جامعة الخوازيق

[Arabisc]

في جامعة الزقازيق

الهم ييجي جملة مش تفاريق

ياما أخوك انقرص منها

وخد خوازيق

من يوم دخلها وهوه جاله ضيق

دي فيها كام عينة

يتولعوا بحريق

----------------------------

في ناس هناك قاعدة

للهم و التضييق

وشغلته قال ايه

الفحص والتدقيق

قاعد مجعلص في غرزة

لسانه صفيق

"روح هاتلي ميت امضا

من بعد موزنبيق

في السكة بصملي

جلال أبو شفيق

اثبتلي إنك إنت

بحق وحقيق"

وعنيه في راسه الجوز

نهايتهم التخزيق

ياإما تقعد سنة

تبصم المخاليق

أو فهيص المسألة

ووزع الشباريق

----------------------------

دكتور تشوفه البومة

تقول اخويا شقيق

ومحاضرته ملحمة

في العك والتلفيق

يخلص المعمعة

والكل فيها غريق

"فاهم يا بابا?"

-" طبعا!! "

تقدر تقول تعليق ????

-----------------------------

دكتورة جايية غلط

من متحف الأناتيك

وكلامها كله عيى

ومتاهة مالزحاليق

وتحط في البوية

وتكب في المساحيق

ولا بنت ستاشر سنة الملا حيق

--------------------------------

معيد فاهم بالغلط

إنه ظريف ورقيق

و هزاره ياختي عليه

هزار صعايدة حقيق

لا يحللك مسألة

أو يرشدك لطريق

إلا ...

إلا في درس خصوصي

وياريته عارف شئ

----------------------

ديه صورة المـأساه

فيها ضحايا مزانيق

خالية من التزويد

والمط والتشويق

ارسمها صورة وعلقها في ألف ميدان

واكتب عليها تحت

.......

......

...

.

"آسف ... بدون تعليق "

[ezzat afifi kotb]

ليه يا سيدى شاعر بالضيق

والله يعينك ع الخوازيق

لو ف الجامعه او ف طريق

تعرف مين زعيم المخازيق

دا اللى دعا المولى بزعيق

سيب لى عدوى والمخاليق

بس احمينى من كل صديق

حتى ولو كان ف الزقازيق

[daktara]

اولا انا عاتب عليك لأن الواحد مش مفروض يعض الأيد اللى اتمدت له و أكيد جامعه الزقازيق إيد اتمدت لك

ثانيا انا زيك خريج هذه الجامعه و أعمل أيضا بها كعضو هيئه تدريس و الحقيقه لم تكن يدا ممدودة لى بل التحقت بها قهرا نظرا للتوزيع الجغرافى الذى [لبسها لى] لأنها أو كليه الطب

بها كانت على قمه هرم التنسيق [عند التحاقى بها]و تسبق  قصر العينى

ثالثا أنا مثلك عانيت الأمرين من اضطهاد و خلافه لاحصل على الدكتوراه ومع انى أحب جامعتى كثيرا و أعتز بها لا لشىء إلا لقناعتى أنها مثل باقى الجامعات فى السلبيات  إلا أننى اضطررت يوما لكتابه هذه الخواطر

هموم مدرس مساعد

،،،،،،،،،،،،،،،،،،،

إمتى البسمه تزور شفايفنا و امتى نقول الله

طبعا مش معقول يتحقق  قبل الدكتوراه

حتى ان خدنا بعد معادنا و اتأهلنا ويّا ولادنا

حنقول لسه يا دنيا ناقصنا عمر نعيش ويّـاه

حنقول لسه ناقصنا كتير  لما نخشّ ف شغل الاير

امتى نفقّع ولا نرقّع   ولاّ نشغّل يد البيـــــر

وان يوم برضه فضلنا نزن  علشان نفتح مره ْسكِنْ

يبقى المكروسكوب متعطل  ولاّ الّرســــــك كبير

هَم يبكّى و هم يضحّك  و احنا همومنا تملّى تبكّى

حتى الضحكه ان جَت تتمحّك  يمكن تهرب لما نحكّى

لما تشوفنا بنفتح باب  للتأخير ملهوش أسباب

غير ترتيبنا خلّى نصيبنا نبقى سطافّ ف جامعه سُكّى

ياما بنينا جبال وقصور   من وهم عشان نرضى غرور

مع إننا لو كُنا نشور    قبل ما ندخل جامعه تغور

أو لو كنّا ف يوم فكّرنا     نتعلم صنعه تقدّرنا

كان الواحد مننا يكسب     أحسن من مليون دكتور

____________________

الاير= الاذن

البير= جهاز يستخدم فى عمليات الاذن

سكن = جلد

الرسك = الخطوره

جامعه سكى = أقصد جامعه الزقازيق و تسمى احيانا جامعه شيبه وهى أسماء ليست رسميه

عزيزى جامعه الزقازيق دلوقتى اتحسنت كتير حقيقى و الكلام دا على مسئوليتى

(Edited by daktara at 10:21 pm on Oct. 2, 2001)

(Edited by daktara at 12:14 am on Oct. 3, 2001)

[Sherief AbdelWahab]

ياللي عايش في زمننا

جاي تشكي م الخوازيق

في الهم احنا كلاتنا

م المنصورة للزقازيق!!

خلص الكلام