اذهب الي المحتوي
محمد سنجر

سواق الأتوبيس ( بقلم : محمد سنجر )

Recommended Posts

( صوت صراخ العجلات لاحتكاكها بالإسفلت أيقظنا مذعورين ،

مالت أجسامنا للأمام على إثر إمساك السائق بالكوابح ،

توقفت الحافلة فجأة ،

تخبط الواقفون ببعضهم البعض ، اصطدمت رؤوس الجالسين بمساند المقاعد أمامهم ،

تساؤلات بدأت تتعالى هنا و هناك )

ـ حصل إيه ؟

ـ فيه إيه ؟

ـ استر يا رب .....

ـ خير اللهم اجعله خير ؟

( أتانا صوت الكمساري الواقف بجوار السائق )

ـ معلش يا جدعان ، السواق تعبان شوية .

( بدأ القلق يسيطر على الجميع ، أخذ البعض يتساءل ساخطا )

ـ و مصالحنا و أشغالنا يا جماعة ؟

ـ ده أنا متأخرة على العيال و الله .

( وقف الشاب الذي كان يجلس بجوار السائق )

ـ إيه يا جماعة ؟ أبويا تعبان و مش قادر يكمل ، يعني الراجل يموت نفسه عشان ترتاحم ؟

( يصرخ الكمساري )

ـ حد يجي يشيل معانا عشان نمدده ورا .

( ابن السائق و الكمساري و بعض الركاب يحملون السائق إلى مؤخرة الحافلة )

ـ وسعوا شوية عشان الراجل يقدر ياخد نفسه .

ـ مية ، شوية مية الله يخليكم ، حد معاه كالونيا ؟

ـ الراجل شكله تعبان مش ها يقدر يكمل .

ـ طب و العمل إيه دلوقتي ؟

ـ ما تشوفوا لنا سواق تاني .

ـ ما تسوق انته يا عم الحاج .

( عندها أجاب الكمساري )

ـ هي فتة و إلا فتة ؟ هو أي حد يسوق فيها و خلاص ؟

ـ طب و العمل إيه دلوقتي ؟

( ينادي الكمساري على ابن السائق )

ـ قوم يا كمال سوق بينا .

ـ كمال مين لا مؤاخذة ؟

ـ كمال ابن السواق هو اللي ها يسوق ، ده سواق أبا عن جد ، و بقى له مدة بيتدرب مع أبوه ع السواقة .

( عندها قام أحد الرجال معترضا )

ـ كمال مين يا أبو كمال ؟ لا طبعا ، ها تتعلموا الحلاقة في روس اليتامى ؟

( صرخت فيهم )

ـ فيه إيه يا جماعة ؟ كل دكتور عاوز يخلي ابنه دكتور بالعافية ، و كل حلاق عاوز ابنه يبقى حلاق ، حتى لعيب الكورة عاوز ابنه يبقى لعيب كورة ، و السواق كمان عاوز ابنه سواق ؟

ـ و هو حرام و إلا إيه ؟ ما أنا ترزي و ابني ترزي .

ـ لا طبعا مش حرام ، بس المفروض إنك تعلم أكتر من واحد ، مش بس ابنك و بعد كده تخلي الناس بقى هي اللي تقرر إن كان ابنك ترزي شاطر و إلا فيه اللي أحسن منه .

( صرخ أحد الرجال )

ـ ده شكله عمره ما ساق موتوسيكل حتى ، تلاتة بالله العظيم ما يسوق بينا أبدا طول ما إحنا في الاتوبيس ده .

( حاول الكمساري الدفاع عن وجهة نظره )

ـ يا جماعة ، و الله ده سواق ميكروباس قد الدنيا ، يلا يا كمال ....

( يذهب كمال إلى مقدمة الحافلة ، يقف أحد الرجال معترضا طريقه )

ـ هي تركة و بتقسموها ؟ عليا النعمة ما هو سايق ...

( يصرخ الكمساري )

ـ طب عليا الطلاق بالتلاتة ما حد ها يسوق غيره ، تعالى يا كمال ..

( يسحب كمال من يده ،

يقفز أحد المعترضين و ينزع المفاتيح من مكانها )

ـ طب طلاق على طلاقك ما هو سايق ، الميكروباس حاجة و الأتوبيس حاجة تانية خالص .

( تصرخ إحدى النساء )

ـ ما يسوق يا جماعة ، أكيد هو أكتر واحد فينا بيعرف يسوق ، المهم إننا نوصل بالسلامة .

ـ و مين قالك إن شاء الله إننا ها نوصل كده بالسلامة ؟

ـ لا طبعا ما يسوقش ، هو العمر بعزقة و إلا بعزقة ؟

( ساد الهرج و المرج ، انقسمت الجموع إلى فرقتين ،

عزف الفريقان كونشترو من السب العلني ،

تطور العزف إلى تشابك بالأيدي ،

تسلل الشجار إلى خارج الحافلة ،

نزلت أحاول فض النزاع )

ـ يا جماعة صلوا ع النبي ، بلاش كده ، حرام عليكم ، خليك انته الكبير يا عم الحاج ..

ـ ما تشوف ابن ستين في سبعين ده بيقول إيه ...

ـ ستين في سبعين يا ابن تمانيين في تسعين ؟ ....

( عندها تقدم أحد الرجال )

ـ خلاص يا عم الحاج ، خلاص يا أستاذ ، أنا ممكن أسوق الأتوبيس ، أنا أصلا سواق تاكس ....

( عندها قال آخر )

ـ و ما أسوقش أنا ليه ؟ على الأقل ابن عمي سواق أتوبيس ، و أنا اللي كل يوم أركن له الأتوبيس بتاعه في الجراج .

ـ تلاتة بالله العظيم ما حد ها يسوق الاتوبيس ده إلا كمال ،

يا جماعة افهموا الله يخليكم ،

الأتوبيس ده متلصم ، ده المفروض يتكهن من عشر سنين ، ده لولا الأسطى (حسيني) الله يخليه ، هو اللي قعد يرقع فيه من هنا و من هنا لغاية ما خلاه زي ما انتم شايفين كده ، ما حدش في الدنيا دي كلها يعرف البلاوي المستخبية اللي فيه إلا هو و ابنه كمال ....

ـ تقولش ها نسوق (الفانتوم) يا خي ؟

( تصرخ إحدى النساء )

ـ ما تشوفوا لنا حل في الورطة اللي إحنا فيها دي يا ناس حرام عليكم .

( في هذه الأثناء تأتي شاحنة و تتوقف بجوارنا ، ينزل منها السائق يتساءل )

ـ سلام عليكم ...

( يسلم على أحد الرجال ، فيحتضنه الرجل )

ـ الحاج محمد ؟ أخبارك ؟ عامل إيه ؟ انته رجعت إمتى من بلاد بره ؟

ـ أهلا يا عم حسن ، بقى لي شهرين دلوقتي ، أخبارك إيه ؟ خير ؟ إيه اللي موقفكم في الحتة المقطوعة دي ؟

ـ السواق بعافية شوية ، و مش قادر يكمل .

ـ طيب ، ما تيجي معايا أوصلك ؟

ـ شكرا ، الله يخليك ، أصل معايا العيال .

ـ طيب ، و ها تعملوا إيه ؟

ـ أدينا بندور على حد يسوق الأتوبيس ..

( تقاطعهم إحدى النساء )

ـ ما ينفعش تسوق بينا انته يا أسطى الله يستر عرضك ؟

( عندها يلتف حوله بعض الركاب )

ـ أيوة الله يخليك ، لو ممكن تسوق بينا و تنجدنا م اللي احنا فيه ده .

ـ عشان خاطري يا اسطى ، الواد تعبان ربنا يخلي لك عيالك .

ـ أيوة بس أنا ....

( يقاطعه ثالث )

ـ لو على الترلة يا سيدي ، روح اركنها في أي بنزينة .....

ـ أيوة روح يا شيخ الله يعمر بيتك و لا يوقعك في ضيقة ...

( يقاطعهم رابع )

ـ و لو عايز فلوس يا سيدي ها نجمع لك فلوس من بعضينا .

ـ مش موضوع فلوس و الله .... أنا بس ...

ـ إحنا واقعين في عرضك ربنا يسترك ...

ـ حاضر ، حاضر ، طيب بس أروح أركن الشاحنة بتاعتي في أي بنزينة على الطريق و أرجع لكم .

ـ روح إلهي يسترك يا شيخ ، بس بسرعة الله يخليك أصل الواد تعبان .

( يذهب السائق يركب شاحنته و ينطلق بها ، ينادي أحد الرجال في الجموع )

ـ خلاص يا جماعة ، اتحلت خلاص ، سواق الترلة وافق و ها يروح يركن في أقرب بنزينة و يرجع يسوق بينا ...

( عندها يصرخ الكمساري )

ـ مين ده اللي ها يسوق ؟ هي سايبة و إلا سايبة ؟ طب ده سواق ترلة ، ماله و مال الأتوبيسات ؟

ـ هو انته عاوز تعطلنا و خلاص ؟

ـ طب لو راجل من ظهر راجل خليه بس كده يلمس الأتوبيس ، تلاتة بالله العظيم قاتل يا مقتول النهاردة .

ـ هو أنت يا ابن السواق هو اللي يسوق بينا يا بلاش .

ـ على الأقل ابن السواق عارف الأتوبيس ده و حافظه مسمار مسمار و ترس ترس .

ـ لأ بقى ، لو جيت للحق بقى الراجل ده كان أكبر سواق في بلاد بره ، ده غير المعارف اللي ليه في كل حته ، يعني لا قدر الله لو حصل للأتوبيس أيتها حاجة ممكن يتصرف .

ـ تلاتة بالله العظيم ما حد ها يسوق إلا كمال .

ـ طب يمين على يمينك ما حد سايق إلا الحاج محمد .

ـ طب ابقى وريني كده الحاج محمد بتاعك ده ها يسوق إزاي .

ـ و انته ابقى وريني ها تاخد المفاتيح مني إزاي ؟

ـ هات المفاتيح أحسن لك .

( يحاول الكمساري التهجم على الرجل ، إلا أن بعض الرجال يمسكون بالكمساري و يقيدونه بالحبال ،

عندها يحاول كمال التدخل ،

عندها يصرخ أحد الرجال )

ـ كتفوه هو كمان ابن السواق ده ...

( يقيدون كمال أيضا بالحبال ، يمددونه بجوار الكمساري ،

ما هي إلا لحظات حتى تتوقف أحد السيارات الآتية من الاتجاه المعاكس ، ينزل منها سائق الشاحنة ، يصعد إلى مقعد السائق ، يصيح بالجموع )

ـ يلا بينا .

ـ يلا يا جدعان ، كله يطلع الأتوبيس .

( يصعد الركاب إلى الحافلة ،

صرخت فيهم )

ـ طب و الكمساري و كمال ؟

ـ ها نخليهم هنا ، هيه ، ها تيجي معانا و إلا تخليك معاهم ؟

ـ أيوة بس حرام نسيبهم كده ...

( صرخ أحدهم )

ـ سيبك منه و اطلع يا اسطى ، ده شكله معاهم ...

( لم أجد فائدة من البقاء بجوارهم ، على الأقل حتى أستطيع إرسال من ينقذهم ، صعدت إلى الحافلة ، صرخت إحدى النساء )

ـ الله يخليك يا أسطى نفسي أقعد شوية بالواد التعبان ده .

( يقف السائق يأمر الجالسين )

ـ الجماعة اللي قاعدين يقفوا و يخلوا الواقفين يقعدوا .

( يتذمر الجالسون بينما يهلل الواقفون )

ـ يا إما تلاتة بالله العظيم ما أنا سايق .

( يتوسط أحد الواقفين )

ـ خلينا نريح بعض بس شوية يا جماعة .

( يقف بعض الجالسين و يجلس بعض الواقفين ، عندها تتحرك الحافلة ، أما أنا فوقفت أعلق عيني على الكمساري و كمال اللذان تمددا على الأرض لا يستطيعان الحراك ،

ما هي إلا لحظات حتى شق الصمت صوت احتكاك العجلات بالإسفلت ،

اهتزت عجلة القيادة بشدة في يد الحاج محمد ، تمايلت الحافلة يمينا و يسارا و خرجت عن الطريق ،

صراخ و عويل هنا و هناك ،

حاولت الإمساك بأي شيء تطوله يداي ،

انقلبنا رأسا على عقب ،

دقة قوية دقت رأسي ،

سالت الدماء على وجهي ،

أفقت على ألم فظيع يسيطر على جسدي ،

تأوهات الرجال تختلط بصرخات النساء و الأطفال من حولي ،

تحرش بسمعي صوت شماتة إحدى المغنيات يأتي من خلال سماعات الحافلة )

ـ الصراحة راحة يا سيدي و انته ما بتعرفش .

شارك هذه المشاركه


رابط المشاركه
شارك

....

لا حضرتك دى تلميحات ...صريحة ...غير مقبولة بالمرة ...

اكيد حضرتك ماتقصدش اللى انا فهمته صح ولا ايه؟؟

سواق ياراجل ؟؟؟

سواق ...

ودى معقولة برضه ...

انتى اشتغلى ايه؟؟؟

لا حلوة ...بس ايه اللى زانقنا نركب الاتوبيس...

طالما دمنا هايسيح ...

شارك هذه المشاركه


رابط المشاركه
شارك

يعنى لو كنتو خليتوا ابن السواق يتزعم ويسوق الاوتبيس ماكنش انقلب بيكو ودمكم سال مش قالكم الكمسرى هو عارف بخباياها اكثر من غيرة اسمعوا الكلام ياركاب وخلوها تعدى بمزاجكم او غصب عنكم اللهم اجعلة خير

شارك هذه المشاركه


رابط المشاركه
شارك

لأ بجد حلوة .. وملعوبه

الكمساري قالكم من الاول محدش عارف الخبايا غير كمال

وعلى الرغم ان المصريين معروفين بأقتناعهم بالمثل القائل اللي نعرفه احسن من اللي مانعرفهوش ( ده هم اللي مألفينه كمان باين )

الا ان ركاب الاتوبيس ده طلعوا ثورجيه

طالبوا بالتغيير من اجل الاصلاح .. قصدي المرواح (ماتودوناش في داهية )

شفتوا بأه اخرة الثورة والتغيير ايه

اهم حاجة

ماتخافوش

تم تعديل بواسطة ام نور محمود

شارك هذه المشاركه


رابط المشاركه
شارك

كمال = جمال

السواق = (........)

الركاب = (أنا الشعب)

انما الكمسرى لسه معرفش مين فيهم :roseop:

حد فاهم حاجة؟؟

اه صحيح نسيت اقول

الراجل ابو تريلا = (........)

اصل انا مش بحب اذكر اسماء يا جماعة بصراحة :blush2:

تم تعديل بواسطة fatfouta

شارك هذه المشاركه


رابط المشاركه
شارك
زوار
هذا الموضوع مغلق.

  • محاورات مشابهه

    • الأتوبيس الخاص

      السلام عليكم ورحمة الله وبركاته انا عضو جديد لسه هنا في المنتدي :rolleyes: وده يعتبر اول موضوع ليا هو بصراحة موضوع يفرح ويزعل wst:: في نفس الوقت هو الأتوبيس الخاص انك ممكن تشتري مثلا تويوتا برادو او لاند كروزر وتنزلها مصر وحسب مانا سمعت وشفت بعنيا عربيات كتيرة السنة دي في مصر اتوبيس خاص انك ما بتتدفعش جمارك عليها إلا بس 5%بدل من 140% بعد مالواحد سمع واتحمس للموضوع قال خلاص اخيرا هركب عربية جامدة في مصر ويسيب الشاهين wst:: رجعوا قالوا الموضوع ده اتلغي عشاان كتر في مصر وعلي فكرة هما مش من ح

      في المغتربين المصريين - egyptian expatriates

    • فيلم (سواق الأتوبيس)

      فيلم من إخراج عاطف الطيب ، وعرض في الثمانينات وحصد العديد من الجوائز على المستوى العربي . الفيلم يحكي عن شاب يعمل سائق أتوبيس تعرض والده لأزمة مالية تتهدده ببيع ورشة النجارة التي يملكها الرجل ، وهو أمر يمس صميم الدخل المادي للأسرة فضلاً عما يمثله من مساس بكرامتها ، وتبدأ محاولات البطل (نور الشريف) لمساعدة أبيه في التعلب على تلك الكارثة الوشيكة ويقوم البطل بزيارة أخوته وكلهن سيدات متزوجات لمحاولة جمع مال يكفي لسداد دين والده ، ولكنه يفاجأ بأن لا أحد منهن على استعداد للمساعدة ، وفي الوقت ذاته يق

      في الفنون

×
×
  • اضف...