شوشو

[Abouhemeed]

بسم الله الرحمن الرحيم

همام جاء م الصعيد يتعين موظف ف الإسكان

باع ورثه من أبوه الدار و معاها الكام فدان

و بدل الجلابية .. لبس قميص و بنطلون بحزام

الفلوس كلها راحت في شقة و عفش تليق بمقام

كاتب درجة ثالثة في وزارة الإسكان

و بعد شوقة جاء له ولدكان منتظر له زمان

سماه شحتة ليعيش بعد ما ماتت له الصبيان

خاف عليه م الحسد علق له حلق ف الودان

رباه زي ما بيقول ع الغالي ليصبح عظيم له شان

في الغلط يقول عيل و ف الصح يقول طالع لي تمام

جت له فرصة يشتغل في الخليج و بعدها في لبنان

و تمر سنين السفر هوا .. و غاب هناك همام

و الأم وحدها ما تقدر على شاب من الشبان

خاب الولد في مدرسته و أبوه هناك شقيان

لجل يدفع أجرة الدروس و يجعله إنسان

الفلوس وحدها لا تربي و لا تملأ الوجدان

ورجع همام و رأسه أبيض كما الكتان

لقي ولد فسدان بدل ما يلقاه عظيم الشان

لقاه هايف و مستهيف و عامل مننا قرفان

كل شيء عنده متخلف حتى تلاوة القرآن

قال الراديو عالي موش عارف إنه ينام

بعد ماسهر في النادي للصبح مع الخلان

تامر و بسبس و كوكو و البنت حنان

سهر يغني كاريوكي و يرقص على الأنغام

حافظ كل الغنا و ما يعرف الخمسة في ستة كام

كل سنه يسقط و يعيد السنة كمان و كمان

لا داري بشقاء الأب و تدلعه أمه كمان

حب يغير اسمه اللي عمل له حرج و خبلان

خلاه شوشو وحسب إنه صار موهوب فنان

و شحتة بات قدر مكتوب ع اللي أصله خان

جاله واحد كده باين عليه البوظان

قال عندنا فرح نحييه ف سرحة اللبان

و تغني و ترقص و تقبض قرش تمام

ولا أبوك ينقرظك و تبات عويل زعلان

هم معاه يجري و قال الفرج أهو بان

للفجر و الأب عليه قاعد في السرير قلقان

بص من الشباك لقاه راجع باين عليه سكران

حلف البيت ما هو معتبه يرجع مطرح ما هو كان

رد عليه الولد بقلة أدب نسى نفسه همام

و رفع الكف و هوى على خد ولد تلفان

طب ساكت لا نفس فيه و البدن همدان

رقعت أمه بالصوت و إتلمت الجيران

همام قتل ولده يا ناس و وقف همام

جملة واحدة يقولها و بالبكاء ندمان

يلعن أبو .....وزارة الإسكان

أبو حميد المصري ‏01‏‏/‏06‏‏/‏2004‏

[Abouhemeed]

وضاع الولد و معاه همام

في حد فيكم عنده كلام ؟

[Farida]

حلوة جدا بس لو كانت وزارة الثقافه كانت حا تبقى محبوكة اكتر h):

[Cleo]

الفلوس وحدها لا تربي و لا تملأ الوجدان

جزاك الله خيرا يا والدى العزيز... فبعد أن كان يعمل فى الخليج (أيام ما كان الخليج خليج بجد) براتب يعتبر فى أيامنا هذه من الرواتب العليا... فضل أن يضحى بكل هذا لأنه شعر أننى و شقيقتى كنز أغلى لديه من مال ادنيا... فعاد ليحميه و يحافظ عليه...

و عليه فأنا إن كنت أدين بعلم أو فكر أو ثقافة فكله قد استقيته من أبى، و كم أحقد عليه كلما تخيلت أنه كان ممكن يحرمنى من كل هذا مقابل بضعة سلع استهلاكية، تنمى حيوانية مستخدميها...

[Salwa]

كلكم راع وكل مسئول عن رعيته ......كلمات ذهبية حقا ودائما تثبت صدقها ..

للأسف ضاعت اجيال بسبب الجرى واللهث وراء السراب ..

لا انصلح حال الابناء ولا استقر الآباء .

ودائما فى حالة ابتعاد الأب الحصيلة صفر فى كل شئ ..

ايه رايكم نفتح موضوع ...ثقافة الانتقال ...مش انتقال الثقافة ؟؟

امتى الفرد ينتقل من مكان لآخر وامتى يكتفى بالغربة ..وهل النجاح المادى يعوض الفشل المعنوى ؟؟؟

اوليس من الأفضل ان تكون الاسرة دائما معا ...ومش مهم المكان ؟؟؟

[Abouhemeed]

فريدة

وزارة الثقافة بتدلع موظفينها فلا يحتاجون للسفر أما وزارة الإسكان لم بستفد منها الا وزيرها لا في مساكن و لا نقطونا بسكاتهم ...

كليو ...

بارك الله في أبيك و جعلك قرة عين له ..

سلوى ...

موافق لأن الموضوع هام و حيوي