من غير تريقة لو سمحتم

[هشام عبد الوهاب]

مفاجأة الريس الكبيرة بتاعت القرار العظيم والمبجل والغير مسبوق ، وغير مسبوق دى يعنى حاجه جديده ماحصلتش قبل كده من اى ريس ومبجل دى يعنى حاجه فخمه كده واخر الاجه تقدر تقول بتاعت ولاد الذوات . الغريب فى المفاجأة دى ان الريس فاجئ بيها الكل كليلة من اول الواد عطوه بتاع الجزم اللى فى القهوه لحد البهوات ولاد البهوات بتوع الحزب الوطنى مع ان الريس هو نفسه ريس الحزب ولما الريس طلع ع المنصه (بتاعه الخطاب مش المنصه اياها) ومسك الميكرفون واتنحنح وقال القرار الكل اتفاجئ وزملاته فى الحزب اتخضوا ومنهم اللى قال يا لهوى واللى قال ياخبر ابيـــــــــــــــــــــض ( ماهو ماينفعش يقول اى لون تانى لحسن يروح فى ابو نكلة او ابو عشره جنيه دلوقتى .

ايه ده هو الريس شورته من دماغه ولا ايه ، يعنى ضرب الحزب ورجالته بمبمه وكتم على الموضوع ،، طب والبهوات دول شكلهم يبقى ايه ادام العيال فى البيت ولا ادام اصحابهم فى النادى اللى كل واحد فيهم عامل نفسه ادامهم عارف الكفت وعارف ان الريس اتغدى محشى كرنب اول امبارح .

طيب هو مش برضك الريس فيه جماعه من بره حزبه قالولوا عاوزين نعدل الدستور قالهم لا يمكن وكلا البته ، والرجاله بتوع الحزب الوطنى رددوا وراه .

كلا البته يا كلا البته ..... تطلعوا تنزلوا كلا البته .

والبهوات الكبار قالوا ان التعديل فى الدستور هايسبب الخراب والدمار والهلاك واللى هايجيب السيره دى تانى هانحط السيخ المحمى فى صرصور ودنه ، ممممم ازاى الصحه دلوك .

وبعد القرار بشويه ابتدا كل واحد من البهوات اياهم اللى يقولك ،، هو انتم مادرتوش مش الريس كان قاللى من 3 سنين وانا نصحته يتروى ( يعنى ينتظر يعنى يصبر شويه ) وبعدها طلع علينا الباشا (من الكبارات بردك ) وقال فيكم من يكتم السر ومع ان ماحدش قاله فى بير لكنه قالنا بينى وبين امه لا الاه الا الله الريس قالى من شهرين ............ شوف ازاى ،

طيب ايه اللى خللى الريس بعد كلا البته يغير رأيه لنعم البته . يكونش ساعة عصرية و الجو بديع والدنيا مطره ورعد وبرق وهو قاعد فى الشمس ( مع ان الدنيا مطره والشمس مابتتطلعش) فكر كده بخبرته وقال لنفسه وماله مالها الانتخابات ما الحزب هايكسب هايكسب ماهو كل اللى فاضل ست اشهر واهى فرصه حلوه .

يعنى ياربى مش كانت مطرت والشمس طالعه من زمان .

وطبعا عقبال ما الاخوة بتوع المقصدار مايطلعوا القرار بالشروط اللى تنطبيق على المرشحين يبقى فاضل شهرين تلاته على الامتحانات (الأنتخابات يعنى) وطبعا الشروط هاتنطبق على المرشحين زى ماتنطبق السما على الأرض وهاتجيب اجلهم ويفضل مين ... مين ... ايوه مرشح الحزب الوطنى الديمو قراره .

وان حتى عدى مرشح ولا اتنين بسلام من انطباق الشروط على روحه ومروره بسلام من المقصله .... ها أو ... مش هايلحق .. اللى فاضل من الوقت قليلون ..قليل ون ... ياولدى .

وادى جزات اللى مايسمعش ....... كلمة ماما تقولها

ذهب الليل وطلع الفجر ....... والعصفور .......................زغرط .

[مصر عشقى]

اكيد من غير تريقة

فعلا هيغيروا الدستور انا بسمع ان المؤبد 25 سنة وهيغيروة فى الدستور ويخلوة مدى الحياة ويوورث

بس خلاص زى شعبولا ما بيقول

تم تعديل 8 أبريل 2005 بواسطة مصر عشقى