لو كانت الإنتخابات بالشكل ده ، يبقى بلاها إنتخابات

[Alshiekh]

ماهو الهدف من أى إنتخابات؟

عند العالم المتحضر ، الإنتخابات البرلمانية ( لمجلس الشعب ) تعنى أن يختار الشعب من يمثله تحت قبة البرلمان لمراقبة تنفيذ الحكومة للخطط الموضوعة ، ومسائلة الحكومة عند التقاعس عن التنفيذ ، وكذلك محاسبتها على ماترتكبه من أخطاء والموافقة على أو رفض مقترحات الحكومة ورئيس الدولة ، والدور المهم الآخر هو التشريع .

لكن يبدو أن فى مصر الأمر مختلف ، فأجندة المرشح لها مقاصد أخرى ، يبذل من أجلها الغالى والرخيص ويستعان فيها بالبلطجية وذوى السوابق حتى ينال كلا نصيبه من الكعكة ، وإلا لماذا يلجأ المرشحون إلى البلطجية يصطحبونهم معهم فى جولاتهم ولماذا تتصدى لهم قوات الأمن ويتم تبادل العنف والإتهامات .

فلنقرأ معا هذا الخبر

بدأت المواجهة: الإخوان يهددون بفتح «أبواب جهنم»

و«الداخلية» تتوعد: الرد سيكون «فى منتهى العنف»

دخلت الاستعدادات لانتخابات مجلس الشعب المقبلة، أمس، مرحلة «الاشتعال» مع تصاعد المواجهات والاشتباكات بين قوات الأمن وأنصار مرشحى جماعة الإخوان المسلمين فى عدد من المحافظات، ودخول الاتحاد الأوروبى طرفاً فى مسألة نزاهة الانتخابات، والهجوم المتبادل بين قيادات «الوطنى» و«الإخوان».

فى الإسكندرية، وبعد الاشتباكات العنيفة بين الأمن والإخوان التى سقط فيها العشرات من رجال الأمن وأنصار الجماعة، شنت قيادات الجماعة هجوماً عنيفاً على النظام وقوات الأمن، وقال صبحى صالح، نائب الجماعة، مرشحها بدائرة الرمل ضد عبدالسلام المحجوب، وزير التنمية المحلية: «ما حدث من اعتداءات سيفتح (أبواب جهنم) على الأمن، ويضر بمرشح الحزب الوطنى قبل مرشح الجماعة».

وأضاف فى تصريحات لـ«المصرى اليوم»: «سبق أن قلت لكل من مدير الأمن ومدير المباحث الجنائية بالإسكندرية: (عندما تريدون فض أى تجمع أنا موجود به، أخبرونى وأنا أمشّى الأهالى)»، وتابع: «أهالى دائرة الرمل (مزاجهم معارض) فى الأساس ولا يحبون الحكومة ويصوتون دائماً للإخوان، و(إحنا لو رشحنا كلب ميت هينتخبوه)».

وقال الدكتور محمد سعد الكتاتنى، عضو مكتب الإرشاد، فى تصريحات لـ«المصرى اليوم»، إن ما يحدث فى الإسكندرية يؤكد ما قيل له من أن هناك صفقة بين الدولة وبعض الأحزاب - حسب كلامه.

من جانبها، ردت وزارة الداخلية على هجوم قيادات الجماعة، مؤكدة أنها ستواجه بمنتهى الحزم والقوة أى تجاوزات للقانون، وستتصدى له بمنتهى العنف، سواء كان من جماعة الإخوان أو غيرها، وقال مصدر أمنى لـ«المصرى اليوم»: «جماعة الإخوان تتعمد تجاوز القانون وقواعد الدعاية التى حددتها اللجنة العليا للانتخابات بالمسيرات غير المصرح بها، وحمل اللافتات وترديد الشعارات الدينية وتحريض المواطنين على الخروج على الشرعية».

وأضاف أن مسيرة لمرشحة الإخوان هدى محمد فى بنها، تحولت إلى مظاهرة بالسيارات والدراجات البخارية، وتعدى أنصارها على قوات الشرطة، وحرّضوا باقى المواطنين على ذلك، مما أسفر عن إصابة عقيد ومقدم ومندوب شرطة ومساعدين، أحدهم يعانى من شرخ فى الجمجمة.

وفى سياق متصل، أمر المستشار عادل عمارة، المحامى العام لنيابات شرق الكلية بالإسكندرية، بحبس ٥٥ من أنصار الجماعة، ١٥ يوماً على ذمة التحقيقات بتهمة مقاومة السلطات وإثارة الشغب وإصابة رجال الشرطة وإتلاف الممتلكات العامة.

يأتى ذلك فى الوقت الذى وقعت فيه مصادمات جديدة بين الأمن وأنصار الجماعة فى عدد من المحافظات، حيث قال الدكتور سمير منصور، مرشح الإخوان بدائرة أبوكبير بالشرقية، منافساً للدكتور على المصيلحى، وزير التضامن، إن قوات الأمن اعتدت على أنصاره بالضرب المبرح وأصابت العديد منهم بكسور، والمصادمات نفسها تكررت فى حلوان وحدائق القبة بالقاهرة.

وفى قنا، سقط أول ضحية للانتخابات فى المحافظة إثر إصابته بطلق نارى أثناء حضوره حفل عرس تبادل خلاله أنصار مرشحى «الوطنى» المتنافسين على المقعد نفسه، إطلاق الأعيرة النارية على بعضهم البعض، جدير بالذكر أن المرشحين ينتميان لقبيلة واحدة.

وبينما زار وفد من منظمة «هيومان رايتس ووتش» الأمريكية لحقوق الإنسان مقر الكتلة البرلمانية للإخوان فى الإسكندرية، أمس، يزور وفد من سفارات الاتحاد الأوروبى بالقاهرة المجلس القومى لحقوق الإنسان، غداً، للاطلاع على دور المجلس فى متابعة الانتخابات.

[ذهبية]

حضرتك لو شوفت الدعاية الانتخابية و اللى بيحصل فيها هتستغرب جداااا كنت فى الشارع باشترى طلباتى لاقيت موكب كبير بيضم لا يقل عن عشرين دراجة بخارية و عليا شوية شباب او فتوات بالمعنى الاصح

و عربيات و لا وفة العروسة ماشية حاولية و البية المرشح بتاع الحزب خارج من العربية و بيحى الجماهير اللى اصلا مش مهتمية بية و لا بتبص علية ماشى كانة رئيس الجمهورية و عمال يحى بايدة الناس

استغربت جدااا من المشهد دة مفيش ثوانى لاقيت عربية نص نقل عليها فتوات ماسكين مكروفون و صوت ردىء جدااااو عالى جدااا شجعواا المرشح كذااا و خبط و رقص و طبل و صورايخ

افهم بقى دة ايةةةةةة

انا بقى المفروض لما اشوف المناظر دى اروح ارشحةة على اساس اية بقى ؟؟؟ كمية الفتوات الللى حوالية و لا كمية الازعاج اللى عملة و لا اية بالضبط

الحكومة عايزة كدةةة

لما الحكومة تنزل مرشحين على نفس المقعد دة اسمية اية

تفكير ديمقراطى جداا االحكومة قال احنا ناكل بعضينا بدل ما حد ياكلنا من برة

و احنا ننافس بعض بدل ما يجى التنافس من برة

دة ادى الى حرب شرسة جداا بين المرشحين نفسهم الى فى الحزب نفسة ما بال حرتك اللى من برة الحزب

بقت حرب من جوة و حر ب من برة متوقع النتيجة تكون اية غير كدة

هى دى الديمقراطية

[se_ Elsyed]

بجد من المناظر اللي شوفتها .. أتمنى إن مجلس الشعب كل أعضاءه يبقوا بالتعيين

بالله عليكم .. لو استاذ قانون ورجل إداري وذو سمعة محترمة ونازل في دايرة إنتخابية أمام تاجر مخدرات له سطوة وبيصرف ملايين ولامم حواليه اشكال زبالة وسوابق أو سوري في الكلمة ستات شراشيح مسجلين أداب وقضايا عنف وما إلى ذلك عشان يرهبوا الناس

والله العظيم هذا حصل ... في الإنتخابات الماضية كانوا بيوقفوهم حوالين اللجان الإنتخابية وأي واحده منقبة أو متحجبة ووشها بيقول إنها ناوية تدخل اللجنة ترشح حد من الاخوان .. كان النسوة دول يحتكوا بها ويبهدلوها في الشارع وتصل إلى هتك العرض علانيةً أما مرآى ومسمع من الشرطة اللي مأجراهم لهذا الغرض بالتحديد ...

هل يستطيع شخص محترم ويحترم نفسه أن يقف امام هؤلاء الحثالة ؟

هل تعلمون إني بأسأل أخويا اللي لسه راجع من الاجازة وبالتأكيد بيزور بيت العيلة ... بأسأله هو فلان هايترشح عن الديرة بتاعتنا وما حولها تاني ؟

قال لي طبعاً .. الحزب الواطي إختاره مره أخرى عشان يكمل المسيرة ...

فلان ده تاجر مخدرات يشار إليه بالبنان .. وعنده جيششششششششششششششششششششش من البلطجية وسائقي الميكروباص تحت إمرته ( ميليشيا مسلحة بمعناها الحقيقي ) لإنه متعين رسمياً من الحكومة بإنه يجمع ( الكرته ) وهي رسوم بلطجه حكومية تفرضها على سائقي الميكروباصات في كل طلعه .... وبالتالي بيصرف بالهبل عى الدعاية واستقطاب الأصوات ...

بس الحزب بصراحة عدل من فِكره الجديد .. لإن المرحلة دي بتحتاج إلى تنوع . وأختار كمان إلى جانبه في الدائرة . فلان اللي أعرفه شخصياً ... وهو تاجر أثار معروف ومليووووووونير من الحرام طبعاً

مش قلت لكم التنوع مطلوب .. يعني أثار ومخدرات وكده يعني .. وبالتأكيد في كوتة المرأة هايختاورا سيدات افاضل مسجلين دعارة أو أداب عشان تبقى الحسبة ماشيه صح ..

ناهيك بقى عن الإشكال اللي بتنزل مستقلة وما بتسمعش عنها في طبق اليوم حتى ..

في حين يكتفى المثقفون وأبناء الوطن الحقيقيون بمشاهدة المهزلة ... وقراءة الصحف الحكومية الصفراء..

أول أمبارح الجمهورية والأهرام كاتبين " الإخوان ينصبون كميناً مسلحاً لرجال الشرطة في وسط الأسكندرية "

أه والله

ه

يا سلام ... شوف إزاي ؟؟؟؟؟؟؟؟؟؟؟؟؟؟؟؟؟

وطبعًاً أمطرهم الأخوان بوابل من نيران مدافع الهاون وصواريخ الكاتيوشا مع تحليق الطائرات العمودية وطائرات إف ستة عشر و بي 52 لتغطية تلك المعركة ولتوفير غطاء جوي ودعم لوجيستي للأخوان الأوباش ...

لا تعليق ..

[اغابي]

يا استاذ محمد

هو حضرتك مصدق ان مصر تعرف حاجة اسمها انتخابات

لالالالالالالالا

كل اللى بيحصل فى الانتخابات دا بيفكرنى بصوت الارسال لما التلفزيون كانت القنوات تقفل

وتعمل صوت شششششششششششششششششششششششششششششششش

كل واحد فى الانتخابات له هدف غير حب البلد وخدمة المواطنين وان مصر تبقى فى صورة متحضرة ومستقبل باهر ومشرق

كل الكلام والعبارات دى عارية تماماعن الحقيقة

اللى بنشوفوا فى الانتخابات داه ديكور - حاجة كدا عاملة زى الروتين

مصر لسه ما تعرفش يعنى ايه انتخابات

كل اعضاء مجلس الشعب اللى فى الصعيد هم اصحاب السلطة والمال

وكيفية رعب الناس بالبلطجة

وما ننساش الغول لما كان الحارس الشخصي له - الكمونى اشهر بلطجى فى الصعيد والمتورط فى قضية مقتل اقباط نجع حمادى

وبتهديد الناس البسطاء و الفقراء بتنتهى الانتخابات لصالحهم

انا ليه جبت نموذج من الصعيد - لان ما يحدث فى الصعيد من امور

بجهل مراسم الانتخابات هو ثقافة مورثة لهم من الراس

يعنى من القاهرة للصعيد - صورة وطقوس ومراسم الانتخابات لم تتغير

معادلة بسيطة جدا جدا

عضو مجلس الشعب + بلطجية = نجاح الانتخابات باغلبية ساحقة

تحياتى

تم تعديل 22 نوفمبر 2010 بواسطة اغابي

[Howayda Ismail]

مجلس الشعب اصبح دوره مقتصرا على حاجتين لثالث لهم

الاول طبخ القوانين حسب الاهواء المرجوة زى تقنين مواد بعينها فى الدستور او رفع سن الزواج اللى كان سبب

فى انتشار الزنا العرفى لانه ليس زواجا وغيره وغيره حسب الطلب وموافقون موافقون

الثانى اصبح الباب الشرعى لحماية كبارات البلد و رجال الاعمال ومصالحهم عشان كده بيتقاتلوا لحصولهم على

كرسى البرلمان ومن الطبيعى الاصوات الفاسدة هى الوحيدة اللى تستحق الدعم والمساندة من قبل الحكومة للفوز

ولن يضير الوسيلة لنيل ذلك بالتزوير بقى او الاستقواء بالبلطجة العبرة بالنتيجة

اعتقد ان اللى حصل فى انتخابات الدورة اللى فاتت هو هو نفس السيناريو عشان كده ناس محترمة كتير بتحجم عن

الادلاء بصوتها او حتى تفكر تعمل بطاقة انتخابية من اصله

[doha]

من فترة وكل شويه اسمع ( زفة )ماشيه في الشارع لاحد مرشحي الانتخابات .. كل واحد دلوقت اصبح له ( اغنية ) بتهتف باسمه وغالبيتها على الحان وطنية بس اكثرها طرافة من وجهة نظري الي سمعتها امبارح لما لقيت صوت هتافات جماهيرية حاشده بتهتف ( سعد سعد يحيا سعد ) ثم انطلقت الاغنية بعد كده والي كانت للامانة ( نشيد ) مفيهاش موسيقى اوي على اساس انه اخوان ..

الملصقات القماش الي بتتقطع لناس ناس دي قديمه تمام زيها زي ملصقات الورق الي بتفضل مشوهة الشوارع من الانتخابات للانتخابات .. لكن موضوع الاغنية الخصوصي ده جديد اوي .. عن نفسي اول مرة اشوفه الانتخابات دي .

في البدايه كنت زعلانه اوي وكل ماسمع حاجه زي كده بحس اننا بنرجع للخلف بسرعه الصاروخ .. اعتقد ان الي بيحصل عندنا في مصر من دعاية انتخابية تعتمد على ( فرض ) اسم المرشح بالقوة على الاذهان ومن ثم على مقعد الشعب امر غير موجود غير في بلدنا بكل اسف .. اذكر من سنين طويلة قرأت لاحد الكتاب ـ ان لم تخني الذاكرة صلاح منتصر ـ وقال انه كان في لندن في عز الانتخابات الي فاز فيها توني بلير للمرة الاولى والي تزامنت بالصدفة مع انتخابات مجلس الشعب عندنا هنا في مصر . . قال بانه فوجيء بعدم وجود اي ملصق لاي مشرح للانتخابات دي على اهميتها .. وان بدلا من ذلك في ( كتيبات ) بتوزع تشرح البرنامج الانتخابي لكل مرشح اضافة للمقابلات التلفزيونيه وان الناس بتروح تنتخب عادي والنتيجه بتطلع عادي لا ملصقات ولا هتافات ولا تظاهرات ..

كل ماكنت اشوف الي بيحصل في مصر وقت الانتخابات تصيبني الغصة واقول ليه كده .. ليه مبنعملش زي الناس ( المتحضرة ) ونختار مرشحينا بناء على كفائتهم مش علو صوتهم .. خاصه والمرشح لو كان له اعمال او افكار تستحق انها توصله لكرسي البرلمان مكانش يبقى محتاج يصرف الملايين دي كلها عشان يقول للناس انا اهوه .. لو كان له اعمال تذكر كانت اعماله هي الي هتوصله مش كتر فلوسه او حتى بلطجته ..

من فترة بطلت اتضايق وبطلت استغرب الي بيحصل بل بالعكس اصبحت مؤمنه ان الاغاني والملصقات بل وكيلوات اللحمه والوعود الي معروف سلفا انها كاذبة كل ده ضرورة حتمية لضمان الاختيار الصحيح .. عارفين ليه ؟ لاننا ببساطة شعب معظمنا لا ينتمي اصلا للتحضر .. غالبيتنا اصبحوا متخلفين بالمعنى الحرفي للكلمه وبالفعل مش هينفع معاهم ابدا غير الاسلوب ده للاقناع .. مبنعملش زي المتحضرين لاننا اصلا مش منهم ..

الي بقوله ده مش تريقة ولا شيء وانما هو اقرار بالواقع الي تقريبا قعدت سنين طويلة احاول انكره لغايه مافرض نفسه بقوة تجعل من المستحيل انكاره ..

بكل اسف الي بيحصل ده طبيعي .. وطبيعي جدا ..

[MaYousof]

[..] اذكر من سنين طويلة قرأت لاحد الكتاب ـ ان لم تخني الذاكرة صلاح منتصر ـ وقال انه كان في لندن في عز الانتخابات الي فاز فيها توني بلير للمرة الاولى والي تزامنت بالصدفة مع انتخابات مجلس الشعب عندنا هنا في مصر . . قال بانه فوجيء بعدم وجود اي ملصق لاي مشرح للانتخابات دي على اهميتها .. وان بدلا من ذلك في ( كتيبات ) بتوزع تشرح البرنامج الانتخابي لكل مرشح اضافة للمقابلات التلفزيونيه وان الناس بتروح تنتخب عادي والنتيجه بتطلع عادي لا ملصقات ولا هتافات ولا تظاهرات ..

كل ماكنت اشوف الي بيحصل في مصر وقت الانتخابات تصيبني الغصة واقول ليه كده .. ليه مبنعملش زي الناس ( المتحضرة ) ونختار مرشحينا بناء على كفائتهم مش علو صوتهم .. خاصه والمرشح لو كان له اعمال او افكار تستحق انها توصله لكرسي البرلمان مكانش يبقى محتاج يصرف الملايين دي كلها عشان يقول للناس انا اهوه .. لو كان له اعمال تذكر كانت اعماله هي الي هتوصله مش كتر فلوسه او حتى بلطجته ..

من فترة بطلت اتضايق وبطلت استغرب الي بيحصل بل بالعكس اصبحت مؤمنه ان الاغاني والملصقات بل وكيلوات اللحمه والوعود الي معروف سلفا انها كاذبة كل ده ضرورة حتمية لضمان الاختيار الصحيح .. عارفين ليه ؟ لاننا ببساطة شعب معظمنا لا ينتمي اصلا للتحضر .. غالبيتنا اصبحوا متخلفين بالمعنى الحرفي للكلمه وبالفعل مش هينفع معاهم ابدا غير الاسلوب ده للاقناع .. مبنعملش زي المتحضرين لاننا اصلا مش منهم ..

الي بقوله ده مش تريقة ولا شيء وانما هو اقرار بالواقع الي تقريبا قعدت سنين طويلة احاول انكره لغايه مافرض نفسه بقوة تجعل من المستحيل انكاره ..

بكل اسف الي بيحصل ده طبيعي .. وطبيعي جدا ..

أنا كنت لسه باقرأ الجزء اللي أنا تركته بالفونت الأسود في اقتباسي من مداخلتك يا أستاذتي وفي بالي إن أرد على حضرتك بنفس الكلام اللي أنا ظللته بالأزرق في نفس الاقتباس .. لما كملت قراءة وجدت حضرتك كتبتيه بالفعل وأجبتي بما كانت أريد أن أقول ..

لو الناس بتتعامل بينها وبين بعضها مش بكفائتهم وإنما بعلو صوتهم يبقى لازم المرشحين للبرلمان يخاطبوا الناس باللغة اللي بيفهموها .. وضع بديهي جدا .. لو خاطبوهم بلغة تانية ماحدش هيسمعهم .. لو وزعوا عليهم كتيبات بتوضح برنامجهم محدش هيلتفت ليها ..

لو الناس كانت لغتها مختلفة المرشحين لازم لغتهم تتغير وإلا استحالة أي منهم يضمن أي صوت ..

لغة الناس في انجلترا مختلفة .. المرشحين خاطبوهم باللغة اللي يفهموها .. لو المرشحين هناك خاطبوهم بلغة الصوت العالي ماحدش من الناس هناك كان هيفهم المرشحين بيقولوا إيه .. وكان ماحدش من المرشحين اللي استخدم لغة الصوت العالي الغير مفهومة للانجليز كان هينجح .. هنا إحنا بنفهم لغة الصوت العالي دي بالشكل الأمثل .. لإننا بنمارسها بيننا وبين بعض كل يوم ..

أنا بس استغربت إن حضرتك اعتبرتي ردك إنه ممكن يتفهم على إنه تريقة!

أكيد أنا أكثر حسن نية بالناس :blush2:

تحياتي لحضرتك على المداخلة القيمة :)

[se_ Elsyed]

لاننا ببساطة شعب معظمنا لا ينتمي اصلا للتحضر .. غالبيتنا اصبحوا متخلفين بالمعنى الحرفي للكلمه وبالفعل مش هينفع معاهم ابدا غير الاسلوب ده للاقناع .. مبنعملش زي المتحضرين لاننا اصلا مش منهم ..

الي بقوله ده مش تريقة ولا شيء وانما هو اقرار بالواقع الي تقريبا قعدت سنين طويلة احاول انكره لغايه مافرض نفسه بقوة تجعل من المستحيل انكاره ..

بكل اسف الي بيحصل ده طبيعي .. وطبيعي جدا ..

لأ ... أسمحي لي أختلف معاكي في النقطة دي بالذات ..

لان التحضر والرُقي دي أشياء بيتم صُنعها وخلقها وتنبع أساساً من السُلطة الحاكمة اللي في إيديها إنها ممكن تقطع الكهربا وتعيش الناس في الضلمة .. أو في إيدها أنها توصل خط من السد العالي رأساً الى كل بيت ينور حياتهم وبصيرتهم ... ..

هاضرب لك مثال :

الإعلام ووسائل الدعاية والتليفزيون والصحافة ...

تخيلي يا ضُحى لو قعد التليفزيون لمدة 10 سنوات يذيع ليل نهار أغاني هشتك بيشتك وبحبك يا حمار وتعالى نطلع فوق السطوح والحاجات المقرفة دي ؟

هل ألوم الناس بعد ده كله إن ذوقهم الفني إنحدر وإنهم يجب أن يرتقوا ويسمعوا موتسارت وشوبان وبيتهوفن ؟

طب منين وإزاي ؟

وهو ما حدث

- شخص .. أوحد ... ديكتاتور .. يجلس على كرسي العرش لمدة 30 عاماً .. اصاب البلد بالتيبس والجمود والشلل التام .. تُحيط به شلة من الفاسدين اللي عارفين هما بيعملوا إيه بالظبط .. واللي فيهم اساتذة في طبخ الفساد زي سرور وصفوت الشريف ومفيد شهاب .... وكل القوانين والدساتير بتبقى تفصيل على مقاسه وعلى الكرسي ...

يبقى عاوزه بعد ده كله ما يحصلش جهل وفساد ومحسوبية وقلة أدب وهما بيسقوها للناس بمعلقة ليل نهار ؟

بُصي على السي في والإنجازات بتاعت وزراء التعليم المتعاقبين خلال 30 سنة .. وشوفي تجارب الفئران اللي عملوها في الاجيال المتعاقبة من 30 سنة ؟

فبعد رفاعة الطهطاوي وعلي مبارك وطه حسين ... أصبحنا نرى مهازل من ناس لا تربويين ولا يعرفوا حاجه عن التعليم بقى شغلهم الشاغل نرجع سنة سته ونلغي خمسة .. ولا نخلي الثانوية سنة ولا اتنين .. والرسم يبقى مادة مجموع ولا لأه ,, ونعمل نظام تحسين مجموع ولا نقفل كليات القمة ... وهكذا ...

كل ده ومش عاوزانا ننزل تحت الأرض ؟

يبقى فين الذنب اللي الناس العادية عملوه ؟ ..

انا مش هاتكلم عن المقاومة وإنهم مش بيعارضوا ده ... دي نقطة تانية ...

لكن أنا باتكلم عن خلق الجهل والحرمان وفرضه على الناس ..

الأخ بتاعنا اللي بقى عنده 86 سنة لسه بيدغدغ مشاعر البسطاء وكل خطاب يقول : بيطالبوا بألغاء نسبة العمال والفلاحين ... لكنني أرفض .. وأنا منحاز تماماً للطبقات الفقيرة ولمحدودي الدخل "

شوفتي الجهل ؟

شوفتي دكتور جامعة أو طبيب ينزل الإنتخابات بصفة فلاح أو عامل ؟ طب إزاي أيها الديكتاتور الأعظم ؟

شوفتي أعداد بالمئات قعدت سنوات طويلة ... أعرف منهم ناس شخصياً . أعضاء مجلس شعب ... أقسم بالله بيستخدم ختم او بصمة إيد لأنه لا يقرأ ولا يكتب ..

والإسم ... عضو مجلس تشريعي لسن القوانين ومراقبة أداء الحكومة ....

هههههههههههههههههههههههههههههههه بيتهيألي بيعينوا له دليل زي اللي بيقود إنسان حُرم من نعمة البصر عشان يقرأ له ويكتب له

بس تخيلي لايقه عليهم .. أه والله

جاهل يراقب جُهلاء ...

قطاع كبير من الناس فقراء وهذه حقيقة والعدد في زيادة ...

فلما تيجي تزغللي عين واحد بإتنين كيلو لحمه بقى لها شهور ما شميش ريحتها حتى ... أو وعد بوظيفة أو توصيل صرف صحي لبيته في مقابل إنه يعطيني صوته ...

صوتي بس يا باشا ؟

ده أنا أدبح لك عيالي تحت رجلك لو عاوز

يبقى ده يتلام أو نحاسبة ونقول له : صوتك أمانة ؟؟؟؟؟؟

بلد متقسمة ومتفصلة عليهم .... وبيعملوا فيها اللي هما عاوزينه ....

الأجازة قبل الماضية ... قابلت صديق من نفس سني أو أصغر سنة او إتنين بس هو حصل على دبلوم تجارة فقط ... لقيته بقى كدر في الحزب الوطني .. ... ومشغل كمية عيال عندنا في الحته ... فين بقى ؟

في مطار القاهرة .. والله زي ما بأقولكم كده

بمرتب 1200 ج في الشهر ...

وبتليفون منه .. بعد ما كلمته وبستفته لأن الشارع والمنطقة اللي ساكن فيها أهلي لقيت صناديق القمامة الكبيرة إتشالت ما أعرفش ودوها فين ... لقيته في ثواني كلم بتوع الحي وجابوا صناديق وسألني : أأمرنا يا باشا نحطها في أنهي حته ؟

وبتليفون منه ... الكهربا لو قطعت ترجع غصب عن التخين إن شالله نولع في منطقة تانية ونسحب منهم الكابلات ونخليهم يعيشوا في ظلام دامس ...

وده عضو مجلس محلي لا مؤخذه مالوش لازمه ..

وللأسف .. هو عشان كان صديقنا .. قدر يغوي أخويا واخده في زوارق الحزب الوطني ... وبقى كدر هو راخر وماشي بالكارنية ياخد حقه من البلد ..

لكنه لا يقبل الحرام أو يبلطج على حد ... وكل الموضوع إنه يستخدم الكرت ضد اللي يحاول يبلطج عليه .. حتى مع الشرطة وشوفت بعيني بيعمل إيه فيهم لما يعرفهم إنه كدر من كوادر الحزب الفاشي ...

ميكافيللية واضحه وصريحة أو على رأي قلب أبيض اختنا العزيزة " اللي تغلب به . إلعب به "

ما بالك بأعضاء مجلس الشعب اللي بتتفرق عليهم أجزاء من ميزانية الدولة . كاش ... يصرفوها زي ما هما عاوزين على أهل دايرتهم ..

او قوافل وزارة الصحة اللي بتنزل القرى والأرياف تعالج الغير قادرين .. يروح التتار لازقين عليها لافتات بتقول إنها " قوافل الحزب الوطني "

يبقى ألوم الناس بعد ده كله ؟؟؟؟

[masraweya]

يبقى ألوم الناس بعد ده كله ؟؟؟؟

أيوة .. بالذات اللي كانوا شايفين و فاهمين نتيجة اللسي بيحصل إيه و سكتوا

بالذات اللي ما حاولش ياخد بايد الناس و يفتح عينيهم و يعلمهم يرفعوا راسهم و ما يبصوش تحت رجليهم

حتى الناس اللي مشيت ورا الفساد تلومهم لأنهم ما حكموش عقولهم و استمرئوا الاستسلام و السلبية و الضعف

:egyflag:

[masraweya]

بسم الله الرحمن الرحيم

وَبَرَزُوا لِلَّـهِ جَمِيعًا فَقَالَ الضُّعَفَاءُ لِلَّذِينَ اسْتَكْبَرُوا إِنَّا كُنَّا لَكُمْ تَبَعًا فَهَلْ أَنتُم مُّغْنُونَ عَنَّا مِنْ عَذَابِ اللَّـهِ مِن شَيْءٍ ۚ قَالُوا لَوْ هَدَانَا اللَّـهُ لَهَدَيْنَاكُمْ ۖ سَوَاءٌ عَلَيْنَا أَجَزِعْنَا أَمْ صَبَرْنَا مَا لَنَا مِن مَّحِيصٍ ﴿٢١﴾ سورة ابراهيم

وَإِذْ يَتَحَاجُّونَ فِي النَّارِ فَيَقُولُ الضُّعَفَاءُ لِلَّذِينَ اسْتَكْبَرُوا إِنَّا كُنَّا لَكُمْ تَبَعًا فَهَلْ أَنتُم مُّغْنُونَ عَنَّا نَصِيبًا مِّنَ النَّارِ ﴿٤٧﴾ سورة غافر

[Alshiekh]

مقال فى الصميم للكاتب " سلامة أحمد سلامة " يعبر فيه عن رؤية واقعية لما يحدث فى كل إنتخابات يبتعد عنها كل مثقف يحترم نفسه خوفا من " البهدلة "

عنوان المقال " المعادلة الصعبة " وإن كنت أرى أن إختيار " السياسة القذرة " هو الأنسب

ألم يكن من الأفضل للأحزاب عدم المشاركة فى نفس المسرحية الهزلية التى تحدث بلا ادنى تعديل اللهم الا فى زيادة او نسبة العنف؟

المعادلة الصعبة

خلال الساعات القليلة الماضية، بدأت تظهر على جسد العملية الانتخابية أعراض المرض العضال، الذى يفتك بالحياة السياسية فى مصر منذ عقود.. لنجد أنفسنا أمام مشهد يتكرر كل مرة، ويلفت أنظار العالم إلى نموذج ردىء من الانتخابات لا يحدث إلا فى دول العالم المتخلفة.. مشهد العنف، وسفك الدماء، واستخدام القنابل المسيلة والحجارة، فى مسيرات لا تلبث أن تنتهى إلى اعتقال أفرادها بعد صدام عنيف مع الشرطة.. وكأن هذا هو كل ميراث عملية ديمقراطية استغرقت ثلاثين عاما من أزهى عصور الحرية!

كانت ملاحقات الشرطة فى المرحلة السابقة أثناء تقديم أوراق الترشيح موجهة إلى عناصر الإخوان الذين يرفعون شعارات غير قانونية مثل «الإسلام هو الحل»: وذلك على الرغم من صدور أحكام قضائية تنفى عدم مشروعيتها.. أما الآن وقبل أيام قليلة من إدلاء الناخبين بأصواتهم يوم الأحد المقبل، فقد اتجهت جهود الإدارة إلى المعارضة بكل أشكالها وتنويعاتها سواء من الإخوان والمستقلين أو من أحزاب المعارضة الأخرى. وكان طبيعيا فى مثل هذه الأجواء، أن تقع اشتباكات بالسلاح بين أنصار المرشحين المتنافسين.

وزاد العبء على الشرطة لاعتقال المئات من المتظاهرين الذين تجمعوا فى مسيرات التأييد. تقبض عليهم الشرطة من هنا وتفرج عنهم النيابة من هناك.. ولا أحد يدرى كيف ستنتهى هذه اللعبة المأساوية حين تتجه الجهود لمنع الناخبين أنفسهم من دخول الدوائر والإدلاء بأصواتهم لمرشحين معارضين أفلتوا من الحصار.

ولكن يرد المسئولون فى الحزب الحاكم عن الانتقادات التى توجه إلى طريقة إجراء الانتخابات فى مصر. وما تنطوى عليه من ترهيب وإجراءات تعسفية، بأن مشاركة خمسة آلاف مرشح من مختلف الأحزاب والقوى السياسية هو دليل على ثقة الشعب فى التطور الديمقراطى وعمق الإيمان بثقافة المشاركة.. ولكن هل مشاركة هذه الأعداد الزائدة من المرشحين الذين جرى استبعاد نسبة كبيرة منهم بحجج غير قانونية، تكفى للدلالة على نزاهة الانتخابات وسلامة إجراءاتها وحياد القائمين عليها؟

الثابت من التجربة حتى الآن، أنه لم يطرأ تغيير يذكر على طريقة إجراء الانتخابات رغم التعديلات الدستورية والقانونية التى أدخلت عليها. فالمرشحون لا يخوضون المعركة استنادا إلى برنامج سياسى أو قضية يدافعون عنها أو مشكلة جماهيرية يتصدون لعلاجها. بل يعتمدون على المساندة الرسمية التى يرتبها الحزب الحاكم عن طريق الأجهزة الإدارية والمحلية.

أو يتمسكون بعصبيات وانتماءات قبلية وعائلية. فإذا لم يكن هذا أو ذاك كانت شنط رمضان وهدايا اللحوم وشكاير الأرز والأموال الانتخابية من رجال الأعمال هى الخيار الأخير فى هوجة انتخابية لا يعرف الشعب أولها من آخرها.

ولهذه الأسباب يظل تأثير الإعلام محدودا إلا بقدر ما تعكسه الصور التليفزيونية من مشاهد القمع والعنف والاعتقال التى تنقلها محطات أجنبية. والمثير للدهشة أننا ونحن على أبواب التصويت للمرشحين، لم نشاهد حوارات أو مناقشات بين مرشحين من الوطنى وأى من أحزاب المعارضة أو المستقلين حول القضايا الخلافية. أو السياسات الاقتصادية والخارجية. بل ظهر كل حزب برئيسه لامع الوجه، مكتمل الأناقة، ليتحدث عن طموحاته الحزبية.

ومن هنا، فسوف تظل مشاركة الناخبين فى الذهاب إلى صناديق الاقتراع محدودة، وسوف تظل ظاهرة عزوف الأغلبية الصامتة من الناخبين هى الغالبة. إذ يكفى أن يشاهد الناخب مناظر الصدام والعنف بين الشرطة والمسيرات الانتخابية حتى يقرر إيثار السلامة والبقاء فى منزله يوم الانتخابات.

ومعنى ذلك أن المعادلة الانتخابية تظل دائما وأبدا فى صالح الحزب الحاكم. فالعنف الأمنى الذى يكاد يصبح طرفا أساسيا فى الانتخابات، يؤدى فى المحصلة النهائية إلى إحجام أغلبية الناخبين العاديين عن المشاركة.

وكلما قلت نسبة الناخبين الذاهبين إلى صناديق الاقتراع، كلما زادت فرص الفوز للحزب الوطنى ومرشحيه.. وهذه هى المعادلة الصعبة التى أدمن بها حزب الأغلبية الفوز فى كل انتخابات أجريت حتى الآن!

[Sherief AbdelWahab]

بعيداً عن تصريحات لمبي الحزب الوطني جهاد عودة عن شعار الحزب وعدم علاقته بأي رمز ديني ، جاء اللمبي الآخر السيد الدكتور عبد الرحيم علي ليقول في أون تي في قبل أيام أن هذه الانتخابات هي فرصة لمصر كلها لتؤكد للعالم أننا على الطريق الصحيح..

كلام أقل ما يوصف به بعيداً عن ما يعاقب عليه القانون أنه كلام متخلف..

وأعتقد أن كل من يزعم أن الحراك السياسي بكل مظاهره السوداء وبلاويه وقيحه وقبحه عليه أن يعرض لنا تلك المزايا المزعومة أو ليصمت..وأن يحدثنا عن ما هية ذلك الطريق الصحيح والأمارة التي يعتقد بها أن ما نسير فيه هو الطريق الصحيح..

أذكر نفسي وإياكم بأنه طوال خمس سنوات لم تقم أي جهة ، خاصةً من أفرزهم سي الحراك ، بأي توعية حقيقية وجادة للناس بشأن الانتخابات ، والديمقراطية ، والسياسة ، ولم يبذل هؤلاء أي جهد يذكر في تكوين نسق قيمي لدى الناس فيما يختص بممارسات سياسية ، مثل استغلال الخدمات في السياسة ، والعصبيات ، والعائلات ، واستغلال مرافق الدولة في السياسة .. كما لم يتحرك أي حزب في ذلك الاتجاه..

وبالتالي لم نعتبر - في مجموعنا - أن الممارسات التي سادت ، وتستمر ، هي ممارسات حقيرة أخلاقياً وسياسياً..

خلال الخمس سنوات ، هل تصدقون أنه لم تبذل أي جهة كانت أي جهد كان في تبصير الناس بالحد الأدنى من المفاهيم السياسية ، من عينة الحزب والانتخابات والبرلمان وأدوار عضو البرلمان؟ ثم يطلبون وبكل غرابة من الناس أن يذهبون للتصويت .. هل هناك حزب عاقل أو جمعية عاقلة تطلب من الناس أن تذهب للامتحان للإجابة عن أسئلة ومقرر لم تعرفه ولم تذاكره؟

أعتقد أن من يعتقد بهذه الطريقة ، وفي ظل هذا المناخ ، أننا نسير في الاتجاه الصحيح ، معلهش في الكلمة ، بيتعاطى الصنف الخطأ..

خلص الكلام

[Sherief AbdelWahab]

كوميديا سوداء :

كان واقف معايا النهاردة واحد مرشح أو يعرف حد مرشح.. شوفوا بقى مبررات سيادته للسؤال المستعصي على فهمنا جميعاً : ليه سي النايب ما بيجيش إلا كل خمس سنين؟

قال لا فوض فوه ما معناه :

لو قعدت أقضيها مجاملات للي حواليا مش ح أخلص ..

الحزب بيعمل لنا مؤتمرات كل يوم عن الإيه والمش عارف إيه .. وبالتالي ما بنفضاش نرجع .. وإن رجعت يوم جمعة تلاقيلك تلات أربع مياتم متقدرش تحضرهم كلهم..ومايبقاش فيه وقت..

آدي مبرر لنائب مش عارف يعني إيه عضوية حزب ، داخل كدة والسلام..

إيه اللي اتعمل في خمس سنين كاملة علشان الهباب دة يتغير؟

وكما قال أحمد مكي : اللي ذاكر ذاكر .. يا فاشللللل

خلص الكلام

[Alshiekh]

عنف جديد فى الصعيد ، والأمن غائب ، والبلطجة هى سيد الموقف

اصابة 15 في اشتباك اثناء مسيرة انتخابية في صعيد مصر

القاهرة (رويترز) - قال مرشحان لمجلس الشعب المصري إن 15 من أنصارهما أصيبوا يوم الاثنين بجروح في اشتباك اثناء مسيرة انتخابية بمدينة المنيا جنوبي القاهرة.

واتهم مرشح جماعة الاخوان المسلمين محمد سعد الكتاتني في اتصال هاتفي مع رويترز أنصارا لمنافسه مرشح الحزب الوطني الديمقراطي الحاكم شادي أبو العلا بمحاولة قتله عندما هاجموا مسيرة كان يتقدمها وأصابوا 10 من أنصاره وحطموا خمس سيارات بينها السيارة التي كان يستقلها.

وأضاف الكتاتني الذي يرأس كتلة جماعة الاخوان في مجلس الشعب المنتهية مدته ان "كانوا يحاولون قتلي".

وقال إن أنصار منافسه استخدموا السواطير والجنازير والسكاكين في الهجوم.

وستجرى الانتخابات البرلمانية يوم الاحد ورشحت جماعة الاخوان 130 من اعضائها.

وقال أبو العلا لرويترز إن الكتاتني وأنصاره أصابوا خمسة من سكان المنطقة التي وقع فيه الاشتباك والتي يتركز فيها أنصاره.

وأضاف قائلا "لم أحرض أحدا على اعتراض المسيرة."

وقالت مصادر أمنية في مدينة المنيا ان الشرطة تقوم بفحص البلاغات المقدمة بشأن الاشتباك وتطلب التقارير الطبية الخاصة بالاصابات.

واتهمت جماعة الاخوان الحكومة يوم الاثنين بممارسة العنف ضد مرشحيها.

وتقول الحكومة إن أحداث عنف وقعت في الايام الماضية بين الشرطة والاخوان تسبب فيها قيام أعضاء من الجماعة بتنظيم مسيرات غير مصرح بها وتعطيل حركة المرور ورفع شعارات دينية تخالف القانون.

وأسفرت الاشتباكات التي وقعت في عدة محافظات عن اصابات في صفوف رجال الشرطة وأنصار المرشحين الاخوان. كما ألقت الشرطة القبض على نحو 200 من أعضاء الجماعة.

وجماعة الاخوان محظورة منذ 1954 بعد أن نسبت اليها محاولة لاغتيال الرئيس الراحل جمال عبد الناصر لكن الحكومة تتسامح مع نشاطها في حدود.

ويتقدم أعضاء الجماعة للانتخابات العامة بصفة مستقلين تفاديا للحظر.

وفي انتخابات عام 2005 فازت الجماعة بحوالي 20 في المئة من مقاعد مجلس الشعب لكن محللين يستبعدون أن تحصل على نفس العدد أو ما يقترب منه في انتخابات هذا العام في وقت يبدو فيه أن الحكومة عازمة على تقليص تمثيل الجماعة في المجلس قبل انتخابات الرئاسة.

من محمد عبد اللاه ومحمد عبد الخالق

[ذهبية]

النهاردة الصبح و البلد واقفة على رجل المنصورة كلها ضباط امن و عساكر و ضباط بنفسها فى الشوراع

و عربيات من بتوع الامن المركزى فى الشوراع

حاجة فظيعة و بعدين قومت بالليل على صوت جاهورى طلعت اشوف فى اية لاقيت مسيرة لواحد من الاخوان و هو الوحيد اللى مرشح مسيرة لا تقل عن عشر الاف واحد تجوب الشوراع بالميكروفات

و اليمكروفون بيقول الاسلام هو الحل الله اكبر وورق بيتوزع

المسيرة منظمة بيحث الرجال فى المقدمة و النساء فى المؤخرة كلهم بلا استثناء مختمرات و منقبات

و جايبن كاميرا تصور المسيرة تجوب كل الشوراع من اكبرها لاضغرهاااا

بعد ما شوفت المنظر المهول دة و دى اول مرة اشوف حاجة زى دى سالت نفسى هل مرشح بالعدد الكبير دة فعلا ممكن ينجح

لا اعتقد طبعا استحالة الحزب هيسمح بنجاحة لان صفوت الشريف نفسة قال لن نسمح بدخول الاخوان الى الحكومة و الغلطة الى فاتت مش

هنكررها تانى

طيب اية امل الاخوان فى الانتخابات دى و انا شايفة ان انصارها فعلا كبيرة جداا العدد فعلا يا جماعة كان يخض الشارع بتاعى كبير

مكنتش شايفة اخرة من كمية البشر

طيب امل الاخوان اية فى الانتخابات و على اى اساس دخلوا الانتخابات و هما عارفين كويس موقف الحكومةة منهم

[se_ Elsyed]

ويقول لك ليه الناس بتتمنى مصيبة سودا تاخد الحكومة باللي فيها ؟

ويقول لك ليه الناس ما بقاش عندها إنتماء ؟

ويقول لك البلطجة ليه زادت في الشارع المصري وكتير بقوا ياخدوا حقهم بدراعهم ؟

اتاري كل ده من إختراع الحكومة وهي الراعي الرسمي للبلطجة والفساد

«الداخلية» تسحب رخص المئات من سائقى الأجرة بالمحافظات.. والسبب: «انتخابات»

كتب محـمد عـزوز وعمر الهادى ومصطفى المرصفاوى ٢٥/ ١١/ ٢٠١٠

بدأت وزارة الداخلية، من خلال إدارات المرور التابعة لها، سحب المئات من رخص مركبات وسائقى الأجرة بالقاهرة والمحافظات، إجبارياً، للمشاركة فى خدمات متعلقة بانتخابات مجلس الشعب، الأحد المقبل، من بينها نقل المشرفين وصناديق الاقتراع.

حصلت «المصرى اليوم» على نسخ من إيصالات سحب الرخص بعدد من المحافظات مدون بها أن سبب المخالفة «خدمة انتخابية»، فيما أصدرت إدارة المرور بمديرية أمن القليوبية إيصالات خاصة، موضحاً بها أنه تم سحب رخص السيارات «للاشتراك بعملية انتخابات مجلس الشعب، على أن تتواجد السيارات أمام مركز كفر شكر الساعة ٧ صباحاً يوم ٢٧ نوفمبر».

وأكد عدد من السائقين أن مسؤولى المرور بوزارة الداخلية أصدروا تعليمات مشددة لهم بضرورة التوجه إلى مديريات الأمن ليلة الانتخابات من أجل تسجيل سياراتهم بها، والحصول على التعليمات وخطوط السير التى سيتحركون وفقاً لها يوم الانتخابات.

ووجه السائقون ـ طلبوا عدم ذكر أسمائهم ـ انتقادات حادة لوزارة الداخلية، مؤكدين أن هذه الإجراءات سوف تكبدهم خسائر كبيرة، خاصة أن جميعهم مطالبون بأقساط شهرية، وأن المبالغ التى تصرف لهم نظير عملهم يوم الانتخابات لا تضاهى بأى حال من الأحول قيمة «البنزين» الذى تستهلكه السيارة.

وقال عدد من السائقين بمحافظة الشرقية إنهم يتقاضون ١٥٠ جنيهاً عن كل يوم، مقابل المشاركة فى الانتخابات، تقل كثيراً عن إيرادهم اليومى، وانتقدوا إجبارهم على المشاركة فى العملية الانتخابية، مطالبين بأن يكون ذلك للراغبين بشكل اختيارى، وأشاروا إلى أن سيارات بعضهم تم تحطيمها خلال مشاركتهم فى انتخابات ٢٠٠٥ دون أن يتلقوا أى تعويض من وزارة الداخلية.

فى المقابل، رفض مصدر أمنى بالإدارة العامة للمرور التعليق على وقائع سحب الرخص وإجبار السائقين على المشاركة فى الانتخابات، وقال لـ«المصرى اليوم»: «لا تعليق.. وليس لدى معلومات عن هذا الموضوع».

ومن جانبه، أكد جبالى محمد جبالى، رئيس النقابة العامة للعاملين بالنقل البرى، أن الإجراءات التى اتخذتها وزارة الداخلية تجاه السائقين تخالف اتفاقيات العمل الدولية، والقانون والدستور، إلا أن الوزارة «معذورة».

[se_ Elsyed]

على فكرة أول من أبتدع تلك القذارة هي الشرطة ....

وأتحدى اي حد في الشرطة ينكر

وهما إنهم إتعودوا يبلطجوا على سائقي الميكروباصات ويسحبوها منهم في حالة المداهمات والكبسات اللي بيعملوها ... وبكده يبقى ضربوا كذا عصفور بحجر واحد :

1- توصيلة ببلاش

2- العربية لو أنضرب عليها نار او إتدغدت .. يبقى في ستين داهية مش بتاعتنا

3- عملية تمويه أثناء المداهمة

عربية مين بقى ولا قطع عيش ناس ولا خراب بيوت ناس .. مش مهم ... مش الشعب في خدمة الشرطة ؟

[جسار]

لسه جاى من الشغل حالا وأنا طول السكة باحمد ربنا أن أسمى لم يدرج فى كشوف الموظفين

المشرفين على عملية الطبيخ الحكومى والمسماة خطأ عملية الانتخابات التشريعية لعام 2010

وللحقيقة فان كثيرين ممن لم تدرج أسماؤهم حزنوا كثيرا لانهم باتوا الليالى الماضية يحلمون

بالقرشين اللى جايين من الداخلية وهذا العام يقال انها ستزيد عن المرة السابقة وترتفع الى

450 جنيه نظير بهدلة وقلة كرامة لمدة يومى الانتخابات فقط

أما عن دائرتنا الانتخابية فالكابتن شوبير مصدع رؤوسنا بمكبرات الصوت المحمولة على 4 أو 5

عربات نصف نقل تذيع الاغانى المؤلفة والملحنة خصيصا له على سبيل المثال لا الحصر

كابتن ..كابتن ..كابتن مصر شوبيرررر

ياما جاب النصر لمصر شوبيرررر

وشوبير مكروه من اغلب الطنطاوية ، ولكن لعبة الانتخابات لا تعترف بمسالة الحب والكره

المهم تظبط امورك مع قيادات الحزب فى القاهرة ومع امين التنظيم وتقب بالمعلوم وهذا

العام رفعوا سقف التبرع الاجبارى للحزب الوطنى الى 2 مليون جنيه كحد ادنى والمرشحين

وشطارتهم يوصلوها الى 3 أو 4 مليون ، والمنافسة تاتى هذه المرة من أثنان من المرشحين

أحدهم على قائمة الحزب الوطنى ( فئات ) !!! وهو د/ ياسر الجندى ، والآخر الشيخ / السيد عسكر

(فئات ) وهو عضو فى المجلس السابق ولكن ( عمال ) وهو مرشح الأخوان ويعتمد على كثافة الاصوات

الانتخابية فى منطقة قحافة والتى ينتمى اليها ، ولكن التجربة السابقة منذ خمسة أعوام تثبت

أن الأنتخابات ليست بحجم الاصوات المستعدة أن تضحى من أجل التصويت لصالح مرشح معين يحبونه أو

يأملون خيرا منه ، ولكن الانتخابات لعبة اخرى تعتمد على مجموعة شروط وهى

أنت مسنود على مين ... لو الحزب الوطنى يبقى فيه أمل كبير انك تنجح ولو بعد الاعادة

مستعد وجاهز ومالى جيبك فلوس من 4 - 10 مليون جنيه وغير كده يبقى أنت بتهرج

مظبط امورك مع الامانة العامة للحزب فى القاهرة وفى الاقليم نفسه وألا بيتلعب بك لصالح مرشح آخر

مظبط امورك مع الشرطة من اول مدير الامن ومأمورى الأقسام والنقط وصولا لضباط الامن المركزى

عملت دعاية ووزعت بطاطين ولحمة وقماش وفلوس ووعود أنتخابية وشغلت تبعك 50 أو 60 شخص فى الموسم

وأخيرا وهو الاهم ربطت مع البلطجية والسوابق ورسمت لهم خطة ضرب اللجان اللى يشتم منها رائحة

تفوق للمنافسين الآخرين ووزعتهم عليها و أخذت موافقة شفهية من القيادة فى القاهرة وكذلك فى

الاقليم على تحييد الامن لرجالتك حين قيامهم بالبلطجة أمام اللجان الانتخابية وفى نفس الوقت

منع بلطجية الآخرين من ممارسة أنشطتهم وألقاء القبض عليهم بمعرفة الامن المحايد !!!

واتذكر حكاية طريفة عن انتخابات الدورة السابقة بخصوص الكابتن شوبير ، وذلك عندما ارسل

بلطجيته من رجال ونساء يحملون العصى والسنج والجنازير والنساء يحملن اكياس المياه بالشطة

وزيت العربيات القديم والبشلة ( فلقة موس واحدة توضع فى أعلى الفم تحت الشفة العليا )

وقاموا بالواجب مع الناخبين فى لجان قحافة حيثما تجمع اصوات ناخبى الاخوان المسلمين

وتمت الاعادة ونجح بجدارة ، ولكن عند صبيحة اليوم الثانى فوجئ شوبير بعدد كبير من النساء

والاطفال والرجال من البلطجية يقتحمون منزل والده حيث بات ليلته هناك هو وزوجته و أقتحموا

المنزل حتى غرفة نومه وبالطبع فلقد اصابه الفزع والرعب الشديدين وأنتم مين وعايزين أيه ؟

فكانت اجابتهم احنا اللى نجحناك وعايزين حقنا ، فتلعثم وقال طيب ما تروحوا لفلان هو اللى

انا اتفقت معاه وقالوا له احنا ما خدناش حاجة وعايزين حقنا ، وبالطبع لم يجد بد من

الاستسلام لمطالبهم و أقام حفلا كبيرا وزع خلاله النقود والهدايا لرجاله ونسوانه الذين اوصلوه

لسدة الكرسى ....