اذهب الي المحتوي
fatfouta

الملوخية الخضراء

Recommended Posts

ايوه هى بعينها........ساعات تبقى جميلة ومضبوطة وساعات كتير تطلع مش حلوة

مرة ساقطة

مرة صايصة

مرة ملهاش طعم

بس انا عاوزة من الستات كل واحدة تقول بتعملها اذاى بالضبط .................سواء كانت مجمدة او خضراء طازجة يعنى

انا مش بلاقى هنا الملوخية الخضراء كتير وساعات بحس حتى لو لقيتها بتبقى مش نفس طعم الملوخية المصرية الجميلة بتاعتنا

ولو على الكيس ال400 جم ده بتحطى اد ايه شوربة عشان ماتسقطش........وليه بتسقط اساسا

ياللا عاوزا الطرق المختلفة لعملها ذى ماعملتوا كده فى البشاميل

يكون ليكم حزيل الشكر اذا ساعدتونى......بس ماحدش يعيب عشان انا قولت مش علطول بتطلع وحشة يعنى :lol:

شارك هذه المشاركه


رابط المشاركه
شارك

الملوخيه انا بفضل المجمده بس مش اي نوع في انواع طعمها وحش

1- مونتانا

2- فارم فرتس

2- لذه

لو بتحبيها تقيله تحطي مج او مج و نص شوربه

و عشان متسقطتش سيبيها تفك الاول او تحيطي الكيس في الشوربه السخنه و متولعيش عليها النار سيبها براحتها

و بعد كدا تولعي النار و تقلبي " بكابشه " من فوق لتحت

و بعدين التوم في شويه سمنه و تشششششششششششششششششششش

:lol:

خلاص بالهنا و الشفا

شارك هذه المشاركه


رابط المشاركه
شارك
ايه دول يا هناء يا اوختشى؟؟؟ :lol:
2- فارم فرتس

2- لذه

ديه انواع ملوخيه مجمده

مش موجوده عندكو في السعوديه ولا ايه :wub:

و في كمان نوع كويس برضه اسمه " بسمه "

بس احسن نوعين مونتانا و فارم فريتس

شارك هذه المشاركه


رابط المشاركه
شارك

بصى يا فتفوتة اهم حاجة علشان تعملى الملوخية صح

انك تقليبها طول ما انتى واقفة قدامها يعنى مش تسيبها و تمشى

اهم حاجة انها متوصلش للغليان اوعى تخليها تغلى

الحاجة الاهم اوعى تغطيها سيبيها من غير غطا

شارك هذه المشاركه


رابط المشاركه
شارك

ايه دوت .. موضوع عن الملوخيه :lol:

فتفوته .. انا بشكرك بجددددددددددد :lol:

فكرت قبل كده اسأل هنا عن طريقه عمل ملوخيه ناجحه .. احم احم .. بس اتكسفت :happy:

قلت ابطل اعمل ملوخيه احسن :P

تقريبا مش بناكل ملوخيه غير لما بننزل مصر .. حماتى عليها ملوخيه خرافيه ما شاء الله ,, لو عملت ايييييييييييييه عمرى ما هعرف اعمل زيها :lol:

مكنتش فاهمة المشكله ليه الملوخيه بتسقط معايا .. قلت يمكن عشان مجمده بس فى ناس بتضبط معاها المجمده دى ومش بغطيها وبقلبها

بسسسسسس مفيش امل wst:: ساقطه ..ساقطه ..ساقطه :P

قلت ابطل اعملها احسن بس ساعات بتوحشنا جدا انا وجوزى ..

يالله انا متابعه .. يمكن ربنا ينفخ فى صورة ملوخيتى يوما ما :D

لولا

شارك هذه المشاركه


رابط المشاركه
شارك

الحمد لله اخيرا لقيت حد ذيى

شكرا يا لولا شجعتينى انى اقول باقى الحاجات اللى مش بتطلع حلوة معايا :P

لكن لغايت دلوقتى مافيش واحدة دخلت وقالت طريقتها بالضبط بمعنى

- على شوربة فراخ ولا لحمة احسن

- بتحطى فى الشوربة ايه؟؟ يعنى بتزودى الشوربة بعد ماتطلعى منها اللحمة اى اضافات قبل ماتحطى الملوخية؟؟

- بتحطى ماجى ولا لأ؟؟

- بتخرطيها اذاى؟؟ لا بلاش دى عارفينها

مش معقول كده هو كله مش بيعرف يعملها ولا ايه؟؟

على جمب كده كلمة لـ لولا حبيبى........بصى احنا طلعنا ذى بعض مش بنعرف نعملها اهو بس عاوزة اقولك حاجة انا القلقاس بيطلع معايا تحفة تاخدى طريقته؟؟ :happy:

على فكرة انا عارفة ردك :lol:

شارك هذه المشاركه


رابط المشاركه
شارك

بصي فافتفت ..

الملوخية دي احد ثلاث اشياء يتيمه بتتقنها والدتي حد الاحتراف والجنان والازبهلال كمان .. وبما اني اخذت عنها الطريقة الي هي اساسا مش وخداها عن والدتها وانما عن جدتها الله يرحمها ( شفت الجده دي تصدقي ) .. وبما اني وبلا فخر حصلت على دكتوراه الفلسفة في الملوخيه بعد ماتفوقت على ماما بذات نفسها وبطلت تطبخها وسابت لي المهمه دي .. فاسمحي لي ادلو بكبشتي قصدي بدلوي في الموضوع ده ..

بصي ياستي .. الملوخيه بتسقط لما تقعد على النار زياده عن اللزوم .. وقبل ماقولك الفترة اللازمه لذلك خلينا نبدا القصة من اولها ..

اول حاجه هنختار الملوخيه الي عيدانها قصيرة قدر الامكان ( بلدي ) ويكون ورقها مفرود وطري مش خشن او مثقب .. الملوخية الي عيدانها طويلة اوي زي الشجر او الي لها براعم تشبه قرون البامية كده بس على رفيع .. دي مش شرط تطلع حلوة في الطبخ .. وطبعا لو الورق ناشف ( خشن زي ورق الدفتر كده مفيهوش مرونه ) بيبقى طعم الملوخية مش كويس وكذلك لو الورق غامق اوي يميل للسواد .. احسن ملوخية هي الي في طولها تشبه الى حد كبير نبتة النعناع ..

هناخذ الورق نقطفه يعني نخلع ورقة ورقة من على الساق .. من اسرار الملوخيه انك تتخلصي من ( العنق ) وهو الجزء الي بيوصل الورقة بالساق .. الجزء ده بيغير الطعم كتير وبيزود ( لزاجة الملوخية ) عن نفسي بحرص اني ازيله تماما تماما يعني تقريبا مبسيبش ولا وحده ..

بعد ماقطفنا الملوخيه هتغسلي الورق كويس بإنك تحطيه في حاجة عميقة وتغمريه بالماء كويس .. بعدين ( تنشلي ) الورق في مصفاه وبكده نضمن ان الرمل والاوساخ نزلت في القاع .. كرري العملية مرة كمان او مرتين وممكن تتركيها في المية دقيقة او اثنين مش اكتر لانك لو ( نقعتيها ) ممكن هتروح فايدتها في المية . .

هنطلع الملوخية تنشف شويه على صينية .. زوجي كان بيقول نقلا عن حماتي انها لازم تترك تنشف في الضل . . وانا لان حماتي قالت كده فمش بنشفها من اساسه :happy: .. الصراحه هي بتبقى افضل بكتير لو هتنشف بس بما اننا بنستخدم المفرمه الكهربائية فمش لازم تنشف اوي يعني دقيقتين تلاته تصفي ميتها على حاجه صينية او ماشابه بعدين نفرم .. عن نفسي لتسريع عملية التنشيف احيانا بحطها على ورق جرائد .. بس ده كان زمان دلوقت زي ماقلت لك بفرم على طول بدون مانشف .

هنحط الملوخيه في مفرمه الملوخية ( بستخدم فود بروسيسور براون وماما من عشقها للملوخيه جايبه مفرمه مخصوص لها بس كله بيؤدي الغرض ) هنحطها ونقعد نشغل المفرمه ونطفي ونشغل ونطفي ونضغطها بالملعقه لتحت عشان تنفرم كويس الى ان تفرم تماما وتبقى ناعمه خالص بس خلي بالك مش عصير .. في مرحلة الفرم لو انتي لم تزيلي الاعناق الي قلت لك عليها هتلاحظي ان في ( رغاوي ) اخضر فاتح ..

اول ماتطلعي الملوخيه من المفرمه هيكون لونها فاتح وكل ماتتركيها في الهواء هتسود .. برضه لو جمدتيها هتبقى سوده وفي كل الاحوال السواد ده لا يؤثر على الطعم بدرجه تذكر .. وبمناسبة التجميد لو هتجمدي يبقى جمديها وهي مفرومه .. بتوضع في كيس شفاف وتضغطي عليها بحيث تبقى ( الواح ) سميكه يادوب 1 سم .. تقفلي الكيس كويس او تثنيه وتلصقي ببلاستر وتحطي عليها تاريخ التعبئة وارمي على الفريزر ..

طريقة الطبخ بقى ...

اولا هنجهز شوربه وبالمناسبة الملوخيه بتبقى احسن كتير بالشوربة المركزة الي في نفس الوقت ( خفيفة الدسم ) يعني تجود اوي على شوربة الارنب لانها خفيفة بطبعها وفي نفس الوقت هي الحاجه الوحيده الي مبتبقاش حلوة اوي مع شوربة البط او الوز .. عن نفسي بحبها بشوربة الفراخ او الارانب هي الافضل زي ماقلت .. وخلي بالك في فرق مابين تركيز الشوربة في ان الماء نفسه بتاعها يكون قليل مقارنة بالبروتين وبين انها تبقى ( دسمه ) من حيث الدهن الي فيها كثير .. ده موضوع وده موضوع .. الشوربة المناسبة زي ماقلنا الي ملهاش دهون وفيها بروتين كتير ..

هنغلي الشوربة على النار .. عن نفسي ببقى عارفه بالنظر الكمية المناسبة .. لو مش عارفه هتاخذي شويه بس من الشوربة مثلا كوبايه ولا اثنين .. وتحطي الباقي على جنب هنزود فيهم ..

قبل مااحط الملوخيه بكون مجهزه الثوم .. ادقة كويس جدا .. اجهز مقلاه صغيره احط فيها ملعقة سمنة + الثوم المدقوق ناعم + رشة ملح بسيطه جدا + قليل من الفلفل + كسبرة مطحونة ..

هجيب الملوخيه لو خضرا واحطها في الشوربة المغلية ولو مجمده بحطها م الفريزر مباشرة على الشوربة بدون ماتمر بمرحلة اذابة ..

هقلب الملوخيه في الشوربة كويس لغايه ماكل الكلاكيع الي فيها تروح .. لو حسيتها محتاجه شوربة زياده افضل ازود شويه بشويه لغايه ماحس (من وزنها في الكبشة ) انها بتتقلب معايا بسهولة او انها وصلت السماكه المطلوبه .. اول ماذابت الملوخيه في الشوربة وقبل ماتغلي فورا بحط المقلاه بتاعت الثوم على البوتاجاز

اقلب شويه في الثوم على نار هادية طبعا وفي نفس الوقت بالمغرفة بقلب الملوخية .. بيقال ان السر في الملوخية في التقليبة دي .. بترفعي المغرفة لفوق وتدلقي الملوخيه الي فيها في الحلة تاني وتكرري .. بيقال ان ده بيخلي الملوخيه تغلظ وتبقى افضل في الطعم .. عن نفسي بعمل كده دائما وبيتهيء لي انها مش هتظبط غير لو اتقلبت كده ( وجدنا ابائنا على ذلك ) ..

مجرد ماتغلي الملوخيه غلوه وحده هنوطي عليها النار وفي هذه الاثناء بيكون الثوم اتحمر تقريبا .. نشيله بسرعه من عل النار قبل مايسود او يتحمر زياده والا هيبقى مر .. يادوب يبقى ذهبي ده المطلوب .. هنقلبه بسرعه على حلة الملوخية وناخذ تقليبة كده وناخذ كبشه ملوخية ونحطها على المقلاه تعمل طشششش .. ونرجع نقلبها في الحلة تاني .. وفورا نروح مغطيين الحلة عشان ريحه الثوم متروحش منها ..

هنطفي عليها بسرعه وهننتظر عشر دقائق كده ولا خمسه ونروح كاشفين الحلة تاني ومقلبينها تقليبتين بالكبشة بعدين نحط الكبشة فيها ( الكبشة = المغرفة يعني لغير الناطقين بالفرنسية ) ونغطي والكبشة محطوطه فيبقى الغطاء ( موارب ) بحيث يطلع البخار ..

لما نيجي نغرف طبعا بنقلب الملوخيه الاول قبل مانغرفها .. وتقدم مع الارز الابيض وبالهنا والشفا ومحدش ياكل صوابعه ويقول انتي السبب ..

شارك هذه المشاركه


رابط المشاركه
شارك

السلام عليكم و رحمة الله و بركاته

ليه و انا بقرا العنوان... افتكرت مشهد مسعودي و لينا.....أدوق و لا اشرب.....دي بتمشي يا لينا.... ايه ده مين طفي النور.... :happy:

اختكم بقي بلاف فخر.....بعمل ملوخية بتاعت مين طفي النور

و الله حاولت كتير جدا....بس عندي اختي الاصغر مني بتعمل ملوخية خرافية.....فعلا و حاولت اقف جنبها عشان انقش التفاصيل ما فيش فايدة

مش عايزة احبطكم....

استمروا

بس و انتوا بتجاوبوا....قولولي:

1- ايه احسن شوربة الدجاج و لا شوربة اللحمة ف الملوخية.

2- المجمدة و لا ام عروق.....ع فكرة في لبنان بيعملوها من غير ما يقرطفوا الورق....و انا افتكرتها سبانخ و قعدت آكل فيها قيمة ربع ساعة علي انها سبانخ لغاية ما حد قالي و انتي ايه رايك بقي في الملوخية.... :lol:

3- صحيح هو ممكن الملوخية ينضاف ليها كده معلقة تسبيكة.... اعرف واحدة كانت بتعملها كده....و كانت حلوة

4- لو طلعت طخينة....ينفع ازود شوربة؟؟؟

5-بمناسبة بقي اسرار الملوخية هو صحيح لو احنا بنخرطها و خلتيها ناعمة اوي ده يخليها ماسخة.؟؟؟؟ دي احد التفسيرات الفيزيقة الجبارة اللي اتقالت قبل كده في محاولاتي الانتحارية

هذا و الله الموفق

كان معكم

لماضة.....كبشة

شارك هذه المشاركه


رابط المشاركه
شارك

يا سلام يا ضحى والله تسلم ايدك

طب خدى بالك احسن اقر عليكى تيجى تعمليها المرة الجاية تطلع وحشة......بس انتى شكلك واثقة من طريقتك

بس بجد شرحتى من اول مانشتريها لغايت ماناكلها ولله تسلمى عالشرح البسيط الجميل

تخيلى بقى هقولك على حاجة بس ماتتخضيش........عشان ماتكلكعش معايا كنت بضربها بالمضرب اليدوى(السلك يعنى)

خيبة بعيد عنك

الف مليون مرة تسلم ايدك :lol:

لماضة تعالى اقعدى جمبى انا ولولا يا حبيبتى :happy:

ozoozo استنى شوية نتعلمها وبعدين نبقى نبعتلك حبة من عينينا حاضر.....انت تؤمر

شارك هذه المشاركه


رابط المشاركه
شارك

ياسلام يامدام ضحى فعلا دكتوراةوفن وهندسه

طيب ولو الملوخية ناشفه مش خضرة هتفرق طريقة الطبخ :happy:

شارك هذه المشاركه


رابط المشاركه
شارك

ولايهمك يافتفت خذي راحتك والطريقة دي على ضمانتي بجد لاني بعملها مرة في الاسبوع على الاقل الملوخية بالذات عشق بالنسبة لي لدرجه انها واحده من ثلاث حاجات برضه توحمت عليها وانا حامل وجه حظي حملت في وقت مفيهوش ملوخيه .. كانت ايام ..

باقي كام معلومه عن الملوخية سقطت سهوا في الطشة الي فاتت ..

1. بالنسبة للكلكعه فكرة المضرب مش بطاله بس خلي بالك متضربيش كتير .. بالنسبة لماما كانت بتفك الكلاكيع بانها تقلبهم وحده وحده بملعقه داخل الكبشة .. يعني تغرف الكلكيعه ف الكبشة وتقلبها او تفتتها بالملعقه وترجع تدلقها تاني .. عن نفسي بقلب الملوخية بـ ( مقصوصه ) او المغرفة المثقبة .. بقلب واضغط على الكلكيعه في جدار الحلة فتتفتت ..

2. الماجي حلوة مع الملوخيه لو الشوربة مش مركزه بس بتديها الى حد ما طعم مسكر شويه .. بعض الناس مبتاكلهاش غير بماجي .. عن نفسي بحطها بس لو الشوربة خفيفه لان الشوربة الخفيفة بتطلع ملوخيه مش حلوة لان الملوخيه ماهي الا شوربه اصلا ..

3. الثوم يكون مستوي كويس عشان مينفخش البطن وطبعا زي ماقلت قبل كده ميكونش محروق عشان ميغيرش الطعم .. النار الهاديه والتقليب المستمر بيساعد .. والكسبرة على فكره اجباري مش اختياري لو عاوزه الملوخيه تطلع حلوة ..

4. ماما بتعمل الملوخيه بالزيت في احيان كتير قال ايه هي ملعقة السمنه دي الي هتطخن .. بتحمر الثوم في ملعقة زيت وتصفيه كويس اوي .. ثاخذ الثوم وترمي الزيت .. انا مستحيل اعملها بزيت برغم ان طبخي كله بالزيت .. الملوخيه من الحاجات القليلة الي لازم فيها سمنه ومتكتريش .. ومتحطيش زبده برضه عشان هتنحرق منك قبل مالثوم يستوي ..

5. الملوخيه بتاخذ على النار من وقت ذوبانها في الشوربة اقل من خمس دقائق وتبقى استوت ..

6. الملوخيه السليمه تكون طازجه , بشوربة حقيقية مش ماجي .. لو عاوزينها معقوله ممكن نعملها مجمده او ناشفة على شوربة حقيقية ا والعكس طازجه على ماجي .. لكن لو عاوزينها فاشلة متتاكلش يبقى مجمده او ناشفة على ماجي ..

7. الاكلة المفضلة عند زوجي في الملوخيه هي فته الملوخيه بالرز ..نجيب خبز محمص وممكن عادي مش متحمص .. يقطع صغير ويفرد منه طبقه في صحن عميق ( بحب البايركس شكله حلو ) .. نصب كمية كويسه من الملوخيه على الخبز ونتركه شويه لغايه مايتشرب .. طبعا تكون الملوخيه ساخنة عشان تتشرب كويس .. نفرد طبقه وفيرة من الرز الابيض المستوي .. نساوي الوجه .. وتتاكل مع سلطة خضرا عباره عن طماطم ـ خيار ـ بصل مقطع صغير جدا ومنقوع دقائق في الخل ..رشة ملح ..

اكلتي انا المفضلة الملوخيه بالمكرونه ومحدش يسألني ازاي لان تقريبا انا بس الي بحبها ... ومش عاوزه اقولكم اني من حبي في الملوخيه عملتها قبل كده سندويتش :happy:

شارك هذه المشاركه


رابط المشاركه
شارك
ياسلام يامدام ضحى فعلا دكتوراةوفن وهندسه

طيب ولو الملوخية ناشفه مش خضرة هتفرق طريقة الطبخ :blush2:

الله يكرمك يارب يااستاذ رفاعي ..

بص هو انا مش خبيرة اوي في الناشفة يعني عملتها يمكن مرتين تلاته بس .. طبعا مبيكونش طعمها هو نفسه بس اهو فيها ريحة الملوخيه ..

لاحظت برضه ان الكمية اللازمه بتبقى اقل كتير من الطازه .. يعني بالملعقه بحطها .. اظن ثلاث اربع ملاعق بتكفي الحلة بس مش فاكره بقى المتوسطه ولا الكبيرة لان زي ماقلت لحضرتك معملتهاش كتير ..

برضه في حاجه اسمها ملوخيه مرسى مطروح .. دي مجففه وطعمها خرافي قريب كتير من الملوخيه الخضرا .. دي بذوقها عند خالتي بصراحه بتجيبها مخصوص من مرسى مطروح وسعرها اغلى من المجففه العاديه وفي فرق كبير او في الطعم ..

شارك هذه المشاركه


رابط المشاركه
شارك
بصي فافتفت ..

الملوخية دي احد ثلاث اشياء يتيمه بتتقنها والدتي حد الاحتراف والجنان والازبهلال كمان .. وبما اني اخذت عنها الطريقة الي هي اساسا مش وخداها عن والدتها وانما عن جدتها الله يرحمها ( شفت الجده دي تصدقي ) .. وبما اني وبلا فخر حصلت على دكتوراه الفلسفة في الملوخيه بعد ماتفوقت على ماما بذات نفسها وبطلت تطبخها وسابت لي المهمه دي .. فاسمحي لي ادلو بكبشتي قصدي بدلوي في الموضوع ده ..

بصي ياستي .. الملوخيه بتسقط لما تقعد على النار زياده عن اللزوم .. وقبل ماقولك الفترة اللازمه لذلك خلينا نبدا القصة من اولها ..

اول حاجه هنختار الملوخيه الي عيدانها قصيرة قدر الامكان ( بلدي ) ويكون ورقها مفرود وطري مش خشن او مثقب .. الملوخية الي عيدانها طويلة اوي زي الشجر او الي لها براعم تشبه قرون البامية كده بس على رفيع .. دي مش شرط تطلع حلوة في الطبخ .. وطبعا لو الورق ناشف ( خشن زي ورق الدفتر كده مفيهوش مرونه ) بيبقى طعم الملوخية مش كويس وكذلك لو الورق غامق اوي يميل للسواد .. احسن ملوخية هي الي في طولها تشبه الى حد كبير نبتة النعناع ..

هناخذ الورق نقطفه يعني نخلع ورقة ورقة من على الساق .. من اسرار الملوخيه انك تتخلصي من ( العنق ) وهو الجزء الي بيوصل الورقة بالساق .. الجزء ده بيغير الطعم كتير وبيزود ( لزاجة الملوخية ) عن نفسي بحرص اني ازيله تماما تماما يعني تقريبا مبسيبش ولا وحده ..

بعد ماقطفنا الملوخيه هتغسلي الورق كويس بإنك تحطيه في حاجة عميقة وتغمريه بالماء كويس .. بعدين ( تنشلي ) الورق في مصفاه وبكده نضمن ان الرمل والاوساخ نزلت في القاع .. كرري العملية مرة كمان او مرتين وممكن تتركيها في المية دقيقة او اثنين مش اكتر لانك لو ( نقعتيها ) ممكن هتروح فايدتها في المية . .

هنطلع الملوخية تنشف شويه على صينية .. زوجي كان بيقول نقلا عن حماتي انها لازم تترك تنشف في الضل . . وانا لان حماتي قالت كده فمش بنشفها من اساسه :blush2: .. الصراحه هي بتبقى افضل بكتير لو هتنشف بس بما اننا بنستخدم المفرمه الكهربائية فمش لازم تنشف اوي يعني دقيقتين تلاته تصفي ميتها على حاجه صينية او ماشابه بعدين نفرم .. عن نفسي لتسريع عملية التنشيف احيانا بحطها على ورق جرائد .. بس ده كان زمان دلوقت زي ماقلت لك بفرم على طول بدون مانشف .

هنحط الملوخيه في مفرمه الملوخية ( بستخدم فود بروسيسور براون وماما من عشقها للملوخيه جايبه مفرمه مخصوص لها بس كله بيؤدي الغرض ) هنحطها ونقعد نشغل المفرمه ونطفي ونشغل ونطفي ونضغطها بالملعقه لتحت عشان تنفرم كويس الى ان تفرم تماما وتبقى ناعمه خالص بس خلي بالك مش عصير .. في مرحلة الفرم لو انتي لم تزيلي الاعناق الي قلت لك عليها هتلاحظي ان في ( رغاوي ) اخضر فاتح ..

اول ماتطلعي الملوخيه من المفرمه هيكون لونها فاتح وكل ماتتركيها في الهواء هتسود .. برضه لو جمدتيها هتبقى سوده وفي كل الاحوال السواد ده لا يؤثر على الطعم بدرجه تذكر .. وبمناسبة التجميد لو هتجمدي يبقى جمديها وهي مفرومه .. بتوضع في كيس شفاف وتضغطي عليها بحيث تبقى ( الواح ) سميكه يادوب 1 سم .. تقفلي الكيس كويس او تثنيه وتلصقي ببلاستر وتحطي عليها تاريخ التعبئة وارمي على الفريزر ..

طريقة الطبخ بقى ...

اولا هنجهز شوربه وبالمناسبة الملوخيه بتبقى احسن كتير بالشوربة المركزة الي في نفس الوقت ( خفيفة الدسم ) يعني تجود اوي على شوربة الارنب لانها خفيفة بطبعها وفي نفس الوقت هي الحاجه الوحيده الي مبتبقاش حلوة اوي مع شوربة البط او الوز .. عن نفسي بحبها بشوربة الفراخ او الارانب هي الافضل زي ماقلت .. وخلي بالك في فرق مابين تركيز الشوربة في ان الماء نفسه بتاعها يكون قليل مقارنة بالبروتين وبين انها تبقى ( دسمه ) من حيث الدهن الي فيها كثير .. ده موضوع وده موضوع .. الشوربة المناسبة زي ماقلنا الي ملهاش دهون وفيها بروتين كتير ..

هنغلي الشوربة على النار .. عن نفسي ببقى عارفه بالنظر الكمية المناسبة .. لو مش عارفه هتاخذي شويه بس من الشوربة مثلا كوبايه ولا اثنين .. وتحطي الباقي على جنب هنزود فيهم ..

قبل مااحط الملوخيه بكون مجهزه الثوم .. ادقة كويس جدا .. اجهز مقلاه صغيره احط فيها ملعقة سمنة + الثوم المدقوق ناعم + رشة ملح بسيطه جدا + قليل من الفلفل + كسبرة مطحونة ..

هجيب الملوخيه لو خضرا واحطها في الشوربة المغلية ولو مجمده بحطها م الفريزر مباشرة على الشوربة بدون ماتمر بمرحلة اذابة ..

هقلب الملوخيه في الشوربة كويس لغايه ماكل الكلاكيع الي فيها تروح .. لو حسيتها محتاجه شوربة زياده افضل ازود شويه بشويه لغايه ماحس (من وزنها في الكبشة ) انها بتتقلب معايا بسهولة او انها وصلت السماكه المطلوبه .. اول ماذابت الملوخيه في الشوربة وقبل ماتغلي فورا بحط المقلاه بتاعت الثوم على البوتاجاز

اقلب شويه في الثوم على نار هادية طبعا وفي نفس الوقت بالمغرفة بقلب الملوخية .. بيقال ان السر في الملوخية في التقليبة دي .. بترفعي المغرفة لفوق وتدلقي الملوخيه الي فيها في الحلة تاني وتكرري .. بيقال ان ده بيخلي الملوخيه تغلظ وتبقى افضل في الطعم .. عن نفسي بعمل كده دائما وبيتهيء لي انها مش هتظبط غير لو اتقلبت كده ( وجدنا ابائنا على ذلك ) ..

مجرد ماتغلي الملوخيه غلوه وحده هنوطي عليها النار وفي هذه الاثناء بيكون الثوم اتحمر تقريبا .. نشيله بسرعه من عل النار قبل مايسود او يتحمر زياده والا هيبقى مر .. يادوب يبقى ذهبي ده المطلوب .. هنقلبه بسرعه على حلة الملوخية وناخذ تقليبة كده وناخذ كبشه ملوخية ونحطها على المقلاه تعمل طشششش .. ونرجع نقلبها في الحلة تاني .. وفورا نروح مغطيين الحلة عشان ريحه الثوم متروحش منها ..

هنطفي عليها بسرعه وهننتظر عشر دقائق كده ولا خمسه ونروح كاشفين الحلة تاني ومقلبينها تقليبتين بالكبشة بعدين نحط الكبشة فيها ( الكبشة = المغرفة يعني لغير الناطقين بالفرنسية ) ونغطي والكبشة محطوطه فيبقى الغطاء ( موارب ) بحيث يطلع البخار ..

لما نيجي نغرف طبعا بنقلب الملوخيه الاول قبل مانغرفها .. وتقدم مع الارز الابيض وبالهنا والشفا ومحدش ياكل صوابعه ويقول انتي السبب ..

الأخت الفاضلة / ضحى ..

كلامك كله جميل وسهل وواضح جدااا..

بس فيه حاجة ...

هو حضرتك ليه مش بتضعى فى شوربة الملوخية ....تحديقة ؟؟ ...او...الثومة كما يطلق عليها اهل القاهرة ؟؟

احنا لازم نضع تحديقة ثوم...وايضا..كثيرين لابد يضعوا ملعقة صلصة ....وان تعذر ذلك...نضع واحد طماطم فى الشوربة يعنى وهى بتتعمل ..ويفضل دائما شوربة الأرانب او

موزة الفخذ ..

بس ..حبيت اشارك ..

هنا..

لاتوجد ملوخية خضراء ...ولهذا استخدم الملوخية الناشفة (( لحد ما تخلص يعنى ...والصراحة افضل ملوخية ناشفة موجودة هى الملوخية ..الدمشقية ..او السورية ..

يعنى الصراحة ..خرافة ...واحلى من اغلبية الملوخية الخضراء ..وبجددد كأن عليها سكر ..

يعنى يبقى كوب الملوخية على حوالى لتر شوربة ..

والطريقة ..؟؟

هى نفس طريقة الملوخية الخضراء ....يعنى شوربة ...ثم..تحديقة وملعقة صلصة ...ثم نضع الملوخية وتقلب ..واول ما تبدأ تغلى ..نشيلها من على النار ...ونكون بنحمر الثوم مع الكسبرة الناشفة والفلفل الاسود والملح ...

وبالهنا والشفا..

شارك هذه المشاركه


رابط المشاركه
شارك

برضه حكاية ان الملوخية بتطلع طعمها حلو او لا...(( اقصد نفس نوع الملوخية الخضراء ))..

ده حسب الأرض اللى بتتزرع فيها ..

يعنى مثلا..

احلى ملوخية خضرا اكلتها عندنا فى اسكندرية ...(( كانت فى كنج مريوط ))..واحتمال لأن الأرض شبه صحراوية .

وطبعااا...حسب اللى مزروع جنبها ..

حد جرب الملوخية اللى مزروعة بجانب النعناع ؟؟..او الفلفل الأخضر ؟؟

شارك هذه المشاركه


رابط المشاركه
شارك
بس فيه حاجة ...

هو حضرتك ليه مش بتضعى فى شوربة الملوخية ....تحديقة ؟؟ ...او...الثومة كما يطلق عليها اهل القاهرة ؟؟

احنا لازم نضع تحديقة ثوم...وايضا..كثيرين لابد يضعوا ملعقة صلصة ....وان تعذر ذلك...نضع واحد طماطم فى الشوربة يعنى وهى بتتعمل ..ويفضل دائما شوربة الأرانب او

موزة الفخذ ..

شكرا استاذة سلوى على الاضافة القيمه . . فعلا اختي قالت مرة انها ارتدت وبقت بتعمل الملوخيه زي اهل والدي مابيعملوها بالطماطم او ( التسبيكه ) وبتقول انها كده احلى بكتير بس انا لسه على عهدي مع والدتي وبعملها بطريقتها بدون اي اضافات ..

سؤال بقى بعد اذن حضرتك .. يعني ايه تحديقة ؟

شارك هذه المشاركه


رابط المشاركه
شارك

أهلا يا ماما سلوى منورة الموضوع بملوخيتك اللى اكيد طبعا تحفة من ايد حضرتك

بصى حضرتك انا امى كانت بتقشر اد خمس فصوص توم وتحطه مع الملوخية وهى بتخرطها

لو هى دى التحديقة اللى حضرتك تقصديها يبقى احنا فعلا بنعمل كده

لكن عمرى ماجربت الملوخية الناشفة غير الصعيدى بس اللى كانت جدتى بتجيبها فى الموسم بتاعها وتقطف كمية كبيرة وتنشفها

برضو طعمها حلو وهى دى اللى فعلا كانت امى بتعملها فته ملوخية ذى طريقة الفته بتاعة ضحى كده

شارك هذه المشاركه


رابط المشاركه
شارك

مش قادر أمسك نفسى من الضحك ..

ليه بقى؟

عشان افتكرت مرة زميل لنا فى الشغل هيموت وياكل ملوخية .. قلتله تجيبها وتعملها الزاى

جه تانى يوم يقولى طلعت توحفة تووووووووحفة ما حصلتش أحسن من اللى مراتى بتعملها

قلتله بجد؟ ولا بتهرج حلف بالله العظيم انها طلعت مالهاش حل

قلتله أصلى عمرى ما عملتها ههههههههههههههههههههههههههههههههههههههههه

وفعلا عمرى ما عملتها

تم تعديل بواسطة بندق أفندى

شارك هذه المشاركه


رابط المشاركه
شارك

طريقة مدام ضحى ممتازة

بس ايه رأيكم لو ننبشر عليها نصف طماطماية مستوية؟

دى طريقة جدة أمى الله يرحمها .. انا حضرتها (توفاها الله عن عمر 104 سنة)

كمان شافت ابن أختى هههههههه

شارك هذه المشاركه


رابط المشاركه
شارك

يجب ان يتم الموافقه علي هذا المحتوي قبل نشره.

زوار
انت تقوم بالتعليق كزائر. اذا كنت تمتلك حساب فقم بتسجيل الدخول تسجيل دخول.
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


×