إستقدام الأسرة

[أبوكنزي]

السلام عليكم أيها الأخوة الأعزاء

تقبلوا تحيات مغترب جديد فى السعودية ... يادوب ليا 8 شهور ... الحمد لله وأرجو من الله التوفيق لنا جميعا فى غربتنا وأن يعطينا كل مانتمناه

سؤالى أيها الأحبة ... أفيدونى أفادكم الله وأصلح حالكم : أنا مهنتى بالإقامة فنى كمبيوتر وأرغب فى استقدام زوجتى وأفادونى تليفونيا فى ادارة الإستقدام بأنه لابد من وجود مؤهل معهد فنى صناعى قسم كمبيوتر وطبعا أنا ليس معى هذا المؤهل ؟ ( معى مؤهل متوسط ثانوية عامة ) ماذا أفعل ؟ وهل لو دبرت صورة مؤهل معهد فنى صناعى (مضروب يعني) لابد من وجود الأصل لمطابقته ولا ممكن مايطلبوش الأصل ؟

من فضلكم افيدونى بسرعة

وتقبلوا تحياتى

[se_ Elsyed]

ما بحبش اقول اخبار وحشه .. لكن لازم نفيدك برد قاطع

اخي الكريم موقفك صعب جداً لإن الاستقدام متاح فقط لحملة المؤهلات العُليا المقترنة بمهنة مسموح لها بذلك وعادة تكون مهن عُليا برضوا يعني مهندس محاسب مندوب مبيعات طبيب .... الخ

يعني عامل او سائق او حرفي او ميكانيكي او ..... غير مسموح لهم

وبالتالي املك الوحيد والاول والأخير في الله سبحانه وتعالى ثم

ثم

التميس والفول

ما تضحكش او ما حدش يضحك

يعني تكمل ورقك ... وتاخد خطاب تعريف من الشركة وتذكر فيه ان مرتبك مش اقل من 4000 ريال وان شركتك موفر لك سكن عائلي

وتكمل الاوراق المطلوية وتسدد 2000 ريال رسوم استقدام في نك الرياض او الراجحي فقك وتروح وانت ونصيبك

لو موظف كان فطران تميس ومديها فول جامد ... ممكن ما ياخدش باله ويوافق لك في الحال

حصلت امامي حالتين واقعيتين

الميكانيكي اللي اخويا بيتعامل معه .. ليس عنده مؤهل ومهنته ميكانيكا وراح غلاسه يقدم واتقبل في مفاجأة مُدوية .

زميل وصديق عزيز معه دبلوم تجارة ... لكن مهنته " مبرمج كمبيوتر " ارزاق بقى .. صاحبنا في مكتب الاستقدام بص للمهنة وما بصش للمؤهل ومشيت الامور

- لكن لو المعاملة اترفضت اول مرة وشخبط لك الموظف على الورق ... ما تيأسش روح غير الورقة اللي اتشخبط عليها وروح تاني يوم .. هاتلاقي الموظف اتغير روح للوجه الجديد وحاول

اعمل العملية دي مرتين تلاتة

ولو اتسدت قوي

اليك البديل

- اعمل ورق زيارة عائلية وبإذن الله هايمشي وده مجاناً من غير رسوم وشهادتك ومهنتك لا غبار عليها

ولما يوصلوا الاولاد ممكن تقعد تمدد لهم التأشيرة لمدة تصل الي 9 شهور او سنة

وما تنساش تخليهم يجيبولك معاهم لحمه وسمنه بلدي وحمام وباصي جوزين محشيين لاخوك سين سين عشان يرم بدنه

[أبوكنزي]

مشكور أخى الحبيب على ردك الوافي وهذا عهدنا بك دائماً

لكن أحب أوضح حاجة بسيطة إن مهنتى مسموح لها بالإستقدام بشرط توفر مؤهل معهد فنى صناعى قسم كمبيوتر ليتماشى مع المهنة فنى كمبيوتر ... سؤالى الأن لو استطعت أن أوفر صورة مؤهل معهد فنى صناعى قسم كمبيوتر بها اسمى وبياناتى هل سيطلب منى الموظف أصل الشهادة أم سيكتفى بالصورة فقط عند مراجعته الأوراق ؟

أنا فى إنتظار الرد

تحياتى لكم جميعا من أؤض الحرمين الشريفين

[ابن الصعيد]

اعمل ذي ما سي السيد شرح

دي طريقه سهله

بعد كده دبر واسطه لو ما نفعش الموضوع

بعد كده كارت زياره يبقوا معاك 9 شهور وينزلوا 3 شهور الاجازه

انا لا احب الورق المضروب دي مشكله لو اكتشفت

وربنا يسهلك المزضوع

[أبوكنزي]

أنا متفق معاكم إن لو الموضوع اتسد فى وشي هاعمل زيارة عائلية وخلاص لكن المشكلة هنا إنهم لو جاءوا زيارة لن يكون هناك تأمين طبي وده شيئ مهم جدا هنا فى السعودية لأن المستشفيات والعلاج غالى جدا وربنا يبعد عننا المرض جميعا يارب بالإضافة إلى أن تمن تذاكر الطيران على حسابى وهانكون عايشين فى قلق من الشرطة لو إتأخرت ميعاد التجديد للزيارة ... يعنى الموضوع كله مخاطر

[se_ Elsyed]

أنا متفق معاكم إن لو الموضوع اتسد فى وشي هاعمل زيارة عائلية وخلاص لكن المشكلة هنا إنهم لو جاءوا زيارة لن يكون هناك تأمين طبي وده شيئ مهم جدا هنا فى السعودية لأن المستشفيات والعلاج غالى جدا وربنا يبعد عننا المرض جميعا يارب بالإضافة إلى أن تمن تذاكر الطيران على حسابى وهانكون عايشين فى قلق من الشرطة لو إتأخرت ميعاد التجديد للزيارة ... يعنى الموضوع كله مخاطر

مين قال إن اللي بييجي زيارة ما بيتأمنش عليه طبي ؟

كلام مش مظبوط وشركات التأمين تقبل ذلك لو كان التأمين عن طريق شركتك اللي هي مأمنه أساساً معاهم .

مشكلة الزيارة بس إن لو عندك أولاد في مدارس فما ينفعش يدخلوا مدارس هنا

أما صورة المؤهل تقبل ولا لأ .. فأنت وحظك

[أبوكنزي]

السلام عليكم ورحمة الله وبركاته

أخوتى الأحباء المصريين .. تقبلوا تحياتى وأرجو من الله أن يكتب لنا جميعا كل مانتمناه لأنفسنا ولأهلنا ..

أحب أن أبشركم جميعاً بأنني ذهبت للإستقدام اليوم وبفضل الله تعالى تمت الموافقة على طلبى وأخذت التأشيرة لزوجتى وابنتى والحمد لله ... وتأكدت من شيئ واحد أن أهم شيئ للموظف هو ماهى مهنتك فى الإقامة بغض النظر عن المؤهل ؟

تحياتى مرة أخرى للجميع وخصوصا من أهتم بالرد على تساؤلاتى السابقة

أخوكم

[se_ Elsyed]

مش قلت لك يابو كنزي .. الرك علاتميس .. وسلم لي عالجلابه

ألف مبروك وما تنساش الحمام

[أبو زياد]

تابعت الردود من أولها ولقيت س س قالك على نظرية التميس و الفول

قلت خلاص هو جاب المفيد وفعلا تحققت توقعاتى

الف مبروك يا ابو كنزى .. وعاش التميس و الفول

[GoldenTiger]

طيب الفول عارفيه

إنما إيه هو التلاميس ده علشان أنا مش عارف

[أبوكنزي]

التميس ده ياسيدى هو الخبز الأفغاني ( هو شيئ رائع هنا خصوصا مع الفول )

بالهنا والشفا

[GoldenTiger]

التميس ده ياسيدى هو الخبز الأفغاني ( هو شيئ رائع هنا خصوصا مع الفول )

بالهنا والشفا

جزاك الله خيراً

[اسكندرية تانى]

الف مبروك يا ابوكنزى و اللة فرحت لك من كل قلبى

و عقبال ما يوصلوا لك بالسلامة ان شاء اللة

[أبوكنزي]

ياباشا ربنا يبارك فيك ويعطينا جميعا مانتمناه

[ياسمينة]

أفيدونى أفادكم الله

زوجى يعمل بالسعودية محاسب منذ 9 شهور والمهنة بالباسبور سباك 000000 ويريد ان يعمل لى استقدام فما هى الاجراءات بالضبط ؟؟؟؟؟؟. وما هى المعوقات ؟وكيف نحلها؟

وماذا بيدى انا لأعمله؟

[doudy]

ياباشا ربنا يبارك فيك ويعطينا جميعا مانتمناه

مبروك يا ابو كنزى

و يجولك الولاد بالسبلامة

على فكرة انا ام كنزى برضه

:blush2:

[ياسمينة]

فينكم يا مغتربين...ألا من مجيب

[خالد شحاته]

فينكم يا مغتربين...ألا من مجيب

الاخت الفاضله مهنة سباك صعب جداا يعمل استقدام لانها تكلف مبلغ كبير جداااااااااااا انما هو يعمل زياره لكي عادي جدااااااااااااااااا

[hossamsamir]

السلام عليكم

سؤال موجة الى سى السيد

انا مهنتى فى الجواز والاقامة مبرمج حاسب الى ولكن شهادتى ليسانس حقوق

هل لما اقدم على الاستقدام فى مشاكل وهل فى حل للموضوع دة

[se_ Elsyed]

السلام عليكم

سؤال موجة الى سى السيد

انا مهنتى فى الجواز والاقامة مبرمج حاسب الى ولكن شهادتى ليسانس حقوق

هل لما اقدم على الاستقدام فى مشاكل وهل فى حل للموضوع دة

حاول على قدر الأمكان تجيب شهادات خبرة موثقة في البرمجة مع شهادات المؤهل العالي بتاعتك ... وحاول مره وإتنين وتلاته ...وربنا يوفق