فتنة جديدة والبلد مش ناقصة

[Simba]

في الوقت اللي البلد فعلا في حالة معاناة والازمات بتزيد

مرتضي منصور بيشعل فتنة جديدة

فتنة مش ظائفية

في الوقت اللي قولنا الحمدلله ان فيه حد مش هيكون عليه اختلاف من الناس

مرتضي بيشوه الثورة

مع انها ابهرت العالم بشهادتهم

حرام بجد

ده الوقت اللي الناس المفروض فيها توحد الصف علشان كلنا نعدي لبر امان

يجي هو عايز ان مصر تكون عراق ولبنان تانية

ومحدش يقول ديقراطية وديكتاتورية الثورة

احنا عمرنا مجربنا الديمقراطية المزعومة دي

والثوار كل خبطة علي دماغهم بتقويهم اكتر وعندنا ثقة كبيرة فيهم ان شاء الله

ان كنا مش قادرين نكون معاهم ييقي اضعف الايمان اننا ندعيلهم يقدروا يقضوا علي الثورة المضادة دي

http://www.youtube.com/watch?v=9y9QD-X786o&tracker=False

[fatfouta]

يا سمبا خضتنى والله وافتكرت ان فيه واحد ثقة ولا حاجة بيتكلم

هو بيكلم مين ده اساسا....يا سيدى دى عالم عاوزة تصور وخلاص

وبيأسس حزب مرتضى؟؟؟ سورى انى اقوله بلا نيلة وايه الفتنة انه يعمل حزب ما يعمل يا سيدى وابقى خلى حد يعبروا

مش الوليه اللى وراه دى هى بتاعة يا سيادة اللواء المشير الطنطاوى؟؟ الولية نزلت طنطاوى للواء قاموا قاطعين على كلامها

وتقولك انا عاملة عملية قلب من اسبوع ونازلة اهو دلوقتى يعنى حتى طبيا فيه مريض قلب عامل عملية ينزل بعد اسبوع طب حتى يتقنوا الكذب طيب

لا حول ولا قوة الا بالله

الفيديو اللى هى بتتكلم فيه اهو بتقوله يا سيادة (اللواء مشير الطنطاوى) :)

انا والله ما بسخر من اى حد فى الدنيا انا بس عاوزة اللى قالها قولى كذا يبقى يحفظها كويس

http://www.youtube.com/watch?v=K7OJo40esEc&feature=player_embedded

تم تعديل 11 مارس 2011 بواسطة fatfouta

[Simba]

والله يا فتفوتة الواحد ايده علي قلبه

شايف الناس ماشية الحمدلله صح

والتعابين بتلعب حواليهم مستنية تلدغهم

عجبني التعليق ده من اليوتيوب

شوفو يا بتوع شفيق : الاسطول الامريكي في السويس والاسماعيليه.. والجيش الاسرائيلي متكربس في رفح .. وامنا الغوله في الجيزة .. وابو رجل مسلوخه في اسكندريه .. والقزافي في السلوم .. والنداهه في المنصورة .. والخط في الصعيد .. والفرماوي حط ايده عالبحيرة .. وفى ومخلوقات فضائيه نازلة دلوقتي فـ طنطا .. بردو باي باي ... يا شفيق بيه يا بتاع المطار .. احنا بردو مش اسفين .. زي حسني كده .. وهش بقا بطلو زن ودوشه

[fatfouta]

بص الرائع نجيب محفوظ بيقولك ايه

لا تخف.. الخوف لا يمنع من الموت، ولكنه يمنع من الحياة

[شرف الدين]

بص الرائع نجيب محفوظ بيقولك ايه

لا تخف.. الخوف لا يمنع من الموت، ولكنه يمنع من الحياة

نقل رائع يا فتفوتة

[Dreamwithme]

تصدق يا أستاذ سمبا إن الفيديو فعلا أستفزني جدا

وهي فعلا فتنة مش هزار لأن للأسف لسه في ناس بتصدق

أنا أعرف واحدة كانت حاضرة درس في جامع وفوجئت أن الشيخة اللي بتقول الدرس

يتقول البلد كانت أمان وكنا عايشين كويسين منهم لله ولا يوم من أيامك ياحسني

والله مش هزار .....والأنكت من كده إن محدش رد عليها والناس اقتنعت بكلامها عن البلطجية اللي في الشارع

والبنات اللي بيتخطفوا وأن المسيحيين حرقوا مسجد السيدة عائشة

والبنت روحت خائفة ومرعوبة وكلمتنا عشان تسأل علي موضوع مسجد السيدة عائشة

حسبي الله ونعم الوكيل وربنا يشفي

ومرتضي زعلان ليه إن الناس كانت بتقول شفيق يمشي وممكن بكره تقول عصام شرف يمشي

أيه المشكلة مش دي الديمقراطية اللي هوا كان زعلان عليها في انتخابات نادي الزمالك؟

عموما الراجل ده أخره يعل برنامج يومي علي موجة كوميدي وهينجح جدا

[التونسى]

رجل مريض بجدا مرتضى منصور

كليب صوتى غريب جدا له .. بيصرخ بهسيتيريه ويقول ((سيبووووووووووونى)):protest:

http://www.youtube.com/watch?v=Lzm0V1Qx7iw

شكلهم كانو بيلبسوه قميص الاكتاف:blink:

[fatfouta]

مرتضى منصور من ميدان مصطفى محمود: هي فين الثورة دي اسمها ثورة شادي ووائل!

الدستور

[aimen]

عموما الراجل ده أخره يعل برنامج يومي علي موجة كوميدي وهينجح جدا

حنلعب بقى اهو :protest:

هوكل مجنون يظهر يقولوا على قناة موجة كوميدى

القناة لازم تحافظ على مستوى المذيعين فيها

طيب القذافى وفعلا يستاهل

لكن مرتشى مسعور

اخره نشترى له قرد ويسرح بيه فى الموالد

تم تعديل 11 مارس 2011 بواسطة aimen

[جسار]

مرتضى الصدر كتبت عنه من قبل أنه يويو أمن الدولة وكانوا عاملينه عفريت العلبة

كل ما يحبوا يشغلوا الشعب بأية مواضيع فارغة يقوموا مطلعينه من العلبة وهاتك

ياردح وشرشحه ، والناس تقعد أسبوع بحاله تتكلم عنه والبعض من السذج والابرياء

تصوروها شجاعة وجدعنة ، مرتضى أول شخص أدخل لعبة غسيل الأموال القذرة الى ساحة

الرياضة فى نادى الزمالك و أغرق النادى فى الديون ، قوة مرتضى فى أنه يعرف جيدا

طريق الوصول الى القضاة المشتبه فى نزاهتهم ويقوم باللا زم ويكسب قضايا أتعابها

لاتقل عن 5 -3 مليون جنيه ، مرتضى بعد الشو اللى عمله فى 83 فى أعقاب فيلم الأفوكاتو

وحصوله على مليون جنيه تعويض من عادل امام مقابل التنازل عن القضية ، فتحت له أبواب

عالم نجوم الفن والرياضة و اصبح نجما من نجوم المجتمع ، وكان الجميع يصمت على سفالاته

وقذاراته لعلمهم بأنه من عملاء أمن الدولة ، وهو أول من ادخل البلطجية بشكلهم المعروف

الى النوادى الرياضية تحت مسمى أمن خاص برئيس النادى جلبهم من قريته بشلوش فى ميت غمر

الحثالة من أمثاله لايتم مناقشتهم فهذه رفاهية ليس لدينا وقت لديها الآن ولكن عن طريق

أننا نرفع الأحذية فى وجهه ... وياريت تكون احذية قديمة ودايبة .

[aimen]

من فترة قرأت الجملة دى

مرتضى منصور كائن الناس تحب تتفرج عليه لكن دايما تبعد عنه لكيلا تصيبها بذاءاته

الراجل دمه محروق بطريقة مش طبيعية محدش معبره ولا مديله اى اهتمام خالص

يا جماعه حد يفهم ال........... اللى فى ميدان مصطفى محمود

ان ميدان التحرير مافيهوش حد

هاجم المحامي مرتضى منصور ثورة 25 يناير، قائلا من فوق المنصة في ميدان مصطفى محمود "هي فين الثورة عشان تبقى فيه ثورة مضادة دي اسمها ثورة شادي ووائل".

وهاجم عمرو أديب ومنى الشاذلي وريم ماجد لمنعه من الظهور في برامجهم، متهما منى الشاذلي بأنها تحصل على 480 ألف جنيه شهريا وأن زوجها حصل على 72 مليون جنيه، واستنكر موقف ريم ماجد المؤيد للثورة قائلا "لو عندها الشجاعة تهاجم عائلة ساويرس".

كما هاجم الأديب العالمي علاء الأسواني والدكتور محمد البرادعي المدير السابق للوكالة الدولية للطاقة الذرية والدكتور أيمن نور زعيم حزب الغد، داعيا الفريق أحمد شفيق رئيس الوزراء السابق للترشح للرئاسة.

وهاجم الثورة المصرية قائلا "هو إيه اللي اتغير بعد الثورة غير ان بقى فيه عندنا فتنة طائفية".

وأكد منصور أنه يجهز لمؤتمر صحفي ضخم يليق بالفريق شفيق لكي يعلن خلاله ترشحه للرئاسة