في لقاء الشباب مع المجلس العسكري: الإتفاق علي رحيل شفيق وحل أمن الدولة سريعا

[م تيمور المراغي]

إجتمع ممثلون عن العديد من الحركات الشبابية علي رأسهم ممثلون عن حركة شباب 6 أبريل مع قيادات المجلس العسكري، لمناقشة أطروحات الشباب ومطالبهم من أجل إتمام التحول الديمقراطي والإطاحة بكل بقايا النظام البائد.

وقد ناقش الإجتماع الذي إستمر أكثر من الخمس ساعات في المنطقة المركزية بالعباسية العديد من الملفات، كان علي رأسها أحداث جمعة التطهير وماحدث من إعتداء من قبل قوات الشرطة العسكرية علي المعتصمين في ميدان التحرير، وكذلك ملفي الإطاحة بحكومة شفيق والطوارئ وأمن الدولة والأجور والعمال.

وإتفق الجميع علي العديد من النقاط الهامة للتنفيذ وهي كالتالي:

1. محاسبة كل المسؤولين عن أحداث جمعة التطهير وإعتداء قوات الشرطة العسكرية علي المتظاهرين

2. رحيل حكومة شفيق في خلال أيام قليلة، مع طرح المجموعات الشبابية لأسماء وزراء مقترحين من الكفاءات لشغل هذه المناصب الوزراية

3. إعادة هيكلة أجهزه وزارة الداخلية كليا، وحل جهاز مباحث أمن الدولة في خلال 4 - 5 أسابيع

4. التنسيق الكامل في ملف المعتقلين، والإفراج الكامل عن كل المعتقلين الذي تطرح أسمائهم من قبلنا

5. الإطاحة بكل المحافظين الحاليين (بعد شهرين تقريبا)

6. الموافقة علي الحد الأدني للأجور والحد الأقصي للأجور، وتتولي الحكومة الجديدة إقرار هذا الحد وتوفير النفقات له.

وقال محمد عادل، المتحدث بالإعلام بإسم حركة شباب 6 أبريل إن الحركة سوف تستمر في إستخدام كل أدوات الضغط علي المجلس العسكري، من أجل الإستمرار في تحقيق المطالب والحفاظ علي المكاسب التي حققتها إنتفاضة الشباب.

[Alattar]

ان شاء الله الكلام ده ان اتنفذ فعلا..يبقي كده تقريبا رؤوس الفساد كلها طارت

و تبقي البلد تم تطهيرها من فوق تماما...

الله المستعان

[عنبو]

ياسلام لو المهندس هانى عازر يمسك وزير النقل والموصلات عندنا

اليى عاوز يعرف مين هو المهندس هانى عازر

افعص هنا

[doha]

مش عارفه انا فهمت غلط ولا فعلا العنوان بيوحي بشيء مخالف لما هو في المضمون ؟

يعني الي فهمته من العنوان ان كان في لقاء للشباب مع المجلس العسكري واتفقوا فيه على عده امور اهمها رحيل حكومه شفيق وحل امن الدولة .. ومن صيغه العنوان كده يفهم ضمنا ان المجلس العسكري وافق على الكلام ده واتفق مع الشباب خلاص ..

بينما الي يفهم من نص الخبر ان الشباب اتفقوا بينهم وبين بعض انهم هيطلبوا المطالب دي من المجلس العسكري الي لسه بطبيعه الحال لم يبت فيها ..

هل انا كده فاهمه صح ؟ اتمنى اكون فهمت غلط لان فعلا العنوان مهم جدا وعسى يكون صحيح ..

لو مش كده يبقى ياريت يتغير العنوان بما يتماشى مع الخبر ..

[Alattar]

ياسلام لو المهندس هانى عازر يمسك وزير النقل والموصلات عندنا

اليى عاوز يعرف مين هو المهندس هانى عازر

افعص هنا

بعد اذنك يا عنبو هعدل رابط الخبر

افعص هنا علي رأي عنبو

تم تعديل 28 فبراير 2011 بواسطة Alattar

[Simba]

يا عم تيمور الله يخليك

الكلام اللي بيكون مع خمسينة شاي وشكرا ده

مش موثوق منه

فين هترحل حكومة شفيق في ايام قليلة من فض اعتصام امبارح بالقوة

كمان ليه القوات المسلحة مطلعتش بيان بكده

كلها وعود يعني ولا ايه

ولا طلبات لسه الشباب هتطلبها

[الســـاري]

3. إعادة هيكلة أجهزه وزارة الداخلية كليا، وحل جهاز مباحث أمن الدولة في خلال 4 - 5 أسابيع

عفوا يا باشمهندس .. بس النقطة دي بالذات مش واضحة

يعني ايه حل جهاز مباحث امن الدولة ؟ .. هل يعني ازالة الجهاز بالكامل من الدولة و منظومتها الامنية .. او حله بمعنى تغيير كل العاملين في هذا الجهاز ؟ واحلال الجديد مكان القديم ؟

ارجو الافادة وشكرا

[م تيمور المراغي]

مش عارفه انا فهمت غلط ولا فعلا العنوان بيوحي بشيء مخالف لما هو في المضمون ؟

يعني الي فهمته من العنوان ان كان في لقاء للشباب مع المجلس العسكري واتفقوا فيه على عده امور اهمها رحيل حكومه شفيق وحل امن الدولة .. ومن صيغه العنوان كده يفهم ضمنا ان المجلس العسكري وافق على الكلام ده واتفق مع الشباب خلاص ..

بينما الي يفهم من نص الخبر ان الشباب اتفقوا بينهم وبين بعض انهم هيطلبوا المطالب دي من المجلس العسكري الي لسه بطبيعه الحال لم يبت فيها ..

هل انا كده فاهمه صح ؟ اتمنى اكون فهمت غلط لان فعلا العنوان مهم جدا وعسى يكون صحيح ..

لو مش كده يبقى ياريت يتغير العنوان بما يتماشى مع الخبر ..

لا فهمتي غلط

كبرت الفونت عشان تفهمي صح

إجتمع ممثلون عن العديد من الحركات الشبابية علي رأسهم ممثلون عن حركة شباب 6 أبريل مع قيادات المجلس العسكري، .............

[rewsha]

بعد الخبر بتاع فتحي سرور

احب اْؤكد ان المجلس الاعلى فعلا هاينفذ مطالب الثوار

وهايشيل احمد شفيق فعلا ...ويحط بداله ...صفوت الشريف

[م تيمور المراغي]

بعد الخبر بتاع فتحي سرور

احب اْؤكد ان المجلس الاعلى فعلا هاينفذ مطالب الثوار

وهايشيل احمد شفيق فعلا ...ويحط بداله ...صفوت الشريف

اطمنك يا استاذة

الاتفاق مع المجلس العسكري كان رحيل حكومة شفيق في خلال أيام قليلة، مع طرح المجموعات الشبابية لأسماء وزراء مقترحين من الكفاءات لشغل هذه المناصب الوزراية

يعني اي شخص غير مرضي عنه من شباب الائتلاف لن يتم تعيينه

اطمني

[rewsha]

يعني اي شخص غير مرضي عنه من شباب الائتلاف لن يتم تعيينه

اطمني

ياريت بجد لاْن اللي الواحد بيشوفه مخليه مش متفائل خالص

بصراحه كل ما اشوف خبر دمي يتحرق واقول الله يكون في عون اخواتنا اللي في التحرير

يعني النهارده بس.... خبرين على الماشي

1- تعيين فتحي سرور رئيس مجلس امناء مستشفى 57357 لا وايه .شوفوا مين اللي معينه (من قبل مجلس الحكم العسكري)

2- ان النائب العام منع حسني مبارك من السفر (فرقت ايه .مهو كده كده كان قاعد)

بصراحه انا مُحبطه جدا

في الاول كنت باقول نستنى ونشوف

لكن دلوقتي ...شوفنا خلاص

وزي ما بيقولوافي المثل .....في العيًنه ....بيًنه

[م تيمور المراغي]

لو تعرفي اللي اعرفه

لو بتشوفي اللي بشوفه

لو تسمعي اللي بسمعه

:happy:

اطمني والله ,,

الثورة دي امانه في رقابنا ,,

لو نموت عن آخررنا

لازم مطالبنا تتحقق ,,

و ان شاء الله

حتتحقق

[م تيمور المراغي]

روشه ماتقولي الفكره الجميله اللي قلتيلي عليها الصبح ؟

لما بلغتهم بيها لقيتهم والله حاطينها ضمن آليات التصعيد ,,

تم تعديل 28 فبراير 2011 بواسطة architect

[امير مجروح]

أنا بجد خلاص دماغى حتنفجر....!!!!!!!!

«المجلس العسكري»: استفتاء تعديل الدستور أول أبريل..ولا إقالة لحكومة شفيق

المصدر

تم تعديل 28 فبراير 2011 بواسطة امير مجروح

[rewsha]

روشه ماتقولي الفكره الجميله اللي قلتيلي عليها الصبح ؟

لما بلغتهم بيها لقيتهم والله حاطينها ضمن آليات التصعيد ,,

والله فكره

واهو برضو نشوف راْي الناس اللي معانا هنا ايه في الفكره دي

انا اقترحت على الباشمهندس تيمور بما انه على اتصال بحركة 6 ابريل

يبلغهم بفكرة جت على بالي لو الاعداد فضلت قليله كده

(يعني اكتر عدد سمعته في ميدان التحرير 5000 )

يبلغوا بانهم مضربين عن الطعام .يمكن الامور تتصعد وتلاقي صدى اكبر

ويبقى في ضغط على المسؤلين بطريقه تانيه

لان المسؤلين لما لبوا بعض المطالب الفئويه .بالتالي الناس اللي طلباتهم اتنفذت خلاص مابقوش يروحوا التحرير

كمان اهالي الشهداء اللي جالهم تهديدات (زي ما سمعنا)

اكيد الخبر ده خلى ناس كتير تخاف وتقول كفايه

وبالتالي العدد قل كتير عن الاول

[رضوي]

يـــــــــــــــــــــــــــارب

يارب كل الاتفاقات دي تتنفذ وعلي وجه السرعة

بصراحة بعد اللي بنشوفه كل يوم من فضايح وفساد

مابقاش عندنا اي نوع من الثقة في اي مسئول ذكر اسمه في النظام السابق

[Simba]

أنا بجد خلاص دماغى حتنفجر....!!!!!!!!

«المجلس العسكري»: استفتاء تعديل الدستور أول أبريل..ولا إقالة لحكومة شفيق

المصدر

طبعا تصدق المصري اليوم

علي الاقل دي ناس متخصصة في نقل الاخبار الرسمية والمهمة ومسئولة عن الاخبار اللي بتنقلها

[fatfouta]

اصبروا اما نشوف الاجتماع خلص على ايه....اقروا الخبر ده

إئتلاف الثورة يعلن نتائج اللقاء مع المجلس العسكري في مؤتمر صحفي بمقر الدستور الأصلي

الإثنين, 28-02-2011 - 4:54الإثنين, 2011-02-28 16:05 | خاص- الدستور الأصلي

يعلن إئتلاف شباب ثورة 25 يناير في مؤتمر صحفي عالمي تفاصيل اللقاء الذي دار بينهم وبين أعضاء المجلس الأعلى للقوات للمسلحة أمس، وذلك في مقر موقع "الدستور الأصلي" في 37 شارع قصر النيل بالقاهرة اليوم الاثنين في تمام الساعة السابعة مساء.

وسيقوم موقع الدستور الأصلي ببث وقائع المؤتمر الصحفي عبر الإنترنت على الهواء مباشرة.

[م تيمور المراغي]

نتابع عبر الدستور

انا بحاول والله اتصل بكل النمر قافلين الموبيلات

ياريتني كنت في مصر معاهم

[ام سلمي]

ائتلاف شباب الثورة| المتحدثين الاعلاميين باسم الائتلاف :محمد القصاص وزياد العليمى على قناة الجزيرة مباشر ابتداءاً من الساعة 06:30 مساءاً ولمدة ساعة

يعلن ائتلاف شباب الثورة عن عقد مؤتمر صحفى اليوم الساعة 7 مساءاً حول لقائة أمس مع قيادات المجلس العسكرى وذلك بمقر موقع الدستور الاصلى ش قصر النيل بجوار ميدان مصطفى كامل أعلى الخطوط الجوية الليبية