

أعتقد أن ( أغلب ) الجماهير اللي بتشجع كورة لدرجة الهوس هم الأسوأ في مصر و في أي دولة سوء كانت عالم تالت أو دولة متحضرة من ناحية الأخلاق للأسف ...

طبعا الكلام عن هذه الشريحة فقط و لا ينسحب على كل المشجعين و الموضوع أن الكرة رقم واحد في حياتهم و التعصب الأعمى يلغي العقل و الأدراك ... لا حول و لا قوة الا بالله ... قولنا يلغوا الزفت الدوري لكن أصحاب المصالح و الاستديوهات و معامل التحليل الكروية صوتهم عالي للأسف

[elfakhrany]

التربية .. التربية .. التربية

اعتقد اننا نفتقد الى ثقافة احترام الأخرين .. الرأى والرأى الأخر.. الفريق والفريق المنافس.. نحتاج الى نبذ التعصب الأعمى ووقف تصريحات السادة الأفاضل المدراء الفنيين للفرق المصرية فهى تشعل من الأمور وتسكب البنزين على النار فى ظل الغياب الأمنى .. الرياضة أخــلاق :unsure:

[أبوعمار]

سبحان الله ...

اختلفت الروايات زي أيام ما كنا بنسمع أخبار الثورة من الجزيرة والعربية .... أو من المحروسة الفضائية المصرية

يعني حسستوني إن الأهلي وجماهيره كتاكيت يا حرام واتغرغر بيهم

يا جماعة اللي قاعد أقراه من الصبح غير كده

وشوفوا ده خبر من الأخبار قريته على أكتر من موقع

جماهير الأهلى تواصل حماقتها وتعتدى على محطة السكة الحديد بالإسماعيلية

كعادتها قامت جماهير الاهلى اثناء توجهها الى بورسعيد عبر القطار بالنزول لبضع دقائق الى محطة قطارات الاسماعيلية و قاموا بتدمير اغلب محتوياتها و الاعتداء على بعض افراد الامن اثناء محاولة التصدى لهم و كذلك بعد المواطنين اللذين تزامن وجودهم داخل المحطة فى هذا التوقيت ثم استقلت قطارها من جديد متوجهه الى بورسعيد.

وقد قام مسؤلى محطة القطارات بابلاغ مديرية الامن بالاسماعيلية عن الحادث و تم تحرير محضر بالواقعة بالدائرة التابع لها محطة السكة الحديد بالاسماعيلية و جارى حصر التلفيات الجسيمة التى احدثها المخربين من جماهير الاهلى.

ومن جانبها اعدت مديرية امن بورسعيد العدة فى استقبال جماهير الاهلى بعدما علمت بواقعة الاسماعيلية فى انتظار قرار من الجهات العليا سواء بالقبض على بعضهم او اعادتهم من جديد الى القاهرة تحت الحراسة المشددة خشية تكرار هذا داخل مدينة بورسعيد الهادئة.

وده الرابط http://www.sharingtv.com/vb/showthread.php?t=26417

الكلام ده مش معناه إني مع أو ضد جماهير الأهلي

بس جماهير الأهلي مش بريئة للدرجة دي يا جماعة .... وده شوفته بعينيا لما كنا ضيوف على جماهير الأهلي ولما كانوا هما ضيوف علينا

أنا ضد الشغب أيا كان نوعه والتعصب أيا كان جنسيته

بس فعلا جماهير الأهلي مستقويين يمكن عشان عددهم ويمكن لاكتساح فريقهم للبطولات

حاسين انهم أسياد على مدينة بيدخلوها ورا فريقهم عشان يشجعوه

أتمنى فعلا من قلبي إن روح الثورة تغير كل ده وتحصل المعجزات اللي شوفناها في ميدان التحرير ونشوفها في استادات مصر كلها

وربنا يهدي

تم تعديل 29 أبريل 2011 بواسطة أبوعمار

[Simba]

الناس اللي متعصبة للكرة مالهاش علاقة بالسياسة ودايما مش فارقة معاها اي حاجة ويكاد يكون قرايب للبلطجية حتي لو من بعيد

الناس دي غالبا مش بتقوم من قدام شوبير ومدحت شلبي طول ما هما صاحيين فثقافتهم هتكون ايه

انا لية صاحبي زملكاوي وممكن يعيط لو الزمالك اتغلب يوم قرار التنحي بقت الناس كلها فرحانة وهو قاعد جنبي عمال يقول حسبي الله ونعم الوكيل حسبي الله ونعم الوكيل

اقول يا بني انت بتقول كده علي شعب :malta:

يقول ده شعب ابن ( ....)

برامج الكورة غسلت مخه

[capitshino]

انا لية صاحبي زملكاوي وممكن يعيط لو الزمالك اتغلب يوم قرار التنحي بقت الناس كلها فرحانة وهو قاعد جنبي عمال يقول حسبي الله ونعم الوكيل حسبي الله ونعم الوكيل

برامج الكورة غسلت مخه

فعلا

فى ناس كانت ضد الثورة علشان الزمالك اول الدورى و الثورة ممكن تلغى الدورى