مهو بيحب مراته وهي بتحب جوزها .. عرفتوا منين ؟

[doha]

من يوم مالواحد فتح عينه على الدنيا واستلمونا افلام ومسلسلات طالعه من قصص وروايات واحنا منعرفش غير خمس ست طرق للتعبير عن الحب

الابتسامه والتسبيله والكلمه الحلوة مع الورده الحمرة

كل مانتكلم عن الحب والحبيبة غصب عننا نلاقي عبد الحليم طالع بيملس على شعره يفرقه على اليمين وساعات تامر حسني بيتأكد من فتحه القميص قبل مايغمز غمزته ..

وكل ماتيجي سيرة الحب بترن في ودانا تنهيده ام كلثوم او نظرة زبيده ثروت وهي على سلم الطيارة

علامات كتير ممكن نحكي عنها لما نتكلم عن الحب مابين العشاق او المخطوبين .. بس فجأه الصورة بتقطع والصوت يروح ونلاقي الشريط بيسف لو جينا نفكر ياترى الحب شكله ايه مابين المتجوزين

مش دايما الواحد بيقدر يدخل على مراته بهدية في عيد جوازهم .. ومش مضمون برضه ان الهدية دي ممكن تسعدها لو حصل وافتكر

وبرضه مش دايما الست في جمال نادية لطفي ولا انوثة هيفاء عشان تبقى اي كلمه منها ليه كلمة غزل ورضاها عنه هو غاية مراده

اجمل مافي الموضوع ان الحب مش كده خالص .. وملوش علاقه بكل الي ( علموهولنا ) او حفظوهولنا من وحنا صغيرين

ملوش علاقه برضه بالمواصفات ولا المقاييس ولا القدرة على التعبير والبوح بالمشاعر ..

ممكن في موقف عابر او لحظة عابرة يكتشف او تكتشف واحد من الطرفين قد ايه التاني بيحبه وقد ايه هو بالنسبة له مهم

المشكلة ان الطرف التاني ممكن ( ميلقطهاش ) وميعرفش ان الي حصل ده دليل بل وعلامه دامغه على الحب ..

وفي احيان تانيه بيكون في مشكلة من نوع تاني

احد الطرفين بيحب الطرف التاني لكن مش قادر او مش عارف يعبر له بطريقة ( عملية ) عن ( حجم ) الحب ده

اهو ده بقى الي عاوزين منقعش فيه .. وبناء عليه فكرت .. ماتيجوا نحكي لبعض

لحظة او موقف او كلمه مش شرط تكون حصلت لك .. ممكن تكون شفتها او انحكت لك او كنت شاهد عليها

موقف حسيت فيه ان يااه قد ايه الست دي بتحب جوزها

او ماشاء الله قد ايه الراجل ده بيحب مراته

تعالوا نتشارك مع بعض في تجميع العلامات دي يمكن تكون دليل لاي حد فينا عاوز يحسن من حياته او يستكشف طبيعه علاقته بطرفه الاخر والي يمكن تكون اقوى مما يظن ..

قولوا لنا بقى

الحب بين المتجوزين .. شكله ايه وبتعرفوه ازاي ؟ ..

[hanzalah]

اتصور جزء كبير من المشكلة هو مفهومنا للحب وطريقة التعبير عنه

يعني بيكون فيه اكلشيه او تابوه لازق ف دماغي

لو مراتي مش بتتبع نفس الطريقه والاسلوب اللي ف دماغي .. يبقى مش بتحبني

ناقص اقول لها .. انظر الشكل .. كما في كتب الدراسة زمان !!

الشيء الجميل انه كل واحد يبقى مرن انه يستقبل الحب من الطرف الاخر بالطريقة التي يجيدها هو وليس اللي ف دماغي انا

مثلا ..

زوجتي اصبحت بعد سنين تعرف اني اتكسف اقول لها كلمات حب !! بس ممكن اكتب

فاصبحت تقول لي : عيد ميلادي بعد بكره

أجيب الورقة والقلم

:lol:

ووشي يروح الوان الطيف ..

لكن من اللحظات الجميلة التي اذكرها في التعبير عن الحب بين المتجوزين ..

كنت دائما اشوف زوج عمتي رحمة الله عليه

لو حكمت ظروف عمله انه أكل خارج البيت اكله ودخلت دماغة

يقوم يجيب منها لعمتي وهو مروح البيت على طول

شيء استعجبت له وانا صغير

لكن فهمت منه لما كبرت

انه حابب يشاركها شيء - اضطر - يستمتع بيه لوحده

يا سلام ياعمو

:lol:

قول واشجيني ياسيدي ..

الله يرحم ناس زمان واخلاق زمان وستات ورجالة زمان

[pink rose]

اتصور جزء كبير من المشكلة هو مفهومنا للحب وطريقة التعبير عنه

يعني بيكون فيه اكلشيه او تابوه لازق ف دماغي

لو مراتي مش بتتبع نفس الطريقه والاسلوب اللي ف دماغي .. يبقى مش بتحبني

ناقص اقول لها .. انظر الشكل .. كما في كتب الدراسة زمان !!

الشيء الجميل انه كل واحد يبقى مرن انه يستقبل الحب من الطرف الاخر بالطريقة التي يجيدها هو وليس اللي ف دماغي انا

مثلا ..

زوجتي اصبحت بعد سنين تعرف اني اتكسف اقول لها كلمات حب !! بس ممكن اكتب

فاصبحت تقول لي : عيد ميلادي بعد بكره

أجيب الورقة والقلم

:wub:

ووشي يروح الوان الطيف ..

:blush2:

لكن من اللحظات الجميلة التي اذكرها في التعبير عن الحب بين المتجوزين ..

كنت دائما اشوف زوج عمتي رحمة الله عليه

لو حكمت ظروف عمله انه أكل خارج البيت اكله ودخلت دماغة

يقوم يجيب منها لعمتي وهو مروح البيت على طول

شيء استعجبت له وانا صغير

لكن فهمت منه لما كبرت

انه حابب يشاركها شيء - اضطر - يستمتع بيه لوحده

يا سلام ياعمو

قول واشجيني ياسيدي ..

الله يرحم ناس زمان واخلاق زمان وستات ورجالة زمان

اوعي يكون جوزي هو جوز عمتك و احنا ما نعرفش :lol:

اصل جوزي بيعمل كده :wub:

[doha]

كنت دائما اشوف زوج عمتي رحمة الله عليه

لو حكمت ظروف عمله انه أكل خارج البيت اكله ودخلت دماغة

يقوم يجيب منها لعمتي وهو مروح البيت على طول

الله .. عجبتني الحته دي

اهو ده حب بجد

مين يزود ..

[hanzalah]

اوعي يكون جوزي هو جوز عمتك و احنا ما نعرفش :wub:

اصل جوزي بيعمل كده :wub:

إيه الصدف السعيدة دي يا استاذه ريمو

طب ياريت ..

ده انا لو عمتي كانت بجمال الصورة كده .. كنت عشت ف بيت عمتي طول عمري

:lol:

بس هو فيه مشكلة صغنونه

:blush2:

عمتي دلوقتي ... يعني ... تقدري تقولي يعني ..

مع جوزها

فوق

فوق خالص

ربنا يرحمهم

:wub:

[مغتربة]

الحب كالهواء

ليس له طعم و لا لون و لا رائحه و لا ملمس

و رغم كده بنعرفه على طول اول ما نلاقيه هجم علينا كده من الشباك مره واحدهو نلاقى نفسنا بنغنى مع شاديه

بصراحه هواك عدى الشباك :blush2: :lol:

و الحب هو نتاج تفاعلات كميائيه داخل جسم الشخص المحب

و بما انه لا يوجد شخصين على وجه البسيطه متطابقين

فبالتالى لكل شخص حبه الخاص و طريقه تعبيره الخاصه ايضا

قد يكون الشعراء و الفنانين اسرفوا فى الحديث عن اكثر علامات و طرق التعبير عن الحب شيوعا

لكن بالتاكيد ان كل علاقه حب جديده تنشيىء بين اثنين بتكون حكايه جديده جدا متحكتش قبل كده و متعرفتش قبل كده

بتكون مولودهم هما الى ممكن يشبه مولود غيرهم (يخلق من الشبه اربعين ) :wub: :wub:

بس استحاله يتطابق معاه

بتظل لكل قصه نكهتها و طعمها الخاص و مفرادتها الحصريه الخاصه باصحابها فقط

[ذهبية]

كما انتى دائما يا ضحى موضوعك رائع

انا هاتكلم عن موقف انا مريت فية على قد ماهو كان شديد القسوة جدا ......لكن عرفت منة اشياء لا يمكن اعرفها الا لو مريت بيها

زواجى كان تقليدا ...... يعنى لم اعرف زوجى و كانت فترة الخطوبة قليلة جدااا ...... لم تكمل شهور معدودة

و كنت مقتعنة بشكل حب......... معين فى خيالى زى ما كنا بنتفرج كدة فى الافلام يجى كدة تحت الشباك

و زى ما شوفنا فى افلام عبد الحليم ....... جوابات غرام و اغانى و طبعا عشلان انا ما مريت بالموضوع دة

فلم امر بالحب و لم تشتعل تلك اللحظة السحرية ......اللى القلب يعلن فيها ......عن اقتحام ملوش مقاومة يغزو الروح والقلب بلا مقاومة

حتى مررت بموقف صعب فى حياتى انا و زوجى

اكتشفنا فجاة .... بالصدفة البحتة وجود مرض مجرد ذكرة ياتى غضة بالقلب المرض الذى يجعل كل الناس تعد الايام الباقية فى الحياة

لم نصدق و لم نتحمل اللحظة معا و اجرينا الكثير من التحاليل للتاكد من النتيجة و للاسف كل مرة تاكد

مر عليا شريط حياتى كلة امام عينى و فجاة

رايت كما انا كنت عايشة فى متع لم اعرف قيمتها .... كم رزقنى الله باكثر مما احلم .....و لم اشعر كم كان بين يدى اعظم حب

كيف لم اشعر بية الا....... و انا على عتبة ان افقدة الى الابد

واكتشفنا هذا فى ايام العيد المبارك...... كان اسوء عيد الكل سعيد يمرح و يضحك و انا و اسرتى الكبيرة و الضغيرة يبكى

فى هذا اليوم ...... فقط عرفت كم هذا الحب الذى كان فى قلبى..... و لم اشعر بية الا الان

حتى ملابسة كان لها قيمة.... حتى برفانتة ... كانت لها قيمة حتى حذائة الذى يرتدية كان لة قيمة ...سجادة صلاتة سبحتة

اى جزء فى المنزل لة فيها لها طعم اخر لم اشعر بة

فقط هذا اليوم عرفت قيمة حبى لزوجى

فى هذا اليوم فقط شعرت بحياتى كم كانت جميلة

فى هذا اليوم فقط عرفت معنى الحب

لا ادرى هل هو طبع الانسان لا يعرف قيمة ما بين يدية الا لو امتحنتة الحياة امتحان اقوى و اقسى من طاقتة

هل لابد ان تاتى السعادة بعد الم هل دائما لابد لنا من دفع ضريبة حتى تحافظ على ما تملك

احمد الله انى دفعت تلك الضريبة و انى تعلمت الدرس احمد الله انى تعلمت ان الحب بين يديك ااقرب اليك مما تشعر

لا ينقص فقط الا ان تفتح عنيك و تراة

ذهبية

[doha]

كلامك يامغتربة ( نخشش في دماغي ) لانه مظبوط اوي بس كنت اتمنى برضه وبرغم الخصوصية بكل حاله انك تذكري لنا ولو مثال واحد على ( تكه ) كده مرت امامك وعرفتي فيها ان الي موجود قدامك ده ( حالة حب ) ..

متستغربيش ولكن وكما تتشابه الملامح وتتكرر فالتشابه في التصرفات وردود الافعال برضه وارد وبشده

----------

ذهبية .. مشاركتك خلتني ادمع .. مش عارفه اقول ايه بس بدعوا ربنا ان تكون سحابه وراحت لحالها ويكون كل الي حصل ده فعل ماضي وايام راحت لحالها خلاص .وتكونوا لقيتوا حل .. يااارب

[pocy]

متابعه وجايه ارد كمان شويه

[jasmin hamed]

عارفه كنت بعرف ابويا بيحب امى قوى اذاى؟

لما كان اول ما عينه تقع على البرتال و هوه لسه اخضر يجبهولها كل سنه عشان عارف انها بتحبه

لما كان بيجبلها فانوس رمضان كل سنه رغم انه تعدى الستين

لما كان سعات يدخل المطبخ يقطع السلطه او يعملها كوباية شاى و هيه يتغسل صحون الغدا

و امى كنت بعرف انها بتحب ابويا قةى لما ربتله ولاده الى هما مش ولدها و جهزتهم ز كانت بتذاكرلهم و مخصصلهم وقت اكتر من ولادها

و كانت بتاخد بالها من اكله و ماتدخلش البيت الى ممكن يعلليله السكر و حفظه مواعيد دواه اكتر منه

و تفاصيل كتير تانيه و على فكره عمرى ماسمعتهم بيقولوا لبعض كلام حب

[doha]

روعه ياياسمين اهو ده بجد حب ..

واضيف من عندي كمان فالحب هو ان يذكر الرجل زوجته بما تحب في غيبتها

يعني لما تشوفوا واحد بيمدح مراته بدون تكلف او مبالغه وهي مش موجوده قدام ناس ممكن حتى ميعرفوهاش فاعرفوا ان الراجل ده بيحب مراته

وبرضه لما تلاقوا وحده عماله على بطال تجيب في سيرة جوزها وتتحين الفرص عشان ( تحشر ) اسمه في كل حاجه تقولها وبتعمل كده بتلقائيه وبلا تفاخر مثلا او تعالي فتاكدوا ان الست دي ميته في دباديب جوزها

ربنا يديم النعمه على كل الي كده ويرزق الي لسه مش كده

ومازلت متابعه ..

[engmido]

الحب بين الزوجين فعل ثم فعل ثم فعل

والكلام ما بيأكلش عيش

بس الستات مخها صغيييييييييييييييييييررررر :lol:

[hOuSsAm]

انوثة هيفاء

حرام عليكى يا مدام ضحى

ظلمتى الانوثة بهيفا

نرجع بقى للحب واشواقه وافعاله

انا لسه محبتش

بس اجمل قصة حب شفتها بين ابويا وامى

يوم مابويا دخل المستشفى وامى تروحله كل يوم بعد عناء شغلها وحمل البيت ومتابعتى انا واخواتى

يوم مبيتنا اتحرق وبابا معرفش غير لما طلع من المستشفى باسبوعين وبعد ماتكدنا انه تعافى تماما

يوم مصبرت معاه فى بداية حياته لحد مكون نفسه وساعدته فى ده

يوم مابويا بيتكلم عليها باجمل الصفات قدام كل الناس وهى مش موجودة

يوم مبيساعدها فى البيت عشان لابد من المشاركة ومش لازم هى تعمل كل حاجة

يوم اهتمامها ان ابويا لازم يشوف كل حاجة حوليه حلوة

يوم مساعدة ابويا لاهل امى اكراما لها

واحترام امى لاهل ابويا تقديرا له

الكلام قليل اوى بس الافعال كتيرة جدا

دى عشرة سنين طويلة اوى

ربنا يدمها نعمة ويحفظها من الزوال

كلمة اخيرة

اكتر حاجة بتعجبنى فى الحب هى الاحترام المتبادل والاخلاص

[رضوي]

بسم الله الرحمن الرحيم

ومن آياته أن خلق لكم من أنفسكم أزواجاً لتسكنوا اليها وجعل بينكم مودة ورحمة

صدق الله العظيم

المودة والرحمة

أو ما نطلق عليهما لفظ الحب

هما المقوم الحقيقي للحياه علي وجه الأرض .......... فالحب هو الشمعة التي تضيء الحياه المظلمة

وفيه حكمة شهيرة بتقول

( حب الرجل هو جزء من حياته ....... ولكن حب المرأة هو كل حياتها )

بس الاتنين بيكملو بعض

ولما يكون فيه حب بنلاقي اهتمام كبير من كل طرف بالآخر ........ غيرة ......... التفات للتفاصيل الصغيرة

سعي كل منهما لرضا الاخر

واهم من كل دة

الاحترام

احترام كل منهما للاخر ............ أنا لو بحترم جوزي هعمل حسابه في كل حاجة ........

وهو لو بيحترمني ...... هيخاف عليا

احترام + تقدير حاجات = مودة ورحمة

الزوج عارف احتياجات زوجته وبالتالي بيحاول قدر الامكان انه يلبيها لها

والعكس بالعكس صحيح

[لماضة مصرية جدا]

السلام عليكم و رحمة الله و بركاته

الله...الله ....الله

ايه المساحة الحلوة دي

انا لما شفت التوبيك اول ما اتفتح.....

قولت في سري بقي ايون ده باب للمتجوزين....و احنا يا حرام هنقف نبص عليهم من خرم الباب....

بس بجد...انتوا فتحتولنا الباب ع الاخر

فتحتوا الباب و فتحتوا معاكو شبابيك...جابت لينا نسمة حلوة أوي

حقيقة كل المداخلات ليها بصمة خاصة....بس وقفت اوي عند مداخلة ذهبية المشاعر......و جاسمين.......

آه......اصلها هي التفاصيل الصغيرة أوي اللي بتعمل حياة مختلفة أوي

حقيقي......كلنا بنبقي فاكرين ان المشاعر لازم تتحط في قالب معين و نبقي داخلين اي ارتباط و احنا عايزين نعيش دور البطل و البطلة اللي اتوحدنا معاه سواء في التلفزيون...(او في حالتي في الكتب و الادب علي وجه الخصوص).....

انا لما قريت كلامكم.....اكتشفت واقع اجمل بكتير من كلمات نزار قباني.....و فاروق جويدة......و كل الشعراء اللي قضوا حياتهم في وصف علاقة حب بين رجل و امرأة....

هي تفاصيل صغيرة أوي.....بس متفردة جدا في نفس الوقت....و ده اللي بيديها طزاجتها ....لأن حقوق الملكية فيها لاصحابها مش لحد تاني

فكرتوني

مرة كنت حاضرة فرح.....كان هو قاعد جنبي......شاب متزوج منذ ما يقرب من 10 سنين...اعرفه عن قرب هو و زوجته......هو اكثر منها وسامة......لكن عندما نهضت من جواره و مرت امام عينيه...و الله لقيت في عينه نظرة المحب اللي بتلمع عينه لما بيشوف حبيبته ماشية قدامه...و كأنها جاية من سفر....و كأنها اجمل امراة في الكون...تمشي في خيلاء امام عينيه

يمكن الناس اللي بتتجوز......في وقت كتير مبتعرفشي تبص للبني آدم...او الانسانة اللي قاعدة جنبيه ع الكنبة.....بس لما بتقوم من جنبه و تبعد حبة.....بيهديها نظرة تسوي مليون قصيدة شعر

و النظرة دي....هي النظرة اللي كانت علي وش الشاب اللي بحكيلكم عليه.....يوم ولادة أول طفلة ليه.......مكنتش اتخيل انه بكي......اه و الله بكي....مع انه مسئول عن اسرة بحالها و معروف عنه انه شديد للغاية.....بس في لحظة......بكي....لانه بيبحها......لما شاف الطفلة بكي......بس قبل ما يحضن الطفلة حضن مراته

انا كنت هناك.....في لحظة الفرح......و كنت هناك لحظة الولادة.......

و شاركتهم كتير من التفاصيل الصغيرة في حياتهم....يمكن ناس كتير بيقولوا انها متناهية الصغر....بس اراها تصنع فارقا

هي ع الجانب الاخر....دايما بشوفها بتعمل حركة حلوة اوي....لو دخلت مكان....و هو موجود فيه....دايما تلاقيها تفحص المكان بنظرة طفوليه سريعة....و تسكن دائما جواره....و لو كان قاعد ع الارض...برضه بتلاقيها اتكورت جنبه

لو حصل.....و اراد ان يريح راسه...لا يجد غضاضة ان يريح راسه علي قدميها.........مهما كان حولهما ناس

لما ربنا ابتلاهم في اولي اطفالهما بمرض اللوكيميا....اخفي عليها لانها كانت في حملها الثاني........

بس لما رجع بدون الطفلة ولقيته قد حلق راسه تماما......

بصت في عينه و قالتله انا خايفة......قالها متخافيش...كل حاجة كويسة

قالتله و هي بتحاول تكذب قلب الام اللي جواها.....انا حلمت ببنتنا حلم مش حلو....

اخدها في حضنه و قالها متخافيش....و الله كل الامور كويسة

لما نامت...تسلل من جوارها...

و لقيته يبكي لوحده في عتمة الليل........

سالته اين ايمانك.......

قالي ايماني بالله ثم ايماني بهذه المرأة الراقدة هو ما يجعلني استيقظ كل يوم هو ما يجعلني اصمد

انا اتابعهما من بعيد...و اعيش معهم لحظات حب كثيرة مؤجلة...لكن يقيني ان قطعا الحب....هو أشياء اخري.....يصنعها عاشقين...بلغة لا يفهمها سواهم

جزاكم الله كل خير علي مساحة الود

علي مساحة الدفا

حافظوا علي مساحة عامرة جدا من التفاصيل مع حبايبكم لانها الرصيد الحقيقي اللي بيخليكوا فعلا تقدروا تصحوا كل يوم عشان تفتحوا شبابيك الحياة

ربنا يسعد قلوبكم....و ينور حياتكم بوجود حبايبكم

[ssamir]

العشره الطيبه.

أجمل ما فى هذه الدنيا زوجان متحابان.

هو يخالها تسكن تلك المضغه التى تنبض فى صدره بين الضلوع. وهى تراه عالمها ونور عينيها ومنتهى الآفاق...تأمل إعجاز الله عز وجل فى خلق النفس البشريه وفى خلق زوجها، وفى نسج أواصر الموده والرحمه بينهما..معجزه حقيقيه!

إن أعظم قصص الحب لا تجدها فى الروايات والأفلام بل قد تجدها خلف أبواب أكثر البيوت تواضعا...قصه أزليه رائعه تتكرر كل يوم دون أن تهتز لها أخيله الشعراء والأدباء، هو قصه الحياه...رجل وإمرأه لا يعرف أى منهما الآخر، لكل منهما طريقه، ولكل منهما عالمه الخاص، فإذا بالقدر يجمعهما معا، ويمهد لهما طريقا واحدا، ويقول لهما:" إذهبا معا روحا واحده فى جسدين ،إراده واحده فى عقلين، وبيتا واحدا لحبيبين".

ليس صحيحا أن أجمل قصص الحب بطليها روميو وجولييت، أو عنتر وعبله، أو ليلى ومجنونها..تلك مصائر لم تعرف إلا الشقاء..ضحت بإسم الحب دون أن تعرف منه لذته الحقيقيه..ولذه الحب فى الإطمئنان وفى الرضى..ثم إن الحب عاطفه تجلب السعاده للقلوب، وتستحيل معها قفور الحياه خمائل وأنهارا...إن أجمل قصه حب تأتى هديه من الله لأثنين من البشر رضى عنهما ورضوا عنه...

ولكن لا أحد يروى تلك القصه، لأن قليلا ما تتاح قراءتها للناس، حتى أولئك الذين يعيشون حياتهم كلها أبطالا لأحداثها، لا يكادون يطلعون أحدا على تفاصيلها. فمن أوتى السعاده يخشى أن تضيع منه، ويخاف أن يحدث بها النفس قبل الناس فتزول عنه، او تطالها عين حاسده...

أجمل قصص الحب تولد بمرور الأيام، وتكبر بتوالى السنين، وقد لا يكون بطل القصه يشبه ليوناردو دى كابريو أو بطلتها فى جمال كيت وينسليت، قد يكون هو زوجا عاديا بكرش وأنف كبير، وقد تكون هى زوجه ضعيفه النظر قصيره القامه ...ولكن العشره الطيبه وصحبه الطريق الطويل نسجت بينهما أقوى قصه حب ...ولكن لا أحد يكتب قصتهما، لأنها تحدث كل يوم، ولأنها تحدث فى سكون دون أن تصحبها دموع وآهات أو تحمل لنا أحداثها غرقى بالمئات فى ليله كالحه كئيبه، وسط مياه الأطلنطى، أو تسجلها عدسه جيمس كاميرون على أنغام لحن رومانسى هادر يشجينا فيه صوت سيلين ديون.

إن الحب الحقيقى ـ ذلك الحب الذى تولده العشره الطيبه فى قلب الزوجين

- لا صوت له، وإن كان يمكن التعبير عنه بصوت المحب، كأن تسمع الزوجه زوجها يغنى فى الحمام: "قولى أحبك لكى تزيد وسامتى"، فترد عليه هى من المطبخ بأغنيه: "رجعونى عينيك لأيامى اللى راحوا...علمونى أندم على الماضى وجراحه..."

الحب الحقيقى يسكن بيوتنا ويملأ علينا حياتنا ولكننا حين نفكر فى التعبير عن هذه النعمه الإلهيه العظيمه بوسائل إبداعنا القاصره لا نملك إلا الحديث الآلام والجراح والشجون وشتى التهم التى ألصقناها باطلا بالحب.

وسيظل الحب بين الزوجين معجزه لا يعلم سرها إلا الله، وومهما حاولت عقولنا القاصره البحث فى أسرار تلك المعجزه العظيمه، فلن نستطيع أبدا أن نكشف سر هذه الكيمياء العاطفيه الجميله التى تنبعث من حركه الزمان ومرور الأيام ، فتصنع من فقراء القلوب أبطالا لأجمل قصص الحب...قصص الحياه

______

منقول

[رحمة]

السلام عليكم اولا ثانيا الحب بين الزوجين في معظم الاوقات لا نجده ماديا يعني ممكن اول الزواج تكثر كلمات الحب و لكن بمرور السنين تقل او تتلاشي لكن الشعور الباقي في القلب يظهر و يحسه الطرف الاخر من لمسات او لحظات قد تبدو عادية لكنها تعبر عن القلب كنظرة قلق شديد علي الطرف الاخر عند المرض او نظرة لهفة و شوق بعد البعد او لمسه حنان عند الحاجة عندما يجعل احد الزوجان نصفه الاخر يحس ان بدونه الحياه لا تكتمل فهذا قمة الحب طبعا كلمات الحب و المودة ضرورية و لكنها جزء من الصورة الكاملة و هي المودة و الرحمة و العشرة

[Diab]

الرسول صلى الله عليه وسلم في إعلان حبه لعائشة رضي الله عنها عندما سأله عمرو بن العاص رضي الله عنه ؟

أي أحب الناس إليك يا رسول الله؟

قال: " عائشة، قال فمن الرجال قال أبوها". رواه البخاري ومسلم

نسب أبيها إليها ولم يقل أبو بكر