أنت... مقابل صورتك

[Cleo]

لكل منا صورة يراهاالناس بطريققة... قد نراها نحن بطريقة مختلفة...

يعنى مثلا قد يراك الناس انطوائى و كتوم و خجول... فى حين أنك ترى نفسك منفتح و اجتماعى و متكلم..

فماذا لو ذكرنا لبعض آراء الناس فينا مقابل ما نراه نحن فى أنفسنا؟؟

[moody00x]

طيب ما تبدأ جناب حظرتكم بأنفسكم ....إحكى أفنظم إحكى

[Cleo]

أنا مثلا هذه أراء أغلب الناس فى:

* هادئة

* خجولة

* ذات قبل شجاع ؟؟؟ (تعليق سمعته أكثر من مرة فى المنتدى)

والله العظيم ده حرام وكتير كمان ... إنتي بتقومي منطورة الحروف وزي ما تيجي يا كليو ؟... يعني المفروض كلمة قبل دي تبقى قلب صح ؟.... بتفكريني بإبني عمر .. برضوا مابيقفش عند الحاجات الصغيرة دي ... س س مشرف على المعاش وهاسرح بقرص عشان خاطر ست كليو خانوم .

* باردة (من ناحية ردود الأفعال)

* باردة (من ناحية المشاعر)

* ذكية

* مغرورة

* ناعمة

ما أراه فى نفسى:

هادئة: أنا شخصية انفعالية جدا... أنفعل بسرعة شديدة و إن كنت أحاول دائما السيطرة على انفعالاتى..

* خجولة : أنا لا أرى نفسى خجولة على الإطلاق.. و إنما يكون حذر فى التعامل الأول مع الناس حتى أستطيع أن أمسك بمفاتيح الشخصية التى أمامى... بعد ذلك .. أنطلق... :P

* باردة (من ناحية ردود الأفعال): العكس... أحاول دائما أن أمتص الشخصية التى أمامى إن كانت غاضبة... و كذلك أحاول دائما السيطرة على انفعالاتى حتى لا يدفعنى الغضب إلى ارتكاب أى حماقة أندم عليها فيما بعد

* ناعمة: إطلاقا... فأنا مظهرى و ميولى صبيانية إلى حد ما

* مغرورة: أحيانا أشعر أنى عديمة الثقة فى نفسى..!!

* باردة من ناحية المشاعر: مشاعرى دائمة فى حالة غليان إما بالسلب أو الإيجاب... فأنا إما أحبك جدا... أو أكرهك جدا... أو أنك لست على خريطة مشاعرى على الإطلاق..

إنتوا بأة .. الناس بتشوفكو إزاى؟؟؟ و إنتو بتشوفوا نفسكو إزاى؟؟؟ hpc:!:

تم تعديل 13 يوليو 2004 بواسطة se_ Elsyed

[moody00x]

ذات قبل شجاع ؟؟؟ (تعليق سمعته أكثر من مرة فى المنتدى)

أنا ف عرض المجمع اللغوى.....

hpc:!: :P :) :) :) :)

[Cleo]

ذات قبل شجاع ؟؟؟ (تعليق سمعته أكثر من مرة فى المنتدى)

أنا ف عرض المجمع اللغوى.....

hpc:!: :P :) :) :) :)

قلب... قللللللللللللللللللب......

إففففف..... اتعبوا معانا شوية...!!

[kfaya]

يا خسارة يا كليو ... لو بتعرفى عربى زى ما انتى كدا لبلب فى التركى و الجريجى ... ...كان زمانك اخدتى منصب هايل هنا .... مشرفة دور ... نائبة مدير ... :)

ولا أقولك .. احنا نستحدث منصب جديد .. ...ونسمية "مصحح لغوى" ... و نحوله مدخلاتك من برة برة .. هو يصلح ....و بعدين يبوستت ....

انتوا عارفين "أنا فى عرض المجمع اللغوى " دى فكرتنى بأية ؟؟؟؟؟؟

ايوة صح اسماعيل يس و القصرى و الخواجة بيجو لما كانوا فى سراية المجانين و بيكتبوا كلمة .... طبعا هى أصلا مينفعش تتكتب ..... :P

لكن أهو ... نحاول هنا ... يمكن تنفع ... hpc:!:

[kfaya]

اللى فاتت دى كانت ملحوظة صغيرة على الماشى ...

نرجع بقى للموضوع الأصلى للأخت كليو

صعب جدا ان الأنسان يأخذ رأى الأخرين فية على أنه مواصفاتة الشخصية .. و خصوصا لو كان المحيطون بة من النوع المجامل , و أعتقد أننا كلنا كذلك ...

طبعا ممكن دة لو كان الصفة حميدة و واضحة ... مثلا نقول للمتفوقة دراسيا , أنتى ذكية , و ذلك لكى نطريها و ندفعها لتفوق أكثر ... أو باستمرار نقول للبنت أو الولد الهادئ .. دة زى الملاك , دة زى النسيم ... و هكذا

أما لو صفة غير مرغوبة ... مثلا بنت مرووشة ... او ترتبك لأى موقف ... أو فاقدة الثقة فى نفسها ....

صعب جدا أن نقول لها ذلك ... و الا تأصلت تلك الصفات و كونت عقد نفسية ..

عشان كدة كلنا حلوين و كلنا أممير .....

[حشيش]

عقلى الباطن:  موضوع ظريف على عكس بقية مواضيعها الرخمة  hpc:!:

شوفى كليو هانم اغا

انا عن نفسى ابدوا لمن يرانى لاول مرة انى شخص جاد جدا...واظل كذلك الى ان اعتاد على الاخرين...قلما امزح فى الحياة اليومية الا مع الاشخاص القريبيين من قلبى...فى معظم صورى الفوتوغرافية تلاقينى ضارب بوز !!!

[crossfield]

ناعمة: إطلاقا... فأنا مظهرى و ميولى صبيانية إلى حد ما

على يدىىىىىىىىىى

:) :) :)

صحيح الجنس الخشن خشن و الجنس الناعم ناعم

hpc:!: :P

لأ بجد

كليو ما شاء الله

ذكية و بنت جدعة جداً و فعلاً بتعرف تتحكم فى أعصابها"أنا شخصياً باحسدها على قدرتها فى الموضوع ده" رغم انها فعلاً عصبية.

و فعلاً قد تعطى انطباع بانها مغرورة

لكنها على العكس تماما- هى خجولة فى البداية بس لكن بعد كده "سيرى يا نورماندى" :)

يمكن عيبها الوحيد

انها مثالية زيادة عن اللزوم و قلوقة حبتين(انظرموضوع القولون العصبى و الاكتئاب و البقية تأتى)

ده رأيى فيها بعد ما طبعاً ظرفتنى باكو علشان أقول البقين دول

كليو شخشى جيبك كمان و أنا أقول شعر :)

[ســيد مرزوق]

موضوع ظريف جدا ...

أنا عن نفسي لو ماابتسمتش .... أبدو جاد جدا وحاد جدا ..

ويقال عني إنني جدع وابن بلد وشهم وخدوم لأي محتاج حتى لو عدوي ..

أما لو فتحت في الهزار والضحك .... إنسوا بقى كل اللي تعرفوهم من الكوميديانات المعروفة وغير المعروفة .

وكذلك تلاقيني وقت الجد جد الجد

ووقت اللعب والهزار والقفشات ..... فظييييييييييييع

دي بقى اتعلمتها من البهوات الأجانب اللي إشتغلت معاهم في بداياتي بالإضافة إلى ما يشاع عني من خفة الدم ... مع إني قليل شرب المياه ..

عموما مخلص للغاية في عملي ولا أقبل بأقل من 100 % وهذا ما يتعبني كثيرا مع من يعمل معي .

أما المقربين مني أوي ..... يقولون عني أنني هاديء نسبيا وصبور ... ولكن عندما أغضب ...... أتحول إلى .... الرجل الأخضر بجد ...

يالهوي ..... إيه ده ؟؟؟؟

رأيي الشخصي في نفسي ...

أنا واحد غلبااااااااااااااااان عالآخر

ومحرووووووووووووم من حاجات بسيطة جدا ولكنها بالنسبة لي في غاية الأهمية

ودمعتي بيني وبين نفسي قريبة جدا ... وممكن أبكي لمنظر طفل أو راجل عجوز بيتألم ....

أما الستات ولا مؤاخذة لو فضلوا يعيطوا لبكره ولا أنا هنا ....

جااااااااااااااااااااامد

وعندي بفضل الله قدرة على العطاء ليس لها حدود

ربنا يسهل وماكونش طولت على حضراتكم

اللي بعده .... hpc:!:

[DARWEEN]

وسيم :)

إجتماعي :)

لبق :)

ذكي :)

لماح :)

أشيك واد في روكسي :)

متواضع جدااااااااااااااااااااااا hpc:!: :P :)

[crossfield]

عصبية

عنيدة

بالى مش طويل

رومانسية

سوسة شويتين

زى القطر"مبعرفش أجامل و لا أنافق حتى لو علشان مصلحتى"

انطوائية وخجولة- مع الغرباء فقط لكن لما باتعود على حد بيبقى و لا كإنى أعرفه من عشرين سنة-عمرى يعنى hpc:!:

مسالمة جداً -مابدأش بأذية حد لكن لو حد أذانى فعلاً

بابقى شرسة جداً و مهداش غير لما آخد بتار الدهاشنة trch:

مع ان و الله كتير باستعوض ربنا و أسكت :P

متقلبة المزاج

و أحياناً أتهم بالغموض- أنا باشوف انه تحفظ مش أكتر

كتومة و حافظة أسرار درجة أولى

[Cleo]

نقطة نظام....

جميل إن كل واحد فيكم ذكر صفاته الشخصية كما يراها... ولكن أين صورتك التى يراها الناس؟؟؟ يعنى رأى الأخرين فيك؟؟

يا خسارة يا كليو ... لو بتعرفى عربى زى ما انتى كدا لبلب فى التركى و الجريجى ... ...كان زمانك اخدتى منصب هايل هنا .... مشرفة دور ... نائبة مدير

مش ذنبى إن انتو ماتعرفوش غير العربية العامية... و مالكوش فى العربى الفصيح...

صعب جدا ان الأنسان يأخذ رأى الأخرين فية على أنه مواصفاتة الشخصية

مش لازم تسأل بنفسك الناس عن رأيهم فيك... بس أكيد بيجيلك فيدباك من ناس كتير عن رأيهم ده... يعنى فى خناقة مثلا واحد يقوللك "إنت مغرور وفاكر نفسك حاجة" ... واحد يكون حصل سوء تفاهم بينك و بينه و بعد كدة يقوللك "أنا كنت فاكرك الأول كذا"

عقلى الباطن:  موضوع ظريف على عكس بقية مواضيعها الرخمة 

حشيش.... خللى روحك رياضية... مش عشان كل مواضيعك بتفشل و مالهاش جمهور و شباك التذاكر بتاعك بقى يوزع قراطيس لب مجانا مع كل تذكرة تقوم تهاجم نجاح الأخرين منقطع النظير بهذا الشكل..!!

كليو شخشى جيبك كمان و أنا أقول شعر

تقوللى إيه يا بنتى..!! إيشحال ماكانوش سطرين بعتاهملك عاللإيميل عشان تعمليهم كوبى بيست زى ماهم...!!! بلاش جشع بأة..!!!

إفففففففف..... مليتو البلد...!!!

[Cleo]

عصبية

عنيدة

بالى مش طويل

فعلا... اتقى شر كروس إذا غضبت...

رومانسية

hpc:!:

يعنى... شوية...

سوسة شويتين

قولى تلات شويات.... عشروميت شوية.... يا سااااااترررررر.... :P

زى القطر"مبعرفش أجامل و لا أنافق حتى لو علشان مصلحتى"

fsh:: fsh:: fsh::

بتفكرينى يا ركوس بسهير البابلى فى ريا و سكينة لما بتقوله "جيت أ*** فى عبى جت فى وشك يا بيه" !!!

انطوائية وخجولة- مع الغرباء فقط لكن لما باتعود على حد بيبقى و لا كإنى أعرفه من عشرين سنة-عمرى يعنى

و دمك زى السكر يخرب عقلك و عليكى سرعة بديهة أحسدك عليها..!!! :)

تم تعديل 13 يوليو 2004 بواسطة Cleo

[Salwa]

شخصية قوية .....

مبترحمش وما تفوتش حاجة ..

متحبش حد يطلعها غلطانة .....مغرورة ..

متكبرة ...

تساعد بعنيها بس لازم تستفسر ..

طيبة وعلى نياتها ...

ينضحك عليها بكلمة ...

دماغها ناشفة ..

لو حد دخل قلبها ممكن يدخل بيتها .....غير كدة لأ .

تعاملك على الفرازة ....

بتعاملك بما يرضى الله .....

ده كلام الناس .........................

كلامى انا بقى .....

صح شخصيتى قوية ......

بالعكس برحم لكنى لا افوت لمن يريد استغلالى ...

كذب......هى مش غباء منى ....لكن لو انا مش غلطانة ليه اللى قدامى يصمم ان هو صح وعاوزنى اجامله على حساب نفسى ؟؟؟؟

والله العظيم مش متكبرة لكن فعلا فعلا الاحساس ده بياخدوه الناس عنى لكن لما بتكلم معاهم بيعرفونى على حقيقتى .وذلك لأنى فعلا محترمة اكثر من اللازم واعتز جدا بنفسى ......

حكاية انى اساعد اى شخص فى اى شئ دى فى دمى لكن لازم اعرف التفاصيل والا ابقى ساذجة وهابلة .....وانا مش كدة .

برضه حكاية طيبة وعلى نياتها ....ليه الناس بتقول كدة ؟؟؟ لأنى اظل استمع لمن يحكى واجيد الاستماع وانا فى حالة صمت تام ....فاللى قدامى يتهيأله انى طيبة وصدقت كل كلمة .....لكن فى الحقيقة انا اكون فى حالة صمت لأنى ......اغربل الحديث داخل مخى .....

ينضحك عليها بكلمة ......آههههه......اصلى مش بستحمل يكون فيه جو ..نكد..........حتى لو انا صاحبة حق لكنى احيان كتير افوتها .....واقبل اتصالح بكلمة حلوة ...

آه دماغى ناشفة فى الحق ......

لو حد دخل قلبى ممكن يدخل بيتى ......صح......مش اى حد يدخل بيتى ....انا اعتبر بيتى من اخص خصوصياتى ....

الصداقة خارج المنزل .....

لكن لو حد اعتبرته انسان كويس ومضمون اخلاقيا ممكن يدخل بيتى ......../ كل واحد حر فى تفكيره ./

بعامل الناس على الفرازة ...يمكن دى كمان صح .....لأنى لا ارضى بمعرفة اى نوع من البشر ...انا اتخير الناس....طيب وايه اللى يجبرنى على غير كدة .....انا لا اجامل احد على حساب نفسى ......وبيتى .

حكاية انى اعامل الجميع بما يرضى الله ده حقيقى مائة فى المائة .

مالا اقبله على نفسى لا اقبله على غيرى وده قانون اساسى فى حياتى ........

انا اجتماعية جدا ...الى حد معين ..اى انى لا اتخطى حدود معينة بحيث ان الخطوط تسيح على بعض ..دائما فيه فاصل بينى وبين اى انسان غريب .....

واخيرا .........

فى الحقيقة المطلقة ولو ان مفيش حقيقة مطلقة ..انا سعيدة بحياتى وبنظام حياتى ولا اقبل تغييره ولا يهمنى كثيرا رأى الغير .....ان تعارض مع رضائى عن نفسى ...

تحياتى .

[فــيــروز]

راى الناس فىّ يتغير بتغير علاقتى بهم

يعنى هناك من لا تسمح علاقتى بهم سوى بالتعامل الرسمى .. وبالتالى يكون رايهم فىّ محدد بما تسمح به العلاقه الرسميه

لكن هناك من تطول علاقتى بهم و تتطور من علاقه رسميه الى علاقة زماله مثلا وقد يصيبهم بعض الدهشه من تغيرى "ده من وجهة نظرهم" :)

يعنى بالنسبه لناس كتير انا مثال العقل و الرزاله .. قصدى الرزانه hpc:!: باتكلم قليل جدا :) "ارجو محدش يستغرب انا فعلا مش باتكلم كتير فى الحقيقه غير مع ناس قليلين" .. هادئه و صبوره ومحدش بيسمع لى حس :P "ربنا بيحبهم" .. ممكن البعض يرى انى برّاويه ودى حاجه انا باحس انها احسن و باتمنى يفضل رايهم فىّ كده عشان يبعدوا عنى :)

انا باحب اتفرج على الناس من بعيد .. عشان كده صورة الولد اللى واقف فى الشباك دى بتمسنى جدا و محتفظه بيها ومش عاوزه اغيرها :) .. وبافترض انى لازم اعرف كل انسان بيحب يتكلم فى ايه او يسمع ايه قبل ما افتح بقى عشان اتكلم .. وحيث ان المعرفه دى تتطلب وقت لازم اسكت شويه قبل ما ابتدى

اتكلم ..

بعض زملائى فى الشغل دلوقت بعد ما قضيت معاهم سنه شايفين انى لبط :) الكلمه دى شكلها مش شيك اوى لكن السبب فى انهم شايفينى كده انى بقيت ارد على هزارهم بعد ما كنت باسمع بس و ابتسم ابتسامه صامته .. ابو الهول يتكلم

انا لم اكن اتخيل ان صورتى عند الناس مختلفه كده عن صورتى عن نفسى الا اما كنت فى ثانويه عامه

كانت اول مره فى حياتى آخد درس خصوصى فى الفيزياء وكان المدرس راجل كبييييير ومش عارفه ليه وقتها كان يسيطر علىّ احساس شديد بالانكسار .. بالاضافه الى انى من الاساس مش باخد على الناس بسرعه فكنت باتعامل معاه بحذر شديد و تحفظ بالغ .. بس على نهاية السنه كنا بقينا اصدقاء جدا خصوصا انه ماكانش عنده بنات وكان نفسه يتبنانى :) .. ومره كنا بنضحك على حاجه لقيته بيقول لى غريبه اللى يشوفك اول السنه مايشوفكيش دلوقت

الناس يرون انى هاديه لكن الحقيقه انى باتعصب جدا بس مش عليهم .. انا باتنرفز للداخل فى المعتاد :D لكن لو اتنرفزت للخارج ده معناه ان الموضوع جلل فعلا ..

انا شخصيا باشوف نفسى شخصيه جامده "من الجمود يعنى" .. وعندى صعوبات فى التعبير عن المشاعر بينما بعض الناس قد يرون العكس .. كتّر خيرهم

بعض الناس يرون انى متواضعه .. و الحقيقه انا باجبر نفسى على هذا لانى مريت بفتره كنت اتغريت فيها وانا باكره الغرور اساسا فباحاول اسيطر عليه جوايا قبل ما يتاكد

انا باحس احيان كتير انى سخيفه مش عارفه ليه :) زى دلوقت كده حاسه انى مش طايقانى .. اقعدوا بالعافيه

تم تعديل 13 يوليو 2004 بواسطة فــيــروز

[أسد]

صورتي الشخصية .. جادة جداً ..

هذا عن الصورة الفوتوغرافية ..

أعتبر نفسي إنسان متوازن ..

في العمل .. فأنا شخصية جادة جداً ..

لا أقبل حلول وسط ..

مجتهد .. أعمل عدد ساعات أكثر من المقرر .. بل وأكثر من الطبيعي ..

الحمد لله .. ناجح في معظم الأعمال التي أقوم بها ..

ودود مع الزملاء والموظفين في مكان عملي .. مع الإحتفاظ بحاجز قوي بيني وبين الجميع ..

عصبي جداً .. هذه مشكلتي الكبيرة .. أشبه نفسي بحلة الضغط التي تفور محتوياتها في الداخل .. وما إذا فتحت عنوة ينطلق كل مافيها خارجها .. وقد تنفجر ..

أعتبر نفسي .. ويعتبرني الآخرون .. عادل في التعامل مع الجميع ..

في المنزل ..

مع الإحتفاظ بعصبيتي من وقت لآخر ..

إلا أنني لطيف للغاية ومتسامح ومتساهل بشكل كبير .. أفوض زوجتي في كل شئون المنزل والأسرة والتربية .. وإتفقت مسبقاً معها أن رأيي في المنزل إستشاري .. وبكل إنصاف .. هي قدها وقدود ..

ألعب مع إبني كأنني طفل مثله .. وأشعر وقتها بالإنطلاق . بلا حدود ..

مع الأصدقاء ..

أصدقائي ليسوا كثيرون ..

أتعرف على الناس بصعوبة ..

أحتاج إلى وقت لإعتبار أي شخص كصديق ..

ولكني مع أصدقائي مخلص جداً ... ولطيف ..

نتبادل في لقاءاتنا . موضوعات جادة .. ومرحة ..

ونتبادل النكات ..

في كل الأحوال .. أنا شخص صارم أفرق بين الجد والهزل .. ولكل شئ وقته ومجاله .. وجدي أكثر من مزاحي ..

أتمنى لو تغيرت قليلاً .. وقلت حدة طباعي وعصبيتي ..

[disappointed]

كل الذين عرفونى (من أيام إعدادى و ثانوى و حتى يومنا هذا) , وفى ساعة صفا يتم فيها إجتذاب أطراف أحاديث تتمتع بمقدار كبير من الشفافية...يقولون لى..... أن إنطباعهم الأوّلى عنّى قبل أن يحتكّوا بى ويتعاملوا معى هو أننى مغرور جدّا , فإذا بهم يكتشفون بعد ذلك أن الغرور أبعد صفة عنى

وهذه الملحوظه أو الإنطباع إكتشفت أن عليها إجماع من كل من يعرفنى (و لاأدرى لماذا يكون هذا الإنطباع دائما أشد و أقوى عند معارفى من الجنس الناعم...حيث يكون مصحوبا قبل التعارف بحنق و تحفز كبيرين تجاهى ردّا على غرورى الذى يعتقدون قبل معرفتى إننى أتسم به - و الذى تصفه بعضهن بأنه يبدو للوهلة الأولى غرورا صارخا...مع إنى hpc:!: والله)

:) :)

هناك إنطباع أولى آخر عنّى إكتشفت أن أغلب معارفى كانوا يشعرون به قبل تعاملهم معى...وهو أننى قليل الكلام جدّا , ولكنهم بعد ذلك يقولون لى : يااااااه....ده إنت طلعت رغااااااى بشكل

:P :)

وهناك إنطباع أولى أخذته زوجتى عنّى فى بداية معرفتنا ببعضنا و التى كانت مليئة بالشد و الجذب و الإستغلاس المتبادل على فكره :) -...وهو أننى عملى جدا و غير عاطفى و مش حنيّن..... ولازالت تضحك و تقهقه كلّما تذكّرت أن هذا كان إنطباعها عنّى فى فترة علاقتنا العاصفة الأولية التى كانت أشبه بساحة حرب و تنافر

و...سبحان الله .......يؤلّف القلوب و يغيّر المشاعر و الإنطباعات من النقيض إلى النقيض قبل و بعد التعامل الفعلى مع الأشخاص

تم تعديل 13 يوليو 2004 بواسطة disappointed

[disappointed]

على فكره

نسيت أقول إن فكرة الموضوع عاجبانى جدا

بس عايز ألفت الإنتباه إلى أن صورة الإنسان فى مخيّلة الناس ممكن تكون صح و ممكن تكون غلط (ولذلك يجب عليه أن يفنّد و يحلّل هذه الصورة و الإنطباعات عنه لدى الآخرين لتفادى و إصلاح و تغيير ما كان منها سلبيّا و صحيحا -دون مكابرة أو عناد أو نرجسيّة- , و لتجاهل و إسقاط ما يتأكّد له أنه خاطئ -حتى لا يقع فى فخ جلد الذات أو الإستهانة بها أو فقدان الثقة بنفسه)

وفى نفس الوقت....صورة الإنسان فى مخيّلته هو عرضة أيضا لأن تكون صحيحة أو خاطئة

وفى الحالتين....فإن المراجعة الذاتيّة و التصويب الذاتى المستمرّين فى غاية الأهمّية حتى يستطيع الإنسان أن يكون قادرا على تجويد صفاته و تحسين أسلوبه و الإرتقاء بسماته الشخصيّة (أنا عن نفسى وضعت لنفسى مبدأ وهو أن أقول لنفسى قبل أن آتى بأى تصرّف : ممممم...يا ترى تحب ولادك يشوفوك بتعمل كده ويتعلّموه منّك و الاّ لأ)

وفى النهاية فإننى أرى أن الإنتباه المطلوب توجيهه للشعرة الفاصلة بين الغرور و الثقة بالنفس هو إنتباه يجب أيضا توجيهه للشعرة الفاصلة بين التواضع و عدم تقدير الذات حق قدرها

تم تعديل 13 يوليو 2004 بواسطة disappointed

[moody00x]

cross wrote

كإنى أعرفه من عشرين سنة...عمرى يعنى

صريحة وصادقة جدآ

:unsure: :angry: lo::