برامج الأطفال

[Om Zayd]

السلام عليكم و رحمة الله و بركاته

مررت بنفس التجربة التالية.. بلال فضل في دور زوجي ,, و أنا نفس موقف زوجته -بدون الفقرتين الأخيرتين طبعا- أترككم لتقرؤها و لنا عودة إن شاء الله

"حكايتى الأخيرة من بريطانيا، حيث شهدت مؤخرا فكرة حضارية بديعة، أتمنى أن نراها قريبا فى إحدى القنوات التليفزيونية المصرية التى يتولى مسؤوليتها أناس متحضرون لديهم دم وإحساس، لعلنا نتعلم كيف نغير منهجنا فى التعامل مع ملايين المواطنين المصريين الذين يتحدون الإعاقة بشجاعة.

شوف يا سيدى، كنت أجلس إلى جوار ابنتى الصغيرة وهى تشاهد قناة أطفال بريطانية شهيرة اسمها «سى بييز»، أغلب برامجها مخصصة للأطفال تحت سن السابعة، كنت مشغولا بالقراءة عندما سمعت ضحكات ابنتى تتعالى مثيرة البهجة، نظرت إلى الشاشة لأشاهد ما أضحكها،

ففوجئت بأن المذيعة التى تقدم البرنامج الذى تشاهده ابنتى فتاة مقطوعة اليد وتظهر على الشاشة بذراعها المقطوعة دون حتى أن ترتدى جهازا تعويضيا، أعترف بأن المشهد خضنى فى البداية، فقمت فورا بتغيير القناة لكى لا تتأذى ابنتى التى لم تكمل الأربعة أعوام من عمرها، هكذا تصورت قبل أن أجد ابنتى تصرخ فى وجهى قائلة: «إيه يا بابا مش شايفنى باتفرج.. مش تستأذنى الأول»،

قبل أن تخطف منى الريموت كونترول وتعيد تشغيل التليفزيون وتتابع الفرجة باستمتاع شديد على المذيعة التى كانت تتحدث بانطلاق شديد وتدير حواراً مع الأطفال الذين يصطحبونها فى البرنامج دون أن يشير أحد إلى إعاقتها أو يتعامل معها على أن بها شيئا غير طبيعى، كان المشهد أعلى بكثير من فهمى وإدراكى،

وبدلا من أن أصمت وأراقب ارتديت ثياب الواعظ، وحرصت على إيصال «المورال» مباشرة إلى عقل ابنتى، الذى أعشق الوصاية عليه ككل أب صالح، قلت لها «شايفة يا حبيبتى المذيعة الغلبانة دى يا عينى إيدها مقطوعة إزاى عشان نحمد ربنا إنه أنعم علينا...».

لم أكمل جملتى، لأن زغدة من زوجتى أسكتتنى، قبل أن تطلب منى أن أخرج إلى خارج الغرفة لكى ترينى شيئا مهما، وعندما ابتعدنا عن أسماع ابنتنا، قالت لى وهى تتميز غيظا: «مش ممكن.. يعنى لازم تبوظ اللى الناس المحترمة دى قررت تعمله ومن غير ما حد يطلب منك.. برضه مصمم على إنك تتعامل مع الست على إنها عَجَبة ومادة للشفقة.. بينما هم بيعودوا الأطفال إنهم يتعاملوا معها على إنها شخص عادى طبيعى ومش محتاجة معاملة خاصة»، شعرت بالخجل من نفسى لأن هذا المعنى النبيل الراقى كان أعلى بكثير من مستوى إدراكى وتعليمى،

قلت لها: «أنا آسف ماتنسيش إنى ابن ثقافة تعودت ألا ترى الذين يتحدون الإعاقة إلا فى برنامج كلام من دهب على خلفية موسيقى حزينة»، لم تستهوها الجملة التى تصورتها لطيفة ولازمة لتبرير موقفى السخيف، فتركتنى وعادت إلى حيث تجلس ابنتى ضاحكة وسعيدة أمام شاشة التليفزيون وهى تستمتع بأداء المذيعة الرائعة خفيفة الظل،

أما أنا فقد وجدتنى أسترجع فى ذهنى عشرات الرسائل المريرة التى انهمرت علىّ فى العام الماضى عندما كتبت اصطباحة عن المعاناة التى يعيشها المواطنون الذين يتحدون الإعاقة فى مصر، لست محتاجا لأن أذكرك الآن بتفاصيل تلك المعاناة التى ما إن تذكرت بعضها حتى وجدتنى أنهمر فى البكاء.. بعد قليل، وجدت ابنتى واقفة فوق رأسى وهى تسألنى: «بابا بتعيط ليه؟»، قلت لها مرتبكا: «لا مافيش أصلى افتكرت واحد مات كنت باحبه قوى»، قالت لى: «إيه هو عمو فلان مات؟»، وذكرت اسم أعز أصدقائى،

قلت لها: «لا ياحبيبتى بعد الشر عليه.. أنا افتكرت واحد اسمه الإمام محمد عبده.. لما جه زينا هنا قال جملة حلوة أوى.. وجدت هنا إسلاما بلا مسلمين وتركت فى بلادى مسلمين بلا إسلام»، نظرت ابنتى لى باستغراب شديد، لها كل الحق فيه، فسارعتُ إلى تغيير الموضوع قبل أن أسبب لها مزيدا من الارتباك، وقلت لها بتأثر: «بس متشكر إنك جيتى تتطمنى عليا.. ارجعى اتفرجى يا حبيبتى على البرنامج»، فقالت لى بهدوء شديد: «أنا ماكنتش جايه أطمن عليك.. أنا كنت رايحه أعمل بيبى».

"

[masraweya]

السلام عليكم

أولا جزاكم الله خيرا

فعلا مهم نعلم أولادنا ازاي يتعاملوا مع من يختلف عنهم ,, في اللون ..الجنس .. العرق .. القدرات .. الرأي .. الدين

هذا لا يمنع أن نحمد الله على نعمة العافية مع تمام الإدراك أن من لديه إعاقة ما ليس أقل منا بأي حال من الأحوال .. ربما فاقنا ذكاءا .. إيمانا .. رحمة

ربنا يعافينا و يصلح حالنا جميعا

[pocy]

اولا جزاكى الله كل الخير على ما اقدتنا بيه من موقف يحمل الكثير لنا ولتعاملنا مع ذو الاحتياجات الخاصه وبجد احيكي من موقعي هذا على موقفك الجميل تجاه تلك المذيعه وفق الله الجميع لما يحبه ويرضاه

[المهندسه]

حلوه فعلا القصه دى ياريت نعلم ولادنا ازاى يتعاملو مع غيرهم من ذوى الاحتياجات الخاصه بحب و على انهم اناس عاديين مثلنا لا ينقصهم شيا لان ما هم فيه هو من عند الله لا

يد لهم فيه ...اللهم اعفنا و عافنا يارب و نحمدك على نعمك التى لاتعد و لا تحصى

[Om Zayd]

السلام عليكم و رحمة الله و بركاته

سعيدة جدا بردودكم الجميلة

عايزة بس أضيف ان تعليم الأطفال التعامل الصحيح هو خطوة أولى يستطيع الكل البدء بها

طبعا محتاجين اهتمام بتسهيل حركتهم (المواصلات - المباني يكون فيها مداخل مجهزة-أرصفة الشوارع - المصاعد) كل ده يفيد أيضا أي أحد يتحرك مع طفل صغير في عربته أو كبير في السن و لا يستطيع استخدام السلم

جميل أن نبدأ بأنفسنا مع أطفالنا .. من يدري ربما يتغير الحال

عافنا يا رب و اكرمنا و و فقنا

[Om Zayd]

السلام عليكم و رحمة الله و بركاته

نكمل سوا عن حاجات استفدتها من وجودي برة في التعامل مع الأطفال في السن الصغير

التعاون ثم التعاون

دايما يركزوا في الحكايات و الكارتون و الألعاب على القيمة دي

ازاي لما تشتغل لوحدك و تستأثر بالمهمة (أنا أقدر لوحدي) .. الفشل هو النتيجة الطبيعية

على العكس ..إذا اشتغلت و نسقت مع اللي حواليك .. هتنجحوا كلكم

و ان أي دور مهما كان صغير برضة مهم و ممكن يكون هو السبب في نجاحكم كلكم

التنافس يكون بينك و بين نفسك .. اتحسنت قد إيه عن قبل كده؟ مش المهم اني أكون أحسن من فلان أو أحسن الموجود

لو واحد جاب 65% بعد ما كان بيجيب 60%يبقى اتحسن و نشجعه .. و العكس لو بيجيب 95% و بعدين جاب 90% ندور إيه السبب و نحاول يرجع لمستواه

تم تعديل 13 أكتوبر 2010 بواسطة Om Zayd

[masraweya]

و عليكم السلام و رحمة الله و بركاته

لقيت حاجة تفرح ذات صلة

المصري اليوم

«أخلاق للبيع» يافطة معلقة على باب فيلا بشارع القبة بروكسى فى منطقة مصر الجديدة، داخل الفيلا انتهى من فترة قصيرة مخيم الأطفال الصيفى بعنوان «أخلاقنا»، المخيم عبارة عن كورس مكثف كل يوم من الساعة الثامنة صباحا وحتى الخامسة مساء، لتنمية مهارات وأخلاق الطفل.

الكورس جزء من كورسات أخرى عن التنمية الذاتية تقدمها إحدى الشركات للاستشارات. من ضمنها كورس It’s all about me للكبار، وكورس It’s all about youth للشباب من سن ١٦ حتى ٢٥ سنة.

بدأ مخيم «أخلاقنا» هذا العام فى شهر يونيو، وتصل مصاريف المخيم إلى ١٨٠٠ جنيه، ويحصل على خصم فى حالة دخوله مع أخواته أو أصدقائه، بالإضافة إلى كورس آخر أثناء إجازة نصف السنة الدراسية، ويقول «تامر صبحى»، مدير تسويق برنامج «أخلاقنا»، إن دكتورة إيمان صبرى، رئيس مجلس إدارة الشركة، هى صاحبة الفكرة: «بدأنا أخلاقنا لأننا لاحظنا نقطتين، أولا إن فيه أماكن كتير بتدى كورسات لتنمية المهارات، وفيه فعلا أطفال كتير مهاراتها هائلة، ولكن ممكن مثلا تكون قليلة الأدب أو مش بيتعاملوا مع أهلهم باحترام، وفى الوقت نفسه لاحظنا أن مستوى الأخلاق نفسه فى الشارع المصرى انحدر وبقينا نسمع عن حوادث عمرنا ما كنا بنسمع عنها زمان، زى التحرش».

يشرح «صبحى» برنامج «أخلاقنا»، فهو يحاول تعليم الأطفال باللغة العربية، عدة قيم وأخلاق من خلال الألعاب، ومن ضمن الأخلاق التى يقوم «صبحى» و«إيمان» بتعليمها للأطفال: الاحترام، والتعاون، والشجاعة، والصدق، والرحمة، والتسامح، والتحكم فى غضبك.

«أخلاقنا» بدأ منذ ٤ سنوات، وضعت دكتورة إيمان صبحى، رئيس مجلس إدارة الشركة، منهجه بناء على دراستها لعلم النفس فى الولايات المتحدة الأمريكية، ولم تتم الاستعانة بوزارة التربية والتعليم، ويحصل المدرسون على تدريب قبل بدء المخيم، وتم اختيار الأخلاق الأكثر افتقادا– على حد تعبيره– لتكون ضمن منهج البرنامج: «الأخلاق اللى اخترناها دى تحديدا أغلبها مش موجود عند الأهالى».

لا تتضمن الكورسات الأخرى التى تقدمها الشركة لأعمار سنية أخرى بند الأخلاق، لأن– كما يشرح «صبحى»– الأطفال فى السن الصغيرة هم الأكثر قابلية وقدرة على التغيير، ويسهل تشكيل شخصياتهم. يؤكد «صبحى» أن الأطفال «ماكانوش يعرفوا أى أخلاق.. وأصبحوا أكثر هدوءاً وطاعة واحتراما لآبائهم، ويضيف «صبحى» أن شهرة البرنامج رشحتهم لمساعدة وزارة التربية والتعليم فى عملية التربية، وبدأ عدد من المدارس بتنظيم كورسات أخلاق.

[Om Zayd]

جزاكم الله خيرا

جميل ان اتجاه زي ده يبتدي

ربنا ييسر و ينتشر يمكن نقدر نعمل حاجة

[Om Zayd]

السلام عليكم و رحمة الله و بركاته

نكمل يا حلوين

الاعتراف بالخطأ و الاعتذار

يترتب على هذا تحمل المسئولية

عدم الكِبر

الثقة بالنفس

قبول الاعتذار من الآخرين (كلنا ممكن نغلط .. المهم ألا نتمادى و أن نعتذر بصدق و نحاول إصلاح ما حدث) أن نتعلم من أخطائنا .. ألا نكررها

جعلني هذا أراجع نفسي .. كيف أتعامل مع ابني عندما يخطئ؟ كيف أزرع فيه مراقبة الله؟

في الكارتون او البرامج لازم يجيبوا حد غلط واعترف بغلطه و اعتذر و اللي حواليه احترموه و حبوه اكتر عشان كده

[Om Zayd]

الاختلاف شيئ جيد

دايما يجيبوا مذيعين و أطفال من أعراق مختلفة

دي حاجة بنفتقدها في مصر

لغاية الآن الأسود أو الأسمر ينظر إليه بتعالي

رغم ان عندنا "إِنَّ أَكْرَمَكُمْ عِندَ اللَّـهِ أَتْقَاكُمْ " .. ربما لأننا لم نعتد على رؤيتهم و نحن صغار كأقران

[Om Zayd]

السلام عليكم و رحمة الله و بركاته

نسبة بدانة الأطفال عندهم تقلق.. يعملو إيه؟

كل برامج الاطفال يدخل فيها التشجيع - بصورة غير مباشرة- على الرياضة و اكل الخضار و الفاكهة و يسموها

sports candy

introduced a nice program:change for life

مليان أفكار للعيلة كلها تمارس رياضة و تبقى اكثر نشاطا

أتمنى تستفيدوا منه

[Om Zayd]

السلام عليكم و رحمة الله و بركاته

الاهتمام بالبيئة

مش بس ما ترميش ورق في الشارع .. و ما تقطفش الورد

لكن بيحاولوا يخلوهم متعلقين بالبيئة بتاعتهم

كل فصل من فصول السنة له أغنية بتوصفه

دايما في برامج الاطفال يحاولوا يكونوا في جنينة حتى برنامج طبخ للأطفال .. لازم يطلعوا الجنينة يجيبوا حاجة من مكونات الطبخة

برامج مخصصة لاستكشاف الطبيعة بنباتاتها و حيواناتها

القضايا البيئية الكبيرة بيحاولوا يبسطوها لهم.. و يناقشوها معاهم .. و الأهم إيه دورهم تجاهها

طبعا ده مش دور الاعلام بس .. المدرسة و البيت كمان

بيشتركوا مع اهلهم في إعادة تدوير المخلفات اللي في البيت

تصنيفها و اعادة استخدامها

بيخلوهم جزء من ترشيد الطاقة و المياه و يفهموهم ان دي مساهمتهم لانقاذ الأرض

[Om Zayd]

السلام عليكم و رحمة الله و بركاته

العمل الخيري و التطوعي

كل المفاهيم و القيم اللي عايزين يغرسوها في الأولاد بتبدأ في الحضانة و برامج الأطفال للسن الصغير (تحت 7 سنين

موضوع انتظامهم في طوابير و انتظار دورهم دون تبرم.. شفتهم بيعلموه للأطفال عند المراجيح

يرجع مرجوعنا

و انا باخد ابني من الحضانة ادوني دعوة جميلة جدا

البداية .. شرح مبسط للأنشطة الخيرية اللي هينظموها في الشهرين القادمين و مواعيدها عشان لو نحب نحضر

شرح لكيفية اشتراك ابني (ما كانش حتى كمل سنتين!) و استمارة صغيرة نملاها احنا و قرايبه و اي حد يحب يتبرع لدعم القضية اللي ابني اختار يساهم فيها

هيساهم ازاي؟شايفة حد مستغرب و بيسأل

أقولكم

مجرد انه يشترك في سباق مشي او جري.. يشترك في رسم لوح (ملخبطة طبعا) أو طبخ أكلة (زي اللي فاتت) .. و احنا نتبرع كرعاة له

sponsors

الاطفال الاكبر ممكن يعملوا حاجات تتباع و دخلها لصالح مشروع خيري معين .. أو يبيعوا بنفسهم كيك او ورد أو .. أو والدخل يروح لجمعية أومشروع

اللي عجبني انه حتى الطفل اللي اقل من سنتين .. رغم انه مش هيبقى فاهم أوي .. لكن بنزرع جواه المشاركة

و يحس ان اهله و قرايبه جايين يشجعوه في المشاركة دي

طبعا برامج التليفزيون مش مقصرة.. المسلسلات .. الكارتون .. تلاقي فيه نموذج تاطفل اللي بيساهم في عمل تطوعي

غير الحملات اللي بتتنظم لجمع التبرعات و بيشترك فيها مش بس المشاهير و الشخصيات العامة .. لأ .. الأشخاص العاديين بيساهموا .. مش بس بالتبرع .. بل بجمع التبرعات بنفسهم .. بينظموا انشطة عجيبة لهذا الغرض.. أطفال المدارس بيعملوا ألذ حاجات في هذا المجال و دايما الإعلام يبرزها جدا

ليه احنا مناخدش اولادنا معانا و احنا بنتصدق .. أو بنزور أيتام .. أو رايحين لعيادة مريض

ليه منظمش أنشطة تطوعية يشاركوا فيها من صغرهم.. مش بس هنزرع الخير جواهم .. كمان هيكتسبوا خبرة في التعامل مع الناس وثقة في النفس

دايما بنكلم اولادنا عن قيم مجردة .. الرحمة .. الخير .. الانسانية

محتاجين نخليهم يمارسوها عملي عشان الدين يبقى فعل مش كلام

ربنا يصلح حالنا جميعا

[Om Zayd]

السلام عليكم و رحمة الله و بركاته

حاجة صغيوووورة اوي لم انتبه لها الا من فترة قصيرة

بتفرج مع زيدو -مش مهم بمزاجي او غصب - على برنامج مدبلج على براعم كان بيحبه في انجلترا

بيقرالهم حكاية في آخر الحلقة .. لفت انتباهي انه مش بيقول اسم المؤلف

النسخة الاصلية كان بيقول عنوان الكتاب و بعدين اسم المؤلف و الرسام اللي عملوا الكتاب

كنت بحب ده طبعا لانه بيديني فرصة ادور على كتب تانية لهم

ليه النسخة العربي مهتموش فيها بذكر صناع الكتاب؟؟؟؟؟؟

هل ده له اي علاقة بموضوع الملكية الفكرية مثلا؟؟

هل حاجة صغيرة زي دي - حريصين عليها في اي برنامج بيقروا فيه للاطفال حكاية- مقصودة لترسيخ اهمية اسناد العمل لاصحابه ... التوثيق

كان ممكن يكتفوا بالاسامي في تتر المقدمة او النهاية

السنا نحن اولى بهذا؟؟ و نحن أمة علم الحديث