تجاوزات الجمهور التونسي في مباراة الاهلي والترجي الأخيرة

[اغابي]

انا مش حاتكلم - الفيديو حيتكلم

اللى حصل فى الماتش اللى كان بين الاهلى والترجي التونسي لسة من شوية

موقف مش جديد ومش غريب

عادى يعنى ما هو بيحصل - لكن هل يعنى لو داه حصل من مصريين لامن المدرجات التونسيين

كان حتبقى الامور بشكل عادى - احنا اصلا ما بنعملش كدا احنا ناس مؤدبين

ايه ذنبهم رجال امن المدرجات - كل الموضوع انهم بيحافظوا على النظام فى المدرجات

طيب الايام اللى جايا نشوف ايه حيحصل ومين حيجيب حق رجال الامن اللى فى المدرج

تعالو نتفرج فى استاد القاهرة وعلى ارضنا

ونشوف الجمهور التونسي وهما بيمسكو اتنين من رجال الامن

ويضربوهم بالكراسي والبوانى وطفايات الحريق بتاعة الاستاد

ومشهد متكرر

انا مش حاتكلم - اهو سكت - سكت خلاص

مرحبا بالاخوة العرب

http://www.youtube.com/watch?v=VzMBqTLp0Ro&feature=player_embedded

اغابي

تم تعديل 3 أكتوبر 2010 بواسطة اغابي

[herohero]

ايه الجديد

هو الامن مش مصري يعني مواطنين مصريين ايه الجديد

سيدتي لكي ان تغضبي اذا كان شيئ جديد لكن ماهو عادي

ماتشغليش بالك بالحاجات الصغيرة ده او لو كبيرة برده حكومتنا عندها حاجات تانيه اهم مش من ضمنها البحث العلمي ولا التعليم ولا التحكم ف غلو الاسعار ولا كرامة المصري

ولا هيحصل شيئ عادي

[جبار سينج]

http://egyimg.com/up/pictures/f4ad7696d7f0c66f6ff4a76deb1bbbb4.jpg

من داخل ملعب ستاد القاهرة أن قوات الشرطة تحاصر مداخل ومخارج الملعب للقبض على مثيرى الشغب من الجانب التونسى بسبب الاعتداء على

رجال قوات الاطفاء وأحدثت بهم العديد من الاصابات الكثيرة

وتابع فرج أنه يتم الاّن حجز الاعلاميين داخل أماكنهم كما يتم منعه ترحيل الجماهير التونسية وسط أنباء عن القبض عن عدد كبير منهم تجاوز

العشرة فى سلوك مشين أظهرته الاعادات التلفزيونية وسط أنباء عن اتلاف العديد من منشاّت الاستاد

كانت المشاهد التلفزيونية قد أظهرت الاعتداءات من جانب بعض الجماهير التونسية " الموتورة " ضد رجل الاطفاء وضربة بكمية كبيرة من الناس قبل أن

يتم التدخل لمنع هذه الاعتداءات ..

_______________________________________

فديوووو

http://www.youtube.com/watch?v=WYLZCKCRWjw&feature=player_embedded

تم تعديل 3 أكتوبر 2010 بواسطة Mohammad
حذف الصورة والاكتفاء بالرابط

[اغابي]

عادى لا ازاى خلينا نشوف حيظهر عمو جيمي - قصدي جمال مبارك حبيب الملايين ومشجع الكورة وراعيها فى مصر حيقول ايه بقى

انا اول ما قابلنى المشهد على التلفزيون ما صدقتش وكنت خايفة

على الامن ورجال المطافى انهم يموتوا من الضرب اللى نازل على قفاهم داه

انتم شوفتم كام واحد هاجم عليهم وضرب فيهم

حرام افرض ماتوا مين حيجيب حقوقهم حيدو كام الف لمراته واولاده ويقولوهم تعويض والباقية فى حياتكم

فين هيبة المكان اللى هما فيه وهيبة الارض اللى واقفين عليها فين هيبة المصري وثمنه

نشوف الايام اللى جايا ايه راى جمال مبارك فى اللى حصل وبعض المستترين على الاعلام

اغابي

:roseop:

[herohero]

عادى لا ازاى خلينا نشوف حيظهر عمو جيمي - قصدي جمال مبارك حبيب الملايين ومشجع الكورة وراعيها فى مصر حيقول ايه بقى

اه حضرتك عادي وهيتقال دول قلة مندسة هو السؤال ، هل الامن ده غير الامن اللي بنشوفه بيضرب مصريين اخوانه واقفين مسالمين ف تظاهر ة ضد التوريث او عاوزين التغيير او طلبه ف حرم عين شمس او طلبة ف الازهر

سؤال مجنني ولا القاعده المعروفة اننا أسود ووحوش مفترسة لكن ع بعض انما ع الغريب قطط وحمل وديع

انا لو ف ايدي القرار الناس ده تتحجز ونوريهم كرم ضيافه الامن المصري اللي الشعب المصري عارفه وياريت نسيب لهم حاجه للذكرى

لحد مايجي سفير تونس وتتدفع حق التلفيات واعتذار من الجهات الامنية للعسكري اللي اتبهدل وهو بيؤدي المهمة بتاعته

لحد ما يحصل ده هقول عاااااااااااااااااااااااادي ويبقى انت اكيد .......

[أبوعمار]

والله فعلا قلبي وجعني

ذنبهم ايه؟

المشكلة ان العرب لا بيعرفوا يلعبوا كورة

ولا حتى بيعرفوا يتصرفوا بطريقة متحضرة ؟

ولابيعرفوا ينظموا مباريات ويوزعوا الأمن بطريقة صح؟

ولا بيعرفوا يسيطروا على الجماهير لما بتثور كده؟

شوية ............ md2:

حاجة غريبة والله

[جبار سينج]

يعني ايه تنضرب بره بلدك وجوه بلدك ..؟؟!!

يعني ايه ييجي الجزائريين يضربونا ويشتمونا جوه بلدنا..؟؟!!

يعني ييجي التوانسة يقتلوا عساكرنا الغلابة اللي جاية من الأرياف اللي ملهمش دية ؟؟!!

يعني ايه الامن يضربك ويقبض عليك ويحجزك في اي وقت ؟؟!!

يعني كل ماتش تروحه الاستاد تروح وانت عارف انك ممكن مش تبات الليلة دي في بيتكم ؟؟!!

يعني تتفتش تفتيش اقل ما يقال هنه انه قذر وتتمنع من دخول الماء والاكل والاعلام والطبول والشماريخ... وييجي الغرب مايتفتوش اصلا ..!!

ويدخلوا بالشماريخ والاكل والماء..؟؟!!

يعني كل ماتش اضرب واتهان وابص الاقي الاجنبي عمال يضرب في العسكري اللي كان بيضربني من كام ماتش ..؟؟!!

يعني ايه ناس تيجي تكسر الاستاد وتضرب العساكر وتسيبها تمشي كده عادي؟؟

يعني ايه قتيل لبنان وقتيل المانيا وقتيل اليونان ومجلودين السعودية ومطاريد الكويت ومذبوحين نيجريا وغيرهم..؟؟!!

ويعني ايه ويعني ايه.. حاجات كتير قوي

===================================

لو مسمعتش ان (الكلاب) اللي جات ضربتنا في بلدنا دي

متقبضش عليها واترموا في السجون لحد ماتدفع بلدهم دية لكل عسكري اتعور وثمن تلفيات الاستاد

انا حقول باعلي صوت ميشرفنيش اكون مصري

ومحدش يقولي انت بتنبي كلامك علي موقف حصل

لأ..!!!

انا مش ببني كلامي علي موقف حصل

انا ببني كلامي علي كل اللي حصل وانا كاتبه فوق

ببني كلامي علي اللي بشوفه وبدوقه وبقراه في صفح الجرايد من ذل واهانة

ممكن اصبر علي اي حاجة

الا اني اشوف كلاب جاية تضربني في بلدي واقول عادي..!!

==================

وبلاش حد يقولي كرامة المصريين

المصري بينضرب ويتهان في كل مكان

واتمني ان الفنانين والفنانات اللي عايشين في قصور ميطلعوش يفتوا برأيهم

و اغبية الاعلام ميطلعوش يقولوا عمل فردي

لانه مش عمل فردي ...!!!

وكفايانا بقه طيبة واصل

لان قلة الاصل والفتونة هي العلامة المسجلة في الزمن ده..!!

=========================================

[Howayda Ismail]

الغلط عندنا مش بيحرموا يلعبوا مع دول المغرب العربى افتكر وانا صغيرة المنتخب

اخد علقة سخنة فى ليبيا لدرجة ان اكرامى وبعض اعضاء الفريق خلعوا العارضات عشان

يدافعوا عن نفسهم وكذلك ماتش الجزائر اللى فيه الاخضر البلومى فقأ عين دكتور مصرى

فى الفندق ولم يتخذ ضده اى اجراء ومع تونس اكتر من مرة ومافيش فايدة

جرب كده واتعارك مع اى جنسية غير مصرية حتى ولو الحق معاك وروح القسم شوف حايحصل

ايه معاك كرامتنا بقت مشاع فى الدول العربية لبنان والسعودية والكويت وليبيا ........

لانها مستباحة فى الداخل تفتكروا اللى برة حيحافظوا على كرامتنا اكتر من حكومتنا

[yasser moustafa]

لا داعى للذهول

طول عمر اخونا فى دول شمال أفريقيا معاملتهم لنا جافة جدا

رغم انهم عرب ... واحنا عرب

لكن اعتقد انهم بيعتبروا نفسهم ... مش عرب أوى يعنى - باعتبار دى درجة اعلى فى التحضر

[Mr MAGED]

تصرف همجي ومتخلف وبجد يفور الدم

واتمني فعلا انه ميعديش من غير حساب

لأن بجد كده هتبقي ملطشة

وربنا يستر من اللي جاي

هنا بيعملوا كده .. امال هناك هيعملوا ايه !!!

[Simba]

اللي محصل مشين ومهين ومؤسف وحاجة تكسف

بلا تحلي باخلاق بقي بلا كلام مالوش معني

كان فيه عسكري امن وقع وزميله راح يساعده علشان يقوم بجد احنا فينا الخير والهمج استفردوا بيهم والمصيبة ان الوقت ده بيعدي والكاميرات بتعرض يعني الاستاد كله شايف تقريبا وملحقش الامن يتدخل

غريبة دي

[Ahmed Anwer]

علي فكرة مكنشي أمن

كان من رجال إطفاء الاستاد و مدني

و للأسف إنه في المستشفي حاليا و مصاب بارتجاج في المخ

و بين الحياة و الموت

[Ahmed Anwer]

الأمن يحاصر الاستاد !!!!

ههههههههه

اللي بيدخلوا الجماهير الأهلاوية

بالمياة في أكياس

مش عارف يسيطر علي كام واحد

[Ahmed Anwer]

هدي أعصابك بس

و للأمانة معظم المشاركات و الأصداء في المنتديات التونسية

بتستنكر اللي حصل و بتعتذر

فرق يعني بينهم و بين الجزائريين

و عموما دي مش غلطتهم

دي غلطة الأمن المتخلف بتاعنا

[nightmare]

مش عارف صراحة لحد إمتى هنبقي ملطشه الدول كده.

الأمن المصري أصبح شغلته الوحيده هي حماية النظام وفقط وليس حماية المصريين , شوفوا الشرطه كده بتتعامل ازاى مع المعارضه في أي مظاهره , بيبقوا "اسود" , لكن لما مصري ينضرب قدام عنيهم شيء عادي , ما هما واخدين على كده.

انا كان نفسي ادخل في التليفزيون أطحن العيال دي , وتشوف الشرطه والضباط واقفين ولا كإن فيه حاجة بتحصل , انا لو مكان أى واحد فيهم كنت هقلع ام البدلة وارميها وانزل فيهم ضرب بالنار , لكن للأسف فقدوا النخوه والرجوله, ولا يستقوا الا علي الشعب والمعارضه وفقط.

احنا بس اللى معصبين نفسنا زيادة عن اللزوم والبهوات ولا في دماغهم عادي , شوية كده وهيهدوا وكله ينزل على مفيش , ويتحفنا الكبير بكلمتين حلوين يصبرنا بيهم بقي زي المرة اللى فاتت مع الجزائر كده يوم ما طلع قالك "ان كرامة المصري من كرامة مصر" , والتشجيع اشتغل ويحيا الرئيس حامى الكرامة , وتانى يوم كان بياخد بوتفليقه بالحضن.

الله ينتقم منه ومن أعوانه جميعاً , فقدنا معه كل شيء وأعز شيء "الكرامة".md2:

مع تحياتى

[herohero]

لا أرى ان تضايقنا وغضبنا سينتج عنه شيء لان الموقف تكرر مرار وسيستمر طالما انت مهان في بلدك فلا عزاء لك

ولكني اتعجب قائدنا الهمام اي كرامة يقصدها عندما يقول كرامة المصري ويتشدق بها

اي كرامة سيدي الرئيس لقد اهنت كرامة المصري ف الداخل بقمعه واهنته من قبل انظمتك وفي الخارج بسبب مواقفنا الضبابية لقد أصبحت سياستنا ضبابية والنتيجه

اما ننضرب او ننضرب الغريب فقط اننا بننضرب في أرضنا

واعتقد اننا نتفرد بهذا وممكن اضافتها من ضمن سمات المصري

انه يمتاز بخاصية اهانة كرامته في داخل بلده وخارجها من الاخر محدش عامل لك حساب لان مالكش كبير

واللي مالوش كبير بيشتري له كبير ؟؟؟؟ حد يعرف كبير للبيع!!!!!

[مسافر زاده الخيال]

اعلن تضامني مع (المصريين) لوقوع الظلم البين على جماهيرهم وفي بلادهم..............

واشيد بالاحترافية (الاعلامية) لتوثيق (الاساءات والتجاوزات)......

واتمنى ان لا(تتكرر) السقطات الاعلامية التي حدثت ايام (مباراة الجزائر لا اعادها الله)التي اضاعت حق المظلوم واعطت المجال (للظالم) لتشتيت الانتباه عما حصل فعلا

[akramgroup]

اللى حصل ده سببه الوحيد بجانب طبعا تخلف وحقد الناس امثال الحشرات دول ( بتوع الفيديو وامثالهم)

هو التقصير الامنى من قبل جهاز الشرطة فى مصر يعنى المفروض يكون فى انتشار لعساكر الامن المركزى فى المدرجات دى

وخصوصا ان ده بيحصل وهايحصل كل ماتش مع الفرق دى

يعنى فين الشرطة ؟؟؟؟؟؟؟؟؟؟؟؟؟؟؟ ( طبعا مش فاضيين بيضربوا فى مظاهرة على الماشى كده وهايرجعوا)

وده لما بيحصل فى اى دوله اوروبيه الشرطة بتحجز الجزء ده من المدرجات وتحقق مع كل المشاغبين دول حتى لو من جنسيات اخرى

يعنى لو كل واحد من المجموعه دى راح على قسم الشرطة واتعمل معاه الواجب اللى بيتعمل مع اى مصرى smk:

كان زمانهم مروحين بيحلفوا بجمال الكرة المصرية وحلاوة المصريين

واحتمال كمان يقلبوا ويبقوا بيشجعوا الاهلى حتى فى التلفزيون التونسى

تحياتى واستيائى

أكرم,,

[اغابي]

بصراحة انا حاسة بيك وليك حق تتعصب كدا

بس مش لدرجة تلغى جنسيتك وههويتك

ايه ذنبها الجنسية المصرية وايه ذنب مصر بس

كل الموضوع ان مش عارفة هما رجال امن ولا مطافى المهم انهم فى كل الاحوال ناس بيقوا بالواجب اللى عليهم وعلى ارضهم

لكن مسلسل الهمجية مش حينتهى من العرب لاخوانهم المصريين اعتقد ان دلوقتى

مفيش اى حجة دلوقتى مفيش حاجة اسمها حد يطلع يكذب الخبر لا الموضوع صوت وصورة

لازم يكون فى رد مننا لان داه غلط فى حقنا كمصريين

ملحوظة

انا شايفة ان اتنين توبيك يتفتحو لنفس القضية داه شيء كويس - سواء توبيك حضرتك او توبيك انا لاننا بنتكلم فى قضية مهمة

ياريت نفتح 20 توبيك وتوبيك

يمكن يكون مساهمة ولو بسيطة منى ومنك ومن الكل فى ان صوتنا كمصريين يوصل لاكبر عدد من الناس والكل يعرف اننا لينا صوت

اصبر بس يا جبار نشوف الايام اللى جايا حيكون ايه الجديد فيها

اغابي

تم تعديل 4 أكتوبر 2010 بواسطة اغابي

[شريف مان]

وايه الجديد

ما احنا اتبهدلنا فى السودان وكل اللى حصل خرج الراجل فاقد الزمن وقال البوقين بتوع لن اسمح باهانة المصريين

وبعدين اتبهدلنا وهنتبهدل طول ماهوا موجود

اللى عايز يرجع كرامة المصريين .... يرجع عبد الناصر والسادات

غير كده مفيش فايدة