اللقاء الثاني للمصريين في جدة

[Amr Radwan]

كل عام و انتو بالصحة و السلامة ..

كل عام و انتو بخير ..

كل عام و كل الاسرة المصرية جوا مصر و برا مصر بخير و سعادة ..

ده تاني تجمع لينا ان شاء الله في جدة ..

و تم اختياره عشان يكون في العيد .. عشان نحس بتجمعاتنا الحلوة الاسرية في العيد ..

لمتنا مع بعض هتحسسنا اننا بنعيش ايام العيد في مصر ..

عاوزين نتجمع .. نتكلم مع بعض.. نتعرف علي بعض .. نتواصل علي بعض .. نفك قيود الغربة و العزلة الاجتماعية .. نعيش في جو الفة الاهل و الاحباب و الاصحاب ..

الدعوة عامة لكل المصريين عزاب و اسر .. طبعا هيكون فيه مكان للشباب مع بعض و اخر للاخوات مع بعض .

و ان شاء الله هيكون التجمع تاني ايام عيد الفطر المبارك (الله اعلم هيكون كام ميلادي طبعا عشان رؤية الهلال )

المكان في دوار النورس علي كورنيش جدة .

و الوقت من الساعة 8:30 الي الساعة 9:00 هنتجمع ان شاء الله

اي حد يحب يشترك يا ريت يسجل اشتراكه في الفيس بوك عشان نحدد العدد اللي هيحضر ان شاء الله و علي اساسة هنعرف نحدد المشتروات اللي محتاجينها قبل التجمع .

لو حد مش معاه عربية (سيارة ) يتواصل معانا عشان نظبط له حد يركب معاه و الحمد لله السيارات كتير و الحبايب كتير ..

ملحوظة اخيرة ..

اليوم ده يومنا كلنا .. يا ريت اللي عنده اي اقتراح او رائ يخلي التجمع ده افضل ما يخلش بيه علينا ..

عنوان الجروب علي الفيس بوك :

تجمع المصريين في جدة

رابط الصور بتاعت اللقاء الاول

صور اللقاء الاول

تحياتنا لكم و في انتظار مشاركاتكم و اقتراحاتكم .. و اراءكم ..

[ssmaly]

انا احب انا أحيك واتمنى ان اشترك معكم ولكن انا فى الكويت للاسف ولايوجد الكثير من المقيمن فى المنتدى يعشون فى الكويت حتى نقتدى بكم ونعمل زيكم......

فين الربع بتوع الكويت؟

[Diab]

انا احب انا أحيك واتمنى ان اشترك معكم ولكن انا فى الكويت للاسف ولايوجد الكثير من المقيمن فى المنتدى يعشون فى الكويت حتى نقتدى بكم ونعمل زيكم......

فين الربع بتوع الكويت؟

في منتدي المحطة

:blush2:

[redwany]

شكرا للفكره العظيمه ديه وانا مقيم فى القنفذه وسف ادعوا الى عمل نفس الشئ فى القنفذه

فكرة رائعة وشكرا

[Amr Radwan]

السلام عليكم و رحمة الله و بركاته

اخي .. ssamaly

اشكرك علي المرور و اتمني انكم تقدروا تعملوا كده في الكويت و الفكرة و الله بعد نجاحها في اول لقاء هنا في جدة و الاستعدد للقاء الثاني .. و اتمني تكرارها في كل المدن اللي فيها تجمعات مصرريين ..

صدقوني بنكون جمب بعض .. بنقف جمب بعض .. و لو حد بيكون عنده مشكلة في الفلوس او مع الكفيل او في اي حاجة .. بيلاقي حد جمبه حتي ولو بالسؤال ..

و بصراحة انا لا انسي ابدا موضوع الحكيم اللي كان بيعلم اولاده ان الاتحاد قوة و جاب لهم مجموعه من العصي و قال لاحدهم حاول تكسرهم مجتمعين و لكنه لم يستطيع و قال له خد عصاية واحدة منهم و حاول تكسرها .. طبعا اتكسرت .. و هو ده وضعنا برا نفس الفكرة .. لو احنا مع بعض و جمب بعض .. هنكون اسرة متحابة و نقف جمب بعض و عمرنا ما ننكسر .. انما لو كل واحد لوحدة .. اكيد هينكسر ..

و ايضا يحضرني قول الرسول الكريم سيدنا محمد (عليه افضل الصلاة و السلام) «إنما يأكل الذئب من الغنم القاصية»

دياب ..

اية اخبارك ؟ ما تنساش تبلغ حبايبك في الشغل

الاستاذ / ردواني

اشكرك و ان شاء الله تتجمعوا علي خير ان شاء الله .. بس ما تنساش الصور

[Amr Radwan]

الحمد لله العدد وصل تقريبا 20 مشارك ..

يا ريت تشاركونا بالردود علي الموضوع و او الاتصال بي

[عبدوو]

كل سنه وانتم ومصر كلها بخير وسلام وعافيه

..

تحيه للكل سواء من شاركنا فى سهره العيد او لم يشاركنا ..

تحيه للاخ الاكبر عمرو على مجهوده وتفانيه ..

ياحبذا تزيد الاقتراحات- كما دعا مهندس عمرو فى هذا الموضوع وفى غيره - و من الجميع سواء كانوا مغتربين أو غير مغتربين ومقيمين بجده او فى خارجها وذلك بهدف تفعيل وزياده الروابط بين المصريين فى خارج الوطن ..

واخيرا استسمح اخويا عمرو فى نشر بعض الصور التى التقطناها بكاميرا الجوال المتواضعه وذلك على جروب المصريين فى جده

تقبلوا تحياتى .

تم تعديل 4 أكتوبر 2008 بواسطة عبدوو

[Amr Radwan]

السلام عليكم و رحمة الله و بركاته ..

تحية طيبة الي كل من يقرأ كلماتي ..

تحية طيبة الي كل احبابي المصريين في جدة .. اللي حضروا و اللي ما حضروش ..

طبعا ما شاء الله كان يوم جمييييل جدا .. و فعلا انبسطنا في اللمة الجميلة دي .. مع ان فيه الكثير من حبايبنا كانوا مش موجودين لظروف السفر او ظروف خاصة زي مثلا الاستاذ باسم فكري (قائد فريق الشوي :big_boss: )و الاستاذ محمد فكري و عائلته و الاستاذ حازم (اللي قام بمجهود كبير في اول لقاء) و م. احمد سالم و أ. احمد عثمان و عائلته .. و طبعا أ. ضياء الدين و م. مصطفي خضر و عائلته و لا انسي طبعا حبيبنا و استاذنا الدكتور محمد الشامي اللي افتقدناه جدا في تاني لقاء .

بس سبحان الله .. فيه ناس جديدة كتيرة ما شاء الله حضرتك حتي كان منهم ناس من الرياض و جايين زيارة لجدة .. و كانت من ضمن المفارقات اللذيذة ان مافيش كاميرا كويسة و اضطرينا اننا نستعمل كاميرا الموبايل ... و عشان كده الصور مش واضحة ..

و احب احكيلكم باختصار اللي حصل في اللقاء ..

اول حاجة الكورنيش كان زحمة جدااااااااا جدااااااااااا و كان سبب من اسباب انقسامنا الي 3 مجموعات ..

المجموعة الاولي : وصلت بالسلامة في الموعد المقرر للقاء

المجموعة التانية : وصلت متأخرة بسبب الزحمة .

المجموعة الثالثة : زهقت من الزحمة و ما عرفتش توصل و غيرت اتجاهها و راحت فين مش عارف ههههههه

و بعد ما جلسنا بدأت الالعاب النارية تشتغل و كانت فعلا جميلة .. و باشكال مختلفة و الكل كان مبهور بيها و الحمد لله صورنا بعض منها في الصور علي الجروب .

و شوية اكتشفنا اننا اتملينا تراب بسبب ان الحديقة اللي كنا فيها كان فيها "موتسكلات الشاطئ" و كانت بتجري بسرعة جمبنا و اضطرينا ننقل في مكان تاني و كان في داخل دوار النورس نفسة و بصراحة فعلا الجو كان رائع و جميل و نسمة هواء نقية باردة حاسين بيها .

بعد شوية بدأ الجوع يدخل الي بطون الجميع لان الساعة وصلت 12 عند منتصف الليل .. المشكلة ان بعض حبايبنا قبل اللقاء رفضوا موضوع الشوي و ما كناش اشترينا حاجة للشوي و لا تبلنا اللحمة و لا عملنا السلطة و لا الطحينة ..

.. طيب نعمل اية .. نعمل اية ..

الحمد لله كنت عامل حسابي علي الموضوع دة و كنت جايب الشواية في العربية و كيس فحم و مشعل و بعد كده خرجنا اشترينا اللحمة و الخضار و التفاح .

المشكلة كانت في ان الدنيا زحمة جدا لدرجة اننا اخدنا حوالي 3 ساعات عشان نعرف نجيب الحاجة من الهيبرات اللي جمبنا

بس اخيرا الحمد لله .. وصلنا بالسلامة و كان جماعة مننا اشعلوا الفحم قبل ما نوصل و بدأنا علي طول الشوي و الحمد لله اكلنا بعد طول انتظار art:)

و طلعنا من الجلسة الجميلة دي قبل الفجر بدقائق .. بس الحمد لله لحقنا الفجر في المسجد ..

و هذه هي اخبار التجمع التاني في جدة .. و عقبال التجمعات الاخري في كل المدن في السعودية و الخليج العالم كلة ..