اذهب إلى المحتوى
محاورات المصريين

إعلان إداري بخصوص باب الحياة و الهجرة الي كندا


Scorpion

Recommended Posts

ومين اللي اتكلم عن ربح مادي يا استاذ محمد

إحنا عارفين كويس إننا لا مساهمين بأموال ولا حاجة وعارفين كويس إن المشرفين متبرعين بوقتهم ومجهودهم

لكن فيه ربح من نوع تاني

ربح معنوي له أكتر من صورة

والربح ده كل واحد مننا حس بيه بعد ماعرف المحاورات

وخاصة اعضاء باب كندا اللي بيساعدوا بعض بحب ومش مستنيين اي مقابل لا مادي ولا غير مادي

إللي ممكن الواحد فيهم يضيع 3 ساعات من وقته علشان يطلع لينك مفيد لغيره

اللي بيدعوا لبعض بالتوفيق في المقابلات ويتمنوا يسمعوا اخبار حلوة تبشر بنجاح او استلام رقم ملف اوتحديد ميعاد مقابلة

هوكل ده مش ربح ؟

حبنا للمنتدي وانتمائنا ليه واعتباره من الاساسيات في حياتنا كل ده مش ربح

ده انا لما بخرج مشوار وغبت فيه شويه مبستناش ارجع البيت واعدي علي اي نت كافيه في سكتي علشان ابص بصة

يبقي ده مش ربح ؟

أنا عايزة اقول حاجة لحضرتك ولكل المشرفين

فيه ناس مقابلاتهم الاسبوعين دول وعلي فكرة انا مش منهم

فياريت متشيلوش ذنب حد فيهم

تحياتي واحترامي

40d2a7ecd8.gif

رابط هذا التعليق
شارك

  • الردود 111
  • البداية
  • اخر رد

أكثر المشاركين في هذا الموضوع

أكثر المشاركين في هذا الموضوع

فيه نقطه احب اوضحها لحضرتك كمان

دكتور حسام لما قال كده ده دليل علي حبه للمنتدي وتمسكه بيه

لأن المنتدي لو كان لا يعنيه في شيء لا كان قال اليكسا ولا غيرها

زي بالظبط لو واحدة زعلانة مع جوزها وعايزة تسيب البيت لومش عايزها وماصدق هيفتحلها الباب بنفسه

إنما لو باقي عليها ومتمسك بيها هيقولها لو خرجتي تبقي طالق مش علشان هو عايز يطلقها

لاء ده علشان متمسك بيها ومش عايزها تخرج

وهو ده اللي عمله دكتور حسام

مش عايزها تخرج

40d2a7ecd8.gif

رابط هذا التعليق
شارك

أشكر الفاضلة ضحى على مقترحاتها الممتازة

بالنسبة للمقترح الأول الخاص بإنشاء فهرس لموضوعات كندا فقد تمّ بالفعل إقراره من جانب الإدارة وبدأت العمل به ولكني سأتركه مختفيا لحين الانتهاء من معظمه... لكن بجانب إنشاء هذا الفهرس فإنني أقترحت أن يكون فتح أي موضوع جديد في باب كندا بالتنسيق المسبق مع مشرف الباب لضمان أن يكون عدد المواضيع في الباب معقولا ويمكن إدراجها في فهرس بطول مناسب لئلا يصبح الفهرس في النهاية عديم الفائدة.

بالنسبة للمقترح الثاني فقد ناقشنا إمكانية فصل مداخلات الشات في مواضيع منفصلة بل في باب فرعي منفصل إسمه (ملتقى المصريين في كندا) ... ولكن هناك عدة اعتراضات على هذا المقترح من الإدارة:

1- فصل مداخلات التهنئة والشكر والتحية سيجعلها منقطعة الصلة بالسياق التي وردت به وبلا معنى.

2- أن هناك أبواب في المنتدى موجودة بالفعل للموضوعات الخفيفة والشخصية والاجتماعيات والرياضة وغيرها ... وأي نقاش حول هذه الموضوعات يمكن أن يتم في الباب الصحيح ... السؤال الذي طرح هو لماذا يصرّ بعض مرتادي باب كندا على تجاهل باقي أبواب المنتدى وحصر أنفسهم في باب كندا.

3- هناك رأي يقول أن الشات عموما ليس من أهداف هذا المنتدى خصوصا من نوعية (أزيكم ... سلامات) وخصوصا إذا أصبح الإضافة الوحيدة على موضوعات استنفذت أغراضها مثل سرد التجارب الشخصية التى يشير اليها البعض بال (قهاوي).

4- وطبعا اعتراض بعض الأعضاء بالمطلق على فصل هذه النوعية من المداخلات والتأثير السلبي للمشكلات المرتبطة بهذا الإجراء يجب أخذها بعين الاعتبار.

عموما مازلنا نناقش الأسلوب الأمثل للتعامل مع مدخلات الشات والمداخلات التي لا علاقة لها بالهجرة الى كندا والحياة بها ... وسنبلغ الأعضاء بالقرار الذي ستتخذه الإدارة بهذا الشأن في حينه.

أما مسألة أن يكون من يفتح موضوعا هو مشرفه فمسألة غير ممكنة التطبيق وسيفتح الباب للشللية والتحزبات كما رأينا في بعض الموضوعات بالفعل ... يمكن بالطبع أن يكون هناك عضو أو أكثر يقودون الحوار وهذا شئ طبيعي ولا يمكننا التدخل فيه ... ولكن الأفضل أن يكون الجميع متابعين ومسؤولين عما يكتب في المواضيع ويبادروا بإبلاغ فريق الإشراف عن أية تجاوزات يلاحظونها أسوة بالحاصل في أبواب المنتدى الأخرى.

مرة أخرى أشكر الأخت ضحى على اهتمامها وأؤكد أن جميع مقترحاتكم وملاحظاتكم كشركاء لنا في نجاح هذا المنتدى تهمنا وسنتعامل معها بكامل الاهتمام والجدية.

إن فشلنا في الوصول للحكم ولتغيير البلد .. لا تقلقوا .. نحن فكرة .. الفكرة لا تموت ... تستمر لا تتوقف

البرادعي 15/10/2011

رابط هذا التعليق
شارك

الفاضل بريكانديان ... شكرا على مداخلتك وأسمح لي أن أعقب على بعض ما جاء فيها

لا يمكن ان تتم هذه الدائره الانساتيه الا بوجود تفاعل بين الناس . بعض مننا بيتعرف علي زمايل بسرعه وباخدوا علي بعض وبيكون في تفاعل علي النت وغير النت . لكن ميزه النت هي اللمه الجماعيه .

لاحظوا كمان ان اللي بيكتب لو ملقاش قراء هيبطل يكتب علشان كده بتكون في مداخلات مجامله واثبات حضور.

رجاء تنضيم المنتدي كما ترون ولاكن بدون الاخلال بهذه ال دائره.

وجود توازن بين عناصر هذه الدائرة أيضا ضروري ... عندما يكون هناك موضوع لسرد تجربة شخصية استمرت أسبوعين عدد صفحاته 90 صفحة ... منها خمسة صفحات على الأكثر لسرد التجربة والباقي تهاني وهزار وحديث في محاور أخرى لا علاقة لها بالموضوع فإذا هناك خلل ولابد أن يتدخل أحد لتصحيحه.

افضل حل هوعمل ملخصات جديده من كل المواضيع اللي في المنتدي زي اللي كانت بتعمله المهندسه سميه صالح.

فكرة الملخصات ناقشناها ولم تعجب معظم أعضاء الإدارة لأنها ستكون مجرد تكرار للمواضيع ولن توقف الشات والفوضى في المواضيع الأصلية ... وعموما اللي داخل ياخذ معلومه (تيك أواي) ويمشي ليس هو محور اهتمامنا بل الأعضاء الدائمين في المنتدى.

اشعر ان هناك تعالي من معظم الاشراف وهذا يضهر في لغه الحوار

اشعر ان هناك لهجه سخريه ضد بعض المشاركين في باب كندا .واعتقد حتي لو كان هناك مايدعو لذلك فارجو اللا يظهر هذا في مداخله المشرف. كل مكان كلام المشرف قليل عند اتخاذ امر اداري كل مكان هذا افضل.

لا اعتقد ابدا ان اسلوب النصح والتنبيه من المشرف علنا ياتي ثماره بل دائما يؤتي ثمار عكسيه تسبب حساسيه . وبالتالي من الافضل نصح العضو والتنبيه عليه في الخاص

لازم ناخد بالنا ان المشرف زي ماهو كبير العضو ايضا كبير ولا فارق بينهما الا ان المشرف له صلاحيه تعديل مسار الامور . والحكم بين الناس. ولنعلم انه ارتضي دلك بمحض ارادته ولا يجب ان يمن علينا كل شويه انه متطوع .

طول ما المشرف حاسس انه ظابط والاعضاء مواطنين تحت ايديه وهو بينفذ عليهم قانون الطوارئ طول مالعلاقه ستكون سيئه وستزداد سوأ . طيب احنا سيبنا ايه للطاغيه اللي بيحكم البلد.

كان ما سبق رؤيه شخصيه واتمني ان تهدا الامور وياريت نرفع سماعه التلفون للناس اللي معانا تلفوناتها ونكلمها . ويا جماعه مش لازم نكون اما بنحب او بنكره علشان نتعامل او مانتعاملش مع بعض .

في هذه اسمح لي أختلف معك

أنا عايزك ترجع للمداخلة الإدارية التي كتبتها في موضوع زناتي والتي كانت الشرارة التي أشعلت كل هذا الجدل ... وأخبرني ما هو وجه التعالي فيها (على الخاص طبعا لأنني لا أريد فتح المناقشة على العام مرة أخرى)

المشكلة يا سيدي الفاضل أن البعض أصبح يعتبر نفسه فوق قواعد المنتدى لمجرد أنه فتح موضوع أو اثنين ... ولا يقبل أن يتدخل الإشراف بالتعديل أو التنبيه في (قهوته) الخاصة ... يريد أن ينصب نفسه مديرا لمنتدى خاص ضمن محاورات المصريين ... لذلك رأينا ردة الفعل العنيفة والغير مبررة منه في أول محاولة للإشراف للتدخل لتصحيح الأوضاع المختلة. الموضوع تحول من وجهة نظره الى عناد ومحاولة لفرض رأي معين على الإدارة في مسألة إصلاح باب كندا بهذا الأسلوب الهابط لللأسف.

أما التنبيهات الإدارية على العام فلها هدف وهو أن تصل الى الكل حتى لا تتكرر المخالفة ... وبعدين الذي يصرّ على تكرار المخالفات على العام ويضرب بعرض الحائط قواعد المنتدى والرجاءات المتكررة لفريق الإشراف لماذا ينبغي أن نراعي مشاعره ونرسل له رسالة على الخاص.

تحياتي لك وشكرا مرة أخرى على الاهتمام.

أحمد سيف

إن فشلنا في الوصول للحكم ولتغيير البلد .. لا تقلقوا .. نحن فكرة .. الفكرة لا تموت ... تستمر لا تتوقف

البرادعي 15/10/2011

رابط هذا التعليق
شارك

وصلنا 3 صفحان من المداخلات والهجوم والزعل والضيق الشديد والحنق على الإدارة

لكن ماحدش لاحظ حاجه مهمه ؟

مش هاحيركم وهاقول هي إيه

هي إن كل الأفعال التي أُستخدمت كانت بصيغة الـ " مبني للمجهول "

المفروض يتم كذا

بالنسبة للفهرس يبقى شكله فوشية وبدانتيلا

أما الأرشيف فيبقى بكرانيش

وهي عادتنا ولا هانشتريها .. عشرات الموضوعات فتحتها الإدارة تستغيث من أبوب الهجرة سواء لكندا أو باب المغتربين الأخر .. وما شاء الله تفاعل من الأعضاء وناس بترفع إيدها وتقول صح لازم نشارك لإنه منتدانا جميعاً مش منتدى المشرفين ولازم كل واحد يبدأ والمجال أمامهم مفتوح ويعمل موضوع ظريف يجمع فيه تساؤلات متشابهه أو يعمل فهرس معين .... ولا أريد أن أذكر الصيادين المهرة اللي ماسكين صنانير وبيلغوصوا ويعكروا أي مياه صافيه .. ودول بالذات لا نتوقع بالتأكيد أن نرى منهم عمل إيجابي ...

وأود أن أشكر الدكتور ssmaly على تواجده في هذا الموضوع بالذات وتذكيري بمقولتي الخالدة " بالدستور أعطيته الكلمة وبالدستور سحبت منه الكلمة "

لكنه لو أتفرج على المسرحية كلها كان هايعجبه مشهد مهم ...

كان بطولة الممثل هاني رمزي ... فهم كمواطنين سمعوا ضرب مدافع حوالين القصر الجمهوري .. فما كان من البطل إلا إنه صرخ في الجماهير وقال : يا رجالة .. بلدنا في خطر .. ولازم نعمل حاجه ونكون إيجابيين " فردت عليه الجماهير وقالوا : موافقين .. : طب نعمل إيه ؟ .. قال لهم مقولته الخالده : كل واحد يجري ويروح يستخبى في بيته ... هههههههههههههه

وهذا ما نراه الأن على جميع المستويات

ساعة الجد الكل بيستخبى ويتغطى ويقول يا أرض أنشقي وأبلعيني ...

حتى على مستوى المنتدى ... صح ولا أنا غلطان يا دكتور ؟

ومع ذلك ... حد يفكرني .. ماذا تم أو ماذا فعل هو ... حاشا لله أن نطلب من أحد دعم مادي .. لكن على الأقل دعم معنوي .. يا عم مد إيدك وشمر كده وساعد في أيه تنظيم أو ترتيب ..... ولا احزاب المعارضة دورها المعارضة والإعتراض فقط ؟

و أنت عزيزي قاريء هذه المداخلة واللي أنحمقت لأن طفح الكيل بنا ولم نتخذ هذه الخطوة إلا بعد أن يأسنا ووضعنا أصبعنا العشرة في الشق

وشكراً للأستاذ precanadian لإنه ذكرنا بهذا الموضوع اللي بقى له عام ونصف

http://www.egyptiantalks.org/invb/?showtopic=65676

وأخر موضوع لي أيضاً في باب شئون المحاورات بقى له شهر الان .. وده يمكن الموضوع العاشر بنفس الصيغة

ومع ذلك

أحلى كلام هانقوله الليلة .. احلى كلام ... والله حرام النوم الليلة ده النوم حرام ...

حد عمل حاجه ؟ طب حد رمى بياضه ؟ طب حد من الإخوة أصحاب الأقلام الرشيقة واللي بنعتز بهم وشايلينهم فوق راسنا وقاعدين ليل نهار في مكانهم المفضل .. حد منهم فتح موضوع تنظيمي ولو فاضي حتى ؟

صباحكم عسل كله إيجابية وطنية ثورية وحدوية تقدمية

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

مقدر المجهود الى انتو بتعملوه وعارف انه تبرع منكم

لكن يا جماعه ياريت نتعامل مع الموضوع على انها مصالح ناس قبل ان ننظر للمشاكل

السؤال الوحيد هو : هل هذا لأن يوتوبيا أقوى منى ، ام لأننى أقوى منى ؟

رابط هذا التعليق
شارك

اللهم الف بين قلوبنا واصلح ذات بيننا

امين

والله لو علموا قبيحَ سريرتي لأبيَ السلامَ عليِّا من يلقاني ولأعرضوا عني

وملوا صحبتي ولكن سترتَ معايبي وذنوبي

فلكَ الحمدُ والمدائِحُ كُلِها بخواطريِ وجوارحيِ ولسانيِ

رابط هذا التعليق
شارك

السلام عليكم ورحمة الله....

والله أنا مندهشة من بعض ما قرأت هنا....يساورنى شك أقرب إلى اليقين بأن المشكلة دائما هى مشكلة مشرفين وإدارة...

موضوع تم نقله...يبقى السبب مشرفين وإدارة....باب يتم تنظيمه...هم المشرفين والإدارة مافيش غيرهم..

منتدى يتم غلقه بصورة مؤقتة ..كى نتوقف جميعا عن التطاحن والمبارزة الكلامية ونعيد ترتيب أفكارنا ونتشارك فى وضع أسس جديدة ...يبقى القيامة قامت...وهم برضه المشرفين الاشرار والادارة المتعنتة...

دائما ننظر خارج أنفسنا...ونبحث عن ضحية نلقى عليه التهمة الجاهزة..."انت متعنت...انت بلطجى ..أنت *****...شخصيا لا أعلم ما الكلمة المفروض تتكتب مكان النجوم دى...ولكنى قرأتها كده فى منتدى أخر... :roseop:

لم أجد من ينظر داخله ليبحث عن أسباب المشكلة الرئيسية....والبعض فى حالة استنفار واستعداد لأن يقول على المنتدى بمشرفيه ما قال مالك فى الخمر....

مع العلم بأنى أقرأ موضوعات لنفس الاشخاص المعترضون هنا...ينقلونها او خلونى اقول ينظمونها ويرتبونها فى صورة جميلة جدا لعرضها فى منتدى أخر...بدون مداخلات التهنئة والعناد التى تحدث هنا...واحترم جدا مداخلات الاداريين فى المنتديات الاخرى التى تطالب الاعضاء النازحيين بأن ينقلوا ماهو مفيد فقط...اذن الجميع يعلم مدى ما نعانينه...وهذا شىء يسعدنى فعلا ويشعرنى بأننا صح...ولكن كما يقول المثل الشعبى..."حبيبك يمضغ لك الزلط وعدوك يتمنى لك الغلط"...

أحترم كل المنتديات ومشرفيها والقائمين عليها...فجميعهم اخوة لنا ...اقول هذا حتى لا اجد من يقول ...أه ..انتم غيرانين بقى...ولا بتهاجموا المنتديات الاخرى"...اطلاقا...شخصيا لا اجد عندى وقت لمتابعة اى شىء اخر...اللهم الا اذا ارسلى لى احدهم رابط موضوع يرى انه يجب على قراءته...مثل موضوع الفاضل زناتى مثلا...

والذى قراءته باعجاب شديد وانا اقول "سبحان الله"... wst:: .......

احترمت جدا مداخلة احد الاعضاء هناك وللاسف لا اتذكر اسمه...يطالب الزناتى بالا يتحول الموضوع الى نسخة من موضوعه فى المحاورات حتى يستفيد منه الجميع...واستجاب استاذنا الفاضل الزناتى وتم ترتيب المداخلات بطريقة مشرفة....

طيب أمال ايه بقى؟...

http://www.almatareed.org/vb/showthread.php?t=11231

طبعا عارفة ان الادارة لا تسمح باضافة روابط...والا انقل موضوعات من منتديات اخرى....بس ارجو انهم يسمحوا لى هذه المرة ان اخالف القواعد..مادام الضرب شغال علينا بقى....اردت فقط ان اوضح فكرة ....وطبعا لكم ان تحذفوا كلامى ان رائيتم هذا...

أريد ايضا ان اشير الى احد هذه القهاوى التى ثار الاعضاء لمجرد ذكرنا لها بالقهاوى....قهوة الاستاذ ايهاب سالم....وذكرت هذا فى الاشراف من قبل....وسجلت اعجابى بها فى الاشراف ولدى بعض الاخوات ......منظمة...افكارها واضحة...معلوماتها أفادتنى شخصيا بالرغم من عدم توافر اى نية لدى للهجرة....اظن انى الوحيدة فى الفريق اللى عايشة فى مصر...ولم اتغرب للعمل فى الخارج من قبل..اللهم بعض الرحلات السياحية التى اقوم بها مع اسرتى بين الحين والاخر...ومش حاقدة على فكرة على اى حد... :roseop:

الحقيقة ان ايهاب سالم عنده المقدرة فعلا انه يتحكم فى مسار موضوعه...واللى يسأله عن حاجة اما يجاوب بوضوح..او يقول لا اعلم...او يضع له رابط موضوع به الاجابة....والله شىء مشرف فعلا...

اشير ايضا الى موضوع الفاضلة المهندسة سمية صالح...بعد ترتيبه وحذف بعض المداخلات منه...الحقيقة الموضوع اصبح مفيد ورائع...والاخوة المشاركين فيه وصلتهم الرسالة واستكملوا المسيرة من بعدنا...اشكرهم واحييهم...

دكتور هشام ابراهيم...عدم تفهمك على رأسنا طبعا...والاخت سوسورانى اعتراضك محل ترحيب وتفهم منا .....ولكنى اعلم تفهمكم لاعطائنا فرصة لاعادة ترتيب الباب بدون ضغوط وفرهدة نفسية وجرنا لساحة العراك....وغلق الباب ليس عقابا...ولكنه هدنة وسيعاد فتحه بعد ان نقوم بعملنا دون تحدى ومهاترات...

نقطة اخرى كنت لا أريد التطرق اليها ...ولكن سأعرض على حضراتكم رابطيين وصلونى على البريد الخاص.....

سأضعهم دون تعليق...لانى لا اعلم ما الغرض وراء ارسالهم لى...ولكن مالفت نظرى فعلا...ان الساحة حولنا مليئة بمدونات ومنتديات تضم معلومات هائلة عن كندا...وكلها..كلها...منقولة من محاورات المصريين...هذا المنتدى الذى يتعرض للهجوم والطعن فى القائميين عليه...ويتم سحب المعلومات منه لعرضها فى اماكن اخرى....الفرق الوحيد انها معلومات صافية خالية من الاضافات الموجودة هنا..

http://www.facebook.com/topic.php?uid=216778041799&topic=12621

والرابط الاخر ...

http://thewaytocanada.mousika.org/

لا تعليق من جانبى.....

نقطة اخيرة اود ان اوضحها للجميع...

احنا المشرفين..كنا دائما ما نتجاذب اطراف الحديث الشخصى فى موضوعات المداولات الخاصة بالموضوعات المطروحة...الى ان نبهنا استاذنا الفاضل عادل ابو زيد واعرب عن استياءه بأسلوبه الراقى وأشار مجرد اشارة الى انه لا يليق ان نضع طاسة القلية فى دولاب الملابس.....واحترنا...ما المقصود...والتزمنا الصمت فترة....ثم عاودنا الدردشة فى موضوعات المداولات...الى ان قررنا تنظيم باب كندا...فنظرنا حولنا...وتذكرنا " أتأمرون الناس بالبر وتنسون أنفسكم "...

وقمنا بفتح موضوع خاص منفصل لمحادثتنا الجانبية والشخصية...والجميع تفهم...بل بالعكس..استطعنا ان نتابع مشاورات الزملاء وملاحظاتهم على الموضوعات بيسر ...ولنا موضوعنا الخاص بدردشتنا وسلاماتنا وتحياتنا....ولم نجد اى مشكلة...

فى النهاية أود أن انقل للجميع مشاعرى الخاصة ومشاعر فريق الاشراف....اننا بنحبكم جدا كلكم..وبنسعد بمشاركاتكم....ولكن مايحزننا فعلا...هو الهجوم الغير مبرر علينا...وعدم تعاونكم معنا...ومن شدة حزنى على ما آلت اليه الأمور لا أجد ما أقوله سوى ..ولله الامر من قبل ومن بعد

وفى نهاية حديثى اتوجه بتذكرة للاخوة المشرفين واقول لهم

"ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ وَجَادِلْهُمْ بِالَّتِي هِيَ أَحْسَنُ إِنَّ رَبَّكَ هُوَ أَعْلَمُ بِمَنْ ضَلَّ عَنْ سَبِيلِهِ وَهُوَ أَعْلَمُ بِالْمُهْتَدِينَ

واذكر جميع اخوانى واخواتى بالمنتدى بقول الحق سبحانه وتعالى :

ولا تَسْتَوِي الْحَسَنَةُ وَلا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ

اكتفى بهذا الان...

خالص مودتى للجميع

{ لَّقَدْ كُنتَ فِي غَفْلَةٍ مِّنْ هَـٰذَا فَكَشَفْنَا عَنكَ غِطَآءَكَ فَبَصَرُكَ ٱلْيَوْمَ حَدِيدٌ }

رابط هذا التعليق
شارك

الاخت الفاضلة فولانة.. كلمات حضرتك حميلة و جيدة.. و لا خلاف عليها.

نتمنى فقط من السادة المشرفين ضبط النفس.. نحن نعلم انكم بشر, و انكم لا تتحصلون على اجر.. و لكن فى النهاية.. اتمنى ان لا يتحول الامر الى خلاف شخصى...

و اتمنى من الاعضاء عدم اتهام الادارة بشكل غير مبرر و زائد عن الحد..

اتمنى فعلا ترجع روح الاخوة.. و يرجع التوازن فى الحديث.. و الترفع عن الصغائر.

تم تعديل بواسطة myusername

رب أخرجنا من القرية الظالم أهلها...

Je suis Québécois et je suis fier de l'être

رابط هذا التعليق
شارك

كنت ساكن في شقة من حوالي 3 سنوات .. وكان جارنا فلسطيني ما شاء الله مخلف ييجي 8 عيال في أعمار مختلفة

ومنهم اللي كانوا في سن أولادي ...

فأبني عُمر كان طفل بريء عادي يعني ... ييجي يلعب معاهم في الطرقة .. ولما يحاول يدخل عندهم شقتهم زي ما هما بيعملوا .. كانوا يطردوه شر طرده ... لأن في بيتهم القشاية فيه ما بتتحركش من مكانها والأب والأم يكهربوهم لو عملوا أي شغب داخل شقتهم ...

وزوجتي كانت تعلم ذلك ..

ففي مره خبطوا عليها عايزين يدخلوا عندنا كالمعتاد وطلبوا منها طلب غريب قوي ... كانوا ييجي 4 عيال أخوات وقالوا لها : خالتو .. ممكن ندخل عندكم نعلب ونعمل شقاوة ونبهدل الدنيا ؟

آه والله بالنص كده

فقالت لهم : يا سلام .. طب ما تروحوا تبهدلوا الدنيا عندكم ؟

قالوا لها : لأ ماما تضربنا

-------------

اهو ما يحدث هنا بالظبط كده ..

باب مفتوح لوجه الله ولمساعدة الراغبين في الهجرة والبحث عن حياة افضل ونريد أن تكون المعلومات متوفره فيه بشكل سلس وسهل يسهل الوصول إليها في أي وقت ..

لكن فجأة .. بقيت تلاقي المعلومة وسط كوم قش ووسط 300 صفحة تهنئات وحياك الله ... ومشكور وكلام من ده .. مع إن من البديهي يكون العكس تماماً ..

وبما إننا نعلم عن موقع الدكتور حسام يوسف الغير مجاني منذ تأسيسه واللي بيقدم خدمات الهجرة بسعر أقتصادي وهي خدمات مآخوذه من جهد وعرق الأعضاء أصحاب الخبرة هنا .. فهاسألة سؤال .... : ترضى يا حسام موقعك يتحول إلى مكان اجتماعي وسلامات وأخبار التوست أبو زبدة والحليب منزوع الدسم في كندا ويبقى 90 % اجتماعيات و10 % خدمات ؟

ترضاها ؟

مقدر المجهود الى انتو بتعملوه وعارف انه تبرع منكم

لكن يا جماعه ياريت نتعامل مع الموضوع على انها مصالح ناس قبل ان ننظر للمشاكل

ومن قال إننا ضد مصالح الناس يا خالد بيه ؟

والمنتدى كله موجود وقائم على مين أساساً ... مش على الناس برضوا ؟

وأنا اهو لا هاجرت ولا هاهجر كندا ولا غيرها ... لكن باب كندا بالذات أتحدى أي كنداوي صاحب خبرة ان يقول لنا إن الراغب في الهجرة يحتاج إلى معلومة ليست موجوده في المواضيع الدسمة الموجودة بالفعل واللي نٌقدر كل كلمة ونصيحة قيلت فيه وكل وقت أستقطعه صاحبه من حياته عشان يفيد الناس ... لكن للأسف ناس كتيره لا تُقدر ولا تقرأ ...

وللمره المليون ... نحن لم نلغي باب كندا .. بل الموضوع مجرد فرصة لألتقاط الأنفاس .. وفرصة لكل راغب في الهجرة إن يقرأ شويه ويستفيد ... ولم ولن نمنع اي عضو موجود ومداوم في باب كندا إنه يشترك في أي موضوع أخر ...

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

استاذي العزيز احمد

نقاط كثيره نتفق عليها

1) المكان لازم يكون ليه اداره

2) الاداره لها منهج تمشي عليه

3) نحن جميعا نتفق علي هذا المنهج الحالي وعلينا جميعا احترام قوانين المنتدي

4) الاحترام متبادل بين الاشراف والاعضاء.

5) أي طرف يخل بهذا الاحترام لا بد ان يعاتب وينصح فان لم يجدي ينذر فان لم يجدي يوقف ثم يشطب اذا لزم الامر

6) في مشكله مزمنه في المنتدي كله ودي جزء من ثقافتنا جميعا كمصريين.

7) في باب كندا لما اخ فاضل بيفتح موضوع يحكي تجربه او رؤيه لكندا او الهجره لها بنيجي لوقت الكلام فيه بيخلص لكن بيستمر تواصل الاعضاء بصوره عشوائيه في احداث حاليه تاره وبالسؤال في موضوع جاد تاره. الخلاصه ان بعد فتره في lجموعه بتتالف مع بعض وبتحب تتعرف علي بعض وبيستمروا في الكلام مع بعض للتواصل ولتوطيد العلاقه بالعربي كده بنبقي زي شلله قاعده مع بعض في بيت احدنا او في قهوه او في كافيه او في النادي .لحد هنا تختلف رؤيه اداره المنتدي في هذه النقطه مع العلم ان كل الحوارات كانت في منتهي الاحترام رغم بساطتها وعفويتها.

8) لا نختلف معكم ان أي خروج عن الصح والحلال والادب في الحوار مرفوض تماما.

9) ولا نختلف ان اسلوب الردح اللي بعض الاعضاء بيتبعوه مرفوض تماما.

10) صدقني يا صديقي العزيز ان مفيش حاجه مستاهله نزعل من بعض او نزعل بعض .

11) اخيرا الان باب كندا مغلق . وان اطالب باستمرار غلقه . نعم باستمرار غلقه .فان كان مغلق للتحسينات فانا واحد من الناس منتظر هذه التحسينات. اما ان كان عقاب وانا استبعد ذلك تماما فلا اعاد الله فتحه. :roseop: :lol:

نيجي لموضوع التحسينات:

واضح ان المشكله الرئيسيه هي حوارات الاعضاء التي قد تكون من وجهه نظر بعضنا انها لا تفيد. فهل هناك مشاكل اخرى تراها الاداره قبل ان نتطرق للبحث عن حلول لها؟

وجود توازن بين عناصر هذه الدائرة أيضا ضروري ... عندما يكون هناك موضوع لسرد تجربة شخصية استمرت أسبوعين عدد صفحاته 90 صفحة ... منها خمسة صفحات على الأكثر لسرد التجربة والباقي تهاني وهزار وحديث في محاور أخرى لا علاقة لها بالموضوع فإذا هناك خلل ولابد أن يتدخل أحد لتصحيحه

اتفق مع حضرتك في ذلك . لكن اللي فتح توبيك ده مش جاي في مهمه وطنيه مكلف بها .هو بيعمل كده لعده اسباب منها مساعده الاخر والتواصل مع الاخر.

واعتقد ان في توبيك احنا مش شايفينه كل الاشراف بيتحاوروا فيه مع بعض ؟

فكرة الملخصات ناقشناها ولم تعجب معظم أعضاء الإدارة لأنها ستكون مجرد تكرار للمواضيع ولن توقف الشات والفوضى في المواضيع الأصلية ... وعموما اللي داخل ياخذ معلومه (تيك أواي) ويمشي ليس هو محور اهتمامنا بل الأعضاء الدائمين في المنتدى.

متفقين يا ريس

في هذه اسمح لي أختلف معك

أنا عايزك ترجع للمداخلة الإدارية التي كتبتها في موضوع زناتي والتي كانت الشرارة التي أشعلت كل هذا الجدل ... وأخبرني ما هو وجه التعالي فيها (على الخاص طبعا لأنني لا أريد فتح المناقشة على العام مرة أخرى)

المشكلة يا سيدي الفاضل أن البعض أصبح يعتبر نفسه فوق قواعد المنتدى لمجرد أنه فتح موضوع أو اثنين ... ولا يقبل أن يتدخل الإشراف بالتعديل أو التنبيه في (قهوته) الخاصة ... يريد أن ينصب نفسه مديرا لمنتدى خاص ضمن محاورات المصريين ... لذلك رأينا ردة الفعل العنيفة والغير مبررة منه في أول محاولة للإشراف للتدخل لتصحيح الأوضاع المختلة. الموضوع تحول من وجهة نظره الى عناد ومحاولة لفرض رأي معين على الإدارة في مسألة إصلاح باب كندا بهذا الأسلوب الهابط لللأسف.

أما التنبيهات الإدارية على العام فلها هدف وهو أن تصل الى الكل حتى لا تتكرر المخالفة ... وبعدين الذي يصرّ على تكرار المخالفات على العام ويضرب بعرض الحائط قواعد المنتدى والرجاءات المتكررة لفريق الإشراف لماذا ينبغي أن نراعي مشاعره ونرسل له رسالة على الخاص.

اتفق معك اخي الحبيب ان الاشراف اشراف والاعضاء اعضاء وغير مقبول غير ذلك لكن ماكان اللين في شئ الا زانه وما نزع من شئ الا شانه. هي دي النقطه .

علي فكره من اكبر الاخطاء في الكتابه في المنتديات هو الكتابه اثناء الغضب وذلك ينصب علي الاعضاء والاشراف نقل مشاعر الغضب علي المنتدي تزيد الطين بله ولذلك قله الكلام عند اتخاذ امر اداري قد نكون افضل. والتوقف عن المشاركه من العضو افضل.

اخي الحبيب استاذ احمد : اريد ان اوضح اني مركز حواري معاك لا لشئ الا لانك منا بالاساس انت والدكتور تهامي قبل ان تكونوا مشرفين. وانتم اكثر تفهما لنا ليس الا لانكم مررتم او تمرون بنفس ظروفنا مع كامل احترامي وتقديري لجميع الاشراف .

وبالنسبه للموضوع ايياه فلنا مع بعض حوار خاص. تحياتي وتقديري.

تم تعديل بواسطة precanadian
رابط هذا التعليق
شارك

السلام عليكم ورحمة الله....

والله أنا مندهشة من بعض ما قرأت هنا....يساورنى شك أقرب إلى اليقين بأن المشكلة دائما هى مشكلة مشرفين وإدارة...

فى النهاية أود أن انقل للجميع مشاعرى الخاصة ومشاعر فريق الاشراف....اننا بنحبكم جدا كلكم..وبنسعد بمشاركاتكم....ولكن مايحزننا فعلا...هو الهجوم الغير مبرر علينا...وعدم تعاونكم معنا...ومن شدة حزنى على ما آلت اليه الأمور لا أجد ما أقوله سوى ..ولله الامر من قبل ومن بعد

وفى نهاية حديثى اتوجه بتذكرة للاخوة المشرفين واقول لهم

"ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ وَجَادِلْهُمْ بِالَّتِي هِيَ أَحْسَنُ إِنَّ رَبَّكَ هُوَ أَعْلَمُ بِمَنْ ضَلَّ عَنْ سَبِيلِهِ وَهُوَ أَعْلَمُ بِالْمُهْتَدِينَ

واذكر جميع اخوانى واخواتى بالمنتدى بقول الحق سبحانه وتعالى :

ولا تَسْتَوِي الْحَسَنَةُ وَلا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ

اكتفى بهذا الان...

خالص مودتى للجميع

استاذتي الفاضله لك كل التحيه والتقدير والاحترام والاجلال والفخر .

علي هذه المداخله ومداخلتان حضرتك كتبتيهم في (بدايه ونهايه)

سأضعهم دون تعليق...لانى لا اعلم ما الغرض وراء ارسالهم لى...ولكن مالفت نظرى فعلا...ان الساحة حولنا مليئة بمدونات ومنتديات تضم معلومات هائلة عن كندا...وكلها..كلها...منقولة من محاورات المصريين...هذا المنتدى الذى يتعرض للهجوم والطعن فى القائميين عليه...ويتم سحب المعلومات منه لعرضها فى اماكن اخرى....الفرق الوحيد انها معلومات صافية خالية من الاضافات الموجودة هنا..

تعقيبا علي ذلك:

الناس في باب كندا انواع واشكال كتيره

1. واحد دخل المنتدي يعطي بسخاء زي د/ هشام والتهامي وقناوي والشامي وسوسو ار :roseop: والمهندس ياسر وايهاب وزناتي.....وغيرهم كثير قبل واثناء هذه الفتره

2. واحد داخل ياخد كل كلمه يسفيد منهم ويتعلم منهم ويعلم غيره لو سال وببلاش لوجه الله لانه اتعلم من اخواته اللي سبقوه في الهجره العطاء وفي اللي نفسه يعرفهم واتعرف عليهم فعلا وفي اللي ميهموش المعارف والترابط والنتوركانج

3. واحد داخل ياخد كل ده علشان يتاجر بيه

تم تعديل بواسطة precanadian
رابط هذا التعليق
شارك

اسمحولي , أنا بس عندي ملحوظة في باب كندا , وارجو ان يتسع صدركم ليها

انا صحيح ماشتركتش في المنتدى عشان الباب ده لكن بعد ما دخلت فكرت فيه

ولما حاولت اعرف الموضوع ده بيبدأ من اين توهت فعلا ,,

اول سبب لان معظم المواضيع بتبدأ من نصف المرحلة ومش فاهم ايه اول حاجة هي ايه , مش عارف بقى اذا كانت المشكلة في المواضيع ولا في التنظيم

تاني سبب وهو الاهم , ان فيه مواضيع موجودة من 2006 واكتر من 4000 مشاركة , ولما بقلب في المواضيع بلاقي مثلا في 2008 ناس بتقول القوانين التغيرت , طيب وبعدين هل المفروض اني اقرا موضوع مشاركاته من اربع سنوات وبالعدد ده عشان اعرف تطوارت القانون ,,

واكيد حتى ولو القوانين ماتغيرتش , اكيد فيه حاجات كتير اتغيرت خلال 4 سنوات

ليه مايتمش تجديد في المواضيع المثبتة على مراحل

يعني مثلا يتم ايقاف دمج المواضيع الجديدة للقديم 2006 ويتم دمج المواضيع المتاشبهة من 2010 في مواضيع مثبتة ايضا

للوقت اللي ممكن الاستغناء فيه عن المواضيع القديمة

محدش يتخيل لما حد يفتح موضوع من4000 مشاركة ومن اكتر من اربع سنين ممكن يتوه ازاي

وبعتذر لو رأيي يضايق حد

تحياتي

رابط هذا التعليق
شارك

المنتدى تهذيبون واصلاح

بداية لم اكن اود ان اتدخل بالمشاركة فى هذا الصدام الدائر حول قرار غلق باب الهجرة لاى سبب كان وذلك لعدة اسباب منها عدم معرفتى الا بعدد محدود من الاعضاء المحترمين وحيث ان حديثى فى هذا الموضوع يمكن ان يقابل بعدائية نظرا لحداثة مشاركاتى وعدم وجود معرفة على المستو ى الشخصى ....على خلاف الاعضاء الاخرين بالموقع و الذى اعتبره كما يعتبره الاخرون بيتا لهم وجزء هام وحيوى فى حياتهم اليومية خصوصا فى الغربة الا انه لى ملاحظتان احب ان اوردهما فى هذه المداخلة

اولها تكتل كل السادة مشرفى المنتدى ضد الاعضاء حيث ان كل من تحدث منهم دافع عن القرار بكل قوة وحماس وهذا شئ لا افهمه

ثانيا محاولة تشبيه الاعضاء كالاطفال فاقدى الاهلية الذين يجب الحجر على تصرفاتهم كالمثال الذى ضربه المشرف السيد سى سى هو تشبيه غير مقبول وانأى به ان يتعامل معنا هكذا

فى النهاية المنتدى يسمى محاورات المصريين والهدف منه هو الحوار الجاد والهادف والاستفادة من خبرات الاخرين كما يعلم الجميع ولا اعتراض على اى تنظيم ادارى ولكن بدون استخدام العصا واما اغلاق الباب فى وجه الاعضاء كما حدث فلااظنه احد اهداف المنتدى

مرة ثانية ارجو ان يتقبل الجميع مداخلتى بدون اى حساسية والسلام عليكم ورحمة الله وبركاته

رابط هذا التعليق
شارك

ثانيا محاولة تشبيه الاعضاء كالاطفال فاقدى الاهلية الذين يجب الحجر على تصرفاتهم كالمثال الذى ضربه المشرف السيد سى سى هو تشبيه غير مقبول وانأى به ان يتعامل معنا هكذا

ف

يا أخي أرجع لكل مداخلاتي وشوف بنتعامل مع الناس إزاي ؟

لكن إذا كان ده بيحصل بالفعل .. فماذا تسميه ؟؟؟؟؟

إذا كان في ناس من بيننا هنا عندهم منتديات تانيه يحرصوا ان تكون منظمة وعلى سنجة عشرة وبيكسبوا من وراها كمان

ولما نيجي إحنا نناشدهم لمدة شهور وندعوهم على التنظيم والنظام لكي يستفيد الجميع من الموضوعات

تلاقي السكاكين طلعت

وكثير جداً تسمع كلام زي بتاع التبرعات الوهمية كده ..

إحنا مستعدين ننظم

لأ لأ ده بيتنا ولازم نحافظ عليه

الهِمه يا رجاله

تيجي بعد فترة طويلة تلاقي المُحصلة = صفر وما حدش حرك حرف من مكانه

إقرأ كده كلام بعض المهاجرين الان إلى منتدى المطاريد الشقيق

هاتلاقي اول دعواهم .. بعد لا إلا الا الله طبعاً .. إن لازم الموضوعات تبقى مفيدة وبعيده عن الثرثرة والحشو

يا سلام !!!!!!!!!!!!!!!!

أومال إحنا بقى لنا سنين بنهاتي ونقول إيه ؟

فهمتني يا برنس ؟

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

[فى النهاية المنتدى يسمى محاورات المصريين والهدف منه هو الحوار الجاد والهادف والاستفادة من خبرات الاخرين كما يعلم الجميع ولا اعتراض على اى تنظيم ادارى ولكن بدون استخدام العصا واما اغلاق الباب فى وجه الاعضاء كما حدث فلااظنه احد اهداف المنتدى

الله ينور عليك

طب تعالى انت احكم :roseop:

وقول لنا

لما تكون بتوجه دعوه شبه يوميه للجميع لشهور طويلة ومن فضلكم ولو سمحتم ساعدونا يسعدكم ربنا .. ويا جماعة ويا أفاضل ويا بشاوات

ومع ذلك لا حياة لمن تنادي ...

ها تعمل إيه لتطبيق النظام ؟

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

[فى النهاية المنتدى يسمى محاورات المصريين والهدف منه هو الحوار الجاد والهادف والاستفادة من خبرات الاخرين كما يعلم الجميع ولا اعتراض على اى تنظيم ادارى ولكن بدون استخدام العصا واما اغلاق الباب فى وجه الاعضاء كما حدث فلااظنه احد اهداف المنتدى

الله ينور عليك

طب تعالى انت احكم :happy:

وقول لنا

لما تكون بتوجه دعوه شبه يوميه للجميع لشهور طويلة ومن فضلكم ولو سمحتم ساعدونا يسعدكم ربنا .. ويا جماعة ويا أفاضل ويا بشاوات

ومع ذلك لا حياة لمن تنادي ...

ها تعمل إيه لتطبيق النظام ؟

الفاضل سى السيد اولا شكرا لعدم الايقاف

ثانيا بخصوص المظاهر الاجتماعية بالمنتدى من تهنئة بنجاح او هجرة او غيرهامن المناسبات اعتقد من وجة نظرى المتواضعة انه شئ لابد منه فهذه المظاهر تعكس طبيعة النفس البشرية التى تميل الى مشاركة الاخرين فرحهم وتواسيهم عند الشدة فالمنتدى ليس دائرة حكومية فقط اوراق ومعاملات وارشادات ولوائح

ثالثا افهم من كلامك انك تؤمن بانه لابد من خلق الية عمل مشتركة بين الاعضاء والمشرفون من اجل تنظيم باب الهجرة الى كندا وهو ما يتعارض مع غلق الباب دون اعلامنا كيف نساعد؟؟؟؟ عموما كل ما نتطلع اليه هو ان نتشارك كاسرة واحدة ووضع اليات قابلة للتنفيذ من قبل الاعضاء واعتقد ان احدا لن يتاخر عن تنفيذها

ولك منى جزيل الشكر

رابط هذا التعليق
شارك

الفاضل سى السيد اولا شكرا لعدم الايقاف

ثانيا بخصوص المظاهر الاجتماعية بالمنتدى من تهنئة بنجاح او هجرة او غيرهامن المناسبات اعتقد من وجة نظرى المتواضعة انه شئ لابد منه فهذه المظاهر تعكس طبيعة النفس البشرية التى تميل الى مشاركة الاخرين فرحهم وتواسيهم عند الشدة فالمنتدى ليس دائرة حكومية فقط اوراق ومعاملات وارشادات ولوائح

ثالثا افهم من كلامك انك تؤمن بانه لابد من خلق الية عمل مشتركة بين الاعضاء والمشرفون من اجل تنظيم باب الهجرة الى كندا وهو ما يتعارض مع غلق الباب دون اعلامنا كيف نساعد؟؟؟؟ عموما كل ما نتطلع اليه هو ان نتشارك كاسرة واحدة ووضع اليات قابلة للتنفيذ من قبل الاعضاء واعتقد ان احدا لن يتاخر عن تنفيذها

ولك منى جزيل الشكر

يبقى انت مش متابع من الاول

إجتماعيات !!!

عظيم جداً

لما يكون عندك موضوع مهم جداً وفجأة يتضخم ويتحول ويوصل 300 صفحة بالتمام والكمال ... وتلاقي فيهم 290 بدون مبالغه اجتماعيات من عينه

مشكور

حياك الله وما إلى ذلك

و10 مدفوسين وسطهم مهمين

ده تسميه إيه ؟

أما موضوع خلق الأليات

فده أستغرق مووووووووووووووووووواضيع طويلة وتوسلات للناس إنها تساعدنا ... ووعود وعهود وأليات على كل شكل ولون ولم يتم شيء من الواعدين وولا سطر حتى واحد اتنظم

يالله حلها أنت بقى ؟

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

اولها تكتل كل السادة مشرفى المنتدى ضد الاعضاء حيث ان كل من تحدث منهم دافع عن القرار بكل قوة وحماس وهذا شئ لا افهمه

أنا أفهمك

فريق الإشراف عادة تكون له رؤية موحدة للتعامل مع المشكلات في المنتدى

ليس تكتلا ولا تعصبا ولكن لأن هناك تنسيقا مستمرا وحوارا دائما بيننا لا يراه الأعضاء للوصول لهذه الرؤية المشتركة

ستندهش من كمّ المناقشات التي دارت بين المشرفين بخصوص باب مسألة تنظيم باب كندا قبل أن يظهر هذا الموضوع للنور على صفحات المنتدى للأعضاء

وجميع القرارات التي تتخذ - باستثناء العاجل أو الروتيني منها - يجب أن نصل الى توافق حولها قبل إعلانها وتنفيذها ... هذا هو منهجنا وأسلوبنا

ثم أننا جميعا نحتكم الى قواعد المشاركة في المنتدى - التي حفظناها تقريبا عن ظهر قلب والتي لا أعتقد أن عددا كبيرا من الأعضاء اكترثوا بقراءتها عند التسجيل - ونطبقها بدقة عندما تصادفنا مشكلة ... لذلك يكون موقفنا متقاربا لأننا ننطلق من نفس الأسس والقواعد

أعتقد أن اختيار أعضاء فريق الإشراف قد تم بناء على درجة توافقهم الفكري والقيمي مع مبادئ وأهداف المنتدى ... وذلك لضمان وجود فريق متفاهم يستطيع تطبيق سياسة المنتدى بكفاءة.

وأخيرا لدينا في فريق الإشراف مرجع نهائي هو الأدفايزور - المدير العام للمنتدى - الذي يقدم مشورته القيمة في اتخاذ القرارات الهامة.

بعد كل ذلك هل تستغرب وجود تفاهم وتعاون بين المشرفين عند التصدي للمخالفات والتجاوزات.

ملاحظة أخيرة ... كلمتك أننا تكتلنا ضد الأعضاء ... نحن لم نتكتل ضد الأعضاء ... نحن تكتلنا ضد التجاوزات من بعض الأعضاء ومن يدافعون عن هذه التجاوزات ... أما الأعضاء الملتزمون بقواعد المنتدى فلهم منا كل الاحترام والتقدير ولم ولن يتعرض لهم أحد

تحياتي

إن فشلنا في الوصول للحكم ولتغيير البلد .. لا تقلقوا .. نحن فكرة .. الفكرة لا تموت ... تستمر لا تتوقف

البرادعي 15/10/2011

رابط هذا التعليق
شارك

السلام عليكم

رغم انى لا اشارك كثيرا

احب اقول انى استفدت كثيرا من هذا الباب باب الهجرة

وأكن كل الاحترام لجميع الاعضاء

لكن فعلا الموضوع محتاج الى عملية تنظيم اكثر من ذلك حتى تعم الافادة

تحياتى للمشرفين على مجهودهم

رابط هذا التعليق
شارك

زائر
هذا الموضوع مغلق.
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة

×
×
  • أضف...