الى المبرمجين عموما واللى فى كندا خصوصا

[asm504]

بيان الحالة

اسمى : أحمد

عمرى 22 سنة

الجانب السلبى: لسه طالب فى جامعة الازهر / كلية اللغة العربية / قسم صحافة وإعلام / شعبة علاقات عامة وإعلان سنة 3 سقطت سنتين وبانجح بالعافية -من الآخر باذاكر ليلة الامتحان -

الجانب الإيجابى : بأدرس دبلومة فى الجامعة الأمريكية , كمبيوتر وبرمجة , خدت حاجات كتيييييييير منها اللى ليه لازمة ومنها اللى مالهوش, المهم انى دلوقتى قربت أخلص ما فاضلش غير مشروع التخرج

وأخر حاجة كنت اتوقعها ان دى كمان تصاب بفيروس الفساد الإدارى المصرى , انا لا اقصد الإساءة بقدر ما أقصد انى اوصل فكرة انه رغم انى من اشطر زمايلى إلا ان الشاطر فينا لا يتعدى حد المبتدئ فى كل مجال وفى كل لغة برمجة على حده, ما تعمقناش فى أى حاجة بحكم ان المواد لها عدد ساعات محدد

شهادة , 120 ساعة معتمدة "أمريكانى", مواد كتير حوالى 26 مادة , يعنى المفروض انى راجل بتاع كله, بس مدى التعمق = سطحى

وده طبعا شئ مش مقبول بالنسبة لى , يلزمنى أكون مبرمج أقل ما يقال عنه انه كفؤ

وعليه , يبقى يلزمنى آخد شهادة عالمية معتمدة microsoft MCSD or Oracle or JAVA

قالو لنا سيبكو من مايكرو سوفت قولنا ماشى

يبقى فاضل أوراكل و جافا

ودى المشكلة الأولى : اوراكل ولا جافا , مش عارف , ومش لاقى حد يفيدنى, يا ريت يا جماعة اللى يقدر يفيدنى بأى معلومة فى الموضوع ده يقوللى

يعنى مثلا من ناحية الطلب عليهم فى سوق العمل ايهما اكثر, المرتبات عاملة ازاى , مستقبلهم, لو حاكمل دراسة ماجيستير مثلا يبقى ايهما أفضل , كل الفروق عموما(وخاصة فى كندا لأنى ناويها ان شاء الله)

النقطة التانية بقى : كندا

انا ملاحظ ان المنتدى مديها اهتمام كبير وفيه مواضيع عنها كتير والمشاركات فيها كتير, انا قريت معظمها وبصراحة المواضيع قيمة اوى ومن ناحية تاني آراء المشاركين عملتلى قلق واضطراب فى دماغى , ناس تقول حلوة وناس تقول وحشة وناس تقول اولها بس اللى فيه بهدلة والانسان المكافح هو اللى بيخلق نجاحه

على العموم انا مش مستنى اى نجاح ييجى بالساهل

بس النقطة اللى انا محتاجها بالظبط ما لقيتهاش فىمواضيع قديمة عشان كده كتبتها هنا وهى: بما ان فاضل لى سنة ونص واتخرج

_ وبما ان اجراءات السفر بتستغرق اكتر من سنتين

يبقى ما هو انسب وقت عشان اتقدم للسفر , هل دلوقتى ولا بعد ما اتخرج ولا بعد ما اشتغل بسنتين عشان موضوع النقط ولا ايه بالظبط , يعنى اول خطوة عشان اسافر هى ايه وامتى

وإيه افضل استغلال للوقت فى المرحلة اللى انا فيها هنا : انا كويس فى الانجليزى ادرس اكتر, ولا اتعلم فرنساوى, ولا اركز اكتر على البرمجة و يا ترى أوراكل ولا جافا ولا اروح آخد دبلوم صنايع ولا ايه.... انا محتاس :mellow:

انا عندى الأمل .. ويمكن عشان كده انا لسه عايش - يا ريت ما تكونوش نسيتو ظروف الشاب اللى بيتعذب فى الجامعة وفى البلد -

بس انا عشمى فى ربنا الأول كبير , وفى الناس اللى فى المنتدى لأنى شايف فعلا ان مشاركاتكم مثرية .....ولكم تحياتى

[waleedss88]

بالنسبة للقوانين دلوقتي

لاني لسه ماشي في الموضوع

اللي تقدر تعمله دلوقتي جمد نفسك في اللغة جدا جدا لحد ماتتخرج انصحك بالبرتش كنسل

لازم تشتغل في التخصص اللي هاتطلع على اساسو في حالتك سنه او اكثر بالكتير 4

تمتحن الايلتس في البرتش ومن الدرجة اللي هاتجيبها تحب نقطك

وتشوف محتاج تدرس فرنساوي ولا لا عشان تكمل النقط

ا

في مشكلة مقابلني لسه ماعرفش حلها وهي ان التخصص العمي مالوش علاقة بالعمل

[shawshank]

الأخ asm504

هذه بعض المواقع التي ربما تكون مفيدة لإعطائك فكرة عن سوق العمل في مجال الحاسبات :

ده موقع في أمريكا . أتصور وجود ما يماثله عن كندا . منظمة اسمها:

Computing Research Association (CRA)

الوصلة

كمان دي مواقع عن فرص عمل:

http://www.chiff.com/computer/jobs.htm

http://programmer.jobs.topusajobs.com/

بالتوفيق إن شاء الله .

[هادي]

أخي الفاضل

تحية طيبة

سأكون مباشر بعض الشيء

أنت ليس لك حظ في دخول كندا بوظيفة (مبرمج)

ذلك لأن شهادتك العلمية تختلف تمام الاختلاف عن هذا التخصص

كان لي زميل خريج (ألسن)

عقده في الشبكات .. بمعنى عقده

وتم رفض طلبه للهجرة لنفس السبب

نصيحتي

1) عمق تخصصك في برمجة جافا وبناء مواقع النت بشكل احترافي

بالدراسة والممارسة ، وهذا شيء مفروغ منه لو عاوز تشوف في كندا مرتب مناسب وعيشه مناسبة.

2) ابحث عن عقد عمل في السعودية (أو أي دولة خليجية) في أي وظيفة مناسبة وبراتب مناسب (ستحتاج لتلك المدخرات هنا)

3) اشتغل هناك سنتين وبعدين قدم للهجرة من السعودية ، وقدم على وظيفة تناسب مؤهلك (مدرس مثلا - سكرتير - مترجم ) ولا تقدم على وظيفة مبرمج

4) قد تأخذ الاجراءات سنتين على الأقل .. لكنها ستظل أسرع من مصر، بالاضافة الى الاستفادة المادية.

5) قد تقول لا أحب السفر لدول الخليج ..

رائع .. مفيش مشكلة

حاول تنفيذ نفس الخطوات السابقة في مصر

وأنا شايف ان تحصيل الخبرة وبناء مبرمج قوي في مصر أفضل من الخليج

ما يهمني التركيز عليه هو :

في النهاية عاوز منك شهادة خبرة من 2 - 5 سنوات في الوظيفة التي ستقدم عليها للهجرة.

6) المصاريف - بأسعار اليوم - وربنا يستر على الايام الجايه:

550 دولار كندي = فتح ملف

200 دولار = استخراج و ترجمة أوراق وشهادات وكشف طبي

975 دولار كندي = لاندنج وتأشيرة

7) لو عاوز تعرف احصائيات عن توفر الوظائف

كندا من الدول الجميلة في موضوع الاحصائيات

خد الموقع ده

الموقع

واليك بعض المواقع للبحث عن وظيفة مبرمج في كندا

قلب فيها

وشوف الشغل وايه مواصفات مطلوبة لشاغل الوظيفة

عشان تحط نفسك مكانهم وتعد العدة لتحمل تلك المواصفات

وكذلك الراتب المتوقع ، وهكذا

الموقع الاول

الموقع الثاني

وهذا موقع وزارة القوى العاملة الكندي للباحثين عن عمل

الموقع

واليك موقع من أهم مواقع البحث عن عمل

ابحث عن الوظيفة مبرمج جافا واقرأ ما يطلبه اصحاب الاعمال من خبراتك

الموقع

ودعواتي لك بالنجاح والتوفيق

[khedr]

الاخوه الكرام ...

.شاكرين كل هذه المعلومات التي تنصب في الطريق الي العمل في الخارج او الهجره

نريد معلومات من الاخوه الذين يعيشون في هذه البلاد عن

ظروف العمل

المرتبات

المعيشه

التواصل والاندماج مع المجتمع الجديد

واي معلومات عن الجانب الاخر من التجربه العمل والمعيشه في الخارج وخاصه كندا واستراليا

[الصعيدى]

:blush:

الاخوه الكرام ...

.شاكرين كل هذه المعلومات التي تنصب في الطريق الي العمل في الخارج او الهجره

نريد معلومات من الاخوه الذين يعيشون في هذه البلاد عن

ظروف العمل

المرتبات

المعيشه

التواصل والاندماج مع المجتمع الجديد

واي معلومات عن الجانب الاخر من التجربه العمل والمعيشه في الخارج وخاصه كندا  واستراليا

<{POST_SNAPBACK}>

:ninja: الاخوة الكرام المقيمين فى كند ا

انا خريج تجارة واعمل فى مجال المبيعات مع العلم اننى اتقن الحسابات وكذلك اغلبية البرامج المحاسبيةبالكمبيوتر وبعض الشى من المحاسبة الانجليزى وبعون الله اقدمت على الهجرة الى كندا-تورنتو

ولى بعض الاسفسارات

1 - بالنسبة لمجال عملى (مبيعات او حسابات)هل متوفر على العلم اننى ليس عندى مانع ان اعمل فى اى مهنة الى ان يكرمنى الرحمن بنفس مجالى سؤالى الذى يحيرنى هو (الرواتب فى هذا المجال فى حدود كام ) والشغل التانى اللى هو (امن -عامل فى مطعم -سائق -عامل بنزينة ) يعنى بالعربى هل هقدر انى اعيش انا واولادى الى ان يشاء الله بكرمه بعمل مناسب لى.

2- ظروف المعيشة الحالية (سكن عائلى معقول + مصاريف ) يعنى فى حدود كام شهريا لاسرة مكونة من 5 افراد

3 - انا اعمل فى مجال ماركات عالمية كهربائية فهل لهل فروع فى تورنتو او كندا بشكل عام مثل

( ويرلبول"ثلاجات وغسالات" + سامسونج مكيفات + جنرال مكيفات+ ال جى ) اناسمعت

ان هذه الشركات وخاصا شركة ويرلبول العالمية لها فروع بكندا فهل هذا صحيح ام لا.

ملحوظه اللغة الانجليزية جيده

الرجاء الافادة وجزالكم الله خيرا

[الصعيدى]

:ninja: B)

ايه ياعم هادى ايه ياولاد عمى المقيمين فى كندا هيه جايت عليه ووقفت مفيش ردود

يظهر انى هرد على نفسى :blush: :D

[الصعيدى]

:blush: :ninja:

طيب اى حد يرد علية حتى لو ميعرفش حاجه عن كندا بس عيب قوى انى انادم ومحدش يرد عليه منظرى بقى وحش قوى بص اهو B) :D :D :P :D

[asm504]

شكرا يا جماعة على اهتمامكم بالموضوع

وشكر خاص للأستاذ هادى

أنت ليس لك حظ في دخول كندا بوظيفة (مبرمج)

احترمت صراحتك اوى

ذلك لأن شهادتك العلمية تختلف تمام الاختلاف عن هذا التخصص

الظاهر والله أعمل ان مش حيبقى فيها شهادة علمية أصلا

لأنى بعد اللى حصل وانا حكيته فى

الموضوع ده

ضاقت بى نفسى وسيبت اللجنة ومشيت وسيبت الورقة فاضية

وبفكر اسيب التعليم فى الأزهر خالص, انا كرهته وكرهت نفسى

زمايلى بيقولولى : انت جاتلك حصبة مثالية , يا ابنى هو الأزهر كده ومش حيتغير , و فوق لنفسك وعيش عيشة أهلك ......الخ

المهم ؛ ولو انى لسه بفكر فى الموضوع -أسيب الأزهر ولا لا - بس لو سيبته حيبقى على اساس انى اكمل دراسة برمجة فى كندا

انا لما يبقى معايا 120 ساعة دراسية من الجامعة الأمريكية , بيتهيألى ان الجامعة ليها مصداقيتها , و فيه جامعات كتير ممكن تعتمد الساعات دى وأكمل عليها وأخد مؤهلى

فى الحالة دى يبقى الكلام على انى اسافر دراسة.. وكده يبقى يلزمنى اجمع معلومات فى هذا الخصوص , بس مواقع الجامعات معقدة اوى وان كنت لسه ما تفحصتهاش كويس

رحت البرتش كاونسل النهارده وان شاء الله حابدأ فى شهر مارس , - على فكرة اسعاره نار -

بس يفضل حاجة مهمة بقى وهى السؤال المهم فى جميع الاحتمالات

جافا ؟؟؟؟ ولا أوراكل ؟؟؟؟؟

دى بقى النقطة اللى لسه محدش أدلى بدلوه فيها

طيب يا جماعة أخصص لها موضوع فى باب الكومبيوتر ولا ايه ؟

يا أ/ صعيدى

طيب اى حد يرد علية حتى لو ميعرفش حاجه عن كندا بس عيب قوى انى انادم ومحدش يرد عليه منظرى بقى وحش قوى بص اهو 

ممكن بس يكون الناس مشغولين , او ان اللى بيشوف عنوان الموضوع من بره بيلاقى انه مالهوش فيه يقوم ما يقراهوش

لكن الناس هنا متعاونين اوى - ولو انى لسه مستجد - بس واضح من حواراتهم انهم خدومين جدا وبتجمعهم روح حلوة اوى , وبعدين يا عم دا انت شكلك زى الفل اهو, دا انت حتى شبهى النهارده وانا قاعد فى الامتحان