عرض وطلب .. ولا استهبال وأستسهال وأستعجال ؟

[عنبو]

عرفتوا انا عاوز امتحانات الثانويه تيجى صعبه قوى وميدخلش الكليه الا الطالب اللى يستاهل يبقى طالب جامعى والباقى بقى يتعلم

صنعه او يشتغل سواق او اى حاجه من الاعمال الحرفيه اللى هو اساساً هيفهم فيها ويجيد فيها

مهو لو تعب فى دخول الكليه وعينه اتفعصت من المذاكره علشان يدخلها وطلع عين اهله علشان ياخدها

عمره مكان هيرضى خالص بالكلام الفاضى ده

بالنسبه بقى لموضوع الظروف والكلام الكبير ده

الراجل ده لو اشتغل عامل يطلع زلط ورمل والله اقل حاجه هيجيب له 2000 ج فى الشهر

لو اشتغل عامل فى مصنع هياخد له 600 ج فى الشهر

يعنى مافيش حاجه تستاهل انه يطلع على المرتب ده الا حاجه واحده انه يكون اهطل

على جنب كده

سين سين خليك بعيد عن الفلاحين لان انا اعرف فلاحين بيطيروا فى الجوووووووووووووووووو :rolleyes:

تحياتى

عنبو

[أحمد سيف]

يا عم سين سين

مش كل قط يتقال له يا مشمش ... ولا كل متخرج من كلية التجاره يتقال عليه محاسب ... نسبة قليلة هما المحاسبين وبعضهم ماسكي دفاتر ومدخلي بيانات والبقية عرضحالجية، وكل فوله ولها كيال.

[الغريب]

وكل فوله ولها كيال.

:rolleyes: :unsure: bv:-

[engmido]

عندي ليك حاجه بـ 1200 ... وسجايرك وكيفك ومزاجك علينا ..... بس إنتي أبقى راضي الرجاله .. سامعني الفاتحه بقى

متشكرين يابو عبده يا اصيل.....هههههه

1200 كتير قوى ...ده بالسلطات بالبابا غنوج؟؟؟

[وطني حر]

يا عم سين سين

مش كل قط يتقال له يا مشمش ... ولا كل متخرج من كلية التجاره يتقال عليه محاسب ... نسبة قليلة هما المحاسبين وبعضهم ماسكي دفاتر ومدخلي بيانات والبقية عرضحالجية، وكل فوله ولها كيال.

فعلا مش كل خريج محاسبه يبقي محاسب

بعدين لم نتكلم عن مرتب المحاسب بالسعوديه او الخليج . فلازم نحط ف بالنا رب العمل او المستثمر ( النصاب ) عنه اختيارات اخري . من دول اخري . وغالبا المحاسبين يكونو ماسكين دفاتر او تسجيل او مكتب تاجير . يومي

فالسودان فاتحه ابوابها وهناك قناعه ما بان السوداني هو افضل محاسب . ( شايفين الاخوه السودانين زرعو الصفه دي ) عشان

شغل المحاسب تحت التكييف .

الهند وبنقلاديش ممكن تخرج محاسبين بعد كم سنه بعد.؟

انا شايف ان موضوع المرتب دا حسب ضروف كل شاب . فالبعض عايز يهرب من البلد .مهما كان الثمن .

[hOuSsAm]

انا قررت انى معتش اتكلم فى الموضوع ده

اللى يشيل اربة مخرومة تخر عليه لواحده

طالما هو مش عارف مصلحة نفسه ومش عايز يتعب يبقى يشيل ويشرب

وزى مقال زوهيرى العقد شريعة المتعاقدين............. يبقى منلومش عالجماعة السعوديين

[Diab]

حرام والله

هما خلاص المصريين بقوا مهانين للدرجة دي

حسبي الله ونعم الوكيل

[ehababdelgawad]

اولا الشباب فى مصر تعبان جدا ولا تتصورا كيف العيشة بالنسبة لشاب متخرج ومشلاقى شغل وكمان مشقادر يقول لأهلة انا عايز مصروف لما بيلاقى فرصة زى دى اكيد انا لو مكانة مش ممكن افوتها واجرى عليها بإيدى وسنانى كمان عشان اسافر واخذ 1000 ريال احوش منها على اد ما استطيع وبعد سنتين اكون شفت شركة احسن وعرفت البلد والنظام وعملت فلوس اشترى بيها فيزا وارجع حر واشتغل فى المكان ال انا عايزة بالراتب ال انا عايزة متتصوروش يا جماعة الشاب لما بيتخرج ويجلس فى البيت سنة ولا سنتين منغير شغل دة حقيقى فى مصر وشايف الناس بتشتغل بالوسايط فى كل مكان وظايف عدم ب 350 جنية زى ما الاستاذ بيقول حقيقى الدنيا بيكون طعمها مر

معلش انا بتكلم من واقع شخصيات امامى شفتها وعرفت حالتها كويس

السلام عليكم ورحمة الله وبركاته

ده اول رد ليا ف المنتدى معاكم هنا بس بصراحة الموضوع استفذنى لدرجة انى ارد

كل حد دخل قال رايه ف ان ازاى الشباب دول يوافقوا انا لو مكانهم طبعا مش هوافق بس مش يمكن ف مصر مش عارفين يشتغلوا اصلا بربع المرتب لا ومش يمكن ده اكيد عندنا المحاسب بينزل 4شهور على الاقل تدريب بياخد فيهم 250جنيه ف الشهر وبعد لما يتثبت بياخد 350جنيه يعنى ولا تنفع حتى ثمن مواصلات مش مرتب واحد ياخده ويكون منه نفسه ويصرف على نفسه وبيته

ف الحلم الوحيد اللى تقريبا عند كل الشباب ف مصر ان هما ييجوا ارض الاحلام ف اى مكان برا مصر المهم هيكسبوا من وراه وخلاص ومهما كانت 1000ريال قليلة مش هتكون اقل من اللى هياخده وهو ف مصر

مش عارفة ممكن يكون رايى غلط او مختلف مع رايكم شوية بس كل واحد بيشوف الموضوع من زاوية ولازم نعزر الشباب على الحال اللى بيوصلوا نفسهم ليه وانه يتقال عليهم بيتباعوا

يا استاذة العيال دى بتكبر دماغها وعايزة تغمس الايس كريم بالعيش من اول يوم

كلامك مش واقعى بالمرة وانا هقولك ليه ومش مقبول

انا اتخرجت من كلية التجارة جامعة المنصورة 2006

وانا من عمق الاقاليم والفلاحين اللى بتقولوا عليهم دول

واكمنياتى محدودة جدا ............ يمكن اقل من ناس كتيرة معايا فى الدفعة ........... تقديرى تقدير عادى

المهم انا خلصت امتحانات فى شهر مايو 2006 كنت 15 يونيو بتدرب فى شركة من اكبر شركات الشرق الاوسط فى مجالها

فى ديسمبر كنت متعين فى شركة تانية تعتبر من اكبر الشركات فى الدلتا والاسكندرية بمرتب 600 جنيه

بعدها بسنة اشتغلت فى القاهرة ب 1200 جنيه وكنت قاعد فى شقة فى المعادى تبع الشركة

بعدها بشهرين سافرت السعودية

مع العلم ان اغلب سنوات الدراسة كنت بشتغل فى الاجازة لاما فى شغل متواضع لاما فى اعمال تطوعية ........... فقطكنت عايزاتعلم الحياة ماشية ازاى

انا مش عاريز اقولك كام شركة فى اليوم كانت بتكلمنى عشان تعمل معايا انترفيو (وكل ده وانا مش متميز انسان عادى جدا زى كل الفلاحين اللى طالعين من الكفور والنجوع اللى بتقولوا عليها)

ووصلت بيا الدرجة انى كنت بتنك عليهم لانى مش لاقيلهم وقت

الشغل فى مصر متلقح يا ناس

انا يناس زى ولاد التييييييت اللى بيطلعوا على الف ريال دول (من نفس الاماكن)

بس الحمد لله كان عندى طموح ومش برضى بالقليل

حسبى الله ونعم الوكيل فيهم اللى بيطلعوا عالمرتبات دى وبيبوظوا سمعتنا فى الخليج

ولا الوم على اى واحد سعودى محترم عايز يعمل توفير اقتصادى ينزل يجيب شوية عبيد من سوق مكاتب السفريات (اسف اقصد مكاتب النخاسة)

حسبى الله ونعم الوكيل والحكومة ملهاش ذنب......... واسمعونى لو الحكومة عملت اى اجراء من اللى انتوا عايزينه الناس هتقوم عليها وهيقولوا مش عايزين يسفرونا

[doha]

على فكره وعشان ( نبرد نارنا ) شويه بدال حرق الدم الي على المسا ده .. ياريت لو يتم تثبيت الموضوع في قسم المغتربين ويتم ضم موضوعين تلاته اليه من الي اصحابها بيستفسروا عن رواتب معروضه عليهم والي تم الرد فيها من ناس عايشه برا فعلا ان متقبلوش العروض دي لان كذا وكذا .. ياريت كل ده ينضم على بعضه في موضوع مثبت عشان يقراه القاصي والداني الرايح والجاي يمكن لعل وعسى ننقذ رقبة فرد واحد بس يقتنع بكلامنا وينفذ بجلده من تحت المقصله ..

على الله

[عنبو]

اولا الشباب فى مصر تعبان جدا ولا تتصورا كيف العيشة بالنسبة لشاب متخرج ومشلاقى شغل وكمان مشقادر يقول لأهلة انا عايز مصروف لما بيلاقى فرصة زى دى اكيد انا لو مكانة مش ممكن افوتها واجرى عليها بإيدى وسنانى كمان عشان اسافر واخذ 1000 ريال احوش منها على اد ما استطيع وبعد سنتين اكون شفت شركة احسن وعرفت البلد والنظام وعملت فلوس اشترى بيها فيزا وارجع حر واشتغل فى المكان ال انا عايزة بالراتب ال انا عايزة متتصوروش يا جماعة الشاب لما بيتخرج ويجلس فى البيت سنة ولا سنتين منغير شغل دة حقيقى فى مصر وشايف الناس بتشتغل بالوسايط فى كل مكان وظايف عدم ب 350 جنية زى ما الاستاذ بيقول حقيقى الدنيا بيكون طعمها مر

معلش انا بتكلم من واقع شخصيات امامى شفتها وعرفت حالتها كويس

مهو حضرتك الاف ريال هنا نفس القيمه بالظبط بتعت 350 جنيه يبقى ليه التعب والبهدله فى بلاد الناس

انت عارف اقصى مبلغ ممكن يوفره كام ده لو هو هياكل وجبه واحده فى اليوم وفى الفطور ممكن يبص وهو ماشى على الاكل وخلاص

اقصى حاجه 300 ريال فى سنه 3600 يعنى فى سنتين 7200

بالله عليك واحد راجع مصر وبعد سنتين وكان عايش عيشه كلابى

ومعاه حوالى عشر الاف جنيه هيعمل بيهم ايه

[se_ Elsyed]

على فكره وعشان ( نبرد نارنا ) شويه بدال حرق الدم الي على المسا ده .. ياريت لو يتم تثبيت الموضوع في قسم المغتربين ويتم ضم موضوعين تلاته اليه من الي اصحابها بيستفسروا عن رواتب معروضه عليهم والي تم الرد فيها من ناس عايشه برا فعلا ان متقبلوش العروض دي لان كذا وكذا .. ياريت كل ده ينضم على بعضه في موضوع مثبت عشان يقراه القاصي والداني الرايح والجاي يمكن لعل وعسى ننقذ رقبة فرد واحد بس يقتنع بكلامنا وينفذ بجلده من تحت المقصله ..

على الله

من عنينا

أدعسي هون

يا مرتباتك يا هولندا

[shawshank]

فيه حل مُسّكن للعرَض، يعني مش بيعالج أسباب المشكلة علاج جذري، لكنه متاح وسهل نسبيًا، وممكن تنفيذه بالتوازي مع الجوانب الأخرى للحل. إن يكون فيه جمعية للمصريين العاملين في الخليج، أو في السعودية. ويكون لها صندوق من اشتراكات/تبرعات الأعضاء. ويكون من ضمن بنود الإنفاق الشهري مساعدة اجتماعية للمصريين الذين تقل مرتباتهم عن حد معين. وممكن وضع حد أقصى لمدة المساعدة دي. بيدعّم الحل ده وجود تفاوت كبير بين مرتبات المصريين العاملين في الخليج، ورغبة الكثيرين منهم في المساعدة، وصعوبة توعية المصريين الراغبين في العمل في الخليج بتدني الأجور المعروضة، وإعراض الحكومة عن المساهمة في هذا الشأن.

[herohero]

انا شايف ان الخبر ده في مصراوي يعني هيفيدنا ف نقاشنا عشان نعرف ان المشكلة اكبر من كلامنا

القبض على ليبي جمع 500 ألف جنيه من مصريين بحجة تسفيرهم للعمل فى بلده

يوسف جمال - مصراوى - ألقت أجهزة الأمن بـ6 أكتوبر القبض على تشكيل عصابى يتزعمه تاجر ليبي للنصب على الشباب المصريين بحجة توفير فرص عمل لهم فى ليبيا .

كانت أجهزة الامن بأكتوبر قد تلقت معلومات بالواقعة وتبين ان تاجر ليبي الجنسية يقيم فى مدينة 6 أكتوبر كون عصابة تضم عاطلين لإيهام الشباب المصرى بالسفر الى ليبيا والنصب عليهم والحصول على مبالغ مالية كبيرة

[تامر مصطفى]

فكرتوني بواحد كنت بحاول افهمه ان العيشة في دول الخليج غالية خصوصا لما تكون معاك اسرتك وعيالك

ولقيته بيقسملي العملية من نفسه وبيقولي يعني هتاكلو وتشربوا ب500 جنيه في الشهر و500 ايجار وقول بنزين ومواصلات 300 او 400 جنيه وباقي راتبك متوفر

يعني فل الفل ياعم بطلوا تخزو العين بقى بس انت طلعني وان شالله امسح جزم هناك :rolleyes:

وواحد تاني كان بيقولي ان جايله عقد "حارس أمن " في الكويت براتب 100 دينار

وغلطتي اني حاولت افهمه ان المبلغ ده ميعملش اي حاجة

اعتبرني مش عايز له الخير وعايز اكسب في الغربة لوحدي ولقيته بيقولي انا دلوقتي دخلي الف ونص ومش بعرف اوفر منهم حاجة لو قبلت الراتب ده في الكويت خليني هصرف الف ونص بمصاريف العيال بكله هيتوفر معايا 500 جنيه في الشهر مش بقدر اعملهم هنا .

في النهاية لقيته مصمم فقلت له وجهة نظرك صح وروح اشتغل واهو 6000 جنيه في السنة توفير ممتاز جدا وعيالك اولى بيهم

[se_ Elsyed]

أنا مش مع الرأي اللي بيقول " طب أروح وأجرب "

هاتجرب إيه يابا ؟؟

يا عم أقعد وجرب في بلدك ..

بدل ما تيجي هنا تتنفخ سنيتن وماحدش يعتر لك على جته

أساساً معليش يعني الشركة المعفنة اللي بتدي مرتبات 1000 و 1500 .. متوقع تبقى شركة محترمة وفيها سيستم ونظام هيكلي حلزوني منبعج .. وبالتالي هاترتاح فيها ؟

مستحيل طبعاً .. دي غالباً إن لم يكن كلها .. بتبقى شركات افراد ... يعني متوقع تتكعبل في كفيل معفن شكل أبو جهل .. وواخد على إن اللي شغالين عنده ما هم إلا عبيد إحسانه وأمتلكهم بصك عبوديه موثق .. والحمد لله إن ما فيش ستات كتير بتسافر بالمنظر ده وإلا كان أعتبرهم مما ملكت يمينه وبالتالي يطلب حقه الشرعي منهم :D

أنا مش بأهزر ... أنا بأسمع بوداني و وبأشوف بعيني أمر واقع وهو إن في ناس هنا بيعتبروا الشغالة مما ملكت يمينه وكإنه دخل حرب في البطحا وكسبها وبالتالي دول أسرى .. وسوري يعني ... كدهوت وكده يعني ... بيعتبرها زوجته .. وأنتوا عارفين الباقي وما حدش من العزاب يقرا الكلام ده عشان عيب ... بالرغم من إنه عارف إنها متجوزه في بلدها وعندها أورطت عيال لكن هي مطحونه في بلدها وسافرت تعمل قرشين وتشتغل في البيوت ... لكن هذا لا يمنع إن دي نقرة وتلك نقرة أخرى وخلي اللي هناك هناك واللي هنا هنا ... اهم حاجه يبقى المكتب مديك ضمان وبيقول لك رجع المليان وخد الفارغ ( الناس القدام فاكرين طبعاً صيغة الإعلانات دي والمكاتب اللي كانت بتكتب بكل تبجح ... نقبل أسترجاع الشغالة في حالة الحمل ... قشطة يابو أشرف )

إذاً التجربة إذا كانت مطلوبة فهي في حالتنا دي تعتبر أنتحار ... خصوصاً لو حد بينصحك ..

يا عم بأقول لك لحد 1500 دي مرتبات عامل النظافة ... ومش هاتوفر حاجه لو وقفت على راسك وكلت عيش حاف وجبنه كل يوم

يا عم بنقول لك الحياة غالية ناررررررررررررررررر

يا عم بنقول لك مش هاتتعلم حاجه وهاتبقى لاسنوات دي مش محسوبة من عمرك بل بالعكس ده لو عندك معلومتين تلاته هايطيروا منك

يا عم بنقول لك خلي بالك من المؤسسة أو الشركة اللي إنت طالع عليها

كل ده يتقال ... ويتقري .. ومع ذلك يدخل من الودن دي يطلع من الودن التانية وكإن الواحد بيعند مع نفسه ...وييجي يتصدم بواقع مرير وبظروف أشبه بالسجن ويصرخ من تاني يوم ويقول عاوز أروح .. وطبعاً كفيله بيقول له على جثتي .. ده أنا شاريك بالشيء الفلاني ...

أنا شخصياً أضحي وأقبل مرتب صغير أقل مما هو متعارف عليه لو طالع على شركة كويسة وهاتعلم حاجه ...

لكن زي ما قلت لكم كلها بتبقى مؤسسات صغيرة وبتلاقي الواحد بيشتغل " ماشطه وبلانه " أو محاسب على سكرتير على مترجم أو زي ما حصل مع واحد صاحبي كان محاسب وقِبل إنه يعمل سكرتير تنفيذي ففي مره مديره وهو صاحب الشركة إتجنن في مخه وقال له " اعمل لي شاي على ميه بيضا يا فلان لو سمحت "

طبعاً قال له : نعم يا روح خالتك ؟ ما أقوم أحضر لك الغدا بالمره وأتذوق وأحط برفان عشان أعجبك

ولم يقبل ومشي نهائي ... أنا فاكر كويس .. كان سنة 99 .. وصمم إنه يحصل على تأشيرة نهائي ونزل قدم في مسابقة لتعيين محاسبين بمصلحة ضرايب المبيعات وربنا وفقه ... ودلوقت ما شاء الله عليه عدا مع اللي عبروا في حرب أكتوبر

-------------

نصيحة هامه بأقدمها لكل شاب ولكل فتاة مقبلين على الزواج .. قصدي على العمل سواء داخل مصر أو خارجه

خليك متفائل .... تفاءلوا بالخير تجدوه

وخلي إيمانك بالله كبير

وخلي عندك ثقة في نفسك

ومالكش دعوه بالأراء المحبطة عن الفساد والأزمات الأقتصادية العالمية وتسريح العمالة في شركة تويوتا باليابان وما إلى ذلك ..

أصلها مش هاتيجي عليك إنتي والدنيا تتكركب وتشيل الليلة لوحدك

لكن طور نفسك على قدر الامكان علمياً وثقافياً ومظهرياً

معليش يعني ما تجيش تقدم على وظيفه في شركة وأنت مبهدل وشعرك منكوش وممكن جاي بشبشب حمام ولسه صاحي من النوم .. ومهما كنت عالم ذرة ساعتها فأول انطباع بيتاخد عنك هو إنك " معفن " من الأخر كده وهي مش ناقصه يعني ...

ماحدش بيقول لك إنزل أشتري لبسك من بيير كاردان وأستخدم برفان من اللي بيدوخ ... لكن مجرد المحافظة على هندام الواحد ويتأكد إن ملابسة متناسقة ومكوية وكويسة ... وأستلف يا عم أي قزازة ريحه إن شالله من بتوع الأفتر شيف - إحنا راضيين يا عم - وأعمل سي في كويسه حتى لو كنت حديث التخرج بالمناسبة مانت لك حق في الحياة برضوا ...

أعمل كل ده وسيب الباقي على ربنا

و تيقن تماماً بما لا يدع مجالاً للشك " إن الله لا يُضيع أجر من أحسن عملاً "

أحسن عملاً مش صلاة وصوم بس

لأ ده أي عمل حتى لو كنت نجار باب وشباك

[mekkawy]

اه ياني ياما

نقول كمان .. و الله يا جدعان اللي لسة ما جاش يسمع كلام اللي هنا

أنا كنت لسة ما جتش و مشيت ورا كلام الناس هنا و كان صح الصح و برزيدينت كمان و 100% .. بجد الناس دي ايدها في النار عادي زي الناس اللي في مصر .. طب ما احنا كنا في مصر و كنا شغالين في مصر .. معلش يا جماعة الخير عندي رأي رفيع كدة

اللي فشل في مصر هيفشل في غيرها و اللي نجح في مصر هنجح في غيرها

الشرح:

هييجي واحد امور يقولي على كدة إنت فاشل بأة و كل الناس اللي في الخليج فاشلة عشان همن سافروا و سابوا مصر؟؟

هنقولوه لا يا سيدي .. معظم الناس اللس هنا دي إن لم يكن كلها كانوا شغالين في مصر في مراكز كويسة أوي و عندهم كارير و سفرهم ده من دواعي الكارير أكتر ما يكون من دواعي الفلوس .. إنما اللي بيدفع 15 و 20 ألف عشان سافر ده مهبوش ليه بأة .. أنا عندي ال20 ألف أعمل بيهم أي حاجة ولا إني أبيع نفسي .. لما يجيلك سفر محترم من غير متدفع ولا مليم عشان انت تستاهل .. انت المطلوب يا فندم مش انت الطالب .. يبا تسافر .. غير كدة الواحد بلده أولى بيه و هو أولى بيها.

ع جنب كدة

بأقولك يا أخويا س س .. هي المؤسسة التييييت دي في الملز و أول حرف منها أبو ... ؟ wst::

مكاوى .. تحقيقات

[أحمد سيف]

اللي فشل في مصر هيفشل في غيرها و اللي نجح في مصر هنجح في غيرها

يا سلام عليك يا عم مكاوي ... انت كده جبت الخلاصه

[الغريب]

اللي فشل في مصر هيفشل في غيرها و اللي نجح في مصر هنجح في غيرها

يا سلام عليك يا عم مكاوي ... انت كده جبت الخلاصه

وأنا والله لما شوفت الكلمة دي قولت هي دي الخلاصة نزلت لقيت التعليق في الجون

صح كلامك يا مكاوي وتسلم أيدك

[se_ Elsyed]

أتعرفت على شاب طلع معرفة ناس قرايبي مؤخراً .. فقلت نوجب معاه .. فعزمته في أستراحه الخميس الماضي وكان معايا الرفيق الأخ زهيري

عارفه يا زهيري ؟

المهم بدأ يحكي قصة كفاحه ولم يستكملها وقومنا انا وزهيري وضربناه علقة موت

شخص خريج نظم معلومات .. شغال في سيراميكا كليوباترا براتب إلى حد معقول جداً ويحسده عليه أي حد ... تطق في دماغه يسافر السعودية .. يبتدي يلف على مكاتب النخاسة ليعرض نفسه ومفاتنه عليهم .. تيجي له فرصة عمل بأحد معارض الادوات الصحية هنامشرف معرض مع إنه تخصص حاسب ألي هارد وير وسوفت وير ... يدفع 9 الاف جنيه ثمن التأشيرة ...

طب عاوز تسافر ليه يابني ؟

يقول لي زهقت من زحمة وخنقة مصر .... وقلت أسافر السعودية زي اللي سافروا ويكون جوازي في جيبي والف الدنيا واعمل فلوس ...

لووووووووووووووولي

المهم

بيقول لي : تصدق بالله يا استاذ سين سين ؟

قلت له أصدق طبعاً

قال لي أقسم بالله لحد ما جيت السعودية ما كانش ليه عقد عمل .. وكل ما أسأل الراجل يقول لي لما توصل وما تخافش

فقلت له ... ما تكملش لأني عارف الباقي

المهم وصل السعودية بسلامة الله ولبيك اللهم لبيك ...

واول ما وصل لقاهم محضرين له عقد بمرتب أجمال وقدره 1500 ريال .... ههههههههههههه .... ولازم ولابد يخصموا منه 5 الاف ريال ثمن التاشيرة - انظر الكتاب فوق ... التأشيرة اللي دافع ثمنها 9 الاف جنيه في مصر - عشان لو قل عقله ومشي قبل نهاية المدة اللي هي سنتين يبقى هما في الأمان ولو ما مشيش يبقوا يرجوهم له ...

اه نسيت أقول إنه متزوج وعنده طفل ..

ونسيت أقول إن بقى له حوالي 5 شهور هنا بالظبط أتحول له من أهله في مصر ما يزيد عن 10 الاف جنيه عشان يعرف يعيش وياكل ويشرب

فوتكو بعافيه

[se_ Elsyed]

بأقولك يا أخويا س س .. هي المؤسسة التييييت دي في الملز و أول حرف منها أبو ... ؟ wst::

مكاوى .. تحقيقات

حبيبي يا ميكو

ايوه هي ..

بس على فكره أعرف تقريباً معظم مؤسسات تأجير السيارات .. كلهم كده مرتباتهم مضروبة بالنار مش أبو تيييييييييت بس يعني .... إحقاقاً للحق

-----------

قد يظن البعض إننا سوداويين .. ومش عاوزين الخير لحد .. وعاوزين نقعدجنب بير البترول لوحدنا وجايبين شاليمو وعمالين نشفط براحتنابنزين 90 ....

لأ والله يا عم الحج .. الرزق ده بتاع ربنا ومتقسم من قبل ما نتولد حتى

لكن لما تلاقي إنسان بينصحك لوجه الله ويقول لك .. يا أخي إدرس الموضوع كويس .... وما تجيش إلا على فرصة مؤكده ... وإبعد عن المبالغ المهوله الي بتندفع في شرا التأشيرات .. واسأل وأعرف يعني إيه سائق خاص ويعني ايه عامل تربية مواشي ... ولو بتقعد على النت دور واسأل أصحاب الخبرة وقلب الموضوع قبل ما تاخد خطور تندم عليها

ده كل اللي طالبينه ... كتير كده على شخص بيخاطر بمستقبله ومستقبل أولاده ؟

ههههههههههههه .. هاضحككم .. قريبي بطل قصة " ايه اللي رماك على المر " اللي كتبتها من سنتين ... حد يدور عليها ويجيبها هنا ... اللي هو باختصار جه على وزارة الدفاع هنا ودفع ثمن التاشيرة 15 الف جنيه .. عشان مرتب 800 ريال .. بمهنة حقيقية فعلية وهي " جنايني " وهو خريج معهد زخرفه وديكور وكان شغال في الإذاعة والتليفزيون ... وأول يوم وصل السعودية وأستلم الشغل لقى المرتب 600 ريال لان 200 ريال رايحين للهندي اللي بيطبخ لهم اكل هندي جميل تاكل صوابعك وراه وتقعد من غير صوابع .. وأول شهر أتخصم منه 750 ريال تكلفة أصدار الأقامة - وزارة الدفاع واخدين بالكم - طبعاً قسموهم على شهرين ... ونزل نهائي بعد شهرين بالظبط لان تم نقله أكثر من مره للعناية المركزة بمستشفى الشميسي وتقريباً أنا كنت مقيم في المستشفى جنبه كله شويه لأنه كان بيموت .. شغل من 7 الصبح لـ 2 الضهر في شهر 7 في عز الولعه في مشتل زرع حصد يعني إنتحارررررررررر

وخسر الجلد والسقط طبعاً زي ما بيقولوا ورجع مديون

الاخ جه الأسبوع الماضي .. بس المره دي أتعلم الدرس جيداً .. جه على أسواق العُثيم مشرف مبيعات بمرتب 2500 ريال ... وما دفعش حاجه في التأشيرة وأجازة وتذكرة سنوية وبدل سكن لو حب يستقدم عائلته

يعني نقدر نقول مبلوعه شويه مش الخيبة القوية اللي عملها في الأول من غير ما يقول لي وأنا هنا مع إنه قريبي وتليفوني معاه وياما كلمني