هل سنخسر دول حوض النيل وأفريقيا ؟

[الغريب]

بعدما أبرزت وسائل الإعلام المختلفة خسارة الدبوماسية المصرية في حوارات دول حوض النيل المنعقدة في شرم الشيخ

أصبح الوضع بحق مريرا حينما ترى الضعف والهوان المتنامي في الدور المصري الإقليمي ، حتى المرتبط بمصالح الدولة العليا..

أقلام كثيرة كتبت عن حتمية إستيقاظ الدبلوماسية المصرية من غفلتها الإقليمية وسرقة الكعكة من حول مصر ونحن لا ندري

الآن.. الكعكة لها مذاق خاص حينما ترتبط بنهر النيل

منذ زمن غير بعيد بدأت تظهر الجهود الإسرائيلية الحقيقية في منطقة حوض النيل وأثيوبيا بالتحديد بتقديم الدعم المادي والعيني لهذه الدول وإنشاء جامعات هناك ، كل هذا من أجل إنشاء مشاريع إسرائيلية في هذه المنطقة تستخدم مياه النهر بتسهيلات من هذه الدول ، والموضوع بسيط جدا في نقل نتاج هذه المشروعات إلى إسرائيل عبر البحر الأحمر ..

وأيضا بدأت المملكة العربية السعودية الدخول في الكعكة بتقديم منحات مالية ضخمة لهذه الدول وإستئجار مساحات شاسعة هناك للزراعة فيها بمياه النيل وتصدير الناتج للملكة أيضا عبر البحر الأحمر..

وبدأت الدول تستجيب لهذه الدول التي تطعمها لتستفيد منها ولا مانع مادام النفع متبادل ..

أما مصر فلا يهم أن تؤثر هذه المشروعات على حصتها من المياه ، لأنها بالعربي الفصيح لا تستحق بعدما رفعت أيديها عن هذه الدول وأصبحت لا تشجع أي تقدم بها وحتى أصبحت لا تستورد منها اللحوم كالعادة

ثم جاءت الزيارة المتأخرة (بعد فوات الآوان) لرئيس الوزراء المصري أحمد نظيف ليغري هذه الدول بالفتات القليل مستخف بالعقليات هناك ..

هاااااااااااااااااااا الحمدلله على كل حال :ninja:

[se_ Elsyed]

أسلوب غبي من قيادة أغبى

لا نافعين بره ولا جوه

والله العظيم بالرغم من إني من أشد المعارضية لعبد الناصر الديكتاتور وأكره سيرته ..

إلا إن هذا لا يمنعنى إني أعترف إن كان له بعض الإيجابيات ومنها موضوع منابع النيل وعلاقاته الجيدة بالدول الأفريقية

أما هذا الشخص مبارك اللي ربنا بلانا به وصبرنا وسكتنا

فلا نافع لا بره ولا جوه

وكلنا شايفين إسرائيل من سنين وهي بتلعب بمفردها في أثيوبيا - فاكرين يهود الفلاشا طبعاً ؟ - وجيبوتي وجنوب السودان وأوغندا .. وولا بنتكلم وولا كإن الموضوع يعنينا في شيء

وأخيراً يروح يشيل محمود أبو زيد وزير الري الأسبق بمنتهى الأهانة وذلك لإنه فشل في التواصل مع دول حوض النيل .......... ههههههههههه شماعة بيعلقوا عليها فشلهم

هاقول لكم على حاجه ظريفة ومبكية ..

إسرائيل كانت بتدعم منتخب موريتانيا لكرة القدم وبتبعت لهم شورتات وفالنات وكور .. وكل العملية على بعضها ما تجيش 10 الاف دولار ... ده كان أيام الرئيس السابق معاوية بن طايع .... فلما لاموه في أحد القمم العربية على ذلك قال لهم بمنتهى البساطة : طب إنتوا يا دول يا عربية عملتوا لنا إيه ؟ ولا أي مساعدات أعطتونا إياها وإنتو شايفين الشعب من الفقر بيموت من الجوع وبياكل ورق الشجر ؟

عنده حق والله العظيم في كل كلامه

أما دول حوض النيل .. فلها كل الحق فيما تفعله وتراه مناسباً لها

[aimen]

سيبك انت من السعودية قطر والعالم دى

الكبير كبير

حنا برضه ... الحضارة والفن ...

( الإسطوانة المشروحة بتاعه التقدم والحضارة والفن والخيبة القوية فى كل المجالات التى لا تحصى ولا تعد )

حسبى الله ونعم الوكيل

تم تعديل 15 أبريل 2010 بواسطة aimen

[mfarag]

طبعا مش مهم

احنا دولة محورية و ريادة و..................................................كمل اى شوية كلام فاضى يغطى على الخيبة

طبعا القنوات التلفزيونية مش مهتمة بالكلام الفاضى دة

و مركزة على مبارة القمة

[ابوهنا]

احنا خسرنا كل حاجه

مصر شاخت مع شيخوخه النخبه الحاكمه

الاسبوع الماضى كل زعماء العراق زاروا السعوديه لخطب ود السعوديه

احمدى نجاد من اسبوع يعلن انه على الغرب التعامل مع ايران على انها قوة ومحور فى المنطقه

احنا بنعانى من الروماتيزم والازهامير

وجدعين فى الكدب...انا احنا دوله محوريه...الدورى بتاعنا اقوى دورى فى المنطقه...ادينى اماره

[herohero]

خسرناها من زمان ياجماعه لو ده حكومة بتفهم روحوا اشتروا لحمه من اثيوبيا اكسبوا ودهم ياجماعه افهموا شوية سياسة فوقوا بقى بجد حكومة تتسم بالغباء السياسي

السودان لو انفصل منه الجنوب مصيبة ياعم الحاج فوق ابوس ايدك

مش هنحلى مياة شرم الشيخ اللي لازق لي فيها فوق شوية بقى

انا كان ليا شغل مع قطاع مياه النيل ف وزارة الري والموارد الماية قطاع ف الطراوة ومرتبات بالهبل وفسح وزيارات لدول افريقيا وبوكيت موني بالدولار

وعربيات ودلع وف الاخر مفيش فكر بيحقق شيئ وادي النتيجه

ودول حوض النيل كارهني ومش عاوزني باستثناء السودان اللي لو جنوبها انفصل هنضيع

بجد يارب تفوق ياعم الحاج

[se_ Elsyed]

انا كان ليا شغل مع قطاع مياه النيل ف وزارة الري والموارد الماية قطاع ف الطراوة ومرتبات بالهبل وفسح وزيارات لدول افريقيا وبوكيت موني بالدولار

لو سمحت ما تغلطش في وزارة الري

انا اخويا شغال في الوزارة بقى لي ييجي 6 سنين .. وقالوا له بالفُم المليان .. أقعد في بيتكم ومرتبك هايوصلك وفوقيه بوسه كل أول شهر ..

ناس طيبين بصراحه

------------

نرجع مرجوعنا لعلاقتنا بدول حوض النيل

الموضوع اخطر مما نتصور

أمريكا واسرائيل توغلت وسيطرت تماماً في تلك الدول الفقيرة ..

وإحنا بناكل رز بلبن

لدى حكومتنا نظرة فوقية ودونيه لهؤلاء ليس لها أي أساس

وكأننا ماسكين عليهم ذلة وما يقدروش يتصرفوا في حاجه الا بموافقتنا

وهذا غير صحيح

إن ظل الوضع كما هو عليه في تدهور

يبقى كل سنة وإحنا طيبين

وهانوصل لدرجة كإننا ساكنين في الدور السابع

والناس بتوع الدور الأول قفلوا علينا الميه .. وهانبقى على وشك نموت من العطش ونغني الأرض لو عطشانه وسننتظر شاديه تيجي تفتح الهويس عشان نشرب ونشروي الزرع

[الباشمهندس ياسر]

اغسلوا ايديكم م النظام

[الغريب]

حقا لو الجنوب أنفصل عن السودان دي هتبقى وقعة طين بصراااحة

المشكلة أنه فاضل سنة على إستفتاء إنفصال الجنوب السوداني واحنا في الطراوة

أمووت وأعرف ليه قطر أتدخلت في المصالحة السودانية وإحنا نايمين ، حتى لو قطر نيته سيئة في الموضوع ده بس ربّ ضرة نافعة المفروض تنبهنا أن فيه سودان وفي مشاكل هناك

على فكرة .. السودان هي قطرة الأمل الوحيدة لنا في أفريقيا ولو فقدناها الأمور هتكون أصعب ما يكون وده اللي هتثبته الأيام القادمة ، والله أعلم

[Mercedes]

السلام عليكم و رحمة الله و بركاته

يا جماعة أنتوا أصلا لو شوفتوا الراجل وزير الرى ده و هو بيدلى بتصريحاته فى التلفزيون, تقول انه بيخاطب شويه عيال فى رابعة ابتدائى, و الله العظيم قمة المسخرة md2: .

هو مفكر أن الدول بتاع منبع النيل دى , لم و لا و لن تجرؤ :blink: أن تمس نقطة من مياه النيل بدون الرجوع لمصر و السودان و أن كلام مصر ده أمر نافد.

بلا خيبة , انا أقطع دراعى , أن الدول اللى وقعت الاتفاقية بدون مصر و السودان و اللى كانوا جايين المؤتمر بتاع شرم الشيخ أصلا و هما متفقين مع بعض على أنهم يوقعوا الاتفاقية بدون مصر و السودان و أنهم ياكلونا فى النص, وراهم اسرائيل :closedeyes: عشان تستطيع انها تحاصر مصر من ناحية المياه و خصوصا أنه على حسب علمى أن اسرائيل علاقتها ممتازة جدا بالدول دى من زماااااااااااااان و بتحرص دائما على أن تكون ليها استثمارات و علاقات مميزة مع الدول دى.

و مافيش أحسن من كده, حتى الميه مش هنلاقيها .

الله المستعان

MERCEDES S430

[herohero]

ياجماعه انا بحكيلكم عن قرب خاصة قطاع مياه النيل وهو القطاع المسئول عن مواضيع مياه النيل وبالاخص دول حوض النيل

طبعا مش عاوز اقولكم ع الدلع اللي في القطاع ده لان انا كنت ف شغلي ف مصر كنت ماسك عملية التركيبات والبنية التحتيه للمبنى بتاعهم ف مدينة نصر واتحدي اي حد شافه وكان متوقع انه تبع وزراة الري المبني بالظبط موجود بعد شركة بتروبل مابينها وبين المعهد القومي للاتصالات ادام جامعة الازهر مبني مايدلش ابدا ع انه تبع جهة حكومية

من جوا بقى مش عاوز اقولكم ع الدلع مصاريف بالهبل

اللي اقصده ايه من هذا السرد للاسف العالملين ع هذا الشان يهمهم فقط مصالحهم كحال جهات كثيرةف مصر ويهمهم البدلات والماموريات بتاعت دول افريقا والهبات اللي بتيجي للعاملين هناك بجد ميغه فانسوا ياشباب لعب السياسة

انا شوفت الاجتماعات بتاعتهم كانت بتبقي ف الفورسيزون اوالكونراد دلع خالص والنتيجه زي ماهي مصر والسودان مع بعض والباقي ضدهم

ده من سنة 2006 واظن انه من قبل كده

وده نتيجه الضعف العام ف سياستنا وان الجهة اللي مهمتها كده مشغولة ف المصاريف والفشخرة

اه ياني خليني ساكت

ابقى شوفوا المبنى http://www.nws.gov.eg/photobulding.html

عشان تعرفوا احنا ازاي مهتمين بجد

[se_ Elsyed]

لأ مش هانخسرهم إن شاء الله

أخيراً وبعد رفض 20 سنة - تصوروا - أثيوبيا توافق على إشناء مزارع تبغ - سبارس يعني - مصرية على ارضها .. تُنشاها الشركة الشرقية للدخان ..

والله والبلية هاتلعب والسجاير هاتبقى برخص التراب ..

أنا عن نفسي لو سعر علية الدخان نزل وبقى بنجنيه .. هافكر ادخن .. أستخسار يعني .. أهي حاجه رخيصة ومتاحه للجميع ...

[الغريب]

لأ مش هانخسرهم إن شاء الله

أخيراً وبعد رفض 20 سنة - تصوروا - أثيوبيا توافق على إشناء مزارع تبغ - سبارس يعني - مصرية على ارضها .. تُنشاها الشركة الشرقية للدخان ..

والله والبلية هاتلعب والسجاير هاتبقى برخص التراب ..

أنا عن نفسي لو سعر علية الدخان نزل وبقى بنجنيه .. هافكر ادخن .. أستخسار يعني .. أهي حاجه رخيصة ومتاحه للجميع ...

ههههههههههه لأ هم عندهم حق لأن التربة هناك بركانية زي اليمن وكينيا وسيلان والبرازيل علشان كدة بتصلح لزراعة التبغ ، بس المشكلة أنهم أختارو التبغ دون أي سبب منطقي

ليه مثلا ماختاروش زراعة الشاي أو البن مع إن الشعب المصري كيييف ؟

ولا هي السجاير أفيد ويرجعوا بعدين يكتبو خطر ومضرة وتسبب السرطان طيب ليه من الأول ريحين تزرعوها في آخر الدنيا ..

عجيبة يا مصر يأم الفتن يأرض الخسارة يا مهد ..... كمل أنت بقى :unsure:

[Falcon Crest]

انا هاخرج بره الموضوع شويه انا لسه منقول لفرع الشركه في انجولا يعني بقالي هنا أسابيع

الجاليه المصريه هنا 30 فرد و شغالين في التجاره و مبسوطين جدا انا عرفت ده من السفاره و انا بسجل علشان اكتر من 6 شهور

المهم لفت نظري حاجه مهمه اوي

ان فيه شارع في لواندا اسمه شارع جمال عبد الناصر و ده يبين قد ايه الراجل كان ليه وجود في العمق الافريقي رغم انها مش من منابع النيل

اسف للخروج عن الموضوع

[se_ Elsyed]

صعب قوي حاجه تضحكني اليومين دول بالذات

إنما لما قريت الخبر ده ضحكت وقلت " تسلم دراعك يا با محمد يابو سويلم "

قياديون بـ (الوطني): مصر قد تحارب في أفريقيا من أجل مياه النيل

4/21/2010 2:31:00 PM

القاهرة - محرر مصراوي - أكد قياديون في الحزب الوطني أن مصر "قد تذهب للحرب في أفريقيا أو أي مكان في العالم إذا ما أصرت دول حوض النيل أن تخفض من حصتها في مياه نهر النيل".

وقد جددت مصر رفضها لأي خطة جديدة لتقاسم مياه النيل مشددة على "حقوقها التاريخية" في النهر الذي تستغل أكثر من نصف منسوبه.

ويتابع الرئيس حسني مبارك أولاً بأول تفاصيل الأزمة مع دول أفريقيا الداعية لتخفيض نصيب مصر من المياه.

وقال اللواء نبيل لوقا بباوي عضو مجلس الشورى إن المياه خط أمن قومي، وأضاف: "إذا تعرضت حصتنا للتخفيض فإننا سنقيم الدنيا ولن نقعدها ولا نقبل النقاش فيها".

هع هع هع

جال نحارب جال ؟

لأ وفين في أفريقيا .. يعني نحشود الحشود .. نبعت جيش أوله في أديس أبابا .. وأخره في ميدان العتبة الخضرا

ونطلع أحراش بقى نحارب وإحنا معانا حلل وشطوت - جمع طشت - ولما ننتصر .. نرجع مظفرين بأكاليل النصر وكل واحد شايل حله ميه فوق دماغه دليل الأنتصار

جتكو خيبه وما تقولوش لحد

[عاشق الترحال]

جريدة الدســـــــــــــتور

علمت «الدستور» من مصدر سوداني رفيع المستوي أن دول حوض النيل تسير بشكل جدي في خطوات إلغاء الاتفاقيات التاريخية والتي تحدد حصتي مصر والسودان في مياه النيل، خاصة اتفاقيتي 1929 و1959.

وأضاف أن دول المنابع تسعي إلي إلغاء هذه الاتفاقيات من خلال تقديمها طلباً بذلك إلي محكمة العدل الدولية، بالإضافة إلي سعيها لإقناع بريطانيا بموقفها وهي الدولة التي كانت تستعمر دول المنابع وقت توقيع هذه الاتفاقيات.

وأضاف المصدر أن دول المنابع تسير في خطوات إلغاء الاتفاقيات التاريخية جنباً إلي جنب مع سعيها للتوقيع المنفرد علي الاتفاقية الإطارية دون مصر والسودان في 15 مايو المقبل.

ومن جانبه، قال الدكتور «إبراهيم غانم» ــ أستاذ جغرافيا المياه بجامعة طنطا ــ إن المشكلة الحالية مع دول منابع النيل نتجت عن إدارة مصر ظهرها لدول المنابع لمدة تزيد علي ربع القرن، مضيفاً أن إسرائيل خلال هذه الفترة وحدث بشكل مكثف في هذه الدول، وانتهي «غانم» بتأكيده أن الوضع الحالي في العلاقات مع دول الحوض مخيف ومقلق في الوقت نفسه.

[justme]

انا اللي غايظني ومجنني خبر سمعته من كام يوم ان مصر بتصدر أرز لسه ولمين لسوريا

يعني في عز ندرة الميه وعمالين نقول فيه مشكلة بنزرع محصول زي الرز وبنصدره ونسيب القمح

حاجة تحرق دم البني ادم وتخليه بجد مش عارف يلاقي كلمة يقولها على العالم دي

بجد البلد راحة ناحية فين الله اعلم

ولسه اللي جاي ربنا اعلم بيه

ربنا يستر علشان الغلابة كده هيموتوا من العطش والجوع

عموما ربنا كريم ورحمته واسعه

تم تعديل 26 أبريل 2010 بواسطة justme

[engmido]

فين التحرك وفين العمليات الخاصة وشغل المخابرات وكده

فين الخراجية فين السياسيين....والا فالحين يشتغلوا معانا فى سياسة ال 3 ورقات؟؟؟!!!

[se_ Elsyed]

حتى اثيوبيا

ردت على مصر وقالت لمبارك النهاردة " اضرب راسك في الحيط واعلى ما في خيلك اركبه وهانبني السد هانبني السد "

وبالامس انضمت كينيا للتوقيع على الاتفاقية

والاسبوع القادم بورندي هاتوقع

وفعلاً .. كل واحد يحضر قزايز الميه المعدنية ويدق طلمبة في بير السلم من دلوقت .... والحريم يحضروا الطشوت والحلل والقلل عشان البحر هايضحك ليها وهي نازلة تملى الميه تمل القلل

انا مش غايظني غير اني باتكسف جداً ومش هاقدر اخد الدايلي شاور بتاعي تحت الحنفية العامة اللي هايعملوها في ميدان مدينة العبور بعد الميه ما تشح .. هاتكسف قوي بجد

[الغريب]

تصدقو بالله لو موضوع النيل ده مشي في مساره

والله هتبقى أكبر نكبة في تاريخ النظام الحالي

وهتكون علامة بارزة في تاريخ مصر زي حرب أكتوبر وقناة السويس والسد العالي بالظبط