أكلات غير تقليديه

[MuslimaEgyptian]

:angry: cr((: yaw:

كلنا نأكل أكلات معتاده كمصريين وعرب...ملوخيه، مكرونه بالبشاميل،

فول بالزيت والليمون، ومحشى ورق عنب، إلخ.

تقريبا طريقه الطهى والتحضير واحده وإن إختلفت بعض المكونات بدرجات قليله(رز بالشعريه بدل رز أبيض ساده وهكذا)..ولكن هل حد لأى سبب بيحب يآكل

اى من الأكلات المعتاده بطريقه مختلفه؟ أو بيطبخها بطريقه غير تقليديه؟

أنا مثلا، لازم آكل الطعميه بالكاتشب. متنفعشى من غيره et:(

الإستثناء بيكون شراء سندوتش جاهز من مصر.

فيه حد كده ؟ :)

[Farah]

بحب اعمل شندوتشات كبده مقليه وعليها شرايح جبن رومي ولو مفيش جبن رومي مكلش كبده

ساعات اعمل مكرونه عاديه بس مشتشطه جدا واعملها سندوتش

انا عارفه ان متجيش بس انا زمان وانا صغيره معرفش ااكل المكرونه الا في السندوتشات فدلوقتي احن الي هذه الايام فبحب اداري العمليه اني اشتشط المكرونه

[Salwa]

غاليتى الفاضلة مسلمة مصرية ..

صدفة غريبة لأن انا ايضا احب اعمل الفلافل بالحمص وبحب آكلها بالكاتشب ....

وبرضه فيه حاجة تانية ......انا بحب آكل المربة مع الجبنة بدون ملح ...بيتهيألى فى مصر اسمها جبنة ريكوتا ...مش مع الزبدة ..

جربى كدة ...!!!.وادعى لى ..

طريقة عمل الكوسة بالباشميل ...ايضا انا لا اقلى الكوسة اولا ..لكنى اسلقها نصف سلق ....وبهذا تكون اخف كثيرا والذ طعم ......

طريقة عمل البصارة .// لو صادفت يعنى واستطعت الحصول بالصدفة على فول مدشوش //......المفروض بتضعى مقدار ملعقة ملوخية ناشفة او بقدونس .......

واللى بيحصل ان زوجى كان متعود ان والدته تضع طماطم مع سلق الفول المدشوش........وانا شعرت ان حاتحصل مشكلة لو كل مرة اصمم على ان طريقتى صح ........ولهذا وصلت لطريقة ترضى جميع الأطراف وخصوصا ان البصارة عزيزة قوى هنا ..

اضع بقدونس وطماطم ..........وبرضه جربى .....وادعى لى .

ايه كمان ؟؟؟؟

بما ان لا يوجد قلقاس هنا ........فأنا جربت اعمل البطاطس بالخضرة مثل القلقاس بالضبط ........وطبعا بتكون ..100%.

البطاطس المقلية .....اضع بجانبها صلصة مكونة من كاتشاب وعليه مايونيز وعليه تاباسكو / صلصة حامية /.وملح .....

جربى ....دى بقى خطيرة ...

كفاية كدة .....

صباح الخير......

[فــيــروز]

يبدو ان الطعميه ستتوج ملكة هذا الموضوع yaw:

انا زمان كان لازم آكل الطعميه مع الشاى !! لانى كنت باشرب الشاى بدل اللبن اللى الاطفال الرضع بيتغذوا بيه :) لا دى بس كنايه عن انى باشرب شاى من قديم الازل tea))(: المهم يعنى ان كان لازم آكل الطعميه بالشاى يعنى الطعميه بدل البسكوت كده !! وكان والدى الله يرحمه يستغرب جدا من ذوقى فى الاكل :) وانا دلوقت كل ما افكر اكرر الحكايه دى اقرف جدا من ذوقى و اقول ايه العك ده :angry:

بمناسبة اكل المربى مع الجبنه et:( والدتى كانت تعمل سندوتشات حلاوه بالجبنه !! cr((: او سندوتشات موز !! بالذمه حد يعمل الموز سندوتشات !! :)

تم تعديل 13 يونيو 2004 بواسطة فــيــروز

[Farida]

سندوتشات موز

:angry: cr((: yaw:

فكرتينى يا فيروز والدى الله يرحمه كان بيحب قوى البسطرمه بالدمعه .....و كمان كان يضع فص البرتقال مع ربع رغيف بلدى وكان بيقول انه بيحب الحكايه دى علشان زمان فى المدرسه كانوا بيدوهم وجبه فكان الطلبه بيعملوا الحكايه دى علشان بتشبعهم

[MuslimaEgyptian]

ردودكم كلها كانت لذيذه جدا وإستمتعت بهم جدا، أشكركم على المشاركات :)

كبده بالجبنه الرومى؟؟؟؟؟؟؟؟؟؟ !!! cr((: سندوتشات موز؟؟؟؟؟؟؟!!! :angry: وبسطرمه بالدمعه!!!!! yaw: الموضوع فعلا قلب سمك لبن تمر هندى أكثر مما توقعته:)

العزيزه أبله سلوى (هل يضايقك هذا اللقب ككنايه عن الاخت الكبرى، حاسه انى بكبرك بماما سلوى) :

إن شاء الله نجتمع يوما على وجبه طعميه بالكاتشب محصلتش :)

أما عن باقى الأكلات، فدى عاوزالها قاعده لأنهم مرحله advanced اوى عليه..خصوصا انى عمرى ما عملت فول مدشوش..لسه فى مرحله أكله بس

et:( والبصاره بنآكلها مره كل 20 سنه :)

عارفه يا فرح، بمناسبه سندوتشات المكرونه، انا عندى عم كان بيآكل الكشرى فى سندوتش أيام الجامعه :)

~*~*~*

طب حد بيشرب الملوخيه بالمعلقه؟ معظم المصريين بياكلوها بالعيش ولكن

منذ ان رأيت قريب لنا بيشربها بالمعلقه وعجبتنى اوى كده ومن ساعتها لم أستطع العوده للعيش :)

[mnman]

انا جدتي الله يرحمها كانت تاكل المكرونة بالعسل الاسود!!!! et:( :)

الاخت مسلمة: انا والدتي محترفة اكل ملوخية بالمعلقة!! وكمان اية بتحط عليها شطة ولمون!!! انا كمان اتعودت علي كدة منها....وكل ما اتعذم علي ملوخية يقعد الناس تبصلي من فوق لتحت زي مكون باكل بأيدي مش بمعلقة!!!

انا كمان بحب البامية بالشطة واللمون!!! وبحب الشيبس سندوتشات :angry: cr((: بجد جربوا الشيبس مع العيش البتي بان خاصة لو صابح هممممممممممم!!!!

وبحب كمان اقلي الموز في الزبدة (همممممممممم) !!!!

منمان طباخ وذواقة!!! yaw:

تم تعديل 13 يونيو 2004 بواسطة mnman

[فــيــروز]

انا جدتي الله يرحمها كانت تاكل المكرونة بالعسل الاسود!!!! :)  :)

et:( لأ صعبه اوى cr((:

انا كمان بحب البامية بالشطة واللمون!!!

لأ دى قديمه :) وملوخيه بالدمعه :)

نسيت اقول حاجه yaw:

انا باحب آكل الفول بالطعميه على بعض :angry:

يعنى اجيب حتة العيش اللى هاكل بيها الفول و اقطم معاها حتة طعميه .. لانها عزيزه علىّ جدا جدا جدا :)

تم تعديل 13 يونيو 2004 بواسطة فــيــروز

[الأفوكاتو]

يمكنكم أكل ما تريدون, و لكن هناك بعض النصائح التى يمكن إتبعاها, و أكل كل ما تتطلبه شهيتكم, فإذا وافقتم على محاولة إتباع هذه النصائح, سوف اذكرها لكم, و لكن يلزم التوقبع أولا.

من سيوقع الأول؟؟

[فــيــروز]

يمكنكم أكل ما تريدون, و لكن هناك بعض النصائح التى يمكن إتبعاها, و أكل كل ما تتطلبه شهيتكم, فإذا وافقتم على محاولة إتباع هذه النصائح, سوف اذكرها لكم, و لكن يلزم التوقبع أولا.

من سيوقع الأول؟؟

:angry:

طيب انا هاوقع باسم فيروز عشان لو ماعجبنيش الكلام آخد الاكل على البطاقه الشخصيه واسمى فيها مش فيروز yaw:

الموقعّه أدناه : فيروز cr((:

[الأفوكاتو]

يا اخت فيروز,

كما تعلمين, فزوجتى طبيبة, و قد تعلمت منها اشياء كثيرة, و كان آخرها نظام بسيط يمكن إتباعه بسهولة , بحيث بمكن تناول جميع الأطعمة, و لكن بترتيب معين.

و لقد جربت هذا النظام, و لا تترتب عليه القيود التقليدية التى يتطلبها الرجيم, و يمكن إتباع هذا النطام مدى الحياة, و لن تندموا:

أولا, نحتاج لفهم العناصر التى يتكون منها أى طعام, فكما نعلم , هناك مواد نشوية, مثل الماكارونة, و البطاطس, و العيش,و السكر... الخ

ثم هناك المواد البروتينية, مثل الحوم بجميع أنواعها, و منتجات الألبان, مثل الجبن, و البيض,

ثم المواد الدهنية مثل الزيوت, و الدهون, و الزبدة. و السمنة البلدى... الخ

ثم هناك الفواكه, التى قد يحتوى بعضها على نسبة سكرية أكثر من الأخرى.

كذلك توجد الخضروات, التى نعرفها جميع, باستبعاد البطاطس, البسلة, فهما يحتويان على كميات كببرة من النشويات فى شكل سكر و نشا.

كذلك يحتوى الموز و البلح الناشف على كميات عالية من السكرو و أيضا المانجة المستوية.

متى فهمنا هذه المجموعات, هناك تركيبة سحرية:

فى الطقة الواحدة, يمكنكم الجمع بين المواد الكربوهايدرية( نشوية سكرية) مع أية خضروات

فى الطقة الواحدة, يمكنكم الجمع بين البروتينيات, و الخضروات

فى الطقة الواحدة يمكنكم الجمع بين جميع أنواع الخضروات و الفاكهة, و بعض البروتينيات

فى الطقة الواحدة, يمكنكم الجمع بين الكربوهيدرات و الخضروات و الفاوكه,

ولكـــــــــــــــــــــــــــــــــــــــــــــــــــــــــــــــــــــــــــــ

ـــن

( لا يجوز الجمع بين البروتينيات و النشويات (الكربوهيدرات) لأسباب كيمائية

و نظرا لأن البقول تجمع بين النشويات, و االبروتينيات, فيجب الإقلال منها, فضلا عن أن كثرتها تسبب بعض أمراض النقرس, و أيضا زيادة غازات المعدة( يمكن شرح ذلك فى مقال مستقل)

جربوا هذه الطريقة التى لا تضع قيودا صعبة, مع مراعاة عدم الزغفة و العين الفارغة, و ملأ البطن بدون داعى, و سيكون كل شيئ على ما يرام.

بالهناء و الشفاء.

[se_ Elsyed]

جربوا هذه الطريقة التى لا تضع قيودا صعبة, مع مراعاة عدم الزغفة و العين الفارغة, و ملأ البطن بدون داعى, و سيكون كل شيئ على ما يرام.

يا متر كلام حضرتك وكلام حرمكم المصون على العين والراس ... لكن إحنا شعب بيحب يلهط ويلغوص ... يعني أنا لا اتصور نفسي أقعد أكل بمزاج وانا قاعد محفلط ولابس سموكن وعمال أقسم الأكل ده نشويات وده كربوهيدرات وده ثاني أكسيد الكبريت ...

إتكل عالله وإدخل بقلب جامد في أي أكل وما يهمكش حاجة أبداً ... وإدعيلي

[se_ Elsyed]

من ساعة ما أُعجبت بالنداء الشهير لبياع البطاطا اللي كان بيعدي قدام البيت وأنا في إبتدائي وبيقول " معسله يا بطــــــــــــــــــــيطه " وانا حبيت البطيطة قصدي البطاطا .. لكن مزاجي الغريب والذي يتهمني فيه البعض بالجنون وهو إني لا أستطيع ان أستسيغ البطاطا إلا إذا وضعت عليها بهارات وملح .

كذلك لا يمكن ومستحيل أعرف اكل كنافة أو كيك أو بسبوسة إلا مع الشاي .. ودائماً أشعر بإني لو أكلتهم مباشرة ممكن أزور وأموت .

بالنسبة للفاكهة .. فلا أأكل البلح أو التفاح بقشرة .. لازم أجيب سكينة وامسك بلاحية بلاحية وأقشرها وكذلك التفاح ...

[Farah]

معظم المكسيكان لازم يحطو ملح علي

المانجي،،،البطيخ...الشمام....

يقطع البطيخ شرايح او المانجي او الشمام

ويرشوا عليها ملح وساعات شطه

بنتي اتعلمت منهم حكاية الملح علي البطيخ

[ragab2]

لا

أتناول منتجات اللحوم النيئة .. نيئة مثل البسطرمة واللانشون لاحتوائها على نسبة كبيرة من التلوث والبكتريا بسبب طريقة العرض والتخزين فى مصر

ولكنى أحب البسطرمة بالبيض حيث تتعقم البسطرمة بعد تسويتها على النار قبل صب البيض عليها

لا أميل كثيرا للبطاطس المطبوخة بالدمعة وكذا الكبدة

أحب أكل الجبنة البيضا مع زيت الزيتون

وساندويتش الفول مع قضمة طعمية بيتى سخنة مثل فيروز

حيث لا نشترى طعمية مقلية خارج البيت

أفضل الخبز على الأرز والمكرونة

قللت كثيرا من تناول البيض فى هذه السن حيث كان طعامى المفضل ضمن الفطار والعشاء

حرمنا من أكل المخ بسبب جنون البقر

[se_ Elsyed]

بنتي اتعلمت منهم حكاية الملح علي البطيخ

اتاريني ماصدقتش واحد زميلي عندنا في قسم تسليم البضائع لما حكالي بإستغراب إنه شاف عمال المخازن جايبين بطيخ وحطين عليه شطه ونازلين لهط فيه .. فانا تخيلت المنظر .. بطيخ بالشطة !!! إزاي تيجي دي ؟

للناس في ما يأكلون مذاهبُ ..

في السوبر ماركت هنا موجوده المانجو المخللة والمشمش كمان .. لكن مابقربش لهم ... اللي نعرفه أحسن من اللي مانعرفوش .

- في بعض مطاعم الفول هنا حاجة إسمها "المِصلح " وده عباره عن فول على جبنة بيضا مبشورة على بيض على طماطم على بصل .. خلطبيطة يعني .. بس طعمه جميل ومش بطال .

- في حاجة تانية إسمها " معصوب " ودي عبارة عن رقائق فطائر وبيفرموها مع موز في المفرمة .. وفي النهاية يا إما يضعوا عليها عسل أبيض أو قشطة وساعات يفرموا معاها تمر ... طعمها حلو جداً وبتلكم الواحد لكمه جامدة .

- بالنسبة للطعمية أم حمص دي .. فأنا بصفتي طعمجي قديم فلا أحبها لأن بعد دقائق بسيطة بتتحول إلى كائن متيبس ... فمازالت طعمية الفول المدشوش تتربع على العرش .

- اول مره شوفت المربى على الجبنه .. كان واحد صديقي - الله يمسيه بالخير - كنا أيام العزوبية ولقيته بيعمل سندوتش جبنة نستو وراح حاطط عليه مربى .. فقولت له إيه القرف ده ؟ فقال جرب كده بس .. وصراحة نفسي ماعت وماقدرتش أجرب الإختراع ده .

- شفت ناس هنا بيشربوا اللبن الرايب على السفن آب .. قال ده يعني هايعمل إختراع فعال للهضم !!! .

- ناس كتير منهم اليمنيين والسعوديين وبعض أهل الشام بيعملوا محشي الكرنب بطريقة غريبة لو شافتها واحده ست مصرية هاتنط في كرشهم .. فدول بيجيبوا خلطة المحشي ويضعوا في الحلة راق رز وراق ورق كرنب وهكذا .. ويطبخوها ويعيشوا معاها ..

:) .

- برضوا من الاكلات الخزعبلية اللي كلتها هنا هي " كيكة الرز " وهي عبارة عن رز مطحون لغاية ما يبقى زي الدقيق وبعدين يتعمل كيكه ... أكلت حته وقعدت تلات أيام عيان .

[الأفوكاتو]

عزيزى سى السيد,

تجريد الفاكه من قشرها يحرمك من أهم عناصرها الغذائية, و التى أيضا تفيد عملية الهضم, و أشياء أخرى تلى الهضم, و أنت تعرفها, حيث تشعر بالراحة و الهدوء بعد ذلك.

نصيحة طبية.

[فــيــروز]

ولكنى أحب البسطرمة بالبيض

حرمنا من أكل المخ بسبب جنون البقر

وانا كمان كنت باحب البسطرمه اوى brd::

وبطلناها بردو بسبب جنون البقر cbyb:

[MuslimaEgyptian]

بالنسبة للفاكهة .. فلا أأكل البلح أو التفاح بقشرة .. لازم أجيب سكينة وامسك بلاحية بلاحية وأقشرها وكذلك التفاح ...

طيب التفاح ومفهوم، ولكن مش صعبه شويه تقشير البلح الأحمر والأصفر؟ ده على بال ما يتقشر تبقى البلحه إنتهت blw)

وانا كمان كنت باحب البسطرمه اوى 

وبطلناها بردو بسبب جنون البقر 

إشمعنى البسطرمه بالذات يا فيروز ؟...هل على كده بطلتوا فى مصر تاكلوا اللحوم كلها؟

~*~*~*~*

أكله غير تقليديه أخرى:

ناس أصدقاءنا مش يحبوا القلقاس بطريقه طبخه المعتاده بالسلق، فبيعملوه زى صينيه البطاطس وبيقولوا عليه أطعم..

[Farah]

من الاكلات اللي اخترعتها وهي غريبه عن النظام المصري

الفراخ مخلوطه بالبتنجان المقلي وطعمها حلو جدا