عتاب على المغتربين المصريين

[deemuck]

السلام عليكم ورحمة الله وبركاته

بعد عمل حسبة صغيرة داخل المملكة العربية السعودية وجدت أن:

1- المقيمين المصريين يبلغ عددهم حوالي مليون ونصف يتألفون من (دكاترة ، مهندسين ، عمال .. إلخ ) في اللي ينزل إجازته كل 6 أشهر أو سنة أو أكثر. ويجيب هدايا معاه بقيمة على الأقل 300 ريال سنويا دة رقم بسيط للغاية ( خذ في الاعتبار متوسط جميع التخصصات والفئات الموجودة داخل مختلف مدن السعودية ). يعني بحسبة صغيرة 1500000 * 300 = 450000000 ريال ( 450 مليون ريال ).

2- المعتمرين القادمين من مصر يبلغ عددهم مليون. معدل الهدايا عشان جاي من عمره طبعا قد تصل إلي أكثر من 300 ريال بس خليني احسبها 100 ريال. بحسبة جديدة 1000000 * 100 = ( 100 مليون ريال ).

3- الحجاج القادمين من مصر يبلغ عددهم حوالي المليون والنصف برضه ، الهدايا هنا اكبر بكتير دة دفع حوالي أكثر من 20 ألف جنية للحج. من الممكن أن تزيد قيمة الهدايا عن 1000 ريال لكن خليني أقول 200 ريال فقط . بنفس الحسبة 1500000 * 200 = ( 300 مليون ريال)

نقوم بجمع جميع النفقات ستجد أنها تصل إلي (850 مليون ريال ) سنويا بحسابات زهيدة جدا جدا جدا.

متوسط الريال في مصر طوال السنة من 1.5 إلي 2.00 يعني حوالي 1.7.

الرقم بالجنيه المصري = 1 مليار و 450 مليون جنيه سنوياُ ( من المقيمين والقادمين إلي المملكة العربية السعودية فقط ) أحسب في ذهنك المقيمين في الأمارات ، الكويت ، البحرين ، قطر ،،، الخ.

تخيل لو أن المبلغ دة يُصرف سنوياً في جمهورية مصر العربية اللي هي بلدنا الأم . هل سيفكر كل من هو هناك في الغربة والهجرة.

تم ،،،،

[الحاج فوزى]

الفاضل deemuck

وجهة نظر ..

واكيد مصرنا اولى بالفلوس ده ..

لكن .. لو نازل وانت عارف ان اخوك نفسه فى ساعة اصلية حلوة ثمنها فى الخليج قول بالمصرى 1000 جنية ، لو جبتها من مصر تلاقيها بـ 3000 ، هتعمل ايه ؟

او لو عايز تجيب كوتش حلو لأبن اختك ثمنه هيكون فى الخليج بـ مئتان جنيه ، وهو هو فى مصر ممكن يوصل لـ 500 و 600 جنيه . هتعمل ايه ؟

طبعا الامثلة كثيرة ..

اللى انا عايز اقوله ايه

انا اول ما سافرت الكويت .. وكان اصحابى هنا بيشتروا الاجهزة الكهربائية من هنا وينزلوها مصر .. اتعصبت قوى وغيرت على العمال والمصانع وقلت المفروض الواحد يشترى من مصر علشان العامل يلاقى شغل والمصانع تشتغل وخلافه ..

لكن بعد سنة واتنين وثلاثة .. للأسف .. مش صح

لانك لو قلت اجيب سلعة بلدى ( معاك حق ) واحتسب الفرق عند الله علشان خاطر بلدى

انت اللى هتجيب سلعة رديئة ، وبفلوس اكثر من ثمن السلعة الاصلية " بتاعت بلادها "

و الفرق بيروح للقطط السمان مش هيروح للعامل او للموظف الغلبان .

لكن اتفق معاك انك لما جمعت المبلغ الكلى لقيت الرقم فعلا كبييييييير

يبقى النصيحة للمغتربيين .. يخففوا من الهدايا شوية :blink:

حسين

تم تعديل 8 مارس 2007 بواسطة Huss.

[رمضان]

والله فكرة يا حسين ولا اقولك بلاش هدايا احسن

[بنت النيل]

طبعا اذا نظرنا للموضوع هنلاقى ان كل وجهات النظر فيه سليمة يعنى محيرة شوية

لكن فى حاجه كمان يعنى مثلا عوزين ذى ما حسبنا اللى بنصرفه فى هذه الدول من شراء للهدايات

ياريت نحسب كمان اللى بنصرفه اثناء تواجدنا بمصر ولا هو احنا مش بنصرف هناك ولا ايه

ده الواحد عشان ينزل شهر اجازة ويقول همسك على المصروف ومش هصرف المهم انى انزل اشوف اهلى وبس عوزله فى الحسبه دى مش اقل من عشرة الاف ولا 15 الف جنيه ده فى حاله انه هيقعد فى بيتهم ويلا اذا سافر مثلا للاسكندرية مش هنقول طبعا منتجع ولا الاماكن المعروفه ساعتها عوزله ولا 20الف 25الف :) على الاقل برده

يعنى احنا برده فلوسنا بتستفيد بها بلدنا مش كلها رايح

ده غير الحسابات الموجودة فى البنوك مش بتفيد برده وكمان عندك المشروعات اللى بيقوم بها بعض المغتربين فى الاستثمار دور هتلاقى اننا بنفيدها كتير المهم هى تفيد الناس وتديهم حقوقهم

ياسيدى مصر غنية بخيرها وفيها الخير كتييييييير لكن للاسف الحراميه اكتر :blink:

وبعدين حضرتك بتقول : { تخيل لو أن المبلغ دة يُصرف سنوياً في جمهورية مصر العربية اللي هي بلدنا الأم . هل سيفكر كل من هو هناك في الغربة والهجرة.}

طب هو فى حد موجود هناك يستطيع صرف هذا المبلغ اصلا عشان يصرفه فى مصر ده بالنسبة للمقيمين فقط

اما الحجاج او المعتمرين دول تقدر تقول كدا بيعمله حسبه للهدايات مع مصروفه فقط

لكن هى برده نظرية كويسة لكن مين يقدر ينزل من غير هدية لحد من هناك والله لو حتى جبت له هدية قيمة من مصر هيقولك يعنى مقدرتش تجبها من هناك جاى تجبهالى من هنا محدش بيعجبه العجيب

[عبده بيه]

بس مين يراعي ظروف المغترب يا اخوانا دي مش اجازة دي فعلا افتري

[أبو حميد]

السلام عليكم ورحمة الله وبركاته

بعد عمل حسبة صغيرة داخل المملكة العربية السعودية وجدت أن:

1- المقيمين المصريين يبلغ عددهم حوالي مليون ونصف يتألفون من (دكاترة ، مهندسين ، عمال .. إلخ ) في اللي ينزل إجازته كل 6 أشهر أو سنة أو أكثر. ويجيب هدايا معاه بقيمة على الأقل 300 ريال سنويا دة رقم بسيط للغاية ( خذ في الاعتبار متوسط جميع التخصصات والفئات الموجودة داخل مختلف مدن السعودية ). يعني بحسبة صغيرة 1500000 * 300 = 450000000 ريال ( 450 مليون ريال ).

2- المعتمرين القادمين من مصر يبلغ عددهم مليون. معدل الهدايا عشان جاي من عمره طبعا قد تصل إلي أكثر من 300 ريال بس خليني احسبها 100 ريال. بحسبة جديدة 1000000 * 100 = ( 100 مليون ريال ).

3- الحجاج القادمين من مصر يبلغ عددهم حوالي المليون والنصف برضه ، الهدايا هنا اكبر بكتير دة دفع حوالي أكثر من 20 ألف جنية للحج. من الممكن أن تزيد قيمة الهدايا عن 1000 ريال لكن خليني أقول 200 ريال فقط . بنفس الحسبة 1500000 * 200 = ( 300 مليون ريال)

المقيمون المصريون بالسعودية حوالي مليون والحجاج القادمين من مصر يجب الا يتعدوا 80 آلف ممكن يكون في حجاج مصريين من السعودية والخليج ودول محسوبين قبل كده والكلام ده حسب اخر حاجة قريتها. لكن الحسبة مش هاتفرق كتير عن حسبتك لأن الهدايا بتكون أغلى من كده بكتير.

المهم الفكرة غير مجدية كخدمة للبلد من وجهة نظري لأن الهدايا الموجودة بمصر معظمها مصنع بالخارج والجزء المصنع بمصر وغالبا ها يكون منسوجات يباع بثلاثة أضعاف ثمنه الأصلي وطبعا بيروح لصاحب المصنع مش للعمال لو حضرتك سافرت للخارج وشوفت الأسعار هاتعرف كم السرقة والأستغلال الواقع على كاهل الشعب المصري وخصوصا المنسوجات ولذلك لم أجد منتج مصري هنا سوى الملابس الداخلية القطنية نادرا وذلك لأن أصحاب المصانع يفضلون البيع في مصر أفضل من التصدير فلن يستطيعوا الحصول على هذه الأثمان خارج مصر.

ساروي لك قصة حقيقية حيث سأل أحد أصدقائي أحد أصحاب المصانع ماذا ستفعلون عندما تطبق الجات في مصر ويجد الناس المستورد برخص التراب أتعرف ماذا كان رد صاحب المصنع؟

بدلا من 300 % مكسب سنكتفي ب 100 % فقط

ما قالته بنت النيل هو الصحيح حيث أن معظم أجور المغتربين تحول لمصر وتصرف بمصر فالمصريون لا يشترون العقارات بدبي أو لبنان او غيرها بل مصيرهم مربوط بتراب بلدهم وسيعودون بكل شئ في النهاية لمصر.

[هادي]

كلامك رائع جدا يا استاذ deemuck

وكذلك كلام الاخوة الافاضل جميعا

كلها أفكار جميلة وبناءة

حبيت أوضح نقطة بسيطة بخصوص جشع التجار او أصحاب المصانع

أنا بداية لا أنفي ان هناك جشعين يريدون تحقيق 300% من المكسب

لكني - عن ممارسة وتجربة - وجدت ان التعميم خاطيء لعدة أسباب

الفساد في مصر أصبح مطاط جدا لدرجة انه لو تحول الى سمشية يلاج سوف يستظل به الجميع

كيف ؟ .. أوضح .. (رابط بسيط ع الماشي من هنا ارجوك)

شخص بسيط يكنس امام محلك او ورشتك كل صباح .. محتاج اصطباحه !!

النهاردة جنيه وبكره اتنين وبعده المعايش بتغلى .. تبقى خمسة وعشرة

وبعد ما كانت جميلة وتطوع من حضرتك

تصبح فردة !! و إتاوة !! ولو لم تبرز المعلوم .. ممكن يعمل لك قلق ومشاكل لا يستهان بها

مثال ..

يشتكي لرئيسة انك بترمي زبالة امام محلك أو ورشتك

دي فيها غرامة قد تصل الى 500 جنيه .. وقد تزيد بحسب المعارف !!

لايوجد قانون محدد واضح المعالم في مصر في قطاع الغرامات المفروض تطبيقها على القاء زبالة في الشارع العام

ممكن ان نقيس على ذلك أمثلة أخرى ..

البلدية .. وما ادراك ما البلدية .. هي سيارة بوكس تابعة للشرطة ينزل منها ضابط ومعه جلاوزته (جلاوزته لمن يهتم هم صبيانه من بعض المجندين !! ) كل ماهو موجود فوق الرصيف ومقابل للمحلات يتم اعتباره غنائم حرب !! ويتم مصادرته أو تكسيره احيانا !!

لنا ان نتخيل عذابات و دموع السريحة ومن يفرشون فوق الرصيف القاهرة و المدن الكبرى

اما أصحاب المحلات .. فأنا اعترف أنهم على خطأ لو تعدوا بفرش بضاعتهم على الرصيف

لكنهم يستحقون الغرامة فقط وليس امتهان الادمية !!

ثم - كالعادة - يتحول الامر الى إتاوة وفردة في النهاية ومعلوم يصل أول كل شهر

وقتها تنام البلدية وتتغافل عن مئات الكراسي التي تفرشها قهوة المعلم فلان على الرصيف

لدرجة تجعل المارة يشاركون السيارات في بحر الطريق

مثال آخر .. الأمن الصناعي

موظف معدوم الضمير ممكن يشك حضرتك مخالفة على الورق تكبدك مصاريف طائلة

اعرف صديق كان خارج مصر وكان مع ذلك بيدفع مخالفات لأن الموظف مر ولم يجد بورشته طفاية حريق !! وطبعا المبدأ السائد في بلادنا الجميلة بيقول : ادفع أولا ثم اشتكي !! شيء متخلف جدا

طالما أن دفعت .. يبقى الشكوى لزمتها إيه .. ؟!

العقل والمنطق وكل دول الدنيا بتقول ان الشكوى أولاً ثم الدفع لاحقا عند تثبيت الجريمة عليك ورفض طعونك بها ورفض الأدلة التي قدمتها حضرتك على براءتك !! لكن مصر غير الدنيا بحالها !!

قد نستمر في صايغة الكثير من الامثلة

وجميعها يصب في الاخير انه يمكن زيادة سعر سلعه وتحميلها بمصاريف (فساد) ترهق المواطن العادي والمشتري النهائي بدون أي داعي ، ويمكن توفيرها لو تم محاربة الفساد

لن اتحدث عن الفساد بالملايين مع الحيتان الكبيرة

لن اذكر واقعة صديق - سولت له نفسه - أن يستورد رولمان بلي لزوم عربيات النقل التقيل واللواري من فرنسا - من فين من فرنسا !! - ثم وقفت بضاعته في الميناء ستة أشهر يدفع عليها ارضية لانه مش عارف يفتح مخه ولأن الحيتان الكبيرة التي تحتكر هذا الكار رفضت السماح لهذا الفسل أن يرفع رأسه. رجال الجمارك رفضوا الرسالة (الشحنة) بالكامل لأنها غير مطابقة للمواصفات !!

كاد الرجل أن يجن .. كيف .. إنها من المصنع الفرنسي الذي يستورد منه الآخرون !!

لدرجة ان المصنع نفسه أرسل له مندوب في مهمة عاجلة لأجل التباحث مع السلطات في سبب رفض الصفقة بكاملها !!!

الامثلة كلها من هذه النوعية الغامقة اللون

لازم اختم مداخلتي وأقول لكم برغم كل شيء

نهاركم سعيد

تم تعديل 8 مارس 2007 بواسطة هادي

[deemuck]

بسم الله الرحمن الرحيم

حقيقي وجهة نظر وأشكر كل من أيد وانتقد.

الأستاذ Huss

كلامك سليم أكيد ، وطبعا الكثير يفضل شراء الأجهزة والهدايا القيمة من خارج مصر لفرق الأسعار مع أن السوق السعودي معظمه صيني . أنت اتخذت هدايا بمبالغ كبيرة كمثال ، مع أني افترض الهدايا الخفيفة التي لا تتعدى أجماليها عن 200 ريال. احسب لنفسك الهدايا اللي اشترتها الإجازة السابقة لك احتمال تجد مبلغ 200 ريال أو أكثر إنفاقه في السوق السعودي كان ليس له داعي.

طب أحب أقول لك شيء. إيه رأيك قبل ما انزل إجازة بحسب متطلبات بيتي في السعودية وما ينقصنه وبجيبه من مصر وأنا راجع كدة كدة الشنط بتكون فاضية. حاجات مثل (عدة للعربية ، مفاتيح ، أشياء خفيفة تنقص المطبخ، الخ ) دول لوحدهم أكثر من 200 ريال ولا تتعلق بالتقنية ولا غيره .لماذا يصرف المبلغ في السعودية؟

تعليقاً آخر على الأجهزة الأصلية شد بلدها. وهذا التعليق شخصي تماما ولا تعتبره دعوة للآخرين

أنا أفضل الجهاز صيني أو مصري ب1000 جنيه بجودة لمدة 10 – 15 سنة عن الجهاز الياباني بجودة 100 سنة بسعر 3000 جنيه. لأني أؤمن بالتقادم وتغير التكنولوجيا لأننا الآن في العصر الصيني مقلدة التكنولوجيا

الأخت بنت النيل و الأستاذ ابوحميد

طبعا وجهة نظر والاختلاف لا يفسد الود قضية. أكيد تحويلات المصريين يستفيد منها السوق المصري.غير الأنفاق على المصايف وغيرها كله يعود لمصر ، ولكن المقصد من كلامي النفقات على الهدايا. قد لا تؤيدان وجهة نظري. لكن المبلغ اللي ذكرته للأستاذ Huss عاليا لن يضرك أبدا إذا أنفقته في مصر. وبرضه زي ما في عمال في أصحاب عمل. قد يكون لهم حافزا للتوسع ومنه توظيف المزيد.

وأشكرك يا أستاذ هادي; حقيقي هادي.

والله الموفق.

[عصام أبوالفتح]

اعزائى الافاضل : المغتربين طفشانين من البلد لاسباب مختلفة .. واللى بيرجع بيندم وبيقولوه : ايه اللى جابك ؟!!! :(

لو وفرنا المبلغ وصرفناه فى الهدايا من مصر هايستفيد البائعين فى مصر طبعا .. لكن المغترب هايفضل مغترب .. يبقى ايه معنى السؤال والعتاب فى اخر الموضوع ؟

[deemuck]

السلام عليكم ورحمة الله وبركاته ،،

مقدمة

تلاحظ إن الجنسيات الباكستانية والهندية فرضت بعض ثقافاتها على المجتمع الخليجي بشكل كبير جعل الخليجيين يتحدثون العبارات الأُردية في الحياة اليومية في مواقف مختلفة. سائقين التاكسي سواء كانوا باكستان او عرب يستخدمون نفس الكلمات بينهم. وبالمثل الباعة في المحلات وورش السيارات ،، الخ. وطبعا الأغلبية لها الدور الأكبر. وتحياتي لهم.

أما بعد ،،

فئة كبيرة من المصريين في المنطقة الجنوبية بالمملكة العربية السعودية تسعى أن لا تتحدث باللهجة المصرية في معظم الموافق حتى إذا كانت الأطراف مصرية. مع إن اللهجة المصرية سهلة ومفهومة : تركب مع سائق مصري ويقول لك أروح سيدا !! . تبقى في ورشة ومصري يقولك اضرب بوري !!. الصبح في الدوام تسمع مصري بيقول : البذورة ما خلتني اركض . إيه الكلام الغريب دة؟ لو أعدت صياغة الكلام بالمصري ستجده مفهوم بشكل لواضح للمصري ، الخليجي وغيرهم. لماذا لا تتحدث بلهجتك كما تتحدث بها في مصر. صحيح ممكن تتأثر بالمجتمع اللي أنت عايش فيه ولكن المسلسلات والأفلام المصرية وغيرها ساهمت بشكل في انتشار اللهجة وفهمها. جئنا لنعمل ونُعلِّم.

والله الموفق ،،

ديم مق

[بنت النيل]

السلام عليكم ورحمة الله وبركاته ،،

أما بعد ،،

فئة كبيرة من المصريين في المنطقة الجنوبية بالمملكة العربية السعودية تسعى أن لا تتحدث باللهجة المصرية في معظم الموافق حتى إذا كانت الأطراف مصرية. مع إن اللهجة المصرية سهلة ومفهومة : تركب مع سائق مصري ويقول لك أروح سيدا !! . تبقى في ورشة ومصري يقولك اضرب بوري !!. الصبح في الدوام تسمع مصري بيقول : البذورة ما خلتني اركض . إيه الكلام الغريب دة؟ لو أعدت صياغة الكلام بالمصري ستجده مفهوم بشكل لواضح للمصري ، الخليجي وغيرهم. لماذا لا تتحدث بلهجتك كما تتحدث بها في مصر. صحيح ممكن تتأثر بالمجتمع اللي أنت عايش فيه ولكن المسلسلات والأفلام المصرية وغيرها ساهمت بشكل في انتشار اللهجة وفهمها. جئنا لنعمل ونُعلِّم.

والله الموفق ،،

ديم مق

الاخ الفاضل

بالنسبة لموضوع الهدايا عن شخصى مفيش مشكلة من شراءها بمصر وايضا لوجهة نظر حضرتك فهى صحيحه ولكننا ننظر الى مايرضى من هم بمصر فهم يفضلون الهدايا من الخارج حتى اذا كانت نفس الشىء ولكن تقول ايه بقى بالنسبة لهم اسمها جايه من بره ولو ما جبتش تبقى اجازة مايعلم بها الا الله تقضيها فى الاقناع والارضاء

اما عن اللهجه فعلا انا عن نفسى بكلم لغتى المصرية فى اى مكان حتى احيانا اُسأل هل انتى مصرية اقول نعم وبكل فخر لكن فى حاله واحده تستخدم اللهجه الخليجيه عندما تقع من هندى او الجنسية الاسيوية عموما

لانهم لا يعرفون العربى الا بالهجه الخليجيه حاجه غريبه احيانا اصادف ناس مغتربين ويكونوا فى مصر وبرده بيكلموا لهجه تانيه طب ليه ياجماعة لا وايه تلاقى الناس بتتعامل معاهم كأنهم خلاص اصبحوا مش مصرين بقوا حاجه تانيه

فعلا كما قال الاخ عصام المغترب هيفضل مغترب حتى فى بلده

[deemuck]

الاخت بنت النيل ،، اشكرك على ردك بكل احترام وتقدير

بالنسبة للهجة اللي يزعلني ان المصريين بين بعضهم تلاقيهم يستخدمون مثلا بدل كلمة المدام : يقول الحرمة ، العيال ، المرة (بالسعودي) ، بالمقارنة بجنسيات عربية اخرى تلاقيهم بنفس لغتهم زي الشوام ، الأردنيين وغيرهم . دة طبعا بعض الاوجه

وتحياتي ،،