ماذا فعل رجال الأعمال في مصر: قراءة نقدية للرأسمالية المصرية

[Sherief AbdelWahab]

ح آخدكم في موضوع تاني بعيد عن سكة التوريث والبرادعي والمش عارف إيه..

عندنا رجال أعمال بسم الله ما شاء الله زكايب فلوس.. وبيصرفوا ع المسلسلات وع الفضائيات وعلى برامج التوك شو دم قلبهم وقلبنا كمان ، وبيصرخوا ع الديمقراطية والليبرالية وحقوق الإنسان وهمة بيستثمروا في دول تانية مفيش فيها الحد الأدنى من مقومات الدولة زي العراق والجزائر والصومال..

إيه إسهام دول في الاقتصاد المصري؟ اشمعنى الناس دي اللي بتشتم في كل حاجة في مصر صدقت تقرير صندوق النقد الدولي اللي بيقول إن معدل النمو في مصر 7% السنة اللي فاتت؟ إيه نسبة إنجازات البهوات من المعدل دة؟

إيه الدور اللي لعبته الرأسمالية المصرية في اللي أسند ليها من أعمال البنية التحتية والمرافق؟ إيه الدور اللي لعبته في تشغيل عمالة والقضاء على البطالة؟

مش إعلامهم بيشتم في التعليم المصري اللي كلنا عارفين إنه متخلف؟ ماشي.. الجامعات اللي مولها القطاع الخاص كان ترتيبها إيه وسط أهم 5000 - ومش 500 - جامعة على مستوى العالم؟ إيه بقى اللي طوروه للتعليم؟

إيه اللي الناس دي عملته للبلد؟ هل المستوى اللي حققوه من أرباح لشركاتهم يخليهم بديل للحزبوطني؟ ولا هو نظام خايب الشتا خايب الصيف خايب الربيع خايب الخريف؟

خلص الكلام

[شريف مان]

مش إعلامهم بيشتم في التعليم المصري اللي كلنا عارفين إنه متخلف؟ ماشي.. الجامعات اللي مولها القطاع الخاص كان ترتيبها إيه وسط أهم 5000 - ومش 500 - جامعة على مستوى العالم؟ إيه بقى اللي طوروه للتعليم؟

أحييك استاذ شريف على موضوعك المميز

انا شايف ان اى رجل اعمال زيه زى اى حد عايز يكسب مش هدفه لا تعليم ولا اقتصاد دولة ولا اى حاجة رقم واحد واتنين والف المكسب زى ناس كتيييييييير

وبالنسبة للجامعات الخاصة فهدفها الربح وماشاء الله بتحقق ارقام فلكية يعنى الهدف الاساسى من الاستثمار مش الارتقاء بالتعليم انما الفلوس

وفيه بردوا رجال اعمال كتييير جدا محترمه وهدفها الصالح العام بجانب المصلحة الشخصية

تحياتى