حسام حسن يعتذر عن الأنضمام للمنتخب

[كاريمو]

:angry: في قرار غير مفهوم بالمرة وقد يقضي على تاريخ حسام حسن بالكامل أعتذر حسام حسن عن الاستمرار مع المنتخب المصري .

وجاء هذا القرار بعد عودة بعثة منتخب مصر الى القاهرة قادمة من الخرطوم وقد عبر حسام عن غضبه لعدم مشاركته في مباراة السودان .

ومهما كانت الأسباب هذه المرة فلن يتعاطف أحد مع حسام حسن لان ما يحدث أصبح كثيرا ولا يتحمله العقلاء .

فحسام حسن كنجم كبير وكابتن منتخب مصر يجب ان يكون أكبر من هذه الأمور البسيطة وليس حسام بأكبر من او احسن مستوى من ( هنري _ او توتي _ او رونالدو ) وكل هؤلاء الاعبين يلعبون او لا يلعبون ولكنهم نجوم .

وحسام لم يكن في حاجة لمثل هذا الموقف في هذا التوقيت بالذات وأعتقد ان حسام قد خانه ذكائه في في هذا الوقت .

وعلى الرغم ان المنتخب قد قدم عرض جيد امام السودان وكان هو الأفضل ووضح تماما مدى تفاهم الجميع كجهاز فني ولاعبين ولكن حسام حسن وكأنه استكتر علينا فترة صغيرة من الهدوء نعيشه كلنا .

وعلى الرغم من اني من عشاق حسام حسن ولكن هذا لا يعني ان اوافقه على ما حدث ولا ان اصمت تجاه ذلك .

وبعيدا عن العواطف والمجاملات كلمة اقولها لكابتن حسام حسن .

كابتن حسام حسن ... بدأت تخسر تاريخ كبير كتبته بعرقك وكفاحك من اجل ماذا لا نعلم وأعتقد انك نفسك لا تعلم .

الخبر منقول من يلاكوره

ايه رأيكم؟

[Lighthouse]

اولا مرحبا ياكاريمو نورت المنتدى

ولو اني مش غاوية كورة لكن قلت اقول رايي واتعشي في بيتنا B)

الامثلة التي اوردتها اخي الكريم للاعبين في بلاد الفرنجة حيث يختلف كل شيئ تماما عن مصر المحروسة بما في ذلك اخلاق اللاعبين

فسعادة حسام باشا حسن واخوه طايحين في الخلق اشي شتيمة واشي اعتذارات

ومن حقهم يتبددوا علينا ويطلعوا لنا لسانهم كمان lo::

ماهو الهرم مقلوب والصفر الكبير يبدو غير كافي علشان كل واحد يعرف حجمه الحقيقي

بالنسبة للاعبينا الجبارين فكل لاعب بمجرد مايلعب مرتين تلاتة والبلية تبتدي تدور معاه تلاقيه ابتدا يمشي في طريق الهلس ولا تدريب ولا دياولوا والمدرب مش عاجبه يشرب من اقرب بحر هو والنادي والمنتخب وكل حاجة .. طبعا مش لعيب ماحصلش ومافيش حد يقف قصاده

فغير مستبعد ان يتصرف حسام حسن او عبد العظيم حسن او اي لاعب حسن بنفس التصرف واللى مش عاجبه ( احنا المشجعين يعني lo:: ) يشرب اي حاجة تطرى على قلبه علشان ماتجيلوش نقطة lo::

وبالهنا والشفا يامصر

[فــيــروز]

هو حسام حسن عنده كام سنه؟ lo:: lo::

[amir]

من غير حسام حسن , مصر فازت 3 / صفر

اعتقد انه آن الآوان لكى يعتزل و يخلصنا

[linux]

الحدوتة بتاعت حسام حسن بوخت قوي. بصراحة ده أسفاف.

و طبعا، يتحمل جزء من الخطأ الجمهور نفسه و الأعلام و خلافه. حسام حسن ليس قدوة يحتذي بها و مع ذلك الطبل و الزمر و الألقاب جاهزة طول الوقت.

أنا شخصيا عمري ما أحترم لاعب أخلاقه مش كويسه، يعني أكره ريفالدو من يوم مباراة البرازيل الأولي مع تركيا في كاس العالم الأخير. مايعجبنيش ميدو للغرور اللي وصل له.

بأختصار، أنا شايف اللي بيبيع و يشتري في منتخبنا نقول له ماتلزمناش و خد الباب في أيدك. حسام حسن فاكر أنه الكون الكروي يدور في فلكه!

أي لاعب لازم يعرف أنه شرف له أن يمثل بلده سواء كان أساسي أو أحتياطي في الفريق. و اللعيبة المصرية لازم تتعلم التيم ورك و أن القرار أساسا قرار المدرب. و لا حسام حسن شايف نفسه أحسن من مايكل أون أو زيدان أو ... أو ... أو ....

مع الف سلامة يا حوس و ماتنساش تشتري لب و تقعد تقزقز قصاد التلفزيون و أنت بتتفرج علي ماتشات المنتخب ... اللي هأيتأهل لكاس العالم أن شاء الله.

[disappointed]

الموضوع مسـّخ و بوّخ قوى

مش معقول يعنى يكون تسوبيل و كابرال و فنجادا و تارديللى كلّهم متآمرين عليه

ممممم....

شامم ريحة عقدة إضطهاد من النوع الفاخر

[hamo90]

حسام مش قادر يفهم أن وجوده في المنتخب شرفي وحركة ذكية جدا من سنيور تارديللي الي محبش يخش في أفلام ومووايل مع الصحافة خد حسام ., ليه ماخدتش حسام ؟

والافلام الي الكل عارفها بس الي صعبان عليه فعلا في الموضوع كله حسام

خسر حاجات كتيرة جدا

أولها تاريخه وأحترام الجماهير

وأهم حاجة خسرها وبيخسرها حسام يوميا هي فلوسه الي بيصرفها علي الحقن بتاعت المنشطات الي قرب يفلس من كتر ما بيشتريها ( لاعب عنده 38 سنة يقدر يعمل السبيرنتات دي كلها ما أظنش ؟)

وأعتقد كفاية عليه بقي كده ويعتزل ويحافظ علي الي باقي من تاريخه

ملحوظة :- حسام من أول الموسم وهو من أهم عشاق الدكة في الزمالك , ازاي تارديللي يعتمد عليه في ماتش مهم زي كده وحالته الفنية مش كويسة

ملحوظة 2 :-

تارديللي أتفق مع حسام عل أنه يشترك مع المنتخب في تدريبات وماتشات ودية بس الماتشات الرسمية المدرب هو الي هيحدد من الي هايلعب من اللاعبين علي حسب الحالة الفنية والبدنية

وحسام وافق علي الكلام ده كله بس ساعة الجد مرضيش حتي يسلم علي زملائه بعد الماتش ويهنئهم بالفوز!!!!!!!!!!!!

hamo

fwrk:

تم تعديل 9 يونيو 2004 بواسطة hamo90

[se_ Elsyed]

هو حسام حسن عنده كام سنه؟  :huh:  :P

38 skm ;) mfb:

[se_ Elsyed]

مشكلة حسام وأبراهيم حسن تتلخص في " الأضواء .... مش سلاح التليمذ ;) " فبعد ان كانت الأضواء مُسلطة عليهم منذ أن لعبا كرة القدم من سنة 86 أخذت في الإنحصار كوضع طبيعي للكون كله ... فلو دامت لغيرك لما وصلت إليك ... وهما لا يريدا الإعتراف بذلك وعملوا بالظبط زي مريم فخر الدين والشحرورة صباح اللي شفت برنامج بيعملوه عنها أعتقد في ال أم بي سي والمذيعة جاية مسنداها لأنها مابقيتش تقدر تمشي ومع ذلك لابسه فوق الركبة وحطه فول ميك آب ولا بنت في العشرينات ومع ذلك لا مريم ولا الشحرورة عايزين يعترفوا إن اخرهم كان فيلم الأيدي الناعمة :P ...

كذلك حسام وإبراهيم لسه فاكرين إنهم أحسن من أي ناشيء عنده 20 سنة وأنهم ممكن يؤدوا 90 دقيقة الآن مثلما كانا سنة 86مثلاً ..

وعلى فكرة إذا لم يعترف الشخص المصاب بهذا الداء ويحاول تقبل الواقع أو تلقي العلاج فممكن يتجنن ويمشي يكلم نفسه في الشارع زي مريم فخر الدين ما بتعمل كده دلوقت .

[Mohammad Abouzied]

المشكلة مش في سن حسام حسن كام ولكن المشكلة هي كمية العطاء الي ممكن يعطيها حسام حسن في الماتش ودي سهلة على كل مدرب يقيسها ويعرف ويقدر المستوى اذا كان يقدر يشارك ام لا

لكن في ظروف تانية اخرى وهي مستوى الفريق كله في الاداء ممكن يزيد بنزول حسام حسن او يقل

ودي هي مشكلة مدرب فريق انه يراعي حالة الفريق النفسية من نزول لاعب معين معاه هل هو ايجابي ام سلبي على الفريق

اعتقد ان المدرب الناجح يقدر بسهولة يقيس هذا بسهولة ويقرر

انا احيانا كنت اضحي بلاعب كفأ علشان احافظ على قوة دفع عند اللاعبين خاصة لو كان اللاعب غير مقبول من الجماعة

اعتقد ان الجهاز الفني للفريق علية يدرس هذا كويس ويساعد المدرب على اتخاذ الاجراءات السليمة ولكني واثق ان الجهاز الفني مثله مثل غيره في مصر قلته افضل

[disappointed]

والله يا سى السيّد أنا من 3 سنين و أنا حاطط إيدى على التشخيص اللى أعتقد أنه صحيح لحالة إبراهيم و حسام حسن

لعيب الكورة اللى متعوّد على الأضواء أثناء اللعب لمّا يبطّل بيكون قانع إلى حد ما بكثافة أقل من تسليط الأضواء عليه (والحاجه اللى ممكن تحقق ده ليه هو إنه يفضل عايش فى جوّ و محيط مجتمع الكورة)

طيّب إيه اللى ممكن يعمله لعيب الكورة لمّا يبطّل و يخلّيه على أطراف بؤرة الضوء (حيشتغل إيه يعنى)؟؟؟

تعالى نشوف كده مع بعض :

يا إمّا حيتّجه لسلك الإداره أو التدريب أو الإعلام

مبدئياً......فتح كلام يعنى..... كل هذه الوضعيّات المهنيّة تحتاج إلى ذكاء إجتماعى .... وهما يفتقدانه بشدّة (واضح طبعا من تعاملاتهما و تصرّفاتهما التى تتسم بالتهوّر و الرعونة)

طيب ... نمسكها بقى واحده و احده

سلك الإدارة (سواء كمدير كرة أو عضو مجلس إدارة نادى أو عضو إتحاد....إلخ) ما ينفعش إبراهيم و حسام حسن نهائيّا... لأنّهم مش Presentable.... يعنى و لا بيعرفوا يلبسوا لبس شيك و لا بيعرفوا يتكلّموا كويّس ولا ليهم شخصيّة دبلوماسيّة...ده غير إنهم إستحالة يدخلوا سلك الإدارة أو مجلس النادى الأهلى بعد ما سابوه بهلّيلة فى نفس الوقت اللى مش من المنتظر إنهم يدخلوا سلك الإدارة أو مجلس الزمالك متجاوزين أولاد النادى اللى متربّيين فيه

سلك التدريب ما ينغعهومش برضه....لأنهم صحيح لعيبة دوليين و قدام و أصحاب خبرة لكن لمّا بيتكلّموا فى النواحى الفنّية لماّ بيتعمل معاهم لقاءات بعد الماتشات بتكتشف إنهم فى الأونطة من الناحية الفنّية و التحليليّة و التكتيكيّة , ناهيك عن إن شخصيّتهم ما تنفعش تقود فرقة من خارج الخطوط ( حيضربولهم لعيب أو إثنين على الأقل فى كل تمرين , ده غير بقى المشاكل مع الحكام و الشلاليت مع مراقبى المباريات و البوكسات مع الصحفيين و الإشتباك كل شويّة و الثانية مع أعضاء مجلس الإدارة اللى ممكن ينتقدوهم بعد الماتشات)...... بالإضافة لأنهم مش من النوع اللى ممكن يروح يأخذ دورات تدريبيّة برّه مصر فى علم التدريب لأنهم ما معهومش لغة و مستواهم التعليمى منخفض

سلك الإعلام لا يصلح نهائيّا لهم.......يعنى ما ينفعوش معلّقين أو محلّلين فنّيين فى إستوديو تحليلى أو مقدّمى برامج رياضيّة..... دى كلّها محتاجة نبرة صوت مميّزة (مش صوت مبحوح زيّهم) و واحد بيعرف يتكلّم كويّس وعلى قدر من الثقافة و الشياكة و حضور الشخصيّة..... وطبعا ما ينفعوش يكتبوا فى الصحافة ( على الأقل على مستوى الثقافة العامّة)

وبهذا......... ونظرا لأن حسام و إبراهيم حسن يعلمان تماما أنهما يفتقران إلى الإمكانيّات و السمات المطلوب توافرها للإتجاه إلى هذه المهن التى يمكن إمتهانها بعد الإعتزال و التى توفر لهم وجودهم داخل محيط أضواء مجتمع الكرة , فإنهما يعلمان أن ممارسة لعب كرة القدم هو آخر تواصل بينهما و بين أضواء الساحرة المستديرة إذ أنهما بعد الإعتزال لن يجدا أمامهما سوى إستثمار ما جنوه من أموال أثناء اللعب فى مشاريع من عيّنة: سوبر ماركت... نادى فيديو......مطعم تيك أواى......بناء عقارات و تقسيم أراضى......... كده يعنى....... وكلّها إتجاهات ستأخذهم خارج محيط و جو مجتمع كرة القدم

وهذا فى رأيى هو سبب تشبّث حسام و إبراهيم حسن باللعب و عدم الإعتزال حتّى آخرذرّة أكسجين فى خلايا جسديهما (يا راجل ده إبراهيم حسن كان ناقص يطلع على الخط فى ماتش الــ6/1 يطلب من دكّة الإحتياطى يرموا ليه بخـّاخ الربو بدل ما يرموا ليه قزازة ميّه)

تم تعديل 9 يونيو 2004 بواسطة disappointed

[فــيــروز]

38 skm

عجبا !!

كان فيه كورس تحليل نظم خدناه من اكتر من سنه كان الدكتورالى بيدرسه لينا بيقول ان الانسان فى الخارج بعد سن 35 مايقبلوش يشغلوه مبرمج mfb: رغم اننا هنا فى مصر ممكن تلاقى ناس مقتربه من الخمسين ولاتزال تمارس هذه المهنه ;)

واعتقد و الله اعلم ان هناك بالفعل مهن معينه ينبغى ان يتوقف الانسان عن العمل بها عند اقترابه من سن معين و اعتقد 38 سنه بالنسبه للظروف التى يعيش بها اللاعبون فى بلادنا سن كبيره .. يمكن فى الغرب ماتعتبرش كده لاختلاف ظروف المعيشه فالواحد يبقى عنده 38 سنه ولسه فيه نفس !!انما هنا فى مصر و كمان مع لاعبى الكره اللى ممكن يتعرضوا لشتى انواع التجاوزات الغير مقبوله من رياضيين "شرب خمور و خلافه" صعب الواحد يوصل 38 ويكون لسه فيه نفس :P لهذا انا بالفعل متعجبه من استمرار الاخوين حسن فى الملاعب حتى الآن !! :huh:

إذ أنهما بعد الإعتزال لن يجدا أمامهما سوى إستثمار ما جنوه من أموال أثناء اللعب فى مشاريع

اعتقد ان حسام حسن فاتح محل كوافير رجالى rei:: .. بينافس س.س. يعنى :D

تم تعديل 9 يونيو 2004 بواسطة فــيــروز

[se_ Elsyed]

محبط كتب

إمّا حيتّجه لسلك الإداره أو التدريب أو الإعلام

مبدئياً......فتح كلام يعنى..... كل هذه الوضعيّات المهنيّة تحتاج إلى ذكاء إجتماعى

إنت بتلقح كلام كده على أحمد شوبير ... بالصلاتو عالنبي واللهم لا حسد .. دلوقت لو فتحت حنفية المطبخ ممكن تلاقيه نازلك منها ... إيش عضو في إتحاد الكورة وفي ملف الزيرو وإيشي معلق رياضي وكاتب صوحفي وشكله مشارك في قناة دريم وسمسار لعيبة وقباني وساقط توجيهية وعليه كرافتة ترد الروح . :P

اعتقد ان حسام حسن فاتح محل كوافير رجالى  .. بينافس س.س. يعنى

وانا أقول الراس دي شفتها فين قبل كده ؟... اتاري الدم بيحن والرؤوس على أشكالها تقع afr2:

[Mohammad Abouzied]

فيه لعيبه وصلت سن الاربعين ولازالت تلعب مثل بكنباور وبليه حتى ماردونا لازال يلعب حتى الان مع ان عمره وصل الاربعين سنة

وفعلا مشكلة مستقبل لاعب الكرة او اي لاعب تاني وفي اي لعبه مشكلة عويصه لما يبطل يلعب ويتركن على الرف

واعداد اللاعب ليكون مدرب مش مسئلة سهلة وحتى وظيفة المدرب من اصعب المهن التي اعتقد لا حسام حسن ولا ابراهيم حسن ممكن يتولوها لصعوبة التعامل مع الشباب في تدريبهم

وانا شخصيا وجدت صعوبة بالغة في تدريب لعبة فردية مثل الجودو وقدمت فيها تضحيات كبيرة من وقتي ومالي ليخرج فريق قوي ممكن ينافس على بطولات دولية ولكني في الاخر فضلت الاعتزال عن التدريب بالرغم من الهالة الاعلامية التي نلتها هنا في السعودية وفضلت الاهتمام بنفسي وبمنزلي واحوالي خاصة اني اهملتهم كثيرا عند امتهاني مهنة التدريب هنا

[فــيــروز]

فيه لعيبه وصلت سن الاربعين ولازالت تلعب مثل بكنباور وبليه حتى ماردونا لازال يلعب حتى الان مع ان عمره وصل الاربعين سنة

ايوه يا استاذ محمد بكنباور و غيره من اللعيبه الجادين كانت كرة القدم بالنسبة لهم احتراف حقيقى .. مهنه يبذلون كل الجهد للنجاح فيها و يلتزمون بسلوكيات تتيح لهم التالق بها

لكن عفوا يعنى لعيبتنا المحترمين اللى كثير منهم للاسف ليسوا على هذا المستوى من الالتزام الاخلاقى صعب يوصلوا لسن الاربعين ويكون لازال لديهم ما يعطوه فى الملاعب :P

وبعدين مارادونا فى العنايه المركزه حسب ما سمعت ;) :huh:

[Mohammad Abouzied]

انا بتكلم عموما وليس بالتحديد لشخص معين ويمكن يكون فيه واحد مصري يلعب بنفس القوة مثل بكنباور في المستقبل مين عارف ؟؟؟

المشكلة رغم المكاسب الكبيرة الى بيكسبها بعض اللاعيبه اثناء حياتهم الرياضية الا انهم في الاخر لا يستطيعون الحفاظ عليها وتضيع كلها في حياة البذخ التي تعودو عليها وتصبح الامور عندهم صعبة بعد ذلك

ومنهم الي بيموت ومش لاقي قيمة كفنه وخرجته فعلا

وسبق ناديت ان يكون فيه نقابة للرياضيين تأمن معاش لهم يحفظ كرامتهم الا ان الموضوع ذهب سدى وقالوا كفاية نقابة المدربين التي لا تأمن الا عشرين جنية فقط معاش ومش عارف كام دلوقتي لاني ما بدفعشي فيها لاني لم امارس مهنة التدريب فعلا الا في السعودية فقط

[linux]

برافو تارديللي ... ده الكلام الصح!

تارديللي يؤكد قبول اعتذار حسام حسن

ويتعجب من تغيير تفكيره فجأة‏!

قرر الإيطالي ماركو تارديللي المدير الفني للمنتخب الوطني الأول لكرة القدم اعتذار حسام حسن كابتن الفريق الذي تقدم به لرئيس اتحاد الكرة في أثناء رحلة العودة من السودان‏.‏ وأكد تارديللي أنه جلس مع حسام حسن في مكتب سمير عدلي مدير المنتخب قبل انضمامه‏,‏ وقال له بالحرف الواحد أنا أضمن لك أن تكون كابتن المنتخب ولا اضمن أبدا أن تلعب كأساسي‏.‏ وإذا تأهل المنتخب لكأس العالم فستكون ضمن القائمة المسافرة ويومها أكد حسام أنه تحت أمر المنتخب في أي وضع يراه المدير الفني والآن تغير الحال وأبدي حسام امتعاضه من عدم الدخول في التشكيل الأساسي لمباراة السودان‏.‏ ويرفض المدير الفني الإيطالي مناقشته في الأمور الفنية ومشاركة أي لاعب من عدمه‏,

[Farah]

عن اخر التطورات قرأت هذا الخبر

طرد حسام حسن من المنتخب القومي نهائيا

قرر ماركوتارديللي المدير الفني للفريق القومي استبعاد حسام حسن نهائيا من الفريق القومي. أكد تارديللي أن علاقة حسام بالفريق القومي انتهت للأبد. وقال: أنا صاحب القرار في مشاركة اللاعبين أو استبعادهم جاء ذلك ردا علي اعتذار حسام عن اللعب مع الفريق القومي احتجاجا علي وضعه في قائمة اللاعبين الاحتياطيين في مباراة مصر والسودان الأحد الماضي. شن تارديللي حملة موسعة ضد اللاعب الدولي الذي وصفه بالأنانية لأنه يحرص علي المشاركة واللعب دون مراعاة مصلحة الفريق القومي. وذكر ان تصرفات اللاعب تؤكد رغبته في عدم الوقوف بجانب زملائه الصاعدين في المنتخب.

[أسامة الكباريتي]

مش برضه هو "عزيز قوم" ..

حسام رجل خلوق بس نرفوز .. تعرض لسلسلة من الإحباطات على أيدي مدربين عقدتهم النجوم ..

لكنه يبقى حسام حسن ..

رجل الظروف الصعبة .. ومنقذ المدربين والإدارات في أحلك الساعات ..

أظن أنه من المناسب له أن يعتزل .. بدل الشحططة الطلياني على آخر الزمن ..

بكره نشوف تارديللي حيعمل ايه ..

بس اسم حسام حيفضل محفور في مصر .. علم من اعلام الكرة ومن أبرز نجومها على مر التاريخ ..

[se_ Elsyed]

الكابتن حسام نموذج غريب فبالرغم من موهبته المتمثلة في إصرارة وعزيمته ومجهودة في الملعب إلا انه مصاب بداء الغرور القاتل والذي يصور له بإنه فوق الجميع وان على كل من يتعامل معه سواء وطني او محلي ان ينظر إلى تاريخه ويقف لها إحتراماً وإجلالاً... شوفوا قايل إيه في المساء النهاردة .

حسام حسن : مستمر في الزمالك..ومستعد للتوقيع علي عقدي الجديد

كتب إيهاب شعبان :

أكد حسام حسن نجم مصر ونادي الزمالك لكرة القدم استعداده الكامل للتوقيع علي عقده الجديد مع ناديه الزمالك حيث ينتهي عقده الحالي رسميا بنهاية الشهر الحالي.

قال حسام حسن.. أنه لا توجد لديه أي موانع أو شروط للاستمرار مع الزمالك.. ولكن القرار في يد مجلس إدارة النادي.. وكنت قد سمعت أن الزمالك جاهز بعقده الجديد لعرضه عليَّ ولكن حتي هذه اللحظة لم يتصل بي أحد.. ورغبتي في البقاء مع الزمالك سببها احترامي له كناد عريق وارتباطي بجمهوره الكبير الذي يلتف حولي في كل مكان ويطالبني بالاستمرار.. أضاف حسام.. أمامي أكثر من عرض للعب في أندية أخري.. ولكن الأولوية للزمالك الذي لعبت معه لمدة أربع سنوات أنجزت فيها الكثير.

وأكد حسام أنه لم يشترط لاستمراره بقاء فينجادا من عدمه.. وأن اختيار المدرب مسئولية مجلس الإدارة وليس مسئوليته.. إلا أنه يطالب المسئولين بتقييم عمل المدرب الذي أضاع من يديه أسهل بطولتين علي الزمالك وهما بطولتا أفريقيا وكأس مصر.. وقال حسام.. لا توجد شروط مادية لي عند التجديد.. "واللي شاريني أهلا وسهلا به".. والذي يهمني هو التقدير المعنوي والاحترام لإنجازاته وتاريخه كلاعب كبير.. وعن قراره المفاجيء بالاعتذار عن عدم الاستمرار مع المنتخب قال.. لست نادما عليه.. وأنا لاعب يحترم نفسه ولا أحب أن أكون مهمشا..!!