تفتكروا فيه فايدة؟؟

[masraweya]

السلام عليكم

تجربة جميلة للمصري اليوم .. "اختارت «المصرى اليوم» أن تكون جزءاً من تجربة الاستقطاب الدائرة حالياً بين مؤيدى الدكتور محمد البرادعى، المدير السابق للوكالة الدولية للطاقة الذرية، وجمال مبارك، الأمين العام المساعد للحزب الوطنى، أمين السياسات، لدفع كليهما إلى الترشح فى الانتخابات الرئاسية، وهى الحالة التى شغلت الرأى العام على مدار أسابيع مضت، وشهدت حالة من الشد والجذب.

عشنا وجهى التجربة، فمرة كنا «برادعيين»، وتحولنا فى أخرى إلى «جماليين»، وبين الاثنين رصدنا الدراما فى الحكاية، ثبتنا عنصر المكان وهو حى المنيرة، فلا هو فقير، ولا راقٍ، لكن غيّرنا الأبطال، والأبطال فى هذه التجربة هم الناس، وليس البرادعى، أو جمال.

أنصار البرادعى يؤيدونه بـ«الكلاكسات».. ويوقّعون بعد تردد والرغبة فى التغيير بسبب الغلاء.. ومعارضوه: «الأمل عند ربنا»

أختار منها: «إنتوا مش خايفين وإنتوا ماشيين كده فى الشارع عادى، إنتوا ما عرفتوش اللى حصل إمبارح»، فأجبناه بقولنا «نحن نسعى للتغيير من أجل صالح هذا البلد، فهذا واجبنا، فماذا عنك أنت»، فنظر إلى صورة البرادعى الموجودة على ملابسنا،

وقال لنا «لو الـ٨٠ مليون عاوزين حاجة والحكومة عاوزة حاجة يبقى برضه اللى الحكومة عاوزاه هتعمله، وده من وجهة نظرى، عشان كده مفيش فايدة من اللى انتوا بتعملوه ده»، فسألناه «يعنى مفيش أمل»، فرد وهو يدير وجهه عنا مستعدا للرحيل «الأمل عند ربنا».

تركناه ومضينا لعبور الشارع فوجدنا إحدى السيارات تهدئ من سرعتها وتطلق بعض «الكلاكسات» لتلفت انتباهنا إليها، وعندما نظرنا ناحيتها وجدنا بداخلها شاباً ينظر إلينا مبتسما رافعا إصبع الإبهام وقال لنا بصوت عال «ربنا يوفقكم»، ثم مضى فى طريقه من جديد، وبينما تكرر الموقف ذاته من بعض المارة أو قائدى السيارة الذين نمر بهم فى جولتنا، إلا أن آخرين كانوا ينظرون إلينا باندهاش واستغراب فى بعض الأحيان.

فأجاب «لا ياعم.. الريس هيديها لابنه»، فسألناه «وما رأيك أنت»، فقال «إحنا ما شفناش جمال لسه، وبعدين الريس معيشنا فى سلام وما دخلناش حروب يبقى ليه لأ»، وعندما سألنا صديقه عن رأيه قال «إحنا ما شفناش لا ده ولا ده يبقى هنختار إزاى»، ورفضا التوقيع وعادا إلى طعامهما مرة أخرى.

سيدتان كانتا تعبران الطريق وما إن اقتربتا منا وشاهدتا صورة البرادعى، حتى أسرعتا فى الابتعاد عنا، وقالت إحداهما «إحنا مالناش فى السياسة»، ولم تمر دقيقتان حتى وجدنا رجلاً ثلاثينى العمر يهرول باتجاهنا ويحاول إيقافنا ليقول لنا شيئا ما، فاتجهنا ناحيته فقال لنا وهو يحاول التقاط أنفاسه «انتوا تبع حملة البرادعى،»، فأجبناه «نعم»، فقال «لقد مرت زوجتى أمامكما منذ قليل وشاهدتكما وأخبرتنى فأسرعت لألحق بكما»،

فسألناه عن السبب، فأجاب «أنا من أشد المعجبين بالبرادعى، لكن إحنا عاوزينكم تيجوا عندنا البحيرة عشان فيه ناس كتير مش عارفة تتواصل معاكم»، شجعنا حماسه هذا على أن نطرح عليه سؤالا «وما رأيك فى أن تقوم أنت بدور حلقة الوصل بيننا وبين مؤيدى البرادعى فى البحيرة»، فلم يتردد فى الموافقة قائلا «يا ريت»، وطلب التوقيع على بيان التغيير، وأعطانا رقم تليفونه لنبلغه بعد ذلك بكيفية التواصل، وما هو الدور الذى سيقوم به فى البحيرة.

لكنه طلب منا قراءتها عليه لأنه لا يعرف القراءة، وما إن انتهينا من قراءة آخر كلمة فى الاستمارة، حتى طلب منا قلما قائلا «طبعا موافق البلد محتاجة تغيير فعلا، انتوا مش شايفين الحاجة بقت غالية إزاى، والناس خلاص مش لاقيه تاكل».

[masraweya]

السلام عليكم

المؤيدون لــ «جمال»: «كفاية إنه ابن الريس».. و«شبعان» والرافضون: «بالذمة إنتم عندكم دم».. «إنتوا خسارة فيكم الكلام»

أختار منها

رحبت بالتوقيع «طبعاً ده الريس»، وعندما علمت أن التوقيع لجمال مبارك، غابت ابتسامتها وقالت ببساطة شديدة «لا» ومضت، سارت خطوتين ثم التفتت مرة أخرى إلينا وقالت مبررة موقفها «الريس عمل حاجات كتير للبلد، لكن جمال ده عمل إيه، إنتوا مش شايفين البلد».

مرسومة على وجهها ابتسامة عريضة، سارت السيدة الأربعينية وحيدة، ترتدى بلوزة وحجاباً برتقالياً، ابتسمت بمجرد إشارتنا لها، وأصبحت ابتسامتها ضحكة مسموعة عندما علمت بأهدافنا، وقالت: «وهو أنا شفت منه حاجة عشان أوقع له»، وعندما أوضحنا لها أن جمال يحتاج الفرصة الكاملة، لكى يستطيع تنفيذ أفكاره، ردت «لما يبقى رئيس هيبقى عامل زى حسنى مبارك»، وعندما سألناها «إنتى مش بتأيدى الرئيس مبارك» أجابت بضحكة صافية وأدارت وجهها إلى الاتجاه الآخر، فسألناها «طب عندك بديل لجمال»، فردت بسرعة وما زالت الابتسامة على وجهها «بديل لإيه، هو إحنا عايشين عشان نشوف بديل، إحنا ميتين».

فأجاب بيقين قاطع «طبعا ده كويس»، فطلبنا منه التوقيع على التفويض، فأجاب «لا يا حبييبى.. أنا ما امضيش إلا لما آخد فلوس.. أنا سمعت إنه بيوزع ٦ آلاف جنيه»، وعندما أخبرناه بأن حملة جمال مبارك لا توزع أموالاً، رفض التوقيع وقال: «انتوا مش بتقولوا حرية.. أنا مش هنتخبه».

مواقف تتكرر أو تتشابه، وقفنا نتذكرها ونرى ما سجلته كاميراتنا منها، ليقطع حديثنا رجلان، أحدهما يرتدى قميصا مفتوحا حتى نصف صدره، والآخر يرتدى «تى شيرت» بنى اللون ويحمل فى يده هاتفه المحمول، وسألانا «إنتوا مين وبتعملوا إيه هنا»، وعندما أجبنا بأننا أعضاء فى حملة جمال مبارك، نظر أحدهما للآخر وقال «طب كلم (فلان) بيه» وبينما انشغل أحدهما فى محادثة معاون المباحث، على حد قولهما، أظهر لنا الآخر إثبات شخصية،

وقال لنا «ما تقلقوش، إنتم تبعنا، وعندنا تعليمات بحمايتكم إذا اعترضكم أى شخص فى الشارع»، وأضاف «طالما تأييد مفيش مشاكل، من فترة قبضنا على ناس فى أبوالريش كانوا معارضة وحاجات كده، راحوا القسم وبعدين أمن الدولة»، وفى هذا الوقت كان الآخر قد بدأ مكالمته التى قال فيها «الائتلاف الشعبى المصرى لدعم جمال مبارك..

أيوه يا باشا عندى فى المنطقة فى المنيرة.. لأ تأييد يا باشا، ولا برادعى ولا الكلام ده.. أنا قلت لهم لو حد اعترضكم بلغونى على طول.. ماشى يا باشا»، وأنهى مكالمته، ثم أعطانا رقم هاتفه المحمول لنبلغه إذا تعرضنا لأى مشاكل لحمايتنا، ثم مضى بعد أن دعا لنا «ربنا يوفقكم».

[nightmare]

أيوه يا باشا عندى فى المنطقة فى المنيرة.. لأ تأييد يا باشا، ولا برادعى ولا الكلام ده.. أنا قلت لهم لو حد اعترضكم بلغونى على طول.. ماشى يا باشا»، وأنهى مكالمته، ثم أعطانا رقم هاتفه المحمول لنبلغه إذا تعرضنا لأى مشاكل لحمايتنا، ثم مضى بعد أن دعا لنا «ربنا يوفقكم».

كفاية الكلمتين دول يا مصراوية وانتى تعرفى فيه فايدة والا لأ؟

عندي دائماً أمل , بس في ظل العتمة دي صعب يتحقق, لكن أكيد هييجي اليوم اللى تزال فيه هذه العتمة .

مش معقول اننا هنفضل كده على طول , احنا وأولادنا وأولاد أولادنا ......... مش قادر أتخيل كده :sad:

مع تحياتى

[Om Zayd]

باختصار .. ما دام الناس ابتدت متخافش و عايزة تشارك ..يبقى طبعا فيه فايدة

كمان زيادة صعوبة المعيشة ممكن تخلي كتير يساند التغيير

على الجانب الآخر .. إيثار السلامة لا زال هو شعار الأغلبية .. المشكلة فيمن يقبل أن يبيع نفسه ب 6000 جنيه بل و لأقل من هذا بكثييير .. هؤلاء هم الخطر الحقيقي

[مغتربة]

ذات يوم وقف رجلا وحيدا فى الشارع

قس من اصل مجرى

و هتف بنداء واحد

يسقط الطاغيه شاوشيسكو

فى البدايه لم يلتفت اليه احد

لكنه لم يكلو لم يمل وواصل تكرار هذا النداء مرات تلو الاخرى

فاخذت الناس فى الالتفات حوله و ترديد مثل ما يقول

و قد كانت هذه هى الشراره التى اسقطت شاوشيسكو ديكتاتور رومانيا الطاغيه

الذى سامهم سوء العذاب طيله فتره حكمه

لكن تحرر شخص واحد من الخوف الهب الجميع لتقليده

دائما هناك املا حتى فى احلك الظروف

و لكن ان تحررنا من الخوف اولا

تحياتى

[masraweya]

أيوه يا باشا عندى فى المنطقة فى المنيرة.. لأ تأييد يا باشا، ولا برادعى ولا الكلام ده.. أنا قلت لهم لو حد اعترضكم بلغونى على طول.. ماشى يا باشا»، وأنهى مكالمته، ثم أعطانا رقم هاتفه المحمول لنبلغه إذا تعرضنا لأى مشاكل لحمايتنا، ثم مضى بعد أن دعا لنا «ربنا يوفقكم».

كفاية الكلمتين دول يا مصراوية وانتى تعرفى فيه فايدة والا لأ؟

عندي دائماً أمل , بس في ظل العتمة دي صعب يتحقق, لكن أكيد هييجي اليوم اللى تزال فيه هذه العتمة .

مش معقول اننا هنفضل كده على طول , احنا وأولادنا وأولاد أولادنا ......... مش قادر أتخيل كده :sad:

مع تحياتى

الأمن ليس بهذه القوة .. وقت الجد كله هيخاف على نفسه و اسمحلي أرد بمشاركة سابقة

أي تفكير في العصيان المدني في ظل وجود القبضة الحديدية لأمن الدولة يبقي ضرب من الخيال

اللي شاف مظاهرة اسكندرية و اللي حصل فيها لما بعتولها فرق الكاراتيه و مقدرتش تعمل حاجة يعرف ان الموضوع ممكن .. احنا عاملين زي الفيل اللي عشان يدربوه بيقيدوه بالحديد لفترة و بعدين يفكوه و ميهربش لانه لسة فاكر الحديد في رجليه

المشكلة فينا "احنا ملناش دعوة بالحاجات دي" مستنيين التغيير ييجي لوحده أو بايد غيرنا

الله يرحم المسيري قال لمااللي راكبين المكروباس ينزلوا ينضموا للمظاهرة بدل ما يتضايقوا انها عطلت "مصالحهم" هنقدر نغير

[Amr Radwan]

لو فضلنا خايفين مش هنعمل حاجة و هنفضل في وضعنا الحالي و عيالنا و عيال عيالنا لحد ما يجي حد او جيل يتشجع و ياخد خطوة البداية

طريق الالف ميل يبدأ بخطوة .. و الخطوأ بدأت و الحمد لله .. المهم احنا بقا نكمل مع بعض الخطوات لحد ما نوصل للهدف .. و هو حياة سعيدة و كريمة و محترمة و انسانية و رغدة لنا جميعا

[herohero]

فيه امل طبعا

لكن بصراحه الحكاية محتاجه توحيد للجهود زي ما بيقولوا كده ائتلاف للقوي المطالبة بالتغيير

ولما ارشح ابقى عاوز الجبهة ده مين يحكم فيها ده قصه تانيه

لكن الجبهة ده تقول خطتها والشخص اللي هيبقى رئيس ماهو الا منفذ لافكار وسياسات اقترحتها هذه الجبهة

انا لا اؤيد البرادعي ولا جمال مبارك والكلام ده ناس كتير عاوزاه عاوزين جبهة تغيير لها خطط ايا كان من سيقوم بتنفيذها مش مهم

فيه أمل واي واحد ينزل الشارع هيلاقي الناس بتكلم زمان الناس كانت ساكتة خالص

وبصراحه محدش يزعل مني الجيل الحالي بيتكلم غير الجيل السابق اللي بصراحه زرع الخوف فينا من امشي جنب الحيط لحد ما بقينا نمشي جوا الحيط

[Howayda Ismail]

ان شاء الله فى فايدة وفى امل لكن دون ان يتوسم كل منا فى الاخر ان يقوم بالمهمة نيابة عنه

لابد ان الجميع يتشارك ويتحد لاحداث التغيير المرجو فليس بالامانى وحدها تتحقق الاحلام

[شريف مان]

أحنا أكتر ناس بننسى

والله لو طلع قرار قبل الانتخابات بزيادة المرتبات حتى لو 10 %

الناس هتبوس ايديها شعر ودقن وهيصوتوااااا للحاج حسنى وابنه واى حد يشاورعليه كمان

أما بالنسبة للتغيير فأنا شايف لافى أمل ولا فى عمر

[herohero]

أما بالنسبة للتغيير فأنا شايف لافى أمل ولا فى عمر

والحل ؟؟؟؟

[أبوعمار]

أكيد بإذن الله فيه فايدة

والأمل كبير

أكيد كلنا حاسين ان في حاجات كتير اتغيرت

والسطح الهادي بدأ تظهر عليه آثار البركان اللي بيغلي تحته

دايما الناس بتستنى اللي يبدأ

وبعده كتير بيتشجعوا ويمشوا وراه

وطالما ناس بدأت وناس تانية مشيت وراهم

يبقى الأمل بيكبر لحد ما هايقدر يتغلب على شبح الخوف اللي جوا الناس الغلابة

اللي لسه بتجرى ورا لقمة العيش وبس

حتى لو العيش مدعم بالحديد اللي في المسامير

ومليان بروتينات اسمها صراصير

بحب قوي أشجع نفسي بالآية الكريمة

(قل يا عبادي الذين أسرفوا على أنفسهم لا تقنطوا من رحمة الله)

[shiko]

http://www.youtube.com/watch?v=mZYt0S14QH0

...ياا بلد معاندة نفسها ....

يا كل حاجة وعكسها ...

انسينى انا صبرى انتهى ...

وموش هاشوف فيكى امل

تم تعديل 4 أكتوبر 2010 بواسطة shiko

[masraweya]

السلام عليكم

إخوتي الأعزاء.. أشارككم الخوف و الأمل

مجرد أن نتخلص من الخوف بداية مشجعة جدا ..بل إن هناك من لم يكتف بالكلام

و من التاريخ و زي ما قالت مغتربة شجاعة فرد واحد قد تشعل الشرارة,, ساعتها مش هيقدروا يوقفونا

المشكلة افتقاد التنظيم و القدرة على إقناع الأغلبية الصامتة بالمشاركة و الأهم توعية الناس أن المستقبل أهم بكثييييييييييير من أي مكاسب متوهمة و زائلة .. أن ينبذوا مبدأ "إحييني النهاردة و موتني بكرة" .. ان نعمل كي يعيش أحفادنا كراما

أم زيد و شريف .. معاكم حق.. الخوف منهم و عليهم .. وهنا ييجي دورنا..أعتقدأننا جميعا يمكن أن نساهم في هذا.. نشجع من حولنا على التفكير .. عدم الركون لليأس و العجز .. ألا نصمت عندما يلقموننا حجر "مفيش فايدة" أو "إحنا مش بتوع الحاجات دي

تحياتي

[Amr Radwan]

دايما لما بفكر في كلمة "مفيش فايدة" .. اقول طيب و امتي هيكون فيه فايدة

لما يجي حد من برا و لا احنا المفروض اللي نتحرك ؟

اللي خايف يتكلم و اللي خايف يفكر و اللي بيبيع ضميره كلهم سواسية .. و مشتركين في حاجة مهمة .. و هي انهم سبب تأخرنا