ارجو المشوره عن عقد محاسب بالرياض

[mokhtarelmalahy]

السلام ليكم يا جماعه الخير

وحشتونى جدا مادخلتش المنتدى من مده كبيره كنت مشغول بقدومى لدبى والحمد لله

صديقى الانتيم وده يهمنى امره جدا جايله عقد عمل بالرياض بشركه او مجموعه اكتر عملهافى تجاره اخشاب بالرياض اسمها طننه ب 2000 ريال فى الشهر والسكن والمواصلات عليهم وتامين طبى وكل سنه 21 يوم اجازه وتذكره طيران عليهم والتاشيره اخصائى تسويق وبيقولوا هتشتغل محاسب او ف فى شئون العاملين ولما سال شغله ايه تحديدا قالوله لما تسافر هتعرف

هو خريج تجاره المنصوره محاسبه 2009 جيد وبيشتغل فى ال HR فى مصنع البان وعصائر عندنا فى دمياط ب550 جنيه بس نفسيا مرتاح فى شغله وواخد وضع كويس فى ادارته من حوالى 7 شهور ومعاه icdl وانجلش وكورسات فى المحاسبه والبورصه واداره المشروعات

مكتب سفريات طالع عن طريقه اسمه الهدف فى شارع مصدق بالدقى وعايزين منه 6000 جنيه وتذاكر السفر عليه وبيقولى ان صاحب المكتب وهو بيتكلم معاهم كانه بيمن عليهم هو انتوا كنتم لاقيين

والعروض التانيه اللى قدامه برضه السعوديه ب 1500 ريال وتاشيره عامل

هو دلوقتى مرتاح فى شغله ولو على الاقل مؤقتا وعايز ياخد دبلومه HR وممكن ينقل فى فرع الشركه بتاعته فى القاهره ويدرس الدبلومه دى

بصراحه انا مش عاجبنى الاوفر ده مع ان ده بقى السائد فى السعوديه للمحاسبين الحديثين التخرج اليومين دول بس مش عارف ليه مش مطمن ليهم وكمان الاوفر ضعيف وهو مش من النوع اللى بيعصر على نفسه لمونه عشان يلم القرشنات ويرحع على مصر يعنى ده

انا قرات كل مواضيع السعوديه بس برضه مش عارف اقوله ايه انا بس عايز اوضحله الصوره وكل حاجه تبقى باينه وهو نفسه محتار جدا وقلقان

دلونى يا اهل الخبره الاوفر ده مناسب ولا لا والمفروض يقبل ولا برفض

[زعلان]

العرض مش مغري بالمرة زي ما انت قلت وملوش لزمة وهو لسه خريج جديد خليه يشتغل في ال الموارد البشرية ويطور نفسه فيها احسن كمان من محاسب + طبعا خبرته في الحسابات كويس حيكون بكره وضعه افضل بكثير

[حماده عبده]

لو مرتاح في شغله في مصر يبقي أكيد لو سافر علي العرض ده هايتعب أوي يبقي خليك في مصر أحسن نصيحه

[kemoid]

لو بيحب المغامرة و مش ح يخسر حاجة ... ممكن يروح و فى خلال سنة يدور على شغل احسن .. محدش قال ان دى النهاية ... لا لازم يعتبر ان دى البداية و يكون بعيد النظر

[عماد حمدي]

السلام عليكم

فيه حاجة يمكن مخدتوش بالكم منها .. وبما أني أكتر واحد إتشحتت في المكاتب دي فخد نصيحتي

اولا ً هو خريج 2009 ياعني 21 سنة لسة

ثانيا ً انته نفسك بتقول قدامة عروض تانية ودا الغالب ع فكرة 1500 ريال

اللي مخدتوش بالكم منه بقا .. هو ان اي شركة بتنزل عايز محاسبين بالذات المحاسب دا يبقي بالنسبة ليها جديد ملهاش دعوه هوه إشتغل فين قبل كدا وبياخد كام ووضعة كان اية .. ولو مقبلش فيه غيرة هيقبل باللي اقل من كدة

فنصيحتي ميضيعش الفرصة دي ويتوكل ع الله وهوه لسة أصلا ً في البداية يتوكل ع الله حتي ولو قعد سنتين كاملين أهو إسمة حوش مبلغ مش هنقول كبير ولكن أضعاف اللي كان هيحوشه في مصر وفي الأخر هوه مش خسران

حاجة تانية كمان انه بعد شغلة في مصر سنتين وجه يدور ع عروض مناسبة برده هيلاقي ال 2000 دول او 2500 بالكتير اوي ..طيب ليه بقا مهي جاية لحد عندك أهي متقشرة وبعد السنتين أكيد ياعني هتزيد وهتاخد وضعك

متضعيش وقت ع الفاضي علشان مترجعش تندم

هحكيلك تجربتي انا وصاحبي انا خريج 2007 وصاحبي خر يج 2003 الفرق 4 سنين وصاحبي أعلي نمني خبرة بكتير وإشتغل في السعودية قبل كدة سنتين .. لما جه فيه إنترفيو بالقاهره روحنا سوا ودخلنا عملوا امتحان موحد انا حليت وهوه حل وبالتالي العرض المقدم لينا كان واحد دون الأخذ في الإعتبار أي خبرات سابقة " ودا برده مش تعميم "

بس انا بقصد دي فرصة ..

وملخص سريع كدة تقوله صاحبك دا ..

قولة انتة بعد سنتين من شغلك في مصر هتحوش كام .؟؟

وبعد سنتين من شغلك في السعودية ع راتب 2000 ريال هتحوش كام ؟؟ وهتزيد قد اية ووضعك هيكون اية ؟؟

والله يا ابني انا بكلمك كدا من واقع تجارب كتير مريت بيها وصعبان عليا صاحبك يضيع وقته في إنتظار الفرصة المناسبة

وفي الأول والأخير الإستخارة اهم شيء دي الفيصل الوحيد لا اما يكمل في مصر لا اما يقبل العرض

بالتوفيق ..

[hOuSsAm]

السلام ليكم يا جماعه الخير

وعليكم السلام ورحمة الله وبركاته

وحشتونى جدا مادخلتش المنتدى من مده كبيره كنت مشغول بقدومى لدبى والحمد لله

ربنا يوفقك ويعينك ويكتبلك الخير

صديقى الانتيم وده يهمنى امره جدا جايله عقد عمل بالرياض بشركه او مجموعه اكتر عملهافى تجاره اخشاب بالرياض اسمها طننه ب 2000 ريال فى الشهر والسكن والمواصلات عليهم وتامين طبى وكل سنه 21 يوم اجازه وتذكره طيران عليهم والتاشيره اخصائى تسويق وبيقولوا هتشتغل محاسب او ف فى شئون العاملين ولما سال شغله ايه تحديدا قالوله لما تسافر هتعرف

هو خريج تجاره المنصوره محاسبه 2009 جيد وبيشتغل فى ال HR فى مصنع البان وعصائر عندنا فى دمياط ب550 جنيه بس نفسيا مرتاح فى شغله وواخد وضع كويس فى ادارته من حوالى 7 شهور ومعاه icdl وانجلش وكورسات فى المحاسبه والبورصه واداره المشروعات

مكتب سفريات طالع عن طريقه اسمه الهدف فى شارع مصدق بالدقى وعايزين منه 6000 جنيه وتذاكر السفر عليه وبيقولى ان صاحب المكتب وهو بيتكلم معاهم كانه بيمن عليهم هو انتوا كنتم لاقيين

حسبى الله ونعم الوكيل فى المكاتب دى مش هيبطلوا تدمير فى العمالة المصرية فى الخارج بقى (بينى وبينك انا بستحرم يدفع المبلغ ده للمكتب وهما بيبقوا واخدين فلوس من الشركة السعودية)

والعروض التانيه اللى قدامه برضه السعوديه ب 1500 ريال وتاشيره عامل

(هى وصلت لكدة)

هو دلوقتى مرتاح فى شغله ولو على الاقل مؤقتا وعايز ياخد دبلومه HR وممكن ينقل فى فرع الشركه بتاعته فى القاهره ويدرس الدبلومه دى

بصراحه انا مش عاجبنى الاوفر ده مع ان ده بقى السائد فى السعوديه للمحاسبين الحديثين التخرج اليومين دول بس مش عارف ليه مش مطمن ليهم وكمان الاوفر ضعيف وهو مش من النوع اللى بيعصر على نفسه لمونه عشان يلم القرشنات ويرحع على مصر يعنى ده

انا قرات كل مواضيع السعوديه بس برضه مش عارف اقوله ايه انا بس عايز اوضحله الصوره وكل حاجه تبقى باينه وهو نفسه محتار جدا وقلقان

دلونى يا اهل الخبره الاوفر ده مناسب ولا لا والمفروض يقبل ولا برفض

انا بصراحة مش هقولك مناسب ولا لاء

انا هوضح بعض الحجات

اول حاجة صحبك ده لحد دلوقتى مش محدد هدفه اذا كان عايز يشتغل محاسب او فى الموارد البشرية والمجالين مختلفين عن بعض تماما

والبداية كمان والدراسة مختلفين

الرياض غالية فى المعيشة وليها حسابات كتيرة اوى

بمعنى السكن عليهم يعنى هيوفروا مكان ولا هيدوه فلوس

لو هيدوه فلوس هيدوه 4000 ريال ودول ميجبش خرم ابرة فى الرياض

لو هيوفروا المكان لازم يعرف هيسكن فى مكان شكله ايه شقة ولا استديو ولا اوضة ولا سرير فى اوضة وفيه مطبخ وحمام نضاف ولا ايه وسكن عزاب ولا عوائل مع العلم بان اغلب سكن العزاب مش نضيف (عالعموم عالاقل ميقبلش انه ياخد سرير فى اوضة مهما كان الشخص اللى هيسكن معاه)

بالنسبة لبدل المواصلات هتبقى فلوس ولا عربية ولا الشركة جنب السكن

لو فلوس يعرف انها هتبقى نسبة من المرتب فى حدود مابين 10% الى 15% يعنى مع احسن الاحوال 300 ريال وده مبلغ قليل جدا عالمواصلات فى الرياض

لو عربية هيبقى بنزينها وصيانتها على مين وغسيلها؟

طيب لو الشركة جنب السكن خليه ياخد فى اعتباره انه هيبقى محتاج ينزل يشترى حاجة او يتفسح او يخرج لاى سبب

هل مكان السكن فى مكان ماهول وجنبه سوبر ماركت ولا حاجة ولا هيتصرف ازاى

هقوك تقييم سريع لبنود العقد من وجهة نظرى والله تعالى اعلى واعلم

المرتب 2000 ريال معقول على امكانياته انه حديث التخرج بس مش معقول على المعيشةى فى السعودية

السكن والمواصلات مش كويس للاسباب اللى قولتها فوق

التامين الطبى والاجازة السنوية والتذكرة كويسين بس خليه يسال عالتامين فى انهو فئة عشان ممكن يعملوله فى التامين بتاع العمال الى لو حصله حاجة هيضطر يروح مستوصفات ودى خدمتها مش كويسة

لازم التامين يكون متضمن عالاقل واحدة او اتنين من المستشفيات الكبيرة

التاشيرة دى اختصاصى تسويق ممتازة جدا و من المرات القليلة اللى هيلاقى زيها (تاشيرة ادارية محترمة وليها استقدام)

موضوع المحاسبة او الموارد البشرية انا علقت عليه فوق

6000 بتوع مكتب السفريات حسبى الله ونعم الوكيل فيهم

(بس بحسبة بسيطة لو قلنا انه هيوفر من 1000 الى 1200 ريال شهريا ودى فى احسن الظروف لان الرياض مش رخيصة يبقى هيعوض المبلغ ده خلال 4 شهور يعنى يعتبر نفسه بيشتغل 4 شهور لله ثم للمكتب المحترم ابن التيت ده

لوصاحبك مهاراته كويسة ومعاه فلوس يقدر يدرس بيها والشركة اللى فيها كبيرة انصحه انه يصبر شوية مع العلم ان مهنة الموارد البشرية فى السعودية اصعب من المحاسب وده بسبب انها مهنة متسعودة تانى حاجة سهل ان اى حد سعوديى او خليجى يشتغل فى الموارد البشرية لانها مش عايزة امكانيات عالية اوى بالنسبة لسوق العمل هناك لكن من الصعب جدا على اى حد خليجى يشتغل محاسب

مديرى فى مصر قالى نصيحة قبل كدة وانا عملت بيها

قالى يا حسام لو مشتغلتش فى مصر فى شركة مالتى ناشونال او مكتب محاسبة من البج فور يبقى سافر احسنلك

اتمنى التوفيق ليك ولصحبك الانتيم

بردوا ابقى شوف تجربة عماد فى السفر هتستفيد منها كتير

حاجة كمان عماد وضحها وانا بردوا ملاحظها ان فيه حاجة اسمها خبرة الخليج يعنى ممكن تلاقى واحد عنده 21 سنة مسافر على نفس مرتب واحد عنده 40 سنة

المرتب بيتقاس بالوظيفة اللى رايح عليها مش بخبرته

عماد

الجمعة 4 يونيو مش 5 يونيو

[mokhtarelmalahy]

متشكر جدا لردودكم يا جماعه ومع انها وضحت الصوره شويه الا انها بتزيد الحيره لانى قريت الموضوع لصاحبى وعاجبه الكلام بتاع حسام بالنسبه لانه لسه صغير 21 سنه وممكن يجرب مش خسران حاجه خصوصا انه فى مصر مش فى شركه مالتى ناشونال دى شركه محليه

برضه انا عايز اشوف اراء اكتر عشان نكون فكره كامله وياريت البوب الكبير بتاعنا سى السيد يعدى علينا كده ثوانى ويقولنا رايه لانى بثق جدا فى كلام الراجل ده وباخده بثقه

مشكور للجميع وربنا يجعله فى ميزان حسناتكم

[مروان]

لو مش هيخسر حاجة في مصر مثل ضياع وظيفته او دراسته او اي شيئ من هذا القبيل يصلي استخارة ويتكل ع الله خاصة انه لسه خفيف يعنى لا زوجة ولاعيل ولا تيل

يجرب حظه سنتين او تلاتة ويرجع يخطب ويشوف نفسه

واكرر الاستخارة مطلوبة

وربنا يوفق