تجاوزات الجمهور التونسي في مباراة الاهلي والترجي الأخيرة

[اغابي]

انتم فاكرين لما ابراهيم حسن قلب الترابيز فى وش المدرب والحكام وضربهم هناك فى قلب ملعبهم

تصدقوا - اننا كلنا المفروض نعمل كدا - لانه راجل من ضهر راجل

وجدع وهما لو داه حصل فى ملعب الجزاير كانو خافو يعملوا حاجة هناك صح

طب ليه مصر هى العاقلة اللى بتستحمل وبتضرب وتسكت

بصراحة تحية وتقدير ليك يا ابراهيم يا حسن

لانه راجـــــــــــل

اغابي

[nightmare]

بصراحة تحية وتقدير ليك يا ابراهيم يا حسن

لانه راجـــــــــــل

اغابي

أؤيد هذا الكلام, وهذا هو تصريحه أمس مع أ.إبراهيم حجازي , بس مين يسمع ومين يفهم :sad:

http://www.youtube.com/watch?v=D-9qsLLNWPw

مع تحياتي

[المهندسه]

البيحصلنا ده القائمين على الامر فى مصر شركاء فيه بسكوتهم عن حقوقنا فى حاجات كتير فاتت ولسه هيحصلنا كده تانى وتانى طول ما احنا ساكتين عن حقنا و مطيباتيه وخايفين على العلاقات السياسيه بين الدول

احنا البنتنازل عن حقوقنا ولسه...هدى نفسك يا جبار وارجع فى حلفانك علشان انت بتأذن فى مالطه ...مصر سكتت فى الاول وهتفضل ساكته

بحجه العلاقات بين الدول الهتتضر..ناسيين ان العالم كله قاطع مصر لما السادات راح اسرائيل ومع ذلك استمرت مصر للان فى الرياده رغم مقاطعه العرب ومنعهم العلاقات السياسيه وتـأثر العلاقات التجاريه وغيرها فى الوقت ده..فينك يا سادات

تم تعديل 4 أكتوبر 2010 بواسطة المهندسه

[anis71]

للأسف إحنا مش بنعرف ناخد حقنا صح، وأنا باتكلم على حكومتنا والمسؤلين، وده لأنها اساسا مش بتدي أي حد حقه ومافيش أي قواعد للعدالة داخل البلد.

اللي حصل إمبارح ده بيتكرر في إستادات اوروبا كتير ، والحق بياخد مجراه والعيال المشاغبين بيتمسكوا ويتحكم عليهم حتى لو هم من دولة تانية، وتلاقى دولتهم باعتة محامين عنهم وكل واحد ياخد حقه قدام القضاء، ولا في دول بتقع في بعضها ولا أي حاجة.

هناك العدل فوق الجميع, لأنهم ناس عارفين حدود الحرية الشخصية لكل واحد، واللي بيغلط بيتحاسب ولا عمر أي إعلام يقدر يزايد او يعمم أي إتهامات.

عندنا بقى كل العالم سواء عرب او اجانب عارفين إن إحنا بلد "معلهش" وقانون "حقك على راسي" و "ياأخي المسامح كريم" بيعاملونا بهذه المبادئ اللي إحنا اخترعناها وبسببها بيضيع حق الناس بينها وبين بعض. طيب فين قانون الاسلام العظيم " العين بالعين والسن بالسن والحرمات قصاص".

أي مصري بيغلط بره بياخد على نافوخه بال.....، ويمكن بيشيل اكتر من العقوبة العادية.

وقدامكم قضايا المصريين في الخليج وليبيا وأوروبا وغيرها.

عندنا بقى لأ المجرم الأجنبي نطبطب عليه ونسامحه ونسهل له يزيد في الافترا...

حد سمع عن مصري خد حقه من أجنبي في اي قسم شرطة؟؟؟ اتحدى

ياما كلاب شخصيات شهيرة نهشت مصريين واتلم الموضوع على حساب المصري، ياما مصريين أفراد او شركات متبهدلين من اصحاب أعمال اجانب ولم يستطيعوا الحصول على حق ولا باطل.

يارب انت الحكم العدل فأنصف هذا الشعب الذي لم يعد يعرف للعدل طعماً. آآآآآآآآآمين

تم تعديل 4 أكتوبر 2010 بواسطة anis71

[Amr Radwan]

يعني ايه تنضرب بره بلدك وجوه بلدك ..؟؟!!

يعني ايه ييجي الجزائريين يضربونا ويشتمونا جوه بلدنا..؟؟!!

يعني ييجي التوانسة يقتلوا عساكرنا الغلابة اللي جاية من الأرياف اللي ملهمش دية ؟؟!!

يعني ايه الامن يضربك ويقبض عليك ويحجزك في اي وقت ؟؟!!

يعني كل ماتش تروحه الاستاد تروح وانت عارف انك ممكن مش تبات الليلة دي في بيتكم ؟؟!!

يعني تتفتش تفتيش اقل ما يقال هنه انه قذر وتتمنع من دخول الماء والاكل والاعلام والطبول والشماريخ... وييجي الغرب مايتفتوش اصلا ..!!

ويدخلوا بالشماريخ والاكل والماء..؟؟!!

يعني كل ماتش اضرب واتهان وابص الاقي الاجنبي عمال يضرب في العسكري اللي كان بيضربني من كام ماتش ..؟؟!!

يعني ايه ناس تيجي تكسر الاستاد وتضرب العساكر وتسيبها تمشي كده عادي؟؟

يعني ايه قتيل لبنان وقتيل المانيا وقتيل اليونان ومجلودين السعودية ومطاريد الكويت ومذبوحين نيجريا وغيرهم..؟؟!!

ويعني ايه ويعني ايه.. حاجات كتير قوي

===================================

لو مسمعتش ان (الكلاب) اللي جات ضربتنا في بلدنا دي

متقبضش عليها واترموا في السجون لحد ماتدفع بلدهم دية لكل عسكري اتعور وثمن تلفيات الاستاد

انا حقول باعلي صوت ميشرفنيش اكون مصري

ومحدش يقولي انت بتنبي كلامك علي موقف حصل

لأ..!!!

انا مش ببني كلامي علي موقف حصل

انا ببني كلامي علي كل اللي حصل وانا كاتبه فوق

ببني كلامي علي اللي بشوفه وبدوقه وبقراه في صفح الجرايد من ذل واهانة

ممكن اصبر علي اي حاجة

الا اني اشوف كلاب جاية تضربني في بلدي واقول عادي..!!

==================

وبلاش حد يقولي كرامة المصريين

المصري بينضرب ويتهان في كل مكان

واتمني ان الفنانين والفنانات اللي عايشين في قصور ميطلعوش يفتوا برأيهم

و اغبية الاعلام ميطلعوش يقولوا عمل فردي

لانه مش عمل فردي ...!!!

وكفايانا بقه طيبة واصل

لان قلة الاصل والفتونة هي العلامة المسجلة في الزمن ده..!!

=========================================

مع كل الاحترام لشخصك .. لو كل واحد اتخنق من حاجة او من حاجات في مصر يقوم يعلن انه مش مصري يبقي الشعب المصري كله بكرة ان شاء الله مش هيبقي مصري

هدي نفسك.. احنا عندنا مشاكل كبيرة و منها المشكلة اللي حضرتك اثرتها بس اللي هيحصل المرة دي زي اللي حصل المرة اللي فاتت يوم الجزائر .. هما شاطرين بس علينا كمواطنين و عاملين زي الفراخ البيضا لا بيهشوا و لا بينشوا مع الاجنبي برا مصر و حتي جوا مصر

اللي بيحصل ده محتاج وقفة قوية مش سحب الجنسية

تحياتي لك

[Ahmed Anwer]

شوفوا الفيديو ده

يمكن يهديكم شوية

http://www.youtube.com/watch?v=nsmEWkCUFDc&feature=player_embedded

العيال اتطجنت

خايف نكون إحنا اللي ضربناهم

و بنكذب و بعدين نعتذر و ينزلوا العقوبات علينا كالعادة

[خالد شحاته]

أكد عبد العزيز أمين مدير هيئة ستاد القاهرة الدولي إن مشجعي الترجي التونسي الذين اعتدوا على أفراد الأمن المصري كانوا مخمورين.

وقال أمين في اتصال هاتفي ببرنامج "مساء الأنوار" على قناة مودرن سبورت: "جماهير الترجي كانوا مخمورين وهربوا الشماريخ في أماكن حساسة بأجسادهم فتعفف الأمن المصري من تفتيشهم".

وأضاف: "أنا رئيس هيئة استاد القاهرة منذ تسع سنوات ولكنني لم أرى ضرباً بهذا (الافترا) من قبل".

ونقلت كاميرات التليفزيون الناقلة لمباراة الأهلي والترجي بالدور نصف النهائي من دوري أبطال إفريقيا اعتداءات مشجعي الترجي على جنود الشرطة وأفراد أمن ستاد القاهرة وأظهرت تعرض اثنين منهم إلى ضرب مبرح.

وأوضح مدير هيئة ستاد القاهرة أن الجمهور التونسي حطم عدد كبير من المقاعد ودورات المياه والمطاعم بما يوازي 150 ألف جنيه مؤكداً أن النادي الأهلي هو من يتكلف هذا المبلغ نظراً لانه من قام بتأجير الملعب.

وتابع "تم التعامل بكرم بالغ مع مشجعي الترجي وتم تأمينهم بصورة جيدة جداً ودخلت لهم الحافلات الخاصة بهم حتى المدرجات".

وكشف أمين عن القبض على 11 مشجعاً تونسياً وتم تحرير محاضر لهم حيث سيتم عرضهم على النيابة غداً الاثنين.

[akramgroup]

شوفوا الفيديو ده

يمكن يهديكم شوية

http://www.youtube.com/watch?v=nsmEWkCUFDc&feature=player_embedded

العيال اتطجنت

خايف نكون إحنا اللي ضربناهم

و بنكذب و بعدين نعتذر و ينزلوا العقوبات علينا كالعادة

الله ينور عليك ياابو حميد

بصراحه يعنى الفيديو ده هدانى شويه

وعلى فكرة انا موافق يقولوا علينا اننا مش بنعامل الضيوف كويس

واننا استفردنا بالعيال الجزم بتوعهم

بس طالما هما بدأوا يبقى يستاهلوا اللى جرالهم

بس على الله يكون اتروقوا منهم كتير عشان يكونوا عبرة

واحنا بنردلهم اللى بدأوه

تحياتى أكرم,,

[اغابي]

ايه اللى وصنا لكدا ما هما ابتدوا

بس برافوو عليهم ومش مهم يحصل اللى يحصل هما ابتدوا

هل احنا من نفسنا يعنى اكيد رجال الاطفاء شافو زمايلهم بيتضربو

من شباب جايز يكونو من دور اولادهم بالشكل داه لازم ان رد الفعل يكون كدا

لان الفيديو الاولانى شباب صغيرين 18 سنة ولا 19 سنة بيضربو رجال الاطفاء الواحد سنه فوق ال40 سنة

كان طبيعي رد الفعل

بصراحة انا فرحت وانبسطت اوى بالفيديو داه يا استاذ احمد

حاسة باحساس هولز او الانتعاش لما تاخد حباية هولز كدا تنعشك بجد

بس ياريت يعرفوا انهم ضيوف وما يعملوش شوشرة تانى لما يروحو اى حتة وخاصة مصر يقعدو كدا بادبهم ويبقوا مؤدبين

ميرسي

اغابي

[akramgroup]

واللهى انا زعلان بس عشان افرجوا عنهم بعد اعتذار السفير التونسي

العيال دول كان لازم يفضلوا محجوزين لحد مايقلبوا اهلاويه

بصراحه كانوا اخر قلة ادب

يلا كله على الله

ومن قدم خير بيداه التقاه

بس كان لازم يكون بالشبشب(مع الاعتذار للشبشب)

تم تعديل 5 أكتوبر 2010 بواسطة akramgroup

[akramgroup]

اه نسيت اقولكم على حاجه كده

سمعت انه تم الافراج عن ال11 اللى تم احتجازهم من قبل الشرطة المصرية فى احداث الشغب

والجميل بقى اللى سمعته بس مش متأكد منه ويارب يطلع غلط

أنه تم الافراج عنهم عشان يتقدموا للمحاكمه فى تونس B)

لو الكلام ده صح تبقى مصيبه

يعنى الاجانب اللى فى مصر بيتحاكموا فى بلدهم مش فى مصر

يعنى مصر هيا البلد الوحيدة اللى بتعمل كده

الله الله على الجمال يعنى المصريين بيتحاكموا فى اى بلد هما فيها والاجانب فى مصر بيتحاكموا فى بلادهم

عظيمة يامصر ياارض اللوا

حد يرد عليا

أكرم,,

[مصطفى يونس]

التحقيات بتقول انهم كانو سكرانيين هما السكرانين بيضربو كدا دا طحنو رجال الدفاع المدنى وفى الاخر هيرحوهم

[شريف مان]

انا كنت مضايق قوى يوم الماتش بس لما شفت الفيديو اللى حطه أحمد أنور

صعبوا عليا قوى الناس اللى بتنضرب وبالذات اللى كان بيعيط ووجهه عليه تراب

يعنى سابوا اللى ضربوا ومسكوا فى دول

ياله ربنا يهدى النفوس

[Ahmed Anwer]

بس المرة دي لعبناها صح

و أكبر تحية لمخرج المباراة

نقل حي مباشر و إعادة

و الأمن اللي اتدخلوا مخبرين بلبس مدني مش بزي عسكري

و للأمانة برده

إعتذار اتحاد الكورة التونسي و نادي الترجي و السفير

خطوة حضارية

و في النهاية بيحصل بين كل مشجعي الكورة في العالم و خصوصا الألتراس

لسه من يومين يعني جماهير الزمالك مكسرة في النادي الأهلي

و عربجية مجهولي الهوية من الأهلاوية قافلين شارع البطل أحمد عبد العزيز

[se_ Elsyed]

مين قال تم الإفراج عنهم ؟؟؟؟؟

ده النيابة أمرت بحبسهم الـ 11 عيل دول 4 أيام على ذمة التحقيق إمبارح

والنهاردة فقط تم القبض على عيل جديد منهم بعد الكاميرات ما صورته وهو بيشترك في ضرب الشرطة

والخبر الحلو إن إتنين إتعكشوا في المطار وهما مسافرين من العيال دي إمبارح.. يعني العدد 14 كده

اقسم بالله العظيم لو الجمهور المصري كان عمل ربع اللي عملوه ده في تونس كان زمانهم أندبحوا هناك ..

الشرطة المصرية مستحيل تضربهم إلا بعد ما عملوا شغب

والشغب بدأ مع إحتساب هدف غير صحيح للاهلي فبدأوا يضربوا صواريخ خبوها وهما داخلين مع إن معروف للجميع إن الشرطة المصرية منعت ذلك وبدأت بالجمهور المصري

كما إن أعضاء روابط التشجيع التونسية وما قدروش ينكروا كانوا لسه معزومين على الغداء من روابط تشجيع الاهلي وخرجوا من الغدا على الأستاد ...

وقبلها بيوم كان في إجتماع أمني مع رئيس البعثة التونسية ونبهوا عليه إن مافيش شماريخ ولا صواريخ ولازم التشجيع يبقى حضاري ...

تخيلوا إن كان في حوالي 6 الاف مشجع تونسي في الملعب ؟

وجيمعهم تم التعامل معهم بمنتهى الاحترام ودخلوا الأستاد في منتهى السلاسة ...

عجبني بيان السفارة التونسية أمس التي طالبت بمعاقبة من أخطأ وتعهدوا بدفع قيمة إصلاح التلفيات التي حدثت بأستاد القاهرة

العام الماضي فريق ليبي راح يلاعب فريق تونسي مش متذكر مين هو لكن شوفت اليوتيوب ... أقسم بالله أول مره اشوف كده في حياتي ... الجمهور الليبي واللعيبة الليبيين أكلوا ضرب ولا كأنهم في حرب مع اليهود

نقول ده عادي ؟ ماشي عادي

لكن اللي مش عادي ... إن ليبيا في حدود مشتركة مع تونس .. ومعظم إن لم يكن كل الجمهور الليبي راح بسياراته ... فشوفت بعيني السيارات الليبية وهي في موقف السيارات في تونس والجمهور التونسي بيولع فيها والنار كانت للسما

هو في إيه يا جماعة ؟

[akramgroup]

واللهى فرحتنى بكلامك يا استاذ سيد

وفعلا طلع انهم محبوسين لسه

وادى الفيديو بتاع عربيات ليبيا

احدى مهازل التخلف

http://www.youtube.com/watch?v=Frl0YZ7M_rU&feature=related

ربنا يهدى الجميع انا مش عارف التصرفات دى اسبابها ايه نفسيه ولا نفسيه

تحياتى

أكرم,,

[Ahmed Anwer]

و قبلهم جمهور جزائري احتل مدينة تونسية بأقسام الشرطة

ده إحنا ملايكة

و مبنتشطرشي غير علي بعضنا

[م تيمور المراغي]

النائب العام يفرج عن مشجعي الترجي حفاظاً على العلاقات المصرية التونسية

أصدر النائب العام المستشار عبد المجيد محمود قراراً يوم السبت بالإفراج عن 14 مشجع تونسي المحبوسين على خلفية أعمال الشغب التي قاموا بها خلال مباراة النادي الأهلي أما نظيره الترجي التونسي في الدور نصف النهائي لدوري أبطال أفريقيا والتي أقيمت يوم الأحد 3 أكتوبر الجاري باستاد القاهرة.

وأمر النائب العام بترحيل المشجعين إلى تونس لتمكين السلطات التونسية من اتخاذ الإجراءات القانونية ضدهم، وأشار إلى أن إخلاء سبيل المشجعين المتهمين يأتي نزولا على العلاقات الودية بين مصر وتونس على جميع المستويات وكافة الأصعدة وعدم قبول أن تنال تلك الأحداث الفردية من صفو تلك العلاقات بين البلدين.

وكان قاضي المعارضات بمحكمة جنح مستأنف مدينة نصر يوم الأربعاء الماضي قرر تجديد حبس الـ 14 مشجع تونسي لمدة 15 يوما على ذمة التحقيق ولحين البت في القضية حيث التهم الثلاث الموجهة لهم هي الاعتداء على رجال أمن خلال تأدية عملهم وإتلاف المال العام وإثارة الشغب ، وكانت الجلسة عقدت برئاسة المستشار محمود أبو رحاب رئيس المحكمة بحضور حاتم الزياد رئيس نيابة حوادث شرق القاهرة الكلية وأحمد الشاذلي وهيثم أبو ضيف مديرا النيابة.

وأنكر المحتجزين من جماهير الترجي التونسي مشاركتهم بما حدث في مدرجات استاد القاهرة حيث كانت مقاعدهم في المدرجات العليا وعندما حدثت الاعتداءات قام الأمن بتطويقهم لحمايتهم من المشاجرات التي كانت تحدث في المدرجات السفلية وأظهروا أسفهم على ما حدث مؤكدين في الوقت نفسه على احترامهم الكامل للشعب، وعند مواجهتهم بالسؤال عن صورهم المسجلة على شريط فيديو شدد على أنها ليست لهم ولم يشاهدوا تلك الصور فليسوا هم من قام بالاعتداء.

وطالبت النيابة بتوقيع أقصى عقوبة على المتهمين نظرا لمدى الإهانة التي تعرض لها قوات الأمن المصري والتلفيات التي حدثت في الإستاد ، وطالب عبد المنعم الدمنهوري المدعى بالحق المدني ضد المتهمين باستمرار حبس المتهمين وعدم إخلاء سبيلهم و بإحالتهم إلى المحاكمة الجنائية عن التهم الموجهة إليهم وتوقيع أقصى العقوبة عليهم

[se_ Elsyed]

مليون تحية للقيادة المصرية على هذا القرار ..... على فكرة ده صدر النهاردة بالذات على هامش القمة العربية المنعقدة اليوم بليبيا

فماذا كنا نستفيد من سجن الأشقاء ؟

إذا كان على التلفيات فتونس تعهدت بدفع كافة التكاليف

ومن حيث الدرس فلقد تعلمه المشاغبون جيداً

ويكفي بصراحة الموقف العقلاني المحترم المتفاهم من الحكومة التونسية ومن القائمين على الرياضة التونسية وأخرهم الاستاذ سليم شيبوب الرئيس الشرفي لنادي الترجي وفي نفس الوقت هو رئيس اللجنة الاولمبية الذي قام بزيارة لمصر اليوم لتقديم إعتذاره ومحاولة التوسط لأطلاق صراح هؤلاء المشاغبين .. وأستمعت إليه منذ قليل وكان عقلانياً إلى أقصى درجة وأستنكر ما فعله هؤلاء وتبرأ من أفعالهم تماماً

برافو مره أخرى للقيادة المصرية .... فهكذا يتصرف الكبار وهكذا تكون الأخوة

بالمناسبة منذ أسابيع قليلة تونس أفرجت عن صيادين مصريين دخلوا للصيد في المياه الأقليمية التونسية حرصاً مناه على علاقتها بمصر

شكراً لتونس حكومةً وشعباً ويكفي أنني لم أستمع إلى أي رأي يتهم التوانسة جميعهم بالعنف لما فعله قلة من الجمهور في مجرد مباراة .

[se_ Elsyed]

نحن نصنع الحدث ..

كما توقعت

رئاسة الجمهورية: مبارك استجاب لطلب بن علي وأمر بالإفراج عن مشجعي الترجي

10/9/2010 9:15:00 PM

كتب: أيمن شعبان

أكد السفير سليمان عواد المتحدث الرسمي باسم رئاسة الجمهورية أن الرئيس حسني مبارك استجاب لطلب الرئيس التونسي زين العابدين بن على وأمر بالإفراج عن 14 مواطنا تونسيا متهمين بارتكاب أعمال شغب، شهدها استاد القاهرة عقب مباراة كرة القدم بين فريقي الأهلي والترجي.

وصرح السفير سليمان عواد بحسب ما أوردته إذاعة راديو مصر بأن قرار الإفراج عن المواطنين التونسيين جاء استجابة للحديث بين الرئيس مبارك والرئيس التونسي زين العابدين بن على الذي جرى على هامش القمة الإفريقية بليبيا يوم السبت، و أن القرار يأتي تقديرا للعلاقات الوثيقة بين مصر وتونس.

في ناس ممكن ما يعجبهاش القرار ويشتموا ويقولوا إتبهدلنا و و و و

دي وجهات نظر