kwala

كنت فكرت كمان في حاجة ممكن احنا المغتربين نقوم بيها....وهيا اننا نمتنع عن تحويل العملة في الفترة الحالية دعما مننا لاقتصاد بلدنا لإن نظرا لهبوط قيمة الجنيه المصري ممكن دا يغري البعض بتحويل العملات علشان يكسب اكتر

فعلا الواحد قلبه حزين...احنا كنا برده في بنده انهاردة وقلت لجوزي فيه جو كآبة منتشر في المكان...لإن المصريين اللي كانوا بيعملوا ليه حس وروح كلهم شاحبين الفترة دي وماشيين ساكتيين!!! القلب حزين علشان هوا بعيد...زائد القلق على الأهل والاصحاب والجيران وعلى مصر حبيبتنا كلنا ربنا يجمعنا على خير يا مصر يا حبيبتي

طيب سؤال كدا بحكم خبرتك يا مهندسة عزة هو لو اسرة مكونة من 5 افراد...هل شقة بمساحة 135 متر هتكون كافية ؟...ولا هيمشوا يخبطوا في بعض دا لو افترضنا مثلا ان نسبة المنافع 15%ا شكرا جزيييييييلا

فعلا يا جماعة الاعتراف بالحق فضيلة ولما يكون فيه دولة بتكرم شعبها بأي طريقة كانت....فهي تستحق أن نذكرها بالخير ونقدر لهم ذلك بصرف النظر عن حالنا كمصريين بجد عن تجربة دول الخليج المواطن فيها واخد كتييييييييييير أوي من حقوقه اكتر من بلاد تانية كتير (ومصر منها)ا على الأقل الكعكة في الخليج بتتقسم على الحاكم والمحكومين مع بعض مش عارفة ليه دلوقتي افتكرت الشيخ زايد الله يرحمه....لما لقى واحد مصري بيشتغل (زبال)ا فأصدر قرار إن المصريين ما حدش منهم يشتغل زبال ويكونوا في وظائف ارقى من كدا... بس ليا سؤال محيرني من زمان وبجد لا اقصد بيه شخص بحد ذاته ليه كتير من المصريين مش بيعترفوا إن فيه حاجة أو حاجات غلط في مصر زي ما يكون واحد لا قدر الله ابنه مدمن ويفضل ينكر دا ويقول لا أنا ابني كويس وزي الفل ومؤدب ومالوش في الغلط... لحد ما الولد يموت بأوفر دوس ولا حاجة ويضيع منه!! ياري يصلح حال الناس كلها....ويخليكي لينا يا مصر يا حبيبتنا...ويحميكي من كل سوء....ويشفيكي من كل امراضك....آمين

أولا نقول حمدلله على السلامة طبعا أنا لما شفت اسم حضرتك قلت بسسسسسسس أنا هسمعلي كلمتين من اياهم (ياريت حضرتك تشوفي المواضيع اللي قبل كدا علشان ما تكتبيش موضوع مكرر....)وحاجات كدا يعني :) المهم..طبعا العبور برده من الاختيارات الكويسة...وخصوصا بعد وجود كارفور والجولف سيتي مول...ومبروك على اللي أخد فيها لكن لو بنتكلم على المدى البعيد شوية مثلا بعد عشر سنوات (يدينا ويديكم طولت العمر) اعتقد ان الشروق تكسب صحيح ان الحياه في الشروق حاليا شبه مستحيلة لكن مستقبلا كل حاجة تقريبا هتفتح هناك....كارفور وهايبر ومترو الجامعة البريطانية والفرنسية والعربية المفتوحة وجامعة الشروق نادي الصيد وهليوبوليس ونادي الشروق وواحد كمان تقريبا اسمه جرين هيلز أو حاجة زي كدا طبعا موضوع مترة الأنفاق هيفرق كتير والجميل برده انها قريبة من العبور لو حد اولاده في جامعة عين شمس أو القاهرة مش هيتعب في المواصلات يعني دا غير ان مافيهاش منطقة صناعية ولا سوق زي سوق العبور (مع احترامي)ا حاليا الاسعار زي بعضها تقريبا في العبور والشروق (المتر بحوالي 1800 في الأماكن الكويسة وانت طالع)مع ان العبور تعتبر مدينة متكاملة والشروق لسة صحراء طيب دا معناه ايه؟...اكيد الشروق لما تعمر اكتر اسعارها هتكون اغلى الخلاصة اللي محتار بين العبور والشروق لو كان عايز سكن حالي يسكن ويستقر فيه دلوقتي يبقى الأفضل العبور طبعا انما اللي يقدر يصبر على الأقل 5 سنين كدا يعني ياخد الموضوع استثمار يبقى الشروق افضل ودا طبعا رأي شخصي....وبالتوفيق للجميع

سلام عليكم يا استاذ سامح للأسف مش هقدر افيك في موضوع مشاركة في البناء أو شراء شقة جاهزة لإني ماعنديش معلومات...لكن اللي اعرفه ان موضوع البناء مربح جدا لكن عاوز حد بيفهم فيه وليه في السوق بالنسبة بأة لاكتوبرولا الشروق كل مكان ليه مميزاته...أنا عشت فترة في اكتوبر....هيا مدينة كويسة ونظيفة وخدماتها تكاد تكون متكاملة لكن عاوزة حد يكون حياته كلها هناك...يعني شغله ومدارس اولاده ويفضل لو قرايبه كمان يكونوا على الأقل قريبين منها...لإن النزول للقاهرة يوميا كان مهلك جسديا وماديا في البنزين..وعصبيا طبعا علشان السواقة!! طبعا اللي بجنيه انهارده في الصحراء بكرة يبقى ب 10...بس أنا كان قصدي برده على الضمانات....كتير يقولوا لازم على الأقل العمارة تكون بدإت تطلع علشان تشوف جودة الشغل والاساسات والمقاسات وخلافه. بالنسبة للشركات اديني شغالة تدوير على النت....لينا برده اصحاب خدوا في الشروق واستلموا بعد سنتين...صحيح الشركة اتاخرت عليهم شوية ودفعتلهم الغرامة...أنا بفكر اسالهم على موقع الشركة دي كمان وادور فيها ربنا يوفقنا جميعا للصح والخير...ونكون بكرة من ملاك العمارات مش بس الشقق....آمين

معندكيش واحدة كمان والنبي :happy: :happy: يا ريت...هو أكيد فيه لكن لازم الواحد يدور كويس....وطبعا بالنسبة للمغتربين دا صعب جدا! لكن مفيش حاجة بعيدة على ربنا

السلام عليكم طبعا مع احترامي الشديد لرأي الدين...فيه نقطة تانية احب اضيفها هنا (مع العلم اني مش بتكلم عن حد بذاته) وهي المرض النفسي...يعني احنا اتربينا على ان المنتحر دا مات كافر لكن اللي فهمته وشفته لما كبرت ان فيه ناس فعلا عندهم درجة من الاكتئاب أو الخوف وبتجيلهم ازمات وحالات هلع بمعنى الكلمة وبيفقدوا السيطرة على نفسهم فهل دول بيتحاسبوا ولا لأ...طبعا الله اعلم ربنا يهدينا ويهدي الجميع ويشفي كل المرضى بدنيا ونفسيا..(وضميريا) آمينِ

السلام عليكم طبعا الجواب باين من عنوانه...اختكم محتارة في موضوع شراء شقة!! مبدئيا اختياري وقع على مدينة الشروق...حسيت انها مستقبلا ليها وضع كويس جدا ولو كان فيه سيولة اكتر بصراحة كنت هختار آخد في التجمع المهم....نرجع للشروق..طبعا فيه اخوات افاضل هنا فادوني كتير بمعلومات عنها ولهم جزيل الشكر ودخلت على مواقع لشركات بتبني في الشروق لكن كل ما أقرب اوصل لقرار الاقيني برجع لورا !! مثلا: موضوع ان المقدم المتوفر معايا هو ربع ثمن الشقة....فدا في عرف السوق معناه اني هستلمها بعد سنتين...يعني وقت التعاقد هتكون صحرااااااااااء!!! موضوع خلفي وامامي وناصية وواجهة...احترت فيه ووصلت لقناعة غريبة وهي إن الخلفي دا حاجة وحشة...آجي ادور على الأمامي الاقيه مساحاته كبيرة!!! طب اعمل ايه؟! موضوع عدد الأدوار....من مميزات الشروق بالنسبةالي ان الارتفاعات فيها تقريبا واحدة...مكان كدا هادي وراقي...لكن اللي فهمته ان مع الوقت ناس كتير هتعلى بأدوار برده كتير!! فمش عارفة اضمن منين ثبات عدد الأدوار علشان المنظر الجمالي!!! نيجي بأه للضمانات...عرفت برده ان فيه ناس بتشترك وتبني عمارة ويبدءوا يبيعوا منها شقق....طب انا اضمن منين ان عندهم خبرة كافية؟ وان الموضوع هينتهي على خير وبسلاسة وبدون مشاكل...ولما بتكلم هنا على ناس فأنا اقصد ناس زيي يمكن صاحبتي يمكن جارتي...يمكن قريب جوزي...يعني ناس كويسين ونيتهم خير....لكن مازال السؤال قائم...هل خبرتهم كافية؟ زمان اهلي اشتروا شقة في مساكن شيراتون بالتقسيط كان سعرها حوالي 27 الف جنيه... دي تبع بنك الاسكان والتعمير على ما اعتقد فكانت (مضمونة)...فين بأة الضمان اللي زي كدا في مدينة الشروق دلوقتي؟؟ نرجع تاني لطريقة الدفع....تيجي تسأل حد من السوق يقولك ثوابت 25% مقدم..15% استلام اولي....15% استلام نهائي أو 50% مقدم وتستلم...والباقي ايا كان مع ان اصحابنا اشتروا شقة ماشاء الله مساحتها كبيرة ومطلة على الجولف سيتي بدون مقدم اصلا...وب 5000 جنيه شريا لمدة 5 سنوات اللي اقصده ان فيه مرونة في طريقة السداد لكن مش عارفة الاقيها فين طبعا بكرر شكري لكل اللي سالته بمعلومة وافادني...لكني فعلا في حيرة...فياريت لو حد محتار زيي نتشارك مع بعض يمكن نعمل (اتحاد محتارين) أو لو حد عنده معلومة تقلل الحيرة دي ياريت ما يبخلش علينا بيها... شكرا جزيلا

شكرا مهندسة عزة واضح ان مشاركاتي لازم توصل لعدد معين علشان اقدر استقبل رسايل!!! علشان اقدر اخد تليفونك واتصل على طول إن شاء الله ... بكرر شكري

شكرا مهندسة عزة على سرعة الرد...بس أنا ماوصلنيش حاجة على الخاص...اما بأة يكون فيه مشكلة في حسابي أو اني مش عارفة اوصل للرسالة عموما أنا اكيد هحتاج اتواصل مع حضرتك اكتر من كدا علشان تفاصيل اكتر لكن مبدئيا ليا كام استفسار: لكن دور اول بعد الارضى المرتفع ...هل حضرتك تقصدي هنا تاني بلكونة؟؟؟؟ لو كدا يبقى مناسب برده ولو اني مازلت افضل ارضي بحديقة المتر سعره كام...وهل طريقة الدفع اللي ذكرتها مناسبة؟؟ المنطقة دي ارتفاعات العمارات فيها واحدة (علشان الشكل الجمالي). ولا كل عمارة ارتفاع مختلف؟؟ بعتذر على الإطالة...شكرا جزيلا.

السلام عليكم ...في البداية شكرا على المجهود الرائع وبجد مهندسة عزة وامثالها اصبحوا قدوة ليا في نشر معرفتي للي ممكن يستفيد منها سؤالي هو اني عاوزة اشتري شقة في شهر يونيو القادم إن شاء الله في الشروق مواصفتاها كالتالي: تكون في المنطقة السابعة أو الثامنة عمارات مساحتها في حدود 130 متر على أن تكون تقسيمتها 3 غرف وصالة بحرية يفضل لو دور ارضي بحديقة دفع 25% مقدم والباقي على 3 سنوات يفضل انها تكون عمارات اهالي لأني حسب ما فهمت منكم ان الواحد لما بيبني لنفسه بيكون غير ما الشركة بتبني لعملاءها...وطبعا كل سلعة ولها زبونها ... الاقي طلبي دا بأة ازاي؟ وهل هو في الأغلب متاح ولا مفيش حاجة كدا؟!! شكرا جزيلا ملحوظة: كنت بعت لحضرتك يا مهندسة عزة على الخاص لكن تقريبا لم يصل...وبما اني كمان غيرت في طلبي فقلت اكتبه هنا بكرر شكري

السلام عليكم إن شاء الله يكون سبب غياب المهندس اشرف محمد عن المنتدى خيرا ياريت أي حد من الأعضاء الأفاضل على تواصل مباشر معاه إنو يطمنا عليه....ويوصلوا تحيات اعضاء المنتدى شكرا جزيلا..

asmaa 7'areg elshroot: Laila Fairouz Fareda Jomana Sally w Rabena ybareklkom feeha w tegy balf million salama.

alslam alikom...sorry i can't write in arabic right now. here is a website i think it will be usefull for u...one of our sisters wrote it here before http://almanarheg.com/ good luck.