يعني ايه زوجة نكدية؟؟؟

[لماضة مصرية جدا]

السلام عليكم و رحمة الله و بركاته

كنا قاعدين في قهوة المغتربين....و بنتكلم طبعا في قضايا الوطن....من حيث الرؤية و المضمون و تحديات العولمة و كدهوت يعني....(وش ابو لمعة)

و بعدين استاذنا رءوف راح سال السؤال اللوذعي دهوت

ليه الحب الفطرى للنكد للزوجة المصرية

سؤال محيرنى جدا

بالنوسبة للستات..اللي شايفاهم هيجموا من مدرجات الدرجة التالتة...متقلقوش احنا ردينا علي استاذ رءوف فيما يتعلق بالزوجة المصرية

بس السؤال هنا هوت

يعني ايه زوجة نكدية....يعني تروح البيت تلاقيها جايبة شعرها زيرو و ضاربها في راسها مفك انجليزي....!!!

امتي يعني تاخد اللقب الموفتخر دوت!!!

اللي هيخش التوبيك....الله يكرمك....قولنا يعني ايه الزوجة النكدية....عشان طبعا ننكد عليكم اكتر و اكتر و اكتر...(وش ريا و هي بتعصر الفوطة في صينية القلل)

امتي بتضايق و تحس ان زوجتك نكدية

امتي بتتضايقي...و تبرطمي في سرك ان زوجك.....قتم....و لاوي بوزه؟؟؟؟

مش يمكن انت مش واخد بالك....ان شريك حياتك.....دمه فعلا خفيف....بس بيجي عندك و بيسقع!!!!

مش عارفة

بسمع السؤال اللي حطيته دوت كتير...قولت اما اسال...اهل البوز...قصدي لما اسال اهل الجوز...و العلم و كدهوت يعني

علي هامش البوز و كده

انا مش هشترك معاكم في التوبيك دوت...انا لسه ملقتشي اللي انكد عليه باذن الله

انا هجيب....اتنين كيلو لب...و هسحب شلتة و هقعد اسمع منكم

ربنا يوفقكم

و يجعل حياتكم كلها...من غير بوز....و لا منقار

كان معكم

لماضة....عاوزة تفهم

[rewsha]

بصي يا لماضه يا اخوتشي

احيانا الواحده بتنكد على جوزها او العكس وهيه مش واخده بالها

بمعنى انها تعمل تصرف مش في وقته ويضايق جوزها من غير ما تحسبها صح

بس الشهاده لله .في ناس تخصص نكد

عن نفسي .العيال بتبقى مطلعه عيني وانا لوحدي معاهم في البيت .وحضرته بيكون في الشغل

قوم اول ما هوه يجي البيت اجري جري احط له الاكل

وهوه بياْكل بقى اقعد جنبه ارغي ارغي ارغي

والبنت الكبيره عملت كذا والوسطانيه زعقت معاها والصغيره قعدت تعيط وانا ضرسي واجعني وماكنتش طايقاهم

كل ده باحكيه وانا ببقى عاوزه افضفض معاه من اللي انا فيه طول اليوم لوحدي

مُعتقده ان هوه في الشغل مش بيكون عليه ضُغوط برضو

لكن مره نبهني ان اللي باعمله ده غلط .

لو انا نكديه بطبعي ....هافضل اكررها سواء بقصد او من غير

لكن انا بصراحه اخدت بالي وبقيت استنى لما يتعشى ويفوق لي كده .وبعدين اقعد احكي براحتى :P

لا بجد .اخدت بالي من الموضوع ده ومابقيتش احكي على كل حاجه

اعتقد كُتر الشكوى للزوج .......بتنكد عليه :blush2:

[rewsha]

اعتقد كمان ان الزوجه النكديه ,هيه اللي مهما عمل زوجها علشان يرضيها .مش بيلاقي منها شُكرانيه :closedeyes:

التصرف ده بيسبب له احباط شديد

والعكس صحيح .لو الزوجه موتت نفسها في شغل البيت والاهتمام بالاولاد علشان زوجها يبقى مبسوط منها .وبعدين ماتلاقيش منه كلمه شُكر اوتشجيع او تقدير لمجهودها .ده بيسبب لها احباط وبالتالي يبقى زوجه كده بينكد عليها

[raouf]

شوفى يا ستى انا هارد عليكى بما انك فضحتينى فى المنتدى كله وحاطه اسمى بالبنط العريض

ومش بعيد مراتى تشوف الموضوع وبعدها هاستنى منكم ورد فى المستشفى او الترب الله اعلم هالحق اهرب ولا لا

المهم انا هاكلمك فى نقاط عليها شبع=ه اجماع من معظم اصدقائى مش عايز اقول كلهم ( احنا بنصفى النفوس مش اكثر ).ههههههه

اولا : عدم الدقة فى اختيار اوقات الحديث فى اى موضوع بمعنى اول ما الراجل يدخل البيت تلاقى مراته بتصوت وبتشتكى من العيال وابنك عمل وسوا وكده طيب يعنى اصبرى الراجل يقلع هدومه ويريح الوقت مش هايخلص لا لازم والراجل على الباب ومثال اخر ماتحبش تتكلم فى موضوع مثلا الا والراجل مشغول لازم يسيب اللى فى ايده ويتكلم طيب اصبرى الراجل يخلص ويقعد واتكلموا لا دلوقتى

ده ملخص موضوع اختيار توقيت ونوع الحديث والامثلة كثيرة

ثانيا : حب الكلام الكثير والتليفونات زيادة عن اى جنسية وده بيتعب الراجل وبينرفذه جدا

ثالثا : الغيرة القاتلة وعدم ثقة المصرية فى نفسها يعنى قاعدة للراجل على الواحدة

الرابعة لازم تقف فى وجه زوجها وقت الغضب لو بس بعدت عنه نص ساعة وماردتش عليه هايعرف خطأه وييجى يبوس ايديها ورجلها كمان لكن للاسف لازم ترد

رابعا عدم توفير الهدوء له فى البيت

المسح والغسل مايحلاش الا والراجل فى البيت ويوم الاجازة وقيسى على ذلك

المهم الزوجة المصرية تتميز بحاجات اكيد

اولا ست بيت ماهرة

بتجيد تربية الاولاد ومخلصة فى المهمة دى

عادة ( مش دائما ) موفرة

بتحب زوجها جدا جدا جدا

ومزايا اخرى كثيرة جدا

انا كاتب كلامى مش من ناجية هجومية ولكن فقط لاظهار السلبيات التى اتمنى من كل مصرية مراجعة نفسها فى هذه النقاط بعدها حياتها هاتتغير 180 درجة

يعنى ايه اللى يحصل لو الست هلصت شغل البيت بدرى ساعة ولبست كويس ويكون وجهها الباسم اول مايراه زوجها بعد رجوعه من عناء العمل ؟

هل هتتعب الستات لو عملوا كده ؟

الاشياء اللى كتبتها تحدث بالظبط مع معظم اصدقائى ولكن المزايا كثيرة جدا

كثيرة جدا رغم تجاربى ( ليست زيحات ولله الحمد ) هى معرفة عن قريب بحكم عملى

المصرية تكسب فى حالة الراجل الهادىء القليل الضغوط اما اذا كان الزوج عصبى وبيحب الترتيب ومخالط ناس كثير زى حالاتى هو بيتعب وبيتعبها معاه

على جنب بقى لكل ستات وبنات المنتدى : متى اخر مرة قلت لزوجك نكتة او خبر مضحك ؟ وفى المقابل فى هذا الاسبوع كم خبر سىء او رخم قلتيه وكم خبر جيد يحث على البهجة قلتيه لزوجك

[ذهبية]

انا اعترض على مووضعك يا لماضة و مطلعة ليكى كرت احمر

بهزر طبعاااااا انتى حبيتبى قلبى انتى عارفة

لماذا و لية و علشان اية خصيت صفة النكد بالطابع الانثوى و حطيتى عليها تاء مربوطة

اسمة النكد و يحمل الطابع الذكورى بلا تاء مربوطة

النكد ممكن ياتى من الزوج كما ياتى من الزوجة

فهناك العديد و العديد من الزوجات المطيعات و المرحات و اصحاب الدم الخفيف

و الازواج مش شايفين و لا اى حاجة من دول

بالعكس

فية الازواج الصامتين اللى الكلام بيخلص من على عتبة البيت مهما الست حاولت تستظرف و تتدلع و هو و لا هنااا

و يفضل قافل بقة لتانى يوم وبمجرد ما يخرج من على عتبة البيت بسم الله ما شاء الله تقوليش مكنة كلام و اتفتحت و لا لو جة موبايل من حد من اصحابة تسمعى الضحكة من اول الشارع

ياترى بقى تسمى هذا النوع من الرجال اية

[Howayda Ismail]

ان جيتى للصراحة يالماضة هم كتير اوى

الزوجة المكشرة على طول ودايما شايلة طاجن ستها بسبب ومن غير سبب ودى بتقصف العمر بدرى

الزوجة اللحوح اللى تزن على الدماغ عاوزة طلباتها دلوقت يعنى دلوقت

الزوجة الغيور الشكاكةاللى بتعد عليه النفس رايح فين وجاى منين

الزوجة المتذمرة اللى مش بيعجبها العجب وصعب رضاها

الزوجة الانانية هى واهلها وبس واهلك انت حر معاهم

الزوجة الشكاية الجيران عملوا ولادك سووا تعبت من شغل البيت دماغى بتوجعنى ......

الزوجة الحقودة او عديمة الرضا او الغير قنوعة ودى دايما تبص على اللى فى ايد

غيرها وعمرها ماتحمد ربنا ولو جاب لها المحيط مش بترتاح لان دايمة باصة لعيشة غيرها

الزوجة الثرثارة عمال على بطال بمناسبة ومن غير مناسبة

الزوجة المثقفة لانها دايما تجادل وتناقش حتى تقنعه او يقنعها

الزوجة السلبية دى اللى مكبرة دماغها و بتسيب الحمل كله على زوجها

الزوجة جافة المشاعر خشنة المعاملة سليطة اللسان

الزوجة اللى مش بتقدر ظروف زوجها النفسية او المادية

وطبعا رجال كتير مشتركة فى نفس الصفات وكثيرا ماتنشئ المشاكل بسبب هذه الصفات

وكتير منا حتلاقيه فى خصال منها وبدرجات الكمال لله وحده

لكن الكيس الفطن هو اللى يتغلب عليها

ويتغلب على اى مشاعر سلبية جواه وده عمره مايتحقق الا بتوفيق ربنا ورضا الانسان

باللى فى ايده ساعتها بس بيملك الدنيا ومافيها لان جواه سلام نفسى ورضا داخلى

الانسان دايما لازم يطوع نفسه على الخير والحب والسرور يحاول يخلقهم باى وسيلة

لانهم المرايا اللى بيشوف نفسه فيها ونفس الوقت بتنعكس عليه

[raouf]

ان جيتى للصراحة يالماضة هم كتير اوى

الزوجة المكشرة على طول ودايما شايلة طاجن ستها بسبب ومن غير سبب ودى بتقصف العمر بدرى

الزوجة اللحوح اللى تزن على الدماغ عاوزة طلباتها دلوقت يعنى دلوقت

الزوجة الغيور الشكاكةاللى بتعد عليه النفس رايح فين وجاى منين

الزوجة المتذمرة اللى مش بيعجبها العجب وصعب رضاها

الزوجة الانانية هى واهلها وبس واهلك انت حر معاهم

الزوجة الشكاية الجيران عملوا ولادك سووا تعبت من شغل البيت دماغى بتوجعنى ......

الزوجة الحقودة او عديمة الرضا او الغير قنوعة ودى دايما تبص على اللى فى ايد

غيرها وعمرها ماتحمد ربنا ولو جاب لها المحيط مش بترتاح لان دايمة باصة لعيشة غيرها

الزوجة الثرثارة عمال على بطال بمناسبة ومن غير مناسبة

الزوجة المثقفة لانها دايما تجادل وتناقش حتى تقنعه او يقنعها

الزوجة السلبية دى اللى مكبرة دماغها و بتسيب الحمل كله على زوجها

الزوجة جافة المشاعر خشنة المعاملة سليطة اللسان

الزوجة اللى مش بتقدر ظروف زوجها النفسية او المادية

وطبعا رجال كتير مشتركة فى نفس الصفات وكثيرا ماتنشئ المشاكل بسبب هذه الصفات

وكتير منا حتلاقيه فى خصال منها وبدرجات الكمال لله وحده

لكن الكيس الفطن هو اللى يتغلب عليها

ويتغلب على اى مشاعر سلبية جواه وده عمره مايتحقق الا بتوفيق ربنا ورضا الانسان

باللى فى ايده ساعتها بس بيملك الدنيا ومافيها لان جواه سلام نفسى ورضا داخلى

الانسان دايما لازم يطوع نفسه على الخير والحب والسرور يحاول يخلقهم باى وسيلة

لانهم المرايا اللى بيشوف نفسه فيها ونفس الوقت بتنعكس عليه

كلام لا يمكن التعليق عليه

كلام كامل متاكمل مدام هند

[اغابي]

باختصااار شديد

الزوجة النكدية هى اللى بتقول

شفت مامتك قالت ايه لكن شفت مامتى اناااااا قالت ايه

شفت اختك قالت ايه لكن شفت اختى انا ااااااااا قالت ايه

شفت اخوك اتكلم ازاى لكنا اخوياااا انا يا عيني عليه

شفت اهلك

شفت قرايبك

عيلة غم وهم هههههههههههه

هى دى الزوجة الننوسة الفنتوسة النكدية

اعوووووووووووووو

:P

[akramgroup]

والله انا رأيى ان موضوع الزوجة النكدية ده بجانب ان فى صفات معروفه لدى الجميع

لكن وده رأيى الشخصى ان برضو موضوع النكد ده نسبي وبيفرق من شخص للتانى

بمعنى ممكن ان الزوج يشوف ان مراته نكديه طالما مالهاش نفس الاهتمامات اللى بيحبها

او لو الزوجه مش بتشاركه حياته بالطريقه اللى هو شايفها تبقى زوجه نكد

يعنى ممكن شخص يشوف ان مراته نكد فى حين انها ماتكونش نكديه اصلا

وبرضو بما انى دخلت هنا يبقى لازم ااكد واقول ان فعلا فى زوجات يخرب بيت النكد اللى هما فيه

وبرضو نسبة النكد بين الزوجات اكتر من الازواج

انا عارف الباب محدش يزق bsh:)

[التونسى]

إسمحوا لى أرد بقى بطريقتى

.. ويمكن التوبيك هنا يكون مكان ميلاد قصيده زجليه جديده عن الزوجه النكديه..وكله بقى على حسب الالهام .. وعلى حسب المداخلات بتاعتكم.. وطبعا انا حعالج الامر بشكل كوميدى هزلى من قبيل الضحك

لماضه بتقول يعنى ايه الزوجه النكديه :unsure:

وانا بقولها ..وبقولكم برده

يا جماعه.. الزوجه النكديه

دِللى .بعيد عنكم .. عنديه

وسليطه ..وكُــبَّه.. وماديه

وِللى بتهوى..تعكنن جوزها

بشراسه ..وتعذيب .. وساديهbsh:)

واهِى دِيا .. الزوجه النكديه

يتبع بما هو أوقع وأوجع وأفظع وأبشع وأروع .. ويمكن أصلع كمان:P

[الباشمهندس ياسر]

نادرا ما تجد امراءة تحب النكد بطبعها

لكن الفكرة هي في فقدان عملية التواصل بين الطرفين

لذلك انصح دائما بقراءة كتاب الرجال من المريخ و النساء من الزهرة

كتاب رائع يقوم المؤلف فيه بتوعية الطرفين للاختلافات الطبيعية بينهما

ثم يأخذ بأيديهم الي تواصل ناجح

نحياتي