قصائد سياسية

[Howayda Ismail]

من أشعار شاعرة العامية " إيمان بكرى "

قصيدة دى ملوخية

_________________

سألت جارتنا أم بهية

جوزها العامل فى البلدية

ما تقوللى يا لفندى يا جوزى

معنى الكلام الأراجوزى

اللى قالوه فى التلا فز يون

ديمراقراطية .. ديرنقاطية

كلمة ما تيجى يوم على بال

واحلف دى شتمة يا عبد العال

قام قالها السيد جوزها

وهى بتمط فى بوزها

ما تبطلوا جهل يا جدعان

ديموقراطية يا بهية

ما تفهمى بقى يا ولية

ديمقراطية .. ديمقراطى

خصم الكباب عند الحاتى

واتعشى على كيلو حراتى

وانا أبوس فى أورطاس طعمية

ديمقراطية ومقرية

فى صحف جرايد مطوية

بتقول نعم بكرة وبعده

ولحد ألفين سنة جاية

ديمقراطية دى لعبتنا

عملوها جدعان حتتنا

عشان ما تحلو صورتنا

ويصدقوا إن عيشتنا

عايمة فى بحور العسلية

ديموقراطية تدلعها

وساعات كتير نلوى دراعها

بس اشترى يوم عتقية

ديموقراطية .. ديموقراطرط

وكلام كتير وبقى مراطرط

والكل مبسوط ومزأطط

ببرباطوسه اللى منه أطيط

من كدبه بقى ماشى يسآقط

على باب حارتنا المنسية

ديموقراطية اتكلم قول

تحيا البقول ويعيش الفول

رزق المدهول على المسطول

والعيشة حلوة مسلية

ديموقراطية و موش هية

بس الشبه عشرة المية

تسعة عشان العالمية

واحد لمون بالملوخية

ما تسكتى بقة يا ولية

فى داهية روحى انت وهية

دى عشان تفوت الوردية

[Howayda Ismail]

من أشعار شاعرة العامية " إيمان بكرى "

قصيدة دستور يا سيادنا

___________________________

دستور يا اخوانا يا بعدا

لأ سوري دستور م البعدا

محبوس حابس يا سيادنا

و بكاكي من فوق مدنة

و ورايا ديوك بيكاكو

حرصوا عالباقي معاكو

بركة مولانا هولاكو

حلت و علينا اللعنة

طرطور طرطر طراطير

بيغيروا فالدساتير

و لا عاد فالحتة كبير

و يا وارث تورث مين

ما الورث إتباع و إتبعنا

نرجع تاني لموضوعنا

و بيان لديار الإفتا

من جمهورية زفتا

لعبو و عملوها إستفتا

صوت ياللي سامعنا

و قوللي ملك ولا كتابة

أسد شبل ف الغابة

و احلف وحياة راس بابا

زفة فمولد كدابة

و الله يجازي اللي خدعنا

للجوكر ألف تحية

ملعون خاش الحرية

يحيا قانون العبودية

و القوانين الوضعية

و الحكومات الشمولية

لها مني ألف تحية

وحياة أمي دي رجعية

و لو صوتنا و جعجعنا

واحد ولافيش غير هوه

قاعد متربع جوة

و بكيفك أو بالقوة

لو سوبر مان و فتوة

روح قله بقى يودعنا

عصابات شغل فتوات

و إستعباط على حركات

و السقا أبوه لو مات

حيقوم يسقي الشربات

و يكمل على مواجعنا

مزيكة و تراباتتو

و نفديك بالدم.. إفدوه

بس إحنا و رحمة أبوه

مين ده اللي حيلوي دراعنا

روح هاتلي لمون بالصودا

انا حاسة بريحة شوطة

حيصعدوا فصل الروضة

و الورث حيصبح موضة

لم الجدعان و اتبعنا

على قهوة ساقية مكي

نصرخ نلطم و حنبكي

ده ناويها و بيتكتكلي

قبل ما حتى يودعنا

ظقططوا يا عيال قولوا هيه

الحكم صبح تيك أواي

لو عايز قول أوكيه

و لو رافض قول أوكيه

في كلا الحالتين نوو واي

غير كودية و زار ينفعنا

لأنا عايزة بخور م الجاوي

و حمار أرمل و حصاوي

و دراع برغوت مش غاوي

تنطيط عفريت و مخاوي

شلة مقاطيع يقطعنا

حابس من شر الكرسي

من شر عزيزة و مرسي

من قرص النمل الفارسي

م الأحياء و الأموات

من كايرو إلى بغداد

أشتات أشتوت أشتات

حرصوا من لعب السيكا

م الحكشة و م البولوتيكا

و لا تشمت يوما فيكا

مارشيل بنت أم ماريكا

قول حاجة الله يهديكا

و ادعي معايا يخليكا

حلوا بقى عن أوجاعنا

و انصرفوا عليكوا اللعنة

انصرفوا عليكوا اللعنة !

[Howayda Ismail]

من أشعار شاعرة العامية " إيمان بكرى "

مانيش عايز خلاص حاجة

ولا محتاج انا لحاجة

ولو عايز صحيح حاجة

مخليتوليش ولا حاجة

عموماً بصوا فيه حاجة ......

هقولها بس محتاج لعقول تفهم..

ولو حاجة مهيش مفهومة او حاجة

....نفسرها بكام حاجة ..

نوضحها بكام حاجة

وأهى حاجة مع حاجة

هتظهر وتبان لنا حاجة

وانا ما بخفش من حاجة

مانيش مسنودولا حاجة

لكن ما بخفش من حاجة

لكن فرضاً لو هقول حاجة

هيحصل إيه ... ولا حاجة

هيعملوا إية.... ولا حاجة

ولو بعد الشر .. بعد الشر لو واحد من القاعدين

من السامعين من الضالين

فِهِم حاجة هَيعملوا إيه ؟؟؟؟

اكيد برضُه ولا حاجة

فنتوكل على الستار لوجه الله نقول حاجة فيه

ناس بتعيش علشان حاجة

وناس بتموت علشان حاجة

وناس بتموت على الحاجة

وناس تديلك الحاجه

وهى ليها محتاجه

وناس تديلك الحاجه

و تاخد قصادها ميت حاجه

وناس تكبر تكون حاجه

و ناس تصغر علشان حاجه

وناس منظر ومش حاجة

وتلقاه كبير حرس ونفير عليه منظر

... وهو جبان وشيخ منصر

ولا يبـنش عليه حاجة

كلامى يا خلق فيه حاجة

... لحد دلوقتى فيه حاجه؟

كلام عادى وبسيط جداً .. ولا فِهشِ ولا حاجة

ما انا ما أقدرش أقول حاجه

صحيح نفسى أقول حاجه وميت حاجه

لكن مش قادر اقول حاجة

لأنى لو هقول حاجه ..

هييجى ناس بتوع حاجه

وياخدونى ورا الحاجة

وهو لو سمع حاجه

هيعملوهالى ميت حاجه

عموما ... بصو لو حد من القاعدين عايزنى أبلغه بحاجة

يقول مايخفش من حاجة

نعم ...... فيه إيه؟

...لالالالالأ مافيش سرقه ولا تهليب ولا تهريب ولا حاجة

وبتقول إيه

...مصمصوا إيه.... وخصخصوا إيه....ده كله كلام مفيش حاجه

... قضية إيه ... ياشيخ روح خلاص مافيش حاجه

حرامى إيه ... ولَكّح إيه ... وهرّب إيه؟ شــفـافـيـه مافيش حاجة

وبتقول إيه ... لالالآلأ عـــيب لافيه تدليس ولاترقيص ولا تدبيس ولا حاجه

سمع مع هووووس انا حاسس انه فيه حاجة

دقيقة سكات

لَتبقى حدادB)

انا حاسس انه فيه حاجه

زمنكوا ياخلق فيه حاجه

ولازموا كام وميت حاجه

ده لو يعنى إذا كان فيه حاجة

انا عن نفسى مش حاسس ولا بحاجة

ولا متضايق ولا حاجة

سعادتك برضه مش زَيـىِ مافيش حاجة ؟

..... أهـه بيقول مافيش حاجة

جنابك برضه مش زَيـىِ وعلشان زَيـىِ مافيش حاجة .

. أهـه بيضحك بيقول مافيش حاجة

ما أنا قولتلكو من الأول مافيش حاجة

عليا النعمه يا اخوانّا مافيه حاجة

ورحمة ابويا ويّا أبوك على إللّى جابوك ما فيه حاجه

وعهد الله . وعهد الله. وعهد الله ما خللولنا ولا حاجه

بقولك إيه خـــلاص خلّص وفركش يا اخوانا

تقبلوا تحياتى وتقديرى

يارب الناس تكون فهمت ولو حاجة

[Howayda Ismail]

من أشعار شاعرة العامية " إيمان بكرى "

قصيدة البغبغان

_________________

آخر بيان للبغبغان اللي ف بلاد العم سام كان بهبهون مافهمناهوش

بعبع وقال بُقين كلام والمعني إيهماعرفناهوش

معقول يكون البغبغان اللي تبغبغ من زمان صماويل جنابه اتلخلخوا

طول عمره سايق في الجنان والعقل عامل شقلبان قام جاب له أورطة يمغمغوا

عملوا وطن من غير بيبان اتملكوا فيه الغيلان

ووطن جعان ازاي ينام والطمعجية ف خيره ناموا وأنتخوا

والبغبغان يكره يموت يسمع سكوت المخروسين

إن قلت بم قفاك يرن عليه أيادي المحروسين

بيجرجروك أنت و ذووك زي الخروف ويسمعوك يادي الكسوف لستة كلام !! ماأبوخه

والبغبغان اللي تبغبغ كل من قرب حداه اتبغبغوا

جوم طرمخوا ع الطرمخان واللي يطرمخ يبسطه و ينغنغو

وف مجلس البغابيغ بنلقي البغبغان قاعد يبغبغ بالكلام يضحك وهما يسخسخوا

ماتقلش يعني البغبغان اللي ف بلاد الألعبان هوا اللي كان بيزغزغو

إلهي يهدي البغبغان واللي تبغبغ يوم معاه تقصف رقبته و دغدغو

وإلهي يوم المعمعان ألقاه هناك وكتير معاه م البغابيغ اللي افتروا يوم أو بغوا

ياخلق لأو اللأه قوموا اتلحلحوا

شوفوا الكلاب !! حتي الكلاب لو شافوا يوم واحد حرامي بينبحوا

وانتو اللي مسروق عمركم

وانتوا اللي ضايع حلمكم

ولا حتي يوم تتلحلحوا

ونصيحتي ليكم تروحوا

سبحانه من حكم عليكو البغبغان

تستاهلو ميت مليون كمان

وان شفتم مرة بغابيغ جايين عشان يبغبغوكم

اتبغبغوا

اتبغبغوا

[Howayda Ismail]

من أشعار شاعرة العامية " إيمان بكرى "

قصيدة ماكرينا

________________

ماكرينا حوالينا وحيقضوا علينا

وبعيد الشر عن السامعينا

صح صح ويّايا لحظات يا أخينا

ونفهِّم اللي مش فاهمينا

دول ماكرينا

ودول ماكرينا

ماكرينا عايشين ويّانا

حيخلَّصوا عَ اللي معانا

وينهبوا فينا وياكلوا شقانا

والحالة جيم و الناس تعبانه

دول ماكرينا !!

ماكرينا حُكَّام وباعونا

لديابة في الضلمة كلونا

حاصرونا ضربونا دوخونا يا لمونه

حالفين ليخلَّصوا عَ اللي جابونا

دول ماكرينا ..!

ماكرينا جُمْ ضحكوا علينا

بسلام مضروب و رضينا

عملونا حصار قولنا موافقينا

ضربونا بالنار غنينا شاكرينا

للماكرينا !!!

ماكرينا بيخصخصوا فينا

والخيبة هتعُم علينا

وفلوسنا فين محنش عارفينا

وقُريّب قوي هنمد إيدينا

للماكرينا !!

ماكرينا بيتكتكوا ليكا..

علشان يوم يقضوا عليكا

نفتح أسواقنا لجون وماريكا

باسم العولمة جُمْ غمّوا عنيكا

دول ماكرينا .. !

ماكرينا وده درس خصوصي

بين فك ديابة ولصوصي

حنروح في كازوزة و النعمة يا جوزي

وهنرجع مشي ومن غير شوزي

للماكرينا !!

فاهمينا..ربنا يهدينا..

ولا يوم يتحكِّموا فينا ( هيء ما خلاص اتحكموا !)

ابن جبان ندل ولا ابن لذينة

ده احنا شعوب العالم مساكينا

ودول ماكرينا !

قول يا سمعان للي مسمعوشي

وأنت يا فهمان للي مفهموشي

للي اتكلموا و اللي منطقوشي

خليكوا رجالة ولا طواطوشي

للماكرينا !!!

[أبوعمار]

طب أقول لك على حاجة

القصيدة دي جامدة آخر حاجة

ولو عايز أضيف حاجة

مش هألاقي ولا حاجة

لأنك قلتي كل حاجة

مع ان الناس محتاجة

تقول ييجي ميت مليون حاجة

بس بيقولوا ان الاختراع

هو ابن الحاجة

على كده هايطلع من مصر

مليون اختراع يسد الحاجة

وعجبي

تم تعديل 6 أكتوبر 2010 بواسطة أبوعمار

[Howayda Ismail]

من أشعار شاعرة العامية " إيمان بكرى "

قصيدة عبده مشتاق

______________________

دى الولايه الرابعه ليك والولايه الخامسه ليا

خمسة وخميسة فى عنيكم

يلى حتنقو عليه

بطلو لؤم وخباثه

حد جاب سيرة الرياسة ؟

مالى أنا ومال السياسة

دى العبارة فى الدبارة

نفسى ابقى وزير ظغنن

والقى كرسى ف الوزارة

هو ده مش حق ليه

ولا يعنى كتير عليه ؟

يا وزير فى العند فيا

الولاية الرابعة ليك والولاية الخامسة

لية نفسى اشوف شكل المنافق

والملاوع واللى نافخ بدلته ورافع إديه

و الحرامى و شكل المرابى

واللى كوش على الاراضى

واللى نام وضميره راضى

وربنا غضبان عليه

نفسىاقابل مره دندى والسيمون ابن الفيميه

اصل متغاظ من غيظه بكرهو كده بالغريزه

كان قصادى بن اللذيذه

وراح فى كرش اللى اسمه ايه

[nightmare]

قصيدة دى ملوخية

_________________

ديمقراطية دى لعبتنا

عملوها جدعان حتتنا

عشان ما تحلو صورتنا

ويصدقوا إن عيشتنا

عايمة فى بحور العسلية

قصيدة دستور يا سيادنا

___________________________

و ادعي معايا يخليكا

حلوا بقى عن أوجاعنا

و انصرفوا عليكوا اللعنة

انصرفوا عليكوا اللعنة !

فكرة حلوة يا أ.هند , واختيارك أكثر من ممتاز , تسلم إيدك.clp::

متابع بشغف واسمحيلي بإضافة القصيدتين التاليتين.

أ.الهاتك بأمر الله ( عبد الرحمن يوسف )

http://www.youtube.com/watch?v=kvm1gERGtLo

ب. القصيدة الثانية في المشاركة القادمة .

مع تحياتي

تم تعديل 6 أكتوبر 2010 بواسطة nightmare

[nightmare]

قصيدة أحمد فؤاد نجم

أنا مابخفش وحفضل أقول

كلمة حق عليها مسؤل

إن الريس راجل طيب وبشعبه دايماًَ مشغول

مشغول إنه يلم فلوسهم

بره سويسرا يحوشهلنا

وف حسبات سريه يشلها .....نفسه يأمن مستقبلنا

شفتوا إزاي بقه قلبه رحيم

عنده إيمان وضميره سليم

بيجوعكوا لجل تخسوا

آه يا شعب محتاج لرجيم

من جهلكوا بتقولوا بطالة

وإن الأحوال مش شغاله

دا الراجل نفسه يريحكم

هي الراحه تبقي عواله ؟؟

أما حكاية المنتجعات

ليه بتسموها معتقلات ؟؟؟؟

ليه الظن...... وسوء النيه

نفسه يفسحكوا يا بهوات

أما الكرسي واللى تقال

دا كلام مش محتاج لسؤال

الغلطه دي غلطتنا يا عالم

إن مجبناش كرسي تيفال

والله إنتوا ظالمين الراجل

ضيع عمره ومين يستاهل

حتى الأكل بيكله بدالنا

طالع واكل نازل واكل

ماله الريس بعد دا كله ؟؟؟

مع تحياتي

تم تعديل 6 أكتوبر 2010 بواسطة nightmare

[Howayda Ismail]

من أشعار شاعرة العامية " إيمان بكرى "

سـلام مربـع

للي ربّع

او مدوّر

للي دوّر

في البلد دي ع الأمانـي

سـلام مربـع للأمانـي

وجمهورية كانـي مانـي

ولنظامها البرلمانـي

سـلام مربـع للكبير اللي استربّع

فوق دماغ مشّش و صدّع

من كـلام عمال بيرسم

دنـيا حلوة فـ الأغانـي

سـلام مربـع للأغانـي

*******

سـلام و داير ع الصوانـي

كـلام و ماشي في ديل كـلام

ولحن تايه في الزحام

غنّى النظام علشان ننام على صوته

نمنا ما قومنا تانـي

سـلام مربـع للي ناموا ماقاموا تانـي

اللي طافوا واللي خافوا

واللي شد عليه لحافُه

وغمّى عينه ع اللي شافه

و راح يقدم للي كمم صوتنا

ولابنه التهانـي

سـلام مربـع للتهانـي

*******

ابن وز وغصب عنا في نيل هوانا

سوا برضانا او المهانه

راح يعوم

ابن حاكم يبقي حاكم

بالوفاق او بالمحاكم

في القانون المستحيل لازم يهون

والوريث يصبح رئيس

بشكل شرعي و فـ ثوانـي

سـلام مربـع للثوانـي

*******

تشريعات على كيف هواهم شرّعوها

وعود قالوها و ضيّعوها

و لعبة بايخة اتعودوها

ناس بترضى وناس بتخضع

ناس مُناها تحب تسمع

يبقى تسمع على مزاج

خطبة تخلق الف مصنع

خطبة تروي و خطبة تشبـع

خطبة تبنـي

فوق رمال الصحرا ألَفات المبانـي

سـلام مربـع للي بانـي

*******

بانـي مجد عشان طموح

مجـروح جمـوح

ظالـم أنانـي

اللي علّى لاجل يعلا

واللي غنّى لاجل يغنا

واللي لما وريده يعطش

يملا بدمانا القنانـي

واللي عمّر واللي دمّر

واللي فكّك واللي سمّر

واللي حزّر واللي فزر

واللي عارض واللي هزّر

واللي شاف الباشا مصلح

واللي شافه وضيع وجانـي

سـلام مربـع للي جانـي

*******

شيء يحزّن

لما صاحب الحق يشحت

لما لون الصدق يبهـت

لما يصبح في البلد دي

الشمال زي اليمين

شيء يحزّن.. شيء يحزّن

لما نرضى و نستكين

و لما يرقص طول السنـين

أراجوز لعيـن

بشكل سافر بهلوانـي

قال هوانـي.. وزاد هوانـي

*******

سـلام مربـّع

للي قال انه هوانـي

وزاد هوانـي

للوعود البهلوانـي

للوريث المعجبانـي

للنظام البرلماني الكاني ماني

*******

سـلام مربـع

للي قطّع واللي ربّع

و اللي مزّع و اللي وزّع

و اللي قلّع و اللي ولّع

و اللي دلّع..

و اللي شخلع في البلد دي

لاجل تبقي

صورة أفظع

للنظام الامريكانـي

سـلام مربـع

للنظام المصر كانـي

[Howayda Ismail]

من أشعار شاعرة العامية " إيمان بكرى "

احنا معاك ياريس قبطان

______________________

ياشــايل هموم النـــــاس مين يشــــيل همــك

تقول كــلمة الحق من غير خوف ولا يهـمــك

تقــف ويا الــناس فى الحق حتى امام عمـــك

قلبك ما يعرفش الخوف والستر من دعا امك

يا مبحــر غــرب الشرق وجنوبك الــــوادى

فاض بيا الكيل والصبرفى الصــدر بيــنادى

يدوب سترنا المــولى وضــاقت على ولادى

يعــز عليا ارحل واتغرب ولا جوع فى بلادى

يا عــم ياللى تبيع الصـبر صـبرك بقــى مــر

منــين نــجيب نــاس تــكتب والزمــن بيمــر

بــلدنا بقت معــتقل كــبير اليه الناس تنجـــر

يكـــبلوك بالسلاسل لـو عـــرفوا انــك حـــر

كسبنا الصلاه على النبى ودخــلنا حلقة ذكــر

مــنين يجــينا الفقـــر ومنــين يجـــينا الرزق

بأقـــامة الصــلاه والســعى ودعــاء و ذكــر

ولا بسلام مربع لدينا ولوسى وكل هزه وسط

[nightmare]

أحمد فؤاد نجم ( عيد ميلادك الكام وثمانين ) .. طبعاً اسمحولى استبدلت كام وسبعين بكام وثمانيين.

سيدي الرئيس

في عيد ميلادك الكام وثمانين

كل سنة وانت طيب

واحنا مش طيبين

كل سنة وانت حاكم

واحنا محكومين

واحنا مظلومين

واحنا متهانين

ويا تري يا حبيب الملايين

فاكرنا ولا احنا خلاص منسيين

فاكر المعتقلين

فاكر الجعانين

فاكر المشردين

فاكر اللي ماتو محروقين

فاكر الغرقانين

الله يكون في عونك - ها تفتكر مين والا مين

في عيد ميلادك الكام وثمانين

بقول لك كلمتين

الأوله

شيلتنا طين

وهل تعلم أن النيل بقي رشاح

والجو أصبح بيئة والعيشة ولعة

والشرفا قلوبهم عالبلد والعة

وانت عاملهم مذبحة ولا بتاعة القلعة

والإقتصاد سداح

والسرقة بقت كفاح

ومصر متاحة بس للسياح

وعرض البلد بقي مستباح

والثانية

ورتنا الويل

دا الخطوة في عهدك بقت ميل

والضحك بقي نواح وعويل

والكوسة

عارف الكوسة

ممكن أقول لك فيها مواويل

والجامعة بقت يا إما كباريه أو دار مسنين

والشباب معظمهم من غير خمرة سكرانين

والعلم عز علي المتعلمين

والأساتذة بقم دجالين

والقادة بقم طبالين

واديني في الهايف يا حبيب الملايين

والثالثة

عارف اليابانيين

زمان في سنة اتنين وخمسين

كان عندنا تروماي وكان عندنا علم ومتعلمين

وثقافة ومثقفين

وأدبا وعلما وفنانين

وكانو اليابانيين

بالنووي لسه مضروبين

وللصدقة مستحقين

دلوقتي إحنا فين وهما فين

هما فوق واحنا في أسفل سافلين

والرابعة

أمن بلدنا بقي تنين

والمحاكم اتملت مظالم

والعدالة بقت كمالة

وكلمة الحق في الزبالة

وأصحابها في الزنازين

والخامسة

القطاع العام….عام

والفساد…..ساد

وفي جثة بلدنا بيرعي

أفتكر لجنابك إيه وللا إيه

وكل ذكري ليك بدمعة

آآآآآآآآه آآآآآآآآه

أنا كنت حالف ميت يمين

أكملهم لك تسعين

بس ها كفيهم ورق منين

وكل سنة وانت ………….

واحنا طيبين

…………………………….

واسمحولي اقول

كل سنه وانت نافخ واحنا منفوخين

كل سنه وانت ضارب واحنا مضروبين

كل سنه وانت شادد واحنا مشدودين

كل سنه وانت ساحل واحنا مسحولين

كل سنه وانت ………..

وجمال وارث واحنا مورثين

مع تحياتي

تم تعديل 6 أكتوبر 2010 بواسطة nightmare

[Howayda Ismail]

من أشعار شاعرة العامية " إيمان بكرى "

كلنا بنحبك ياحمار

_______________________

بيقولوا في مطرب مكار...بيغني بحبك يا حمار

الواد ده وصولي وكداب..ومنافق وكمان نعار

وإشمعنى لوحده اللي يحبك...كلنا بنحبك يا حمار

ده لأنك فعلا متفاهم... ومبرطع فينا ومش فاهم

وبتبعد عن أي تفاهم .. بعزيمة غبية وإصرار

العِشرة ما بينا ما بتهونشي..وإن هانت..برضو ما نقدرشي

محكمة العدل ما تحكمشي..وإن حكمت.. هتولع نار

مثلتوا علينا الثلاثية.. وبطولة وكانت جماعية

وعشان ما تكمل سداسية..عملتوا ألف حصار وحصار

وفي وسط ميدان الحرية..فيه شعلة مسكاها وليّة

متكنش دي ليزا المخفية..مدية إشارة إنذار

وعلى العموم أنا حبيتك

وإلهي يا بعيد يخرب بيتك

لو يوم هتشُك في إخلاصي..وتصدق ده من الأشرار

هو سؤال ومافيهش هزار....هو أنت يعني حمار يا حمار

علشان تصدق إن الفار.. ممكن يقول لأسد يا حمار

وبعاهدك والعهد أمانه..هتّنَّك على طول ويانا

حمورية أهلك عجبانا..يا واخدنا من الدار للنار

كل الحميره هنا عملت سين...واتفقت انك بغل عظيم

هيوزعوا شربات برسيم ...علي العربخاني وعلي الزوار

أنا مش حمّار هتخاف مني

مانا برضو حمار وأحمر منك

ما تنهق..قول أي حوار

بنقولك شيي..ما بتمشيشي....والح ااا..بنقولها ما بتجيشي

ونقولك هيييسس...ما بتهيسش..ومكمل بينا المشوار

وعلشان كده إحنا إخترناك..وعلى حياتنا إستئمناك

ولا يوم هيجي يفرقنا...وهنفضل دايما وياك

[Howayda Ismail]

من أشعار شاعرة العامية " إيمان بكرى "

فلتقرأوا هذا الخبر

______________________

قبل انعقاد المؤتمر

فأنا الأكاليل·· العذاب

أنا الوجود

أنا الغياب

أنا النبوءة والمطر

نصر على كف الحروف

أنا النوازف والسيوف

أنا الوليد

أنا عمر

أنين سنبلة عوت بكفها

بعث لفجر منتظر

مدن الحصار مدائني

وأنا الدموع الشاخصات

أنا القصيدة والضجر··

وأنا الرمادي الموحد في الرماد

أنا الضياء المشرئب على شواطئ تفتقر

ديك الأساطير محنط

فوق أعلاف السنين

أنا تلال الياسمين

وأنا العجائز والصغار

وأنا بريد الانتظار

تحتل ذاكرتي الرياح

دمي تفقسه الرماح

أنا المباح لكل طاغية عبر

[nightmare]

انا تعبت يا أ. هند , إنتى شغاله على إيمان البكري على طول ليه كده , وانا بقي عاشق لأحمد فؤاد نجم , بس انا تعبت كفاية كده بقي, انا مش قدك ههههههه :lol:

أحمد فؤاد نجم ( نفسى فى صنف حشيش )

نفسي في صنف حشيش

ينمل الدماغ وينظف النخاشيش

علشان انسى طابور العيش

واخش فى الغيبوبه وانسى مشكلة الانبوبه

وانسى بلدنا المنهوبه

وانسى اللى بيجهزوه علشان يبقى رئيس للمخروبه

وابقى مسطول

وانسى اى مسئول

من اللى سابوا الناس فى السيول

وانسى ان نظيف اتجوز وبقى بيعول

وانسى مجلس الشعب وفتحى سرور

وانسى البرادعى وايمن نور

وانسى شوبير ومرتضى منصور

وانسى تعديل الدستور

وانسى اللى ساكنين فى القبور

وانسى انفلونزا الطيور

وانسى مشاريعنا الفاشله

فى توشكى وابو طرطور

واخش فى الاستهبال

وانسى علاء وجمال

وانسى التوريث

و النيل اللى نازلين فيه تلويث

وانسى ان منتخبنا كويس زى ماقال الريس

وانسى تصدير الغاز

واحنا عندنا ازمة بوتاجاز

وانسى قطر العياط

وانسى قطر الصعيد

وانسى احمد عز واحتكار الحديد

وانسى زحمة المواصلات

وانسى الانتخابات

وانسى فتاوى الفضائيات

وانسى العشوائيات

وانسى فشل التعليم

وانسى هشام طلعت وسوزان تميم

وانسى الاهرام وانسى الاخبار

وانسى ثروة الريس ال40 مليار

اللى مش بالجنيه المعفن لا بالدولار

وانسى انه خلى بلدنا افقر من زنجبار

وانسى المعارضه وانسى الاحزاب

وانسى تامر حسنى وعمرو دياب

وانسى ارضاع الكبير وشرب بول البعير

وانسى انفلونزا الخنازير

وانسى اوروبا وامريكا وانسى الصين

المتقدمين عننا بسنين

وانسى البيت بيتك و تامر امين

وانسى ان كيلو اللحمه بقى بتمانين

وانسى اننا فى الزباله غرقانين

وانسى الماده سته وسبعين

والماده سبعه وسبعين

وانسى فريق الساجدين

وانسى الزمالك والاهلي

وانسى اليسا وهيفاء وهبي

وانسى الفول والطعميه

وازهى عصور الديموقراطيه

وجامعة الدول العربيه

والجماهيريه الليبيه

وانسى بطرس غالى و الضريبه العقاريه

وانسى الطلعه الاولى الجويه

والمصالحه الفلسطينيه

وانسى فتح وانسى حماس

وانسى هنيه ومحمود عباس

وانسى العراق وافغانستان

وانسى ايران و انسى باكستان

وانسى ماما سوزان

وانسى الاخوان

وانسى محمد ابراهيم سليمان

وانسى ان حد من 0900 يطلع كسبان

وانسى انى مديون

وانسى كل ممثله حيزبون

بتاخد فى المسلسل كام مليون

وانسى ايامنا السوده

واحضان الطيب والبابا شنوده

وانسى القذافى والبشير

وانسى كل ملك وكل امير

اللى حاكمين من سنين

من غير تغيير

وعلشان اعرف ان الصنف كويس

لازم ارشح نفسى وابقى الريس

مع تحياتي

تم تعديل 6 أكتوبر 2010 بواسطة nightmare

[Howayda Ismail]

انا تعبت يا أ. هند , إنتى شغاله على إيمان البكري على طول ليه كده , وانا بقي عاشق لأحمد فؤاد نجم , بس انا تعبت كفاية كده بقي, انا مش قدك ههههههه :lol:

[color="

مع تحياتي

خلاص عشان خاطرك كفاية كده النهاردة ونكمل بكرة ان شاء الله

[المهندسه]

طيب شوفوا دى

http://www.youtube.com/watch?v=Q3lj2tkpqgc

[nightmare]

أروع ما كتب ( نزار قباني ).

قصيدة -- عنترة

هذي البلاد شقة مفروشة... يملكها شخص يسمى عنترة....

يسكر طول الليل عند بابها...

ويجمع الإيجار من سكانها...

ويطلب الزواج من نسوانها...

ويطلق النار على الأشجار، والأطفال، والعيون، والضفائر المعطرة...

هذي البلاد.. كلها مزرعة شخصية لعنترة...سماؤها.. هواؤها.. نساؤها.. حقولها المخضوضرة...

كل الشبابيك عليها صورة لعنترة...

كل الميادين هنا تحمل اسم عنترة...

عنترة يقيم في ثيابنا...

في ربطة الخبز...

وفي زجاجة الكولا...

وفي أحلامنا المحتضرة...

في عربات الخس والبطيخ... في الباصات...

في محطة القطار، في جمارك المطار...

في طوابع البريد، في ملاعب الفوتبول، في مطاعم البيتزا....

وفي كل فئات العملة المزورة....

مدينة مهجورة مهجرة....

لم يبق فيها فأرة، أو نملة، أو جدول أو شجرة...

لا شيء فيعا يدهش السياح إلا الصورة الرسمية المقررة، للجنرال عنترة...

في غرفة الجلوس، في ميلاده السعيد، في قصوره الشامخة الباذخة المسورة...

ما من جديد في حياة هذه المدينة المستعمرة....

فحزننا مكرر، وموتنا مكرر، ونكهة القهوة في شفاهنا مكررة...

فمنذ أن ولدنا ونحن محبوسون في زجاجة الثقافة المدورة...

واللغة المدورة...

ومذ دخلنا المدرسة ونحن لا ندرس إلا سيرة ذاتية واحدة تخبرنا عن عضلات عنترة...

ومكرمات عنترة...

ومعجزات عنترة...

ولا نرى في كل دور السينما إلا شريطا عربيا مضجرا يلعب فيه عنترة...

لا شيء في إذاعة الصباح نهتم به.. فالخبر الأول فيها خبر عن عنترة...

والخبر الثالث والخامس والتاسع والعاشر... فيها خبر عن عنترة...

لا شيء في البرنامج الثاني سوى عزف على القانون من مؤلفات عنترة...

ولوحة زيتية من خربشات عنترة...

وباقة من أردأ الشعر بصوت عنترة....

هذي بلاد يمنح الكتّاب فيها صوتهم لسيد المثقفين... عنترة...

يجمّلون قبحه... يؤرّخون عصره...

وينشرون فكره.. ويقرعون الطبل في حروبه المظفرة....

لا نجم فوق شاشة التلفاز إلا عنترة.. بقده المياس، أو ضحكته المعبرة...

يوما بزي الدوق والأمير...

يوما بزي الكادح الفقير...

يوما على دبابة روسية.. يوما على مجنزرة....

يوما على أضلاعنا المكسرة.....

فيديو كمان

http://www.youtube.com/watch?v=vWyVkYnCcXo&feature=related

مع تحياتي

تم تعديل 6 أكتوبر 2010 بواسطة nightmare

[المهندسه]

http://www.youtube.com/watch?v=nh6E6_FQVaE&feature=related

ده اسمه على سلامه لل ميعرفوش

[المهندسه]

خايف اصحى من النوم ملاقيش مصر

http://www.youtube.com/watch?v=oWZM9fWzvp0&feature=related