اذهب إلى المحتوى
إنشاء باب جديد بعنوان سد النهضة الإثيوبي لكل الموضوعات المتعلقة بسد النهضة ×

استشارة في تخصصات كلية الهندسة


Recommended Posts

الاعزاء أعضاء المنتدى

احب اخد رأي حضراتكم في اقسام كلية الهندسة من حيث توفر مجال العمل بمصر او الخارج.وكذلك امكانية الجمع بين العمل الغير اكاديمي الى جانب دراسة الماجستير والدكتوراه ان شاء الله

الميول الشخصية للحاسب والاتصالات قبل دخول الكلية وهى من الاقسام المرشحة حاليا بس بدأت فكرة لامانع من عمارة او غيرها

وطبيعة الشخصية لاتميل للعمل مع جمهور كتير زى المهندس المدني مثلا؟ وهل الميول الشخصية دي ممكن تتعدل مع النضج ولا لأ

والشخصية طموحة تتمنى تدرس بالخارج والخارج ده أوروبا وأمريكا

وايه هي مميزات وعيوب كل قسم من وجهة نظركم

اكيد الدراسة وحدها لا تكفي فايه النصايح للطالب يعملها خلال دراسته بحيث لما يتخرج يكون مستواه اعلى ومواكب لسوق العمل

بانتظار مشاركتكم

ولا خاب من استشار

وشكرا

رابط المشاركة
شارك

الأخ الفاضل

موضوع حيوى وفعلا يستاهل المناقشة ، انا بطلب المساعدة من الاخوة الاعضاء الكرام فى تخصص هندسة البترول ، بالنسبة لفرص العمل فى مصر مطلوب ، وممكن يحصل على وظيفة بسرعة ولا مش مطلوبين بالنسبة لابنى . هو حاليا بيدرس اول ترم فى هندسة فى الجامعة الاسترالية . بس الاسترالية بتدى دبلوم هندسة النفط والغاز اولا وبعدين يكمل سنتين بكالوريوس ، فهل ممكن انه يكمل بكالوريوس فى جامعة بمصر ، وايه الجامعات اللى ممكن يقدم فيها .

وممكن يلاقى فرصة عمل بسهولة ، يعنى مطلوبين لسوق العمل .

الرجاء من الاخوة الاعضاء الكرام المساعدة .

وشكرا للجميع .

رابط المشاركة
شارك

السلام عليكم

لو الشخصيه زي ما حضرتك بتقول لا تميل للتعامل مع الجمهور ..... يبقى لابد يركز في إنه يعمل في المجال الأكاديمي ( دراسات - بحوث- ممكن تدريس لو استطاع)

أما سوق العمل الهندسي في أي تخصص فهيكون فيه تعامل مع الناس سواء مهندسين آخرين أو فنيين أو مشرفين تنفيذيين أو حتى عمالة ماهرة أو غير ماهرة.

بالنسبة لترتيب سوق العمل في الخليج مثلاً :

1- هندسة الإتصالات .... خاصة نظم التحكم ...و ده علشان مشاريع المطارات و الموانئ و المترو اللي كل دول الخليج دلوقتي بتتسابق علشان يكون عندها البنية التحتية دي.

2- تخصصات الحاسب الآلي و بالترتيب (شبكات-تصميم مواقع -برمجة)

3- الهندسه المدنيه ( لكن يجب أن يكون ذو خبره ويفضل المتخصص في إدارة العقود الهندسيه- التخطيط الزمني- هندسة رقابة التكاليف...) أي ليس مفهموم المهندس المدني الي يقف في الموقع طوال النهار ويزعق في العمال.

4-هندسة البترول (خاصة الحفر - التحكم)

5- هندسة الميكانيكا ( قوى- موائع)

6- هندسة كهرباء قوى

7- هندسة مدنيه - تصميم إنشائي

أما بالنسبه للهندسه المعماريه .... فلا أنصح بها على الإطلاق .... لأن المنافسه شديده جداً من مختلف دول العالم في هذا المجال .... و هي مجال فني إبداعي أكتر من كونه مجال هندسي ( بمعنى أبسط هو تخصص لا يعتمد على الرياضيات و التي هي العنصر الأساسي في مختلف التخصصات الأخرى)

أيضاً يوجد تخصصات غير تقليدية مثل:

- هندسة الأجهزة الطبية ...لكن لن تصدقني إذا قلت لك أن أحسن سوق عمل في الوطن العربي في هذا المجال هو في مصر ...و تليه السعودية ...ولا يوجد أسواق أخرى( في الوطن العربي)

- الهندسة البيئية ...دول غالباً بيكونوا خريجي مدني ثم دراسات عليا في مجال البيئة.

- الهندسة الساحلية و الموانئ ...... مطلوبين برضه في دول الخليج.

أتمنى أني أكون وضحت الصوره شوية ...و كشفت بعض الغمام .

و في النهاية أذكر بقول الله تعالى " وَفِي السَّمَاءِ رِزْقُكُمْ وَمَا تُوعَدُونَ"

تم تعديل بواسطة matzakos
رابط المشاركة
شارك

اختلف تماما مع الاخ متزاكوس

وللعلم مبدئيا جميع اقسام هندسة ممتازة.........ولكن هناك عاملين رئيسين فى الاختيار

1- طبيعة الدراسة لكل قسم ( وامكانية ان الشخص يمشى فيها بسهولة)

2- طبعا انه يكلع يلاقى بيها شغل

الاقسام حسب الاقبال وفرص العمل

كهرباء قوى ( لا يكاد يخلو اى منشأة من مهندس كهرباء وذلك لاتساع مجالات التخصص الفرعى

مثل التحكم الالى- هندسة الجهد العالى ومحطات الكهرباء- الاستشارات الهندسية فى المبانى والتركيبات- وشغل المصانع والمكن وحاجات كتير)

اتصالات وهو موجود ولكن فرصه فى مصر قليلة

مدنى وهو من اكثرهم عملا فى الخليج

ميكانيكا يكاد يقترب من كهرباء

معمارى شغله مش قليل ولا حاجة

بترول يحتاج واسطة جامدة جدا فى مصر وخبرة مش قليلة فى الخليج

رابط المشاركة
شارك

جيد كل الكلام اللى اتقال .. لكن فيه الدراسات الواقعية ..

قبل 5 سنوات احد جمعيات خدمة المجتمع نظمت 5 محاضرات لطلاب الثانوية العامة (سنة حصول ابنى عليها)

شرحو لهم بشكل عام الوضع الاقتصادى واتجاه سوق العمل

ثم التخصصات المطلوبة

ثم الدراسة الواجب الحصول عليها

ثم كيف تعد نفسك لسوق العمل

وانتهى ابنى وقتها الى اجتيار قسم الميكاترونكس تبعا لهوسه بالسيارات والكمبيوتر فى آن واحد

رابط المشاركة
شارك

الاختلاف في الرأي لا يفسد للود قضية

الترتيب اللي أنا حطيته راعيت فيه ترتيب الرواتب

و للعلم ...صحيح المهندسين المدني كثير في الخليج ...لكن نسبة بسيطه منهم هي اللي بتاخد رواتب عاليه ...و النسبة دي هيا اللي قولت عليهم إما حاسب كميات أو مدير مشروع أو مهندس تخطيط أو رقابة تكاليف.

مهندسين الكهرباء قوى ...مش مطلوبين بالصورة اللي حضرتك صورتها ..... هاضربلك مثال ....مشروع مترو دبي مثلاً ...إنظر لعدد مهندسي الاتصالات اللي اشتغلوا فيه و قارنه بمهندسي القوى ....سواء من الاستشاري أو المقاول....

و بعدين الهندسه المعماريه ..... أنا تعاملت مع معماريين من جنسيات مختلفة ومكاتب عالمية ..... ناس دارسه عمارة بمفاهيم عاليه جداً ....و يحسسك إن العماره دي فن راقي ....فاذا كان الطالب عنده توجه وحس فني عالي ...ممكن يصقله بالدراسه ...لكن في النهاية المنافسه صعبه جداً لوجود معماريين ( فنانين) جامدين قوي

دي كانت وجهة نظر.

رابط المشاركة
شارك

انا مهندس اتصالات وكنت من المعجبين بالمجال لدرجه الهوس وايامي كانت التكنولوجيا ف قمتها المهم

ما اريد ان اوضحه اختيار التخصص بيعتمد ع تركيبة الشخص

مدني من التخصصات الجميلة وفرص عمله كثير وتمتاز بامكانية ان ممكن يكون لك عملك الخاص وتشتغل مع نفسك وده بعد شويه خبره ومع راس مال معقول وتنطلق

ميزته انا بشوف صحابي انه مش محتاج تطوير اذ اكان الشخص لايحب التطوير يعني اللي اقصده مفيهوش جديد كتير ع حد علمي وبالتالي خلصت كليتك تبدا حياتك وتشتغل

عكس اتصالات والتخصصات المرتبطة بالتكنولوجيا كل يوم فيه جديد

اما اتصالات فانا حبيته عشان فيه كل يوم جديد صحيح بندفع تمن ده محتاج تقرى وتتابع الجديد يعني ده مشكلة مش اكتر

لكن فرص العمل اللي شايفه ان مدني فيه طلب كتير عليه

والرزق ع ربنا

رابط المشاركة
شارك

بص ادرس اللى انت حابه وسيبك من سوق العمل لان سوق العمل كل يوم فى الحال

بس لو عاوز تلعب فى المضمون خليك فى هندسه مدنيه لان دى مطلوبه على طوووول

بس فيه بقى حاجه لازم تاخد بالك منها لو معاك شهادة هندسه بس بدون لغه وكمبيوتر وسيمات شخصيه

يبقى مع احترامى ليك هتبقى مهندس من ابو بلاش

لازم تكون محترف كمبيوتر فى مجالك يعنى

معاك لغه تمام مش بتعت الثانويه العامه

السيمات الشخصيه ودى ممكن تتقنها بدورات التنميه البشريه

كل دول هيفرقوا معاك بدل لما يبقى مرتبك 3000 هيبقى عشر الاف مثلاً

وفيه بقى حاجه لازم تاخد بالك منها لان كل المهندسين اللى لسه متخرجين بيصعبوا عليا

انك فى بداية شغلك هتتبهدل بجد لحد لما تاخد لقب مهندس سيبك من لقب الكليه انا بتكلم علشان تبقى مهندس فى شركه ولا مصنع هيطلع عينك وهتتعب لازم يكون عندك استعداد نفسى للوصول

هى الفتره مش كبيره يوم لما بطول قووى هيبقى سنتين

بس هتفيدك كتير قوووووووووووووى بعد كده

رابط المشاركة
شارك

بسم الله الرحمن الرحيم

الأخ الكريم / اليوم السابع

تحية طيبة وبعد 000

عليك بالآتي :-

قسم الهندسة المدنية ( شعبة خرسانات / طرق / إنشاءات ) + تدريب في شركات المقاولات أثناء الدراسة + كورسات لغة + كورسات كمبيوتر و خاصة برنامجى الأوتوكاد و البريمافيرا + دورات في جودة الأعمال + تقدير إمتياز + لباقة في الشخصية = العمل في كبرى شركات المقاولات في مصر أو في الخارج و صدقني و بدون أن تحتاج أي واسطة 0

أخي الفاضل

أنا أعمل مهندس في أكبر شركة مقاولات في الشرق الأوسط و إذا توفر في الشخص المتقدم للوظيفة ما سبق و أن ذكرته يتم تعيينه فوراً 0

خالص تحياتي

مهندس / أشرف محمد

رابط المشاركة
شارك

مشروع المهندس اليوم السابع،

بص يا سيدي، انت بتتكلم في نقطة كنت في يوم من الأيام فاتح مكتب استشارات مرتبط بيها ولكن يخاطب حديثي التخرج من الجامعة والباحثين عن عمل، ولكن قررت أن أرتبط بعمل مستقل إلى جانبه في شركة نظم معلومات:

http://sites.google.com/site/newegypthr/

شوف بقى:

فيه نقطة بس إن الجامعات الحكومية على حد علمي يكون اختيار القسم طبقا لنتائج امتحاناتك في السنة الأولى (إعدادي)..

نرجع لموضوعنا،

انت ذكرت أنك لا تميل للعمل مع جمهور كثير العدد، ودي نقطة محتاجة توضيح، هل مثلا أنت شخص خجول، أم تهاب الحديث أمام الناس، وبعدين مفيش حاجة اسمها لا أميل للعمل مع جمهور كثير العدد، إلا لو أنك تقصد أنك تحب ان تعمل في مكان يكون هنالك شخص أو اثنان تتعامل معهم وكفى مثل محاسب في شركة يتعامل مع بضعة موظفين داخل الشركة في تسليم الرواتب والعهد ودفع الفواتير ودمتم والسلام عليكم، في هده الحالة يا أخي العزيز ارجو أن تراجع نفسك وتقوي مهاراتك الاجتماعية لأننا في زمن يجب أن تتعامل فيه مع أطياف من الناس واللغات والأديان والثقافات، خصوصا لو كنت تطمح للعمل في شركة كبيرة وراتب مجزي، أو لو كنت تطمح في المستقبل لبدء نشاط مستقل.

أنا لي تصور لأهمية انتقاء التخصص الدراسي بعناية وضعته في مدونتي:

http://3ayezjob.blogspot.com/2010/01/blog-post_31.html

ولكن دعني أختصر لك نقطة مهمة: هي أن تحرص على أن تكون مبدعا في مجال عملك، أيا كان عملك، فحينئذ ستحقق النجاح على كافة الأصعدة بإذن الله، فالبقال المبدع يحب الناس أن يشتروا بضاعتهم منه، والمهندس المبدع يحب الناس أن يوكلوا إليه أعمالهم، والمدرس المبدع يحب الآباء أن يرسلوا أولادهم إلى المدرسة التي يدرس بها.

مجال الاتصالات هو قطاع ينمو بشدة خصوصا في المنطقة العربية وفرص العمل فيه متوفرة، وكلما كنت متميزا مهنيا ولغويا زادت فرصك في عمل متميز، أنا خريج قسم الكترونيات واتصالات دفعة 2006م وهو قسم أحببته من أحد أصدقاء والدي كان في مركز أبحاث بأمريكا وكان يحكي لي دوما عن الابتكارات الالكترونية التي كانت تبهرني وأنا في الثانوي حين يرويها لي، وكنت الحمد لله متفوق في الرياضيات ودخلت كلية الهندسة قسم الكترونيات واتصالات.

مجال الهندسة المدنية هو فعلا ليس فيه تغيرات كثيرة والتكنولوجيا التي فيه لا تتغير بشكل متسارع مثلما هو حال الاتصالات مثلا، وبالمناسبة هندسة الالكترونيات والاتصالات هي باب واسع للدخول لمجال الأجهزة الطبية.

أؤكد مثلما فعل الزملاء على أهمية التدريب الصيفي، وصقل المهارات، وخصوصا في مجال التعامل لو كنت من أبناء العاملين في الخارج فالحياة الاجتماعية في الخليج مختلفة تماما عن الحياة الاجتماعية في مصر.

في الحقيقة هنالك نقاط متعددة يشملها تساؤلك، فمثلا هنالك مهندس مدني في شركات الكهرباء ولكن وظيفته لا تتعدى عادة بناء القواعد الخرسانية لأبراج الضغط العالي، وهنالك مهندس مدني آخر في شركة أوراسكوم مثلا ووظيفته تشمل إدارة حي كامل ضمن مشروع مدينة سكنية متكاملة مثلا، فعليك أن تلاحظ أن المهنة الواحدة لها مجالات عمل متفاوتة، وعليك أن تختار ما يناسب ميولك وطموحك وظروفك الشخصية،

جزئية الدراسة بالخارج لست أدري ماذا تقصد، هل تقصد مرحلة ما بعد الجامعة كالدراسات العليا، فأنا لا أنصحك إلا لو كنت تهوي السلك الأكاديمي بحيث تختار تخصصا تتفوق فيه وتترقى أكاديميا، أو لو خضت معترك الحياة العملية وأحببت أن تدرس مثلا ماجستير إدارة الأعمال فهذا شيء طيب، لكن أن والله تشتغل في شركة اتصالات ثم تدرس ماجستير هندسة اتصالات فأنا شخصيا ضد هذا التوجه لو كنت تريد أن تستقر في مصر لأن الأبحاث مكانها شركات في الخارج، وبالتالي طالما لا تريد أن تعمل في الجامعة ولا في مراكز أبحاث علمية فالماجستير العلمي التخصصي لا داعي له ودي وجهة نظري.

لو لديك استفسار آخر فمرحبا بك، وأحييك على حرصك على السؤال، وعايزك تسأل أكثر من واحد وتشوف في محيط العائلة والأقارب والمعارف، اسأل ولا مانع حتى من أن تذهب للكلية وتسأل أستاذا هنالك مثلا، وكما يقولون في القوات المسلحة: التدريب في السلم يوفر الدم في الحرب، فأنت الآن اسأل ولن تخسر شيئا وبالعكس، ستتضح أمامك الأمور أكثر وأكثر، ويبقى فقط النية الطيبة وبر الوالدين والدعاء وربنا يوفقك:ninja:

تم تعديل بواسطة abdulmuttaleb
رابط المشاركة
شارك

السلام عليكم

مبدئياُُ السمات الشخصية بتتغير تماما بطبيعة الحياه الجامعية وطبيعة الدراسة.

يعنى لو دخل مدنى حتبقى سماته الشخصية فى بكارليوس سمات مهندس مدنى, وبالمثل لو دخل ميكانيكا حيتكلم بطريقة مهندس ميكانيكا.

لان دراسة الهندسة بتطغى على سمات الشخية وطريقة التفكير بتختلف من المهندس الى غيره وده مش تحيز للمهندسين.

اعمل دكتور مهندس مدنى بالسعودية والسوق محتاج الى مهندسين مدنى وسيظل ذلك

المدنى تخصصات - انشاءات مبانى وغيرها -كبارى- طرق - ادارة مشاريع- ميله وسواء تصميم او اشراف او تدريس ولو نظرنا مستقبلاُ للمنطقة العربية حنالاقى ان تخصصات مدنى مرتبطة بالنية التحتية والازمة العقارية اللى فى الشرق الاوسط بما فيها مصر.

ميزة قسم مدنى ان مفاتيح الشغل ليه كثيره وفروعه اكثر ولا يتاثر بالازمات لان الناس لازم تسكن ولازم الناس لازم تلاقى شوراع وكبارى.

بمعنى اخر دخول قسم مدتى مجرد بداية بعدها بيحدد مجال عمله تصميم اشراف دراسة عطاءات ادارة مشاريع واى حاجه فى دول التفوق فيهم ليه سعره

هناك اقسام اخرى كويسه بعد مدنى

مثل اتصالات- حاسبات- وبلاش الاقسام الشاذه زى طبيه وطيران

واخيرا المستقبل والرزق بيد الله سبحانه وتعالى , وربنا يلهمكم ويلهمنا طريق الصواب

وتمنياتى بالتوفيق

رابط المشاركة
شارك

السلام عليكم

شكرا بجد لكل الاخوة الافاضل بمشاركاتهم القيمة

والموضوع يخص المحروس ابني مش انا شخصيا

وهو مش انطوائي ولا حاجة بس زى ماتقولوا كده جنتل مان ويمكن التعامل مع العمال والحرفيين مع احترامنا للجميع كما في مجال المهندس المدني يكون صعب شوية عليه لكن اكيد مع الزملاء او الجمهور العادي مفيش مشكلة كما اراه مع اصحابه وربما اكون مخطىء في تقديري

والحمد لله اللغة عندة كويسة مقارنة بزملاءه وهو طموح وتفكيره عالي فهو مثلا لا يحب السلك الاكاديمي ولكن عايز يشتغل بايده في مجاله لاكتساب الخبرة العملية ويصقلها بالدراسات العليا

هو من قبل دخول الكليه ناوى على قسم حاسبات بس بدأ يفكر في أقسام اخرى وهذا النضج اللى المفروض يكون عليه ولا يحصر تفكيره في اتجاه واحد فقط وانما يستفيد باراء الاكثر خبرة ويستكشف الواقع ويستشرف المستقبل -ظريفة- وربنا يكتب له وللجميع الخير ويوفقه وهو ابناءكم جميعا

وشكرا

رابط المشاركة
شارك

السلام عليكم

الشكرا الجزيل لكل الاخوة الافاضل بمشاركاتهم القيمة

لكن ياجماعة بالنسبة لابنى اتمنى الاستفادة من خبراتكم مع ابناءكم وسؤالى هو

- ممكن ابنى بعد دبلوم الجامعة الاسترالية يكمل فى جامعة مصرية بكالوريوس ، فى تخصص النفط والغاز ياريت لو اى حد موجود فى مصر يقدر يفدنا ، وهل الجامعة الاسترالية معترف بيها فى مصر ، هى معترف بيها فى كل دول العالم بس مش عارفة بالنسبة مصر .

الله يفرح الجميع باولادهم .

وشكرا

رابط المشاركة
شارك
  • 2 weeks later...

راى الشخصى هو كالاتى الرزق بيد الله وهو امر مقدر من قبل ان نولد لذا الواحد يختار القسم الللى بيحبه

وبالمناسبة من 10 سنين تقريبا كان ترتيب الاقسام كالاتى على حسب التقدير فى اعدادى

1-هندسة النظم والحاسبات 2-اتصلات3-كهرباء قوى 4-مدنى 5- بترول وتعدين 6-ميكانيكا

واظن الان الوضع قد يكون مختلف قليلا وبالمناسبة ان كنت تخصص حاسبات والان عملى هو مهندس كهرباء قوى :lol:

رابط المشاركة
شارك
من حيث توفر مجال العمل بمصر او الخارج

كان مهندس مدني مطلوب أكثر من غيره...

حاليا وخصوصا بعد الأزمة المالية مابقتش فارقة السوق نايم علي مهندسين مدني تحديدا...

بالمناسبة لو دخلت كهرباء او ميكانيكا وقررت تشتغل في مجال الانشاءات بعدها (مهندس كهرباء انشاءات) تبقي عامل حسابك ان مديرك هايكون مدني smk: وده حقه طبعا

مدني وعمارة مش أقسام مخترعين دي أقسام تطبيق نظريات افتراضية قديييييييييييييييييييمة جدا

لكن لو تحب تحس انك فعلا مهندس يبقي عليك وعلي قسم اتصالات او كهرباء قوي او ميكانيكا قوي مثلا

والاقسام دي بيفيد فيها جدا انك تعمل pg لانها اقسام علمية مش زلطية رملية :P

أخي الفاضل وزميل المستقبل ، ان ماذكرته سيادتك عن تركيبة شخصيتك قد يكون حاليا أو مستقبلا عائقا ضد كونك مهندس مدني حيث يحتاج مهندس مدني في بعض لحظات العمل أن يكون (سوابق) :roseop: :roseop:

نصيحة لوجه الله صلي استخارة واسأل من هم في عائلتك من المهندسين او جيرانك وستجد ان كلامي صحيح لدرجة كبيرة

طبعا التدريب خلال سنوات الدراسة ولو مجانا مش مهم ادفع فلوس واتعلم في شركات كويسة

مدني ؟ :lol:

عمارة ؟ :roseop: أدبي هندسة القسمين دول والله :roseop:

رابط المشاركة
شارك
  • 7 years later...

انشئ حساب جديد او قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    لايوجد أعضاء مسجلون يتصفحون هذه الصفحة

  • محاورات مشابهه

    • استشارة

      السلام عليكم اعمل في السعودية منذ 17 سنه وكانت الحياه جميله حيث ان اولادي كانوا معي ولكن نزلوا نهائي منذ 3 سنوات واصبحت الحياه صعبة بدونهم وهم يلحون علي في العودية بشكل نهائي لان الاولاد بدأت مشاكلهم العادية وزوجتي غير قادرة علي ادارة الامور معهم مع العلم اني  املك بيت ومحل مؤجر ومبلغ قليل من المال في مصر و ليس لدي وظيفة في مصر وافكر في العوده وعمل اي مشروع ولكني متخوف من القرار لان مجال خبرتي بعيد عن مصر ارجوا النصيحه

      في موضوعات شخصية

    • استشارة قانونيه فى عقد شراء شقة تمليك

      الحمد لله اشتريت شقة تمليك ومكتوب فى العقد بنود وهى : شامل نصيبه من الارض المقام عليها العقار فى وسط الكلام ... وتبلغ مساحة الشقة موضوع البيع كذا .. تقريبا تحت العجز والزيادة وبناء تمثل كذا قيراط من 24 قيراط مشاعة فى كامل ارض وبناء العقار ..هى مكونه من .... الخ .. وده بند اخر مذكور ايضا فى وسط الكلام ... وهناك بند ثانى يقول يتحمل الطرف الثانى( المشترى ) بنصيبه فى تكاليف حفظ الأجزاء المشتركة وصيانتها وادارتها وتجديدها ويكون نصيبه فى هذه التكاليف بنسبة قيمة حصة الشقة موضوع البيع فى الأجزاء المش

      في القوانين والقضايا

    • حلم السفر للعمل بالخارج مميزات وعيوب( استشارة )

      السلام عليكم  ما خاب من استشار  محتاجه رأي أهل الخبرة  انا خريجة 2017 كليه تمريض أخصائي تمريض بعد عناء خمس سنوات الحمد لله  انا حاليا تم تعييني في مستشفيات الجامعه  ومحتاره جدا في قرار السفر نفسي اسافر واعمل إنجاز قبل ما السنين تجري بيا واحس اني معملتش حاجه  وف نفس الوقت قلقانه اسافر مرتحش من المعامله والأسلوب وابقي اتدبست في عقد عمل  محتاجه اعرف رايكم ايه الاحسن هل في أماكن كويسه بره مصر والخوف اللي جوايا مش اكتر من وهم جوايا الخوف من التغيير والسفر   ولا

      في المغتربين المصريين - egyptian expatriates

    • استشارة قانونية … تغيير الإسم الخامس في السجل المدني !

      بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين السلام عليكم ورحمة الله وبركاته فيه خطأ في بطاقتي الشخصية في الاسم الخامس لما رحت أطلع بطاقة رقم قومي من 12 سنة كتبت اسمي واسم العائلة زي مانا عارفه وحافظه الموظفة لم تأخذ بما كتبته في الاستمارة بل أخذت بما استنتجته بعبقريتها الفذة من شهادة الميلاد القديمة الي كانت مكتوبة بخط زي خط الروشتات الطبية :lol: ولما استلمت البطاقة واكتشفت الخطأ ده سألتها عن السبب قالتلي انها قرأت الا

      في موضوعات شخصية

    • تجربة العمرة بالسيارة-استشارة مغتربي الرياض

      ان شاء الله طالع مع اهلي رحلة عمرة اخر الاسبوع بالسيارة واول مرة نعملها حبيت اعرف كام حاجة مثل ايه انسب مكان لركن السيارة واحسن وقت للانطلاق وناخد ايه من الرياض واحنا طالعين وومسافة الطريق لو همشي على 150 مثلا تكون وقت قد ايه احنا صد رد يعني مش هننزل بفندق يدوب نعمل عمرتنا ونرجع هل فيه زي ما سمعت مواقف جديدة مجانية عملاها امانة مكة للقادمين وايه المشاكل اللي ممكن تواجهنا بالطريق مع الشكر للجميع

      في موضوعات جادة

×
×
  • أضف...