مسجل بعلم الوصول ....

[لماضة مصرية جدا]

السلام عليكم و رحمة الله و بركاته

إلي...إدارة المحاورات القريبة جدا من القلب

محدش يقدر ينكر المجهود و الوقت اللي بتستقطعوه من حياتكم عشان المنتدي يكون بمستوي الرقي اللي وصله

زمان كنت قريت جملة "ان التوبيك طالما طلع ع البانر مبقاش ملك فقط لصاحب التوبيك....بل اصبح ملك لكل افراد المحاورات"

صح و لا لا

انا ببعت المكتوب دهون عشان انا عاتبة جدا علي غلق توبيك "مصطفي حسني و تناول موضوع الحجاب"

الجدل هيكون موجود في اي توبيك.....ده احنا بنتجادل حتي مع مكاوي و هو قاعد علي كورسي الاعتراف في موضوعات خفيفة....يبقي هنحرمكم من الجدل في موضوعات هي مثار الجدل بعينه

توبيك اختنا الفاضلة بوسي مهم جدا جدا جدا.....و بقترح

بدل من اللجوء للحل السهل عشان نتفادي لخروج عن الموضوع...ان احنا نغير عنوان التوبيك و يكون "حجابي" يتكلم عن الحجاب بشكل عام .....لا هو مصطفي حسني و لا غيره...و متهيالي ده كان الهدف الاصلي للموضوع

و في نفس الوقت....حضراتكم ممكن تاخدوا اللي بيعملوا المداخلات اللي ملهاش دعوة بالسياق علي جنب كده و تشوفوا هتعملوا معاهم ايه

بس التوبيك بجد مهم

عارفين ليه

لان ممكن بنوتة تكون عايشة في بلد اجنبي....او في بلد عربي لكن مبتعرفشي كتير عن الحجاب....و تلاقي توبيك زي ده...و الله هيكون منارة ليها جدا انها تفهم اكتر عن دينها....في مكان هي بتتردد عليه كتير و هو المحاورات

ناس هتقولوا طب ما هو اللي عايز يقرا و لا يبحث معنده النت.....اقول لحضراتكم بس لما بيسمع نصيحة من ناس قريبين منه زي هنا في المحاورات ممكن يكون سبب في طريق هداية.

دي وجهة نظري

و ليكو مني كل الاحترام

صبااااح شريف

[se_ Elsyed]

الإبنه لماضه

وصلت رسالتك للسادة المسئولين ... ونوعدك ندرسها جيداً ...

[mekkawy]

بأضم صوتي لصوت لماضة و بأقول .. رسالة لجميع أعضاء المنتدى اللي شهدوا الموقف ده .. و خصوصاً .. الفاضلة أم عمر

و الله أعتذر و اسف جداً على ما آلت له الأمور في موضوع حيوي زي ده ... لكن كان لابد من الرد ... ده حتى أخويا الكبير س س رد .. عشان دي ثوابت .. لو كانت أول مشاركة خارج الموضوع اتحذفت مكنش حد فينا رد .. لكن بأكرر اسفي ... و بأطلب فضلاً لا أمراً إعادة فتح الموضوع و مش هأسوق اسباب تاني .. أختنا لماضة قامت بالواجب و زيادة و أقل سبب قالته يكفي.

كان نفسي أوجه رجاء للإدارة بحذف أي مشاركة يشتبه في اثارتها للفتنة أو تخرج عن الموضوع لأي عضو .. بس قد يختلف معايا أعضاء في الطلب ده و قد يكون سوء أدب مني أن أطلب طلب زي ده من إدارة واعية و توجهاتها ما شاء الله واضحة و صريحة في هذا الشأن .. كمان أخشى أن يفهم طلبي أو يفسر بشكل خاطئ .. عشان كدة مش هأطلبه بأة و خلاص. :) (حبيبي يا أبو نسمة)

الفاضلة أم عمر ... عذراً

مكاوى

[MZohairy]

حتنقلوا الموضوع هنا ولا ايه؟ :)

انا ممكن افند كلام مكاوي اللي فوق ده حته حته

و بمنتهى الأدب

لكن مفيش داعي

بون ويي

تم تعديل 11 مايو 2010 بواسطة mzohairy

[لماضة مصرية جدا]

السلام عليكم و رحمة الله و بركاته

إلي .......

دودي.....وحشتيني يا مضروبة.....يا تري لسه بتزعلي لما حد يقولك يا فشلة يا فشلة...ما هو انتي تخنتي اوي الحقيقة...!!!

موني المجنونة......هتستيني نطلع نجري ع الكورنيش.....و اسهيكي و اقولك العبيطة اهه

حسن.... يا تري لسه هتضربني برجل الكورسي.....لما بفضل اتريق ع الناس

محمد.......اخبارك الفنية ايه يا بيكاسو الصعيد........هزور معرضك امتي....بقي؟؟؟

علاء......يا تري خطيبتك ضحكت عليك من حرف الية....(الراء)...اللي انت الدغ فيه....

وليد.......يا تري لسه بتحب تشيل شنطة السانودتشات.....اللي كنا بنلفحها علي قلبنا في اي رحلة.....و ده مش كرم اخلاق من سموك....لا انت بتبقي عايز تطمن ع الغنيمة

خالد........يا تري.....اخبار بنوتك اللي سمتها باسمي ايه......انت عبيط يا ابني......شكلي هيبقي زبالة قدام المودام.....ع العموم انت عارف الاسم الحركي بتاعي..........اياكشي تقول اسمي الحقيقي...انا خايفة عليك مش اكتر

نونا الشعنونة....... يا تري .......لسه قاعدة تحبي علي نفسك......يخربيت كده......انا خلاص غرقت مشاعير......اتجوزتي و لا لسه؟؟؟

اوشا.......لسه القطة بامبي......عندك......خلي بالك منها...و لو قدرتي تجوزيها ...عشان عايزة اشوف عيالها قبل ما اموت...قصدي لما انزل ان شاء الله.....هموووت و اربي قطة.....صغنتوتة....مش هوصيكي بقي

ميرو....توتر.......اوعدك اول ما انزل هروقك ع الاخر......و هظبطلك المظابيط.....و هنضرب احلاها سحلب فيكي يا مصر....

ياااااااااااااااااااااه

أجدع صحااااااااب

وحشتوني جدا جدا جدا

خدوا اسمعوا دي لغاية ما اتقندل آجي

http://www.youtube.com/watch?v=6K82JYdB9F4...feature=related

وحشتوني اوي اوي

بس خلاص

[joo]

اعزائى واحبابى المحاوراتية

انا قررت انى مش هكتب تانى فى المحاورات الا فى باب كندا فقط لانى حسيت انى بضيع وقت كتير

هنا والنت سيطر عليا جامد انا هيعز عليا فراقكم لكنى قررت ذالك لالتفت لحياتى التى اهملتها

وشغلى وبيتى ومذاكرة الفرنساوى وحاجات كتير جدا

هتوحشونى جدا جدا ومش هقدر انسى صحبتكم ابدا وهفتقدكم جدا جدا

سلامى للجميع

صديقكم دوما وليس يوما

http://www.youtube.com/watch?v=b0rIieQpy2k

تم تعديل 12 مايو 2010 بواسطة joo

[الباشمهندس ياسر]

خلي بالك ع حالك يا جو

[الباشمهندس ياسر]

الي المشرف الذي مسح مداخلتي ف الرد ع مكاوي

المشكلة اي تعبان و داخل ف دور اكتئاب حاد و مش قادر حتي اجمع افكاري و اعرف اجي اتخانق معاكم

انما ببساطة تامة ... انت فهمك ع قدك

كفاية كده

[أسد]

الي المشرف الذي مسح مداخلتي ف الرد ع مكاوي

المشكلة اي تعبان و داخل ف دور اكتئاب حاد و مش قادر حتي اجمع افكاري و اعرف اجي اتخانق معاكم

انما ببساطة تامة ... انت فهمك ع قدك

كفاية كده

الحقيقة أنا مش عارف إنت قصدك على مين من المشرفين ..

بكل تأكيد من قام بحذف المداخلة له في تقديره مايبرر ذلك ..

لكن ما أعرفه أنك شاب في مقتبل عمرك ..

ولا يجوز منك .. أن توجه مثل هذا الكلام لأي من المشرفين وأن تقول له "فهمك على قدك" لأن أصغر مشرف بكل تأكيد هو أكبر منك عمراً ..

وأعلى منك وظيفة بكل تأكيد ..

ومن غير المقبول أن توجه هذا الكلام لأي شخص كان

أما مسألة الفهم على القد .. فهذا حقيقة بكل تأكيد ..

فكلهم "قدهم" قدرهم .. أعلى بكثير من أن تدركه ..

مرة أخيرة ..

لن يكون مسموح لك بأن توجه مثل هذا الكلام لأي من فريق المشرفين ..

أو لأي شخص من الأفاضل أعضاء المحاورات ..

أما كونك داخل على دور إكتئاب وتعبان ..

يمكنك البحث في دليل الهاتف عن طبيب نفسي يكون له المقدرة على علاجك وإعطاءك الدواء المناسب .. بدلاً من أن تخرج مشكلاتك هنا ..

أسد

[الباشمهندس ياسر]

كتبت ردا و لكن الادارة الكريمة قامت بحذفه

شكرا حد النهاية فقد اثبتم ان العالم الافتراضي الذي نعيشه هنا لا يختلف كثيرا عن العالم الذي نحياه ف الواقع

بل ربما كان الواقع اهون .. ففي الواقع لن يجرؤ احدهم ان يتحدث معي بهذه الطريقة الكريمة

تحياتي

[الباشمهندس ياسر]

الي اعضاء المحاورات

هتوحشوني اوي

الي عادل ابوزيد

شكرا ع كل حاجة استفدت بيها في منتداك الكريم

الي ايمو

كل سة و انتي طيبة .. كنت احب اعملك موضوع تهنئة بعيد ميلادك .. بس النصيب غلاب

الي كتكوتي

ربنا دائما بيكتب الخير

[قلب ابيض]

الى كل حبايبى فى المحاورات

الحاضر يعلم الغايب

وحشتووووووووونى جدا

مفتقداكم بشده

دعواتكم :blink:

[mekkawy]

الى كل حبايبى فى المحاورات

الحاضر يعلم الغايب

وحشتووووووووونى جدا

مفتقداكم بشده

دعواتكم :blink:

عوداً أحمد

اسف

عوداً أبيض :lol:

[shiko]

إليهما ....

وأعتزلكم وما تدعون من دون الله وأدعو ربي عسى ألا أكون بدعاء ربي شقيا

خلص الكلام...

تم تعديل 14 يونيو 2010 بواسطة shiko

[shiko]

....يا أمى ...

هل هذه الدنيا ظلام فى ظلام مستمر .؟؟؟

مدى لى يديك عسى... يزايلنى الضجر ....

امشى اخاف تعثرا ....وسط النهار أو السحر

لا اهتدى فى السير ان طال الطريق وان قصر ....

امشى احاذر ان يصادفنى إذا اخطو خطر .....

والارض عندى يستوى منها البسائط والحفر ....

هل فى جماد من نظر ؟؟؟

يجرى الصغار ويلعبون ويرتعون ....ولا ضرر...

الله يلطف بى ويصرف ما اقاسى من كدر

رسالة مقتطفة ....

تم تعديل 10 يوليو 2010 بواسطة shiko

[لماضة مصرية جدا]

إلي....

ربنا يملي كل ذرة في حياتك

راحة بال....

فرحة...

سعادة....

نور....

حب....

طاعة....

هنا....

شقاوة.....

حنية....

مغفرة....

سماح....

بركة

ربنا يبعتلك منين ما تكون شعاع نور....

ينور سكتك....

يملي حياتك يقين...

هنتسابق ع الجنة....وعد

في أمان الله

[shiko]

إلى ذلك البيت الجميل

ذو الشبابيك الزرقاء ...

...والستائر ..البيضاء....

إلى بيت المصريين ...

محاوراتى ...بيتى الدافىء...

كل سنة وانتم بخير يا اهل البيت

[shiko]

إليه ...

...تهاجمنى فى احلامى ....

تكتسى الاماكن برائحتك ...العفنة ...

تبدوا على هيئتك القديمة لا تعديل ولا تغيير ...

محـــــــــــــتال ....

اما بعد ...

هل تنوى الاحتيال على احلامى ...بعدما استوليت على واقعى ...؟؟

تم تعديل 14 سبتمبر 2010 بواسطة shiko

[خالد شحاته]

الي ابي رحمة الله عليه

ما اقدر أنسى ابدا من حملت أسمه..... ولن انسى أبدا من أعطاني الحب والحنان والعطف....ومابنسى أبدا صاحب القلب الكبير....هو من علمني الصدق...وكيف احب الناس وكيف اتعامل معاهم

.... الى أغلى انسان......

ابوي الله يرحمك

تذكرتك هي والله تذكرت وكل يوم في بالي ...ذالك اليوم....الذي اسميه اليوم المحزن..يوم كنت

ناايم ولا تقدر تتحرك من مكانك ..كنت ما تقدر تتكلم بس تنظرلنا ونحن

نظر لك وعيني تدمع ودموعي كلها ع صدرك .. وفي هذه اللحظه عرفت

اني مابشوفك مره ثانيه وكان الكل يكذب عليه ويقولو هو بس تعبان بيرقد له كم ساعه

ومن غفت عينه ثواني عرفت انه بيروح مكاااااااااااااااان بعيد ومستحيل يرد لي....وألتفت

من ورايه ومن حولي اشوف الكل يبكي امي اخواني خواتي .. وكانت دموعي تنزل علي وجهي ما عرفت اعمل ايهفي هذه الساعه

..الاني كنت أتمنى اكووون بدالك في الفراش وانت اللي تبكي عليا .

..ما نقدر نقول غير الا انا لله وانا اليه راجعون.....

ابوي الغالي ...<<<(( الله يرحمك ويغمد روحك الجنه ))

كنت اتمنا اذ احتجت شي ألجا اليك يا غالي

كنت اتمنا لو توقف بجانبي اذ كنت في مصيبه

وكنت اتمنى تشوفني وانا البس بدله فرحي ودموع الفرح في عيونك

كنت اتمنى لو ارتمي في حضنك جزء من الثواني وتشل عني الهموم والاحزان عني

كنت اتمنا اذ مرضت اراك فوق راسي وتشوف حالي

كنت اتمنا وجوووودك اكثر من غيابك عني

ولكن.....

ما اكتملت فرحتي في دنياي والقدر كان مكتوووب لك ....

تراك في القلب ..... وما بنسااااااااااك طوول عمري وانا عايش في الحياه

[لماضة مصرية جدا]

أنا آسفة و الله

انا عارفة ان حضرتك مش هتقري الكلام ده

و خايفة اصحي الصبح مش الاقيك

مش هتبطل سفر بقي

ياأغلي الناس

مفتقداك

واحشني

واحشني

واحشني

واحشني

انت عارف اني عنيدة....و بزمجر....انت دايما تقول عني كده

بس اكيد برضه انت عارف اني زعلانة منك...عشان بحبك.....و سفرك....بيحسسني انك بتتخلي عني

بصيت عليك و انت نايم

انت نايم بدري كده ليه؟؟؟

كنت هصحيك و اقولك كلمتين

انا اسفة

بحبك

و احتمال.....اقول حقك عليا

و هطفي النور وامشي

انا هفضل صاحية.......بس خايفة عيني تنام و اصحي الاقيك برضه سافرت

بتفكر فيا و انت مسافر

بوحشك

بتدور عليا

أنا بس.....مكبرتش ......و الطفلة اللي انت فاكر انها كبرت و بقت بتفهم.....مكبرتش...و مفهمتش غير حاجة واحدة بس

وحشتني

يا بابا

انا هفضل....و عندي يقين....هتسامح....عشان انت اكيد بتحبني....صح؟؟