مصر بعد التغيير مراسلكم من قلب الحدث

[the consultant]

مكنش ينفع بصراحة اني منزلش ، كنت خلاص حيحصلي حاجة و بعد تفكير طويييييل هدفه تبرير النزول فقط قررت و سبت العيال و المدام (عشان البلطجية و الحرامية و قطاع الطرق و كدة ) و نزلت مصر أو بمعنى أكثر دقة (الاسكندرية عريس البحر الابيض المتوسط) و قررت إني اشاركم كل اللي شفته من ساعة ما نزلت الى يوم العودة .

[the consultant]

المشهد الأول

بعد الوداع و الاستماع لنصائح زوجتي الحبيبة و خلي بالك على نفسك من البلطجية "الأشرار" وإوعى تمشي في المظاهرات الفئوية أو غير الفئوية و إياك تروح تدور على ملفك اللي في امن الدولة أو سي دي هايتك اللي مع مرتضى منصور.

اتجهت الى مطار الملك بجدة و إنتظرت طائرتي و أنا كلي سعادة و إشتياق ، لمالحمد لله الطيارة غادرت في وقتها و ما لاحظته أنها كانت فاضية لدرجة كبيرة و بدأت أحلم بللي هشوفه في مصر لما أنزل و برائحة الثورة و وشوش الناس و بدأت اسمع صوت الحرية اللي بينادي من كل شارع في بلادي على رأي اغنية الثورة الشهيرة ثم استيقظت على صوت قائد الطائرة و هو بيزعق للكرو "يلا اترزعوا إستعدادا للهبوط " ياااااااااااااااااه إسكندرية حبيبتي انا جيييييييييييييت .

[الغريب]

كونسلت يا حبيبي

أنت ليه دفنت موضوعك في باب المغتربين

ياريت تطلب من الإدارة تغييره للإجتماعيات أو موضوعات خفيفة أو أي باب آخر علشان نتابع ونتفاعل

مستنينك ..

[the consultant]

كونسلت يا حبيبي

أنت ليه دفنت موضوعك في باب المغتربين

ياريت تطلب من الإدارة تغييره للإجتماعيات أو موضوعات خفيفة أو أي باب آخر علشان نتابع ونتفاعل

مستنينك ..

والله انا قلت اصحصح باب المغتربين شوية لانه ميت كدة بقالة فترة ، لكن تحت أمرك يا ريس و أشكرك على المتابعة. bv:-

[the consultant]

المشهد التاني

هبطت الطائرة بسلام في مطار برج العرب ( ذا نيو إيديشن) إييييييه الحلاوة دي ياولاد حاجة زي الفل تيوب من الطيارة على المطار زي المطارات اللي بجد و مزيكا هادية تعم الأرجاء و وجوه مصرية مبتسمة من فريق المطار ( طبعا اللي كان بينزل على برج العرب القديم أو النزهة حيعرف انا ليه منشكح بالمطار الجديد)

تخيلوا إن مفيش حد قلي (حمدلله عسلامة يا باشا كل سنة وانت طيب = هات فلوس يا غني يا بتاع الخليج يا مكيش) تصاعدت معدلات السعادة عندي و بدأت أغنية يا حبيبتي يا مصر يا مصر تتردد بصوت أعلى في مؤخرة عقلي الباطن (اللي هي وره الودان علطول)

بصراحة ماحولتش اركز في موضوع هل ظباط الجوازات اتغيرو ولا لا لانهم بصراحة مكانوش وحشين اصلا ( على الأقل بالنسبة ليا عمري مشفت منهم حاجة وحشة) بس برده قلت أجرب

أنا: لوسمحت يا فندم أنا لسة واصل من جدة و راجع تاني قريب و للأسف نسيت تصريح العمل هناك هل لازم أعمل واحد تاني

ظابط الجوازات (بعد 25 يناير) رد مباشر مع النظر في عين السائل و كاني سألت خدمة عملاء فودافون في 2005 : مهنة حضرتك إيه في الفيزا

أنا داخليا: ايه الحلاوة ديه

أنا قائلا: مستشار قانوني

ظابط الجوازات: مفيش مشكلة مش محتاج تتطلع واحد جديد

ياااااااااااااااااسلاااااااااااااااااااااام نزلت من الجوازات (على سلالم متحركة بتاعة مطار برج العرب الجديد :P ) و انا في قمة السعادة

طبعا مش محتاج اني اقول المطار فااااااااااااااااضي يمكن في 30 واحد مثلا ، إنتظرت شنطي القليلة و عديت على الجمارك بسهولة ثم ..................................To Be Continued

[the consultant]

رجاء من أحد المشرفين نقل الموضوع الى باب أخر مناسب إن أمكن

[kingsabry]

ينقلوه يمين ينقلوه شمال وراك ياريس بس كنت عاوز أعرف الجمارك ظروفها ايه ؟

[hOuSsAm]

مستمتع بكلامك اخويا كونسلتنت

ومع راى الغريب ياريت الموضوع يتنقل لباب تانى

وحمدلله عالسلامة واجازة سعيدة

قعبالى انا كمان

[لونا]

تسجيل متابعة و باهتمام

نظرة حضرتك للوضع في مصر مهمة بالنسبة للمغتربين اللي زينا

لأن نظرة المغترب اللي نازل بعد غيبة غير اللي قاعد هناك و بيشوف الأوضاع و هي بتتغير بالتدريج

البداية مبشرة لغاية دلوقتي

يا رب ما تقلبش

تحياتي

[the consultant]

شكرا للجميع على المتابعة

المشهد الثالث (خارج المطار) درجة الحرارة 12

كان في إنتظاري أحد الأصدقاء ( طبعا أنا مقلتش لأهلي إني نازل لتجنب النصايح اللي من نوع "مالهاش لازمة يابني , حتنزل تعمل ايه ,إحنا كويسين الخ ) المهم ركبت العربية بعد السلام و الترحيب بدأ طبعا يحكيلي عن أحداث الثورة و عن بطولاته الشخصية و كفاحة في القبض على البلطجية و المروعيين و إن الجيش كان بيربط الحرامية في عمدان النور و إن علبة المارلبورو وصلت 20 جنيه و توكيل بي إم اتكسر و إتسرق و العربيات كانت بتتنقل على عربيات كارو بس محدش جه جنب توكيل العربيات الصيني اللي جنبه ( و إكتشفت بعد كدة إن المسألة دي شاغلة ناس كتير أوي كل ما حد يقولي شفت بي إم يقولي تصدق التوكيل الصيني محصلوش حاجة ) .

لمن لا يعلم من برج العرب لقلب الاسكندرية حوالي ساعة الا ربع طبعا هو حكالي كل أحداث الثورة خلال هذه المدة بدأت أدخل على البلد و أول حاجة شفتها كان قسم باب شرق و كأنه تحول الى كهف مهجور و جنبه نادي الضباط لازالت أثار الحريق عليه و تذكرت لحظتها أيامي في القسم و مغامراتي مع أمناء الشرطة و الظباط "كمحامي أكيد مش متهم " ( على فكرة قسم باب شرق هو احد دوافعي للسفر للخارج) يالا اللهم لا شماته فقت من ذكرياتي على صاحبي و هو بيحكي لما الراجل الملثم طلع عليه بشومة راح هو شايلة بالعربية و لما الحرامية كانو بيدوروا على الجيش عشان يسلموا نفسهم من منطلق إن الجيش أحن عليهم من اللجان الشعبية !!!.

[pink rose]

حمدالله على السلامة يا بلدياتي

نورت يا فندم و الله

و احييك على الخطوة الجامدة دي

تعرف كل يوم اتصل باهلي اقعد اسأل بالتفصيل الممل ايه اللي بيحصل

طب بتشوفوا ايه

طب ظباط الشرطة لما نزلوا بيتعاملوا معاكم ازاي

طب المكان الفلاني لسا في زبالة حواليه

و عاوزة اقولك انهم زهقوا مني بجد

فا ما صدقت لقيت التوبيك بتاع حضرتك دا عشان اشوف بعيني اسكندرية الجميلة اللي كان نفسي اشوفها

احكي بقىىىىىىىىىىىىىىىى

كمل الله يكرمك

[mekkawy]

كمل يا عمنا كمل و شجعنا ننزل احنا كمان

بس جرئ إنت و الله انك نزلت و سبت العيال هنا .. جددددددددع

[the consultant]

المشهد الرابع (شارعنا و بيتنا و أهلي )0

أول ما لاحظتة قريبا من منطقة سكني و بالتحديد عند قهوة (المعاشات) يافطة كبيرة مكتوب عليها شكر و تقدير لقناة الجزيرة على المجهود و المصداقية في تغطية الأحداث !!!! المهم ما تلاحظه أيضا إن اللي بيته من إزاز مش بس مبيحدفش الناس بالطوب لاااااا ده عمل باب حديد و قفله بقفل عملاق خوفا من إقتحامات البلطجية الأشرار ، فعلا كل عمارات الشارع ركبت أبواب مصفحة بأقفال حصينة و ورقة أيه فور متعلقة عند المدخل كتب عليها تحذير شديد اللهجة لكل من تسول له نفسه من سكان العمارة يترك الباب مفتوح bsh:)

المهم دقت ساعة الحسم دقت ساعة التلاقي الى الامام الى الامام ، طبعا بما إني نازل فجأة و محدش يعرف إني جي الت أغلس خبطت على الباب خبطة البلطجية و قفلت العين ( لقيت إن رد الفعل غير متوقع حركات غريبة و تحذيلرات من فتح الباب بيني و بينكو أنا قلقت ليفتحوا و يضربوني بحاجة فإعترفت و بالرغم من إنهم كانو شاكين فية لحد ما سفرت إني ممكن أكون بلطجي متخفي في شخصية إبنهم اللي مسافر خاصة و إني ماعييش ما يثبت إني إبنهم و هما عيالي و مراتي لاني سايبهم في جدة لكن قلب الأم قدر يتغلب على هذا الشك

و بدأ أبوية يحكيلي قصص كفاحه مع اللجان الشعبية هو و الجيران و بدأ النصح بإني ماينفعش أنزل بعد الساعة 12 عشان حظر التجول (طبعا كنت ناوي أقابل حظر التجول اللي بيقولو عليه) بيطلع للناس اللي ماشية بعد الساعة 12 و ياكلها . عموما أنا كنت تعبان من السفر و الساعة كانت 10 تقريبا فنمت حالما بيوم حافل ازور فيه كل حتة في اسكندرية العزيزة.

[لماضة مصرية جدا]

السلام عليكم و رحمة الله و بركاته

حمد لله ع السلامة استاذي

الله يسعد قلبك.....انزلنا بقيمة خمشاشر عشرميت مداخلة مرة واحدة

انت متتخيلشي احنا قاعدين عايمين في مية البطيخ ازاي

طول فترة الثورة حياتنا اتوقفت بمعني الكلمة....دلوقتي حياتنا يا متابعة الاحداث....يا تليفونات للاهل ...يا قعدة ع المنتدي

عايزين....حاجة حقيقية....عايزين...نعرف ايه حصل هناك

احسن فعلا قربت اقول جاااااااااااااااااااااااااااااااااي....(وش سنبل مش فاكر قبل المليون و لا بعده)

حمد لله ع السلامة مرة تانية

انا هبيت في التوبيك دوت

صباحك حضرتك......مصري جدا

[the consultant]

@ KINGSABRY الجمارك محصلش معايا موقف يذكر الموظف قالي معاك حاجة يا استاذ قلتله لا قالي حمدلله عسلامة

الأخت العزيزة لونا :شكرا على دعمك و يارب أقدر أنقل الصورة بتفاصيلها و مانساش حاجة.

ريمو يا بلدياتي مش عايز أغيظك بس دهب فطيره بقى أحلا بعد الثورة و لا جاد يااااه

مكاوي: لازم تعملها يا ريس أن شاء الله تنزل بالعيال و تكون الدنيا أمان قريب

أستاذة ريهام: شكرا على المداخلة و ربنا يقدرني و أقدر أنقلكو الصورة كاملة إن شاء الله

[pink rose]

@ KINGSABRY الجمارك محصلش معايا موقف يذكر الموظف قالي معاك حاجة يا استاذ قلتله لا قالي حمدلله عسلامة

الأخت العزيزة لونا :شكرا على دعمك و يارب أقدر أنقل الصورة بتفاصيلها و مانساش حاجة.

ريمو يا بلدياتي مش عايز أغيظك بس دهب فطيره بقى أحلا بعد الثورة و لا جاد يااااه

مكاوي: لازم تعملها يا ريس أن شاء الله تنزل بالعيال و تكون الدنيا أمان قريب

أستاذة ريهام: شكرا على المداخلة و ربنا يقدرني و أقدر أنقلكو الصورة كاملة إن شاء الله

و كبدة الفلاح اخبارها ايه يا استاذي

ارجوك طمني

و الراجل بتاع العصير خروب أمال اخبار التمر الهندي عنده ايه

طمني انا من ساعة الثورة و انا قلقانة عليهم اوي

اااااااااه واحد مهم جدا كمان بليز طمني عليه جنواز اللي في السلطان حسين لسا بخير

هههههههههههههههههههههههههههههه

[the consultant]

المشهد الخامس

طبعا زي ما قلتلكو قررت أبدأ اليوم من بدري نزلت علطول من حوالي الساعة 10:30 كدة الصبح الجو كان عادي جدا الناس متعايشة و البنات و الستات ماشية في الشارع لوحدها مش خايفة من حاجة ، أول ما تلاحظة خصوصا لو أنت ماشي لوحدك إن الدنيا كلها بقت ابيض و احمر و اسود (علم مصر أكيد مش محتاجة زكاء) بس الناس زودت الموضوع شويتين يعني الحيطان ماشي ، الرصيف يمكن و الشجر أوكيه لكن مواسير الميه !!!!! طيب ولازالت الشرطة غائبة الشرطة العسكرية هي اللي بتنظم المرور .

على طول البحر رسومات محترفة و شعارات تعبر عن النصر و صور كبيرة بطول 8:9 متر صور شهداء 25 يناير و خالد سعيد . وعبارات سقوط النظام و من حين لأخر تجد بعض الشباب مجتمعين للرسم على الجدران (طبعا بعض الرسومات ملهاش أي معنى ) و البعض الأخر جميل معظم سيارات شركات الأغذية اللي بتوزع البضاعة برده عليها أعلام مصر و عبارات التغيير التوعوية بصراحة الشكل الإجمالي حلو أوي

لاحظو إني كل ده مدخلتش في أي حديث مع حد و لما كان المرور صعب جدا بصراحة نظرا لغياب الشرطة رفضت كل عروض القرائب و الأصدقاء لاقتراض سياراتهم و قررت إني اقضيها بالتاكسيات نظرا لكونها مصدر هام للمعلومات في مثل هذه الأحوال......................

أنا: إيه أخبار البلد و الدنيا أصلي مسافر و لسه راجع

سواق التاكسي: لا قلة أدب والله

أنا: ليه بس؟

سواق التاكس: حرقوا أمن الدولة أنا مش عارف الناس دول عايزين إيه و البوستة قافلة و محدش عارف ياخد معاشه

أنا : طيب و البلطجة

سواق نفس التاكسي: زايدة أوي يا استاذ و بيطلعوا على الستات اللي سايقة يمضوهم على مبايعات باعربية و ياخدو العربية و يمشوا

انا: ربنا يستر

أنا : سمعت إن كان في أعمال بلضجة في محطة الرمل إمبارح

هو: دول بهدلو الدنيا و كسرو شارع شكور (زي شارع عبد العزيز في مصر موبايلات الى الابد) 9

المهم ما لاحظتة أيضا ان الكنيسة اللي في سبورتنج كان قدامها دبابتين كبااااار ما شاء الله و يومها بالليل قفلوا الشارع بتاعها خالص بالدبابات.

بعد ما سمعت كلام سواق التاكسي كلمت قرايبي و اصحابي اللي انا رفضت عرضهم اني اخد عربيتهم و ابديت ندمي و اسفي و قررت اخد عربية اول احد احس انه مش بيعزم عزومة مراكبية . و المهم نجحت و جريت على محطة الرمل و دخلت الشارع اللي المفروض انه مكسر و اذ بي افوجأ انه زي الفل مافيهوش أيتها تكسير ........!!!! وبعدين بأه

[fatfouta]

حمد لله عالسلامة يا كونسالتانت مستنيينك من امبارح

تنزلش الله يخليك القاهرة وتيجى تحكى لنا

[pink rose]

النهاردة الخميس و اجازة

المفروض تنزلنا بخماشر تمناشر مداخلة

ليه بقى التنقيط دا

بلاش الله يكرمك القفلات بتاعت المسلسلات العربي دي

عاوزين افلام

ماشيها افلام يا اسكندراني يا بلدياتي اختك هاتتجنن

[hOuSsAm]

حمد لله عالسلامة يا كونسالتانت مستنيينك من امبارح

تنزلش الله يخليك القاهرة وتيجى تحكى لنا

اضم صوتى لصوتها

ميدان التحرير يا عمنا والاهرامات والحسين

وشوفلنا رمسيس عامل ايه (لسه كاتبين عليه بردوا محمد حسنى مبارك؟) :(

واخبار الجامعات والكليات ايه جامعة الاسكندرية وجامعة القاهرة

ومكتبة الاسكندرية والبتاعة الزرقا اللى قدامها دى (نفسى ادخلهامرة)

وفيه واحد فى اول اللبان بيقف بعد الساعة عشرة بالليل بيعمل اكل ممبار ومحشى وعكاوى وكلاوى وحجات غريبة كدة بالله عليك طمنى عليه عشان وحشنى اوى :)

ولسه الناس بتروح تقعد فى القلعة بعد 12 بالليل تسمع ام كلثوم ولا ايه (اكيد بقى دلوقتى بيسمعوا اغانى وطنية)

متشكرين ليك جدا ومستمتعين بحكاويك

متتاخرش علينا بقى