كان حواوشي بس اتحول الى بيتزا في ظروف غامضة

[ام نور محمود]

السلام عليكم ورحمة الله وبركاته

ده اول موضوع ليا وان شاء الله مايكونش الاخير

بناء على طلب الجماهير ( العزيزة فتفوته ) عندي كام صنف كده اغلبهم معجنات هاحاول انزلهم تباعا بالشرح التفصيلي والصور كلما امكن

انا كنت هاعمل حواوشي وعجنت العجينة وكله تمام وببص لقيت مافيش لحمة مفرومة بس في سوسيس ففكرت اقلبها بيتزا والله المستعان

المهم طبعا انا بجرب في مقدار صغير عشان لو .. احم احم .. يعني الواحد مايضمنش الظروف

وكمان ايديا ضعيفة مش بقدر اعجن وبحط كله في العجانة والمفروض العجينة لازم تتلت كتير فقلت ربنا يستر

المهم حطيت ربع كوبايه زيت ونص علبة زبادي في العجانة وضربتهم كويس

وبعدين حطيت كوبايتين دقيق ونص معلقة بيكنج بودر وذرة ملح وذره سكر ومعلقة لبن بودرة وشوية اوريغانو ( زعتر ناشف ) في كيس نايلون ورجيتهم كويس وشغلت الجهاز وقصيت الكيس وقعدت ازود الدقيق حبة حبة لغاية ماخلصت وبقى الخليط مفرول

دوبت نص معلقة خميرة جافة في نص كوبايه ماء دافي وبعد عشر دقايق شغلت الجهاز وزودت الميه بالخميرة شوية شوية لغايه العجينه مالمت وده شكلها

وسبتها كام ساعة ( 8 ساعات بصراحة عشان نمت وراحت عليا نومة ) وده شكلها لما خمرت

وبعدين اكتشفت ان مافيش لحمة مفرومة فقلبتها بيتزا

فردتها في الصينية ومش قادرة اوصفلكم العجينة قد ايه طرية ومرنة وريحتها حلوة اوي تخلي الواحد عايز ياكلها نيه

وكنت دايما بعاني من عجينة البيتزا انها لما افردها بتلم تاني لكن دي مش بتلم ومريحة اوي في الشغل

دهنت وشها كاتشب وحطيت حلقات السوسيس والفلفل الرومي والطماطم وكنت مسخنة الفرن وده شكلها قبل ما تدخل

وحطيتها على لحم الفرن وهديت النار عشان تستوي من جوه وبعد عشر دقايق نقلتها تحت الشوايه عشان تتحمر شويه خمس دقايق

وبعدين طلعتها وحطيت الموتزاريلا

ورجعتها تحت الشوايه تسيح وبعد دقيقتين طلعتها وده شكلها النهائي

المقدار ده طلعلي 2 بيتزا واحدة 26 سم وواحدة 24 بس الصغيرة عملتها سادة بالموتزاريلا بس عشان بنتي فقرية مابتحبش اي نوع حشو

بس والله الساده طلعت طعمها يجنن وريحتها واااااااااااااااااااو

وبرضه بسويها الاول وبعدين بحط الموتزاريلا في الاخر

وبس

جربوها وان شاء الله تعجبكم

[MZohairy]

فكرتيني وانا في الجامعه حبيت اعمل نفسي بعرف اطبخ

روحت قايلهم في البيت حعملكم اكله حتاكلوا صوابعكم وراها

و كنت ناوي اعمل مسقعه

بعد ما عملتها (و كنت لسه لوحدي و محدش لسه شافها) لقيتها مالهاش علاقه بالمسقعه لا شكلا و لا طعما و لا لونا و لا قواما

قلت مش حكسف نفسي طبعا

رحت قايلهم ان الاكله دي طلياني اسمها x 12

و كلوها و عجبتهم

تخيلوا بقى لو كنت قولتلهم دي مسقعه !!!!! :wub:

[رضوي]

السلام عليكم ورحمة الله وبركاته

تسلم ايديكي ............ شكلها جميل جداً .......... دة انا قربت اشم ريحتها من هنا :blush2:

بس معلش سؤال علي جنب كدة

انتي اضافتي بيكنج بودر وخميرة ؟؟؟

طب ازاي مش كفاية الخميرة

بصراحة أنا بعمل البيتزا بالخميرة بس ............. تقريباً بنفس طريقتك بس بدل الزبادي بضيف لبن عادي مش بودر ........ وبضيف بضاية واحدة

ممكن كمان نضيف نص معلقة كركم بيديلها لون جميل جداً .........

بس بجد تسلم ايدك شكلها رائع ........... هجرب طريقتك المرة الجاية

تحياتي :wub:

[ام نور محمود]

فكرتيني وانا في الجامعه حبيت اعمل نفسي بعرف اطبخ

روحت قايلهم في البيت حعملكم اكله حتاكلوا صوابعكم وراها

و كنت ناوي اعمل مسقعه

بعد ما عملتها (و كنت لسه لوحدي و محدش لسه شافها) لقيتها مالهاش علاقه بالمسقعه لا شكلا و لا طعما و لا لونا و لا قواما

قلت مش حكسف نفسي طبعا

رحت قايلهم ان الاكله دي طلياني اسمها x 12

و كلوها و عجبتهم

تخيلوا بقى لو كنت قولتلهم دي مسقعه !!!!! :blush2:

بس انا طلعت انصح منك

انا قلت الصراحة

طلعت بيتزا قلتلهم معلش ياجماعة الحواوشي بقى بيتزا

وهم تقبلوا الموضوع بصدر رحب md2:

شكرا لمرورك وردك

السلام عليكم ورحمة الله وبركاته

تسلم ايديكي ............ شكلها جميل جداً .......... دة انا قربت اشم ريحتها من هنا md2:

بس معلش سؤال علي جنب كدة

انتي اضافتي بيكنج بودر وخميرة ؟؟؟

طب ازاي مش كفاية الخميرة

بصراحة أنا بعمل البيتزا بالخميرة بس ............. تقريباً بنفس طريقتك بس بدل الزبادي بضيف لبن عادي مش بودر ........ وبضيف بضاية واحدة

ممكن كمان نضيف نص معلقة كركم بيديلها لون جميل جداً .........

بس بجد تسلم ايدك شكلها رائع ........... هجرب طريقتك المرة الجاية

تحياتي :wub:

تسلمي يارضوى على الرد الجميل

بصي ياقمر .. بما اني طباخة مبتدئة عشان كده بحب امشي زي الكتاب ماقال

وانا واخدة الوصفة من واحدة حبيبتي وعملتها زي ماقالت تمام

بس البيكنج بودر بيخليها هشه وجميلة

جربيها وهاتعجبك ان شاء الله

وانا هاجرب الكركم

[لونا]

:blush2: تسلم إيدك شكلها روعة bv:-

عجبتني أوي طريقة وضعك للدقيق في الفود بروسيسور

المرة الجاية حاعجن البيتزا فيه إن شاء الله

بس أنا باعمل الحواوشي بالعيش العادي مش عجينة

طب ياريت تكملي جميلك .. و تقولي طريقة الحواوشي ..و بيتحط قد إيه في الفرن ..و على أي رف ..و على درجة كام ؟

كل دي أسئلة md2:

طب الأحسن تفتحي موضوع مستقل عن الحواوشي بالعجين md2:

بس معلش سؤال علي جنب كدة

انتي اضافتي بيكنج بودر وخميرة ؟؟؟

طب ازاي مش كفاية الخميرة

بصراحة أنا بعمل البيتزا بالخميرة بس ............. تقريباً بنفس طريقتك بس بدل الزبادي بضيف لبن عادي مش بودر ........ وبضيف بضاية واحدة

أنا برضه يا رضوى باحط بيضة على عجينة البيتزا..

و الزبادي بيطري العجينة أكثر من الحليب .. أما الزيت ينشفها .. و كمان لو حطيتي ملعقة قشطة بتبقى طرية أوي :wub:

و كمان أنا باحط البيكنج و الخميرة .. البيكنج بيخليها هشة و خفيفة أكثر

تحياتي

[رضوي]

تسلمي يارضوى على الرد الجميل

بصي ياقمر .. بما اني طباخة مبتدئة عشان كده بحب امشي زي الكتاب ماقال

وانا واخدة الوصفة من واحدة حبيبتي وعملتها زي ماقالت تمام

بس البيكنج بودر بيخليها هشه وجميلة

جربيها وهاتعجبك ان شاء الله

وانا هاجرب الكركم

أنا برضه يا رضوى باحط بيضة على عجينة البيتزا..

و الزبادي بيطري العجينة أكثر من الحليب .. أما الزيت ينشفها .. و كمان لو حطيتي ملعقة قشطة بتبقى طرية أوي :closedeyes:

و كمان أنا باحط البيكنج و الخميرة .. البيكنج بيخليها هشة و خفيفة أكثر

تحياتي

اوك ......... بكنج بودر بكنج بودر

وماله مش عيب برضه :lol:

شكراً ليكم بجد وتسلم ايدكم

بالنسبة بقي للحواوشي

أنا برده بحب أعمله بالعيش الجاهز ........ اه بخاف شوية من العجين احسن يبوظ مني ولا حاجة ......... وأنا أصلي بحب الأختراعات مابحبش امشي علي وصفات ...... لابد وحتماً من الافتكاسات في المطبخ وأجرب بقي فيهم وهما وحظهم ...... يلا بقي

بس نفسي أجربه بالعجين بصراحة ....... اه بس أعمله كدة لوحدي علشان لو طلع حلو اقولهم ولو لخبط الدنيا وباظ مني ماحدش يتريق عليا ....... وخصوصاً أبي العزيز بيقعد يضحك عليا ويقولي معلش ماحدش بيتعلم بسهولة

wst::

[Diab]

فكرتيني وانا في الجامعه حبيت اعمل نفسي بعرف اطبخ

روحت قايلهم في البيت حعملكم اكله حتاكلوا صوابعكم وراها

و كنت ناوي اعمل مسقعه

بعد ما عملتها (و كنت لسه لوحدي و محدش لسه شافها) لقيتها مالهاش علاقه بالمسقعه لا شكلا و لا طعما و لا لونا و لا قواما

قلت مش حكسف نفسي طبعا

رحت قايلهم ان الاكله دي طلياني اسمها x 12

و كلوها و عجبتهم

تخيلوا بقى لو كنت قولتلهم دي مسقعه !!!!! wst::

نفس اللي حصل في الفنكوش

العالم حط مادة سرية وقال رقمها

طلع تليفون بيتهم

الناس اشترتها هواء

بروا عليك يا زوهيري عرفت تتصرف

[fatfouta]

السلام عليكم ورحمة الله وبركاته

ده اول موضوع ليا وان شاء الله مايكونش الاخير

بناء على طلب الجماهير ( العزيزة فتفوته )

ايا ربى اروح منكوا فين.... اى حد تبوظ منه او حاجة او تحصله حاجة فى المنتدى ده يقول فتفوتة هى السبب

عموما والله تسلم ايدك يا ام نور شكلها جميل قوى بس مش هقدر اعملها ماوعدكيش اليومين دول بالذات

انا اول مرة اعرف ان الحواوشى بتعمله عجينه

بس أنا عارفة ان الاسكندرانية بيسموه عيش باللحمة مش (حواوشى)

طب عملتى البتونساليه اللى قلتى هتنفذيه؟؟؟ شكله باظ منك اعترفى wst::

[shiko]

.....يسلم الايادى ....

بجد انا بتعلم منكم حاجات جميلة ....

انا اول مرة اشارك مع حضرتك ...بس بجد متابعة مداخلاتك الكريمة ...

ربنا يزيدكم بركة ونفع للناس....

[ام نور محمود]

:) تسلم إيدك شكلها روعة :wub:

عجبتني أوي طريقة وضعك للدقيق في الفود بروسيسور

المرة الجاية حاعجن البيتزا فيه إن شاء الله

بس أنا باعمل الحواوشي بالعيش العادي مش عجينة

طب ياريت تكملي جميلك .. و تقولي طريقة الحواوشي ..و بيتحط قد إيه في الفرن ..و على أي رف ..و على درجة كام ؟

كل دي أسئلة :D

طب الأحسن تفتحي موضوع مستقل عن الحواوشي بالعجين :P

بس معلش سؤال علي جنب كدة

انتي اضافتي بيكنج بودر وخميرة ؟؟؟

طب ازاي مش كفاية الخميرة

بصراحة أنا بعمل البيتزا بالخميرة بس ............. تقريباً بنفس طريقتك بس بدل الزبادي بضيف لبن عادي مش بودر ........ وبضيف بضاية واحدة

أنا برضه يا رضوى باحط بيضة على عجينة البيتزا..

و الزبادي بيطري العجينة أكثر من الحليب .. أما الزيت ينشفها .. و كمان لو حطيتي ملعقة قشطة بتبقى طرية أوي wst::

و كمان أنا باحط البيكنج و الخميرة .. البيكنج بيخليها هشة و خفيفة أكثر

تحياتي

تسلم ايدك انتي على الرد الاروع

بصي يالونا .. الحاجة ام الاختراع .. انا كنت بزود الدقيق بالمعلقة وكان بيطلع عيني ويعفر الدنيا ولا كأني في حرب البسوس وبعدين جت في بالي الفكرة دي ولقيتها تمام وبتوفر مجهود كتير

بصي هو انا باعمل الحواوشي بنفس العجينة بس بسوي اللحمة نص سوا الاول عشان بخاف ماتستويش كويس في الفرن ( موسوسة بعيد عنك )

وبحطه في الصاج العادي بتاع البوتاجاز في النص وبسخن الفرن الاول وبعدين اهدي النار شويه واتابعه

وفعلا ان شاء الله هاعمل موضوع عن الحواوشي بس اصور خطواته الاول لاني احب اشرح بالتفصيل .. لسه فاكرة ايام التربيه العملي

انا مش بحط بيضه على العجين عشان مرة ماكانش عندي ( كالعادة لاني مش بحضر للاكلة من قبلها بيوم ) وعملت من غير بيض وطلعت احلى فمن يومها بطلت احط بيضة

وفعلا الزبادي بيطري اوي والبيكنج بودر بيخليها تحفة اما القشطة هاجيبها منين ..انا في الصحراء الجرداء ومفيش غير قشطة عجيبة وغريبة في الهايبر ( قرايه على السريع ) هنيئا لكم بمصر يا اهل مصر

شرفتيني يا لونا

تم تعديل 4 أبريل 2010 بواسطة ام نور محمود

[ام نور محمود]

اوك ......... بكنج بودر بكنج بودر

وماله مش عيب برضه

شكراً ليكم بجد وتسلم ايدكم

بالنسبة بقي للحواوشي

أنا برده بحب أعمله بالعيش الجاهز ........ اه بخاف شوية من العجين احسن يبوظ مني ولا حاجة ......... وأنا أصلي بحب الأختراعات مابحبش امشي علي وصفات ...... لابد وحتماً من الافتكاسات في المطبخ وأجرب بقي فيهم وهما وحظهم ...... يلا بقي

بس نفسي أجربه بالعجين بصراحة ....... اه بس أعمله كدة لوحدي علشان لو طلع حلو اقولهم ولو لخبط الدنيا وباظ مني ماحدش يتريق عليا ....... وخصوصاً أبي العزيز بيقعد يضحك عليا ويقولي معلش ماحدش بيتعلم بسهولة

:)

ان شاء الله هانزل موضزع عن الحواوشي يارضوى

وموضوع الاختراعات ده ماينفعش معايا .. ده انا بجري على بقاق مفتوحة .. لأ و الانافة والتناكة واخدة حدها معاهم .. لو معجبهمش الاكل مابياكلوش وبيحسسوني بتانيب الضمير

هنيئا لك بوالدك وهنيئا له بكي .. انا اتذكر اني كنت بعمل سلطة فزيعة لبابا وكانت بتعجبه اوي لدرجة انا كان بيخليها يحلي بيها بعد الاكل .. وبعدين اكتشفت مصيرها لما دخلت المطبخ بالصدفة على غير العادة wst:: .. والله استحملوني كتير ربنا يعزهم

اتعلمي يابنتي في عز باباكي .. محدش بيستحمل الواحد غيرهم

تم تعديل 4 أبريل 2010 بواسطة ام نور محمود

[ام نور محمود]

نفس اللي حصل في الفنكوش

العالم حط مادة سرية وقال رقمها

طلع تليفون بيتهم

الناس اشترتها هواء

بروا عليك يا زوهيري عرفت تتصرف

افهم من كده ان حضرتك معجبتكش البيتزا وبتطالب بالفنكوش

خلي زوهيري يعملهولك بأه :closedeyes:

شرفتني بمرورك

[ام نور محمود]

ايا ربى اروح منكوا فين.... اى حد تبوظ منه او حاجة او تحصله حاجة فى المنتدى ده يقول فتفوتة هى السبب

عموما والله تسلم ايدك يا ام نور شكلها جميل قوى بس مش هقدر اعملها ماوعدكيش اليومين دول بالذات

انا اول مرة اعرف ان الحواوشى بتعمله عجينه

بس أنا عارفة ان الاسكندرانية بيسموه عيش باللحمة مش (حواوشى)

طب عملتى البتونساليه اللى قلتى هتنفذيه؟؟؟ شكله باظ منك اعترفى wst::

لا مهرب ولا مفر .. خصوصا مني انا .. ده انتي هاتشوفي ايام .. عسللللل

تسلم ايدك انتي يافوتفوت والف سلامة عليكي .. ده انا عملها واجيبها لحد عندك والله ومش عزومة مراكبية وانتي عارفة

والله يا اختشي من يوم مابقينا كبار وفاهمين كده وحنا نعرف ان الحواوشي اسمه حواوشي وبيتعمل بالعجينه والمصحف

عيش باللحمة :closedeyes: انا سمعت الكلمة من حد قديم اوي .. واحد عاصر ايام مالفرنجة دخلوا قاهرة المعز كده .. انتي ماروحتيش اليكس من امتى يافوتي فوتي wst::

الباتون ساليه :blink: مين قال باتون ساليه .. مش بقولك .. انتي اكيد على علاقة العقيد ادهم صبري

انا هاعترف اهو .. والله العظيم يابيه اتلسع مني في الفرن عشان اول مرة بعمله ومش عارفه سواه .. بس المرة الجايه ان شاء الله هاصوره وانزله

بس انتي طفي كاميرات المراقبه دي وحياة ولادك ياشيخة mfb:

[ام نور محمود]

.....يسلم الايادى ....

بجد انا بتعلم منكم حاجات جميلة ....

انا اول مرة اشارك مع حضرتك ...بس بجد متابعة مداخلاتك الكريمة ...

ربنا يزيدكم بركة ونفع للناس....

تسلم ايدك انتي ياشيكو على الرد الجميل

ربنا يزيدك من نعيمه يارب ويديكي كل اللي نفسك فيه

[لونا]

اما القشطة هاجيبها منين ..انا في الصحراء الجرداء ومفيش غير قشطة عجيبة وغريبة في الهايبر ( قرايه على السريع ) هنيئا لكم بمصر يا اهل مصر

هو طبعاً أنا و الحمد لله من أهل مصر .. بس سايباها شوية ..

من كام سنة كدة .. و قاعدة في الرياض

و باستعمل قشطة الهايبر الغريبة العجيبة في المعجنات و في البسبوسة

.. أعمل إيه يعني؟ :closedeyes:

[doudy]

تسلمى ع العجينة الحلوة دى

اهم حاجة فى البيتزا و العيش باللحمة هى العجينة

اكيد هجربها و فى انتظار وصفاتك الحلوة

اصلى بصراحة بموت فى المعجنات و بالذات البيتزا :closedeyes:

[ام نور محمود]

هو طبعاً أنا و الحمد لله من أهل مصر .. بس سايباها شوية ..

من كام سنة كدة .. و قاعدة في الرياض

و باستعمل قشطة الهايبر الغريبة العجيبة في المعجنات و في البسبوسة

.. أعمل إيه يعني؟ :closedeyes:

ياحيني يالونا .. الحال من بعضه يا حبيبتشي

تعالي نقعد جنب بعض ونفتكر مصر ونعيط :blink:

بس على فكرة سمعت كده خير اللهم اجعله خير ان في محل في المنفوحة اسمه وله عنده منتجات مصرية ومنها القشطة العادية والتانية الملفوفة شبه الرول

انا اخويا جابلي من عنده جبنه رومي كانت تحفة بصراحة

تيجي نجرب ؟

[ام نور محمود]

تسلمى ع العجينة الحلوة دى

اهم حاجة فى البيتزا و العيش باللحمة هى العجينة

اكيد هجربها و فى انتظار وصفاتك الحلوة

اصلى بصراحة بموت فى المعجنات و بالذات البيتزا :closedeyes:

تسلمي يادودي

جربيها وان شاء الله تعجبك

شرفتيني ياقمر

[لونا]

أنا فعلاً أسمع عن المحل ده ..

و أعرف إن المنفوحة فيها كل المنتجات المصرية فعلاً

و أعرف إن فيه جزار مصري هناك ممتاز

بس عمري ما جبت حاجة من هناك خالص

[ام نور محمود]

أنا فعلاً أسمع عن المحل ده ..

و أعرف إن المنفوحة فيها كل المنتجات المصرية فعلاً

و أعرف إن فيه جزار مصري هناك ممتاز

بس عمري ما جبت حاجة من هناك خالص

بصراحة انا اشتريت من هناك خضار كذا مرة

يجنن وسعره ارخص من الهايبر كتير

والطماطم تفكرك ببتاعة مصر .. مش العيانه اللي عندها انيميا بتاعة الصوب دي

والتلاتة كيلو ب 5 ريال

وبجيب عيش شبه البلدي بتاعنا اسمه بر وبجيب فينو وفطير حلو اوي

زورونا تجدوا ما يسركم