الكتاب خير جليس حقيقة مش تهجيص

[ابو صلاح]

السلام عليكم كلكم
انا فعلا حبيت المنتدى دة جدا ، علشان الواحد ساعات بياخد راحتو فى التعبير على النت اكتر بكتير من الواقع ، يعنى فى الواقع ما تقدرش تكلم صحبك كتير فى السياسة الا لما يتريق عليك عكس المنتدى ما حدش بيزهق من التانى بالعكس الكل بيتكلم بتلقائية وعفوية
فعلاشان كدة انا اخترت الصفحة دى علاشان كل واحد يقول عن كتاب قراة وعجبو أو قراة ومعجبوش أو كتاب فى معلومات مهمة او قصة حلوة او كاتب فكروة كويس ، طبعا لو الواحد قال لواحد فى الحياة الواقعية ان قرأت كتاب ممكن بيصلك بأستغراب كأنك من كوكب تانى ، وعملت شئ غلط يعنى

يعنى انا مثلا ما شوفتش حد من أهلى والمحيطين بيا مسك كتاب فى يوم وقعد يقرا منو ، وعشان ابقا صادق معاكم ، امى مثلا ما بتقراش غير قرأن ، اخواتى اقصاهم مجلة ميكى ابويا بيتخانق معاهم على المجلة علاشان يقراها قبل ما ينام

مش معنى كدة ان انا المثقف اللى فيهم ، انا اتعلمت القرايا على كبر بس أتعلمتها لوحدى ولقتها شئ مش وحش ، جربو القرايا هتلاقوها لذيذة خاصة لو الكتاب اللى انت بتقراة حاجة انت بتحبها او مهتم بيها

يعنى انا مثلا بحب كتب التنمية البشرية والكتب دى ممكن تغير حاجات كتير فى حياتك ، ومن الكتب دى قريت مثلا
كتاب افضل سنة فى عمرك الأن : والكتاب دة بأختصار بيعلمك ازى تخطط للسنة اللى جاية وأزاى تحقق اهدافك وأزاى تعمل توازن فى شتى مجالات حياتك
كتاب قوة عقلك الباطن : والكتاب بأختصار بيعلمك ازاى تتحكم فى عقلك الباطن وازاى ممكن للعقل الباطن انو يكون لية دور كبير فى نجاحك وأزى تقهر اى خوف أو أدمان
كتاب كيف تضاعف ذكائك : كتاب باين من اسمو فعلا فى حاجات جامدة جدا فى كل مجالات الذكاء من حساب وتخيل وحل مشكلات وذكاء لغوى تقريبا كتاب شامل كل انواع الذكاء
يعنى الكتب دى من الحاجات اللى قرتها
وفى الكتب الأدبية ما تعمقتش فيها بس اللى قريتو قصة يوسف السباعى اللى هيا ( نائب عزرائيل ) على الرغم ان القصة فيها شطحات لكن الى حد ما لذيذة وتقدر تخرج منها بحكمة وضحكة
ومن الكتب اللى مهتم بأنى اقراها ( كتب انيس منصور ) لأنى بحترم الراجل دة ولى اراء كويسة فى كذا مجال يعنى
طبعا وكتب مصطفى محمود انا قريت منها كذا كتاب زى ( زيارة للجنة والنار ) ودة كتاب أدبى وفية قصة لذيذة وفية وعظ دينى دة غير اسلوب مصطفى محمود الرائع ، وكتاب برضو ( حوار مع صديقى الملحد ) كتاب رائع وفى اسئلة بتبقا انت عايز نسئلها بس فى حاجة من جواك تقول لأ هتتفهم غلط واسئلة شائكة هتلقيها فى الكتاب دة ومردود عيها الجواب الشافى

انا مستنى ردكم واعطائى رايكم فى كتب قرتوها انتم او كاتب لية مؤلفات كويسة ادبية او فكرىة

[ENG. BEHAIRY]

الأخ الفاضـــل / محمد صـــــلاح

أهــــلاً ومرحـــبًا بــك فى بيتـــك ومنتـــداك

وأحييــــك على وضـــــوحك وصــــــراحـتك

وطمـــوحـك وإصــــرارك ، وأنت القائــــــل

( انا اتعلمت القرايا على كبر بس أتعلمتها

لوحدى ولقتها شئ مش وحش ) واســمح

لى أن أعــبر عن اعـــتزازى بك وبما قلت.

فكـرتك الخاصــة بأن يقـــوم كل واحــد منا

بعـرض أى كتــاب قرأه فعجـبه أو قرأه فلم

يعجبه فـكرة رائـعة وجــميلة ، ولكنى أرى

بعض التعديل : فنقتصر على أفضـل الكتب

التى قرأنـاها ، وبحيث تكون كل مشـــاركة

مقصورة على كتاب واحد ، يتم ذكـر إســم

الكتاب ومؤلفـه ، ونبذه عن الكتــاب وأهم

مواضيعه والتعرض للمواضيع باختصـــار

فى حدود صفحتين إلا إذا اقتضت الأهـمية

الزيادة ، ولا نكتفى فقط بالإشارة إليه فى

ســـطر أو ســـطرين ، فـهذا ســيوســع من

معارفنا ويزيد من ثقافتنا ، ويشجعنا على

الإستزادة ، ولعلى فى هـذا الصــدد أشـــير

إلى الحــكمة الغالية التى قالها الأب لإبنـه

ناصــحًا ومربيًـــا وموجـــهًا :

يا بُني عَــلم عــِلمك ...وتعــلم عِـــلم غــيرك

فـــإذا أنت قــد حفظـت ما لديــك وعــلمت ما عنــد غــــيرك

وكلنا يعــلم حفاوة ديننا بالقــراءة والعلم

ويكفى أن نســمع ونتدبــر هــذه الآيات :

(اقْـــرَأْ بِاسْــمِ رَبِّكَ الَّذِي خَــلَقَ{1} خَــــلَقَ الإِنسَـــانَ مِنْ عَـلَقٍ{2}

اقْـــــرَأْ وَرَبُّكَ الأَكْـــــرَمُ{3} الَّذِي عَــــلَّمَ بِالْقَــــلَمِ{4}

عَـــلَّمَ الإِنسَـــانَ مَــا لَــمْ يَعْــــلَمْ {5} ) العـــلق

هذه الآيات الكريمات كانت أول ما نزل

من الوحى على رســـولنا الكـريم النبى

الأمى عــليه الصــــلاة وأزكى الســـــلام

أمر آخر وهو أن دور المثقف أن يحمل

مشعل النور لمن حوله ، ولا يجعـل من

كلماتهم مثبطًا له ، بل يجعل سـخريتهم

وعدم اكتراثهم بالقــراءة نقطـة إنطلاق

أنتظر ردك ورد بقيــــة الزملاء لننطلق ســــويًا ..

تم تعديل 21 أغسطس 2005 بواسطة ENG. BEHAIRY

[ابو صلاح]

فكرتك واضافتك رائعة ومبدعة ، بس توضيح بسيط انا اسمى محمود

ارجع تانى للموضوع يعنى اكلمكم على كتاب اثر فيا وغير فيا حجات كتير ، اللى هتكلم علية انهاردة وهو( كتاب افضل سنة فى عمرك الأن ) ومؤلفتة اسمها : ( جينى اس . ديتزلر )

والكتاب دة بيغير حياتك فى 3 ساعات عن طريق عشر اسئلة بيسئلهالك

السؤال الأول : (ماذا انجزت )

وهذا السؤال بيسئل عن انجازاتك فى السنة الماضية واية الحاجات اللى انت حققتها

السؤال الثانى : ( ماذا كانت اكبر اشياء مخيبة لأمالى )

وهذا السؤال يسئل عن فى ماذا فشلت فى العام الماضى

السؤال الثالث : ( ماذا تعلمت )

وهنا يجعلك هذا السؤال تتعلم من انجازاتك وكيف حققت النجاح ، وايضا ان تتعلم من اخفاقاتك وفشلك وهذا من خلال السؤال الأول والثانى ثم تختار من قائمة التى تعلمتها من دروس 3 دروس فقط وتجعلها كخطوط أرشادية للعام المقبل

السؤال الابع : ( كيف أضع حدود لنفسى وكيف اتوقف )

وهذا السؤال يجعلك تغير المنظر عن نفسك فمثلا بدل ان تقول عن نفسك انا فاشل ، تبتدى تقول انا استطيع النجاح وهكذا

السؤال الخامس : ( ما قيمى الشخصية )

وهذا السؤال يسألك عن الدوافع الخفية الموجودة خلف الأهداف ، وما القيم التى تريد اظهارها فى حياتك

السؤال السادس : ( ما الأدوار التى تقوم بها )

وهذا السؤال يسئل عن ادوارك فى الحياة مثلا الشخص منا ممكن ان يكون أب و موظف و طالب و وهكذا

السؤال السابع : ( على اى دور أركز فى السنة القادمة )

ما هو الدور الذى يحتاج منك مجهود اضافى

السؤال الثامن : ( ما اهدافى لكل دور )

يعنى تكتب اهدافك فى كل دور وأية اللى انت عايز تحققو فى كل دور

السؤال التاسع : ( ما هى اهم عشر اهداف للسنة القادمة )

تختار عشر اهداف من حصيلة كل الأدوار اللى انت بتقوم بيها

السؤال العاشر : ( كيف يمكننى التأكد من اننى احققها )

وهو التأكد من انك حققت العشر اهداف بتوعك وأستخدام النظام فى تحقيق تلك الأهداف ويوجد فى الكتاب طريقة لتنظيم الوقت

هى دى محتويات الكتاب بأختصار الكتاب فعلا جامد وبيغير حياتك خالص والى حد ما بيخلى دماغك مترتبة ويخليك تعرف انت عايز اية

انا هديكو عنوان المكتبة اللى بتبيع الكتاب دوت والمكتبة دى واخدة توكيل مكتبة ( جرير ) ومكتبة جرير دى اكبر مكتية عربية فيها كتب بتهتم بالتنمية البشرية ومش هتلاقو فى المكتبة دى للأسف

6 شارع حسين فهمى من د/ حسنين هيكل - عباس العقاد ت 2707023 فى عنوان تانى للمكتبة

2 د ش السريات امام كلية الهندسة عين شمس - العباسية - القاهرة ت 0121084710

[وليد صفوت]

موضوع رائع عزيزى محمود ,......... أحييك !

و طبعاً ساحاول أن أورد بعض ملخصات الكتب التى قرأتها , و التى تندرج تحت باب المعلومات العامة , و من منا لا يحب قراءة المعلومات العامة ؟

ألف تحية ,.......

[ابو صلاح]

فى انتظار اضافاتك يا violinking ومتشوق لها انت وكل القريرة بتوع المنتدى

[ابو صلاح]

اية يا جماعة انتو مابتقروش خالص :) ولا كتاب أثر فيكو يا نهار أسود :lol: دة انا طلعت المثقف الوحيد اللى فى المنتدى

[emadiab]

شكرا ليك يا استا> محمود صلاح وبإ>ن الله حتكلم عن كتاب هايل جدا واثر فيا تأثير قوى وهو دع القلق وابدأ الحياة لديل كارينجى

[وليد صفوت]

اية يا جماعة انتو مابتقروش خالص  :)  ولا كتاب قصر فيكو يا نهار أسود  :lol:  دة انا طلعت المثقف الوحيد اللى فى المنتدى

<{POST_SNAPBACK}>

لا و الله الموضوع مش كده ,......

كل ما فى الأمر ان الناس بتستعد و كل واحد جاب و رقة و قلم وقعد يخلص اللى قراه فى حياته :wub: ,... فأكيد الموضوع هياخد وقت ,......

معلش نصبر شوية ,.. و انا عن نفسى فى طريقى لكتابة أول موضوع ,.....

الف تحية ,.....

[سقراط المصري]

يا مسهل يا كريم اكرمنا يارب

طبعا عن الكتاب بالنسبه لي فهو كان بمراحل عمريه ، بدأت معي من يوم اما والدي دخل عليا في يوم وكنت اياميها في اولي ابتدائي ومعاه شئ يسمي " صندوق الدنيا" مجله كانت بتصدر من ايام لما كنت بالبس الشورت ، وكان والدي فرحان وهو شاريها وبيقولي بكل حماس ، ياسقراط يابني عاوزك تقرأ المجله دي وتحكي لي اللي فيها.

وكانت اللعنه، حرف حرف اقرأ المجله ، المهم خلصتها في اسبوع قراءه او "ترجمه من العربيه المشبكه الي العربيه الهجائيه "

وبدأت اعتمد على نفسي واجاهد واتعب واكد واكد كمان مره عشان افك طلاسم ميكي موس.

ماعلينا

المهم الكتب المحترمه اللي قرأتها باللغه العربيه قليله، واقصد بالمحترمه ، الكتب التي تقدم معلومه علميه او تاريخيه بحياد.

اغلب انتاج انيس منصور قرأته (ولم احترم هذا الرجل بعد كل الوقت اللي ضيعته في كتبه بداً من الذين صعدوا الي الذين هبطوا من السماء مروراً بكتاب التاريخ انياب واظافر). كلها هجس وكلام علمي موثق بمؤتمرات بير السلم والعالم الفلاني المعجزه ، وفلان مات وبعدين حكي القصه الاتيه، وهكذا.

ماعلينا كمان مره

اغلب الكتب المحترمه هي كتب اصدار عالم المعرفه الكويتيه.

من افضل واعز اصداراتهم الي قلبي كتاب " بنية الثورات العلميه" وهو مترجم عن المؤلف" توماس كون" بصراحه كتاب بيوضح ليه نظريه علميه تظهر ولماذا الاخري تختفي وهكذا.

علشان انا بعيد عن مكتبتي مش فاكر اصدرات الكتب او اساميها ولكن سلسلة مكتبه الاسره كانت ممتعه بشرط ان تكون الاصدرات في السنوات الاولي لانه في السنوات الاخيره العمليه بقت اكل عيش واي واحد عاز جوز جنيهات اهو بيألف كتاب والسلام.

في السنوات الاربعه الاخيره قرأت كتب هيكل عن اكتوبر وناصر والسادات ، ومنتظر ان اقرأ كتابه عن مبارك .....ماعلينا.

فيه حاجه غتته ظهرت معي في موضوع الكتب وهي اني بقيت بعمل " سكان" للكتاب اي مسح للكتاب والقفز بين سطوره للحصول على المعلومه المفيده. اسلوب الاطاله اصبح مالوش مجال الان.

ولكن بعنايه وحرص على كل سطر وكل كلمه اقرأ كتب " ذكي نجيب محمود" وله كتاب رائع اعتقد اسمه " الشرق الفنان" كتاب عجبني مع كتابه عن المنهج العلمي.

تاريخ الفلسفه وتاريخ العالم من الكتب اللي اهواها ايضاً.

وكتب " حمدان" عن الجغرافيا ووصف مصر رائعه.

وبالرغم من ذلك لازلت احن لمجلة " صندوق الدنيا"

تحياتي

سقراط

[أنـفـــال]

أكتر كتاب قراته و حبيته ..

اسمه .. أسعد امرأة في العالم .. للدكتور القرني..

و في كتاب ممتاز.. اسمه هكذا علمتني الحياة للدكتور مصطفى السباعي و في منه نسخة اليكترونية هابقى اجيبلكم اللينك بتاعها..

في تاني.. :)

بس كفاية دول دلوقتي :lol:

شكراً يا محمود

[ابو صلاح]

شكرا يا استاذ سقراط على مشاركتك الجميلة ، بس سؤال شخصى هو انت اسمك الحقيقى سقراط ولا دة اسم حركى :wub: ، بس باين من كلامك انك مهتم بالكتب السياسة

انا عايز خدمة منك انك تكلمنا عن كتاب بشئ من التفصيل ، مش بالتفصيل بالظبط بس الكتاب بيحكى عن اية بوجة عام بأختصار وفى نفس الوقت يكون شامل الكتاب كلو ، ودى الفكرة الأساسية للصفحة دى

[ابو صلاح]

مشاركة متميزة يا انفال ، بس واضح من كلاميك انك مستعجلة شويا ، لأ الصفحة دى عايزة روقان مش ترمنا حتة لينك وتجرى D: ، المقصود من الصفحة دى هوا انطباعنا عن الكتاب ، يعنى انا ممكن انا وانتِ نقرا كتاب واحد بس انا اطلع بوجة نظر غير وجة نظرك ، ودة المقصود من الصفحة دى ، الكلام بشئ تفصيلى عن الكتاب وانطباع الشخص عنة ،

[ابو صلاح]

لا و الله الموضوع مش كده ,......

كل ما فى الأمر ان الناس بتستعد و كل واحد جاب و رقة و قلم وقعد يخلص اللى قراه فى حياته  ,... فأكيد الموضوع هياخد وقت ,......

فين التلخيص يا Violinking

شكرا ليك يا استا> محمود صلاح وبإ>ن الله حتكلم عن كتاب هايل جدا واثر فيا تأثير قوى وهو دع القلق وابدأ الحياة لديل كارينجى

اية يا عماد انت مش قلتلنا هتتكلم عن كتاب القلق ، الصراحة انا محتاج الكتب دة بعد قلقى عليك، أصلك غطست مرة واحدة كدة

[New]

الاخ العزيز محمود

بذكر المجلات علشان الاخ العزيز سقراط ما يغضبش على: :D

احب مجلة عربية بالنسبة لى وفيها معلومات عامة كتيرة هى مجلة العربي ولها موقع على النت.

المجلات الاجنبية كتير بس اهمها National Geographic Magazine ولها برضه موقع على النت.

بالنسبة لاخر كتب قرأتهم :

1- سيرة الرسول صلى الله عليه وسلم لابن هشام(5 اجزاء) : سرد تفصيلى لحياة الرسول صلى الله عليه وسلم.. كتاب تاريخى جميل...

2- رجال حول الرسول صلى الله عليه وسلم لخالد محمد خالد

عن حياة الصحابة وكثير منهم ما بنسمعش عنهم كتير وكان لهم دور مؤثر و عطاء غير محدود.

3- خلفاء الرسول صلى الله عليه وسلم لخالد محمد خالد

عن حياة الخلفاء الراشدين الخمسة (ابو بكر وعمر وعثمان وعلى وعمر بن عبد العزيز رضى الله عنهم) و كيفية حكمهم واسلوبهم فى الحياة. يتطرق ايضا لفترة الفتنة واسبابها وما ادت اليه.

الكتب دى كنت قرأتهم زمان بس من فترة للاخرى تحس انك عايز ترجع وتقرأهم تانى ... وده اللى انا عملته مؤخرآ.

ارجوا ان الاخ الفاضل ENG. BEHAIRY ما يزعلش منى لانى كتبت عن اكتر من كتاب بس الكتابة بالماوس تجيب شلل. والواحد ما بيصدق يكتب مداخلة.

تم تعديل 23 أغسطس 2005 بواسطة New

[bentmasria]

الاخ الفاضل الاستاذ محمود صلاح

يبدو انك تحاول اعادتنا لزمن العشق الجميل والقراءة التى مازلت اعشقها ولا استطيع فراقها رغم السنين والمسئوليات الا انها تعيدنى مائة عام للوراء

ومؤخرا تمتعت بقصة رائعه فى عدة فصول لاديب متميز رحل عنا منذ بضعة اشهر وترك تاريخا وتراثا ادبيا ثريا تمتعت بقراءة بعضا منه واشير الى سداسيته الشهيرة واسمها (مدن الملح) تعرض بشكل عام الى بدء وتطور نشأة المجتمعات الخليجية فى الفترة ماقبل اكتشاف البترول وبعدها مباشرة وتعرض للآثار السلبية والايجابية للثروة المفاجئة على مجتمعات البدو والحضر وقيمهم وتحمل تحليلا رائعا للأمر ربما باعتبار كاتبا ناقدا ايضا فهى ممتعة تهتم بالتفاصيل وترسم الصورة من المجتمع بدقة ورغم وجودها فى اجزاء كل جزء لا يقل عن خمسمائة صفحة الا انها لا تصيبك بالملل او الرتابه فأنت تلهث وراء الصفحات لتعلم ماذا سيحدث فى هذه المللكة الخيالية الصغيره على حدود الصحراء ومع دخول الامريكان وقيم الغرب وفى جنبات عائلة الطبيب المعار الى بلاد حديثة الثروة وكيف يتسلل الى جنباتها بذكاء يحسد عليه

ادعوكم جميعا لقراءة مدن الملح

ولقراءة سطور من كتب قلمه

(("مثل كثير من الفقراء الحالمين كنت أرسم على وجه السماء خيولا راكضة باستمرار، كنت أفعل هذا عندما تكون السماء شديدة الزرقة وليس فيها غيمة واحدة، وكانت هذه الخيول شديدة الجموح وشديدة القوة، وكانت تسافر دائما، وكنت أمتطيها باستمرار وأسافر، لكني في هذا السفر لم أكن أبحث عن شيء، أو أعرف شيئا، حتى جاء يوم مللت فيه أن أسافر ببلاهة هكذا، فبدأت أبحث عن أهداف لهذا السفر، لكن بحثي كله ضاع، وانتهى بلا جدوى، فقررت أن أتعلم القراءة، وكانت تلك هي البداية لرحلة عذابي الحقيقية على الأرض". ))

عبد الرحمن منيف

والتمتع بحكايات عبد الرحمن منيف فى سداسيته الرائعه

[مسافر زاده الخيال]

السلام عليكم

من الكتب التى قلبت كياني منذ الصغر كتاب (الف ليلة و ليله) نسخة قديمة مطبوعة في بيروت , والسبب هو ان مظهر الكتاب (حسب نظرتي الطفولية و قتها) كان كتاب دين ولكني فوجئت بالحوادث والقصص الجنسية(بل بالالفاظ الصريحة والتي كنت اظنها حتى ذلك الوقت كلمات عامية) و قصص الجن فاصبحت في حال (متلخبط) بين الاندهاش والمتعة والاستغراب من القصص (فهذا الكتاب هو الذي دربني لقرأة اي نص يفوق عدد صفحاتة المائه (وهذا كان غريبا في بيئتي و قتها لمن لم يتجاوز الحادية عشره في بداية الثمانينات)

وطبعا كنت اقرأ الكتاب خلسة (من مكتبة الوالد) في الليل حتى قبل الفجر خلال اجازة نهاية العام الدراسي.

طبعا لصغر سني وقوتي لم اتم قراءة جميع الاجزاء الا بعد سنوات قليلة لانتهاء الدراسة وانشغالي بها وبالحياة ولكن ذلك الكتاب اصابني (بالشبق القرائي).

ثم بعد ذلك مرحلة قراءة ترجمات المنفلوطي (تحت ظلال الزيزفون و مجدولين والفضيلة) وبالذات الفضيلة اخذتني لعوالم خيالية من الدهشة والبهاء

ولا انسى قرأتي لكتابى (بدائع الزهور في وقائع الدهور) استعرته من زميل دراسة في المنرحلة الابتدائية على اساس انه كتاب ديني مفيد (وشكله كذلك ولذا لم يمنع ).

وبقدر ما كان كتاب ممتع قرأة الا انه قد اثر سلبيا على من الناحية الفكرية ففيه قرأت ان الارض على قرن ثور والثور فوق سلحفاه والسلحفاه فوق حوت فتصوروا مدى التمزق الفكري الذي عشته وقتها (حوالى 1986)بين ما اعتقده ان الدين و بين عقلي حتى كلمت ابي عما يشيج في صدري واجابني بان ماقرأته ماهو الا اسرائيليات (وكنت اول مرة اسمع هذه الكلمة) وطبعا بعد ذلك مررت بمرحلة قرأة كتب مصطفي محمود ولن انسى كتابه (حوار صديقي الملحد-الذي الغي بشكل نهائي اي احتمال لاتجاهي لفكر الحادي) ورواية (رجل تحت الصفر ) والذي اعتقد انها قصة عالمية لا تقل عن قصص (اسحق عظيموف) في الخيال العلمي

ومررت بمرحلة قراءة انيس منصور (حول العالم.....,مذكرات.......,لعنة الفراعنه-واذكر حينما كنت اقراة في رمضان ليلا فجأة انقطعت الكهرباء عن جنوب مدينه جده فقزت مرعوبا ثم ضحكت(والله العظيم) وليس لدي تفسير.

وقرأة اولاد حارتنا لنجيب محفوظ من نسخة مهربة (والتى جعلتني اعذر الدول التي منعتها من التداول-اسلوب الرواية ممتع من حيث الشكل ولكني اتحرق لمعرفة من هو (الجبلاوي)في الرواية؟؟؟؟؟؟؟؟؟؟؟؟؟وهناك العديد من المحطات وسأكتفي بذلك (حتى لا اسبب الملل للاعضاء الكرام والسلام عليكم

[ابو صلاح]

ملل ايه بس ده انت كلامك كله متعة ... وشكراً على احياء هذا الموضوع بعد ما اتنسى

ده حتى انا خلصت كام كتاب وما كتبتش ملخص عنه فى هذه الصفحة مع انى صاحب الفكرة .. بس هاحاول على قد ما أقدر انى اضيف ملخصات للى قاريته

وبحب أفكر الناس اللى وعدتنى انها تكتب ملخصات عن الكتب اللى قارتها ولكن لحست وعودها ... واخد بالك يا ( Violinking)

بس بتمنى ان كل اللى يقرا كتاب مفيد وممتع يدينا تلخيص بسيط لينا أو على الأقل يدينا أسم الكتاب

[مسافر زاده الخيال]

وهناك كتاب ((الاصول الزنجية للحضارة الفرعونية))تأليف شيخ اندي ديوب وهو سنغالي وقد الف كتابه في الخمسينيات وقد قرات ترجمته بالعربية وفكرته باختصار بان بناة الحضارة الفرعونية او ان السكان اللاوائل ليسوا بيضا بل ينتمون عرقيا للزنوج وهناك عدة دراسات لغوية على عدد من القبائل الافريقية وصلتها باللغات المصرية القديمة.

رواية البوساء ((لفكتور هوجو)) ترجمة منير البعلبكي حوالي الف صفحة في 4 مجلدات حيث ان اغلب الترجمات العربية مختصرة ومبسترة بشكل مخل جدا جدا جدا

حيث ان القصة الكاملة تتجاوز كونها رواية (فهي رواية وكتاب تاريخ ودراسات اجتماعية ولغوية بل حتى دراسات دينية كهنوتية و دراسات سياسية عن الثورة الفرنسية والصراع بين الجمهوريين والملكيين) بحيث تتضائل (حسب رأيي) اهمية الشخصيات الرئيسة {جان فلجان_كوزيت_جافيرالخ} حقيقة لا تغني الترجمات المختصرة عن قرأة الرواية كاملة.

رواية رحلات (جليفر) الكاملة كذلك حيث ان اغلب ترجماتها تذكر له رحلتين فقط في بلاد الاقزام وفي بلاد العمالقة بشكل طفولي (والحقيقة ان الرواية فلسفية و نقدية للحياة السياسية في بريطانيا بشكل رمزي) وفي الرواية اربع رحلات من ضمنها في بلاد الخيول مخلوقات عاقلة والبشر مخلوقات همجية.

والى اللقاء في شروحات اخرى لاجمل ما قرأت من كتب

[ASD ALLAH]

وقرأة اولاد حارتنا لنجيب محفوظ من نسخة مهربة (والتى جعلتني اعذر الدول التي منعتها من التداول-اسلوب الرواية ممتع من حيث الشكل ولكني اتحرق لمعرفة من هو (الجبلاوي)في الرواية؟؟؟؟؟؟؟؟؟؟؟؟؟

<{POST_SNAPBACK}>

نجيب محفوظ 00

رغم أن نجيب محفوظ لم يكن البداية بالنسبة لى إلا أنه كان

المحطة الأبرز فى تحولاتى القرائية بل والفكرية 00

بدايتى مع نجيب محفوظ كانت مع " الحرافيش " ومن حسن حظى

أننى لم أكن قد سمعت يومها مسلسل الإذاعة الذى يحمل نفس

الاسم ولم تكن السينما قد أنتجت القصة بعد 00

ولا أستطيع أن أعبرعن العوالم الساحرة الذى سحبنى إليه نجيب

محفوظ من خلال " الحرافيش " عالم من دم ولحم أعيش بينها

كأحد سكان الأحياء الشعبية القريبة من أمكنة نجيب محفوظ 00

لقد ظللت أعض أناملى ندما - رغم سنى المبكرة - أننى قد أضعت

وقتا طويلا سدى مع قصص احسان عبد القدوس و خزعبلات أنيس

منصور دون أن أدرى أن هناك عبقرية اسمها نجيب محفوظ 00

وأصبحت أبحث وأن شئت الدقة أنبش و " أنكش " عن أى قصة

غير مشهورة لم تتحول بعد إلى فيلم لنجيب محفوظ حتى أستطيع

أن أتذوقها على طريقتى دون أى تأثير من رؤى أصحاب الفيلم 00

وقد كنت فى هذا السن المبكر حريصا على ألا أشاهد أى عمل

سينمائى مأخوذ عن قصص نجيب محفوظ إلا بعد أن أقرأ القصة

الأصلية حتى لا أفسد على نفسى عوالم القصة 00

من هنا قرأت اللص والكلاب والطريق والسراب والسمان

والخريف وميرامار وثرثرة فوق النيل طازجة ندية برؤيتى أنا 00

وكانت المفاجأة الكبرى فى " ليالى ألف ليلة " التى أعتبرها أفضل

ما كتب نجيب محفوظ بأطلاق والتى مازلت أقرأها مرة كل عام

على الأقل حتى أستزيد من عبقريتها وحكمتها وعالمها الساحر 00

وقد دفعنى الفضول إلى البحث المضنى عن " اولاد حارتنا " قبل

الحادث الأثيم الذى تعرض له أستاذنا الكبير منتصف التسعينيات

وقد أثمر بحثى وقرأت القصة أكثر من مرة 00

وبمنتهى الأنصاف - وقد قرأت كل ما كتبه نجيب محفوظ وكل ما

كتب عنه - أقول أن " اولاد حارتنا " هى الأضعف والأقل

قيمة والأقصر قامة فيما كتب نجيب محفوظ وأنها عبارة عن جنونة

أو " نزوة " من النزوات التى تعترى المبدعين أحيانا فيذهب

أحدهم لمضاهاة القرآن الكريم بقصة أو يحاول آخر تلحين كلمات

القرآن على العود ؛ ولولا الضجة التى أثيرت حول ههذه القصة

لطوها النسيان و لما أهتم بها أحد على الاطلآق 00

وقد حاول نجيب محفوظ فى هذه القصة تمثل ومحاكاة ومضاهاة

الشكل و القصص القرآنى 00

فتعمد الرجل أن يدون قصته فى ( 114 ) فصل وهو نفس عدد

سور القرآن الكريم بالتمام والكمال 00

و أختار لأبطال قصته اسماء قريبة الشبه جدا باسماء أنبياء الله

عليهم جميعا وعلى نبينا الصلاة والسلام ؛ بل وتعمد أن يكون

الاسم على نفس الوزن أحيانا 00

فآدم عليه السلام فى القصة " أدهم " 00

و أبليس عليه اللعنة فى القصة " أدريس " 00

و موسى عليه السلام فى القصة " رفاعى " لارتباط اسم

الرفاعية فى مصر بأولئك الذين يتعاملون مع الأفاعى والحيات و

هى ما أشتهر فى قصة موسى عليه السلام 00

ومحمد عليه الصلاة والسلام فى القصة " قاسم " ولا يخفى أن

نبينا عليه الصلاة والسلام يكنى " أبا القاسم " 00

أما " الجبلاوى " وكما يبدو من سياق القصة فهو يرمز للذات

الألهية تعالى الله عما يقولون علوا كبيرا 00

وقد سعدت أن بأن قابلت أستاذنا نجيب محفوظ قبل حصوله على

جائزة نوبل وقد كان يومها فى أتم صحة وأحسن حال 00

و رغم تغير مزاجى فى القراءة والأطلاع إلا أن كل ذلك يتوقف

تماما أمام نجيب محفوظ ويوسف أدريس وفتحى غانم 00

هل قلت يوسف أدريس وفتحى غانم ؟؟!!!

نعم قلت يوسف أدريس وفتحى غانم ولكن لكل منهم مداخلة

مستقلة 00

فنحن سنتحدث عن يوسف أدريس وما أدراك ما يوسف أدريس 00

وفتحى غانم وما أدراك ما فتحى غانم 00

فإلى اللقاء 00

[مسافر زاده الخيال]

تحية لاسدالله حقيقة ان رؤيتي متطابقة معك بخصوص شخصيات قصة اولاد حارتنا خاصة الجبلاوي (والعياذبالله) غفر الله لكاتبها بعد توبته ان شاء الله . وقد بدأت قراءة ثرثرة على النيل قبل حوالى ثمان سنوات ولم اكمل لعدم تذوقي القصة (ربما لضالة ثقافتي).

ولكني اسأل هل يمكن لي ان اجد روايات او كتب صدرت قبل قرن في مصر؟ فأنا اتشوق لقراءة حديث عيسى بن هشام للمويلحي وتحفة الابريز في تلخيص باريز مثلا .

والى اللقاء في مداخلات اخر