التوك توك......كرامتي......وأنتمائي

[Morial]

خرجت اليوم لقضاء بعض المصالح الهامة

أخذت تاكسي كعادتي فأنا أؤمن بالمثل القائل هين قرشك ولا تهين نفسك

طلبت من السائق أن يتوقف حين وصلت حيث اريد

نزلت من التاكسي لأصعد الرصيف حيث سأضع خطة كالمعتاد لعبور الشارع

وفجأة ظهر من تحت الارض الكارثة اللي بيقولولها توك توك

وأقسم بالله أن عمر السائق لا يتجاوز الثالثة عشر إن لم يكن أقل ويجلس بجواره طفل أخر في حوالي الثانية عشرة والأثنين يتبادلان اللعب والقفز فوق المقود اللي المفروض انه دريكسيون تماما كما يمرح اطفالنا في الملاهي بلعبة العربات الطائشة

ولولا لطف الله وسرعة قفزي فوق الرصيف في حركة بهلوانية اعتدت عليها لتفادي الحفر وبرك الماء القذر لدهساني

لقد اصبت بالذهول حين رأيت طفلين وليس سائق راشد يدرك ما يفعل اكثر من ذهولي بما فعلاه

وعلا صوتي أتسائل

من سمح لكما بالقيادة وكيف تقودان بلا رخصة ؟

فرد أحدهما

متخافيش

قلت له كيف لا أخاف وأنت طفل لا تدرك أي كارثة كانت ستحدث

فرد قائلا

خلاص خافي

صعدت فوق الرصيف وأنا مندهشة من عجب العجاب هذا الذي رأيت

ولكنهما أبيا ان يذهبا دون وداعي

فقد أنهالا عليا بالسباب وهما في عمر أبني

هل تعقلون ؟

هل تتصورون؟

لقد كنت في حالة من الاحتقان والغل لا توصف

ليس منهما فهما في الاخر مجرد طفلين

ولكني حنقت علي ذويهم والمسؤولون عن تربيتهم وقبل كل شيء الحرص علي سلامتهم

ألا يعني هؤلاء شيئا لأبائهم وأمهاتهم؟

ألا يعلمونهم شيئا من الادب والاصول واحترام الكبير؟

وهذا الوحش الذي اعطي لهما هذا التوك توك ليعملا عليه الا يعقل ابسط قوانين السلامة؟

ألا يخشي أن يتسببا في حادث فيُسئل هو؟

لم أستطع ان اكبح جماح غضبي فقد كنت علي وشك البكاء

ذهبت مباشرة الي وحدة التراخيص والمرور والتي تتصدر الشارع العامر بالتكاتك

فالتوكتوك يجري جيئة وذهابا امام المرور والسائقين في المعظم من الاطفال

وقد لاحظت انه لا يوجد نمر لأي توك توك

دخلت وسألت أين شرطة المرور قابلني الضابط

قصصت عليه ما حدث

هل تعرفون ماذا قال ؟

قال لي يا مدام الكبار بتوع البلد هما اللي منزلين التوك توك ده عشان يقرفوا بيه الناس

عايزاني انا اعمل ايه؟

روحي هتيهولي هنا بالتوك توك بتاعه وانا مش هخرجه بيه تاني

واقسم بالله ان هذا ما قيل لي بالنص

خرجت اجر اذيال الخيبة والشعور بالدونية والمهانه والرخـــــــــــــــــــــــــــــــــص

حد منكم قادر يحس أحساسي

حسيت اني رخيصة ف نظر الحكومة اوي

وفي اللحظة دي بس بكيت

وكرهت نفسي وكرهت اللحظة اللي خرجت فيها من البيت

من ساعة ما رجعت البيت لم اتكلم مع اي احد من اسرتي

عندي حالة كأبة شديدة وغصة في حلقي

ولم اتوقف عن التفكير في كندا

ابـــــــــــوس ايـــــــــــدك يا كنــــــــــــدا خــــــــــدينـــــــــــــــــــــي

تم تعديل 6 يونيو 2010 بواسطة Morial

[herohero]

التوك توك ده كارثه طبعا كله ع بعضه غير مطابق ولو اتكلمنا هيقولك ايه انت فاكرين نفسكم بهوات البيه يوسف غالي لما راح الهند زمان معرفش يجيب من الهند الا فكرة التوك توك

وقال ايه بيحل ازمة الشباب اللي حاصلانه بيطلع الاطفال من المدارس انا واحدمن الناس حسبتها لهم ع فكرة دخله احسن من متعلمي كتير لدرجه ان اللي بيسوقوا التوك توك معاهم فلوس وبقوا مطمع وهم غير مؤهلين و كتير منهم بيتعاطوا مخدرات غير بقى السفاله اللي بتشوفيها التوك توك بقى ياستي

وسيلة للانحرافتلاقيه راكن ع جنب ف وضح النهار ومعاه بنت وهاتك ياقلة ادب وسفاله

وتعالى اتكلمي هتشوفي ردود ف قلة الادب والمبرر مصدر رزق لا ياباشوات ده مصدرللانحراف

عموما الواحد ما يقدرش يتكلم لان كلامه هيخلي الناس تهيج عليه وندخل ف نقطة عدم الولاء للبلد لان النقد ف نظر الكتير كره للبلد

وايدي ع ايدك ويارب كندا تستجيب وتخلصي واخلص كمان مش لشيئ بس ع الاقل الواحد يبقى ماشي له حد يدافعه عنه ف مصر

ع فكرة قبل كده التوك توك كاسر لي فانوس عربية زكلفني500جنيه وسواق التوك توك مش عاجبه مع ان راكن العربية فوق الرصيف وصل ازاي للعربية وهي مركونة

ولا تعرفي تتكلمي معاه واعي لانه تحت الكرسي حاطط حديده حذاري من بتوعم التوك توك دولشوية صيع

[engmido]

مدام موريال

هل انت جديدة على مصر؟؟؟؟؟؟؟؟؟؟؟؟؟

للاسف انت اكيييييييد فى مصر

[Morial]

باشمهندس هيروهيرو

أللي سمعته أن اللي دخل التوك توك ده هو أحمد نظيف في صفقة لحسابه مع غبور

والله أعلم

علي فكرة أنا مش ضد التوك توك في حد ذاته

هو ممكن يكون ليه ميزة أنه بيساهم في حل أزمة المرور اللي عمرها ما هتتحل وذلك لصغر حجمه

لكن أنا أعتراضي أنه بدون نمر

وأن اي حد ممكن يشتغل عليه بدون تراخيص

دي مهزلة وتسيب وأنعدام وعي وأستخفاف بأرواح الناس

وقلة أدب

[Morial]

مدام موريال

هل انت جديدة على مصر؟؟؟؟؟؟؟؟؟؟؟؟؟

للاسف انت اكيييييييد فى مصر

لا والله يا باشمهندس

أنا مش جديدة علي مصر

كل ما في الامر أني لسه راجعة مصر من 3 شهور

والمرات اللي خرجت فيهم من البيت كانت معدودة

ومشاويري معظمها كانت بتكون قريبة جدا من سكني

علشان كدة تلاقيني ناسيه

العتب علي الذاكرة بقي

عموما أديني أفتكرت كل حاجة النهاردة

ولعلمك أنا مدركة حجم مأساتي من 16 سنه وأديني بنحت في الصخر

علشان ألاقي حل جذري

ولعل الله يجعل لي مخرجا

أميــــــــــــــــن

[herohero]

زار يوسف بطرس غالي الهند لم يجد فيها ما يلفت النظر إلا «التوك توك». انبهر الوزير بتلك العربة الساحرة انبهاراً شديداً، وقرر جلب آلاف «التكاتك» إلي أرض الكنانة ضمن رؤية حضارية جديدة!

ساعتها كان الواحد مبسوطبزيارته للهند وبم اني مهندس الكترونيات فكنت متعقد من الهند وندمت انيب ماروحتش درست ف الهند دراسه كويسة ورخيصه

المهم قفوجئت ساعتها بان انجاز غالي هو التوك توك وركبته اولمانزل مصر وكان ف منطقه بعيده بس صممت اركبه كان ساعتها ب50 قرش

الكارثة ان التوك توك اللي بنعتبره بيحل ازمة بقى ازمة بجد اللي بيسوقوه كتير منهم عيال وبقى معاهم قرش فبيدوها بانجوو

وتحذير بجد اوعوا تتكلموا معاهم معظمهم عيال منحرفة ومحدش ينسى الحديدة اللي بيحطوها تحت الكرسي انا شوفتها مرة بتتسحب ع واحد محترم للاسف وحذاري تمشي جنبه بعربيتك بجد شيئ مقرف سنة 2010 واحنا بنتفاخر ف حزننا الوطني باننا ادخلنا الكثير من اعداد التوك توك يا خي كات ستين خيبة عليك

[myusername]

فيه ناس... اتولدت علشان تعيش فى كندا... انتى من الناس دول

مينفعش تعيشى فى مصر... ربنا يوفقك ان شاء الله فى مشوارك للهجرة, و تروحى كندا فى أقرب وقت...

[مهندس ابو يوسف]

اعجبني تعليقاتكم لتوك توك مخاطره اكثر من منافعه

فانا لا اتخيل مثلا اني اركب شيء يمشي بدون ابواب وعيل صغير يسوق بي

اين الامان هنا

انا معاكي اهين قرشي ولا اهين نفسي

ووجود اموال كثيره في يد اطفال يشجعهم على الانحراف بدري

وكم من الحوادث المؤسفه حصلت عن طريق التوك توك

اللي خايف على عمره ونفسه واهله يبعد عنهم احسن حتى لا يضطر الى الندم في يوم من الايام

وقانا الله منهم

ولا يحوجنا لهم

تحياتي :rolleyes:

[لولا]

العزيزه منال ..

يبدو جليا أن المسألة ليست مسأله توك توك انهار معه الإنتماء الكامل للوطن !

لا اريد ان اقلل من شأن تلك الأشياء الصغيره هنا وهناك ولا حتى الكبيره .. ولا الكبيره جدا والمظاهر المثيره للحنق وللغضب وللأستنكار.. كُلنا كبشر نمر بتلك المشاعر وكمواطنين مصريين نتعايش مع مواقف مشابهه لا تتوقف منذ لحظة الخروج من باب المنزل .

الإنتماء للوطن شيء لا أستطيع ان استوعب بأى حال أنه شيء كما رداء نخلعه عندما نختنق تماما منه ايا كانت الأسباب.. !

هدئى من روعك عزيزتى لأن الموقف كما يبدو فعلا قد آثر على نفسيتك بشده .

كونى بخير وزى ما بيقولوا ارمى حمولك على ربنا وادعى ان شاء الله يريح قلبك ويطمنك :rolleyes:

لولا

[fatfouta]

يا منال يا حبيبتى المضوع مش موضوع توك توك.......إنتى بقيتى خلاص مش طايقة اى حاجة حواليكى ومستنية موضوع الهجرة بفارغ الصبر وربنا يوفقك ويديهولك عن قريب وترحى كندا كده وتبقى تحكيلنا عن اللى بتشوفيه هناك

انتى اللى بتدورى على الحاجات اللى تضايقك وتكبريها فى وش نفسك

هتكلم معاكى فى كام نقطة ومش عاوزاكى تزعلى منى عشان انتى عارفة انك اختى وعاوزة انصحك

اولا...لما تكونى ماشية فى الشارع اوعى تكلمى سواق ميكروباص او توك توك او تفتكرى نفسك هتهذقيه وهو هيسكت......لألألألألألألألألأ ده دل بيبقى لسانهم متبرى منهم ومابيصدقوا يشوفوا واحدة يحسوا انها بتبص لهم نظرة مش تمام ويضايقوها ويستفزوها يعنى هما ممكن يكونوا بيعاكسوكى بالحركة اللى عملوها دى وانتى رديتى قام رادد عليكى وقل ادبه....يبقى ماكنتيش تردى ولا كانك سامعاه اصلا لانك عمرك ماهتجاريهم فى لسانهم

ثانيا....انا بشوف التوك توك ليه رقم بيبقى مكتوب مجلس محلى مدينة......مش عارف ايه وفيه رقم صغير كده تحت تقريبا

ثالثا...على فكرة انا بيت جوزى اللى المفروض ان شقتنا فيه فى منطقة عشوائية والتوك توك فيها مااااااالى الدنيا وانا مش بدافع عنه انما هو لو كان اتقنن صح كان هيبقى وسيلة حضارية لان يا منال ولا مؤاخذة كده يا حبيبتى فيه شوارع اصغر من الحوارى وماينفعش ان التاكسى يدخلها وسواق التاكسى ممكن يهزقنى لو قلتله ادخل بينا هنا

فدايما اضطر انزل برا عالطريق الواسع واخد توك توك لجوا وهو ده الوحيد اللى بيرضى يدخل بيا فى الادغال اللى جوا......يعنى فيه ناس بتستنفع بيه والله

رابعا.......موضوع بقى انك تروحى تشتكيه ده انسيه لان دول بيبقوا دافعين لدول وكله مستفيد

يا حبيبتى هونى على نفسك وكفاياكى احتقان فى نفسك يا منال الهجرة جاية جاية وماتخافيش طالما انتى طلبتى من ربنا انك تعيشى برا مصر يبقى ربنا هيديهالك وذى ما قلتلك لولا قولى ياربوسيبيها على الله

تم تعديل 7 يونيو 2010 بواسطة fatfouta

[اغابي]

بصراحة اللى حزين على مصر اكتر . . . هو اللى شايف عيوبها لحظة بلحظة وما عندهوش لا مبالاه - لكن ما باليد حيلة اننا نغير حتى ولو شي من كل شيء

مين فينا عنده سلطة انه ينزل قرار بمنع التوك توك او حتى ابسط شيء يلتزم بقانون سن معين لسائق التوك توك

- اصلا منظر البلد بقت شبه النيبال واندونيسيا والاحياء الفقيرة فى الفلبين والهند .

مصر التاريخ والحضارة بقت بالمنظر داه

المشكلة اغلب حوادث التوك توك من اطفال ضد اطفال - اما يكونو اطفال بيلعبوا فى الشارع او اطفال بيسوقوا التوك توك

انا حاسة بيكي يا منال ...انت مفتقدة الحضارة فى بلدك ودى امنية للكل و الشوارع ومنظر الرقى

انا حاسة بيكي يا منال ...لانى لما نزلت اخر مرة زيارة لمصر - توك توك خبط ابن اختى ( 5 سنين ) قدام الناس كلها ورجل الولد اتكسرت .

انا حاسة بيكي يا منال . . من كم صوت الكاست العالى اللى مشغله صاحب التوك توك ناهيك عن الالفاظ الخارجة والتى تخدش حياء المارة -

اللى بيتكلم فى نقطة زى كدا - مش معناها انه اقل وطنية وحبا فى البلد من اى حد - بالعكس هو بيطرح قضايا على ارض الواقع المصري - لنتناقش فيها

لعل وعسي نجد حلول - ولنبدأ براس الفساد - ومع الوقت - كل الامور تتغيير للافضل .

اغابي

:rolleyes:

[herohero]

هتكلم هتشغلوا اسطوانة الوطنية يعني مطلوب دفن الرؤوس ف الرمال

انا موافق ان التوك توك يفكرنا بالهند لكن مش كل الهند ها ونيبال لكن مش كل نيبال واي دولة تقولوها بيبقى فيها فقروغنى لكن مشكلتنا ف مصر هنرجع نقولها تاني اننا بنفكر بفكر الفقر

حلولنا كلها مبنيه اننا بلد فقيرة وسكانا كتير ولازم نعايرهم باللقمة اللي بياكلوها

حد منهم دور ايه الصناعات اللي تناسب الدول اللي زي مصر الهند شافت ايه اللي يناسبها وعلمته حد فكر بجد يطور مناهج التعليم مش مشكلة توك توك ولاغيره

انت سياستك كلها مبنيه ع اننا دولة فقيرة معرفشس فقرتنا ليه يا ابو 82 سنة ولا حاربنا ولا دخلنا ف مشاكل خليت البلد كلها عشوائية ف الفكر وف كله وف حلولها للازمات

ارجع واقول عاوزين نحلها لازم السلم يتمسح من فوق

السلم بيتمسح من فوق

ده شعاري وبقيت مقتنع بيه

[ابو محمد بن مصطفي]

التوك توك دي الفكرة العبقرية لتنفيذ البرنامج الانتخابي للريس

ايه علاقة البرنامج الانتخابي بالتوك توك

البرنامج الانتخابي كان فيه اتاحة فرص عمل لتشغيل الشباب

شوفوا انتم كام توك توك في البلد دلوقتي نقول مثلا نصف مليون في 2 شاب للعمل وردية صباحية واخري مسائية

يبقي اجمالي فرص العمل المتاحة مليـــــــــــــــــــــون فرصة عمل

شوفتم التوك توك بقي مشروع قومي لتشغيل الشباب ولتنفيذ البرنامج الانتخابي لسيادة الريس

لسة هنبني مصانع ونشغل

يبقي محدش يتكلم عن البرنامج الانتخابي تاني قصدي التوك توك

[لولا]

هتكلم هتشغلوا اسطوانة الوطنية يعني مطلوب دفن الرؤوس ف الرمال

اسطوانة الوطنيه اسطوانه جميلة يا عزيزى هيرو بس انت شكلك مبقتش تحب الأغانى :closedeyes:

الحقيقه طبعا لا احد مع دفن الرؤوس فى الرمال اولى خطوات التصحيح فى اى شيء ادارك الخطأ، الإعتراف به ، وضع تصور لكيفيه العلاج.

المظاهر السلبيه اصبحت طاغيه لكن ربطها بقرارات خلع الإنتماء من كل من كان يرفضها "والرفض حتما يدل على فطره سويه " هو الغير مقبول.

أظننا كلنا قرأنا ذات يوم المجموعه القصصيه للكاتب "يحى حقى " ورائعته "قنديل ام هاشم".

ذلك الطبيب الشاب الذى تفتح وعيه فى مجتمع ريفى تشوبه الخزعبلات .. سافر للخارج وأكتشف حجم المآساة التى يعيشها أهل قريته

والغرق فى الجهل .. عاد بعد سنوات ودخل القريه وهو يشعر بالغضب الشديد والتنكر من كل ما فيها .. ومن فيها!

عاش صراع نفسي صعب كان يستطيع ان يشعر عمقه كل قارىء للقصه وهو يجزم انه سيختار حتماً ان يترك القريه بمن فيها ويعود لإنجلترا

ذاك البلد المتحضر المتقدم لكنه فى لحظة ما قرر أن يستجمع قوته ..

أن يعرف ان الواقع الأليم من حوله لن يتغير بيد غير يديه..

ادرك ان تغير الواقع يتم قبل اى شيء بأن نٌحبه وننتمى له وندرك مسؤليتنا تجاهه كمثقفين ومتعلمين .

مصر ستتغيير عندما يصبح عدد من يؤمنون بدورهم فى التغيير اكثر ممن يديرون وجهوههم بلا مبالاه او يختارون الرحيل كما اخترناه نحن انا وانت وهو وهى

"أقصد كل مغترب" .

جميعنا مقصرون فى حق مصر وتضيع مجهودتنا متناثره دون ان تشعل نفق مظلم ماعادت الشموع الصغيره المتفرقه تكفى لإضائته..

ارجع واقول عاوزين نحلها لازم السلم يتمسح من فوق

السلم بيتمسح من فوق

ده شعاري وبقيت مقتنع بيه

السلم محتاج يتغسل يا عزيزى ..

ده شعارى وبقيت مقتنعه بيه !

تحياتى

لولا

[herohero]

حياتي يا اخت لولا وانا معاكي ف مسح السلم بس مازلت مصرمن فوقعشان ينظف بجد

وانا مقتنع ان انا وغيري هربنا من البلد بس والله الواحد كان بيحاولع المستوى الصغير الواحد اتعقد ياستي ابسط شيئ سواق الميكروباص يستغل الركاب وانت بينهم عارفة تتكلمي محدش بيقف معاكي واللي بيضحك والي يقولك معلش يابيه وتحسي ف الاخر ان الواحد مجنون مجتم السلبيين فيه واللي بيطبقوا مبدا الاناملية كتييييييييير

واهي لما هتخرب هتخربع دماغ الكل بصراحه حاليا الوضع تغير بدرجه ملحوظة وبردهانا بقيسه فالميكروباص وانت راكبه عربيتك ولا ف النادي ولا ف مارينا ده مجتمع مصر الحلوة ده لا فارق معاه تغيير ولاغيره ده اموره ماشية وخلاص

اما المواطن البسيط اللي بيتشعبط ف الميكروباص ولا الاتوبيس ولا راكب التوك توك ده اللي يديك نبض الشارع بجد

كل دول مجتمعين بدات احس فيهم بنبرة غضب وبدئوا يتكلموا ويقولا ده غلط لا للاستغلال والشباب دلوقتي سيبك من التمراوي اوالعمراوي بس الباقي عاوزين يغيروا

صحيح احنا بنتلكم عن التوك توك بس والله كله موصل لبعضه التوك توك والتحرش والفساد الاداري والبطاله والنخدرات كل ده ينتمي لمنظومة الفساد والخلل اللي بنشوفه ف بلدنا للاسف

اسف ع الاطاله بس معرفش شايف ان التوك توك هو الشعار المناسب لحالنا حالنا اللي ماشي ع تلات عجلات لامحصل عربية ولا موتوسيكلفمش متزن طبعا

وبنحمله فوق طاقته

بحس ان مصر توك توك كبير قدتنا لا عندهم فكر واضح ولا رؤية البلد رايحه فين ماتعرفش ناوين لنا ع ايه "هي نيه سودة شكلها " برده محدش عارف مين اللي هيمسكنا معلش ف الكلمة مين اللي هيقود ...........

اه ماحنا كده نصحى ع قرارت وننام عليها ولا لنا اي راي فيها

يبقى سياستنا زي التوك توك ولا لا ماشية بعجله واحدة ادامانيه طب لو وقعت العجلة ده فيه استبن ولا لا

صحيح عجلتنا كويسة وفيها النفس لسه بس قدمت هتفضل ساحبانا معاها لحد امتى عمرها الافتراضي انتهى :closedeyes:

اه ياعجلة

[Morial]

العزيزه منال ..

يبدو جليا أن المسألة ليست مسأله توك توك انهار معه الإنتماء الكامل للوطن !

لا اريد ان اقلل من شأن تلك الأشياء الصغيره هنا وهناك ولا حتى الكبيره .. ولا الكبيره جدا والمظاهر المثيره للحنق وللغضب وللأستنكار.. كُلنا كبشر نمر بتلك المشاعر وكمواطنين مصريين نتعايش مع مواقف مشابهه لا تتوقف منذ لحظة الخروج من باب المنزل .

الإنتماء للوطن شيء لا أستطيع ان استوعب بأى حال أنه شيء كما رداء نخلعه عندما نختنق تماما منه ايا كانت الأسباب.. !

هدئى من روعك عزيزتى لأن الموقف كما يبدو فعلا قد آثر على نفسيتك بشده .

كونى بخير وزى ما بيقولوا ارمى حمولك على ربنا وادعى ان شاء الله يريح قلبك ويطمنك :closedeyes:

لولا

عزيزتي لولا

معك كل الحق في ان التوك توك ليس بسبب كافي لخلع رداء الانتماء ولكنه

بكل تأكيد يصلح لأن يكون القشة التي قسمت ظهر البعير

وأنا لست بصدد أن أعد وأحصي ما تحمل ظهري وما زال

فالمقام لايتسع

وأعصابي لم تعد تحتمل

والأكيد أن السفينة تغرق

ولست بنادمة سوي علي ضياع أحلي سنوات عمري هباء

أملا في أن ينصلح الحال

وبمنتهي الصدق

لم يعد يعنيني في قليل أو كثير إن هو إنصلح أو ظل مائل

لك خالص تحياتي

تم تعديل 7 يونيو 2010 بواسطة Morial

[Morial]

يا منال يا حبيبتى المضوع مش موضوع توك توك.......إنتى بقيتى خلاص مش طايقة اى حاجة حواليكى ومستنية موضوع الهجرة بفارغ الصبر وربنا يوفقك ويديهولك عن قريب وترحى كندا كده وتبقى تحكيلنا عن اللى بتشوفيه هناك

انتى اللى بتدورى على الحاجات اللى تضايقك وتكبريها فى وش نفسك

هتكلم معاكى فى كام نقطة ومش عاوزاكى تزعلى منى عشان انتى عارفة انك اختى وعاوزة انصحك

اولا...لما تكونى ماشية فى الشارع اوعى تكلمى سواق ميكروباص او توك توك او تفتكرى نفسك هتهذقيه وهو هيسكت......لألألألألألألألألأ ده دل بيبقى لسانهم متبرى منهم ومابيصدقوا يشوفوا واحدة يحسوا انها بتبص لهم نظرة مش تمام ويضايقوها ويستفزوها يعنى هما ممكن يكونوا بيعاكسوكى بالحركة اللى عملوها دى وانتى رديتى قام رادد عليكى وقل ادبه....يبقى ماكنتيش تردى ولا كانك سامعاه اصلا لانك عمرك ماهتجاريهم فى لسانهم

ثانيا....انا بشوف التوك توك ليه رقم بيبقى مكتوب مجلس محلى مدينة......مش عارف ايه وفيه رقم صغير كده تحت تقريبا

ثالثا...على فكرة انا بيت جوزى اللى المفروض ان شقتنا فيه فى منطقة عشوائية والتوك توك فيها مااااااالى الدنيا وانا مش بدافع عنه انما هو لو كان اتقنن صح كان هيبقى وسيلة حضارية لان يا منال ولا مؤاخذة كده يا حبيبتى فيه شوارع اصغر من الحوارى وماينفعش ان التاكسى يدخلها وسواق التاكسى ممكن يهزقنى لو قلتله ادخل بينا هنا

فدايما اضطر انزل برا عالطريق الواسع واخد توك توك لجوا وهو ده الوحيد اللى بيرضى يدخل بيا فى الادغال اللى جوا......يعنى فيه ناس بتستنفع بيه والله

رابعا.......موضوع بقى انك تروحى تشتكيه ده انسيه لان دول بيبقوا دافعين لدول وكله مستفيد

يا حبيبتى هونى على نفسك وكفاياكى احتقان فى نفسك يا منال الهجرة جاية جاية وماتخافيش طالما انتى طلبتى من ربنا انك تعيشى برا مصر يبقى ربنا هيديهالك وذى ما قلتلك لولا قولى ياربوسيبيها على الله

فتفوته حبيبتي

اولا انا عمري ما ازعل منك لأني متأكدة من حسن نواياكي وطيبة قلبك وان اللي فقلبك علي لسانك

لكني مختلفة معك في عدة نقاط

اولا

موضوع الهجرة ده بيصبرني علي تحمل ما لم أكن لأتحمله من قبل لسبب بسيط هو ان عندي امل في الخلاص وبقول اللي خلاني اتحمل كل السنين دي يخليني اتحمل كام شهر وبجملة

علي سبيل المثال لا الحصر تذللي لموظفي الدوائر الحكومية لأنهاء بعض المستندات الرسمية والتي من حقي الحصول عليها بالحُسني و أصراري علي معاملتهم بمنتهي الذوق والاحترام - هو أقرب ما يكون الي التذلل- علي الرغم من تعنتهم وغبائهم وسرقتهم لي عيني عينك

والله العظيم تلاته موظف في مجمع التحريربعد ما ارغمني علي اني ادور علي الورقة اللي انا طلباها في اربع دوسيهات من الحجم المتين وبعد انا ما طلعتها قاللي بمنتهي البجاحة فين حقي

ولما سألته يعني أيه؟

شخط فيا مستنكرا غبائي وقاللي

مش عارفة يعني ايه؟يعني فين شقايا وعرقي

ولما طلعتله كل الفلوس اللي كانت متبقية معايا في الشنطه اتريق وحلفتله اني في اللحظة دي لا أملك من المال سوي هذا الذي أعطيه

أتريق عليا ببجاحة ومسك الورقة بتاعتي وفضل يهزها في الهوا ويقول

يااااللاااااااا أوكازيون وبنبيع بسعر الجملة

كان بيغنيهالي وبيلحنها كمان

قليل الادب اللي بيأكل ولاده مال حرام المرتشي الفاشل

شوفتي يا فتفوته قهر وقلة أدب ومسخرة وبجاحة أكتر من كدة؟

والنبي الله يخليكم ويرضي عليكم سيبوني باللي فيا

ومحدش يقولي أنتماء ووطن

أنا متنازلة عن حتة الوطن بتاعتي وبكفاية أنتماء التمانين مليون

أنا لا هزود ولا هنقص في مصر وخيرها اللي زاد وغطي

اللي هيزيد هو انا يوم ما ابعد

واللي هينقص هو انا يوم ما اقرب

تم تعديل 8 يونيو 2010 بواسطة Morial

[بركة]

دعاء سلطان / الدستور معقبة على مشاهدة فيلم عسل إسود لاحمد حلمي

أجمل ما في هذا الفيلم أنه فسر لي وأجاب عن سؤال: لماذا نحب هذا البلد الذي يكرهنا حتي الآن؟ ولماذا ننفعل وتقفز عروقنا من أماكنها دفاعا عنه وعن كل من يهاجمه بعد كل ما يفعله بنا وفينا؟ أكد لي الفيلم أننا لا نحب مصر ذلك الحب الأبله، ولكننا نحبها لأنها تشبهنا.. حالها مثل حالنا، فنحن أجمل من صورنا المكفهرة علي الرقم القومي، وهي أجمل من شوارعها القبيحة ومن يمتلكون تحديد مصيرها وتشويهه.. تكرهنا وتحبنا - في نفس ذات الوقت - تطردنا وتبكي علينا ونبكي عليها.. نرغب في أن نموت فيها «هي مصر قرافة؟!»، وأن نحيا بعيدا عنها.. نحن فيها بلا ثمن ولا قيمة ولا كرامة، وعندما نهجرها نفرح بمصريتنا ونفتخر بها.. فقط ونحن خارجها! نعم نحن كل شخصيات هذا الفيلم بطيبتها وإنسانيتها وسذاجتها وأمانتها وصدقها وحنانها ودهشتها وكرمها وإيمانها وأملها ونبلها.. ونحن كل هذه الشخصيات بعنفها ونصبها وكذبها وقسوتها وبخلها وخستها ويأسها وكفرها بالمستقبل، لكننا حقا شغوفون بالحياة في الحالتين وننتظر من يمسح عنا تراب الأيام «السودة» ويسقينا عسل العيشة المرتاحة الذي لا شك أننا نستحقها.. بالتأكيد سيأتي اليوم الذي نهب فيه لاقتناص حياتنا ممن سرقوها، وحتي يأتي هذا اليوم سنظل مشحونين بكل غضبنا وشجننا وبهجتنا ورضانا، الذي ساهم «عسل إسود» في إحياء شعلتهم في نفوسنا.. «عسل إسود» فيلم كوميدي لم أكف عن الضحك أثناء مشاهدته، وأصابني بالشجن بعد مشاهدته.

[herohero]

لقيت نفسي مش لاقي الا رد من اغنيه نور عبد الله وهي اللي كتبت ماشربتش من نيلها كتب لنا الاغنيه الرائعه اللي بتفسر حالتنا ف فيلم احمد حلمي عسل اسود

الفيلم عجبني ومستغرباذاكان هيعجب شبابنا فمصر ولا لا لانه بعيد عنهم الشباب عايش ف الدوامة ومنهمالليكبردماغه ومنهم الي بيعاني وف كلا الحالتين محسش بالمواقف اللي ف الفيلم اما اللي طلعوا بره حسوا بالمواقف ده ف حاجات كتير ويمكن معظمها

--------------------------------------------------------------------------------

بالورقة والقلم

-----

خدتينى 100 ألم

انا شفت فيكى مرمطة وعرفت مين اللى اتظلم

ليه اللى جايلك اجنبى

عارفة عليه تطبطبى

وتركبى والش الخشب وعلى اللى منك تقلبى

عارفة سواد العسل؟؟

اهو ده اللى حالك ليه وصل

ازاى قوليلى مكملةوكل ده فيكى حصل؟؟؟

يا بلد معاندة نفسها

يا كل حاجة وعكسها

ازاى وانا صبرى انتهى لسة بشوف فيكى امل!!؟؟

طرداك وهى بتحضنك

وهو ده اللى يجننك

بلد ماتعرف لو ساكنها والا هى بتسكنك

بتسرقك وتسلفك

ظلماك وبرضه بتنصفك

ازاى فى حضنك ملمومين وانتى على حالك كده!!؟؟!!؟؟

[herohero]

ياريت تركزوا ف الكلمتين دول الاه ماهي حاجه تغيظ السعودي بيستثمر ف مصر بقوانين عمر اهله ماشافوها ف السعوديه وياخد الحاجه برخص التراب واحنا يطلع عينا لو حبينا نستثمر ويرحب بيه ف المطر واحنا نقف عشان البصمة نفسي نبقى محترمين ونطبق مبدا المعامله بالمثل

بس خلص الكلام