نوارة نجم : وما آلت إليه الثورة الآن

[tarek hassan]

نواره نجم

اللي حصل امبارح كان مخطط له مسبقا ومقصود ومعمول بوعي، من كل الاطراف

سواء من اغرب ظباط في تاريخ الانسانية اللي لأول مرة في التاريخ يتظاهروا ضد قياداتهم بالافرول وسط المدنيين

او من القيادات اللي كانت عارفة ان فيه ناس نازلة وسحبت الشرطة العسكرية وسابتهم يخشوا وما رضيتش تيجي تقبض عليهم اول ما جم ولما اتصلت بيهم قالوا لي: احنا عارفين

او من السادة المناضلين الثوريين النوريين اللي ما كانش وراهم شغلانة طول الاسبوع اللي فات الا انهم يحربوا على المصادمات مع الجيش ويتشهوا كل الطين اللي حصل ده

اولا انا رايحة اقدم البلاغ في الثلاثي المرح وظباط امن الدولة بعد ما كملنا الميت الف ثم بقى مش عايزة اشوف خلقة حد تاني.. لا بجد، خالص، حادور بقى على اكل عيشي بدل ما قربت اترفد من شغلي، واشوف اللي ورايا بقى ولما اجواء ماتش الجزائر دي تنتهي نبقى نشوف لسه فيه مصر ولا ما لساش

بس قبل ما اغور بقى احب اقول كام حاجة:

اولا: حسبي الله ونعم الوكيل في اللي كان عارف اللي حيحصل ده وفضل ساكت وسابني انا وبلال فضل نتكلم لوحدنا

كل واحد ياخويا ياخدني على جنب ويقول لي: ينفع الجنان ده يا نوارة؟ عالم وسخة، وعيال وسخة، والدنيا قلبت وساخة في وساخة.. طب ما تتكلم يا فلان.. ما انا باقولك كلميهم بقى

يا علان ما تتكلم.. لا يا ستي.. دول في حالة هيستيرية وبصراحة انا مغلطك انت وبلال انكم بتتكلموا، ما تسيبوهم يولعوا، يا ستي انت متضررة في حاجة؟ انت كده بتضري نفسك.. لابسين لابسين، لازمتها ايه تحرقوا نفسكم؟

وبلال قال لي انا ماحدش ماسك عليا ذلة زي ما اتكلمت ايام مبارك حاتكلم دلوقت واقول اللي يمليه عليا ضميري

وانا طبعا قلبي الوسخ كلني.. وبقالي اسبوع شايفة اللي حصل امبارح

ثانيا: ايه ده؟ ها؟ ايه؟ على الله تكونوا مبسوطين يا بتوع "عيب ثورتنا انها سلمية زيادة، محتاجة دم اكتر، لعلمك ليبيا احسن منا لإنها بتجيب من الآخر.. انا مش مبسوط من حكاية الجيش والشعب ايد واحدة دي، لازم مواجهة عشان الثورة تكمل"

طب يلعن ابو الشيوعية على ابو الاناركية على ابو الثورية في الارض على فكرة... يلعن ابوها في الارض على ابو الكتب الوسخة اللي حولت امخاخكم لكنيف

هي ايه المطالب بتاعة مليونية امبارح؟ فكروني كده؟

احنا كنا ماشيين بما يرضي الله... وكل حاجة كويسة، وتمام، والناس مقبلة على الحياة، ونفسها تغير وتتغير، والروح ايجابية، والاجراءات ماشية تمام

نمنا صحينا لقينا هطل نعم ولا، ثم هطل التباطؤ

طب استفتاء نعم ولا ده كان معمول تجربة على الانتخابات عشان يشوفوا القوى اللي على الارض ويشوفوا امكانياتهم في اجراء انتخابات نزيهة وايه الاخطاء اللي ممكن ترتكب وخلوا في النهاية النتيجة واحدة

ومافيش تباطؤ

مافيش تباطؤ

مافيش تباطؤ

واي قانوني بتلاتة نكلة عارف ان مافيش تباطؤ.. وحسبي الله ونعم الوكيل فيهم عشان ما رضيوش يتكلموا لإنهم خافوا يتعملوا عبرة زي طارق البشري

واي قانوني بتلاتة نكلة عارف ان المحاكمة المدنية التقليدية ام اعلان وما يرضاش يستلمه ويبعتوا له اعلان تاني، وحكم وطعن واستئناف ونقض وخلافه هو احسن حاجة لإدانة مبارك وفلول النظام، لأسباب كتير، عشان نعرف نجيب الفلوس ده اولا، وعشان يدانوا في محاكمة عادلة مافيهاش شبهة تسرع ولا انتقام، وعشان التاريخ يكتب انهم ادينوا في محاكمة عادلة وما تجيش واحدة بعد ستين سنة زي لميس جابر تجيب لنا ممثل سوري كتكوت يمثل لنا دور مبارك ويطلعه مظلوم

بس ما اتكلموش.. ما اتكلموش ليه؟ عشان الاجواء مش حتساعد على تقبل الكلام ده، زي ايام ماتش الجزائر بالظبط ما فضلت اتشتم لوحدي وكله لعب على المشاعر البدائية عند الناس

واي واحد قاري له كتابين في الثورات بتلاتة نكلة برضه عارف ان السير خلف المليونيات خطوة بخطوة يحتفظ بطبيعتها كثورة شعبية مافيهاش شبهة عسكرة، لإن الثورة لو اتعسكرت تبقى مصيبة، ولو المجلس العسكري عمل زي محمد علي - زي ما اقترح احد ضباط الجيش اللي كانوا لابسين مدني في المظاهرة وقال لي انتوا محتاجين محمد علي جديد - حياخد المقابل بتاعه، لإنه كده شريك في الثورة، ومتشكرين قوي، انتوا اتظاهرتوا وانبسطوا، اتفضلوا اقعدوا في البيت وانا حاعمل كل حاجة، والناس حتنبسط، وحتهلل، وحتقول الجيش والشعب ايد واحدة، بس هو حد بيعمل حاجة ببلاش؟

بس برضه ما حدش فيهم اتكلم... ليه؟ عشان الاجواء اللي شبه اجواء كاميليا شحاتة ما كانتش حتقبل تسمع الكلام ده، وبرضه ايام كاميليا شحاتة اتشتمت لوحدي، من المسلمين والمسيحيين

طب انا زهقت على فكرة.. او انا فاهمة غلط.. يبدو ان الناس بتحب الساسبنس والاكشن ده، وبتسعى له سعيا حثيثا ولو على حساب مصالحها، او اللي انا فاكراه مصالحها يعني

طب وانا متضايقة ليه انا دلوقت؟ الاخوة النشطاء كانوا بيسعوا سعيا حثيثا ان المواجهات تحصل بينهم وبين الجيش، وما كانوش عايزين يجيبوها البر، وما كانوش عايزين يسعوا ورا المطالب المعلنة، المطالب دي كانت حجة عشان هم طالبة معاهم خناق

والجيش حس ان طب ما انا قدمت حاجات، وخدمات، ودخل لنا في نغمة جديدة: انا ياما عملت ايام مبارك بس ما كنتش باتكلم

طب يعني ماهم متفقين اهو.. متفقين على مواجهة يعقبها القبض على "فلول الوطني"، يعقبها حكم عسكري مبرر ومشدد، وانا اللي بنت كلب... طب انا زعلانة ليه؟ دول عاملين زي المسلمين والمسيحيين اللي بيحبوا يتخانقوا ولما احب افض بينهم ابقى عاملة زي اللي بتخش بين الراجل ومراته

طب انبسطوا بقى، المدعو ابراهيم كامل، والمدعو حسني مبارك، والمدعو جمال مبارك، واي مدعو في الدنيا دي حيتجاب من قفاه ويتحاكم زي ما انتوا عايزين، وانتوا في البيت زي ما انتوا عايزين، ومش حيضطروكم تنزلوا مليونيات زي ما انتوا عايزين، ومش حينزلوكم من البيت مدام تعبتوا وزهقتوا من الثورة الشعبية زي ما انتوا عايزين، والحمد لله المواجهات اللتيفة اللي كنتوا بتتشهوها وبتسعوا لها وبتجروا وراها حصلت زي ما انتوا عايزين، وعسكرة الثورة حصلت زي ما انتوا عايزين

عسكرة الثورة حصلت من اول ما نزل فيها ناس بالافرول والناس قبلت ده

وانا عندي سؤال لمؤسسة الجيش كلها

النت كله بقاله اسبوع بيتكلم عن نزول ضباط جيش للاعتصام، ولم يكن هناك اي رد فعل سوى ان جوز المعاتيه اللي نزلوا الفيديوهات عايشين برة، واي حد مش عسكري لو لبس لبس عسكري حنظبطه

ايوة؟ نعم؟ خير؟

انا افهم لما يبقى عندي ضباط متمردين ما اسحبش الدبابات من الميدان، وما اسحبش الشرطة العسكرية من الميدان، وما اسيبهمش يخشوا الميدان اساسا، من لحظة خروجهم من الداهية اللي كانوا فيها باللبس الميري امسكهم حماية للمدنيين

مش اسيبهم واخلع انا، ومش بس اخلع، دول سحبوا كل الشرطة العسكرية اللي حوالين الميدان بلا استثناء

الله... هي ايه الحكاية؟

طب انا لما شفتهم داخلين باللبس العسكري نفذت تهديد امبارح واتصلت بالقوات المسلحة وقلت لهم دي مظاهرة مدنية سلمية ومش عايزة انا عسكريين وسطنا، قام قالوا لي: اه.. ما احنا عارفين، وشايفينهم قدامنا دلوقت اهو!

يا رااااجل

وعشنا وقعدنا والناس كانت ناوية تروح راحوا دول طالعين وقالوا لهم: نعتصم في الشارع اصل لو روحنا حيقبضوا علينا

بس الناس مشيت.. وفضل عدد قليل اخدتهم الشهامة وقالوا احنا حنقعد ونحميهم!

مدني بيحمي عسكري

والعسكري اللي نازل يتظاهر بلبس الجيش عارف انه نازل يتمترس وسط مدنيين ويعملهم دروع بشرية وهو عارف القوانين العسكرية وعارف ان حيحصل اطلاق نار

والعسكري اللي نازل يقبض على المتمردين عارف ان المتمردين قاعدين وسط مدنيين وانه كان يقدر يحاصر الميدان لحد الصبح والناس اعدادها كانت حتقل وحتى لو قلتش يقدر حتى يعتقلهم بشكل مؤقت لحد ما يسلك ظباط الجيش من وسطهم

كان لازمته ايه ضرب النار ده كله؟ انت بتضرب في اسرائيل؟

وكان لازمته ايه نزولك وسط المدنيين بلبس عسكري انت رايح احتفالات اكتوبر؟ ما فيه عشرميت ظابط جيش كانوا نازلين المرة دي والمرة اللي فاتت بلبس مدني ومسكوا دماغي وقعدوا ينظروا لي في نظريات دموية وديكتاتورية كده وهم قرفانين مننا وحاسين اننا مالناش لازمة في الحياة، ومش عاجبهم المجلس عشان مش عايز يبقى حاسم وحازم مع امثالنا من الغوغاء والدهماء

وكان لازمته ايه التشتيت عن المطالب الرئيسية والتهليل لظباط الجيش اللي نازلين ظباط الجيش اللي نازلين ظباط الجيش اللي نازلين ومصمم تعسكر ثورتك والحماقة اعيت من يداويها

الناس كان مطلبها محاكمات وحل الوطني وامن الدولة وتطهير البلاد، نسيوا ده كله ومسكوا في الماتش بتاع القوات المسلحة وطلائع الجيش بتلعب مع القوات المسلحة وهم قاعدين يشجعوا ويهللوا، وطالعين يألفوا قصص ساسبنس على احمد شومان اللي امبارح كان بيشد في شعره تاني من اللي بيحصل، وعملوه كاميليا شحاتة هو راخر و: قولي له ينزل لنا فيديو!

هي الناس دي بتثور ولا بتتسلى وتلعب استغماية؟

ما قلنا الجيش ده مؤسسة عسكرية وطنية، وقعدنا نشرح في وطنية دي انها تعني: المهنية، يعني هو عسكري عنده عقيدة عسكرية متمسك بيها، ومؤسسة عسكرية مهتم بتماسكها، ولو على حساب انه ينحي القائد الاعلى

وقلنا هو مش ثوري، ومش مناضل، وكويس انه مش معتبر ان الثورة ثورته، وكويس ان هدفه هو الامن والاستقرار، قشطة بقى، نعمل ضغط سلمي عشان نحقق مطالبنا، واللي احنا عايزينه حيتعمل بمجهودنا وبضغوطنا عشان تفضل الثورة ثورة شعبية

طب انا مش عارفة صباع مين ده اللي لعب عشان يصعد الموقف لمواجهات مع الجيش اللي ضحى بقائده الاعلى عشان تماسكه، ومستعد عادي يضحي بعشر ظباط والكام عيل اللي واقفين يحموهم عشان تماسكه برضه

الا راحوا فين الظباط؟ اتنين اتقبض عليهم والباقي راح فين؟

لا بقى.. ولا المناحة المنصوبة بقى دلوقت كأن الجيش اول مرة في حياته يضرب!

اه.. بس اللي انضرب المرة دي كان ضباط جيش، فطبعا البدلة الميري لها شمخة كده

طب قبل كده كان بيضرب عادي يعني، ومش اول مرة يضرب نار في الهوا على فكرة، ومش اول مرة يفض اعتصام بالقوة، وقلنا بلاش نجرأه علينا، اول مرة ضرب واعتذر، تاني مرة ضرب وسكت، تالت مرة حيضرب ويلبسنا احنا مصيبة

واهو حصل... وطلعت فلول ابراهيم كامل والمواطنين الشرفاء هم اللي فضوا الاعتصام

وراح قالت لك

كما تؤكد أنها سوف تقوم مستقبلاً بفرض وتطبيق القانون بكل قوة وحزم إذا ما اقتضى أمن الوطن وسلامة المواطنين ذلك.

ههههههههههههههه

طب ما انا عارفة يا فندم

وعارفة بقى ان انتوا قاعدين شوية كده معنا عشان تمنعوا "خميني آخر" وعارفة ان فيه تعاون ما بينكم وبين اللي قاعدين يسخنوا عشان تحصل مواجهة بين الناس والجيش

وعارفة ان الاخوة باللبس الميري داخلين بطناش متعمد

وعارفة ان الجيش والشعب ايد واحدة... وانا بنت كلب

عادي يعني، دي حقيقة علمية مثبتة

كل واحد يخلي باله من لغاليغه بقى... الاخوة الثوريين عايزين ايه؟ عايزين خناقة عشان يحسوا انهم مناضلين وكدهون يعني.. اهي الخناقة

الاخوة السياسيين عايزين ايه؟ عايزين كل واحد ياخد نصيب مرضي؟ حتاخد نصيب مرضي

الاخوة الجيش عايزين ايه؟ عايزين ظبط وربط بقى بلا قلة ادب.. وبرضه يعني احنا ما نطلعش من المولد بلا حمص.. ومااااله، حقك يا باشا

على الله يكون الكل مبسوط دلوقت... ربنا يهنيكم ببعض

لا فلوس مبارك ايه بقى... خش نام دلوقت ولما يخلصوا العشا يصحوك

وبيقولوا فيه ناس ماتت! يالللااااااا... الحي ابقى من الميت ومدام كل حي واخد نصيبه، يبقى الله يرحم اللي مات

اللي كنت خايف منه بيحصل

أشكال غريبة شفتها وسمعتها هتافات ضد المشير من غير داع أبدا والهجوم على القوات المسلحة اللي هي المفروض خط أحمر والكذب عليها إنها أطلقت نار على حد

أمن مصر والإساءة لجيشها من خلال دور معين لضباط مش عارفين حكايتهم إيه

حاجات كتير سلبية الاختبار الحقيقي واللي عايز يحاكم مبارك يروح شرم الشيخ فالعدو الحقيقي هناك

وحصل إيه كمان للجزيرة اللي سابت إسرائيل اللي بترقص الوقتي على حدودنا ومسكت في الجيش المصري

مش حسني مبارك كان خايف من الفوضى اعملوها علشان يبقى كلامه صح

الأيام الجاية هنشوف أفلام هندي كتير من اللي شغالة الوقتي من عيال كده في مؤتمر صحفي في نقابة الصحفيين الآن شعرها طويل وشكلها غريب ومريب وبتسخن ضد الجيش

تم تعديل 9 أبريل 2011 بواسطة tarek hassan

[Diab]

ايه شغل فرش الملاية ده

مقالة دي وردح علي نصبة خضار

حتي لو كانت بتتكلم صح لكن اسلوب كلامها غير مقبول ويجب ان تختار الفاظها بعناية وبلاش حجة التلقائية

لانها المفروض كاتبة يعني تقدر أن تصغ ما تريد وتفكر فيه بمنتهي السهولة ولابد ان تمتلك ناصية اللغة

صحفيين علي ماتفرج

تم تعديل 9 أبريل 2011 بواسطة Diab

[أحمد سيف]

نواره قلبتها تهييس رسمي

وشغاله بأسلوب فرد الملايه وخدوهم بالصوت ومن ليس معنا فهو علينا

[Ahmed Anwer]

أنضف واحدة في الفكر و الأكثر براءة و وطنية

بغض النظر عن الأسلوب ،،

[Diab]

أنضف واحدة في الفكر و الأكثر براءة و وطنية

بغض النظر عن الأسلوب ،،

عارف لو طبقت النظرية دي في حياتك هتتعب صدقني

مفيش حاجة

إسمها بغض النظر عن الأسلوب - الوسيلة .... إلخ

حاول تشطب الكلمة دي من حياتك يا اخ أحمد لأن الغاية لا تبرر الوسيلة

ده غير انك لو قلت كدة يبقي في 100 ألف ست علي الأقل ممكن تاخد مكانها في جريدة زي الدستور ولا المصري اليوم ومتسألش بقي الإسلوب اللي هيستخدموه في الكتابة لان ساعتها هيتبرر أنهم بيحبوا البلد وفعلا هيكونوا بيحبوها ألف مرة من نوارة

الصحافة هي كانت مهنة الصحفيين بجد

دلوقت اصبحت مهنة من لا مهنة له

تم تعديل 9 أبريل 2011 بواسطة Diab

[Simba]

انا من زمن الزمان ما بيعجنيش اسلوبها ولا كتاباتها ودايما بقول عليه فرش ملاية ونظرية الحدق الفاهم في كل حاجة واي حاجة

في التدوينة دي عكت في كل حاجة في الثورة والثوار والجيش وقناة الجزيرة اللي كانت يوميا ضيفة شرف عليها ايام الثورة

[تامر مصطفى]

اشكر الفاضلة صاحبة اوسخ قلب واوسخ اصحاب واوسخ كل حاجة في الدنيا

طبعا ده كلامها مش كلامي

اتمنى انها تلاقي حد يقولها الف شكر ليكي يا ست الكل على كل مجهوداتك وياريت تريحي بقى في البيت او تشوفي شغلك وتسيبي الناس دي في حالها

انتي عملتي اللي عليكي وكتر الف خيرك

وبالنسبة للناس اللي عينوكي حارس على الثورة فياريت تاخدي باقي حسابك منهم وشكرا ليكي

ده اسلوب انسانه محترمه ومتعلمة؟؟؟

ده اسلوب وحدة تتكلم بالنيابة عن ثوار 25 يناير؟

شكلها عايشة دور عبلة كامل ايام ما كانت الناس بتقول عليها تلقائية

[Ahmed Anwer]

أ / دياب ده لسانها يعتبر من أطهر الألسنة في الناشطين و المدونين

تابع بس وائل عباس و مالك و غيرهم و أنتا تعرف

[عصام أبوالفتح]

انا متابع لنوارة على تويتر واسلوبها فى النازل وبالتوازى رؤيتها للامور

العصبية الشديدة والتوتر قاتلاا محترفان لأى رأى مهما كانت النوايا ورائه طيبة

[وليد صفوت]

السلام عليكم....

يا جماعة حضراتكم دلوقتى بتناقشوا المقالة و ما ورد فيها و لا جايبين المقالة كمثال لأسلوب نوارة نجم فى كتابة المقال و نقعد نحلل اسلوبها و هل هو ينتمى الى الكتابة التلقائية الحديثة؟ أم المدرسة اللاوعيية التنويرية؟

خلينا فى موضوع المقال الله يكرم الجميع

[tarek hassan]

مش عارف إحنا داخلين على إيه بالظبط

أنا سمعت جزء من خطبة الجمعة في التحرير وصفوت حجازي بيقول : إذا لم يخرجوهم من السجن هنروح نخرجهم إحنا وكأننا في دولة بلا قانون ومحدش بيقوله أنت بتقول إيه ؟

وبالنسبة للعيال الصغيرين المغرر بيهم على رأي السادات يلموا نفسهم شوية علشان البلد إذا كان عندهم إحساس ودم

المطالب ماشي ولكن أن شايف وجوه غير الوجوه ومقاصد غير المقاصد وحاسس بنيات غير النيات وأغاني وكليبات هابطة قوي وأفلام هندي من ناس ليسوا أكثر وطنية من الجيش ومن الكبار اللي في البلد

فليتقوا الله في البد

وكفاية بقى

هل الحرية إنك كل يوم والتاني تتحاكم للشارع في كل صغيرة وكبيرة ؟

ذن بلاش حكومة ولا رئيس ولا جيش وبلاش بقية الشعب

وهل الحرية أن يظهر أفراد الجيش بهذا الشكل وكأننا في انقلاب عسكري ؟

تم تعديل 9 أبريل 2011 بواسطة tarek hassan

[أحمد سيف]

مش عارف يا استاذ طارق أنا حاسس إن التيار الإسلامي دلوقت بيتكلموا كإنهم من النظام مش من الثورة

وده حسب اعتقادي لإنهم حاسين أنهم أصبحوا في موقع قوة واستمرار الوضع الحالي هو لصالحهم خصوصا بعد نتيجة الاستفتاء وضمان أغلبية في البرلمان في ظل عدم استعداد القوى الأخرى تتيح لهم وضع الدستور وتشكيل الحكومة ... علشان كده مش شاغلين نفسهم بباقي مطالب الثورة وبيعارضوا استمرار الضغط من أجل تنفيذها خصوصا أنها ممكن تفيد خصومهم من باقي التيارات

والكلام عن القانون والشرعية والحكومة بقيت باسمعه كثير زي ما تكون الثورة دي قامت وفقا للقانون

السؤال اللي عايز حضرتك تسأله لنفسك: هل مطالب المتظاهرين مشروعة ولا لأ؟ وإذا كانت مشروعة فلماذا لا تنفذ؟ وإذا لم تنفذ وخرجوا للشارع للمطالبة بها (في ظل أن الشارع هو الآن الوسيلة الوحيدة لإيصال المطالب للمجلس العسكري) فهل نلومهم أم نلوم من أجبرهم على ذلك بعدم استجابته لمطالبهم المشروعة؟

[tarek hassan]

يا دكتور : أحمد

أنا أكدت على المطالب في كلامي

وليست المسألة عندي هي الحفاظ على نعم كما أن المسألة عند الآخرين هي الانقلاب على نعم

ولكن أنا خايف من إن الثورة الجميلة تتشوه - خايف من أعداء البلد ينقضوا عليها - عندي يقين إن هناك محاولة للوقيعة بين الجيش والشعب

الناس اللي في الشارع مش من رأيها مع الأسلوب اللي في التحرير ده وكلها ناقمة عليهم

والله أنا كنت من أكثر الناس سعادة وأنا بشوف التحرير إمبارح وصورة مبارك في القفص

ولكن الصورة تغيرت بعد كده

هل الديمقراطية هي الاحتكام للشارع

طيب ما نجيب رئيس جديد

وهو يعمل كل اللي احنا عايزينه لو المجلس العسكري منفذش

تم تعديل 9 أبريل 2011 بواسطة tarek hassan