سماعة المحمول انفجرت في أذن الموظف

[Simba]

انفجرت سماعة موبايل صيني أثناء استخدامها لأول مرة في أذن موظف بوزارة الإسكان مما تسبب ذلك في اصابته بحروق من الدرجة الأولي بأذنيه ويده اليسري.. تم نقل الموظف المصاب ويدعي جمال التهامي »٥٤ سنة« إلي مستشفي المنيرة العام وانتقل لسؤاله وباشر التحقيق المعتصم بالله جبال وكيل نيابة السيدة زينب باشراف محمود إسماعيل رئيس النيابة.. قرر الموظف في التحقيقات انه اشتري موبايل صيني من أحد محلات الموبايلات بشارع رشدي بالموسكي منذ ٠١ أيام وأثناء استخدام السماعة الخارجية »الهاند فري«، الخاصة بالموبايل انفجرت في اذنيه ويده اليسري.. أمر المستشار محمد غراب المحامي العام الاول لنيابات جنوب القاهرة باستدعاء صاحب المحل الذي اشتري منه المجني عليه الموبايل لسؤاله والاستعلام عن كيفية دخول هذا النوع من الموبايلات لمصر وارسال سماعة الموبايل للمعمل الجنائي لفحصها

[doha]

هم مش كانوا منعوا الموبايلات الصيني من كام شهر وقالوا خلاص مش هتشتغل على الشبكه اساسا . . رجعوا في كلامهم ولا ايه ؟

على العموم الخبر ده والي سمعته امبارح في التلفزيون برضه اظنه كفيل انه يردع كل من تسول له نفسه يشتري اي موبايل من بتوع الغلابه ومقداموش بقى غير على توكيلات الحيتان بتوع السوق .. ربنا يعين

طبعا الجماعه الي معاهم الآي فون بقى محدش يقدر يكلمهم .. صباحه قر

[اغابي]

فعلا يا سمبا

انا قريت الخبر داه نهارده فى الصحافة

خلو بالكم دى مشكلة - ولو كان حصل الموقف نفسه فى اوربا او امريكا

كانو منعوا فورا استيراد الحاجات دى وكان عملوا قانون كمان يعاقب على استيرادها

كل الحاجات الصيني مش كواليتي وممكن تضر الناس طب ليه ماليا الدنيا كده

انا زهقت - كل حاجة صيني صيني

احنا زمان كان الشيء الوحيد اللى مغرق الدنيا صيني هو الاطقم الصيني والخزف الصيني

- لكن دلوقتى كل حاجة صيني - والمشكلة الاضرار الخطيرة .....

اغابي

jmb-)

[Simba]

صباح الخير يا مدام ضحي

من غير قر ولا حاجة اهم ميزة كنت بدور عليها في الاي فون وهي الكتب مش عارف استخدمها ولا شكلي هعرف

ده غير اصلا ان الاي فون مكتوب عليه صنع في الصين

بمناسبة التلفيونات الصيني فبجد لها العجب انا اجازتي اللي فاتت كنت بشوف شباب والواحد اصلا ما ينفعش يقول عليهم شباب ماشي في الشارع وماسك التلفيون الصيني ومشغل اغنية بصوت عالي جدا وبيطوح دماغه يمين وشمال طربا غير طبعا تشويحه بايده اللي فيها التلفيون

بعدين الصيني بالمقارنة بالماركات التانية مش بتاع الغلابة ولا حاجة لانه معروف هيبوظ بسرعة ما يستحملش لانه صيني ابن صيني

فتمنه اي كان قليل فهو خسارة فلوس وبس

تم تعديل 3 يونيو 2010 بواسطة سمبا

[Simba]

انا زهقت - كل حاجة صيني صيني

والله بجد وانا حتي لما الواحد يدور علي حاجة عايزها مش بيلاقيها غير صيني لبس ولا اجهزة ومش عارف اصلا الاسواق كلها غرقانة ليه كده بالمنتجات الصيني

[se_ Elsyed]

صيني عن صيني يفرق

في أوروبا والدول المتقدمة عندهم معايير وأشتراطات محدده بتخلي الصينيين يلفوا حوالين نفسهم وما يقدروش يخالفوا الأشتراطات دي قيد أنمُله .. وبالتالي تلك المنتجات اللي الصين مغرقه بيها أوروبا وأمريكا تكاد تضاهي منتجات الدرجة الأولى الياباني أو الكوري او حتى الامريكي نفسه ... وكله بثمنه

أما في افريقيا والدول العربية المتأخرة .. فنهارو أبيض وكله ماشي ...

بتلاقي الصين بيصدروا لنا الزبالة بتاعتهم ... ويادوب معظم المنتدات تلاقيها one time use .... فطالما الناس بتدور عالسعر فقط .. يبقى إديها حاجات من ابو ببلاش وإبقى قابلني بعد كده ..

لكن مما لا شك فيه إن الصين تفوقت على نفسها .. وكبرى الشركات وخصوصاً شركات الحاسب الألي والتكنولوجيا بتصنع منتجاتها هناك عشان إنخفاض التكاليف

[pink rose]

كويس انكم قولتولي المصيبه دي

جوزي كان جايب موبايل صيني تقليد ال n95

لاقاه صغنن و محندق كده فاشتراه لمريم اصل الهانم عاوزة موبايل

[engmido]

كنت داخل اقول نفس الكلام بتاعك يا مسيو س س

القصة كلها ان الصين بتعرف تعمل كل حاجة واى حاجة لاى جودة تطلبها وكله بتمنه

فطبعاا احنا عايزين حاجة رخيصة جداااااااااا وممتازة جدااااا

بس طبعا هما مش هبل........وكمان المشكلة فى المستورد

لان الموضوع بيبدأ ازاى؟؟؟؟

- اى مستورد عايز مثلا سلعة معينة ولتكن اى حاجة قول مثلا مكنسة كهربائية نوع اصلى توشيبا مثلا

يقول للمصنع او المصدر احنا عايزين واحدة اخت دى بس فى حدود مثلا كذا

يقوله انا ممكن اعملهالك بكذا وبكذا وبكذا ( 10و7و5) مثلا

نفس الشكل مع فرق الخامة.........لان سر نجاح الصين فى الخامة بتاعته وامتلاكهم للخامات ومصدرها

طبعا المستورد يطلب ارخص حاجة واردأ حاجة.......طالما الشكل جذاب مش مشكلة

وشهر والتانى الحاجة تبوظ وغير واشترى ياباشا